رواية العروس في الثوب الاسود الفصل السابع 7 بقلم عبير ادريس

 رواية العروس في الثوب الاسود الفصل السابع 7 بقلم عبير ادريس

باوعتله وهمست...

رسيل: مضيع شي ؟

رفع حاجبه وكال 

ايهم: وياية ؟

باوعت منا ومنا وحجيت..

رسيل: اكو احد غيرك هنا ؟ 

ايهم : ممم معناها وياي الحجي المهم شنو تسوين ؟ 

رسيل: جعت وكاعد اسوي لفة ..

ايهم : ممممم بالعافية

رسيل : الله يعافيك

ايهم: رسيل 

رفعت راسي وهمست ..

رسيل : نعم 

ايهم : انتِ ياصف ؟

رسيل: رابع عام..

ايهم: ممم حلو وشلونج بالدراسة ؟

رسيل: زينة 

اسوي باللفة واحجي وياه بدون ما ارفع عيوني عليه..

ايهم : سؤال 

رسيل : جواب 

ايهم : ليش ما تنزلين من احنا موجودين للعلم ما ناكل بشر 

رفعت عيني شفته متكتف ومرتاج على اطار الباب..

رسيل: ما احب اختلط وية الغرباء..

ايهم:  فد احنا مو غربة ولد عمج وفوك هذا جدج ويانا بالبيت..

رسيل: بالنسبة الي غربة ما اعرفكم  ماصار كم يوم من تعرفت عليكم .

ايهم: تمام على كيفج ليش عصبية و احسج ضايجة ؟

رسيل: ما ضايجة متوهم ..

ايهم: طيب ليش تحجين بنتر؟ 

نفخت بنفاذ صبر..

رسيل: شتريد انت ؟ من وين طلعتلي لخاطر الله..

ايهم: ما رايد شي سلامتج بس اهم شي اعصابج تكون باردة وتكونين ريلاكس..

رسيل: شوية اريد افوت ...

باوعلي من فوك ليجوة جان يكول

أيهم: ليش هيج تفترين بلا حجاب مو تدرين بيت بيه شباب

رسيل: مو شغلك وخر 

ايهم: لا تشمرين بالحجي عيب من باب الأدب تجاوبيني بأدب مثل ما انه احجي وياج بكل احترام وما متجاوز عليج..

رسيل: شوف حتى ابرد گلبك وتروي فضولك المستفز اني مو محجبة وعادي ألبس هيج لبس وحتى اطلع بيه للشارع تمام هسه ممكن اروح انام، لو سمحت وخر عن طريقي..

ايهم: حتى لو مو محجبة المفروض ما تلبسين هيج لبس كدامنا عيب 

رسيل: اذا تستحرم غض البصر وبعدين كلت نايمين وبسرعة اصعد سويتها سالفة علية..

فتح اثنين ايديه وكال..

ايهم : وهذا انه كاعد وشفتج غير تنتبهين على نفسج ؟ 

حجاها ومال براسه لجهة اليمين

رسيل: منتبهة وشكراً لان نبهتني بالأكثر و مرة ثانية انزلك بعباية.

من حجيت هيج عدل وكفته وعكد حاجبه وكال

ايهم: شو تستهزأين لازم ماعاجبج الحجي؟ 

رسيل: ترى حرت وياك احجي تكولي تحجين معلك وما تحترمين اكولك صار تكولي تستهزأين .

ايهم: اي تستهزأين مبين من طريقة كلامج ...

رسيل: من تعرف استهزأ ليش متعب نفسك ومتعبني وياك اكولك اريد انام وهاي اللفة انت اكلها بالعافية عليك.   

خليتها على الميز دفعته من طريقي وفتت اجى وراية جرني من ايدي حيل التفتت عليه خزرته..

رسيل : ايدي وخر..

ايهم : من احاجيج جاوبي بأدب وبطلي صلافة عيب عليج افتهمتي

نتر ايدي حيل وراح للأستقبال 

صعدت نمت وحلفت ما انزل بعد الا يروحون مر الاسبوع بضيق وتعب علية ، اجى يوم الكعدة نصبوا الجادر بالباب والرياجيل كلها واكفة وشايلين اسلحة وكلهم لابسين  دشاديش زيهم هذا حتى بابا هم لبس مثلهم .

بهذا الاسبوع ما شفت عمة ولا حسام ولا حتى خالو ، عمة وجهها ثكل علية احجي وياها ترد بكلمة لو كلمتين وتسكت اني ما متعودة عليها هيج دائماً  نسولف ونضحك اجيت بستها بخدها وابتسمت..

رسيل: شبيج عمة حبيبتي مضوجتج بشي سويت شغلة ضوجتج مني؟ ليش ماتحجين وياية ترى اللي صار مو ذنبي وتعرفين كلش زين .

كامت تبجي وتمسح وجهها بالحجاب 

زهرة: يايمه ادري ما الج ذنب بس حسام كاسر ظهري من يوم المشكلة تعارك وية ابوه وعاف البيت وراح يم خاله بحي أور نخابر عليه مايقبل يحجي ويانا مقاطعنا ويحلف ما يرجع لهنا بعد اللي صار..

رسيل: عمة احتمال جبير ضايج من اللي صار خليه فترة يرتاح ويرجع للبيت لا تضغطون عليه واذا ما رجع اني اخابره واخليه يرجع .

زهرة: من خابرت على اخوية وكلتله يحجي وية حسام ويقنعه يرجع للبيت  يكولي حسام يكول اذا رجعت اكتل واحد خلوني هنا احسن الية والهم.

رسيل:حسام بس حجي تصدكين  يقتل واحد  هو اذا شاف حيوان بالشارع مدعوم يبجي عليه ..

زهرة:عقلي يودي ويجيب وحتى تفكير ما اعرف افكر بعد..

بعدنا نحجي اندكت باب المطبخ راحت عمة فتحتها  دخل مروان 

مروان: ام حسام بوية بلا امر عليج اذا كمل الجاي صبي وهسة ادز الولد ياخذونا

بعدها سكت والتفت عليه 

مروان : وانتِ لفيلج حجاب لا تضلين مفرعة للرايح والجاي حلاة البنية بسترها لو ما معلميج اهلج متيهيج .

حجى هالحجايتين بنتر  وطلع  حتى ما لحكت اجاوب هالمرة گلبي احترك ازيد ولمت نفسي ليش ما جاوبت وسكتتله..

