رواية العروس في الثوب الاسود الفصل الثاني 2 بقلم عبير ادريس

 رواية العروس في الثوب الاسود الفصل الثاني 2 بقلم عبير ادريس

في هذه الساعة المتأخرة من الوهن 

أحتاج لمشاهدة مسرحية فكاهية 

تدفعني للضحك بهستيريا

احتاج أن اسرق البسمة من ثغر طفل 

لا يأبه لبؤس هذا العالم 

احتاج لصوت أحبهُ يباغتني باتصال مُفاجئ

أحتاج لعناق صادق

لحكايا رفاقي المجنونة 

أحتاج لتذكرة سفر ترتحل بي 

عن أفاق هذه الحياة..

أحتاج للأغتراب عن أمسي 

عن روتيني، عن موطن وجعي 

أحتاج أن أنفث نيكوتين الحزن

أحتاج لشغبي ، لوهج الحياة في الأماكن التي تتسع لحجم إحساسي...

____________

مر على وفاة ماما اسبوعين ضبط وحالنا يرثى له 

بابا عزل نفسه بغرفته لا يطلع ولا يجي  نوديله اكل يرفض ياكل عاش على المغذيات فترة واخذ اجازة من دوامة كعد بلبيت ، حتى مايدري بينا وين ما وين كأنما عايش بكوكب ثاني

خالو حاير بمرض بيبي يفتر بيها من طبيب لطبيب حالتها كل مجالها تسوء اكثر وبس تبجي على ماما

 ..

عمة زهرة بعدها بالمستشفى وية اخوية وحسب كلام خالو الطفل  كلش ناعم بكد جف الايد كال ادعوله الله ينطيه عمر ويعيش .

بالنسبة النا اني وريناد بين بيتنا و بيت جدو

بفترة الاسبوعين خالو علاء رجع سافر بحكم عمله مايكدر يتأخر اكثر 

اخذ عائلته وراح ضلت بس نبراس ماقبلت تروح لان الوضع مايسمح تعوفنا وحدنا ،،،

منو يداري بيبي وخالة سهاد على الاقل بينما ترجع عمة زهرة حتى هي تقوم بيهم .

اجى موعد امتحاناتي و اني كلشي ما قارية ولا كدرت افتح كتاب امتحنت 

وانتضرت النتيجة طلعت اكمال بدرسين

ودرجاتي البقيه ع الحافة،

كلش زين على قرايتي اللي قريتها ،

اعتمدت على اليومي

ومنا نفسيتي تعبانة 

اضافة الى ريناد كلش تعبتنا بس تبجي تريد ماما وتنحست كامت تعاند على كلشي حتى لو تحس هذا الشي غلط تسويه 

مرة من المرات لكيتها كاعدة وتكصكص بملابسنا همزين لحكت عليهة ، اخذت المكص من ايدها وعطت بيها...

رسيل : هاي شكاعد تسوين ليش هيج مو حرامات...

تباوعلي وماتحجي رحت ع خالو كلتله على سوالفها تخبل اجى وياية لبيتنا وصعدنا فوك اني وياه لغرفتنا ، كعد يمها وبدا يحجي وياها بهدوء..

محمد: رنود حبيبتي ليش زعلانة منو وياج اكو احد مضوجج .

صافنة علينا و ما تحجي ..

محمد : ضايجة اطلعج نفتر اني واختج ...

هم ساكتة بس عيونها بدت تدمع ..

محمد : زين شنو رأيج تجين يمنا بالبيت تباتين يمي ونسهر للصبح بالحديقة ونشوف الشمس شلون تطلع ..

رفعت راسها وكلتله ..

ريناد : اني كل هذا ما اريده اريد شي اذا كتلك عليه تسويه... 

محمد: كولي عيوني اشلعهن الج ..

ريناد: وديني لماما اريدها حجتها وكامت تبجي ..

محمد : لا حول ولا قوة الا بالله بنتي حبيبتي ماما راحت بالجنة راحت يم ناس احسن من عندنا وهناك حياتهم حلوة ليش تبجين عليها افرحي لان ارتاحت .

ريناد: لعد ليش ما اخذتنا وياها.

محمد: مايصير الصغار يروحون ممنوع بس الكبار ..

ريناد : لعد انت وبابا وبيبي مو كبار وبعدكم هنا ليش مارحتوا ليش بس هي راحت  .

خالو اختنك نزلها من حضنه وطلع برا الغرفه كام يبجي 

ويحجي بصوت مخنوك...

محمد :  اخ يابويه شون كسرتينا  ياسوسن الله يعين گلبنا على فراكج . 

