رواية العروس في الثوب الاسود الفصل التاسع والثلاثون 39 بقلم عبير ادريس

   رواية العروس في الثوب الاسود الفصل التاسع والثلاثون 39 بقلم عبير ادريس

مرت الايام خلصت العدة وسند كبر صار عمرة سنة ونصف بدا يفتهم و كام يختنك من الشقة يريد ينزل جوا صح ييجون عمامه ياخذوه بس ساعة وحدة ويرجعوه باقي الوقت يمي ميكدرون يبقوه اكثر لأن ملتهين بشيماء  ، ونور مقسومة اقسام بين الخطار وبين البيت وبين جهالها ورجلها وبين شيماء وايهم وبيني وحبيبتي رغم كل التعب تجيني باليل دمعتها على دمعتي وتكعد تواسيني وتصبرني ...

سند كام يكول امه وابه بلفض واضح يموتني من يحجيها كابلته وكعدت دموعي تنزل واهمس...

رسيل : حبيبي اني وياك اثنينا عشنا نفس المصير ونفس الحظ اني تيتمت من وكت وماما عافتني وانت ابوك عافك 

بس ادعي من ربي حظك يكون احسن من حظي وتنسعدك وترتاح بحياتك مو مثلي تتعلعل..

ابجي وهو يباوعلي ويضحك عباله كاعد العب وياه ، بهاي الفترة ابد ما قصرت وية ابني رغم حزني وگلبي محترك على ابوه بس جنت مهتمة بيه وبأكله وقت بوقته اسبحه وابدله وانومه من وقت..

حسيته نعس اخذته بحضني نام كمت  خليته بفراشه ورحت توضيت صليت المغرب واخذت القران حتى اكمل الختمة واهديها على روح مروان ، من توفه لليوم  بالشهر مرتين اختم القرآن واهديه لروحه انظم لختماتي وية بابا وماما سبحان اللي زرع معزتك بقلبي وحط حركة بية ما تطفى ليوم لو يرجع بية الوكت لو بس ما يفيد الحجي بعد راح واخذ كلشي حلو وياه

اخ اخ من عذابي ولوعتي 

كملت الختمة هديتها لروحه مروان ابن شيماء بعدها رحت مددت بغرفتي .. يومي هيج اكضيه بين سند وصلاتي وقراءة القرآن سبحان الله شكد انقهر واكو وجع بقلبي بس من اقرأ القرآن ارتاح كأنه اسفنجة وتمتص الألم ...

 مرت ثلاث اشهر ونصف كل خميس نسوي ثواب على روح مروان والناس الجان متكفلهم  ايهم وياسر كملوا مسيرته ..

 وبيوم كعد سند ساعة سبعة الصبح شبعان نوم من المغرب نام وصل للباب يريد يطلع يبجي ويدك بيها تعود على عمامه يعرف اذا دك الباب ييجون ياخذوه 

سمعت صوت ياسر يصيح

ياسر: ها عمو تريد تجي ؟ كول لماما تفتح الباب حتى اخذك 

سكت باوعلي وضحك اسنانه بيننن

وكف دك وشهك بفرحه 

يعني افتحي الباب اجاني عمو واريد اطلع لبست حجاب فتحت الباب اخذه وراح،  ياسر من يوم وفاو مروان لحد الآن ، سلام ما يسلم علية حتى ما اخذ من خاطري هو ضايج مني من يوم اللي انهزمت ساءت العلاقة بيني وبينا وبعد ما رجعت من هذاك الوقت بس جنت اسلم  يرد السلام من وراه خشمه هسه حتى السلام كطعه مرتين ييجي ياخذ سند اسلم ما يرد اني هم بطلت اسلم عليه دخلت للغرفة مددت ما كدرت انام كمت حتى اكمل شغلي مادام سند اخذه ياسر عندي ساعة ونصف استغلها قبل لا يروحون للشغل  نظفت الشقة مسحتها اكثر من مرة علمود سند ، اي شي ياكله ويوكع بالكاع يرجع يخليه بحلكه ،  اخاف عليه كلش بحيث صار عندي هوس بالنظافة من وراه

كملت كلشي سبحت وبدلت ،لبست دشداشة ردان وجواريب وشال 

من انزل جوا صار هذا لبسي  كمت احسب حساب لكلشي  احس مروان يشوفني ويحس بية لهذا اريده يفرح من يشوفني حافضه غيابه  صح تأخرت ولازم من هو موجود هيج اسوي بس بعد عقل طفلة جان رغم آخر سنتين  ألتزمت بكلشي يكولي عليه من حجابي من تصرفاتي كلشي احسبله حساب   بهذه السنتين ما خنته حتى بالفكر  ولا حنيت لأيهم وبديت اتعود عليه وكلت خلص صرت حامل وهو زين ويحبني  اعيش حياتي هذا هو بس بعد مكتوبلي هيج  الحمدلله على كل حال 

