رواية العروس في الثوب الاسود الفصل السادس 6 بقلم عبير ادريس

 رواية العروس في الثوب الاسود الفصل السادس 6 بقلم عبير ادريس

خالو يباوعلها ويرجف

زهرة: خير ان شاءالله شصار الولد بيهم شي حسام ثائر ؟

محمد: لالا مابيهم...

يحجي وايده ترجف رجليه ما يكدر يوكف عليهن..

زهرة: لعد شكو احجي مو نشفت دمي يارجال ..

عمة كعدت بالكاع من الهبطة 

زهرة: يايمة رجليه ما تعيني بعد احجي عاد..

فاتحة عيوني واباوع على خالو اريده بس يحجي ، بلع ريكه وكال..

محمد: جنا كاعدين  بباب المحل اني وصادق وحسام 

وبدة خالو يحجي التفاصيل.....

صادق: حسام بلكت تجيبلنل لفات من ابو رافد شو جعت محمد تريد ؟ 

محمد: اي والله ياريت ..

حسام: اجيب اربعة كافيات ...

صادق: شدعوة على لفة لفة ومن نريد ندز بعد..

حسام : صار عمي تتدلل 

  كاعد احجي وية صادق واشوفلج  وحدة واكفة يم محل يبيع حلويات يبعد شوية عن محلنا  الشعر طالع وهذاك اللبس اللي يخزي استحي اباوع عليها هالكد ما لبسها فاضح باوعت لصادق وكلتله..

محمد : والله هاي الدنيا صايرة مدري شلونها شوف الناس بدال ما تتعض تعصي ربها قاطات .

صادق: شكو شبيك المن تقصد ؟

محمد : شوف ذيج البنية شلابسه معقولة ماعندها اهل هذا الي وياها ما شافها من طلعت ؟ هيج شاد كرون ستيل ..

صادق: وينها ؟

محمد: هذيج كبالك ..

صادق: هاي ام شعر الاصفر ؟

محمد: اي هي

صادق: شعلينا بالعالم غض بصرك عنها..

محمد: لايابة شعلينا بس اول مرة اشوف وحدة هيج لابسة لبس وتفتر عادي بنص الزلم ..

صادق: اني شايف اشكال مثل هاي وبعد اضرب شتحجي انت؟ 

محمد: اي عيني انت رجال كله سفر ودول طبعاً تشوف اشكال مثل حظي حدي للسوك وارجع...

باوعتله صفن على البنية شو هذا كوم واسحب بوري من المحل واركض تخبلت  ركضت وراه واشوفه لازم واحد ودك بالبوري على راسه وعلى ظهره والبنية الجانت وياه انهزمت  كوة خلصناه جان مات الولد بيده

كعدت يم الولد اكلب بيه اشوفه بيه روح لو مات  رفعت راسي ادور على صادق ماكو ركضت مثل المخبل ادور عليه 

سألت الواكفين عليه كالوا لحك هاي البنية اللي جانت هنا كمت اضرب على راسي شلون بيه هذا وين راح وكفت تكسي وكلت ارجع للبيت اشوفه خاف رجع  بعدني ببداية الفرع واشوف سيارة شرطة بباب بيت مرته اخذوه صادق وراحوا من اركز زين الكى نفسها البنية اللي جانت وية هذا الولد بس مدميها و كاعدة بالكاع ويمها هوسة نسوان ..

زهرة: يايمة تعزينا وتصخمنا يعني شنو جانت شجن وية هذا الولد اللي ضربه صادق ؟ يايمة راح صادق انسجن من وراها؟ 

محمد: والله ما اخليه ينام ليلة وحدة بالسجن راح اوكل احسن محامي واطلعه 

اريد استوعب الحجي اللي يحجيه  خالو ماكاعد يدخل بعقلي  كمت ابجي بقهر عفية بابا شوكت ترتاح جبت عمرك تعب بتعب .

ورا شوية  دخل حسام صاير دم كام خالو من الكاع وكف يمه...

محمد : ها شصار احجي عمك منو بلغ عليه ؟ شلون وصلت الشرطة بسرعة..

حسام:شجن بلغت اول ما رجعت للبيت 

بس عاشت ايده عمي شلون خابزها يضرب بيها واكله بعد اريد يبرد كلبي بنت الكلب ليش تخاف؟ وحدة صلفة ترادد الكلمة تردها بعشرة تكوله هذا الموجود يعجبك ما يعجبك الا اخليك تمشي ومدنك راسك..

محمد: والولد مات لو بيه روح؟ عفته بعد ما ادري شنو صار  ...

حسام: عساه ميت والله عمي قصر ما فلع راسه نصين  اخ لو ملحك عليه الا اشوف نفسه انكطع يلا اكوم منه ..

زهرة: اي عفية اي ضيع نفسك هيج اريدك سبع ...

عمة تبجي وتضرب على رجليها ..

حسام: شتريدين لعد اباوع على عرضنا تفرفر وية الزلم واسكت ما تكليلي منين هاي الزبالة جبتيها لعمي شكد كلج ما اريد اتزوج لا الا تتزوج الا تتصخم دعوفوه للرجال هيج احسن انفضح بالمنطقة وهسه اخذته الشرطة ..

كمت ابجي بصوت عالي واصيح اريد بابا معلية احجي واضرب برجلي بالكاع .

تقرب مني حسام وخلى ايده على حلكي ..