رسيل: عمة سمعتيه شيكول هذوله شبيهم راح يخبلوني منين طلعلونا ساعة السودة اللي صارت هاي الشغلة وتعرفنا عليهم جنا مرتاحين وبابا يعرفهم شنو لهذا جان يكول خلوني بعيد عنهم ..

زهرة: وبعد وبعد الله يستر من الجاي ماطولهم ثبتو رجل هنا بعد هاهي..

رسيل: شنو يعني عمة يبقون رايحين جايين ويتدخلون بحياتنا ؟

زهرة: الايام تبين خلينا ما نسبق الاحداث بس الجاي ما يطمن 

جريت حسرة جبيرة اكبر من عمري بهواي..

فضت الكعدة والكل راح بقى بس جدي وعمي علي والولد دخلوا كعدوا بالاستقبال يحجون على الكعدة على اساس فاصليهم ١٠٠ مليون ولخاطر فلان وخاطر علان منزليها للنص بس بابا واكف بنص الزلم وكايل اني ما اريد فلوس ولا اي شي المهم محد يتعرضلنا وعائلتي تبقى بأمان هذا يكفي واذا صار شي علية لو على اهل بيتي انتم تصيرون كدامي ، كاموا بوسوا بابا وتشكروا منه ، جدي ضغطه صعد ماقبل على تصرف بابا وكام يحجي عليه..

صادق: بوية الفلوس اللي تجي بالغصب تحركنا واني ماجايز من بناتي وابني وشوفني خير من الله بيتي جبير وسيارة عندي وفلوس ، مامحتاج زبالتهم خليها على گلبهم .

الجد:  يا صادق ذول مايفيد وياهم غير كسران الظهر اذا ما يلجمون ما يمشون عدل هاي كرصة اذن الهم لو ماخذهن يا بوي .

صادق : انهانوا بوسط عشيرتهم وترزلوا واشكال الحجي سمعوا وابنهم تسكط ذاك مشمور شمرة الجلب الحاجتين جواه  لا يمشي ولا يعرف احد فاقد الذاكرة اكثر من هيج شتريد يصير بيهم بعد؟ 

الجد: وشناوي تسوي بالعربيد الاصفر .

صادق: ياعربيد ؟

الجد : مرتك ياهو غيرها 

صادق: اطلكها بس مو هسه اخليها معلكة فد سنتين ثلاثة هيج اخليها لا تطول السماء ولا تنزل للأرض .

الجد: طلكها  وافتك منها كافي اللي صار، ورد ( ارجع) انت وفروخك لديرتك واهلك.

صادق: ما اروح لأي مكان اني باقي هنا البنات مدارسهم ومتعلمين على بغداد ،  واطباعهم تختلف عنكم اذا اجيت راح يتعبن وما يتأقلمن ويه عيشتكم .

الجد: شني يتأقلمن ما يتأقلمن النوب علينا الزعاطيط انام على خوانيگهن لو حجن، تسمع علي يابوي 

اكلمة اگلة هلك وارجع بينهم يگلي بناتي ويتأقلمن ترضاها يابة ؟ 

علي : ليش صادق جديد عليك ومستغرب تصرفاته من يوم يومه ناكر عاداتنا وطبايعنا والدليل شوف عينك بناته مفرعات وما ألهن رداد واذا  واحد نطق جلمة وياهن يردنه بعشرة وحتى هو ما يرضى لواحد يحاجيهن، انه كدامه احجيها مو وراه. 

صادق: اذا تعرفوني هيج ليش تتعبون نفسكم عل خالي بلاش اني باقي هنا شغلي وظيفتي بيتي ، ببغداد اسست حياة كاملة وتعودت صار عمر ما اكدر اغير نظامي ونظام بناتي علمود واحد يرضى علية 

الجد: جا انه لفو ( غريب) ويحجي وياك لو ابوك وهيج تردة (تجاوبه) ؟ حاجيني !

صادق: محشوم حجي مو قصدي هيج بس كلمن يعرف بظروفه واللي يناسبه وما يناسبه ...

الجد: اذا ما جيت وياي  اتبرأ منك ولا انت ولدي ولا اعرفك يزي الوكت المضى وانت بعيد عن ديرتك وهلك .

مروان: حجي صلي على محمد 

ردوا بصوت واحد اللهم صل على محمد وال محمد ..

مروان : ما يريد ييجي عوفه على راحته غصب تاخذة ؟ خليه فترة يفكر احتمال يجي يوم وهو يحب يرجع من ذاته.

الجد: وانه انطر لوين والعمر تبدة وراح  (خلص) شضالي اعيش شهر سنة والف راسي واموت.

علي: حجي عمرك طويل شهالحجي اللي يگرب الگلب .

بهذه الاثناء جبنا السفرة وفرشناها حتى يتغدون لان التهوا بالكعدة ومحد تغدا بس الزلم اللي جاية من البصرة لأن وراهم طريق ، صاح جدي...

الجد: تعالي انتِ  ارفعي  السماط 

رسيل: هااا !!!

حجى مروان...

مروان: السفرة شيليها

رسيل: ليش اشيلها ؟ 

الجد :رفعيها لا اضربج كف على وجهج لا تجادلين .

شلت السفرة وهزيت ايدي وفتت للمطبخ جان فارغ عمة صبت الاكل وراحت دخل مروان وراية جرني من ايدي ولواها حيل حسيتها طگت ...

رسيل: اخ اخ ايدي شبيك دوخر راح تنكسر ..

خازرني وضاغط عليها حيل جان كلش قريب علية ..

مروان: انه اريد اكسرها المن هزيتيها لج ماعاجبج حجي جدج ولج هذا كل الزلم تهابه ولو صاح صوت كلنا نخرس ومحد يحجي حجاية عكبة تجين انتِ بت البارحة تجادليه وتهزين ايدج جدامه ؟ 

رسيل: مو قصدي شي عفية هد ايدي..

حجيتها وبجيت خفت منه هذا مو حسام اللي اجادله ويركض يصالحني لا هذا ضربته والكبر ما يتفاهمون ابد ...

نتر ايدي بقوة ايده وحجى بنبرة تحذير وصوته جان ناصي... 

مروان: شوفي لج انه ما ارتاحيتلج من جيت لسه بيانج ملعبة ومو هينة فد انه اعرف دواج شنو والايام تثبتلج يا بت سوسن منو الجدامج ...