نزلت جانوا الولد يريدون يطلعون ايهم شايل سند ويبوس بيه  يشيله ليفوك وينزله  وسند طاير من الفرح  بس يضحك 

ياسر: يلا يمعود تأخرنا

ايهم: ولك هذا ما ينشبع منه ما تشوفه؟ 

علي: عمت عيني اخ يايابه عبالك ابوه من جان صغير  نفس شكله الله اخذ مروان الجبير ونطاني مروان صغير 

حجاها وكام يبجي عمي انكسر على مروان مو بس هز الكل حتى اخواته و امه انتهت  لا ايد ولا رجل كسرنا وكسر قلوبنا...

طلعوا الولد بديت اشتغل وية نور وسند يم عمي تركته..

نور: ريكي ابنج خطية صارله هواي كاعد 

رسيل: ما ياكل هسه لان شرب حليب ، ورا ساعة تسعة يلا ياكل

نور: براحتج 

حجتها وجرت حسرة

رسيل: نورة شبيج ؟

نور: كولي شنو اللي مابيج ؟ فوك التعب والضيم والقهر على مروان النوب ياسر 

رسيل: شبيه ؟

نور: من يوم وفاة مروان لهذا يومج ، لا ياكل لا يشرب نومه قليل عصبي اقل حجاية يتنرفز ويتعارك الجهال لو طلع صوتهم  يضربهم هذاك اليوم لو ما انه موجودة جان خلص على اية

رسيل: حقه اعصابه تعبانة مو سهل اللي صار مروان كسرنا كلنا...

نور: ادري  وانه متفاجأة هو ما جان هيج وية الجهال جنت اذا اصيح بيهم  يتخبل هسه شيسوي بية يسوي  ما اهتم فد الجهال كاسرين خاطري ييجون يمه  يكوم ينام يصيح ما اتحمل صوت 

رسيل: الله يصبره ويصبرنا ان شاءالله 

نور: امين 

جريت حسرة ومشت الايام على نفس الوتيرة اي جديد ماكو غير الحزن اللي مخيم على البيت واليوم النا ست اشهر على وفاة مروان دخلنا بشهر ١١ سنة ٢٠١٣ مروان توفى بشهر الخامس ٢٠١٣

الله يعلم شلون عدت علية الايام عيوني ما تاخذ نوم الليل كله اتذكر ايامنا وابجي ما ادري على سوالفه لو على دلاله  لو على شبابه اللي راح هيج  لو على اهله شنو صار بيهم من بعده لو ابجي على ابني لو على نفسي

ضعت وتايهة ماعندي هدف بالحياة اصعب شي بالدنيا من تعيش وماعندك هدف  حتى تطمح تحققه وتوصله ، مرات الهدف مو الا يكون عبارة عن مشاريع او دراسة لو فلوس لا الهدف اللي جنت اريد اوصله  من جان مروان عايش اكبر هاي العائلة واجيب بعده اطفال جنا متفقين نسويهم اربعة وبأعمار متقاربة لان مروان مو صغير 

كلت اربيهم وادللهم شلون بابا ربانا ودللنا امشي على نهجه بس مرات هم اكول الف الحمدلله عندي سبب اعيش علموده

سند اكبره واربيه احسن تربية ويطلع سبع على ابوه مادام راح يعيش يم عمامه اكيد ياخذ اطباعهم وراح اكون مرتاحة بوجوده بوسطهم ماراح يحس بالغربة..

وبيوم كاعدين دخل علينا ايهم شايل لوحة كلش كبيرة مغلفة فتح التغليف صورة مروان  واكف بيها ويمه اسد وعلم العراق شلون صورة تكطع القلب جان ضاحك بيها ضحكة تخبل ..

سند من شافها ركض عليها وصاح بابا جانت كبيرة وواضحة  عباله واكف ويضحك وياه جان شايل بيده جبس مد ايده الصغيرة يريد يوكله بعدين كام يضرب على الصورة ويبوس بيها نزلت دموعي من وحدها منظر مؤلم بشكل...