حسام: سدي حلكج شنو هذا  العياط مالتج منا الناس طفلة خوما طفلة ...

رسيل: اي طفلة اني طفلة اريد بابا وخر عني اني بيا حال و تكولي صوتج ومنا العالم بابا راح بعد ما يرجعلي .

حسام: لا تتفاولين هسه نروحله للمركز وان شاءالله ماكو شي كافي ..

اخذني لحضنه ضليت ابجي واشهك كام يمسد على شعري ويحجي بصوت ناصي..

حسام : كافي والله اليوم ينام يمج  بالزايد باجر الصبح .

محمد: حسام اذاها هواي ؟

عافني واندار على خالو .

حسام : المن ؟

محمد: شجن 

حسام: طبلها بالبوري وانت تخيل الوضع كسرها تكسر بحيث امها وكعت على رجله  باستها حتى يعوفها وهو فاقد ما يحس ، اللي خبلني هذا عمي الهادئ منين اجته هاي الاعصاب ما ادري ولو اللي ينحط بهيج موقف اكيد ردة فعله تكون هيج واقوة بعد...

زهرة : وشنو راح تسوون؟

محمد: اروح اسأل على محامي زين وبلكت الله نطلعه بسرعة..

حسام: يابة ترى اهل الولد كاعدين بمنطقتنا وناس زايعتهم الكاع وعندهم الكتل بفلس لازم نطلع عمي منا اول ما يطلع من السجن..

زهرة : يبو يبو هاهي راح بيها الرجال كله صوجي اني رحت وجبرته عليها هو اعتمد علية شمعرفة بالناس اخ يا حظك ياخوية..

هم يحجون واني اباوع عليهم واسمع اريد اوكف بعد ما اكدر رجلي ما تعيني وكعت بالكاع وما حسيت الا وعمة تغسل بوجهي وكلهم واكفين على رسي ويباوعولي بقلق باوعت لكيت نفسي نايمة على القنفة...

حسام: ها جبانة ؟ ليش هيج مابيج خير بسرعة توكعين بس اذا منا وجاي اي شي يصير وهيج توكعين واني اشيل ضعفيها لروحج عوفي التشاريب حتى اكدر اشيلج مو هديتي حيلي 

زهرة: اسكت حسام وكت شقاك هسه خلي نشوف البنية شبيها شبيج ماما احجي ليش هيج خربتي ما ماكلة مو ؟ 

هزيت راسي بلا

زهرة : ولو من وين تجي المشتهاية الله يعينا على اللي صار..

كمت  احجي وابجي..

رسيل : خاف يكتلون بابا والله ما اتحمل  اذا صار بيه شي لا سامح الله اموت روحي ما اريد اعيش بعد..

محمد: شحدة اللي يمس منه شعراية والله اقتله خلاص واحسب الله ما خلقه..

زهرة: هاهي صار كاتل ومكتول وراحت زلمج يازهرة 

كامت تضرب على راسها.

حسام: شبيجن وحدة توكع والثانية تلطم ترى الرجال محبوس ما مات شو يابة كوم نروح نشوف حل لعمي احسن ما نكابل النسوان كعدتهم تكصر العمر .

محمد:اي والله يا ابني امشي يلا...

راحوا خالو وحسام واحنا بقينا بالبيت نفتر بين الهول والطرمة للأسف الوقت ما يمشي مرات من الخوف والقلق نحسه ثكيل اثكل من المصيبة نفسها صارت ساعة ١٢ ومحد بين بالوحدة ونصف اندك الجرس كمزنا نتسابق على الباب فتحناها دخلوا خالو وحسام.

زهرة : ها بشروا شصار وصادق وين ليش ما اجى وياكم ؟

محمد: انطي صبر يامرة خلينا  نجر نفس.

دخلوا جوة ركضت جبتلهم مي ..

زهرة : يلا عاد احجي.

باوعلها جر نفس وكال..

محمد: رحت لمحامي دلوني عليه كالوا كلش زين حجيتله الوضع كله ،طمني وكال القضية بجانبكم وان شاءالله ربحانة بعدها رحنا للمركز حاولنا نشوفه ماسمحولنا المحامي كال باجر اني اروح واخذ اذن للمقابلة  ويصير خير . 

زهرة: ياربي خير يارب..

ضلينا الليل كله ننتظر بقلق شوكت يجي الصبح وصار الصبح واحنا كاعدين وبس صوت البجي مالتي مسموع الكل ساكت اباوع على ريناد هادئة من سمعت بالحادثة ماحجت اي شي سكتت وهو هذا طبعها ما تنطي ردة فعل حتى من ماتت ماما تبجي من تختلي بنفسها ما تبجي كدام احد .

صارت ساعة عشرة الصبح وراحوا خالو وحسام للمركز حسب الموعد اللي حدده المحامي ورا ربع ساعة اندكت الباب رحت فتحتها واشوف بابا حبيبي ركضت حضنته وابجي طلعت عمة تهلهل وتهوس بالطرمة ..

زهرة: حمد لله على سلامتك والله متنا خوف عليك

صادق : الله يسلمج ام حسام رحم الله والديج

زهرة: لعد وين الجماعة ؟

صادق: منو ؟

زهرة: محمد وحسام اجوي للمركز ..

صادق: ماشفتهم !

زهرة: لعد شلون طلعت اجوي وياهم المحامي..

