رواية طبيب الحب الفصل الخامس عشر 15 والسادس عشر 16 بقلم مياده
الحلقه 15
مازن قفل مع مامته
محمود:مش هتكمل اليومين معانا
مازن:لا مش هينفع عندى عمليه البنوته اللى قولتلك عليها وعندى شويه مشاكل
محمود:ولا خلاص مش طايق تقعد هنا
مازن:الاتنين قلبى وجعنى اوى منها
محمود:على فكره هى كمان بتحبك انا شايف نظراتها ليك كلها توسل انك تسامحها
مازن:والله ما شوفتش اللى ماسك اديها
محمود:هى مش طيقاه وحتى مش شيفاه قصادها بص فى عنيها وانت هتعرف
مازن:الله يخليك يا محمود انا مش ناقص انا بكره بإذن الله همشى
محمود:خلاص براحتك
فى المستشفى
نفين:هى فين لبنى
ايمن:دخلت تشوف مدام مروه
نفين:أحسن برضو علشان عيزاك
ايمن:فى حاجه
نفين :اه اكيد عايزه بس اوضحلك حقيقه مازن اللى انت معجب بيه ده لانه بنى ادم حقير
ايمن:ليه بس كده ده حتى بيشكر فيكو وفى دكتور عبد السلام
نفين :بعد ايه بعد ما خلاه عايش بقهرتو واتشل بسببه
ايمن:ايه اللى انتى بتقوليه ده
نفين:انا هحكيلك انا ومازن كنا فى اخر سنه وكنت انا وهو اشطر اتنين وكنا هنتخصص فى نفس المجال وطبعا علشان انا بنت دكتور عبد السلام والانظار كلها هتتوجهلى سلط ناس عليا واتورط فى قضيه ظلم وبابا ساعتها اتشل فيها
ايمن:معقول
نفين:لا وما اكتفاش بكده ده حاول يلعب لعبته الدنيئه مع لبنى وهى فى امتياز وفضحها
ايمن:بس باين ان مامتك بتعامله بحب لو هو كده
نفين:ماما للأسف طيبه جدا ومش مصدقه كل الكلام ده
ايمن:غريبه لبنى عمرها ما جابتلى سيرته
نفين:واوعى تحكيلها حاجه عن اللى قولته علشان لو عرفت انى حكيتلك هتزعل
مازن من بليل كان حجز تذاكر السفر صحى الصبح حضر المؤتمر كان لابس بدله كحلى شيك جدا وبرفان ريحته واصله لاخر الفندق حضوره كان ملفت جدا للأنتباه وكان محضر شنطه وأول ما خلص المؤتمر طلع اخذ شنطه ونزل مستنى العربيه اللى هتوصله وفى نفس الوقت كان الدكتور كتب لمروه على خروج واخذوها فى تاكسى ايمن ونفين ولبنى وصلو عند الفندق كان مازن بيحط شنطه فى العربيه وبيركب اول ما لمحهم نزل فتح الباب لمروه
مروه:حبيبى انا كنت عايزه اشكرك
مازن:على ايه بس انتى حبيبتى
مروه:لبنى حكيتلى انك شيلتنى وجريت بيا
مازن: ده اقل حاجه اقدر اقدمهالك حضرتك عارفه غلاوتك وغلاوه الدكتور كل ده ولبنى قاعده جنب مروه بتتنفس بصعوبه وبصاله اخيرا بص للبنى نظره كلها عتاب
مروه :انت رايح فين
مازن:انا عندى عمليه ولازم ارجع اسكندريه ضرورى حاولى تيجى تكملى علاجك فى المستشفى عند محمود علشان اخد بالى منك
مروه:هو محمود عرض عليا كذا مره
مازن:وايه اول ما تروحو تعالى على طول
مروه :حاضر وانا اقدر ارفضلك طلب
مازن بص للبنى ورجع بص تانى لمروه :اشوف وشك على خير
سافر مازن بس طول السكه لنفسه:ما تنسى بقى هى اصلا نسيت حبت تانى انت مجرد صديق وهتفضل كده وايمن طيب ويستحقها وبعدين انت لسه بتفكر فيها ليه
مازن وصل على بيت مامته
سلوى بعياط:حبيبى وحشتنى جدا كل دى غيبه
مازن:بتعيطى ليه طيب ما انا جيت اهو
بعد ما سلم عليها وقعد شويه
مازن:امال فين ادهم وزياد
سلوى:ادهم هيجيب عياله ويجى وزياد نايم جوه
مازن:واللى نايم جوه ده ماطلعش يسلم عليا ليه ودخل للغرفه بتاعته