علي : شلون يعرف ابوه يا حبيبي ياجدو 

رسيل : من استشهد مروان كل يوم احجيله لسند على ابوه واشوفه صورته  اكوله هذا بابا يحبك ونسولف وية الصورة لهذا من شافها عرفه

علي : وين صورته ؟ فوك

رسيل : اي عندي فوك صورة بيها هو وابوه لابسين زي عربي دشاديش وعكال بوقتها طلبت من مروان يكبرها ويخليها بأطار علكتها بالهول بس صغيرة مو بكد هاي الصورة...

علي : ما شبع من ابنه ولا تهنا بيه جان فرحان بجيته..

رسيل : يحير شنو يجيبله من ملابس والعاب فرحان بيه وطيلة فترة نزوله ماجنت احس عندي طفل كله بيد مروان حتى باليل مرات من يبجي اكعد ألكاه  كاعد قبلي ومخليه بحضنه لو من مريض يضل يفتر بيه للصبح بكلشي ساعدني بكلشي حتى من اطبخ ييجي يمي نبقى نسولف  لو من انظف واكو شغلات ما اكدر عليها هو يساعدني بيها  من انزل البردات وياية هو لو من نفرش الشقة فراش الشتا اخ اخ 

علي :  وين جان مروان كلاص مي ما يجيب لنفسه كلشي ييجي يمة.

ما اعرف ليش حجيت كل هذا الحجي بس جنت احس اريد احد يسمعني اريد ذكرياتي تطلع على شكل كلام تعبت اكبتها بداخلي...

ايهم جان يسمعني وصافن علية وقبل لا احجي من شاف سند كابل صورة ابوه دموعه نزلت قبل عمو يخلص كلامخ عاف الصورة واطلع برا ما علكها...

وضلت الصورة لليل بمكانها ما ألهم گلب يتقربون منها كمت خليتها على صفحة اخذت سند وصعدنا لشقتنا

ثاني يوم نزلت معلكيها 

بهذه الست شهور ياسر وايهم تكفلوا بكلشي يخصنا اني وابني من مسواك  و ملابس ما جنت ألحك اطلب شي ألكاهم جايبيه حتى عمي ما قصر ويانا 

اخواته هادئات بهاي الفترة او الاصح مكسورات  هم على مروان وهم على امهن الله يعينهن ويصبرهن،  عدت الايام هدوء مابيها اي مشاكل ومرت الايام واليوم سنة مروان  انكلبت الدنيا ، عبالك اليوم وفاته انفتح الجرح من جديد انعادت المأسات علينا سوينه السنة جابوا مله واتجدد العزاء رحنا للنجف و حالنا يرثى له اصعب بهواي من اول مرة زرناه بيها ما اعرف ليش يمكن بسبب الاشتياق ومرت بعدها الايام ودخلنا بشهر الخامس من سنة ٢٠١٤ 

بعدها بشهرين بشهر السابع جنت كاعدة و سمعت صوت هوسه بالبيت مشيت للمحجر اريد اسمع شكو 

علي: يابوية اتزوجها مو جانت نفسك بيها شغيرك ؟ 

ايهم: هذا الحجي قبل لا تصير زوجة اخويو وهسه اتحرمت علية حرمة الاخت على اخوها..

يحجي و صوته يرجف عصبي نار..

علي: من وين اجتي اختك ؟ وبعدين هاي زوجة اخوك واخوك راح  وابنها ياهو يربيه ؟ 

ايهم: انت كلتها زوجو اخوية لو اموت ما اخذ شي جان لاخوية ونفسه بيه وبالنسبة لسند احنا نربيه وين رحنا عنه ؟ انه وانت وياسر يعني الا تتزوج يلا 

علي: هذا حجيك النهائي ؟ 

ايهم: اي وبعد لا تعيده علية 

عفتهم ودخلت للشقة  عمي شبيه من عقله شنو هاي النفسية اللي عندهم  ابنك توها طالعة السنو مالته شنو تزوج مرته لاخوه خلي يسويها بية الا اكلب الدنيا فوك راسهم بكيفهم امشي يومية مزوجيني  قبل غلطت ومشيت وراهم هسه لو يموتوني ما اسوي اللي يريدوه

و مشت الايام بعدها محد فتح الموضوع 

وبيوم جنا ملتمين على الغداء من كملنا  ياسر  فتح موضوع وية عمي علي صدمنا بيه...