صادق: ما اعرف 

زهرة : شلون افرجوا عنك احجيلي ؟ 

صادق : حجيت الحادثة كلها للضابط وتعاطف وياية حتى كالي حرامات لو كاتلهم .

بعدنا نحجي وسمعنا  صوت السيارات بباب بيتنا ورمي قوي على البيت 

بابا عاط بينا وكال فوتوا جوة اجوي غدر ، كمت اصيح ومجلبة بتيشيرت بابا اخاف اعوفه ويطلع عليهم ركضنا جوة وسدينا باب المطبخ وصوت الرمي مستمر ورا عشر دقايق من الرمي هدأ  سمعنا شخطت السيارات بطريقة مفزعة..

صادق: راحوا ولد الكلاب 

بابا هد ايدي  ويريد يطلع حضنته قوي وصرت كباله حتى امنعه من الطلعة

رسيل: وين رايح عفية  اخاف واكفيلك لا تطلع حبيبي انت

ابجي واتوسل بيه حجى بنفاذ صبر...

صادق: رسيل وخري من كدامي ترى واصله حدها..

رسيل: ما اوخر والله .

اجتي ريناد هم جلبت بيده وعمة زهرة تتوسل يلا كعد على الكرسي اللي بالمطبخ وخلى ايده على راسه .

ورا شويه اندكت الباب كام بابا صرخنا اني وريناد.

صادق: شطلعت هاي وخرن من كدامي واللي اسمعها تتنفس والله اطلع ظيم گلبي بيها ما اسمع صوت يلا طبن جوة .

جرني من ايدي وخرني من باب المطبخ وطلع واني املخ بوجهي من الخوف فتح الباب فاتوا  خالو وحسام وجوهم ما تتفسر مصدومين من اللي صار طلع بابا حتى يشوف الرمي على بيتنا لان مبين مو على بيت جدو 

ورا شوية فات و كلنا كعدنا بالهول .

محمد: شفتهم ولد القنادر كاتبين على بيتك مطلوب دم 

صادق: اي شفت ..

محمد: والحل ؟

صادق: ما اعرف خلي ارتاح شوية وافكر راسي راح يطك ام حسام كلاص جاي بلا زحمة عليج

زهرة: صار صار هسه كايمة اسوي 

صادق: سالمة خيتي راح انام بغرفة حسام لحد يكعدني 

دخل بابا نام وكلنا صافنين على وضعه ،  تغير عبالك شخص ثاني مرات اكو اشياء تصير للأنسان تغيره للأحسن ومرات لا تحوله لشخص كاسر خصوصاً اذا جانت هذه الأشياء تخص سمعته بابا انكسر وكسرته جبيرة حيل وينراد وقت يلا يتعافى منها 

مر اسبوع واحنا بحالة ترقب وخوف خالو حبيبي تعب و اكله قليل ماينام لازم حراسة على بابا خاف يطلع وحسام كذلك ما يخليهم يوصلون الطرمة كم مرة صارت هوسة بين بابا وخالو وتنتهي كل واحد يكعد بمكان حياتنا انقلبت رأسن على عقب ، بنهاية الاسبوع اندكت الباب طلع خالو صاح منو .

اني حجي ابو ناظم .

محمد: يا هلا بالحجي تفضل ..

_ لا بويه جاييك بجلمتين ورايح ..

محمد: أأمرني حجي ..

_ ما يأمر عليك ظالم اني جاي من طرف بيت ابو سالم ودزولكم خبر بيدي .

محمد: شنو شرايدين ؟

خالو يحجي بأعصاب تلفانة

_ يكولون الكم  عطوة ثلاث ايام واذا ما حولتوا يمهم يرموكم واي واحد يطلع من هذا البيت يعتبروه مطلوب ...

طلع بابا وارتفعت الاصوات كل واحد يحجي شكل الى ان راح الحجي ودخلوا جوة بابا خشمه طك دم ، عبالك بوري وانفتح ركض حسام جاب خاولي خلاه على خشمه صاح خالو..

محمد : جيبوا جهاز الضغط ..

رحت ركض جبته اخذه مني قاس ضغط بابا طلع العالي ١٨...

محمد: زهرة بسرعة عصير ليمون ..

ركضنا اني وعمة وحدة تنضرب بالثانية هي تكولي وخري اني اسوي واني اكلها لا اني اسويله راحت عمة١ يمهم واني سويتله وجبته اخذه حسام .

حسام: خليتي شكر لو لا ؟

رسيل: اي خليت ..

كام يصيح وينتر بية  

حسام :  شبيج ثولة ؟حرام اذا تدبرين شي هاج يمه سوي غيره على السريع ..

راحت عمه جابت واحد ثاني وشربوه لبابا ورا شوية انكطع الدم غمض عيونه ونام...

محمد: اطلعوا برا وسدوا الباب...

طفينا الضوء وطلعنا ؛ بعدها رجعت على كيفي گلبي ما ينطيني اعوف بابا بهذا الحال واسمع خالو يحجي وياه 

محمد: صادق اكعد اعرف بيك ما نايم..

صادق: هممم 

محمد: شوف خوية بالله عليك راح احجي بدون انفعال اسمعني للأخير وقرر ذوله ناس شرانيين وشفت شلون رموا البيت وحبسونا اسبوع بيه كأنه مساجيت صمون ما نكدر نطلع نجيب.

صادق: انت صوجك خايف وحابسنا من ورا جوكة جهال..