وراها راح لغرفة بابا رحت وراه

محمد : صادق كوم كافي عاد تبجي وتنوح ذني بناتك محتاجاتك و يديرن بعينهن خطية ما اكلك لخاطري وبداعتي  لا الخاطر هذني الاطفال شنو ذنبهن ضيعن امهن وانت هذا حالك راح تضيع وتضيعهن وياك .

جاوبه بابا بتعب ونبرة حزن بصوته..

صادق: انت موجود بمكاني وتكفي ..

محمد : بعيوني اخليهن بس اني مو ابوهن مستحيل اكدر أسد مكانك كوم لبناتك ذني يتيمات لا تيتمهن مرتين صادق..

بابا من سمع بابا كلمة يتيمات شون عبالك جان نايم بحلم وفز كمز من مكانه و طلع من الغرفة حسيته فقد عقله،،،،

ركض فوك على ريناد صعدت  وراه ورحت كعدت يمه،،

حضنا قوي ويبجي كام يصيح..

صادق : صرتن يتيمات راحت امجن راحت وعافتنا ولكم  مو بس أنتم تيتمتوا أني هم . 

يحجي و يبجي واحنا هم نبجي بيومها نام يمنا فوك فرش فراش ونمنا على ايده وحدة منا وحدة منا .

ثاني يوم الصبح كعدنا ..

صادق : يلا بنات كومو نتريك سويتلكم اكل ..

رسيل : صباح الخير بابا ،،، كمت حضنته وبسته ما مصدكه هذا بابا وكف لحيله ويحجي ويانا..

كعدت ريتاد  ساكتة كلشي ماحجت بس تباوع بعيونها ، نزلنا جوة غسلنا وكعدنا على الميز بالمطبخ ...

ناكل و بابا يباوع علينا انتبه على عيوني وين نظرها جانت بأتجاه كرسي ماما اللي جانت تكعد عليه. 

تنهد وكال..

صادق : مكانها خالي 

حجاها وجر حسرة ...

هاي اول مرة نلتم بدون ماما صح جان عندها دوام واغلب الاحيان نتريك وحدنا بس جانت تحضر الريوك وتسوي لفات النا وتروح .

مرت الايام.

وبيوم اجه خالو محمد للبيت على بابا ..

محمد: صادق شوكت تروح للمستشفى حتى تسجل ابنك لحد الان ضال بدون اسم..

صادق : ما اروح خليها بعدين ..

محمد: شنو بعدين  اذا ماتجي  يخلون اسم بكيفهم هي هاي وضعية امشي وياية وهم تشوف ابنك ما متلهف تشوفة؟ .

باوع بابا على خالو ونصه راسه  عيونه دمعت وكال 

صادق : بسببه راحت سوسن مني  ما الي نفس بيه بعد .

محمد : اتقي الله حرام هيج تحجي هذا كفر كلمن وساعته ويومه. 

سكت بابا ما حجى شي مرت ثلاثة اشهر اثقل مايكون عبالك ثلاث سنوات 

اليوم  احد بداية اسبوع ، راح بابا وخالو محمد للمستشفى وجابوا اخوية اللي لحد الان ماشايفيه و بمعجزة عاش ..

ولولا الله ومن بعدها عمة زهرة جان اخوية توفه لان حالته جانت حيل تعبانة..

اجوي لبيت بيبي اول ما فات بابا خلاه بحضن بيبي

حضنته وكامت تنعي 

البيبي : يمة خالي طبيت ولكيت البيت خالي يمة تعالي 

تعالي صحنة يالحبيبة تعالي

تعالي والدمع هالي( يهل) 

كلبي انخمش والدمع هالي 

أنا اركض وراها

أنا الزمت النعش واركض وراها....

تبجي و تنعي اجى خالو واخذ اخوية من ايديها ،،طلعه برا حتى تبطل بجي بعد ما بجتنه كلنا وياها وبابا حيل تعب ...

رجعنا للبيت اجتي خالة زهرة ويانا نظفت البيت ، ساعدتها بشغلات بسيطة خطية تعبت حيل،، فات بابا جان يكول.

صادق: والله يا ام حسام ما اعرف شلون أطلع من جزاتج أنتِ الاخت اللي الله رزقني بيها  صح مو بنت امي وابوية بس احن من خواتي علية

زهرة: شنو هذا الحجي ابو رسيل مامقبولة منك انت اخوية وسوسن الله يرحمها اختي وجهالك جهالي ما اقبل  تحجي هيج، هذا واجبي لا فضل  مني ولا منية .