ياسر: انه وايهم  رايحين للموصل 

علي: شنيييي بوية ؟ تخبلت انت لو ناوي تموتني ؟ 

ياسر: لا اموتك ولا شي نوينا وخلصنا كل امورنا وراح نلتحق بالحشد 

علي: يا حشد هذا ولك لا تخبلني وتدمر اعصابي وانه منا تعبان وبعدني ما صاحي من كسرة اخوك تريدون تسكروني النوب ؟ 

ايهم: حجي منو ياخذ بثار مروان ؟  ترضاها نعوف دمه وما ناخذه يا يوم  تخلينا عن حگنا حتى هسه نتخلى عن دم اخونا ومو اخ عادي ونكول ينسي هذا مروان ما حاجة احجيلك عنه

عمي كام يبجي وصار عصبي 

علي: من منو تاخذون حگه ها من منو ؟  لا تعرفون جتاله ولا تندلون الهم طريق 

يحجي ويضرب على رجليه

ياسر: حجي قررنا والامر محسوم  واحنا جاي نبلغكم ما ناخذ رأييكم 

علي: اريدلي رجال يطلع منا  اتبرأ منكم ليوم الدين واذا استشهدتوا ما ابريكم الذمة ولا اريدكم  وما ادفنكم ...

اختنك كام يبجي ويلطم على راسه وتخربط انخبصنا بيه ياسر طلع جاب المضمد ورجع ...

ازهار: والله حرام عليكم  هذا الرجال حلكه يبس مو كافي اللي صارله من بعد مروان ناوين على موته ؟ 

ايهم: مو انتِ اللي تعلمينا شنو نسوي وما نسوي حلكج ما تفكينا..

ازهار: بس ...

ايهم: لا تبسبسين سدي حلكج

 عاط بيها بصوت عالي سكتها دارت وجهها ورجعت لغرفة امها ، بعد شوية عمي صار احسن وطلع جعفر...

نور: لج شفتي ، يريد اترمل وجهاله يتيتمون مو كلتلج ياسر تغير مو نفسه تكوليلي مصدوم هاي شوفي راح يروح من ايدي ويعوفني ويعوف بركبتي  جهال اثنين

رسيل: على كيفج حبيبتي احتمال بس حجي ما يسووها 

نور: يا بس حجي ولج يسووها وكولي كالت نور ما تعرفيهم اذا حطوا شي ببالهم محد يردعهم عنه اسأليني انه  وبعدين شكد صارلج يمنا ما عرفتيهم ؟  اذا كالوا نه نه انتهت ...

جريت حسرة وهمست..

رسيل: اي اعرفهم شلون ما اعرفهم الله يهديهم ويبرد قلبهم

لهناك دخلوا للبيت و ايهم حجى وية ياسر  بحزم..

ايهم: ياسر ما نكدر اثنينا نروح  شفت حال ابوي ، هذا يموت وذنبه بركبتنا 

ياسر: والحل شنو؟

ايهم: انت تبقى هنا وانه اروح فترة  وارجع انت تروح بعدها..

ياسر: شلون ؟ ما اخليك تخطي خطوة من غيري هالمرة تروح انت مني  غير اموت 

ايهم: ما اموت صدكني ، انه رايح وراد بحيل الله 

ياسر: مو بكيفك ايهم نروح سوة لو نبقى سوة

ايهم: شوف انه ماعندي لا وراية ولا كدامي  لا ابن اللي يتيتم ولا مرأة الي تترمل  فد انت تختلف عندك عائلة بركبتك يحتاجوك..

ياسر: صعبة ياخوية صعبة اعوفك تروح وحدك 

ايهم: اذا انه ماروح وانت ما تروح ياهو يدافع عن البلد ياهو يرد حگه وحك اخوي وحك هاي الشباب الحلوة الراحت 

ياسر: اي والله صحيح زين شوكت ناوي تلتحق ؟ 

ايهم: اسبوع الجاي بحيل الله 

ياسر: بالسلامة يالحبيب بالسلامة..

 حضن ايهم وطبطب على كتفه

نزلت دموعنا مثل الشلال عليهم  عمت عيني على خوتكم  بعدها سمعنا هواي شباب من منطقتنا ألتحقت شكد نطت البصرة شباب  حلوين واحدهم يسواله ألف زلمة سباع كلهم عرسان اعمارهم حلوة على ابواب زواج من يرجعوهم مستشهدين يزفوهم بمزايق ولافيهم بعلم مثل مروان..

كل يوم تقريباً جايبين شهيد ومشيعيه ومنصوبة فاتحة من اصعب السنوات اللي مرت على اهالي البصرة والعراق كله هي سنة ٢٠١٤ الموصل تدمرت بيها و الانبار و الفلوجة تكريت  الغربية كلها 

دمرتهم داعش ، انقتلوا وانسبوا وتهجروا وانخطفوا واخذوا نسائهم سباية كم وكم بيت اندمر واندمرت احلامه  راحت عوائل كاملة وانطفت بسبب ناس قذرة لا ذمة عندهم ولا ضمير اجوي بأسم الدين والدين بريء منهم اللي سوته داعش بأهل الغربية وبشباب الوسط والجنوب محد مسويه بالعالم كله لا شرع ولا دين يقبل بأفعالهم لا المسيحي ولا النصراني ولا المسلم سلم من شرهم 

العراق من شماله لجنوبه لاحته نار داعش وعانه ما عانه من الحروب والدمار بس ما نكول غير حسبي الله ونعم الوكيل باللي جان السبب ....

