رواية وادي الزعيم الفصل الرابع عشر 14 بقلم عبير ادريس
هم تدري من اعتازلك شتسوي بية العازة ؟
حقك عليةواعتذر مني الغلط هل مرة
جنت مغفل اتعلمت من عندك درس لو ادري ما متعلمه..
🎲🎲🎲🎲🎲
بهذه اﻷثناء تقرب مني رجل أعمال عراقي هواي شايفته يطلع بلقاءات تلفزيونية باوعلي ابتسم وكال
_يستوجب شُكر نجوم الحظ اللي جابتني للحفلة حتى اتعرف على هيج وجوه حلوة
باوعتله ابتسمت مو على كلامه بس حتى أغيض الخصم اللي يراقبني بكثب ويشتاط غضب
خيلاء : شكراً جزيلاً بس احنا مو مثل البقية بالحفلة
_ما فهمت ست!
اجى صوت من الخلف خلاني ألتفت
باوعتله طوى ايديه على صدره بشكل مرعب كأنه مستعد للعِراك بأي لحظة رجعت خطوتين ليورا حسيت راح تصير مشكلة همس قريب منه عاقد الوجه طافي الملامح
اينار : اعتقد انت مو بمزاج يسمحلك بتسلية امرأة، وعدا هذا ما عندنا بنات ممكن تستأجرهم ليلة حتى تكون شريكتك بالمنام
_لا العفو زعيم فهمتني خطأ مو هيج قصدي
اينار : شنو قصدك؟ فهمني
_وروح ابوك العزيز مو هذا قصدي
اينار : لا تحلف بيهم وانتهى النقاش وهذا الشي راح نتحاسب عليه بعدين
_اعذرني ما جنت اعرفها من الخاصات بيك
اينار : مادام من طرفي معناها خاصة بية مو شرط تكون مرافقتني
_اكرر اعتذاري وياريت تاخذه بنظر الاعتبار
اينار : نحجي بعدين
اخذني من عكسي ومشى بية لنهاية الصالة وكف كبالي ونهرني بقوة عاقد حاجبه ويحجي
اينار : شنو هذا لبسج ما لكيتي فستان أستر من هيج؟؟
خيلاء : واو الزعيم يدور من عندنا ستر!!
حبيت ألتفاتك تنحسبلك والله، خصوصاً من بينت انت مهتم
اينار : مو مهتم بس راح احاول قدر الامكان اكون وياج مهذب لحدما يخلص الحفل
قابلت تهديده بضحكة وهمست
خيلاء : شنو تكدر تسوي؟
تلفت للجوانب بعدها باوعلي تقرب مني محذرني بهمس
اينار : اسمعيني زين واللي خلقج وصورج بهاي الصورة اذا عاندتيني اليوم ابوج احركه
خيلاء : احركه وشنو يعني ما تفرق عندي وبالمناسبة البقاء بحياتك، الوالد خلّف وما مات
من حجيت جان تعقيب على كلامهم هو ورجل الأعمال ما عندي اي قصد بكلامي سواء تلميح او تجريح بس ردت اعرف ليش مايقبل احد يحلف بيهم او يحجي عنهم، بس هو تخبل علية
تقلص حاجبه وصار وجهه اكثر صلابة، لاحظت كمية الغضب المخفية تحت قناع التحضر الوهمي اللي لابسه، لمعت عيونه بغضب وتنبأت عن خطر راح يصيبني من نظراته، ظهرت خطوط التوتر حول فمه رفع ايده مهدد بعدين قبضها وتمتم بين اسنانه
اينار : جاية تعزيني بوالدي بنت أميرة؟؟
ولج اني قتلت نفس من عرفت اكو علاقة بين
انتبه على روحه مثل اللي صحى رفع ايده فرك وجهه وزفر نفسه وكتم اللي راد يحجيه وبقت بس عيونه تشرح تخربط وضعه
نتعارك وما مهتمين للمحيطين بينا لا اني اهتميت للاذان اللي كانت تسترق السمع ولا هو اهتم للحشود اللي مراقبتنا
شعور حزن وغضب اجتاح ملامحه أخذ نظرة للمحيطين بيه وتلفظ بشتيمة سب والدتي بيها، لزمني من ذراعي بيده الكبيرة وسحبني بسرعة للطرف الآخر من المكان جان اهدأ خالي من الناس
دارني بسرعة حتى اكون بمواجهته، وزالت كل معالم التحضر منه، امتلأ بالحقد والغضب وتعابير وجهه الصارمة شرحت جميع انفعالاته