صادق: رحم الله البطن الشالتج ياغالية الله يحفظج ويحفظلج كل عزيز والله كلنا نضيع بلياج من الحجية وسهاد وبيتج لحد اني وبناتي كم ايد انتِ صايرة والله مرات اخجل من اشوفج طابخة وجايبة الجدر لو الخبز وانتي منا حايرة ب آران.

آران اسم اخوية الجديد معناه النشاط والمرح 

حسب ما بابا كال سماه على وصية ماما رادت هذا الاسم . 

ومرت الايام  رجعت حياتنا مثل قبل بس طافية شلون واحد ميت ويمشي ، لكن هاي الحياة لازم تستمر برضاتنا او غصب عنا ماكو واحد مات ورا واحد بس مستحيل ينسى هذا الشخص ويوم عن يوم الاشتياق يزيد لكن مابيدنا شي غير الدعاء الها بالرحمة والنا  بالصبر ، 

طلعت النتائج مالتي والحمدلله ناجحة رحت للاول متوسط وريناد صف خامس وخالو ابتلش بينا يودي ويجيب بابا رجع لدوامه ، و بيوم ريناد ما قبلت تداوم ضلت نايمة واصرت الا تغيب..

بابا كال عوفوها براحتها لا تضغطون عليها،،،

رحنا و خلص وقت الدوام رجعنا للبيت خالو كال اروح بشغلة واجي كولي لعمتج حتى لايضل بالها .

رسيل : صار خالو 

سحبت السيم مال الباب ودخلت لبيت جدو ،هدوء ماكو احد المطبخ فارغ شنو وين عمة اصيح عليها ماترد رحت لغرفة بيبي نايمة  وخالة سهاد متمددة ..شافتني ابتسمت..

رسيل : هلو خالة

سهاد: هلو حبيبتي شوكت اجيتي ..

رسيل : توني اجيت ، عمة زهرة وريناد وين شو ماكو؟

سهاد: عمتج راحت تجيب معجون من ابو الاسواق وريناد توها جانت هنا وطلعت من الغرفة قبل لا تجين..

رسيل : راح اشوفها وين واجي ..

طلعت ادور عليها فريت البيت كله ماكو اخر شي رحت لغرفة خالو واشوفها تخنك ب آران وجان اعيط بعلو صوتي  ..

رسيل :لج هاي شجاي تسوين

على صوتي اجتي عمة زهرة تركض وخرتها واخذت آران ، يكح حبيبي ومخنوك بالكوة يتنفس ، عمة كامت تطبطب على ظهره وتنفخ بوجهه شهك حيل وبجى ضل يصرخ 

طلعته برا سوتلة ممة شربها ونام 

ما حجينا وية ريناد لان اذا حجينا وياها تاخذ طبع السكوت لو تعاند ، بس من اجوي خالو وبابا حجتلهم عمة زهرة على اللي الصار . 

صادق: صدك والله اليوم الا اكسرها ليش هيج تسوي هاي تخبلت فد نوب شافتني كاعد اسايسها وساكت على سوالفها كامت تتمادى بالغلط .

زهرة : عوفها بروح سوسن لاتضربها بس احجي وياها.

صادق: لا والله فلا اعوفها اذا ما اربيها من جديد ما أطلع صادق وخري ام حسام عني ..

يحجي وگلبه محروك..

محمد : عوفها يمعود شبيك كبيت هذا منين ينطفي هي طفلة، اللي يسمعك يكول كاعد تحجي على وحدة عمرها عشرين سنة تذبح وتصلخ مو هي تايهتلك

صادق: لعد شلون اعوفها تتمادى بابا هاي تاخذ الخباثة للكبر هاي رسيل يومية باجية من وراها ومن اجي اسألها ماتقبل تحجيلي مرات اصعد بسكوت اسمعها بليل تحجي وية اختها وتعلمها لك رسيل تربيها وتعلمها وماتنطي بيها كدامي واني ابوها هي شنو فرقها عنها..

رسيل شايلة عقل يوزن بلد هدوء وأدب وكلشي تريده تلكاه عندها تركض كدامي من اريد الحاجة وهاي عكسها بكلشي تعبتني وتعبت اختها عبالك جاي تنتقم من عندنا ادري اعدائها احنا حتى من رحت سألت عليها بالمدرسة اول مافتت للأدارة كلتلهم على اسمها رأسن عرفوها لان يومية شكوة عليها ومستواها الدراسي بالنازل واليوم ختمتها تخنك بأخوها تعبتني شسويلها فهموني مو راح اتخبل. 

حسام: عمو ريناد ما جانت هيج ورا وفاة عمة تغيرت...

