رواية العروس في الثوب الاسود الفصل الثالث 3 بقلم عبير ادريس

  رواية العروس في الثوب الاسود الفصل الثالث 3 بقلم عبير ادريس

لحظة لا هالدرب بيه ذكريات 

يعني من دون الطرق من دونها 

كون ذيج الشجرة تنكص وتموت

وكون هاي المسطبة يشيلونها 

فدوة ذاك الجسر لا تعبر عليه 

هنا حلفنا العشرة ابد مانخونها 

وكلي هم يمر وكت تنساني بيه 

كتله من جنازتي يشيعونها 

أنا لو ناسيك ومغادر هواك 

الرجفة هاي بجسمي شيسمونها 

وليش أغاني التطلع تذكرني بيك

دموعي تنزل كبل ما يبدونها 

نعمة النسيان اكبر جذبه هاي 

ما تصرف بعد لتعيدونها ..

___________

زهرة : ها يمة رسوله جيتي ؟ 

رسيل : اي عمة اجيت صارلي ربع ساعة 

زهرة : اختج وثائر اجوي لو بعدهم 

رسيل: لا بعدهم بس اني اجيت من وقت لان اليوم اجتماع الأمهات 

حجيتها وسكتت اختنكت نزلت دموعي 

اجتي عمة زهرة حضنتني

زهرة: يايمه ليش تبجين اني امج حبيبتي لو كايلتلي جان اجيت وياج

رسيل : ما صار شي عمة عادي لا تهتمين..

مسحت دموعي وكمت غسلت وجهي ورحت للمطبخ صبيت تمن وفوكاه مركة فاصوليا يابسة حيل احبها اكلت ورحت نمت يم بيبي على جربايتها 

البيبي: هله بحبيبتي تعالي. 

تقربت منها باستني وبقت تلعب بشعري لحدما غفيت 

مرت ربع ساعة حسيت على هوسة الولد وريناد اجوي من المدرسة وآران وياهم يهوس على واهسهم يموت على الجهال واللعب 

كمت رحت يمهم بالهول كاعدين كلنا فات خالو سلم وكعد ،، راحت عمه صبت الغداء  وكعدوا تغدوا، كمت اريد اروح للبيت حسام صاح وين ؟ 

رسيل : للبيت اريد انام شوية واكعد اقرأ ..

حسام : انتظري اني اوصلج ..

طلعت وهو طلع وراية وصلني ورجع

اول مادخلت حسيت اكو شي بالبيت صحت ..

رسيل : بابا شنو اجيت؟ 

محد جاوبني اباوع للهول مخربط دخلت لغرفة بابا واشوف الدنيا مكلوبة ابواب الكنتور مفتوحة، الهدوم مطشرة المجارير بالكاع تخبلت كمت ارجف من الخوف كلت هسه يطلع الحرامي ويكتلني  كمت امشي سريع واتلفت منا ومنا علما وصلت باب الطرمة قطرة دم مابقت بية صحت بصوت عالي .

رسيل : خالو عمة الحكولي حرامي حرامي

ركضت لبيتهم ومستمرة اعيط طلعوا يتراكضون صاحو شكو خير يمعودة 

رسيل : خالو حرامي بالبيت...

احجي وحلكي يابس من الخرعة ...

محمد : شفتيه بعينج ...

رسيل : لا بس البيت مكلوب ..

ركضوا خالو وعمة واني وراهم اول ما دخلنا لكينه حسام بالهول رايح للبيت اول ما سامعني اصيح ومدور البيت كله

محمد : هااا لكيت شي ؟ 

حسام : ماكو احد فارغ البيت !!

شغلة تصفن ياحرامي هذا اللي يطب ويقفل الباب ويرجع المفتاح بمكانه !  حسبة تودينا و حسبة تجيبنا

انتظرنا بابا على ما اجى جان طالع بشغلة 

وحجيناله كلشي ، راح لغرفته ورا شوية طلع مصدوم

صادق :  هذا الباكني حرامي بيت 

محمد: شنو قصدك؟ يعني من عندنا ؟ 

صادق: هاي شبيك يمعود اشك بنفسي وما اشك بيكم بس القصد  واحد فايت للبيت ويندل مكان المفتاح وين نخليه وشمعنى بس غرفتي مهوسه اكثر شي .

محمد: اني ببالي شغلة بس حرام اظلم حظي وبختي..

صادق: اني اكلك هي ماكو غيرها ..

محمد: انت فهمت شنو اريد اكول حتى تحجي

صادق :اي تقصد المرة اللي تنظف اني هم اول ماحجيتولي كلت ماكو غيرها لان الوحيدة اللي تندل المفتاح وين؟  و من اجتي تنظف البيت شافتني منين طلعته .

