رواية ضماد جرح الفصل الخامس والعشرون 25 بقلم نوسه حمد
مشيت لي ياسر في الشركه وبقيت اترجا فيهو عشان يسمعني وكان زهجان مني شديد بس دخلني ولسوء حظي م قعدت سمح جا فادي داخل لمن شافني لمن انخلع وانا زاتي انخلعت لانو محزرني م اجي لي ياسر لمن دخل م سلم علي عمو قال لي نوسه انا قلت ليك شنو موش انا قلت ليك ما تجي هنا براك وخلي الموضوع دا علي قلت ليهو فادي انا م قادره وجيت سبقتك عشان اعرف ردت فعل ابوي شنو لمن يعرف انا بتو ياسر بقا اعاين لي واعاين لي فادي وبقا مخلوع فادي قال لي الموضوع دا م ساهل ولا عاوز ردت فعل عاوزه هداوه وكلام بالعقل الموضوع اكبر مما تتصوري ياسر قال ليهو موضوع شنو وانتو بتتكلمو عن شنو فهموني فادي قال ليهو كيف بنتكلم عن شنو نحنا بنتكلم عن الموضوع المخبيهو ليك سنين مننا قال ليهو ياتو موضوع فادي عاين لي بي استغراب وعلامه الدهشه ظهرت فيهو قال ليهو طيب انت كنت عاوز تدي نوسه ياتو مقابل عشان تسكت وانت م تنفضح انا طوالي بقيت اقول ليهو حقيقه انك ابوي ياسر بقا اعاين لي وخشمو م فتحو وبعاين لي جوه في عيوني وساكت م ردا علي انا اتكلمت قبل فادي عشان ابوي م يجيب سيره ميار في خشمو وحسيت انو حزين وخجلان ومندهش ومخلوع كل العلامات دي قصاد رده فعل واحده هي الصمت بقيت ابكي واترجا فيهو قلت ليهو انا م عايزه مقابل يا ابوي انا عايزاك تعترف بي وتحنن قلبك علي وتقول للناس دي بتي بالحلال بالحرام بس المهم انا اتنسب ليك انا تعبتا وانا بفتش ليك تعبت من كل عريس يعجب بي ويخطبني اول م يعرف حقيقتي يخليني انا انظلمت كتير م تظلمني تاني وتحرمني من الزواج واني اكون ام زي م كنت خايف اليوم داك علي خطوبه بتك م تنخرب خاف علي وعلي مشاعري انا بحس وبقيت ابكي فادي بقا يسكت فيني قال لي نوسه استغفري وعشان شعورك دا قلت ليك خليني اتناقش مع عمي انا قلت ليهو انا انتظرت عمري دا كلو وكنت مجهوله الهويه عاوزني انتظر تاني انا تعبت انا م عايزه منو غير اني اكون بتو علي الورق ولمن يجيني ولد الحلال يتقدم لي يمش يطلبني منو انا الحمد لله ربنا م خزلني وعندي ابو عوضني عن اي شي في الدنيا بس اوراقي الثبوتيه هي البتخزلني ابوي بس ساكت زي الجاتو صدمه من الكلام لمن وقع من طولو والناس جو جارين عليهو مهيلم ولدو لمن شافني قال لي عملتو لي ابوي شنو وبقا يكورك فينا انا وفادي وطردنا فادي بقا يفهم فيهو ابا يتكلم معاهو واسعفو ابوي ودوهو المستشفى ونحنا جرينا وراهو فادي قال لي نوسه م تتكلمي في الموضوع دا الوضع م بستحمل فادي بقا يتصل لي فاتن اختو وصفت لينا المستشفى ومشينا ولقيناهو دخلوهو العنايه الدكتور قال جاتو جلطه وبناتو ابكن بكا وفي واحده من بناتو تشبهني شبه لمن شافتني قالت دي منو فادي ومهيلم بقو ساكتين فادي فاهم القصه الحقيقيه ومهيلم فاهم اني بت عمو عشان انا غشيت عليهو قلت ليها انا البت الشغاله عندكم قالت لي شغاله لا لا انتي م شغاله معانا انتي منو بقت تسال فيني لدرجه لفتت نظر كل الناس لي بالذات امها قالت لي موش انتي الكنتي شغاله ف الضيافه اليوم داك بتها قالت ليها ماما شغاله شنو انتي م شايفه الشبه ماما عايني الشامه العند حبوبه وعند ابوي وعندي مهيلم