محمد: خوية جوكة الجهال  اللي ما عاجبيك طبعهم الغدر يغدرون ما يجون بالوجه اني ما خايف على نفسي بكدما خايف عليك وعلى البنات وآران وحسام وثائر كلشي توقع يضربون اي واحد في سبيل يحركون گلبنا مو شرط انت تكون مستهدف ..

صادق: المطلوب مني شنو ؟ شسوي ؟ 

محمد: نخابر على اخوانك وابوك..

كام بابا من مكانه وحجى بعصبية 

صادق: شوف محمد هذا الحجي تسده وراح اعتبر نفسي ما سمعتك ودير بالك تخابر من وراية  قسم بالله لساني ما يطخ لسانك.

محمد: والحل شنو منين نجيب عشيرة ونروحلهم خوية اني وياك وحدنا ما النا ظهر وهاي شوفة عينك  ماعندي احد غيرك انت وعلاء لا اخوان لا ولد عم بيهم حظ ونحتمي بيهم وحتى لو عندي ولد عم صدكني ما يجون محد يورط روحه ناس تخاف وتتجفى الشر .

صادق: وان يكن ما ادز عليهم اروحلهم وحدي .

محمد: انت مخبل وتروح وحدك حتى يرموك هم من دزوا خبر معناها يريدوها عشاير وانت عشيرتك تسد عين الشمس بس أشر يجوك ركض الله يخليك فكر لخاطري هالمرة اسمعني لا تسمع نفسك..

نصى خالو على راس بابا وباسه يريده بس يوافق ..

صادق: افرض خابرتهم من بعد كل هاي السنين شنو ايد اكللهم شلونكم اخوتي تعالوا لحوكني زوجتي خانتني وية واحد بنص السوك ضربته وخليت دمه بطوله ويريدون مني فصل انت فكرت بيها لو بس حجي وخلص .

محمد: فكرت وفكرت وفكرت صارلي سبوع يخوي مانايم بس ماكو غير حل اني لو علية من اول يوم اللي رموا بيتك اتصل عليهم صدكني من يشوفون عندك ظهر يخافون ويهابوك مو هسه وحدك وظهرك مكشوف الهم ..

.

صادق: صعبة يا محمد صعبة راح اموت بقهري هاي بنت الكلب هيج تسوي بية والله حتى مالي عين ارفعها واخليها بعيونكم وانتوا اهلي عاد الغربة اذا طلعت ويأشرون علية هذا اللي خانته مرته ولزمهم بالسوك والله اذا اسمع هيج كلمة واني متوقع اسمعها الا اطك واموت من قهري .

محمد: صح صعبة بس مو اصعب من الجاي ، الجاي عبارة عن ثارات ودم وشي يجر شي وكلنا نروح بالرجلين،  ابوك شيخ عشيرة وكاعد بدواوين ويعرف بهاي السوالف ، اذا يجي يفرهم فر كم مصيبة صارت هناك ويدزون عليه ويحلها اسمعني بس هالمرة وما تخسر.

سكت بابا وجر نفس طويل وكله جيب التلفون كام خالو باسه براسه وعلك الضوء شافني واكفة ..

محمد: اني مو كلت الكل يطلع شعندج هنا ؟

رسيل: كلت خاف بابا يحتاج شي وما طلعت .

محمد: وخري وخري شلون جيل ما يسمع الكلام وصلف .

ما اهتميت للحجي اهم شي عندي بابا والباقي مو مهم وخالو اصلاً اعصابه تعبانة مو مال اخذ بكلامه واعتب عليه 

اجى خالو جايب التليفون شكله بالفيشة مال هول وطلعني برا خابروا على بيت جدي وماعرفت التفاصيل شنو ...

ثاني يوم ساعة ٢ الظهر اندكت الباب طلع حسام فتحها ودخلت زلم مسلحة تسد عين الشمس اني وعمة وريناد نباوع من الشباك على الطرمة حجت عمة

زهرة: ماشاءالله شوفي شكد جاييين ..

رسيل: كون يحلوها النا مو بس عدد ..

زهرة:  جنتي صغيرة وماسامعه بالكعدات مال جدج شلون يحلها ويسد حلوك الكاعدين محد يحجي بعد حجايته .

دخل بابا للمطبخ وكال..

صادق: ام حسام راح نتعبج هاليومين بس ماعندي غيرج .

زهرة: عيوني الك ابو رسيل ما اعرف شسوي واكفر عن ذنبي وياك

صادق: ما الج ذنب خوية قابل تعرفين العالم عوفج من الراح اريدج تسوين جاي تنزلين الكتلي الكبير (قوري)

كم واحد عندنا بالمخزن ؟

زهرة: اربعة..

صادق: كلش زين هسه اصيح حسام ينزلهن وياج وحضروا الجاي علما يكعدون الزلم..

دخل خالو وسمع الحجي 

محمد: يا جاي رحمة لأهلك طريق ستة ساعات السيارة تدك بيهم غير نصب غداء هسه العالم تاكل وجوهنا

صادق: صدك نسيت ليش ضل عقل براسي...

محمد: اطلعلهم يريدوك وما عليك بهاي السوالف اني ادبرها..