وكفت كباله خزرته وعيوني بعيونه كلت..

رسيل: اول شي ماما ميتة ما اسمحلك تجيب طاريها ثاني شي عيب عليك تكول سوسن عندها بنات وعندها ولد سميها بأسمهم وين حرمة الميت عندك وبعدين شبيها سوسن حتى تكولي بنت سوسن ؟ 

صار اعصاب دمارت وجهه برزت خفت بدخلي وگلبي رجف توقعته يضربني بس ضليت اتصنع القوة كدامه..

مروان: أكره ما اكره المرأة الصلفة وترادد شايفة لو انتِ هناك يمنا يوم ما اخليج عايشة لو اشوفج شي بعمرج ما شايفتة اخليج تتمنين الموت وما تحصليه وتمشين وتتلفتين داير مدايرج خاف يلمحج مروان واذكري حجايتي هاي لا تنسيها..

عيوني دمعت بقهر بس ما بجيت حتى لا يكول خافت مني ، اول مرة واحد يحجي وياية بهيج طريقة...

رسيل: الحمدلله ما عايشة يمكم والحمد لله ابوية موجود وراسه يشم الهواء وما يخليك لا انت ولا امثالك يتحكمون بية وهسه عرفت ليش بابا ما يريدكم وما يعجبه يرجع يمكم لان ناس همج .

شال ايده يضربني فات بابا لزمها  وصاح بصوت عالي .

صادق: مروووان ايدك ...

جاوبه مروان بنتر..

مروان: عمي علم بنتك الأدب لا ادفنها هنا وحتى انت ما توكف بعيني .

اجوي كلهم التموا علينا ...

ايهم بعصبية كال هاي شكو شصاير ؟ 

مروان: بنت عمك المترباية تكول علينا ناس همج ولسانها اطول منها الادبسز.

بابا عاط بصوت...

صادق: رسيل كلامه صحيح لو لا ؟ 

مروان: افه عليك عمي جاهل جدامك واكذب وتسأل هاي ؟ 

نصيت راسي كلهم اعصاب ويباوعولي بغضب ، ماحسيت الا انضربت كف دار  وجهي عطت رفعت راسي اجاني الثاني  بابا  جان يرجف وعيونه تدمع مبين مقهور مني حيل وهاي اول مرة يسويها ويمد ايديها علية ، رفع اصبعه مهدد.

صادق: اياج مرة ثانية ترفعين صوتج على الأكبر منج لو تجادلين وذولة الهمج اللي تحجين عليهم اهلي يعني اني هم همجي مو ؟ من تحجين حجاية ثمنييها وسولفيها بينج وبين نفسج شوفي المقابل يتقبلها منج لو لا يلا تحجين وامشي لغرفتج خيالج ما اشوفه يلااا

رسيل: بس..

علي: والله والج عين تحجين بعد، شلون بنات ..

صادق: ابو مروان انت اخوية الجبير وعلى راسي بس ما اقبل تمس بناتي بكلمة..

علي : ما تشوف بناتك شلون لسان ومامتربايات .

اباوع على بابا نظراته كلها لوم وعتب لان حطيته بهيج موقف صعب لا يكدر يدافعلي ولا يكدر يعديها ويسكت كله بسبب مروان هو استفزني من حجى على ماما واني منا كارهتهم من يوم اللي سووا مشكلة وية بابا وبسببهم طلع حسام من البيت ، صعدت لغرفتي اركض نمت على جربايتي ابجي واشهك اول مرة احس بالأهانة نظرات الشماتة مالتهم مستحيل بيوم اكدر اتخطاها  گلبي محروك عضيت مخدتي وكمت اعيط اكرهكم اطلعوا من حياتنا اطلعوا

دخلت عمة زهرة لزمتني وتهز بية..

زهرة: شبيج يمة اسم الله الرحمن شصاير ليش هيج صوتج عالي وتبجين؟ 

رسيل: ما اريدهم ما اريد اشوف شكولاتهم خلي يروحون 

زهرة: راحوا حبيبتي على كيفج منو يستاهل تبجين وتحركين دمج من وراه.

شالت راسي وخلته بحظنها وكامت تمسدلي 

زهرة: ليش هيج صار مو عفتج جان كلشي ماكو.

رسيل: بابا ضربني بسببهم .

زهرة: اعرف وهو دزني عليج كال روحي شوفيها.

رسيل: عمة يكولي بنت سوسن واني ما مرتاحلج من اجيت لحد الآن شمسوية اني فهميني ..

زهرة: انتِ هم صوجج ليش تاخذين وتنطين وياهم بالحجي اول شي ما تعرفين اطباعهم ولا على شنو متربين المفروض منج تتجنبيهم وثاني شي لخاطر ابوج المفروض تتحملين شلون ماجان و من يحجون شي ابتسم وافوت هاي مو ريناد وياج شلون يحبوها تسولف وتشاقة وياهم عبالك صارلها سنين تعرفهم.

رسيل: اي مو هاي ادبسز اني الها

زهرة: لا مو ادبسز ما سوت شي غلط كعدت وسولفت وياهم وهم مو غربة ولد عمكم .

رسيل: ماعندي لا عم ولا ولد عم عرف ولف من تالي وكت طلعولنا عمام.

زهرة : سواء تقبلتيهم او لا يبقون ولد عمج وخلي لبالج بعد اسبوعين تروحون للبصرة .

كمزت من حظنها مخروعة شنو لو اموت والله ما اروح 

زهرة: عرس ياسر وعزموا ابوج وعزمونا وياهم وابوج انطاهم كلمة تروحون.

رسيل: اي خلي يروح بالنسبة الية ما اوصل ولا اتحرك من مكاني والله ياالله هسه بس نروح جدي يوكع دخيل ويخلي بابا يبقى هناك وما يخليه يرجع لو نموت .

زهرة: لا ابوج مصر على موقفه ومايتراجع عنه لا تخافين 

رسيل: ما شفتي اليوم شلون فروا راسه علية بكلمتين وخلوه يضربني...

زهرة: انتِ خليتيه يضربج لو مضاربج جان اكلوا وجهه وزاد الحجي ما نقص.. 

بقت عمة تحجي وياية واني ساكتة كلشي ما حجيت الى ان غفيت ،

ما كعدت غير ساعة عشرة باليل كمت باوعت على روحي بالمراية اخترعت عيوني مورمة وجهي مطبوع بيه آثار اصابع بابا تلمست خدي وبجيت بقهر كعدت على الطابورية غطيت وجهي بيدي وابجي الى ان انفتحت الباب عبالي ريناد اجتي ما رفعت راسي لان كلش ضايجة منها .