صادق: اي عمي هذا حظ عمك الاعوج ..

محمد : روح لبيتك ارتاح واخذ رسيل وآران واذا تريد عوفهم هنا يمنا واني اشوف شنو موضوعها .

صادق : رايح بس بروح اختك تحجيلي الصدك لاتضم عليه شنو تكلك وبشنو تفكر...

محمد: ماشي لايضل بالك..

طلع بابا واحنا بقينا ببيت جدو حتى نتغده وأران  يم عمه راح خالو يم ريناد ورة نصف ساعةاجى يمنة كعد..

زهرة : ها بشر شكالتلك ...

محمد: اول شي ساكتة ما تحجي ابد تكولين عبالك حلكها مخيط بعدين جبتها منا وديتها منا كلتلها امج زعلت عليج وكالت ماحبها لريناد لان صايرة وكحة وتأذي اخوها واني كاعدة أتأذى من وراها تدرون شنو كالتلي. 

زهرة : شكالت بلة

محمد: والله صفنتني كالت سمعت بابا يكول كله صوجه من وراه ماما راحت وحتى بابا ما رادة وما يحبه بس انت كتله لا الا نجيبه واني لان هو موتها لماما اني اريد اموته و اخلص منه. 

زهرة: يايمة سودة بوجهي هاي الطفلة تعقدت شلون بينا شنسوي .

حسام : ودوها طبيب نفسي بلكت تتعالج هاي اذا تظشل هيج اول فرصة تصير راح تسوي شي للطفل. 

محمد: خليني ابلغ صادق واشوف شنو رأية بالموضوع .

صار العصر وراح خالو لبابا واتفقوا يعرضون ريناد على طبيب نفسي ...

ثاني يوم راحوا بابا وخالو سألوا على طبيب كلولهم على واحد بشارع فلسطين كلش زين اتفقوا ياخذوها ثاني يوم هذا الحجي ريناد لحد الان ماتدري وحابسة روحها بغرفة خالو وماخذة وضع السكوت ومرات تبجي بهدوء..

رجع بابا اخذها وراح ورا ساعتين ونصف اجوي لبيت بيبي اول ما دخل سألته بيبي .

البيبي : ها يمة صادق بشر شنو كال الطبيب .

صادق : ثأوري حبيبي هاكم فلوس وروحو انت وريناد اشتروا وتعالوا...

نطاهم بابا فلوس وراحوا حتى يحجي براحته .

صادق : الطبيب من حجى وياها كدامي ما قبلت كلشي تحجي بعدين طلعني برا كال خاف ما تاخذ راحتها اتفضل بالاستراحة طلعت كعدت تقريبا ساعة كاملة انتظر ورا الساعة صاحني السكرتير دخلت. 

صادق : ها دكتور بشر تاخرت حيل ...

الطبيب:يؤسفني ابلغك وضع الطفلة النفسي حيل تعبان متعرضة لصدمة خلتها تكره كلشي حواليها وتريد بس تأذيكم الله يصبرك لان وراك علاج طويل. 

صادق: زين شسوي والله مستعد اي شي تكلي عليه اسويه بس ترجع بنتي مثل ما جانت زين دكتور كالتلك شي عن اخوها .

الطبيب : لا هي ماحجتلي من وحدها أني سألتها كلتلها تحبيه او لا ما ردت علية اكتفت بهز راسها معنى لا. 

صادق :هااا زين كل كم يوم اجيبها...

الطبيب: مرتين بالاسبوع حتى تتعافى بشكل اسرع. 

زهرة : ياربي الطفلة جانت مثل الورد وينها وين الطبيب النفسي الحمدلله يارب كلشي يجي منك حلو وراضين بيه .

ومرت الايام والاشهر وبدت ريناد تستجاب للعلاج النفسي وبين الفرق عليها من خلال تصرفاتها ويانا بالبيت  بدت تتقبل وجود آران بيناتنا وبابا بين فترة وفترة ياخذ اجازة ويكعد يمنا يعوضنا غياب ماما...

كام يودي ويجيب للدوام ويدرسنا من عندنا شي صعب وشوية شوية رجع مستوى ريناد الدراسي يتحسن

آران كبر حبيبي ونشنش صار عمره سبعة اشهر تعلقت بيه وكمت اموت عليه و على طول شايلته.

زهرة : يمة ضهرج ماتعب شايلته وتفترين خوش تعلوم علمتيه .

رسيل: خلي يتدلل مادام اخته بالوجود هذا اروني الورد..

زهرة: هالمرة آروني منين جبتي هذا الاسم 

رسيل : عمة شبيج غير ادلعه...