جريت نفسي بعنف حتى احررها من قبضته بس جان متزمت برأيه وبقاني قريبة منه، تنفست زفيره اللي جان يلفح بوجهي من شدة غضبه وتصاعد الموقف بينا
خيلاء : شبيك شبيك هيج تعاملني كأني طفلتك وتمردت عليك؟
اينار : ابوية شنو تعرفين عنه؟
خيلاء : ما اعرف شي المفروض اني اسألك عن اسم امي شلون عرفته واحاسبك لأن سبيتها وهي ميتة
باوعلي بمقت كز على اسنانه وكال
اينار : لحد الآن انسان مسالم وطبيعي، احجي اللي تعرفيه وضامته عني ومنو اللي دازج علية؟
خيلاء : اهوو رجعنا لنفس الحجي، منو دازج علية؟ شنو ضامة عني؟ ووو الخ من لعبان النفس مالتك
اينار : غرورج هذا اذا ما كسرته ما اتسمى اينار
خيلاء : سامع بمي البحر؟
بقى ساكت
خيلاء : روح اشربه يكولون مالح
تركته حتى امشي رجع جرني بقوة من معصمي فلتت ايدي منه وفركتها، حاولت بكل القوة اللي متبقية عندي ابين نفسي ما خايفة بس جنت ارجف منه
خيلاء : ايدي شبيك انت؟؟
اينار : ما مرتاحلج ابد ومن يوم اللي اجيتي لحد الآن اني ما مرتاح
خيلاء : عساني اكون طول العمر عقابك واسلب منك راحتك وفرحتك
جاوبني بطريقة وحشية ويهز بية
اينار : عبالج خايف منج؟
احبسج واخليج مُهانة للي يسوى واللي ما يسوى وتشتغلين كل انوع الشغل اللي يكرهج حياتج
تقربت منه باوعت بوجهه نظرات عيونه تنفي كلامه حجيت بهمس
خيلاء: انت اللي ما متحمل تشوفني بهيج وضع، صح تهدد بس ما تنفذ
جاوبني بسخرية وتهكم
اينار : كلج من فوك ليجوة ما شايفج
خيلاء : صح كلامك والدليل مجرد لمحت شخص وكف يمي اجيت تريد تضربه وحجيت وياه كلام قاسي ممكن ينهي شراكتكم
باوعلي فتح كل عيونه سحبني من اعلى فستاني بقوة
اينار : شلون عرفتي هو شريكي؟؟ انتِ من وين كاعد تجيبين هيج معلومات خطرة عني؟؟
حاولت اسحب نفسي منه انزلق الفستان عن كتفي، باوعت لعيونه تختلس النظر للحظة وشفت بعيونه شعلة الرغبة بالانقضاض علية
ابتعدت عنه نطيته ظهري متجنبة نظراته الوقحة، سحبت نفس عميق رفعت فستاني عدلته بأيادي مرتجفة رجعت ألتفتت ناحيته وهمست
خيلاء : كل اللي حجيته تكهنات حتى ازعجك بيها لا اكثر وشيل من بالك فكرة ممكن احد دازني عليك او يريد يكيدلك، جيتنا للوادي جانت بمحض الصدفة
اينار: وتريديني اصدك يعني؟
خيلاء : براحتك
اينار : هاي علموج اذا تنكشف اوراقج تستعملين جوكر الخلاص مو؟
خيلاء : هاي ألعابكم خليني بعيدة عنها ﻷن صدكني مهما يصير ما راح اتقنها
رفع راسه بشموخ واطلق ضحكات مجنونة رجع راسه ليورا ظهرت عضلات حلكه، حسيت بضعف امام قوته صار عندي وجع اسفل جسمي وحرارة مزعجة بعيوني احتاجيت امدد ظهري لان على وشك يغمى علية
خيلاء : حاسة بتعب اتركني اروح وبعدين نكمل النزاعات ضيوفكم منتظريك والحفلة بعدها ببدايتها شكلنا ابد مو حلو اذا طلعنا كدامهم بهيج حال، من رخصتك
قبل لا يحجي تركته ورجعت للحفلة تلكتني سديل وجهها مخطوف وخايفة
سديل : شنو اللي صار وين رحتوا كل الموجودين تركوا الحفلة ويحجون بيكم
خيلاء : تعبانة حاولي تشوفيلي مكان انزوي بيه واريد حلاة يعدل وضعي حاسة السكر نزل عندي
سديل : معقولة اكو عصائر هنا؟
خيلاء : كلشي اكو قابل بس خمور، وهيج كلها فري وانفتاح عالي ويشربون هم ونسوانهم!!