مرت اربعة ايام عمي تحسن وضعه صار احسن رجع ايهم فتح الموضوع وياه..

عمي راد عالج حتى بس يقنعه ماكو قافل  بعدها انصدمت من عمي كال

علي: اذا تروح ما ابريك الذمة اذا متت الا بحالة وحدة..

ايهم: وهي ؟ 

علي: تعقد على رسيل

ايهم: انت ما تفكني من هاي السالفة مو كلتلك سدها عاد شجلبت بيها يابه ما اريدها  ولا الي نفس بيها  انه اساساً گلبي مات من يمها ومن يم اي وحدة  لا رايد اتزوج ولا رايد مرأة بحياتي

علي: وغيداء نسيتها ؟ لساها مشمورة ببيت اهلها لا انت اللي ماخذها ولا انت مطلكها

ايهم: بس ارجع اطلكها وعد هسه ما الحك بعد

علي: ارجع واكولك انه ما ارضى عليك ولا ابريك الذمة وغضبان عليك دنيا واخرة اذا ما عقدت على رسيل ..

صارت هوسة جبيرة كلش وانتهت بكلمة من ايهم..

ايهم: اعقد عليها بشرط  وما اتنازل عنه 

علي: شنو ؟ 

ايهم: اول ما ارجع اطلكها 

علي: ليش يابوية ليش انت هم تحتاجلك مرة 

ايهم: هذا شرطي وهاي احجي كدامها وكدام الكل انه لو عقدت عليها ، فد ارجع اطلك ، سواء بقيت يوم اسبوع شهر سنة بيوم اللي ارجع بيه اطلكها 

علي: هاهي قابل 

 صافنة عليهم كاعد يقنع بأيهم واني محد ياخذ رأيي محد محسبلي حساب بس بيهم يقنعون بيه بعدها طلع وركع الباب وراه ما تحملت الموقف كله ما بلعته كمت ابجي..

رسيل: عمو شو انت ما اخذت رأيي  وتصرفت من ذاتك ؟ انت منو كالك اريد اتزوج ؟ وفوكاها اخوه لمروان ؟ 

اعذرني اني ما اكدر ومستحيل اوافق على المهزلة هاي..

علي: براحتج  باجر مخابر خالج ياخذج وابننا يضل يمنا وروحي الله وياج انه ما مستعد اسمع حجي على ارملة وبنص حموينها وليش ما ردت لاهلها 

رسيل: مستحيل شنو تاخذون ابني مني  والله اخذه وانهزم منكم..

علي: انه كلتلج ابنج يضل يمنا  وانتِ تروحين لاهلج لو تتزوجين حماج وتبقين هنا

رسيل: هسه صاروا اهلي ؟  مو جانوا غربة وبناتكم ما تطلع للغريب هسه ترجعوني عادي ؟ 

علي: انه ما مرجعج فد ما ارضى تضلين بين ولدي وتصير عليج نظرة حرام ..

كمت املخ بوجهي ....

رسيل: شنو نظره حرام شنو شايفني انت ؟ شو لابسة اسود من فوك ليجوة وحجابي مستور وصوتي محد سامعه وين الحرام بالموضوع ؟  عمو لا تكسرني فوك كسرتي اني وايهم مستحيل ننجمع سوية لا هو طايقني ولا اني رايده اكسر حزني على زوجي..

علي: هذا الحجي فد بالبداية بعدين تتصافى الكلوب وترجعون سوية وتنسين هاي الحياة..

رسيل: عمو انت كاعد تظلمني وهاي ثاني مرة تسويها بية..

علي: وحق الله وجلالته با بنت صادق لو تاخذين ايهم وتبقين يم ابنج تربيه لو تروحين من باجر لخالج وهسه تقررين و تردين الجواب وحسب جوابج اقرر اعوفنج هنا لو اخابر خالج ييجي ياخذج

رسيل: حسبي الله عليكم حسبي الله على ظلمكم شنو راح تكوله لمروان؟ و شلون ضميرك يرتاح وهيج تسوي بعائلته ؟ شلون تنام الليل فهمني..