عمة زهرة لطمت على صدرها وكالت.

زهرة :  ياااا واني نسيتها اليوم وألتهيت برسيل جانت تبجي وراحت من بالي عفتها يم عمتي وفتت اسبح طلعت لكيت رسيل راجعة من المدرسة وهي ماكو..

حسام : ماكو غيرها تندل بيتها مو عمو؟ 

صادق : اي ورانا بفرعين ...

محمد : امشي نروح نطيح حظها 

صادق: هاي شبيك غير اكو دليل شي يثبت هي البايكة خوما نروح نهد عليها وهالمرة تفتر السالفو علينا وتعال جيب عمامك وخوالك ويزوعونا العافية 

محمد: هم صدك لعد شلون شنسوي هسه.

صادق : ندز زهرة تروح تحجي وياها وتهددها تكللها شافوج الجوارين واجوي كالولنا اذا ماترجعين الفلوس نرفع دعوة عليج وتنحبسين .

محمد: شكد الفلوس بله؟ 

صادق: خير من الله تحويشة العمر 

محمد : لا بربك لعد شو عبالك اني مبيوك مو انت يابرود اعصابك يا اخي 

صادق : اللي يروحله عزيز يشوف كلشي بالدنيا تافه وما يسوة يقهر روحه عليه ولا تنهزله شعرة احتمال لو قبل من جانت سوسن عايشة جان انقهرت واحترك دمي بس هسه لا عادي.

زهرة: والله حجيك كله صحيح يا ابو رسيل الله يصبرك اكوم اروح الها بس دليني بيتهم وارجع ...

صادق : يلا راح اوكفلج على صفحة

راحوا ورا نصف ساعة اجوي.

محمد: ها بشروالكيتوها؟ هددتيها ؟ خافت مو ؟ راح ترجعهن !

صادق : وحدة وحدة على كيفك لا يصير بيك شي مالكيناها شايلة 

محمد: يعني شنو فهمني ؟

صادق: السالفه كالآتي البنية مرتبة وضعها كلش زين ومدسترة امورها كلها ومجيكة مكان الفلوس وشايلة قبل يومين بغير منطقة واليوم باكتني ونهزمت ومحد يندلها ما تاركة اي اثر يوصلنت الها  حتى تلدلال  اللي جانت مأجرة منه البيت رحتله كال اجتني الصبح دفعت الأيجار مال اربعة اشهر وراحت و قبل يومين مسلمة مفاتيح البيت .

محمد: شون ناس الله لايوفقها كون كل فلس اخذته يحركها حرك 

صادق : هذا هو ربك موجود هي وربها تتجازة

محمد: وهسه شنو راح تسوي ؟

صادق : اقطع الأجازة واداوم شسوي قابل .

محمد:  يلا فدوة اهم شي انت وبناتك وابنك سالمين .

صادق: رحم الله والديك ، الحمدلله على كل حال..

زهرة : يلا رسوله كومي نرتب الغرفة

صادق: عوفيها رحمة لابوج اني ارتبها اريد اندل كلشي واسفطها مثلما اريد 

بابا حجى هيج حتى عمة لا تتعب واحنا رتبناها ...

مشت الايام و حياتنا كالعادة بين دوام وبيت ودراسة ماكو شي يذكر بس اللي صار والسبب اللي خله حياتنا تنكلب هو مرض آران من ورا البرد صارت عنده نشلة قوية ونزلت بصدره كام يتنك وبس يبجي لان  يتنفس بصعوبة وكل فترة يضيق عنده النفس ويصير ازرك ونركض بيه للمستشفى

بابا خلصت طاقته وتعب حيل  لان بآخر فترة آران يمنه يبقى بس بفترة دوام بابا يوديه يم عمة وباقي اليوم كله يمه هو يوكله ويسبحه ويبدله واني اساعده .

وبيوم كاعدين بالبيت واندكت الباب قوي طلع بابا وصاح...

صادق: جيت جيت .

فتح الباب فاتت عمة زهرة وتصيح..

زهرة : الحك صادق عمتي تخربطت لا ايد ولا رجل ...