زهرة : والله خوش دلع يلا صيحي اختج راح اصب الغداء هم يلا نتغدا الولد شوفيهم اذا بغرفهم صيحيهم واذا ماكو شوفيهم بلباب ...

رسيل : ماشي

رحت صحت ريناد ودورت على الولد ماكو طلعت برا بالطرمة هم ماكو فتحت باب الشارع جان ولد على البايسكل وحسام واكف يمه وكاعد يسولفون من شافني خزرني واشر براسه معناها طبي جوة .

دخلت للطرمة مشيت بعدني لنصف الطرمة ماواصلة جان انجر حيل من أيدي انداريت وأشوف حسام اعصاب ومخنزر.

ضجت كلش جاوبته بحدية..

رسيل : هاي شبيك أيدي دوخر ليش هيج تجر بيها ..

حسام : شعندج مادة راسج ماتكولين احد يفوت انتِ وهاي كفشتج..

رسيل: اي غير اصيحك حتى تتغدا...

حسام : وليش انتِ تطلعين وين هذا الغبي ليش ماطلع؟

رسيل: منو قصدك؟

حسام: ثائر

رسيل: والله شمدريني وينه عمة كالت صيحيهم راح اصب غداء واجيت حتى اصيحك ..

حسام : هاي آخر مرة تطلعين برا وتمدين راسج فهمتي..

يحجي بصياح

على صوته مدت راسها عمة زهرة من باب المطبخ تحجي وبيدها الجفجير..

زهرة : هاي شنو الصياح شكو شبيك حسام ؟

حسام : شكو تدزيها تصيحني مو عندج ولد ودزيه

زهرة : على كيفك هاي من يمته وجاي تحاسب رسيل شو يومية تروح وتجي لو بيتنا لو بيتهم..

حسام: بالجديد ومنا وجاي ما تطلع وحدها لو اني لو انتِ لو عمو لو ابوية مال تروح وتجي وحدها بعد ماكو ...

زهرة: لا تاخذنا بعياطك فهمني شنو صار وهيج اجيت فاير وصوتك يلعلع..

حسام: اول ما مدت راسها عيون صاحبي لجحتها حتى ما احترمني وتالي طردته .

زهرة : زين تسوي هو مبين مو خوش ولد ...

حسام: لا مو هو مو خوش كل الولد هيج اول ما تنفتح الباب عينهم تصير على اللي يفتحها ذاك من ذاك ما يباوع 

زهرة : هسة شتريد فضني نريد نتغدا..

حسام: رسيل ممنوع تطلع وحدها بعد وسم ما اريد تغدوا انتم . 

عافنا وفات جوة عمة زهرة كامت تهز بيدها كالت..

زهرة : والله هذا ابني فلا صاحي.

دخلنا جوة وبدينا نصب فات خالو ...

محمد: ها يابة الله يساعدهم...

زهرة : هله الله يساعدك عيوني تعال غسل حتى تتغدا

محمد: اي والله يا ام حسام ميت جوع واليوم كلش حار الجو وبيه هواء عالي حتى وجهي كسب...

زهرة : الله يعينك وياربي يقيك نار جهنم ..

محمد: أمين 

رسيل : الله يساعدك خالو حبيبي

رحت بسته من خده 

محمد : هله حبيبتي شلونج اليوم ..

رسيل : زينة الحمد لله ..

محمد: الله يجعلج دائماً زينة

رسيل : شكراً خالو حبيبي

بعدها تغدينا والامور تمام...

مشت الايام و حياتنا هادئة نوعاً ما بابا سجلني بخط لان صرت بمدرسة ابعد من مدرسة ريناد

عمة زهرة شايلتنا بالصلوات مقسومة بين بيت جدو وبين بيتنا تجي تنظف مرتين بالاسبوع وآران هي متكفلة بكل شي يخصه ..

بيبي على حالها صار الها اشهر وماكو فرق خالو ما خله طبيب ماعرض عليه حالتها ونفس اراء الاطباء الباقين اخر شي اقترح خالو على بابا يسفرون بيبي للاردن تتعالج ...

صادق: محمد اني مااكدر اسافر تدري بوضعي منا دوامي والبنات مدارس شلون اذا اني اخذت اجازة البنات تروح عليهم السنة .

محمد: والله ياخوية صح كلامك ولا اجة على بالي سالفه المدارس الله كريم نشوف شلون تصفى .

وبيوم جنت راجعة من المدرسة جانت امتحانات اخر السنه باقيلي أمتحانين رجعت كبل لبيت جدو واشوف عمة زهرة تريد تبجي من التعب رحت عليهة كتلها .