علي: انام ليلي ومرتاح  لان أمنتكم عند اخوه وايهم كدها اعرفه شنو ما شامركم بالشارع..

رسيل: شتأمن منا ؟ ما سمعته من كاا اطلكها اول ما ارجع 

علي: بس حجي ويكابر ايام ويتعود ويلحم جرحه ويطيب وانتِ تنسينا قهرته 

رسيل: واني منو ينسيني ؟ ها ؟ منو ؟  مستحيل اتزوج ورا مروان ولا اتقبل رجال بحياتي مرة ثانية واهاي آخر شي عندي. 

علي: نور يابه جيبي الموبايل..

نور: عمي صلي على محمد هسه انه احجي وياها ، كلشي بالهداوة ينحل..

رسيل: شتحجين انتِ شتحجين ؟  تخبلتي شلون تريديني اقبل بهاي المهزلة ومروان ما صارله سنة ونص 

نور: امشي نصعد لا تلحين امشي 

جرتني من ايدي وصعدنا فوك 

رسيل: شفتيهم شفتي الظلم؟  يعني اني ما ارتاح  ابد ابقى هيج اعاني طول عمري؟ 

نور: مو هذا جان امنيتج وكتلتي روحج عليه هاي قدموه الج على طبق من  ذهب بعد شتريدين ؟ 

رسيل: جااااااان جاااان  يعني ماضي وراح  هسه ما اريده بعدني ما صاحيه من صدمة موت مروان اجي اتزوج بعد سنة كل عقلج ؟ 

نور: هاي بعد تردين ابنج اقتنعي واسكتي  لا تشعلين عليج حرب  وماعندج سند  كلها ضدج ترة لا تشوفينهم ساكتين عنج عبالج حبوج وتقبلوج لا حبيبتي جرحهم بعده جديد  وفد يمر عليه زمن يرجعولج  وشفتي ايهم وياج مو مثل الاول عسى ولعل  ترجع الماي لمجاريها من تتزوجون..

رسيل: ولج نور افهميني يامي يابطيخ  اني وايهم  مثل البانزين والنار ما نتوالم بعد تخدشت گلوبنا واحد شايل على الثاني ما راح تصفى صدكيني

نور: تصفى وكولي كالت نور واذكرج  ومحد مات ورا واحد جان ماتوا بعد جدي  جان انتِ متي ورا امج وابوج  هاي الحياة لازم تمشي انطي لنفسج فرصة وفكري زين قبل لا تردين الجواب لان حاطين ابنج وزواجج من ايهم بكفة ورفضج ورجعتج لبيت خالج بكفة ثانية اي كفة تختارين شوفي ياهو وزنها اثكل والاعز على گلبج يلا ترديلهم جواب فكري بعقل رسيل لا تتهورين ...

عافتني اخذت سند وطلعت 

ورا ساعتين سمعت صوت ايهم يحجي ويه نور برا  كمت لبست حجابي وكلت احجي وياه هو يرفض من يمه 

رحت دكيت الباب سمعته صاح تعال 

فتحتها وضليت برا واكفة باوعلي وكال..

ايهم: خير ؟ 

رسيل: اطلع اريد احجي وياك 

ايهم : وما تفوتين راح اكلج ؟ 

رسيل: لا ما افوت تعال انت هنا نحجي 

ايهم: براحتج سدي الباب وراج 

حجاها وكعد على القنفة لزم ريمونت  التلفزيون وكام يقلب بالقنوات

دخلت وتركت الباب مفتوح 

هو كاعد واني واكفة 

رسيل: ايهم لا تروح 

ابتسم مستهزء

ايهم: ليش ؟

حجاها وباوعلي 

رسيل: احسن 

ايهم: ليش تخافين تترملين للمرة ثانية ؟ 

رسيل: لا 

ايهم: لا تكليلي خايفة عليك لان ما اصدك وما يهمني خوفج صراحة..

رسيل: اول شي طبعاً اخاف عليك لان عم ابني والشي الثاني لان راح تروح انجبرت تعقد علية واذا ما رحت  بعد ما يكدر عمي يجبرك يعني عقدنا متوقف على روحتك 

ايهم: وانتِ ما فرحتي لان راح اعقد عليج ؟ 

رسيل: مو موضوعنا هذا ايهم 

ايهم: المهم يازوجة الغالي يا ام سند  انه بعد باجر رايح سواء عاقد عليج او لا  ما يهمني سواء قبلتي او لا هم ما يهمني 

رسيل: ليش اللي يسمعك يكول اني كاتلة روحي عليك  واريدك بس تعقد علية اصحى من خيالك المريض شو شايف نفسك انت ؟ 

ايهم: انتِ اصحي من احلامج الوردية بعمرج ما ترجعين لگلبي اخاف رحتي ذبيتيلج دمعتين يم ابوي حتى يقنعني اعقد عليج  وتكسرين ظهري بيج  ترة غلطانة انه لا رايدج هسه ولا بعدين وكايلها الج قبل لو يصبوج ذهب ما ارضى بيج لا تتأملين على الفاضي..