طلع بابا يركض رحت وراه  اباوع بيبي صايرة صفرة وعيونها مكلوبة ليفوك شالها بابا وركض بيها وصل للسيارة جان يعيط رسيل جيبي السويج والمحفظة  رحت اركض جبتهن اخذتهن عمة زهرة وفتحت السيارة صعد بيبي واخذ عمة وراحوا

هذا الحجي ساعة خمسة العصر رحت يم خالة سهاد كعدنا يمها اني وثائر وريناد خطية خالة سهاد كلش فقيرة وعلى نياتها نحجي وياها تحجي نضحك تضحك واذا محد يسولف عندها استعداد تبقى ساكتة ايام بحيث مرات الجوارين من يجون عبالهم خالة خرسة 

رجع بابا ساعة ثمانية ونصف كال رسيل حضريلي ملابس لعمتج ولبيبيتج والعلاج مال بيبي خليه بالجنطة بسرعة ومن يجي خالج كليلة يلحكني للمستشفى لان بيبي راح تبات اليوم وتبقى يمها عمتج زهرة لأن حالتها تعبانة

راح بابا مرت ساعة اجى خالو كلتله تخبل وراحلهم رجع بليل وحده

رسيل: ها خالو شلونها بيبي؟

محمد: بيبيتج حيل تعبانة ضاربتها جلطة كلش قوية بحيث فاقدة ماحاسة بأي احد .

كمت ابجي على بيبي ما تستاهل هيج يصير بيها لأن حنينة وطيبة وابد ما اذكر بيوم صيحت علينا لو منعتنا من شي .

رسيل : لعد بابا ليش ما اجة؟

محمد: ابوج بثى بالمستشفى واني رجعت علمود سهاد .

بيبي نامت بالمستشفى ٣ ايام وطلعوها للبيت وكل فترة تتخربط ونوديها، عمة زهرة تعبت بابا تعب البيت كله متوتر ابد مامرتاحين .

ساعة بالتسعة اني وبابا بالمطبخ نسوي بالعشاء اندكت الباب راح بابا فتحها فاتوا خالو وحسام ...

صادق : يلا تعالوا شلون عشاء سوينا اني ورسولة يلوك لهذا الحلك..

محمد: دايم خوية بس جيتك بسالفة وما اريدك تخجلني..

صادق: هاي من شوكت بيناتنا هاي الرسميات 

محمد: مو هذا الموضوع اللي راح احجي بيه وياك حيل حساس بالنسبة الك .

صادق : هسه غير يحجي ويفضها مو نشفت دمي فوت بالموضوع بلا هالمقدمات ..

محمد : شوف خوية اني تعبت وعمري مو صغير وانت هم تعبان وجهالك متبهذلين وزهرة بعد مو مثل حيل قبل تعبت ، مرض الحجية اخذ من حيلها حيل تشيل وتحط على عدد الدقايق وابنك يومية مريض وينرادله عناية، الله يخليك بلا ماتحجي فكر بالموضوع انت الوحيد اللي تكدر تطلعنا من هذا الوضع اللي احنا بيه 

صادق: يعني هيج الامور كلها بيدي واني راح اخلي حياتكم تصير وردية والكل يصير بخير اذا تزوجت محمد اني احبك واحترمك ما اريد تطلع مني حجاية عايبة بحقك كلت ما اتزوج يعني ما اتزوج.

بعدهم يحجون اجتي عمة زهرة جان تكول 

زهرة : خوية بروح العزيزة الغالية لا ترفض هالمرة والله لو الحجية ما واكعة فلا اكلك  اريد وحدة تساعدني وتعيني بالبيت لخاطري لاتعاند بناتك وابنك كاعد يكبرون و ينرادلهم مداراه فكر الله يخليك .

بابا سمع الحجي وسكت حسيت من سكوت بابا راح يوافق عفتهم وصعدت ابجي ورا شوية اجتي ريناد متخبلة  

ريناد : هاي شنو بابا صدك راح يتزوج ؟

رسيل : ليش شنو وافق ؟

ريناد: اي كال لعمة شوفيلي وحدة على معرفتج لج شلون بابا راح يتزوج وحدة غير ماما وتجي تعيش يمنا والله ما اخليها تجي هنا اذا اجتي اروح لبيت جدو  اعيش...

رسيل : شو اسكتي من هسه تدورين مشاكل كومي طفي الضوء اريد انام ...

عافتني وطلعت بقيت افكر تجي تساعد عمة وهم تدير بالها على اران من احنا بالمدارس وبابا بالدوام ومن ناحية فكرت اخاف تجي وتأذينا اوووف ما مكتوب علينا الراحة ابد .

ثاني يوم اجى بابا الصبح وكال بدلوا انتِ واختج وتعالوا وراية لبيت جدج.

رسيل : اي بابا ..

بدلنا ورحنا لبيت جدو ،، بابا كللها لعمة

صادق : ام حسام يابه هذا آران خليه يمج ولو زحمة عليج اريد اخذ البنات ونروح لأمهم نزورها .

زهرة : عمت عيني جيبه وروح والله لوما الحجية وسهاد الا اجي وياك ..

صادق : المرة الجاية نخلي محمد يمهم واخذج وعد ..

زهرة : ياريت طاك گلبي عليها ترحون وترجعون بالسلامة ..

صادق : الله يسلمج..