رسيل : شبيج عمة ليش هيج وجهج تعبان وفد مرة صايرة...

زهرة: وج يمة ضهري ماكدر اتنفس من الوجع يمكن طك ...

جاوبتها بقلق...

رسيل : ليش عمة خاف شلتي شي ثكيل ..

زهرة: لا بس اليوم بيبيتج سبحتها وبدلت فراشها ونيمتها وراها سهاد كالت بلكت تسبحيني وياج اني جنت حيل تعبانه بس كلت خطيه ميخالف هم صارلهة يومين ماغاسله توني رفعتها من الفراش حتى اكعدها بالعربانة و اسمع طكه بضهري شاغت روحي ولحد هسه ماكدر اتحرك وكوة اجر النفس . 

رسيل : سوده عليه عمة شلون قهر ..

ويه حجايتي فات حسام

حسام: خير شكو..

سولفتله لحسام السالفة 

حسام : خاف لزمج دمار..

زهرة : والله ما ادري ما اعتقد شغله دمار ..

حسام: كومي خلي ادهنه الج بالفكس ( دهن حار ) ..

كومها وراحو لغرفه خالو رحت وراهم لكيت اران نايم شلته علمود نرجع للبيت لان عمه تعبانه و هو صاير حرك كلش ،طلعت للشارع طبك خالو ونزل من السياره ...

صاح..

محمد: ها خالو وين ماخذه اخوج خطيه نايم ليش تمردين نومته ضلو هنا تغدو يمنه..

رسيل : لا خالو مو عمة تعبانه خطيه ضهرها ..

محمد : ليش خير شصار ..

رسيل : خالو روح جوة و عمة تحجيلك اران ثكيل ايدي راحت .

محمد : روحي حبيبتي ..

التفتت على ريناد كتلها امشي ويايه للبيت خلي عمة ترتاح اليوم ..

ريناد: اي جيت باي ثائر ..

ثائر : باي ريناد انتظرج العصر حتى نروح نشتري 

ريناد : اي ساعة اربعة اجيك ..

ثائر : تمام..

دخلت للبيت نيمت آران بغرفة بابا وصعدنا اني وريناد بدلنا ملابسنا ونزلنا نمنا يم آران بالغرفة لحد ساعة ٣  رن جرس الباب ،، طلعت وفاتحة نصف عين بعدني نعسانة صحت منو ..

حسام: اني 

فتحت الباب وهمست بضجر..

رسيل : ها حسام 

حسام: هاي منو هيج مطفي عيونج؟ حجاها وضحك..

رسيل: نعسانة احجي بسرعة اريد ارجع انام ...

حسام : تعالوا تغدوا ..

رسيل : نايمين بعدهم من يكعدون نجي ..

حسام : امشي بابا هي مال من تكعدون ترى ما يبقى اي شي هو اكل من برا نفتحه وناكل سوى ...

رسيل : ماشي هسه اصيحهم ..

دخلت وهو بقى واكف بالطرمة كعدت ريناد وشلت آران وطلعنا حسام اخذه مني 

دخلنا جانت الصينية بالكاع وبس خالو وثائر كاعدين

حسام : لعد وين الباقين؟

محمد: امي نايمة ما قبلت تكعد وهاي سهاد تبجي تصيح من وراية هيج صار بزهرة وهم ماقبلت تاكل ..

رسيل: لعد وعمة ؟

محمد: عمتج جبتلها مسكن الآم من الصيدلية ونامت بينما يصير العصر واخذها للطبيب ..

رسيل : الله يشافيها ...

محمد : امين اكعدي اكلي..

كعدنا ناكل بس ما النا نفس لان خالة زهرة هيج صاير بيها وخالو حيل مقهور ...

صار العصر خالو وحسام اخذوا عمة وراحو للطبيب.. 

ساعة سبعة المغرب اجى بابا اول ما دخل للبيت سأل وينهم 

سولفتله  الصار كلش انقهر 

صادق : زهرة انسانة طيبة ماتستاهل و شايلتنا كلنا الله يشافيها ويباركلها بصحتها.

رسيل : امين يارب العالمين

ورا ساعة تقريباً  اجى خالو ضايج حيل ومبين مقهور ، دخلت عمة ساندها حسام...

كام بابا راح يمهم...

صادق: ها حمدلله على السلامة ام حسام ما تستاهلين بية ولا بيج ..

زهرة : اسم الله عليك الوجع العندي لعدوي ما اتمناه 

صادق : شنو كال الطبيب ؟

محمد: انزلاق وسوفان بالفقرات ولازم تنام وترتاح وتبقى على العلاج فترة ...