رسيل: شوف ايهم كل اللي حجيته راح اعتبر نفسي ما سامعته وانت بيدك توكف هاي المهزلة كلها لو بحالة وحدة انت عاجبك الوضع وفرحان..

حجيتها وطلعت قبل لا يجاوبني رحت اخذت سند وألتهيت وياه ما اريد لا افكر بيه ولا بغيره بلكت يفيد الحجي وياه الي حجيته ثاني يوم العصر الساعة اربعة صاحتني نور 

نور: رسيل 

رسيل: ها عيني

نور: ألبسي حجابج وتعالي جوا

رسيل: ليش ؟ 

نور: عمي يريدج  فد لبسي جبة انه نازلة وانتظرج 

رسيل: ماشي اجيت 

رحت لبست جبة واخذت سند ونزلت بس قلبي يلعب ما اعرف شكو لهناك 

واتفاجئ بالسيد وعمي وايهم وياسر كاعدين  هالمرة لا اكدر احجي ولا اكدر اسوي اي شي صرت امام امر الواقع

نور اخذت سند من ايدي وهمست بأذني

نور: اكعدي واقبلي هو فترة ويرجع يطلكج لا تعاندين فكري بأبنج  رسيل..

مشيت كعدت صرنا واحد مقابيل الثاني

يايابه شكد تمنيت هذا اليوم بحياتي شكد استقتلت عليه مرات من نتمنى شي بشدة ونريده وما نحصله وبعد فترة يلا نحصل عليه  بعدما نفقد الامل منه وقلبنا يموت يصير ماله طعم  وروحنا متريده  بعد  لان اجى متأخر  ومتأخر هوواي اجى بوقت مو مناسب ابد

هو كاعد و عيونه بالكاع ورجله تهتز 

بدأ السيد يحجي  وكال

_ ايهم علي حميد هل تقبل الزواج من موكلتي رسيل صادق حميد زوجة لك على المذهب الجعفري والسنة النبوية ان قبلت فقل نعم 

يايابه من كال اسمائنا سوية گلبي ماكمت احس بيه دكاته علت  حسيت صار عندي خفقان ، صح اني كلتله ما اريدك و تغيرت بس يبقى الگلب يدك حتى لو النفس ما تريد الواحد مو بيده شعور قاسي ومؤلم ...

رفعت عيوني وصارت بعيونه وبدأت تحجي العيون اخ يالغة العيون اصعب من الحجي شكد بيها عتب شكد بيها حب شكد بيها عذاب  نظرات تعبر عن رحلة من العمر  عيونه دمعت واني بجيت ما تحملت الموقف..

رجع السيد عاد الكلام على ايهم لان ما جاوبه اول مرة

_ ايهم علي حميد هل تقبل الزواج من موكلتي رسيل صادق حميد زوجة لك على المذهب الجعفري والسنة النبوية ان قبلت فقل نعم 

ايهم : نعم 

رجع سألني ، رسيل صادق حميد هل تقبلين الزواج بموكلي ايهم علي حميد... 

كمل السيد الحجي واني بالي سرح بيوم مروان من عقد عليه  هم جنت مكسورة وهم انغصبت وهم لابسة اسود وهاي ثاني مرة اني العروس بالثوب الاسود 

جاوبته بصوت ضعيف ويرجف  نعم انت وكيلي خلص العقد صعدت فوك بجيت وعاتبت روحي ولمتها هوواي بس تبقى الحقيقة هي هي ما تتغير ثاني يوم راح ايهم وارتفعت الصرخات بالبيت والبجي والنحيب اهله حيل تأذوا حتى عمي تخربط  بس ايهم اللي براسه يسويه اخذ جنطته وطلع...

مرت الايام تشبه بعضها ملل بملل ويوم اثكل من اللي قبله ورا شهر تقريباً اجانا تليفون ابنكم متصوب بالمستشفى كامت الدنيا ما كعدت ركضوا للمستشفى ياسر واولاد عمامي الي عرفته ايهم متصوب بس ما نعرف نوع الاصابة شنو ورا اسبوع جابوه للبيت بس شنو مو هو مبدليه  تفاجأت لا مستحيل هذا مو ايهم 

ضعفان و مسمر صاير اسود من الشمس  بشرته محتركة واضافة لهذا ياسر يدفع بيه بكرسي يعني شنو ما يمشي بعد ؟ 

تخبلنه  نفسيتنا تعبت كلش 

يعني بيت واحد انطى شهيد والثاني متصوب  وما نعرف يمشي لو لا 

ياسر تكفل بكلشي يخص ايهم  ترك بيته و عائلته وشغله واتوجه لأيهم يداري بيه ...