بقا يتمتم شكلو خايف علي فاتن فاتن قالت ليها اي والله نوسه انتي تشبهي عمي شديد وم شبه خلقه انتي دمك زي دمنا انا خشمي م فتحتو مهيلم قال ليهم دي بت شغاله جبتها انا وما عارف جات الشركه لي ابوي ليه شكلها بت شحاده قلت ليهو لا انا. شحاده وانت عارف كده كويس قال لي اسمعيني يلا بره وتاني م تجينا ولا اشوف وشك تاني جرحني وكسر قلبي وطبعا امي نفس دهشه ابوي شكلها حست اني بتها الجدعتها فادي قال ليهو لا نوسه م ح تطلع ولازم كلكم تعرفو الحقيقه ماف داعي تعيشو انتو ملوك وواحده بريئه م عندها ذنب تعيش حياه الزله والاهانه مهليم قال ليهو فادي خليها تمشي من هنا البت دي انا بكرها قال ليهو تكرها ولا تحبها دي حاجه بترجع ليك اختو قالت ليهو انتو فشنو فهمونا حاجه انا خلاص ح اجن فادي قال ليها انا ح اتكلم ولازم كلكم تعرفو انو نوسه دي اختكم فاتن انخلعت وبقت تعاين لي قالت لي نوسه معقوله نوسه ردي وقولي فادي كذاب قلت ليها لا يا فاتن فادي م كذاب انا للاسف بت ياسر الانظلمت وانجدعت بدون رحمه وبقيت اعاين لي رده فعل امي بتها بقت دموعا نازله قالت لي اختي اختي كيف ي بت انتي م جاده م بمعني شبهتك لي تكوني اختي استهدي بالله ولا شنو يا ماما م ردت عليها مهيلم قال لي انتي واحده كذابه وانتي جايه ترمي بلاك علينا موش انتي جيتي الشركه وقلتي لي انك بت عمي فادي وفاتن بقو مخلوعين حسيت انهم شكو في مصداقيتي قلت ليهو انا لمن جيت الشركه وقلت ليك كده عشان لو قلت اني اختك م كان ح تجيبني بيتكم وانا قصدت اني اكذب عليك عشان تخليني ادخل بيتكم.
فادي قال لي نوسه دا كلام شنو قلت ليهو فادي انا لمن جيت وكذبت عليهو م مفتكره اساسا انو عمو الكذبت فيهو يطلع ابوك انا اتفاجات بيكم في الخطوبه وقلت كده عشان بس يخليني ادخل بيتهم والاقي امي وحصل الحصل وخلليكم مني اسالو امكم من بتها الرمتها وما راعت لي مشاعرها ولا حست بالذنب قصادها مهيلم بقا يقول ليها ماما ردي فشنو نحنا بقينا م قادرين نفهم
كلامها صاح هل دي اختنا بقت تتهرب منهم وقالت ليهم البت دي بي كذبها دا هي سبب في دخول ابوكم العنايه وانتو جايين تصدقوها رده فعلها كانت صادمه بالنسبه لي اول لحظه احس فيها امي ريا كانت رحمه بالنسبه لي وعسي ان تكرهو شيئا وهو خيرا لكم قلت ليها م متوقعه ردت فعل غير دي لانو انتي لو بتحني م كان جدعتيني وعيشتي مستمتعه بي حياتك ولا اقول ليك م كان اساسا حملتي بالحرام م تابعت الكلمه سمح كفتتني قالت لي انتي جنيتي انا ببلغ فيك قلت ليها م يحتاج تبلغي فيني وصدقيني م لي الشرف تكوني امي ولي رده فعلك دا احسن لي العالم كلو يقول علي بت حرام ولا انتي تكوني امي ومشيت ودموعي كانت نازله فادي وفاتن عاوزين يلحقوني مهيلم قال لي فاتن لو اتخطيتي خطوه انتي طلقانه بقت تبكي وتقول ليهو نوسه دي انا بعرفها حرام تنظلم اكتر وانا لو كنت عارفه حقيقتها من زمان م كان خليتها حست بالاحساس الحاساهو دا ومستحيل اخليها براها هي ياما مدت يدها لي وخدمتني بي عيونها فادي قال ليها فاتن اسمعي كلام راجلك وما تتحركي شبر لانو لو اتحركتي ح تشوفي مني العمرك م شفتي قلت ليهو فادي لا انت ولا هي انا بعرف ارجع وربنا يشفي ابوهم ويقوم