طلعنا صعدنا بالسيارة وتوجهنا للنجف بابا دفنها هناك وكتب وصية لخالو اذا مات يدفنوه بصف ماما .

الطريق كلش طويل ومتعب وصلنا للمقبرة نزلنا..

وبقينا نمشي بين القبور ،لكينا قبر ماما بسهولة لان بابا على طول يجي الها اول ما صار الكبر كبالنا بابا كام يبجي ويشهك نام على كبرها واسمعه يحجي ويبجي..

صادق: لج سوسن وين عفتيني ورحتي شلون نطاج كلبج تعوفينا لج كومي لبيتج ولبناتج بيتج وبيت اهلج انهجم من بعدج رحتي واخذتي كل الراحة وياج يابعد راحتي وعافيتي لج كومي يريدوني اتزوج ترضين اتزوج غيرج؟ ترضين اشم عطر غير عطرج ؟ ترضين حبيبج يروح منج بسهولة ؟ اخ يانار گلبي تدرين شنو اكثر شي قاهرني وخلاني اكره روحي قبلت اتزوج قبلت اني ما استاهلج خنتج للأسف خنت الوعد، اني واحد خاين مايستاهل حبج ما يستاهلج ابد 

كام يصرخ ويبجي واحنا يمه حاضنيه ونبجي على بجيته وراها كام جاب مي وغسل القبر ،قرينا الفاتحة وعفنا روحنا يمها ورجعنا من النجف بنفس اليوم وصلنا لبغداد تقريباً ساعة عشرة بالليل  بابا فتح الباب الخارجي وكال انتظروني اجيب اخوكم واجي

راح بابا ورا شوية اجى 

رسيل : ها بابا وين آران ؟

صادق: طلعلي حسام وكال عوفه نايم باجر الصبح اول ما يكعد يجيبوه..

رسيل: ها زين لعد ..

صادق : بنات سبحوا وغيروا ملابسكم علمود اسبح وراكم ..

رسيل : اي بابا 

دخلت سبحت وطلعت وبعدين دخلت ريناد كملنة وصعدنا نمنا ما كعدنا غير ساعة ٣ الظهر على صوت بابا يصيح...

صادق: يلا بنات كعدوا راح يصير  العصر 

رسيل: نازلين بابا رنود يلا ننزل..

ريناد: يلا 

اول ما نزلنا لكينا بابا واكف بداية الدرج وعيونه مدمعة استغربت ليش باجي يمكن تذكر ماما...

صادق: تعالوت نتغدا..

ريناد: شنو الغداء بابا..

صادق: دولمة عمتج دزتها ...

رسيل: والله دولمة عمة ما تتفوت عاشت ايديها جنت كلش مشتهيتها 

صادق: يلا امشوا لعد قبل لا اخلصها واخليكم بلا غدة.. 

حضناه وحدة منا وحدة منا وهو حاوطنا بيده ، مشينا سوية للمطبخ كعدنا منظر الاكل يبجي دولمة حمرة وطرشي بيت وخضروات وخبز مكسب سمينا بسم الله واكلنا 

احنا ناكل وبابا لازم الخاشوكة ويحرك بيها 

رسيل: بابا ليش ماتاكل ؟ بابا مو احجي وياك ؟

صادق: هاا وياية ؟

رسيل: اي بابا وياك وين صافن؟

صادق : ماكو شي اكلوا بالعافية اني ما اشتهي لان قبل ساعة تريكت .

باوعت بالمطبخ ماكو ماعون مغسول ولا قوري على الطباخ عرفت مامتريك بس سكتت خليته براحته 

كملنا الاكل نظفنا الصحون وبلشنا بتنظيف البيت وية بابا .

صادق: يلا بنات اني راح اغسل الكراج والشارع واسقي الزرع وانتوا سووا اللي تكدرون عليه بينما اكمل واجيكم...

رسيل : تمام بابا ...

لملمت البيت وكنسته ومسحته وريناد رتبت الاسرة مالتنه ومال بابا ،دخل بابا شافنه كلشي مكملين تعجب 

صادق : هاي شنو والله وعاشت ايديكم اني تأخرت لان غسلت السيارة بدربي صارلي كم يوم ماغاسلها حتى اطلعكم باجر .

ريناد : هله هله بابا الحلو بابا الزين هههه ..

صادق: يا كلاوجية تموتين على التخايم ...

ريناد : اذا بابا حبيبي مايطلعني منو يطلعني .

صادق : تدللو عيوني الكم شعندي غيركم بالدنيا...