نمدت ايد على ايدي وسحبتها من وجهي رفعت راسي واشوفه حسام كمزت حظنته وابجي .

رسيل: شوكت جيت ؟

حسام: توني طبيت وكالوا اكو وحدة تلطم فوك ناصبة مناحة روح نوح وياها شفته عرض حلو فكرت بيه واجيتج.

ضحكت وعيوني كلها دموع ..

حسام: والله انتِ غشاشة

رسيل: ليش بله ؟

حسام: هو هذا هم وجه !

رسيل: شبية عيني اخبل 

دارني للمرايا وكالي شوفي ،باوعت صدك مورم واخوف 

رسيل: غير جنت ابجي 

حسام: ومنو يسوة تبجين عليه بس والله سباعية يكولون ماسحة الكاع بشواربهم 

ضحكت 

رسيل: وانت ليش انهزمت جبان جان صرنا جبهة وحدة ضدهم

حسام: ام الجبهات انتِ شمدريج نايمة هنا بالكهف واني اجيت قبل كم يوم العصر وتعاركت وية ايهم بالكوة فاككونا..

رسيل: ليش تعاركت؟ وشوكت اجيت؟ شو ماندري وعمة كالت انت ببيت خالك ..

حسام: صح جنت هناك بس ضليت ألوب ردت اشوف الوضع شنو واجيت وردت افوت لبيتكم وايهم الكلب منعني..

رسيل: ليش يمنعك قابل بيته ؟

حسام: شمدريني عوفج منهم كومي غسلي وامشي نتمشى

رسيل: مابية حيل

حسام: كومي كومي اجيتج مناك لهنا لان كالوا كاعد تبجين واني جنت حالف ما اطب بيت اهلي .

رسيل: وليش بله ؟

حسام: غير ما شفتي من طلعت من يمكم بيوم المشكلة ابوية شسوة بية  

غلط وتجاوز طلعني واحد ابن شوارع .

رسيل:صرنا فلم بهذا الاسبوع لو يبقون شهر شيصير بينا..

حسام: راحوا عساهم مارجعوا لا تفكرين بيهم بعد ويلا بدلي انتظرج جوة بداعتي لا تتأخرين علية مشتاقلج كلش..

رسيل : تمام ما اتأخر 

حسام : رسيل اكيد ؟ 

رسيل : اي 

نزل واني بدلت ونزلت شفت بابا متمدد على القنفة بالهول رحت كعدت بالكاع يم راسه .

رسيل: بابا اني اعتذر زعلتك مني بس هو تجاوز على ماما وما كدرت اسكت 

جر نفس قوي وكال..

صادق: لا تسكتين وخليني علج بحلوكهم اهم شي تردين حقج وابوج ضربيه بعرض الحايط. 

رسيل: بس بابا ..

قاطعني

صادق: لا بس ولا تبسبسين انتِ غلطانة والغلط راكبج من ساسج لراسج المفروض لو صدك تحترميني وتكولين عندي اب تجيني وتخليني بالصورة بابا ترضى مروان يحجي هيج اذا ما اخذت حقج هذاك الوكت هدي لسانج وعاركي الولد ،ما استحيتي ماخجلتي رجال شطوله ومشورب حجاية بحجاية وياه وبعدين من ابوية يكولج شيلي السفرة ليش تهزين بيدج كدامهم هاي تربيتي الج هاي اخلاقج حرامات بيج التعب التعبناه اني وامج من تالي وكت تجينا حجاية بسببج .

ردت ابوسه دفعني ما قبل وكام دخل لغرفته سد الباب كعدت على القنفة شكو بجي بالدنيا بجيته وشكو قهر بگلبي طلعته دخل حسام اجى يمي ...

حسام: على كيفج راح تموتين كومي نطلع نغير جو هسه نفسيتج تتحسن.

رسيل: ما اطلع 

عفته وصعدت لغرفتي سديت الباب  ضل يدك بالباب ويحجي على كيف ..

حسام : رسيل افتحي بس احجي وياج واروح .

رسيل: حسام روح الله يخليك اريد انام .

حسام: جذابة ما تنامين افتحي الباب كلت 

عطت بصوت مخنوك..

رسيل: روح حسام روح ما اريد اشوف احد .

ورا شوية سمعت صوت نزلته من الدرج ،حضنت مخدتي وابجي ما اعرف لأي ساعة اني كاعدة حتى نزلت ولا اكلت .

من بعد هذا الموقف مشت الايام عادية تشبه القبلها هدوء بدون عواصف داومت من بعد غياب اسبوعين وشرحت وضعي للمديرة رادت ولي امري بوقتها خالو راح لمدرستي رجعنا اني وريناد وراح لمدرسة ثائر .

رجع الدوام نروح ونجي بالخط ومن نرجع نلتهي بين الدروس والواجبات وشغل البيت ويخلص الوكت .

اجتي امتحانات نصف السنة بشهر الواحد امتحنا وخلصنا على خير بدت العطله وبهاي الفترة اني وبابا علاقتنا مو مثل قبل على كد اذا راد مني شي او يسألني على شي لا يسولف وياية ولا يكعد يمي، هيج يسوي حتى يعلمني درس ما انساه و السويته خطأ ما يسامحني عليه بسهولة حتى اذا اريد اعيده افكر الف مرة قبلها

صار عرس ياسر ما رحت لا اني ولا ريناد فقط بابا وآران يومين ورجعوا اسمعه يحجي لخالو الموقف من شاف امه هو يبجي وهي تبجي وشلون نصى على رجليها باسها ، ورجع علمود عنده دوام الا هي واكعتله دخيل دم حتى يضل يمهم فترة اطول ، وعدهم يرجع بأقرب فرصة تصيرله ...

ثاني يوم  اجى بابا وكال حضرول ملابسكم باجر عندنا سفر..

ما حجيت شي صعدت خليت ملابسي بالجنطة جينزات على بلوزات صوف وقماصل وتراكات بيت صفنت اخذ شي طويل وياية  اخاف هناك ما يخلوني اطلع والبس بكيفي، زين شلون راح اتحملهم والله حيرة يا ربي .