سديل : امشي نكعد هناك حتى اروح ادبرلج عصير
تركتها ومشيت خايفة عليها جان عندي فضول اعرف شنو دار بينهم من حديث بس اعرف الوقت مو مناسب ووضعها تعبان
رحت للمطبخ الخاص بالفندق طلبت منهم عصير فرش ما فهموا علية دخل وراية احد افراد حماية الزعيم
ضخم طويل وعريض الاكتاف منظره مرعب، سألني بصوت خشن
_شعندج هنا؟
من الخوف ردت اكوله كلشي ما اريد بس تذكرت خيلاء ولازم اجيبلها شي تشربه ولوما محتاجته ما طلبته مني بألحاح
سديل : اختي اااا
كمت اقطع بالحجي وصوتي يرجف صاح بية
_شبيها اختج احجي؟
سديل : تريد شسمه هذا اللي ينشرب
_خمر يعني؟
سديل : لا خمريش وجوه خمر احنا!!
اريد عصير برتقال عنب اي شي
حاول يكون بنفس الجدية اللي هو بيها بس لاحت شفايفه ابتسامة خفيفة
_روحي وادزلج العصير، اختج شنو تشرب؟
سديل : تحب البرتقال
_وانتِ
ابتسمت مثل الهبلة ميلت راسي وحجيت
سديل : عنب اذا اكو
_يلا روحي هسه ادزلكم
رجعت يم خيلاء شفتها صافنة وتعبانة مغمضة عيونها ودمعتها نازلة على خدها تقربت مديت ايدي مسحت دموعها، فتحت عيونها تحسرت وباوعتلي نظراتها مليانة حزن
سديل : شبيج يا روح اختج وكلبها
بلعت ريكها وهمست
خيلاء: سديل بنتي اشتاقيت اشوفها اشمها اقرض اظافرها اوكلها بيدي ابدللها اظفر شعرها
سديل : ريتني متت ولا شفت هذا اليوم وحرمانج من بنتج
خيلاء : لا تحجين هيج بس حافظي على نفسج وراعي الله بية
سديل : كل اللي سويته علمودج وجنت اتصور ماشية صح
خيلاء : ما علينا باللي راح احنا بنات اليوم
سديل : خايفة عليج هواي
خيلاء : لا تخافين اختج جبل من الصبر وبيها تتحمل بعد اكثر واكثر
سديل : اني وياج اشيل همج واسندج، شبيدي اسوي واشيل عنج
خيلاء : بس الله يكدر يهوّن علية ويبرد كلبي ادعيلي اصبر على فراق بنتي وانجمع بيها عن قريب بس هذا اللي اريده
سديل : يارب ياحبيبتي لا يحرمج ريحتها ولا حسها ان شاء الله
خيلاء : آمين يارب العالمين
حجتها ورجعت راسها على الكرسي وغمضت عيونها طلعت منها آه حركتي لهيب نارها
اجى العصير اخذته من البنية وتشكرت منها هزت راسها مبتسمة لان ما تفهم علية، اخذت عصير خيلاء خليته بيدها ماكدرت تلزمه لان ترجف، اخذته وكمت اشربها ترتشف شوية شوية وترجع تستند على ظهر الكرسي ترتاح وترجع تشرب خلصت نصف الكاس
سديل : هاي هي ياروحي؟
خيلاء : اي عشتي
سديل : نرجع للفندق اذا حاسة بتعب؟
خيلاء : لا
سديل : ليش؟
خيلاء: ما اريدج تندكين بيهم ولا تحجين ولا تتقربين ولا تطلبين اي شي وابتعدي كل البعد خليني اني وياهم احاول اصلح اللي خربتيه
سديل : ماشي
كعدت اشرب بالعصير واتأملها شكد تعبانة وشكد تحتاج للراحة والسكينة ياربي مِنّ على قلبها بالهدوء والراحة
غمضت عيونها حسيتها بدأت تغفي حضنت نفسها لان بردت، شسوي هسه من وين اجيبلها غطى والجو بارد ثلج رغم مشتغلة التدفأت
مرت ربع ساعة ضبط وكامت تتألم بصمت، تلم شفتها وتعكد حواجبها وتمرد ببطنها بحركة تدل على الوجع اللي حاسته
سديل : خيلاء بيج شي؟ تتألمين؟؟
هزت راسها بأي وهمست
خيلاء : محتاجة حمام سديل بسرعة
سديل : كومي وياية ونسأل مو مال اعوفج وحدج هنا
خيلاء : كومي سنديني راح اتخبل ليش هيج يصير وياية!!