صادق : لا ياالله مو خوش خبر ..

زهرة : الحمدلله ألهي لا اعتراض على حكمك ..

صادق : يستاهل الحمد..

مر اسبوع على سالفة عمة زهرة حياتنا نكلبت الكل كام يشتغل وما نلحك اللي يتسوك واللي ينظف واللي يكوي ملابس والي يطبخ ويغسل مواعين 

اما بيبي وخالة سهاد خالو محمد تكفل بيهم وبيتنا وآران اني وبابا ...

مشت الأيام وعمة كلشي ما تكدر تسوي الحمل زاد والتعب بين على الكل...

الى ان بيوم كاعدين وبيبي كالت صيحولي صادق اريد احجي وياه رحت صحته اجى بابا كعد يم بيبي على القنفة  ، بدون مقدمات فتحت الموضوع..

البيبي : يمة صادق انت ليش ما تتزوج عاجبتك حياتك هاي ؟ وحياة بناتك وابنك المخربطة ؟ 

بابا باوع على بيبي بصدمة بقى صافن عليها  بعدين كال...

صادق: حجية كاعد تحجين صدك؟ من كل عقلج ؟  لو تتشاقين حتى اعرف بشنو اجاوبج 

البيبي : ليش يمة هو هذا الموضوع مال واحد يتشاقى بيه؟

صادق: شجابة على بالج وليش تفتحين هيج مواضيع وياي؟ 

البيبي: يمة انت وبنياتك وابنك ينرادلكم مرة حوك تقوم بيكم وبالبيت تشوف طلباتك اكلتك لبسك مايصير يايمة تبقون هيج..

صادق: حجية شاكيلج اني ؟ سمعتيني فد يوم تذمرت من وضعي؟ عايش ومرتاح مامحتاج لمرة تجي وتخدمني. 

البيبي: انت هم قدر وضعنا شوف زهرة شنو صار بيها واني وسهاد ينرادلنل مداراه ومحمد  تعب بالكت البنية تطلع بنت حلال وتساعد اخيتك زهرة .

صادق: حجية اذا احنا ثقلنا عليكم اني مستعد اخذ اطفالي واكعد ببيتي حتى لو اعرف ابطل من الدوام واكابلهم، واذا على مساعده زهرة اني اجيب بنية تساعدها ، هواي بنات اصول وشريفات يكيفن يشتغلن براتب واني ادفعه واتكفل بكلشي .

البيبي : يمة اسمعني ..

قاطعها بابا وكام 

صادق: اسمعيني حجية تشيلين هذا الموضوع من بالج تماماً وما أريد اسمعه بعد والمفروض اني اجي عليج واكلج اريد اتزوج وانتِ ماترضين لان بنتج ما صارلها هواي من ماتت الله يرحمها واني ما ابدل سوسن بمليون مرة الا اذا تخبلت،  في امان الله 

عافنا وطلع...

خطية بيبي كامت تبجي...

البيبي: هو ما جاي يفهمني اني كلت ينرادلنا مداراة مو بس هو وجهاله لازم تجينا بنية تساعدنا ،عبالكم سهلة علية من هيج حجيت لاوحق بيت الله حسيت خناجر طبت بگلبي..

زهرة: والله ياعمة شمدريج اللي يتزوجها  شنو ماشنو اطباعها تصرفاتها يجوز نحسة ما ترضى تساعد تكلج اني تزوجته اله شعليه بيهم...

البيبي : لا اكو بنات اصول هوواي واحنا من نخطبها لازم نكللها عن وضعنا تقبل اهلاً وسهلاً ما تقبل نشوف غيرها شو كومة بنات...

محمد: والله حجية ماعرف شنو اكلج حيرة حجيج صحيح بس هو صعبة عليه خصوصاً جرحه بعده جديد  ماطاب .

البيبي : الله يعين كلبه ويصبره ويصبرنا ...

من بعدها انسد الموضوع ومحد حجى بيه وبابا اسبوع مايقبل ييجي لبيت بيبي زعلان عليها  وحتى ملابسه هو يغسلها مايخلي عمة زهرة تغسلهن ولا يقبل تنظف البيت تالي عمه راحتله وحجت وياه

زهرة: شجاك ابو رسيل ليش تاخذني بذنب عمتي شنو دخلي بالموضوع قابل اني كلتلك روح تزوج لو تعاجزت منكم ؟

صادق: حشى خيتي ام حسام لا عاش ولا كان اللي ينكر فضلج لو يكول تعاجزتي بس اني ما اريد اتعبج واخذت اجازة ست شهور راح اكعد بالبيت والحمدلله عندي فلوس مال رواتبي جامعهن يكفني منا لسنة حتى ما يحتاج اطلع اشتغل .