كملنا كلشي وبابا سوة جاي و كعك وكعدنا برا بالحديقة ناكل ونسولف ونضحك اجواء كلش حلوة خصوصاً وية 

بابا الحلو بيه صاير صديقنا كلش و ابد ماعندنت تقيد  اي شي نريده نروح نحجي وياه لان يتفهم ومو عصبي اهدأ من النسمة الباردة والحلو عنده خلك حيل طويل ويانا و حتى وية الناس يعني مستعد يسمع المقابل ساعات ومايمل صدره رحب كلش ويتقبل الاشخاص بعيوبهم قبل مميزاتهم 

صار كم سنة هنا كاعدين مافد يوم صارت بينا وبين الجوارين اي مشكلة...

  الناس كلها تحبه وتريد خاطره لان يساعد الصغير قبل الكبير يصيحوله صادق ابو الوكفات .

وره نصف ساعه اندكت الباب كام بابا فتحها فاتوا عمة  وخالو وآران يمشي فدوة شاله بابا وبوسه كعدوا خالو وعمة.

محمد: هاي خيانه هيج كاعدين وماتدزون علينا ...

صادق: ردت اكعد اني وبناتي وحدنا ما يصير يعني ؟ حجاها بضحكة 

محمد : اكعد عيني ليش لا اني جان زعلت ورحت على حجايتك هاي بس الجاي وريحة الهيل دكت بخشمي .

صادق: كومي رسوله صبي جاي لخالج وعمتج

زهرة : كعدي يمه اني اصب 

راحت عمة جابت استكانين جاي وكعدت بقوا يسولفون لوقت متأخر،  كامت ريناد ..

صادق: ها وين ؟ 

ريناد: اروح اقرأ بابا باجر عندي امتحان ..

محمد : وهاي هسه يلا تذكرتي وين جنتي كل هذا الوقت ؟ كومي رسيل قري اختج ..

ريناد: خالو ما يحتاج اني اقرأ هي اجتماعيات 

محمد: لا خلي اختج تقريج احسن حتى تاخذين درجة كاملة 

اني عرفت خالو يريدني اكوم من يمهم اكيد عنده موضوع وية بابا وخوفي لا موضوع الزواج

كمت وكلتلهم راح اروح اني هم اقرأ

دخلنا جوة صعدت ريناد واني بقيت واكفه بالمطبخ اريد اسمع شنو الموضوع اني مو طبعي اتسمع على الكبير بس هذا الموضوع حيل حساس بالنسبة النه...

لهناك و اسمع خالو يكول لبابا.

محمد:  صادق اليوم ام حسام راحت لبيت ابو جعفر وعندهم بنات ما متزوجات وحيل خوش بنات شتكول تشوف وحده منهن.

صادق: ليش يعني بيت ابو جعفر 

زهرة: اني صارلي فترة ادورلك على مرة الحجية وصتني قبل وكعتها الاخيرة وياهو اللي اروح الها لو ما تريد تتزوج لو محلوة ما تعجبني بس بنات ابو جعفر يخبلن كلش حلوات .

صادق : شكد اعمارهن ؟

زهرة: وحده ١٦ والثانية ٢٠ والجبيرة ٢٥ سنة 

صادق: شعجب ما متزوجه الكبيرة؟

زهرة: ما اجاها نصيب زين  

صادق: كلتي الهم اني زوجتي متوفية وعندي ٣ اطفال ..

زهرة: اي يدرون هم اصلا يعرفوك واول ما  كلت لامهم  وافقت كالت وين نلكه احسن من ابو رسيل 

صادق:  كلتيلهم عن الحجية وسهاد يدرون بالوضع ؟

زهرة: كلشي يدرون وكيفن 

محمد: هسه شتكول هاهي نتوكل ؟

جر حسرة وكال هاهي ..

زهرة : لعد راح اتفق وياهم باجر نروح حتى تشوف البنية ما كلت ياهو تريد بيهن

صادق: الجبيرة نشوفها خوما اخذها صغيرة وتشلع گلبي مابية حيل ..

محمد: لك يا حظي اخذها صغيرة وجدد شبابك بيها ..

زهرة: محمد هاي كدامي وهيج تحجي من وراية شلون اليوم تنام بلا عشا ..

صادق: حيل تستاهل وبعدين يا شبابي اللي اجدده شنو شايفني شايب كدامك اني كل عمري  ٣٨ سنه بكدي بعدهم ما متزوجين..

محمد: لا بكدك بعدهم ما مطلعين سنون كزة والله الشايب التايب .

صادق: عيوني ام حسام ماعلينا برجلج اجلي سالفة الروحة باجر لان اريد اطلع البنات خليها غير يوم

زهرة : براحتك عيوني يلا من رخصتكم اروح لان عمتي كعدت هسه و وقت علاجها فات نسيتوني بالحجي

صادق: الله وياج و انت وين رايح ؟ضل هنا ...