صادق: مالي عين   

محمد: لا تصعبها بايك ناهب العيب عليها وانت ماسكتت اخذت حكك وهسه احنا ناخذه قاط لاخ امشي رافع راسك واتذكر سوسن وبس هاي انساها 

بعدهم يحجون اندفع الباب ودخل رجال كبير بالعمر بس بعده بحيله قوي البنية رغم سنه كلنا سكتنا اباوع على بابا شفايفه ترجف وعيونه دمعت فتح ايده الحجي معناها تعال احضنك

ركضله بابا يبجي وابوه يبجي التقوا من بعد فراق ١٥ سنة تعالت اصواتهم بالبجي والحسرة على السنين الضاعت من عمرهم وهم بعيدين عن بعض 

موقف حيل مؤثر كلنا بجينا على بجيهم ...

لهناك دخل شاب ضخم اسمراني لابس دشداشة سودة وغترة لافها على راسه ماشفت عيونه لابس مناظر شمسية وشايل سلاح بيده وسلاح لابسه فوك الدشداشة شكله مثل الحزام جوزي اول مرة اشوف هيج لبس اول مادخل شافنل وصاح ياالله .

عمة زهرة لابسة حجاب كامل بس اني بدون حجاب وبملابس البيت  رجع صاح ياالله كلت هذا شبيه كاعد يدعي بالمطبخ خبصنا خبص بصوته العالي لو يفوت لو يبقى برا بهاي الاثناء اجى حسام وكف بصف الولد اسمعه يكوله..

_ فد سوي طريق اريد احجي وي عمي وحدنا ..

التفت حسام شافني طب يركض علية جرني من ايدي لغرفة خالو سد الباب ولزمني من زندي حيل..

حسام: ثولة و غبية فاهية لو احجي حجي اثكل بعد ..

رسيل: شكو شمسوية اني بس تغلط وتعيط شبيك ايدي راحت..

حسام: ما تشوفين الولد واكف بباب المطبخ ويصيح ياالله شكو متبسمرة بمكانج .

رسيل: شسويله اذا هو ما لكى مكان غير بالباب يدعي .

حسام: لج صدك ثولة شيدعي من اكلج ثولة تزعلين من كال ياالله معناها يريد يفوت جوة ..

رسيل: وما يفوت لازمتله جفجير لو عوده ماسحة بيدي لو كزة يريد احد يدليه.

حسام: شوف شلون لسان  لا عقل ولا فهم وبس بالمرادد استاذة 

رسيل: حسام هسه شرايد ..

حسام: من تشوفين اكو ولد غربة ليش ما تلبسين حجاب واصلاً شعندج واكفة بالمطبخ اريد افتهم...

رسيل: والله اني واكفة في امان الله وهو طب شسويله؟

حسام: باعي لا اهدد ولا احجي ولا اسويلج شي لان اعرفج تعاندين وتسوين العكس بس احلفج بروح امج ما اريدهم يشوفوج شنو تريدين اجيبه الج لهنا بس لا تطلعين والله اضل قريب عليج واذا ماموجود دزي اي احد علية اجيج ركض.

رسيل: لا ما اطلع لايضل بالك . 

حسام : اكيد رسيل ؟ 

رسيل : اي اكيد..

حسام : ماشي ..

راح حسام واول مرة اشوفه هيج خايف بس من شنو ما اعرف.

صار الغداء جابلي ماعون تمن وعليه دجاج مبين من برا الاكل تغديت وضليت وحدي تالي اجتي ريناد كعدت يمي .

رسيل: هاا شعجب اجيتي؟

ريناد: لكفني ابن خالج وكالي روحي يم اختج لا تضلين بنص الزلم ..

رسيل: ليش وين جنتي ؟

ريناد: اخ گلبي لج جنت بالمطبخ صافنه على ولد العم يبووو يخبلون شكلهم الا اشرد...

رسيل: لج شنو هالحجي وشنو اشرد منين متعلمتها وبعدين ما تستحين تباوعين عليهم هسه شيكولون عليج ..

ريناد: مايكولون لان مايباوعون مؤدبين شلون بية جعت اريد اتغدا راح اصب واجي ..

رسيل: متأكدة تتغدين؟ لو رايحة على غير شي اختي واعرفج..

ريناد : اتغدا طلعتي اتعس من حسام ثنينكم قنقينة(اللي ينك هواي) .

كمت فتحت الباب اجى حسام ركض عبالك منتظرنا خطية هالولد والله..

حسام: ها رسيل ..

يحجي ويباوع منا ومنا ..

رسيل: ريناد تريد اكل اذا ما تصير زحمة عليك جيبلها ماعون 

حسام: عايزة تاكلني بعد لج تغدت مرتين كل شوية وجاية للمطبخ تصب ماعون وتاكله وتطلع الا عطت بيها يلا اجتي لهنا رسيل لزمي اختج لا تنطيها عين هاي مراهقة واعرف بشنو تفكر .

رسيل: ماشي ..

فتت وسديت الباب شفتها واكفة وكالبة الخلقة عرفتها سمعت 

رسيل: اذا سمعتي الحجي احترمي نفسج واكعدي هنا بينما تفض السالفة عيب عليج تجي حجاية ناقصة لابونا من وراج

ريناد: صدكتي بيه هذا واحد مريض عايش بنصف عقل يتخيل وين اكو هيج حجي ؟ 

رسيل: هاا وعصافيرج الطايرات وتحجيلي بولد عمج..

ريناد : هو انتِ مال واحد يسولف وياج اصلاً زايدة مني حجيتلج...