بالسلامة انا تاني م ح تشوفو وشي ويا فادي ارتاح انا خلاص م عاد عندي لازمه قال لي نوسه دا كلام شنو مشيت خليتو جاري وراي وانا كنت ببكي وماشه وكل م اتخطا خطوات بحس نفسي راجعه لي ورا كل الدنيا والأبواب اتقفلت في وشي فادي م عندو ذنب وقفت عربيه وركبتا وفادي بتكلم معاي كاني م سامعاهو وفعلا انا كنت م سامعاهو او م عارفه بقول فشنو وصلت البيت وكنت زهجانه ابوي قال لي مالك فشنو ي بتي قلت ليهو مافي شي يا ابوي بس نحنا لازم نهاجر قال لي نهاجر انتي ي بتي جنيتي انا عندي قدره للهجره قلت ليهو ابوي انا م كويسه وما عايزه اقعد دقيقه في السودان بقا يسال فيني ويغصب فيني اني احكي ليهو حكيت ليهو بالحاصل قال لي ي بتي الناس ديل انسيهم والله م ح تشوفي منهم خير م تتعبي نفسك م ح يقبلو بيك لو عاوزنك كانو خلقو الف حجه وما جدعوك م تتعبي نفسك قلت ليهو حصل الحصل انا كنت مفتكره انهم اول م يشوفوني ياخدوني في حضنهم قال لي انتي مفتكره نفسك في فيلم نحنا في السودان ي بتي مستحيل يحصل كده عقلي نفسك ونحنا ممكن نرحل اي ولايه نمش الجزيره اهلي هناك قلت ليهو مكان اخوانك وحقيقتي وعقدتي واخوانك مفتكرين الكلام في الحته دي صراحه وما قايلين انهم بشيلو سكين يطعنوني بيها في قلبي قال لي انا بتكلم معاهم ماف زول بقرب ليك قلت ليهو لا ي ابوي انا عاوزه اقرا بره قنعت من اي شي وما عاوزه اي شي حاول اجرد الدكان دا لي اي زول والقروش نجهز بيها للسفر قال لي انا م بقدر اسافر ي بتي ولو علي الدكان من بكره اجردو ليك وانا برجع البلد بقيت اترجا فيهو قال لي انا م زعلان منك دا قرارك م بقول ليك فيهو حاجه بس م كان نفسي افارقك الا وانا جنازه ودموعو بقت جاريه قلت ليهو ابوي عاين لي انا واعمل الحاجه دي عشاني انا زهجتا وتعبتا قال لي زهجتي من شنو انتي انا م مشرفك ولا شنو من عرفتي طريق ابوك جريتي ليهو ولا عشان انا م عندي قروش قلت ليهو العفو يا ابوي انت بالعملتو معاي تشرف السودان كلو. بس انت عارف سببي وعقدتي قال لي عقدتك فشنو قلت ليهو اي زول يعرف حقيقتي ببعد مني قال لي هم الخسرانين الراجل الصاح م بعاين لي جنس ولا نسب بعاين لي اخلاق البت العايزه تعيش معاهو واخلاقك انتي في بت ماف بس هم بعاينو لي وجهه النظر الناس لي مره الولد والنسب ي بتي قسمتك بتجيك كملي تعليمك وخليني هنا انا مبسوط قلت ليهو بس انا م مرتاحه قال لي خلاص تمام البتشوفي بعملو ليك وفات خلاني حسيت نفسي كسرتو شديد بس غصبا عني نومتا وانا بدعي علي امي من جوه قلبي وصحيت متاخره سمعت صوت الباب بضرب بقيت اكورك لي ابوي بس حسيتو ماف لبست طرحتي وقبل افتح الباب لقيت الدكان مطبو بي جوه بي طبله قلبي بقا ادق فتحت الباب لقيتو فادي م عاينت ليهو سمح طلعت زي المجنونه وبعاين لي باب الدكان مقفول وفي ناس واقفين قالو لي اللليله حاج خالد وين م فتح نحنا منتظرنو لي اللبن غلبني ارد عليهم وما عاينت لي فادي ولا قلت ليهو اتفضل جريت جوه لقيت ملابس الولد ماف وملابس ابوي ماف عرفتو ساق ولد اخوهو وفات شيلت التلفون وبقيت اتصل علي ابوي ما ردا علي وعلي الولد م ردا علي فادي بقا اقول لي نوسه فهميني فشنو قلت ليهو خسرت ابوي وخسرت الدنيا 😭 ……..يتبع