محمد: وين يعني غير اطلع على باب الله شغلة التكسي حيل تعبتني والوارد مالها قليل اريد اشوف شغلة ثانية 

صادق: ولك دنيا ليل يا شغل هسه وبعدين الف مرة كايلك اني عندك شتحتاج تعال وبلغني ما راح اقصر  ..

محمد : ما تقصر والله بس اريد افتح محل انشائيات وسألت  ينراد مبلغ قوي يلا اكدر اجهزة وموصي ولد متواعد وياه على الساعة تسعة نلتقي 

صادق: اكعد اني اسحبلك قرض على راتبي 

محمد: لا يابة ياقرض ما اقبل ...

صادق:شعليك انت  قابل اني راح اسددة وتتحسس انت سدد واذا ماسددت احبسك 

حجاها وضحك

محمد : اقبل بشرط ..

صادق: شنو؟

محمد: تصير شريك وياية ..

صادق: هسه خلي اسحب الفلوس اول وفتح المحل والله كريم منا لذاك الوكت .

كام خالو وحضن بابا 

محمد: لك انت اخوية والله شون اجازيك ما ادري 

صادق : مابيناتنا مجازات واحد يوكف للثاني

محمد: الله يديم هاي الخوة 

صادق : يارب  ..

راح خالو واني ركضت صعدت فوك خاف يشوفني بابا احس مسوية جريمة 

ريناد: هاي وين جنتي مو كلتي اصعد اقرأ

رسيل : هاا مو جنت بالحمام 

ريناد: هلكد بالحمام وشبيه وجهج اصفر 

رسيل: شبيج تحقيق خوما تحقيق اقري يلا معليج بية ..

بقينا نقرأ صارت ساعه عشرة ونصف صعد بابا فتح الباب 

صادق: تحتاجون اقريكم عندكم شي ما فاهميه 

رسيل:  لا بابا ماعندنا اني تقريباً خلصت ..

صادق: وانتِ  رنوده ..

ريناد: كملت الامتحان بقى بس اكتب رياضيات ..

صادق : كملو بسرعة علمود نروح نتمشى ونشتري موطا ونجيب عشا شتكولون .

كمزت ريناد وصاحت

ريناد:اني كملت 

جاوبها بابا بضحكة..

صادق: شكملتي مو هسه كلتي عندي رياضيات

ريناد: لا لا كملت كوم بابا نروح عفية ضايجة

صادق :يلا كوموا

كمنة لبسنا وطلعنا من البيت بابا شايل آران وكفت و كلتله بابا راح اجيب العربانة يشلع كلبك ثكيل ترة.

صادق: ها اي صدك يلا جيبيها

خلينا آران بالعربانة وطلعنا لكينه حسام واكف بالباب وبيده جكارة من شاف بابا رأسن شمرها بالكاع وداس عليها 

صادق: ودست عليها ريحة حلكك شلون توخرها ابوك يدري بيك تدخن؟

حسام : لا عمو عليك الله لا تجيب طاري لأبويه يزعل مني ..

صادق: على شرط هاي اخر مرة اشوفك تشرب جكارة ترة والله اكسرك ما انتظر ابوك يحاسبك ، اللي يشوفك يكول السفن مالته غركانة وهالكد كطوف بالكاع. 

باوع علية ودار وجها على بابا وكال..

حسام : اي والله عمو غركانة حيل ..

صادق: شنو لك عيد شكلت ما سمعت 

حسام : شبيك عمو والله قصدي على السادس تدري بكلوريا وهاي 

صادق: هاي ثاني سنة الك اطلع منها عاد شلون جنت شاطر  شجاك بالسادس بنجرت لو هذا حظ ابوك ..

حسام: اطلع اطلع لا تخاف والله وشوف شلون راح ارفع راسكم 

صادق : لعد احنا  شنو نريد غير نجاحك يلا رايحين  تجي ويانا تتمشى؟

بدون ما يسأل بابا وين جان يكول

حسام : اي اي جاي ماعندي شي 

اجى ويانا بابا وهو ليكدام واني وريناد وراهم اسمع بابا يحجي وياه على الجكاير شلون تأذي الواحد وتدمره وحسام اي عمو وصار مايحجي غير شي وصلنا لمحل اللي يبيع أيس كريم...

صادق : ها رسوله شنو اجيبلج ؟

رسيل: بكيفك بابا شنو تطلب مثلك ..

صادق: زين وانتِ رنودة ؟

ريناد: اريد ازبري ..

صادق : صار يا روح ابوكم ..

التفت لحسام 

صادق :يلا حسام تعال وياية ..