رسيل: فعلاً زايدة اذا تحجين هيج حجي ماصخ بلاه احسن

عافتني ونامت ما عجبها الحجي صح اختي وعايشين سوى بس ما اعرفلها طبع صار الليل اجى بابا للغرفة  

صادق: بنات تعالوا سلموا على جدكم سأل عليكم بس لبسكم غيروا ..

رسيل: بابا هدومنا فوك ..

صادق: شو بله انداري امشي شوية مابيه شي ثوبج طويل 

كمت رتبت شعري كبال المرايا سويته ذيل حصان عالي ولبست شحاطتي  وطلعنا اني وريناد وياريتني ما طلعت شفت ثلاث رياجيل وجدي اللي بحياتي ما شايفته ولا سامعه صوته غير اليوم  وخالو وحسام وثائر اول ما فتت اجتي عيني على حسام اباوعله كام يرجف من الاعصاب خفت حتى اسلم عليهم من وراه..

صادق: امشي بابا هذا جدج ..

بوسته وكلتله هلو 

الجد : شني الهلو هاي شمعناها عود ؟

رسيل: لعد شنو اكول؟

صخنت خدودي صارن حمر من الفشلى احس الكل يباوع ويراقبني اريد اختفي من كدامهم وهذا جدي لازم ايدي مجلب بيها ..

الجد: كواج الله بنيتي انتِ ياهي منهن ؟

رسيل: رسيل 

الجد: ياهله برسل كواج الله تعالي احبنج ...

ضليت واكفة بمكاني شنو احبنج 

واحد كاعد بصفه اول مرة اشوفه جان يهمس .

_ دنكي يريد يبوسج الحجي الله يسلمه يحب يبوس ...

الجد: اسكت لا بارك الله بيك تشوفين هذا الحيال اسمه ياسر ابن عمج علي ابو مروان ..

وضاك (ذاك ) اسمه مروان الفحل الكبير .

هذا نفسه اللي شفته بالمطبخ بس هنا نازع النظارات

وضاك اسمه ايهم من بعد مروان ذول كلهم ولد علي .

التفتت الهم وكتلهم اهلاً وسهلاً ...

ردو بصوت واحد وخشن اهلاً بيج ...

الجد :تعالي اكعدي حدي( بصفي) التفت للولد كاله ..

وخر لك خلي البت تكعد ..

ياسر: صار حجي بس لا تنفعل...

كام وكعد مقابيلي...

اجتي ريناد بوسته لجدو.

الجد: وانتِ ياهي بيهن ..

ريناد: جدو اسمي ريناد ويدلعوني رنودة الدبدوبة ..

الجد: عيدي بوية هذا موش اسم لغز .

ياسر : جدي الناس تطورت غير انت بعدك على التحديث القديم .

الجد: وشبيه اسم حمدية وكرجية وغيرهن لو الا رنياد مدري ياهو ..

بضحكة كالت..

ريناد : والله ياجدو هذا احلى من اسمي بعد..

التفتت على بابا كالتله 

ريناد : غير اسمي رنياد والله احلى..

اني وحسام وثائر وحتى عمة مستغربين تصرفات ريناد شبسرعة ذبت ميانه كام حسام وصاح عمه راحوا للمطبخ ورل شوية عمة اشرتلي وهمست تعالي فتت للمطبخ واشوفه يكمز من الاعصاب .

حسام: ليش هيج دخلتي شكلتلج اني ما كتلج لبسي خ*** اذا طلعتي وشعندج اصلاً طلعتيلهم زين هسه من اكلوج اكل بعيونهم هذا الكلب ياسر ماشال عيونه منج اطب ادميه هسه واحول الكعدة يمهم .

رسيل: هم رجع عليه اني شكو انت من كلت لاتطلعين طلعت لا سمعت صوتي لا اجى بابا وكال صيحي اختج جدكم يريدكم وطلعنا 

حسام: ليش ما لبستي حجاب ما تدرين ذولة ماعندهم امرأة هيج تطلعلهم شفتيهم شلون صفنوا عليج متعجبين اللي تدخل بدون حجاب عليهم كأنما ما لابسة شي .

رسيل: والله انت عليك تخيلات وتسوي خوش افلام اذا تصير مخرج تطلع من جوة ايدك افلام الا بشدة..

حسام: رسيل اني دمي محروك واذا تضلين تحركين بأعصابي والله ثم والله اكتل واحد بيهم بسببج بس هاليومين اصبري تفض هالسالفة الكشرة الله يخليج وراها يولون ونخلص منهم

رسيل : صار والله هسه وين اروح ..

حسام: امشي اوديج لبيتكم ولاتطلعين منه ابد واخذي اختج الادبسز اني اعلمها على صلافتها بس افرغلها .

رسيل: زين سؤال وين باقي الرياجيل اللي اجوي اليوم ؟

حسام: رجعوا للبصرة بعدين افهمج من نروح للبيت بس امشي .

فات جوا و صاح على ريناد وطلعنا شكلنا يخرب ضحك مثل واحد مهزوم من عصابة وخايف يلزموه وصلت للباب وخفت اتذكرت الطلق انداريت على حسام

رسيل: اني نسيت بيتنا مايصير ندخله شلون خلي نرجع عفية

حسام: ماكو شي سالفة البيت فضت اليوم العصر وصبغنا الحايط شوفيه

رسيل : شلون سولفلي شصار ؟ 

حسام: خلي نفوت اول واحجيلج .