سديل : حامل يعني ليش حسبي الله عليهم
اخذتها سندتها ونمشي سوى كل شوية تهوي للكاع وارفعها بصعوبة اسندها وصلنا لنصف القاعة هوت من ايدي ما سيطرت بعد كامت تتقيء بشكل فضيع افضع من كل مرة حسيت روحها بدأت تطلع وية كل تقيؤ تستفرغه
مدتلي ايدها تستنجد بية مديت ايدي حتى الزمها اندفعت بكف كبيرة حضنت كفها النحيل الشاحب ورفعها بقوة من الأرض شالها وطلع بيها خارج الصالة لفناء الفندق وصل لبقعة ارض خضراء نزلها عليها، ظهره ما خلاني اشوف خيلاء ولا اكدر اقترب اكثر ما اريد اسوي شي وهي منعتني وكالت اتركيهم بس بقيت من بعيد اراقب ألتفت واشوف سكرة بصفي تباوعلهم وعيونها مليانة دموع كامت تحجي بدون ما تعي منو يمها
سكرة : ترك سكرته بنارها وراحلها!!
اكثر وحدة تعرف الى اي مدى ممكن توصل قساوتك وكاعد تصدمني بالضغط اللي تمارسه على نفسك في سبيل ما تجرحها ولا تأذيها معقولة خطفت كلبك!!
زين واني؟ وحبي؟ اني ما افرق عنها شي
التفتت علية وعيونها مليانة دموع بلعت غصتها ودموعها بدت تنهمر بقوة على خدها وهمست
سكرة : اني مثلكم بس اختاريته هو، سويت اللي يريده ويحبه تمسكت بيه لأبعد حد لأن حبيته بكل جوارحي، اني حلوة احلى من سلافي وعندي شهادة وحنينة عليه اني سده اني الحضن اللي يرتمي بيه بوقت التعب واﻷلم اني ملجئه الوحيد، راحته يمي هو كال راحتي يمج بس ليش يعوف راحته ويروح برجله للي تذله كل يوم وتنتقص منه وتأذيه، اني بعمري ما رفعت صوتي بحضرته ولا كسرتله كلمة غير مرة وحدة من قررت اختاره
بقيت اباوع عليها صافنة ما اعرف شنو احجي هي هم عندها قصة مثلنا ويمكن الزعيم كل اهلها وناسها وملجئها الوحيد، رجعت انتبهت عليها من كامت تحجي
سكرة : اتعب بدونه اذا ما شفته عيوني توجعني اذا ما سمعت صوته اذني تأذيني كلبي بغيابه يرفض يدك لواحد ثاني غيره اني ما اشوف نفسي حلوة اذا ما يتغزل بية ما ارتاح لغير نبرته شنو اسوي اذا اختج اخذته مني؟
سديل : مستحيل شتسوي بيه كل امنياتها تطلع من الوادي وتخلص، ياريت عندج خطط تساعدينا نطلع
باوعتلي ضيقت عيونها وبقت تراقبهم بكثب وترجع تباوعلي مسحت عيونها وسحبت المي اللي بخشمها بعدين مسحته بكف ايدها وهمست
سكرة : يعني ممكن تطلعون اذا احد ساعدكم؟
سديل : طبعاً اليوم قبل باجر
سكرة : متأكدة من كلامج؟
سديل : شنو متأكدة كاعد اكولج احنا نريد نطلع من الوادي وبأسرع وقت تكوليلي متأكدة
سكرة : ماشي يصير خير
حجتها وألقت عليهم نظرة أخيرة ورجعت دخلت للصالة بقيت اباوعلهم من بعيد واحد من الحماية أخذ كلاص لبن ما اعرف حليب المهم شي ابيض وخلاه بيد الزعيم ورجع
اينار : هاج اشربي شوية هسه ترتاحين
هزيت راسي بلا وهو مصّر يشربنياه رفعت راسي وصحت بيه
خيلاء : كلتلك ما اريد
اينار : يطبج مرض ولا تريدين
حجاها وشمر الكلاص بالكاع تفلش، باوعتله ورجعت دنكت راسي بقى يفتر فوك راسي ويدردم
خيلاء : خلينا ما ندّعي إنك مهتم وكل همك تشوفني زينة
دنك وكنبص كبالي مد راسه كبال عيوني وكال
اينار : لا مهتم وهواي هم، تعرفين ليش لأن احنا ببلد غريب ما اريد يصير بيج شي ونفوت بسين وجيم من وراج
خيلاء : الله عليك ياحنين عوفني وارجع وية نسوانك احسن النا اثنينا
اينار : لج سمعيني عدل كل فترة وجودج بالوادي اني حاجب عنج جدار كامل من الغضب لو بقيتي تدكين وتحفرين بيه بيدج ينهد على راسج وراس الخلفوج
خيلاء : لا كل شوية وجايب سيرة اهلي على لسانك مرة تسب امي تاج راسك ومرة تهدم ما تهدم على راسهم الحساب بيني وبينك اهلي ما عليهم
اينار : مادام لسانج طول معناها صرتي زينة تعالي نتفاهم اكعدي عدل اريد احجي وياج
عدلت كعدتي وتربعت بعد إلحاح، طلعت رجلي باوعلها ورجع باوع بعيوني وكال
اينار : مديها احسن
خيلاء : اذا ما جان عاجبك رجلي تطلع ومفاتني تنعرض كدام اللي يسوى واللي ما يسوى مثل عارضات الازياء مدفوعات الثمن ليش لبستني هيج لبس مخازي!!