مر اسبوع اريد اروح اسلم عليه احجي وياه بس مالي عين اشوفه هيج  گلبي ممرود عليه  وبيوم كلت لازم اسأل عليه هسه يكول بالكذب ما سألت عني ولا اجتي شافتني دخلت جان ياسر يمه وهو كاعد ياكل على القنفة اول ما شافني ألتفت لياسر ونتر بيه

ايهم: كوللها تطلع برا..

اشرلي ياسر يعني اطلعي طلعت وسديت الباب مرت الايام وايهم وضعه يزداد سوء نفسيته تعبت كام يتعارك حتى وية ياسر  استصعب وضعه كلش ،  وبيوم صادف الجمعة الصبح جنت بالشقة  اجتني نور..

نور: داده رسيل عيونج على ايهم فدوة هذا علاوي مصخن فد نروح انه وياسر نوديه ونرجع ماكو احد بالبيت فد شوق ويم امها وتعرفين هي وايهم مو على صلح

رسيل: بس هو ما طايقني اخاف تصير مشكلة..

نور: هو كلنا ما طايقنا اساساً ما طايق نفسه 

رسيل: والله حيرة 

نور: شسوي لازم اروح فدوة 

رسيل : ماشي 

راحت نور  اخذت سند ورحتله

لكيته كاعد بالهول وصافن كدامه صينية بيها اكل كلشي ما ماكل عايفها على حالها مشيت على كيفي وكعدت على القنفة اللي بصفه سحب نفس طويل ودار وجهه على الجهة البعيدة.

رسيل: ليش ما ماكل ايهم ؟ 

ساكت ما يحجي 

رسيل: ايهم 

ساكت عفته ما حجيت شي بعد جر نفس وكال..

ايهم: اطلعي برا..

رسيل: ما مسوية شي والله ما احجي بشنو مأثرة عليك ؟ 

ايهم: مأثرة علية خانكتني ما طايق وجودج كارهج حسي ما اريدج شوفتج تجيبلي الهم 

 كام يصيح بصوت عالي..

رسيل: شنو تحجي اتقبل منك بس خليني اداريك الله يخليك والله ما اضوجك

ايهم: اسمعيني انتِ اخر وحدة ممكن اطلب منها تسويلي شي اطلعي احسنلج قبل لا اتخبل عليج

رسيل: زين بس اكل واروح 

ايهم: يلا راح اكل

شال الصينية وركعها حيل بالكاع 

ايهم : يلا ارتاحيتي؟ 

تناثر الكزاز بكل مكان و على رجلي طلع منها دم  جنت واكفة قريب منه  دنكت اريد اشوف منين كاعد ينزل ما حسيت الا ايده انمدت وبيها كلينكس دنك علية وحجه بصوت هادئ..

أيهم: تأذيتي ؟ آسف ما ادري 

رسيل: ولا يهمك جرح بسيط مو شي 

ايهم: الله يخليج اطلعي من حياتي انه ماجاي اتحمل وجودج  كل ما تباوعين بعيوني جاي اشوف مروان بيها وانجن بالزايد جاي اشوف اخويه بعيونج روحي رسيل عوفيني وروحي ارجعي لبيت خالج  انه وياج بنفس المكان ما نرهم  لو انتِ ترحين لو انه اروح واتغرب..

رسيل: وين تروح؟

ايهم: اسافر واتغرب وبعد ما ارد هنا 

رسيل: زين اذا رحت عمو راح يخليني ؟ لو ياخذ سند مني ؟ 

ايهم: انه احجي وياه ما عليج انتِ  فد روحي ابوس ايديج انه اللي صار بية واللي راح يصير كله بسببج اطلعي من حياتي بلكت تصفى وارتاح مثلما دخلتي بيها وخربتيها اطلعي منها

رسيل: ماشي اروح بس مو قبل ما احجيلك اللي بگلبي كله من يوم اللي سافرت لحد هذا اليوم صح يمكن مو وقته ومو مهم بس لازم احجي..

عكد حاجبه وكال 

ايهم: احجي اسمعج 

              الفصل الاربعون من هنا 

 لقراءه باقي الفصول من هنا