فتح باب المطبخ دخلنا وقفل الباب اباوع البيت كله تراب لان صار اسبوع متروك كعدنا بالاستقبال وطلبت منه يحجيلي...

رسيل : يلا احجيلي بالتفاصيل

من كلتله هيج صفن بوجهي وكال

حسام: ماكو رشوة حتى احجي ؟

باوعلي بمكر وتقرب علية 

رسيل: شبيك حسام شنو هالحركات لا تخليني اندم اجيت وياك ..

تقرب علية اكثر بحيث انلزك ظهري بالحايط بيني وبينه مسافة كلش قليلة اباوع عيونه ذبلت ارتبكت .

رسيل : وخر عفية..

حجيتها ودفعته 

حسام: اريد جاي حتى اسولفلج ...

اريد صوتي يطلع ماكو اختفى وضليت الوم بروحي شلون اجيت لهنا  صحت على ريناد تجي يمنا نزلت كعدنا بالمطبخ شويه امنت..

سويت الجاي وصبيتله وبعد ماسألته و ما اريده يحجي حس علية ضجت منه بدا يسولف حتى يزيل التوتر الصار..

حسام: هذا ابن عمج واحد مكار ومحد يكدرله ..

رفعت راسي وهمست..

رسيل: منو منهم؟

حسام: مروان غير طلع ضابط جبير بالبصرة واله وزنه هناك .

رسيل:  هااا وشسوه ؟ 

حسام: اول ما اجى كعد وية عمي وافتهم السالفة منه وكاله ....

مروان: عمي  ردت اكعد وياك ونتفاهم قبل لا نكعد وي الزلم انه من لميتهم بديوانه قبل لانجي ليجاي 

خبرتهم عمي واكع بمشكلة ومهددينا لان من غير طائفة ماردت اذكر سالفتك وتطش بالسلف اللي يدري بالحقيقة انه وجدي وابوي وايهم غيرنا محد يعرف..

صادق: بس السالفة مو هيج واني الكل يحبني هنا ومافديوم احد حسسني اني مو منهم ناس طيبين صارلي ١٥ سنة معاشرهم ماشفت منهم غير الخير...

مروان: اعرف عمي بس شنو اريد اكللهم ماكو غير هذا الحل .

صادق: وعمامك ؟

مروان: شبيهم ؟

صادق: يدرون بسالفتي ؟

مروان: فهمتهم حالهم حال الغربة لان اعرف محد يكض لسانه كبال مرته ومن واحد لواحد لنهة طاشة السالفة..

صادق: عفية عليك سبع ما انسالك وكفتك هاي..

مروان: عمي انه ما انكر فضلك علي من جنت جاهل علمتني وفهمتني الدنيا جنت اقرب من ابوي انت رفيجي قبل لا تكون عمي .

صادق: والنعم منك ومن تربيتك والله انت ابن حمولة يامروان .

مروان: الاريدة منك تروح تكعد بنص الزلم ورافع راسك وتكول قضيتي كيت وكيت ...

صادق: ومحمد كلتله بهذا الحجي خاف يحجي غير شي ؟ 

مروان: اول ما اجيت فهمته وكال تم ..

صادق: ريحتني الله يريح كلبك ...

كام ابوج حضنه ويبجي ..

رسيل: وبعدين شلون نحلت سالفى البيت ..

حسام: من بعدماصارت الكعدة ابوج فهم الزلم بالسالفة اللي اتفق عليها هو ومروان ودزولهم كم زلمة خشن ومشورب تكولين صكر واكف على حلكه مو شوارب هذولة جماعة مروان مو كرايب ويثق بيهم ثقة عمياء ، راحوا هم واسلحتهم لبيت ابو سالم كالولهم انتوا اللي مندكين بعرضنا وبنتنا كالت ابنكم يدري بيها مزوجه ومصاحبها هاي وحدة والشغلة الثانية دكيتوا البيت مال ابننا هاي وحدها عليها فصل وحجاية منا حجاية منا ذولاك كاموا يطكطكون تالي حولوا الكعدة يمنا وكالولهم من تجون تذكرون سالفة طائفية مو غيرها  ونطيناهم عطوة اسبوع وتجي الزلم هنا وراح ننصب جادر بالباب .

رسيل: يعني فروها عليهم حل..

صادق: هو هذا ابن عمج فد واحد لعبهم لعب .

صافنين على حسام من يحجي عبالك فيلم وكاعد نتفرج عليه شلون احداث عجيبة اندك الباب وسكتنا 

حسام: راح اشوف منو واجي لا تطلعون وراية زين ؟ 

رسيل : تمام..

طلع واحنا بقينا على كعدتنا طبت عمة زهرة تضرب على راسها وتصيح تعزينا وتصخمنا...

حسام: دومج تلطمين وتعزيتي وتصخمتي من ورا حجايتج هاي صدك تعزينا احجي على كيفج بدون لطم مو حتى گلبي خلص..

جرته حيل من هدومه ...

زهرة : ولك شلون تريدني ما الطم ومن وراك صارت عركة شكبرها وعمك تخربط وصعد ضغطه...

كمت من مكاني وصرخت..

رسيل :  بابا شبيه ؟ عفية عمة احجي 

زهرة: سدي حلكج مو جنتي مطمورة  بغرفتي شجابج هنا شجابج 

كامت تضرب على وجهها..

حسام: اوكفي فهميني اني شكو حتى من وراية صارت عركة شمسوي .