مازن:والله ما انت صاحى اهو امال ما طلعتش سلمت عليا يعنى
زياد:ما سمعتش صوتك انك جيت
مازن:اه ولما سمعتو دلوقتى برضو لسه قاعد وما قومتش سلمت
زياد:معلش اصل لسه صاحى ومش مركز
كل ده وزياد ما اتحركش من مكانه
مازن:فى ايه يا زياد ما تتكلم وتجيب من الاخر
زياد:فى انكو معيشينى طول عمرى فى كدبه واكيد امك حكيتلك وعيطتلك وانا جى دلوقتى علشان تعمل فيها الكبير وتعلمنى الادب
مازن:الاسلوب ده معايا من امتى انت عايز ايه دلوقتى عايز تروح لعماتك احنا حظرناك بس عايز تروح روح وانسى ان ليك ام واخوات مش عايزين نعرفك تانى
زياد:انت بتمسكنى من ايدى اللى بتوجعنى مش انا مفكر هتهددنى
مازن:ولا اهددك ولا تهددنى اللى عندى وقولته
هنا ادهم دخل عليه سلم على مازن وحضنه
ادهم:صوتكو واصل للشارع تحت
زياد:اوعى تفتكر انت وهو انى لسه صغير وهتقولولى اعمل ايه لا انا كبرت
مازن:انا همشى علشان مش بيفهم يابنى افهم مش هتستفاد حاجه غير وجع الدماغ
ادهم:مازن خلاص سيبك منه انا وامك غلبنا معاه اعمل اللى انت عايزه يا زياد
مازن بعد ما ارتاح نزل المستشفى شاف البنت اللى لازم يعملها العمليه كانت بنوته صغيره اموره اوى فضل يحايل فيها لحد ما اطمنتلو واتفق مع باباها انه هيعمل العمليه بعد يومين باباها ومامتها كانو بيبصولو كانه اخر امل ليهم
مازن:اطمنو بأذن الله خير
بعد اسبوع بالظبط كان عمل العمليه والبنت ابتدت تتحسن مدام مروه جت المستشفى وابتدت تاخد العلاج
مازن من وقت للتانى بيروح يشوفها وقابل دكتور عبد السلام وكل ما يروح لازم يشوف ايمن معاهم واقف جنب لبنى مره لبنى كانت هى وايمن لوحدهم
لبنى:انا متشكره ليك جدا انا لو ليا اخ مش هيقف معاياا كده
ايمن:اخ هو انتى بتعتبرينى اخ يا لبنى
لبنى:ايمن انا دلوقتى مش فى مجال انى افكر فى حاجه او احس بحاجه موضوع ماما وكده فاهمنى
ايمن:هو الاحساس ده بمواعيد
لبنى:ايمن حاول تفهم انا مضغوطه من كل الجهات مش برفضك انت شخصيا لا
ايمن:لبنى فى حد تانى فى حياتك صح
لبنى:والله ابدا لو فى كنت انت عرفت
ايمن:لا فى انا شايف نظراتك انتى ودكتور مازن شايفك بتبصيله اذاى وهو كمان
لبنى:كان فى وخلص وموصلناش للحب كنا صداقه وبس ايمن:حتى وانتى بتتكلمى عنه عنيكى بتلمع انا هوعدك انى مش هحاول اقربلك تانى
لبنى:ايمن انت فاهم غلط انا ومازن مش هينفع نكون لبعض اصلا خلاص موضوعنا اتقفل قبل ما يبدأ ارجوك حاول تفهمنى خلينا اصدقاء لحد ما اعصابى تهدى شويه انا متلغبطه بس محتجاك جنبى ماتسبنيش فى وقت ذى ده
ايمن:انا معاكى مش هسيبك ما تقلقيش
ياترى مين هيقرب ومين هيبعد؟
الحلقه 16
فى بيت سلوى
زياد:انا روحت لعمتى وكلامكو عنها غلط خالص قابلتنى حلو جدا
سلوى:برضو ما سمعتش الكلام
زياد:يا ماما هى كل همها اننا نزور بابا يمكن يفتكرنا ويخف
سلوى:يفتكر مين هو انتو بنفس الشكل ؟
زياد:اهو نعمل اللى علينا لعل وعسى
سلوى :اعمل اللى تعمله بس متدخلنيش ولا انا ولا اخواتك فى الحوار ده
زياد:يا ماما مش هو ده اللى حبتيه وباع اهله علشانك دلوقتى رمتيه
سلوى:شوفت بقى كلام عمتك اللى انت بتعيده
زياد:علشان عندها حق
فى المستشفى
والد جنى البنوته اللى مازن عملها العمليه
جنى:انا بحبك اوى يا دكتور مازن