دخلت ريناد وبدات تحضر ملابسها بلهفة فرحانة

رسيل: هاي هيج فرحانة لان راح تروحين لبيت جدج لو ندري هيج تضحكين ونفسيتج تتغير جان من زمان نتصالح وياهم .

باوعتلي وضحكت ...

ريناد: متشوقه اشوف منطقتهم وبيتهم وشلون عايشين اعتبريها تجربة وتونسي شبيج قافلة..

رسيل: تجربة عابت هيج تجربة اي والله ..

ريناد: اذا ما عاجيج لا تجين ابقي ببيت جدو .

رسيل: حتى بابا بعد طول عمره ما يحجي وياية ما اريد شي غير يصالحني مستعدة اسوي اي شي علمود يرضى علية..

ريناد: لعد لا تسوين مشاكل وخلي العطلة تعدي على خير  .. 

صفنت عليها هاي اللي جنت اني انصحها صارت هي تنصحني معقولة اني غلط ؟ وعقلها اكبر من عقلي!

كملنا ترتيب الجنط وحضرنا ملابسنا 

ثاني يوم الصبح ساعة ستة بابا صعد كعدنا...

صادق: يلا بنات كوموا بدلوا تأخرنا..

كمت فتت للحمام غسلت وفرشت اسناني وصعدت بدلت لبست بلوز طويل اكرهه و قليل لابسته بس لأن رايحين للبصرة ما اريد حجاية تجي لبابا ولبست قمصلة ولفيت شال على راسي .

فاتت ريناد للغرفة باوعتلي وكامت تضحك...

رسيل: كدامج قرقوز وتضحكين ..

ريناد: لا بس ليش هيج لابسة؟ اول تالي تلبسين هذا البلوز وفوكاها حجاب !

رسيل: غير رايحين لبيت جدج هسه اول ما اطب يتلكوني بسين وجيم وليش هيج وتالي اطلع ما مترباية .

ريناد: اي هم صدك زين تسوين 

باوعت عليها شو هاي لبست جينز وعليه بلوز قصير وقمصلة جلد قصيرة .

رسيل: هاي هيج تروحين وتطبين لبيت جدج والله يمزقوج ..

ريناد: اول شي يحبوني ما يحجون علية وثاني شي اني ما اغير لبسي حتى ارضى احد  مادام شايفة نفسي صح اثبت للكل اني صح 

صفنت عليها ضيقت عيوني وهمست..

رسيل: هاي شوكت كبرتي وكمتي هيج تحجين حجي مال كبار .

ريناد : من زمان بس انتِ مامنتبهة ..

هزيت راسي وهمست

رسيل : اي صح 

نزلنا شفت بابا واكف بيدة جنطة ملابس يخبل طالع رحت بسته ضحك .

صادق: فكي ريكج بلگمة ورانا طريق  طويل..

رسيل: ما اشتهي .

صادق: براحتج يلا طلعوا حتى اقفل الابواب..

طلعت واشوف حسام واكف وعلى جتفه جنطة صغيرة ولازم آران بيده وثائر هم .

رسيل: هاي شنو  شكعدكم من الصبح و وين رايحين ؟ 

حسام: غير نوصلكم للبصرة خاف تحتاجين فزعة اكون قريب عليج .

رسيل: احجي الصدك وين رايحين ؟ 

حسام:: عمي شبيها رسيل اكولها جاي وياكم للبصرة ما تصدكني

صادق: عوفها من تشوف بعيونها راح تصدك .

طلعنا اخذنا تكسيات اثنين.

سيارة صعدوا بيها بابا وريناد وآران .

والسيارة الثانية اني وحسام وثائر وانطلقنا عقلي كام يودي ويجيب ليش هيج مرتاحين كلهم ويضحكون ولا عبالك رايحين للبصرة راح اتخبل  وحسام شعنده رايح وهو يكرههم 

نزلنا بالكراج وكفنا على صفحة ورا شوية اجى بابا صاحنا رحنا صعدنا بسيارة ستاركس ،بابا وحسام والسايق صعدوا الجنط .

مشت السيارة بينا والهم كاتلني شلون راح اتحملهم اسبوعين  اموت ما اريد اشوفهم كل شوية تنرسملي صورة مروان لو ايهم لو عمي لو جدي كلهم اكرههم .

حاولت اغفى ما كدرت من القهر ردت انهزم من التفكير غفيت من بعد ثلاث ساعات تفكير شراح يصير .

كعدتني ريناد  تضحك ..

ريناد: رسيل وصلنا كومي ..

فتحت عيوني والكاهم كلهم يضحكون هاي شبيهم استغربتهم كلش..

نزلت من السيارة واشوف كدامي مناظر سبحان الخالق جبال وكلها ثلوج منظر يجننن والسماء لونها ازرق وبنايات حديثة التفت الهم

رسيل: احنا وين ؟ 

حسام: سبرايز  احنا بالشمال ياعوبة..

حجاها ويضحك

كلهم يضحكون ويكهكهون واني كعدت على جنطتي مال سفر وكمت ابجي...

رسيل: يعني هاي كلكم تدرون ومتفقين علية ؟ صدك تحجون ؟ اني ناقصة حرك اعصاب ؟ 

التفتت على ريناد، حتى انتِ تدرين؟

ريناد: معلية هذا طلب بابا ولازم يتنفذ 

حجتها ورفعت كتفها بعدم موبالاة..

باوعت على حسام ..

رسيل: بسيطة اني اعلمك ..

حسام: اهوو ابوية ما يكدر بس على امي عمي راد يسويلج مفاجأة وما قبل احد يحجي اني شكو ؟ 

بقوا يضحكون وبابا وكف تكسي نطاه عنوان فندق  يوصلنا اله...

وصلنا للفندق ونزلنا دخلنا للرسبشن كعدنا بابا وحسام راحوا يحجزون غرف ..

اجى بابا يمشي لازم راسه..

رسيل: هاا بابا خير ؟ 

صادق: مدري شيرطن حرام اذا افتهمت منه شي..

اجى حسام باوعلنا وكال..

حسام: هسه شلون راح نفتهم عليهم ؟ 

رسيل: امشوا خلي اشوف اني اعرف كم كلمة..

حسام: شوف هاي مدري  عبالها سهلة 

رسيل: هسه انت شعليك اجرب ما خسرانة شي ..

باستغراب بابا كال 

صادق : يلا كومي ..