اينار : اني لبستج!! اصلاً انصدمت من اطلالتج اليوم
خيلاء : وليش تنصدم فستاني مشابه لفستان شريكتك من اجيتوا للفندق
اينار : ها هنا مربط الفرس تقليد أعمى للغلط
خيلاء : مو اني لبست واذا انت هيج غيور صير غيور على نساءك وبس ماعليك ببنات الناس
اينار : انتِ كل
وسكت ابتسمت وكملتله الجملة
خيلاء : اني كل زوجاتك؟ حبيباتك؟ عشيقاتك؟ نساءك؟ اني كل شنو؟
اينار : أعرف راح تستهزئين بس جنتي كل ممتلكاتي
خيلاء :ها جنت وهسه شنو صرت؟
اينار : لا تغيرين الحجي هيج لبس ممنوع تنزلين بيه ولو اكولج نزلي انتِ كلج ما تهميني
خيلاء : عوفني اذا هيج وصيح اختي لو اكولك اني اصيحها او هي تجيني بس تشوفك تروح
اينار : ليش لان ما تقترب الملائكة بحضرة الشياطين؟
سحبت نفس قوي وبقيت استغفر ربي
اينار : وينج وين الاستغفار؟
خيلاء : انت شبيك؟ جاي تسممني فوك السم اللي اني بيه
اينار : لا جاي اريد اشوف حالتج شبيج؟
خيلاء : ليش لازم تركت الكو** ة وصرت دكتور؟
ضربني كف فر وجهي لزمت مكان الضربة وخزرته
اينار : من منو حامل هالمرة؟
فتحت عيوني على وسعها نفضت كل ألم بية وكمت وكفت كباله همست وعيوني بعيونه
خيلاء : شنو تقصد؟
اينار : الي سمعتيه
خيلاء : احجي اللي حجيته اريد اسمعه مرة ثانية
اينار : حامل؟
خيلاء : منك
اينار : ويجوز من واحد ثاني
ضربته بقوة على صدره وكمت ادفع بيه
خيلاء : العلم عندك انت أعرف بفعلتك شنو سويت
يا جبان يا حقير
اينار : جنت على استعداد اعقد عليج لحد آخر لحظة بس عرفت عنج اشياء ما تشرفني اربط اسمي بأسمج
خيلاء : شنو هاي الاشياء اللي سمعتها وبعدين منو كالك اني يشرفني اسمي ينكتب بصف اسمك مو اصير زوجتك
اينار : كلما انوي اساعدج تكسرين ايدي
خيلاء : مثلما كسرت نفسي وكسرتني ماسويت فعل مثل دناءة افعالك يا زعيم
اينار : ليش خايفة اذا جنتي حامل جسمج متعود يحمل الطفل ويرفضه بعدين بطرق الإجهاض اللي حضرتج خبيرة بيها
عكدت حاجبي ما مصدكة اللي كاعد يحجيه تقربت منه اريد املخه بأسناني اقطع اوصاله ما اعرف شنو اسوي المهم أأذيه
خيلاء : لا تحاجيني بألغاز احجي اللي عندك دفعة وحدة ولا تضغط على اعصابي اكثر من هيج لأن راح اتخبل عليك
بقى يباوعلي وجنت احس بمرارة كلامه ميل راسه وهمس
اينار : اني كلش معجب بتمثيلج لأدوار المظلومية كلش تجيديها خصوصاً من تصيرين بر*** وصوتج يعلى عبالج تاخذيني بالصوت العالي واسكت، شو اني وياج للصبح والحفلة طز بيها وكاعدلج اليوم اشوف تاليتج شنو
خيلاء : ولك اني شنو مسوية بحياتي ويصير هيج بية، شنو مسوية وتطلع انت بحياتي، شنو من ذنب اقترفته واتعاقب بهيج شي، ولك انت جهنم الحمراء اللي سامعين عنها وما شايفيها
اينار : اووو كلتلج تمثيلج واو اصلاً المفروض تاخذين عليه الاوسكار
انهاريت بالبجي بس جنت احاول احافظ على ما تبقى من كرامتي المسلوبة من قبل هذا الرجل انخرطت بموجة بكاء هستيرية لدقائق بعدها صاح بعلو صوته
اينار : فهميني اذا غلطان، كل اللي اشوفه بعين عقلي خطيئتج وجذبج واحتيالج علية، كل اللي اشوفه وحدة عاهرة وتتظاهر عكس هالشي اكثر وحدة تعبت عقلي هي انتِ
بقيت اباوعله وشفايفي واسفل فكي يرجف مشيت مبتعدة عنه تعثرت بحذائي موقف خلاني اكثر هشاشة كعدت بالكاع وهمست