حسام : لا اني باقي يم البنات وانت جيب وتعال 

صادق : اي هم صدك شلون يبقن وحدهن زين شنو اجيبلك ؟ 

حسام: اي شي بكيفك 

صادق : كله بكيفك بس رنود ماتحيرني . حجاها بضحكة وراح.

لزمت عربانة آران قوي خاف تفلت مني اخاف عليه كلش. وحسام وريناد يمي واكفين..التفتلي حسام..

حسام: تعالوا نكعد هناك..

عقجت حاجبي وكلتله ..

رسيل: ليش 

حسام : ماكاعد تشوفين الهوسة ؟

رسيل: وشبيك ضايج وتنتر بالحجي؟

حسام : ماضايج كوة تضوجيني يعني؟

رسيل: لا ابد عيونك راح تطلع من مكانها على كيفك.

حسام: امشي كاعد اكلج ولاتتخيلين شي ماصاير ..

رسيل :امشي ريناد قبل لا يطلعها سم من خشمنا ..

باوعلي صفح وكال 

حسام : امشوا كدامي لا صدك اسممج هسه..

مشينا رحنا كعدنا على مصطبه مغطيتها الاشجار يعني ما نبين ابد وحسام واكف كبالنا ويخزر هذا وذاك شفت بابا يتلفت منا ومنا يدور علينا كلتله..

رسيل : ذاك عمك روح صيحه ديدور علينا ماتكلي وين شمرتنا ميشوفنا لو يضل يدور سنة...

حسام: لو لابسة لبس بيه حظ جان مجبتج هنا وكعدتج جان ضلينه بمكاننا حتى ابوج لايضل يدور لو بس ادري شلون خلاج هيج تطلعين جان ارتاحيت. 

باوعتله وكمت رحت بأتجاه بابا لان خطية يدور علينا وخاف يخترع عباله شو شنو صار وفعلاً اول مشافني صاح ...

صادق : هاي وينكم صدك جذب ..

رسيل : والله بابا اكو واحد تخبل علينا وصار ساعة ياكل بگلبي 

صادق : ليش شنو الصار ؟

باوعت على حسام  صاير نار كلت بيني وبين نفسي اكول  لبابا ويرزله حتى يتوب بعد يحاسبني  لحد الآن ما ناسيتله سالفة الباب من طلعت اصيحه ورزلني وهسه سالفة اللبس..

رسيل: يكلي ليش طالعة بالتراكسود وشلون ابوج خلاج هيج تطلعين. 

عكد حاجبه وباوع على حسام وحجى

صادق: ليش شبيه لبسها؟

حسام: لاعمي مابيه هاي تتخيل.

رسيل: لعد اذا اتخيل ليش خليتنا نكعد هناك...

حسام : غير اخاف عليكم ماتشوفين شلون هوسة صارت هنا

صادق: يلا كافي جبتكم تتعاركون لو تغيرون جو ..

رسيل: والله بابا لو مجاية احسن ..

صادق: كعدوا اكلوا حتى الموطا ماعت يلا شربوها شرب.

ريناد : بابا اريد اغسل ..

صادق: ياملعونة شبسرعة خلصتيها ..

ريناد :  قابل انتظركم ..

صادق: والله تفتهمين شوفو شلون ماعت  كلها راح اجيب غيرها ..

رسيل : اني ما اريد ..

حسام : ولا اني عمو ..

صادق: اني هم ما اريد امشوا نجيب عشا ونرجع للبيت ..

رحنا لمحل يبيع مشويات اخذنا سفري صينيتين كبار ..

رجعنا كبل لبيت بيبي دخلنا للمطبخ جانت عمة زهرة دتسوي عشا نواشف..

صادق: عوفي اللي بأيدج وامشي نتعشى..

زهرة : ياا هاي شجايب ليش مكلف نفسك وهذا اكل كومة سويت كلت اكمل وادز عليكم .

صادق: لا تكلفة ولا شي والاكل ضميه لباجر نحميه على الغداء

طفت عمة الطباخ وكعدنا كلنا سوية بغرفة بيبي عمة سوت لفة لخالة سهاد هي تاكل وحدها بس بيبي لازم واحد يوكلها عمة خلت بالماعون وراحت يم بيبي علمود توكلها، كام بابا واخذه منها كللها ..

صادق : روحي اكلي واني اوكل الحجية .

البيبي: رحم الله البطن الشالتك والله انت اصيل وابن اصيلة .

صادق: رحم الله والديج ربي يحفظج النا ويخليج خيمة على راسنا ..

خلصنا العشاء ورجعنه للبيت ثاني يوم رحنا للدوام ورجعنا لبيت جدو للعصر اجه بابا مبدل وكاشخ طالع يخبل ..شافه عمو محمد وضحك..

محمد: ها وين؟

يحجي ويغمز لبابا ...