رحت وصلت يم الولد كلتله بابتسامة

رسيل: بياني باش (صباح الخير )

صاحب الفندي:  بياني باش فەرموو صباح الخير (تفضلي) ..

رسيل: تكايه یارمەتیم بدە (ارجو مساعدتي )

صاحب الفندق: چیت پێویستە؟( ماذا تحتاج)

رسيل: به تەنیا ژوورێکم ده وێت (اريد غرفة لوحدي) ..

صاحب الفندق: ژووری بچووکمان هەیەو ژووریشمان هەیە بۆ خێزانان( لدينا غرفة صغيرة وغرفة للعوائل)

رسيل: باشە کلیلی ژوورەکەم بمدەرێ( حسناً أعطني مفتاح الغرفة )

صاحب الفندق: فەرموو ژمارەی ژوورەکە چل ونۆیە(تفضل رقم الغرفة ٤٩)

رسيل: بەڕاست لەبیرم کرد نرخی نووستن بو هەر شەوێک چەندە؟(حقاً نسيت كم هو سعر المنام كل ليلة) 

صاحب الفندق التفت لبابا بابتسامة وكاله 

گەورەم نرخی نووستن شێست وپێنچ دۆلارە 

باوعلي بابا وضحك يعني شنو اشر بيده ..

رسيل: يكول سيدي سعر المنام ٦٥ دولار 

صادق: ها اذا هيج هذا هو اخذي المفتاح بس امشوا ميت تعب..

اخذنا المفاتيح وصعدنا بالممر لزموني هاي شنو وشوكت تعلمتي شو ما ندري وكلمن يحجي حجاية شكل .

رسيل: ابدل واسبح واكوللكم شلون تعلمت 

ريناد: وتريدينا ننتظر هالكد ؟ 

رسيل: مثلما انتضرت يوم ونصف يلا عرفت احنا مسافرين للشمال...

عفتهم ورحت اسبح .

طلعت من الحمام فرحانة لان راح اغير جو صارلنا هواي مامسافرين آخر سفرة من جنت صف رابع ابتدائي بابا جان كل صيف ياخذنا لدولة 

لبنان سوريا السعودية الامارات تركيا اكثر شي جنا نروحلهن...

رسيل: يلا كومي نزعي ملابسج واسبحي 

ريناد: ما بية حيل انام شوية واكعد اسبح 

رسيل: براحتج ..

وكفت اباوع على الغرفة كلش عجبتني لون الحايط مصبوغ بلون بيجي فاتح والاضاءة هادئة لونهم شمسي ،  واكو سريرين واحد الي والثاني لريناد والحمام يخبل يسوي واهس واحد يسبح بيه .

بدلت ومشطت شعري وطلعت من باب الغرفة اكو مثل هول صغير ومقابيله غرفة ثانيه اللي هي لبابا وحسام وآران اخذنا سويت حتى كلنا ننجمع بمكان واحد.

كعدت بالهول ورا وين يلا كعدوا  الوحيده ما نمت لان بالسيارة شبعت نوم تقريبا ثلاث ساعات اني نايمة..

دخلت للغرفة سمعت صوت المي ريناد داخلة تسبح 

علكت الهيتر الكهربائي حتى تتدفى وما تتمرض..

بدلت لبست جينز اسود وبلوز لونه اصفر حياكة وبيه الوان بالصدر وقمصلة جلد طويلة بيها كلاو يغيطه فروا اصفر سشورت شعري ورفعته ذيل حصان عالي

طلعت ريناد من الحمام باوعتلي 

ريناد: اي هاي اختي مو ذيج اللي شفتها الصبح 

رسيل: غير من ورا سوالفج جان كلتيلي خليتيني اعيش ليلة كاملة بالهم جان فرحت حالي حالج .

ريناد: بابا ما قبل كال اريد اسويلها مفاجأة صلح ..

رسيل:اي خوش مفاجأة يلا كومي بدلي حتى نكعدهم شنو جايبينا حتى ننام .

ريناد : يلا ..

من خلصت تبديل ريناد طلعنه دكينا الباب عليهم كسرناها

رسيل : كوموا يلا جعنا صدك جذب؟ 

بابا فتح الباب مبدل مديت راسي شفت حسام وثائر نايمين باوعت على ريناد بنظرة فهمتني رأسن دخلنا جانت اكو سراحية مال مي درناها على حسام وثائر  كمزوا من نومهم عاط حسام...

حسام: هذا هم شقى صدك جذب ؟ 

رسيل: حتى تبطل تكذب علية 

حسام: هو هيج درتي المي كله بأذني 

كام اخذ المنشفة وينشف براسه واذنه 

حسام: عمي جايبني حتى بناتك يسون بية مقالب ؟ 

صادق: ما الي دخل طلعوني منها انت وياهن 

حسام : خوش يعني ايدي الي 

صادق: شتسوي سوي 

حسام: ماشي 

باوع علينا بمكر وضحك ضحكة خبيثة واشر بيدة بمعنى بسيطة .

ريناد: رسيل ايدي بيدج...

ضربنها كف بكف صرنا حزب عليهم .

حجى ثائر 

ثائر :حسام اني وياك عليهن عندي مقالب الا بشدة..

ريناد: عبالي بعدك نايم تدري ردت ادير مي على راسك مرة ثانية..

ثائر : كاعد كاعد بس منتظر حسام ردت اشوف شنو يسوي عبالي راح يركعكم راس براس بس خيب املي..

رسيل: شحده غير نموته هنا شتكولين رنوود ؟ 

ريناد: خلي يجرب ويشوف ..

حسام: لا اجرب ولا شي اني رجال مسالم شيخلصني منجن .

رسيل : اي عفية هيج صير

حجيتها وضحكت..

حسام : امشي ولي خلي ابدل...

طلعنا كعدنا بالهول بابا كاعد ويضحك صارلي هواي ما شايفتة هيج مرتاح 

رسيل : بابا شكد حلوة الضحكة عليك وتلوكلك .

صادق: من اشوفكم مرتاحين وتضحكون اني اضحك وارتاح...

رسيل : فدوة لعمرك حبيبي..

كعدنه يمه اني وريناد وحضناه وحدة منا وحدة منا .

صادق: الله يحفظكم بابا ويريح گلبگم ويبعد عنكم كل سوء بهاي الدنيا.

رسيل: امين يارب ويحفظك النا يا احلا واطيب اب بالدنيا.