زهرة: ولشوكت هيج تبقى؟  هم تخلص الست شهور ويرجع الوضع مثل قبل .

صادق: لا البنات شوية يكبرن وآران يكبر واني اريد اساعدج ماتقبلين اول مرة ادري بيج بخيلة .

زهرة: هاهي مثلما تشوف وشوكت ما تحتاجني بس كول اجي اركض.

صادق: والنعم منج اخيتي كول وفعل الله يحفظج النا يارب 

زهرة : الله يسلمك اني رايحة مع السلامه ..

صادق: الله وياج 

مشت الايام بسرعة والعطلة اشرفت على الانتهاء وراح يرجع دوام المدارس اخذنا بابا للسوك اتسوك النا ملابس وجنط وترانشوزات وقراصات وقرطاسية 

واخذنا ملابس بيت  واشترى ل آران ملابس والعاب بعدها رجعنا بابا حيل فرحان عيونه تلمع من يباوعلنا

قبل من جانت ماما عايشة جان هو وياها ياخذونا ونطلع نشتري بس العام مارحنا لان بابا نفسيته تعبانة ...

قبل الدوام بأسبوع كاعدين نتغدا اندكت الباب 

طلع خالو ورجع كال صادق جماعة يردوك بالباب 

صادق: منو؟ 

محمد: ما اعرف والله كوم نشوف منو .

طلعوا  ورا ربع ساعة اجوي  الوجوه مكلوبة وحيل ضايجين ...

زهرة: منو ذولة وشبيكم ليش هذا حالكم؟ 

محمد: اهل صادق دازين ناس يتوسطون يمه حتى يرجع للبصرة وابوه الحجي صحته تعبانة ويريد يشوفه .

زهرة : اي كلش زين بلكت يصير صلح وترجع علاقته ويه أهله

محمد: ليش هو صادق نطاهم مجال يحجون تكول عبالك رشاش مو لسان صلاهم صلي وصار طفارهم ماله والي 

زهرة : ليش ابو رسيل ذولة هم اهلك وعمر الدم ماصار ماي 

صادق: صار والماي خايس اني ما الي اهل غيركم وما اريد اشوف اي واحد بيهم ولحد يكولي اهلك واهلك رايح انام ساعة من رخصتكم ..

محمد: ماتشرب جاي ؟ 

صادق : لا 

راح بابا بس مبين مقهور اكيد يريد يشوف جدو ويرجع بنص اهله بس اللي سواه بيه وبماما قبل صعب ما يكدر ينساه .

بعد هذا الموقف ماصار شي يذكر ومشت حياتنا طبيعي وبيوم اجى بابا وجايب وياه مرية تطلع اصغر من عمة زهرة فات  وصاح ياالله 

زهرة: تفضل ابو رسيل ماكو احد ...

صادق : السلام عليكم ام حسام ..

زهرة : وعليكم السلام منو هاي البنية خطار ؟

صادق: لا هاي مرية عندها ايتام وتدور شغل واني صارلي فترة أسال على وحدة زينة وبنت اصول تساعدج دلوني عليها راح تجي يومية الصبح تكمل شغل البيت كله وتساعدج بالحجية وسهاد وترجع الظهر زين .....

زهرة : الله يوفقك ان شاءالله وياربي تطلع خوش مرة

صادق : ان شاءالله اصيح الها حتى تتفقين وياها 

زهرة : صيحها خلي تتفضل ..

دخلت المرة وبابا طلع واتفقت هي وعمة زهرة تجي بين يوم ويوم .

بدت تجي هاي المرة الصبح تشتغل وتسوي اللي عليها وتطلع عمة زهرة حيل ارتاحت لان خف الحمل عليها 

ومن تجي لبيتنا تنظف ولازم بوجود بابا لو عمة زهرة مايقبل تدخل اذا بس احنا البنات يكول كلشي يصير الحذر واجب ليش ما فد يوم احنا بالمدارس وعمة زهرة فايته تسبح ومأمنه عليها يم بيبي وخاله سهاد

كومي وغافليهم على اساس تكمل شغلها طلعت رايحة لبيتنا و تندل وين نخلي المفتاح و( مهوسة) غرفه بابا كالبتها ماكو شي بمكانه ماخذة الفلوس ومهزومة

                   الفصل الثالث من هنا

لقراءه باقي الفصول من هنا