مازن بأيتسامه:وانا يا روحى بحبك جدا انتى ذى القمر وخفيتى وبقيتى كويسه وهتلعبى مع اصحابك
والد جنى:انا الصراحه مش عارف اقول ايه لحضرتك انت كنت الامل لما خلاص سلمنا انها هتموت لو فضلت اشكرك طول عمرى مش هوفيك حقك
مازن: ربنا يتمم شفاها على خير انا ما عملتش حاجه ده شغلى هى كدا عدت الخطر بقالها اسبوعين محجوزه هنا هكتبلها خروج النهارده تريح شويه فى البيت وبعدين تمارس حياتها الطبيعيه
والد جنى:شكرا جدا يا دكتور
مازن فضل فى المستشفى بس طول اليوم وهو مبتسم وفرحان حاسس ينتيجه تعبه وسفره لما عمل المستحيل علشان البنوته دى ونجح
وفى اخر اليوم كان ماشى :ميعاد الزياره خلص اكيد محدش موجود مع مدام مروه اما اروح اطمن عليها علشان بقالى اسبوعين ما شوفتهاش وصل عند اوضتها
لقى لبنى لوحدها بره بتلم حاجتها وبتعيط
مازن:السلام عليكم
لبنى بصتله وعنيا كلها دموع:وعليكم السلام
مازن:ماما عامله ايه
لبنى :تعبانه جدا انا خايفه عليها اوى
مازن:ما تقلقيش هتبقى كويسه بس انتى ادعيلها وبطلى عياط بقى
لبنى:حاضر
مازن:امال فين خطيبك
لبنى:خطيبى!! مين خطيبى ده انا مش مخطوبه
مازن:اه صح انتو لسه ما اتخطبتوش
لبنى:ايه اللى انت بتقوله ده بتتكلم عن مين
مازن:عن دكتور ايمن شكلى كده عكيت الدنيا اصل هو كان قايلى انه هيخطبك بس شكله عملهالك مفاجأه ما تقولهوش انى قولتلك
لبنى بغيظ: مفيش حاجه من دى احنا اصدقاء وبس
مازن:ااه نسيت اصل انتى بتقدسى علاقات الصداقه اللى فى الاخر بتتحول لحب
لبنى:انت جاى تستفزنى مش كده
مازن:لا ابدا انا اصلا مش جايلك انا قولت الوقت اتأخر اروح لمدام مروه فرصه مايكونش عندها حد علشان مش عايز اشوف حد فيكو
لبنى:ولما انت مش عايز تشوفنا بتتكلم معايا ليه
مازن:شفقه اصل شوفتك بتعيطى صعبتى عليا قولت اكلمك
لبنى:ماما عندك جوه انا ماشيه مش عايزه ضغطى يعلا
دخل مازن عند مدام مروه يسلم عليها
فى فيلا الصواف
فاديه اخت فهمى بتتكلم مع جوزها شوقى
فاديه: مش قولتلك هتخاف منى ولو عرفت انى وصلتلها
شوقى:وخافت منك اذاى بقى
فاديه:اكبر دليل اهو بعتتلى زياد بتسكتنى بيه
شوقى:هى شغلاكى ليه ما تسبيها فى حالها
فاديه:اسيب مين دى السبب فى ان عيلتى ادمرت السبب فى موت امى وابويا ودخول فهمى مستشفى المجانين وفى الاخر تقولى سبيها فى حالها
شوقى:مش هى السبب ولا حاجه انتى هتنسى ان اهلك كانو موافقين عادى على الجوازه وانتى اللى فضلتى وراها لحد ما كرهتيهم فيها
فاديه:مش عرفت حقيقتها وكانو لازم يعرفو
شوقى :حقيقتها اللى هى ايه انها بنت عامل بسيط فى شركه ابوكى بس على فكره ده مش عيب وهى ما خبتش عليكو علشان انتى تكتشفى اخوكى اللى كان مخبى علشان خايف من تفكيرك وحتى بعد ما اتجوز عمى كان هيرضى علشان عايز يشوف احفاده وانت فضلتى تبوظى العلاقه لحد ما قطعتيهم من بعض
فاديه :هو كان مفكر انه هيذل بابا لمجرد انه خلف
شوقى :استفادتى ايه بقى اخوكى من الزعل اتجنن وعمى وطنط من زعلهم عليه ماتو بقهرتهم
فاديه:هى لو ماكنتش دخلت ما بينا كان زمانهم عايشين
انا مستنيه كل ده علشان انتقم وهنتقم منها ومن اللى هى فرحانه بيهم ومتحاميه فيهم
شوقى:حرام عليكى سبيهم فى حالهم انتى علشان مش عارفه قيمه الضنا عايزه توجعيها بيهم