كملوا الولد تبديل دخلت بدلت لآران وطلعنا جان صاير المغرب دخلنا مطعم ناكل

اجى النادل يحجي بالكردي 

باوعولي وضحكوا ..

رسيل: اريد فلوس 

حسام : مال شنو بله ؟ 

رسيل: ترجمة لو وياكم مترجم ما تنطوه فلوس ؟ 

صادق: على لسانج اللي تريديه..

رسيل: حبيبي بابا اروحلك فدوة .

ريناد: اي والله كله لرسولة ورنودة كخ ..

صادق: ولج اني يايوم مفرق بينكم كلشي اجيبه لاختج اجيبلج نفسه.

ريناد: اريد فلوس مثل رسيل..

صادق: تدللي ..

رسيل: هسه اني اخذت وبسرعة خليتي عينج..

كامت تغمزلي بحواجبها ضحكت ودرت وجهي على نادل المطعم.

رسيل: ئێوارەت باش ( مساء الخير)

النادل: گیان باش( مساء النور)

رسيل: ئایا خواردنی چیتان هەیە؟( ماذا عندكم من المأكولات )

النادل: هەر چیت دەوێ هەمانە،ئەمەش لیستەی خواردنەکان.

( عندنا كل ما تريد وهذه قائمة للمأكولات )

رسيل: بابا هاي قائمة وعددتله اسماء الاكلات اتفق الكل على كباب ولبن اربيل .

رسيل: کەبابم دەوێت لەگەڵ ماستاوی هەولێر

(اريد كباب ولبن اربيل) 

النادل: ئایا حەزت لە نانە یان سەموون؟

(هل تحب الخبز أم الصمون)

التفتت الهم شنو تاكلون ويه الكباب خبز لو صمون ؟

صادق: طبعاً خبز وكوليله يخلي وية الكباب بصل .

رسيل: نان لەگەل قاپێک پیوازی شیرین 

( خبز مع ماعون بصل حلو) 

النادل: باشه ( جيد) 

رسيل: سوپاس(شكراً) 

النادل اخذ الطلب مال الاكل واستلموني يلا سولفي شلون تعلمتي .

رسيل: عندي صديقة مقربة بالمدرسة كردية بس ساكنين ببغداد ومرات اسمعها تحجي وية اختها كردي حتى البنات ما يفتهمون شنو يحجون بينهم صار عندي فضول اسألها شنو يعني هاي الكلمة وكمت اكتب بدفتر كل كلمة ومعناها ومرة شافت دفتري ضحكت كالت هيج تحبين لغتنا. 

كلتلها احب اتعلم احجي مثلج وافهمج من تحجين

كامت يومية من عندنا شاغر لو بالفرصة تعلمني كم كلمة 

بعدين علمتني الحروف بعدها الجمل ، وراها بدأت افتهم حجيهم من تحجي وية اختها بس بالكلام مو قوية بقت تعلمني وتخليني احجي ومن نكعد سوية كمنا نحجي كله كردي وتعلمت .

حسام: والله زين هاي من ياصف  تتعلمين ؟

رسيل : من صف خامس ابتدائي لحد الآن وجانت ماما حيل فرحانة من اجيها واكوللها تعلمت كلمات جديدة

باوعت على بابا عيونه مدمعة يباوعلي بفخر .

صادق: تستاهلين ارقى هدية اجيبلج على هذا الشي الحلو عفية عليج لو ما انتِ جان هسه نستعمل لغة الاشارة.

رسيل : شكراً بابا حبيبي ...

بقينا نسولف الى ان اجى الاكل وبدينا ناكل وكل شوية واحد حاجي شي ونضحك ، خلصنا وبابا تحاسب وياهم عن طريقي طبعاً 

طلعنا نتمشى الجو بارد ثلج وقليل ناس يمشون بالشارع يمكن بس احنا بدون مبالغة وكم محل مفتح ضلينا نمشي الى ان آران كال لبابا تعبت اريد ارجع 

بابا باوعله بقلق ..

صادق: صدرك كام يوجعك ؟ 

آران: لا بس تعبت ..

صادق: امشوا ناخذ تكسي ونرجع 

اشر بابا لتكسي وصعدنا نطاه عنوان الفندق همزين طلع الولد يحجي عربي مكسر

سأله بابا على الاماكن البيها اجواء تونس ويكدر ياخذنا الها

السايق اقترح نروح لأربيل 

صادق : شعجب اربيل ؟ 

_ جوها حلو والعاب بيها ومابيها ثلج قليل كلش وحرامات تروح عليكم الايام وانتم هنا

صادق : هم خوش فكرة..

بعدها بقوا يحجون شوية وراها وصلنا...

دخلنا للفندق وحضرنا ملابسنا وثاني يوم انطلقنا لأربيل جمال المناطق لا يوصف ، حجزنا بفندق وبدأت الونسة ما خلينا مكان يعتب علينا نكعد ساعة ثمانية ونصف نتريك بالفندق عندهم نظام البوفيه المفتوح لحد ساعة تسعة صباحاً ينسد ومن بعدها انطلقنا اول يوم رحنا لمدينة الالعاب صعدت لعبة اسمها (شنكل بانه) هالكد ضحكت وتونست ونسة جانت من العمر وخلصت مع الاسف ، الأيام الحلوة بسرعه تخلص 

آخر مكان رحناله شقلاوة وقررنا نرجع  لأن بعد يومين دوام المدارس يبدأ لمينا ملابسنا وسدينا الجنط توجهنا راجعين لحياتنا

مدينة الاعظمية الساعة التاسعة ليلاً 

كاعدين بحديقة بيت جدو النا يومين راجعين من السفر ملتمين بحب والكل مرتاح الحمدلله .

الي صار اندكت الباب فتحها ثائر ودخلت ام شجن...

تحجي ومدنكة راسها وتفرك بيديها بخجل ..

أم شجن: السلام عليكم ..

زهرة: هلا حجية تفضلي 

ام شجن: اعرف اجيت من غير موعد وغير مرحب بية ببيتكم بس عندي حجايتين احجيهن واروح .

اباوع على بابا صار اعصاب ويهز برجله ويتأفأف..

ام شجن: ابو رسيل اللي صار صار واني حتى ما ألي عين اعتذر منك بس اعتبرني امك وجايتك .

محمد: حجية بلا مقدمات كولي العندج وتوكلي .