خيلاء : تعبت بعد ما اكدر اكمل موتني هنا ما اريد أعيش ما اريد، طاقتي خلصت حرام عليكم يا من ما تعرفون للحرام سبيل
اجاني صوته الخافت من خلف ظهري وهو يكول
اينار : حملج بداية دخولج للوادي شنو تفسيره؟
ألتفتت عليه باوعتله بغضب رجف حلكي وهمست بصوت مبحوح
خيلاء : شنو قصدك؟
تقرب وكعد كبالي على الحشيش باوعلي عيونه مليانة تساؤلات وحزن
اينار : اول ما اجيتي اتضح بالفحص عندج حمل خارج الرحم
خيلاء : اي وهسه يلا وصلك الخبر؟
اللي سمعته منك هسه اول مرة أعرف بنفسي جنت حامل ومنك عرفت مبروك علية
اينار : لا تستهزئين
خيلاء : اي وشلون عرفت؟
اينار : من سمعت قصتج رحت ادور على الجزء المفقود منها
قاطعته بهمس
خيلاء : ولكيت الجزء المفقود من الرواية وهو حملي وراح تختمها هسه؟
اينار : فسري حملج ليش انتِ حامل وسديل لا
خيلاء : ومن منو حامل ما عرفت؟ ما مكتوب بالتقرير منو صاحب الفعل الشنيع هذا؟
حجيتها مستهزئة
اينار : لا ماعرفت واجيت اعرف منج
خيلاء : من منو حامل هو اني تاركة ثروان من قبل ست شهور من جيتي للوادي بعد شلون حامل وفوكاها خارج الرحم لعد شكد غبية وفاشلة دكتورتك العجوز
اينار : احتمال من غير ثروان بهاي الست شهور شنو صار بس انتِ تعرفين
ردت استفزه واحرك كلبه مثلما كاعد كبالي ويحرك بكلبي تذكرت كلامي على أبوه شلون استفزه رفعت اصبعي بوجهه محذرته يكمل
خيلاء : لك إياك تكمل الكلام اني مو مثل نسوانك السزز، اني لو هيج جان قبلت بيك واخذت مكانة سكرة بس لا حفيت وراح تحفى وما تحصلني يا شبيه ابوك
اينار : اني مو ابوية اني ما اشبهها اني مو هو لحد يجيب طاري امي لحد يسوي بية هيج كافي اسكتي كافي
تهستر وكف وكام يعيط لحدما تخربط صار بيه مثل نوبة الصرع
تخبلت وكمت اعيط اريدهم يجون يشوفون شنو بيه ترأستهم سكرة باوعتلي وخزرتني صاحت
سكرة : شنو سويتي بيه شنو سويتي؟
تركتهم ملتمين عليه ومشيت انخبصوا والوضع تأزم صعدونا بالسيارات ورجعونا للفندق ما عرفت شنو صار وياهم ووين ودوه وشنو حالته بس هواي خفت لدرجة حجي عادي وية سديل ما كدرت احجي
مرت يومين واني على اعصابي كل شوية واكول هسه يدز علية حتى ينتقم مني بسبب اللي حجيته بس ما تحققت مخاوفي
اندك باب الغرفة فتحته سديل ودخلت سنود ألقت علينا تعليمات من مجملها لازم نلبس وننزل اكو اجتماع ناقص التفاصيل هذا بس اللي عرفناه، كمنا اني وسديل وجهزنا نفسنا وقررت اترك العناد وما اجاكره بس هو يستفزني ويطلع اسوء ما بية
لبسنا جينزات وتيشيرتات باللون الابيض رفعنا شعرنا بكيتر ولبسنا الشوز الرياضي وطلعنا نزلنا للرسبشن مال الفندق وكعدنا ننتظرهم حسب التعليمات
دقايق وصار التجمع طلعنا لكينا باص منتظرنا صعدنا وتوجهنا للمكان اللي راح ينعقد الاجتماع بيه، وكف الباص كبال حديقة كلش كبيرة كالوا انزلوا، نزلنا جنا مثل الدمى وين ما يوجهونا نتوجه شلون ما يحركونا نتحرك وصلنا لوسط الحديقة وطلبوا من عندنا نكعد بشكل دائري وكعدنا على الحشيش بدون اي شي
بقينا كاعدين قريب ساعة ونصف وصفت سيارة لاند كروز حديثة فضية اللون تخبل لمعتها، ترجل منها الزعيم بخفة ومد ايده نزلت المدام كفها عانق كفه ومشوا متوجهين ألنا زحت بعيوني عنهم لهيت نفسي بأي شي كدامي او بصفي المهم ما ابقى مركزة وياهم