فاديه:ايه يا شوقى انت بتعايرنى وبعدين انت معايا ولا معاها
شوقى:ولا تعايرينى ولا اعايرك
وقام مشى وسابها
فى بيت سلوى
مازن:فى ايه يا ماما هنفضل فى النكد والعياط ده كتير
سلوى:برضو راح وما سمعش الكلام
مازن:سيبك منه يروح وهيرجع ذى الجذمه
سلوى:اذا كان راجع يدافع عنها ويتكلم بأسلوبها وقالى لو مش عايزينى هروح اعيش معاها فى فيلا الصواف
مازن:قوليلو روح
سلوى :هو انا لسه هقوله هو اصلا اخد شنطه وراح يعيش معاهم
مازن:بتتكلمى بجد؟؟
تلفونه رن والد جنى
مازن:السلام عليكم
والد جنى :دكتور مازن
مازن:فى حاجه
والد جنى:جنى مامتها بتصحيها الصبح مش بتصحى ومش بترد
مازن:اطلع بيها بسرعه على المستشفى وانا هحصلك
وقفل التلفون
مازن:ماما معلش انا لازم انزل بسرعه
سلوى:على مهلك وسوق بالراحه
مازن نزل جرى ركب عربيته وساق باقصى سرعه وصل المستشفى ودخل جرى كان دكتور عبد السلام ونفين ولبنى ساندين مدام مروه وواقفين فى الاستقبال
عبد السلام:هو مازن بيجرى كده ليه
لبنى :هتلاقيه مستعجل او راه حاجه
عبد السلام:ربنا يعينه
مازن دخل الاستقبال بسرعه وجرى لقى والد جنى ووالدتها واقفين بيعيطو ومعاهم دكتور
مازن للدكتور:ايه اللى حصل
الدكتور:البنت متوفيه من اكتر من ساعتين
مازن:ليه ايه سبب الوفاه
الدكتور:مفيش سبب امر الله
مازن:اذاى يعنى البنت خفت واتعافت وبقالها شهر كويسه ايه اللى حصل
الدكتور:موت طبيعى مفيش سبب امر ربنا
مازن دخل بسرعه على الاوضه اللى فيها جنى لقى الممرضات بيلمو الاجهزه من حوليها :علقو الاجهزه تانى
الممرضات:يا دكتور الحاله خلاص اتوفت
مازن بزعيق:قولت علقو الاجهزه تانى
علقو الاجهزه مازن حاول بكل الطرق يعملها انعاش بس طبعا معرفش
الدكتور:يا دكتور مازن بتعمل ايه
مازن:ما ينفعش تموت مفيش اى غلطه فى العمليه لازم تعيش
الدكتور بعد مازن عن جنى
الدكتور:يا دكتور افهم مفيش غلط موتته ربنا البنت ربنا كاتبلها كده
مازن خرج من الاوضه مش شايف قدامه لقى محمود
محمود:فى ايه يا مازن
مازن سابه ومش ونزل جرى كان وشه احمر جدا وباين عليه انه هينفجر فى اى لحظه ومحمود نازل وراه
عبد السلام:اهو مازن نازل تانى اهو
مازن بيمد جامد علشان يخرج بره المستشفى ومحمود بينادى عليه وهو مش بيرد
لحد ما خرج وركب عربيته وساق بأقصى بسرعه
لبنى:هو فى ايه
نفين:هتلاقيه عمل مصيبه ذى عوايده وبيهرب منها
عبد السلام:يا شيخه حرام عليكى هتلاقيه فى مشكله
لبنى:فعلا انا اول مره اشوف مازن متنرفز كده ربنا يستر
عدى يومين مازن مجاش المستشفى
لبنى بتروح مع مامتها المستشفى وبتدور عليه بعنيها مش بتلاقيه وهتتجنن كان فى ممرضه بتساعدهم على طول
لبنى:هو فى اى مشكله حصلت من يومين كده
الممرضه:لا مفيش ليه بتسألى يا دكتوره
لبنى:اصل كنت شايفه دكتور مازن نازل متنرفز اوى
الممرضه:اااااه اليوم ده اصل فى بنوته دكتور مازن تعب معاها جدا وكان فرحان جدا ان عمليتها نجحت لان كان فيها نسبه خطوره عاليا والبنت كانت ذى القمر وخفت وكان فرحان بيها جدا وروحت بيتها وبعد يومين بالظبط ماتت موته ربنا ده دكتور مازن كان شكله يقطع القلب وبقاله يومين مجاش المستشفى
لبنى: اه حاجه تزعل فعلا