صادق: والله عازم شلون بنات ثنين الا يموتن ..

محمد: عليك الله اجي وياك..

زهرة : هاي شبيك اثكل يمعود راح يطلع وية بناته مو كدامك البارحة كال ..

محمد: لو بس ادري الله مسلطج علية منين تطلعيلي انتِ

زهرة : اني مثل ظلك تكدر تتنفس ؟

محمد: لا والله ما اكدر خانكتني خنك ..

بابا يضحك على مناكرهم التفت علينا وكال..

صادق : يلا بنات بدلوا تاخرنا

زهرة : تغديت لو اصبلك؟

صادق: لا والله مامتغدي عازم بناتي على عشا واكل وياهم ..

زهرة : الف عافية عيني ..

صادق: الله يعافيج يلا اترخص ..

زهرة: الله وياكم..

رحنا للبيت وكبل صعدنا فوك بدلنا وطلعنا لكينه بابا كاعد بالسيارة سألنا وين تروحون اول كلناله للمطعم ...

توجه بينا لمطعم نحبه كلنا اول ما

وصلنه بابا التفت علية وكال

صادق: نزلوا هنا اطبك السيارة بهذا الكراج واجي ..

رسيل: اي بابا..

نزلنا وهو فر السيارة وراح ورا شوية اجه يمشي اباوع عليه عبالك اول مرة اشوفه شون طالع حلو متعجبة بيه هو من قبل انيق واللبس مالته كله تنسيقات والعطور ماركة بس من توفت ماما همل نفسه وطولت لحيتة هوواي وشكله تعب بس هسه لا رجع مثل قبل وصل يمنا ضحك...

صادق: شبيج كاعد ترسميني و هيج صافنة عليه حتى ما ترمشين ...

رسيل: والله بابا لو بيدي اخليك بنص عيوني واغمض هالكد ما اخاف عليك واحبك..

صادق: لاتخافين ابوية انتِ اني يمكم وين رايح..

رسيل : الله يخليك النه ويطول بعمرك ..

صادق : امين ويخليكم الية يا احلا البنات ...

لزم ايدنا وحدة منا وحدة منا نمشي ورافعات راسنا عندنا هيج اب حنين علينا ويحبنه ومدللنا غمضت عيني جريت نفس وكلت بداخلي الحمدلله على هذه النعمة .

طبينا للمطعم صاح بابا على النادل اجه ونطانه المنيو مال الاكل ...

اختارينه كل وحدة اكله وبابا كالعادة لو كباب لو مشاوي وصى على نفر مشكل .

اجه الاكل اكلنا ورحنا غسلنا ورجعنا للميز لكينه بابا جايب الي ولريناد عصائر واله جاي .

لزمت الكلاص وبديت اشرب بالعصير حجى بابا وتركت الكلاص حتى انتبه لكلامه ...

صادق: اريد اخذ رأييكم بشغلة تخصنا كلنا ...

رسيل : شنو الشغلة ؟

اني اعرف على موضوع الزواج بس سويت نفسي ما ادري ..

صادق: تعرفون اخر فترة شلون وضعنا بالبيت تعب وبيت جدج ماعندهم احد وعمتج زهرة تعبت وحدها .

بابا يحجي واني لزمني مغص ببطني عبالك رايحة استلم النتائج فاتحة كل عيوني ومركزة بكل كلمة يكولها واتمنى يكول فكرت بالموضوع ورفضته بس اللي صار العكس بابا دياخذ رأينة حتى يخطب .

صادق : اريد تعرفون شغلة وحدة يمكن هسه انتوا صغار وماتفتهمون كلامي بس من تكبرون اريدكم تتذكرون هذا الكلام كلمة كلمة حتى لا تلوموني. 

اني لو علية سنين ابقى بلا زواج عندي عادي 

واي وحدة هسه ماتحلى بعيوني من بعد امكم بس اللي صار اقوة مني ومابيدي غير هذا الحل جبتها منا وديتها منا ماكاعد ترهم وهذا الحل الوحيد وشفتوا الحاح بيت جدكم علية ومتأكد ما راح يعوفوني بحالي الا يشوفوني متزوج ...

شهكت ريناد بقت تكح ،كمز بابا عليها طبطب على ظهرها شربها مي صفنت على بابا وكالت بصوت مخنوك

ريناد : شنو بابا راح تتزوج ..

صادق : اذا انتوا توافقون اتزوج واذا وحدة منكم رفضت اني ارفض هذا الموضوع تماماً.

رسيل: بابا اذا هذا الموضوع بيه راحتك أني اقبل

ريناد : واني ما اقبل

عافتنا وكامت

                     الفصل الرابع من هنا 

لقراءه باقي الفصول من هنا