توسط المكان سلم علينا صوته تعبان وبيه بحة قوية بدأ يحجي ويمدح بالموجودين وشلون هو عنده ثقة مطلقة بيهم وسبب سفرتهم هاي هسه يلا عرفتها من كال
اينار : جبتكم هنا حتى اكدر احجي وياكم براحتي واضمن عدم تواصل اي فرد من افراد حزب سمعان بجيشنا بالوادي اعرف كلش زين وية منو حاطط ثقتي ومسلم مفاتيح الوادي لولاكم مانكدر نسوي شي ولولا امانتكم جان انسد المكان من زمان
رفعت عيوني باوعتله جان هزيل بشكل وتعبان بالكوة يجر النفس معقولة كلامي هيج جرحه وتعبه لدرجة صار بيه كل هذا وبهاي الهيئة، تعب طلب كرسي يكعد عليه وكعد أخذ نفس عميق واسترسل
اينار : اي قانون من القوانين الجديدة اني ما معترف بيه نهائياً هذا اللي بيني وبينكم اما ظاهرياً احنا ايد بإيد وية حزب سمعان صار معلوم؟
جزار : معلوم زعيم
لامي : معناها نشتغل مثل قبل بس بالخفاء
اينار : لا مو بالخفاء، نسوي اللي نريده بمعلومهم وبموافقتهم
لامع : وشلون؟ اكيد راح يرفضون
اينار : بالحيلة نشتغلهم بالحيلة
سنارة : وضحلنا اكثر زعيم دخت اني
اينار : جبتوا القصاصات اللي بالجنط مالتكم؟
هزوا راسهم بأي، همس بجهد وتبعه كحات خفيفة لزم صدره عصره بقوة وكال
اينار : متأكد فتحتوها وقريتوها؟ اللي اريده منكم تقرولي المكتوب، ابدي ستيرة
ستيرة دنكت وفتحت الورقة حضنها زوجها وباوع وياها للورقة
ستيرة : أرهب الآخرين بالمفاجئات وأكسر التوقع
هز راسه وبعدها طلب من ابلج فتح ورقته ويقرأ اللي بيها
ابلج :لا تُلزم نفسك بالولاء ﻷحد
رفع راسه باوع للزعيم وكال
ابلج : للموت ولائي للزعيم
اينار : المقصود بيه أعمق من اللي فهمته يا ابلج
بعدها طلب من شكيب يفتح ورقته
شكيب : استدرج فرائسك بالتظاهر بأنك اقل منهم دهاء
وبعدها كل واحد فتح ورقته وقراها بالتتابع
محاج : ركز ضرباتك
لامي : احرص على إخفاء أخطائك
لامع: أبتدع صيحة او مذهباً ليتبعك الناس ويمجدّونك
ساهد : نفذ مخططاتك بجرأة ودون تردد
سنارة : تصرف برشاقة ولا تظهر معاناتك في إنجاز الأمور
سوارة : تحكم بأوراق اللعب، اجعل الآخرين يختارون من البدائل التي تحددها لهم
سنود :خاطب في الناس آمالهم وأحلامهم وليس واقعهم
عافي : اكتشف نقاط الضعف لدى كل مَن تتعامل معهم
باهي :لا تتدنى ابداً في تصرفاتك تصرف كَملِك تعامل كَملِك
ساهي : حرك الماء الراكد لتدخل الاسماك في شباكك
جزار : اضرب الراعي لتتشتت الخراف
سفانا : ساير الأحداث دائماً ولا تتجمد في قالب محدد
ساتي : أدعُ الناس للتغيير لكن لا تُغير كثيراً في خطوة واحدة...
اينار : بالضبط ستيب باي ستيب يعني خطوة خطوة لحدما نقنعهم باللي نريده وينجبرون يسووه
وبدا يشرح كل قاعدة من القواعد اللي مكتوبة ختم كلامه
اينار : جرد عدوك وأفقده إتزانه بإستراتيجيبة المرآة، بمعنى المرايا تعكس الواقع لكن بنفس الوقت تشوهه لذلك فهي ادوات بارعة بالمكر والخداع هذه الاستراتيجية تحاكي افعال الآخرين لتشوشهم وترهبهم وتفقدهم تفكيرهم المتزن او لتفتنهم وتشعرهم بأنك تفهم ما في اعماق نفوسهم او لتلقنهم درساً يجعلهم يتذوقون ما جَنت ايديهم وعليه اول ما نرجع يتغير ديكور الوادي من الحائط الاعتيادي الى مرآة وهاي اول ضربة راح نضربهم بيها...