ام شجن:احنا راح نشيل منا واريد خدمة من ابو رسيل واتمنى مايردني 

محمد: شنو الخدمة حجية اذا نكدر عليها ما نقصر ..

ام شجن: يطلك شجن وتروح بفالها جايها ناس خطابة ومن اهل الله و ما يدرون هي متزوجة..

صادق: كلتي من اهل الله وهم كربسيها براسه وتلعب من ورآه ما استحيتي على شيباتج جايتني مناك لهنا تحجين هيج حجي وبكل عين صلفة تريدين اطلك مرتي حتى تزوجيها...

ام شجن : بس انت ماتريدها يايمة ليش مجلب بيها عوفها لحال سبيلها .

صادق: بكيفي  اني اريد مرتي و مايعجبني اطلك شلون بلة؟ 

كلنا صفنا على بابا شكاعد يحجي يامرته هاي مو جانت يمه وبدون مشاكل ما يريدها هسه يتمسك بيها .

أم شجن: اذا رايد مرتك ليش ما ترجعها ونخلص من حجي الناس ؟

صادق: بكيفي اني اريد الناس تحجي وتاكل وجهكم وما اريد اطلكها وتلعب بكيفها ، حجية انتظري يومين ويجيكم قرار من المحكمة اطلبها ببيت الطاعة..

محمد: صادق تحجي صدك انت شبيك تخبلت ؟ 

صادق: لا ما تخبلت بالعكس بكامل قواي العقليه واللي كاعد اسويه من حقي .

محمد: تعال اريد احجي وياك على صفحة..

صادق: احجي هنا ام شجن مو غريبة نسبان بعد ..

محمد: كوم لا تعاند .

صادق: شبيك اشوفلها بيت هنا قريب وتجي تكعد بيه لا تطلع على احد ولا احد يطب عليها 

محمد: خوش وتجيك حجاية على ابو ك*** ورجعها 

صادق: اللي يحجي هو وهذا ما يهمني على اساس هسه ساكتين 

حجى مأشر على اللي برجليه.د

الكل سكت صار هدوء وام شجن تسحبت بهدوء وطلعت صارت هوسة بين بابا وخالو وحسام.

حسام: عمي شكاعد تسوي ما عولنا نخلص من هاي السالفة وتنسد هسه طلعت بشغلة جديدة ؟ 

صادق: اريد اربيها عبالك اخليها تفلت باللي سوته بسهولة والله لا اعيشها المر اخليها تنام وتكعد تلعن اليوم الشافتني بيه والساعة اللي اجتي بيها للدنيا.

محمد: ومنو يخليك على كص ركبتي تسوي هاي الخرابيط ..

صادق: سويتها وخلصت اجرت بيت بمكان محد يندله وكلفت محامي توب لزم القضية اريدها تجي حتى ابرد گلبي بيها .

محمد: خوية كول ياالله واستهدي بالرحمن ضربة من الضربات ماتت البنية مو تدخل السجن بسببها ؟ و هي تسوه تنسجن من ورة هيج شكولات ؟ تضيع عمرك وجهالك ؟ ادري انت ما تفكر عقلك انضرب احجي مو راح اتخبل .

صادق: عوفها هسه وكوموا نتعشى ، ام حسام شنو اليوم ما تعشينا ؟ 

زهرة: والله يا ابو حسام اللي سمعته خلاني انسى حتى اسمي مو بس العشاء

دخلنا للمطبخ اني وعمة وبلشنا بالعشاء ، كملناه و فرشت السفرة وطلعت صحتهم جانوا ضايجين والوجوه ما تتفسر..

كعدنا على السفرة الكل صافن وما ياكل بس هيج كأنما تأدية واجب شوية  وانسحبوا واحد ورا الثاني.

مرت اليومين مشاكل بين بابا وخالو آخر شي خالو هدد بابا اذا يسوي هيج يتصل على جدو ويبلغه 

صادق: روح خابره خايف منهم والله ياالله 

محمد: لا تعاند من شوكت انت هيج راكب راسك مو موتتني حرام اللي تسويه خلينا مرتاحين شتسوي بالمشاكل و وجع الراس 

سكت بابا ما جاوبه ،بعدها بأيام خالو خابر على عمامي واجوي وصارت مشكلة كلش كبيرة وبابا مصر على رأية ما يطلك عمامي جلبوا لبابا الا تجي ويانا للبصرة ما نعوفك هنا بعد .

صادق: ما اجي وما اطلك ما الكم دخل بحياتي .

جواد: شو انت محد بعينك جاين مناك ليجاي وتالي راكب راسك اركد بمجانك يومية طلابة وتعالوا حلوها.

صادق: تعيرني حجي ؟ هو اني يايوم داز عليك بس مرة احتاجيتك واجيتول حليتوا مشكلتي وعلى عيني وراسي بعد وين يومية داز عليكم اني .

علي: استهدوا بالرحمن صادق كصر الشر وامشي ويانا ابوية حيل تعبان مو حمل سالفو جديدة لا يصير بيه شي وبذمتك .

حجاية منا وحجاية منا كدروا يقنعون بابا يطلك شجن والحمد لله ورا فترة طلكها وخلصنا منها  ، ومشت الايام والاسابيع والشهور واجتي امتحانات آخر السنه امتحنا وهلت علينا العطلة الصيفية طلعت النتائج ناجحين الحمدلله وبدأت السنة الجديدة وهم خلصت على خير مابيها اي حدث مميز يذكر سوى روتين عادي وايام حالها حال القبلها .

واليوم اني واكفة كبال الاستاذ اسجل اسمي بمعهد الدروس الخصوصية، جان بيت صغير ومسويه معهد وبيه اساتذة لكل المواد سجلت وطلعت لكيت بابا منتظرني بالباب مال معهد ابستمتله.

صادق: ها كلشي تمام ان شاءالله ؟ 

رسيل: الحمدلله..

صادق: الله يقويج ويسهلها عليج وتطلعين معدل عالي وافرح بيج..

رسيل: يارب بابا شنو تتمنى اطلع ياكلية ؟ 

صادق: اي شي يخص المجموعة الطبية اهم شي اشوفج بصدريه بيضة .

رسيل: ان شاءالله حبيبي يتحقق حلمك اللي هو حلمي ...

مشينا وصلنا يم السيارة ،وبابا لكى ورقة على البنيد فتحها وجانت الصدمة .  

              الفصل الثامن من هنا 

لقراءه باقي الفصول من هنا