زهرة: من تدري عندنا خطار ومحد يعرف اطباعنا ولا يعرفون ميانتكم  انت وياهن ورابين سوى تاخذ بنات عمك من نصهم ليش وتجيب حجاية لأبوك ولعمك هااا ليش؟ 

انصدمت بالحجي ما كاعد استوعب شنو من بشر بكلشي يخلون انه...

رسيل: وشعليهم اجيت ببيتنا منو هم حتى يتحكمون بية اعرفهم يعرفوني؟ 

زهرة: ذولة ولد عمج ومادام ابوج صالحهم كلمتهم تمشي عليج وما تكدرين تسوين اللي يعجبج وتتصرفين على هواج ترى حاسبيج امرأة كبيرة مو عبالج طفله بعدج هناك بكدج متزوجات وكل وحدة عندها اثنين وتلاثة .

حسام: بس فهميني وحدة وحدة وعوفي رسيل مو خبلتيني شصار وشلون افتهموا اني والبنات طلعنا

زهرة: اول ماصحت على رسيل واجتك للمطبخ رحت كعدت يمهم شفت ايهم ومروان يتهامسون بيناتهم والخلق مگلوبة ومن انت اجيت صحت ريناد وطلعتوا مروان اشر لأيهم يلحكم وكام ايهم وراك ورا شوية طب وكاله لعمك ..

ايهم: عمي شنو حسام ورسيل مخطوبين ؟

صادق: شنو لا ما مخطوبين ليش تسأل ؟

أيهم: لا بس كاعد اشوف حسام هواي عنده ميانة وية البنات .

صادق: شتقصد ايهم ثمن كلامك من تحجي ..

ايهم: قصدي معروف عمي من بنية شابة وحلوة تطلع وية ولد شاب باليل وبالبيت وحدهم شمعناها شتفسرها انت ؟

هنا عمك صادق صار عصبي نار وكام على ايهم راد يضربه وكف مروان بيناتهم .

مروان: عمي حجي ايهم صح والصح ما ينزعل منه شابة حديثة ليش طالعة بهاليل .

صادق: ولكم هاي بنتي اني مربيها شكاعد تحجون انتم لا تخبلوني عندي ثقة مو بس بيها وبحسام انت تعرف رابين سوى من الصغر؟ 

مروان: والناس تعرفهم اقارب مو اخوان والناس عليها الظاهر والكلمة اللي تمس البنية تمس كل اهلها صح لو انه غلطان؟ 

الجد : انه مامرتاح لهذا الاطرم جنه يحبها للبنت ويلوب عليها.

ابوك كام يعيط عليهم 

محمد : شنو هالحجي عيب هم ابيتي وهم تتهمون ابني بالباطل..

هنا عمك وكع وضغطه صعد كله بسبب تصرفكم الغبي .

عمة تحجي ومستمرة  بلوم حسام اندفعت باب البيت دخل بابا عصبي  وقميصه بيه دم مبين خشمة نازف لزم حسام من ياخته ..

صادق: انت ماتفتهم ماعندك عقل سويتلي حجاية شكبرها بهاليل البنات شعليك بيهن وجبتهن هنا .

حسام: خفت عليهن شنو بنص الزلم كاعدات يفترن كلت هنا يباتن واني ابات بالهول قابل سويت جريمة

صادق: مو هذا خوفك اللي عم عليك وعلية وعلى البنات صارت مشكلة بسبب طيشك وقله العقل وسوء التصرف ،  بناتي وبكيفي اخليهن بنص الزلم احركهن يعودن الية مو الك لا انت حريص اكثر مني عليهن ولا تحبهن بكدي .

صارت مشادة كلامية بين بابا وحسام وكلمن يحس بروحه هو الصح الى ان دخلوا ولد عمي وجدو .

الجد: صادق اضن بيتك اولى نكعد بيه من بيت العالم خلهم  ياخذون راحتهم .

صادق: كل الهلة بيك حجي تفضل..

حجاها بتعب وبالكوة يجر النفس 

اباوع على ولد عمي علي لو بيدهم ياكلوه لحسام وهو  بعد اضرب منهم نظرات الحقد بينهم ما تتفسر..

راحت عمة جرت حسام جر ما جان يقبل يروح وبابا سد الباب وراهم 

صعدت فوك اركض مالي نفس اشوفهم بعد ولا اسمع اصواتهم شنو من عقل عندهم كل تصرف نسويه يخلون علامة اكس كدامة..

مرت ثلاث ايام واني فوك ما نزلت بس على كد الحمام واصعد ومن يطلعون مرات انزل بس المشكلة جدي يضل لان مابيه حيل يطلع يفتر على السريع ،  انظف واكمل كلشي واصعد فوك من يجون وما علية لا بغداهم ولا بعشاهم الظاهر  ياكلون برا لان ما يطلبون نسويلهم اكل لو مرات عمة تدز غداهم بيد بابا الى ان بيوم احتاجيت حمام باليل ردت انزل ومترددة لخاف اشوف واحد بيهم جنت لابسة تراك صيفي ونزلت على كيفي حتى محد يسمع دخلت للحمام وبعدين رحت للمطبخ ردت اسوي لفة جعت لان نويت انام بدون عشا بس ما صبرت..

فتحت الثلاجة سمعت صوت وراية  التفتت واشوف ايهم..

               الفصل السابع من هنا 

لقراءه باقي الفصول من هنا