وعلى فكرة اللي قريتوه من كتاب اسمه قواعد السطوة راح اوزعلكم منه نسخ تقرأون كل نقطة انكتبت ألكم وتحفظوها صم واريد تتعمقون بيه حتى اللي اريده منكم تسووه بحذافيره
تجاهلنا اني وسديل تماماً بعدها سكرة كالت
سكرة : زعيم خيلاء وسديل ما عرفنا شنو بقصاصاتهم؟
ألتفت عليها عاكد حاجبه رجف حلكه بعدها تمالك نفسه كبح جماح غضبه وكال
اينار : يلا نسمع
فتحت سديل ورقتها وقرت اللي بيها بعدها اجى دوري فتحت القصاصة وايدي ترجف تملكني الشك يكون هو همام او مو هو؟ لهذا كمت اقرأ كلمة كلمة وارفع عيوني اباوع ملامحه ونظرات عيونه الهاربة مني
خيلاء : بيني وبين قاتلي حكاية طريفة
باوعتله سحب نفس قوي استرسلت
خيلاء : فقبل أن يطعنني حلفني بأمهُ الشريفة
اشتاط غضب المكتوب الكعبة الشريفة واني ما اعرف ليش من اشوفه كدامي بس أريد اوجهله طعنة وضربة وأأذيه بيها بلعت ريكي مراقبته وكملت بدون ما اباوع بالورقة لأن حافظه الباقي صم، عيوني بعيونه اللي جان مضيقها ومركزها علية
خيلاء : أن احبس الدماء عن ثيابه النظيفة
لأنه سوف يصلي بعدما يفرغ من تأدية الوظفية
الكل سكت وساد الصمت بعدها طلب المغادرة من الكل وابقى اني وياه بس
سكرة: اني هم؟؟
بدون ما يباوعلها ومركز عيونه علية جاوبها
اينار : وانتِ هم
الكل لبى الأوامر وتركوا المكان متوجهين للباصات وحتى سكرة صعدت وياهم
من صرنا وحدنا قرب الكرسي حطه كبالي وكعد عليه عكس وكال
اينار : شنو قصدج بأمه الشريفة؟
اني ما كاتب اللي حجيتيه
خيلاء : المفروض اسأل وانت تستمعلي ساكت وتجاوبني من اطلب الجواب
بقى ساكت ويباوعلي بلع ريكه تحركت تفاحة آدم
خيلاء : من تخطط وتكتبلي شي وبعدين تعيشنياه شنو تسمي هذا الشعور
بصوت باهت كال
اينار : شنو تقصدين؟
خيلاء : القصاصات اللي جانت تنكتب بأيام الكلية وتتخلى بالجنطة او بالملزمة او على الستول وبداخل الدفتر ونفس العبارة من العبارات اللي انكتبت وما فهمتها بوقتها عيشتني بيها بحدث حقيقي
اينار : هم ما فهمت!!
خيلاء : هاي القصاصة مو انت كتبتها؟
اينار : اي اني
خيلاء : تعرف معنى اللي مكتوب بيها؟
اينار : اي اعرفه
خيلاء : هذا الكلام اني قاريته قبل كم سنة وهسه رجعت قريته نفسه
اينار : احتمال صدفة
صحت بصوت عالي راسي حسيته اشتعل نار
خيلاء : بس اني عشت هاي الصدفة
اينار : تشابه كلام مجرد تشابه ليش مكبرتها
خيلاء : تشابه كلام وتشابه قصاصات نفس الطريقة اللي انكتبلي بيها هسه انت كتبت النا كلنا عدا هذا الشي اني عشت الموقف
اينار : شنو عشتي الموقف فهميني لا تبقين تصيحين
خيلاء : عشته للموقف اللي بداخل القصاصة، كلكم تآمرتوا علية ووهمتوني على اساس انت رايح بمهمة ولازم اجي وراك وامنعك واجيت وقتلت واحد بدم بارد وبعدها اخذتني لبيت وفرشت سجادة وعادي صليت من سحبتها من جوة رجليك ومنعتك تصلي وبعدها صار اللي صار
رفعت راسي للسماء ولزمته بقوة وكمت اصرخ اتهسترت
خيلاء: يا الهي هواي اللي كاعد يصير راح اتخبل اريد عقلي اريده حرام عليكم حرام
ما سكتت بقيت احجي الى ان رن موبايله وبلغوه اكو مداهمة من قبل الشرطة للوادي