رواية العروس في الثوب الاسود الفصل الاول 1 بقلم عبير ادريس

مشهد

قصر كبيرٌ جداً.....ظلاااااامٌ حالك.......صمتٌ مخيف......

أعمدة تحمل مصابيح مضيئة تصنع أشكالاً قد تبدو مرعبة.... وجوه حقودة ... أنفس غدارة ...

٠

.

.

أحيانآ نحتاج من يقول لنا حكمة عن الحياة وان كانت قصيرة، بل هي في الحقيقة تعني الكثير، في وقت المحن والشدائد، في وقت الفراق او الخيانة، الحياه فيها تقلبات كثيرة تجعلنا لاندري الى أين نسير وماذا نفعل لنتخطى المفاجآت السيئة، ونرتقي بأنفسنا لنصبح أشخاص أفضل واقوى لا تكسرهم الأحزان آبدا......

(البصرة العشار الساعة الثامنة مساءً)

دخلنة بشارع واسع متكون من سايدين، أرصفة محفوفة بالأشجار ،بيووت كبيرة ، فجأة وكفت السيارة والسيارات البقية ، كدام بيت كلشش كبير  نزلوا، وأنفتح الباب الخلفي مال سيارة ، باوعت ياسر واكف وعاقد الحاجب اشرلي بحركة بمعنى انزلي .نزلت وكفت كدام هذا القصر ، يمكن لو بغير ضروف ومارة من كدامة لكان متت حتى ادخل واشوف دواخلة ، شنو من بناء فخم وفاخر . لكن بعيني شنو ؟ عبارة عن سجن كبير وأظلم ، والسجان ظالم ....

نزلت اترنح شبه اريد افقد التوازن انتبه عليه ياسر، تقدم اتجاهي مد ايدة لحتى يساعدني على المشي ، اشرتله بحركة معناها ابتعد ولتلزمني .

انفتحت باب القصر او بالاحرى السجن ، واشرلي ياسر باالدخول ، التفتت ورايه واشوف العصابة اللي جابتني من بغداد كلهم منتضريني ادخل حتى يدخلون 

بيهم تقريباً ٩ اشخاص ..

دخلت للكراج ، كلش كبير حجمة يسع خمسة سيارات ، على يميني حديقة كلش كبيرة واكو كلب حراسة لونه اسود وكبير شكله مخيف كلش ومربوط بزنجيل .مشيت وأتعثر بخطواتي الى ان وصلت باب خشب ضخمة كلش وبيها يدة كبيرة اندفعت الباب ، اريد ادخل ومترددة ، اقدم رجل ارجع الثانية الى ان سمعت صوت عوجية تضرب بالكاع تعلن عن قدوم شخص .

رفعت راسي واشوفها ام بابا ، تقربت عليه اشرتلي بيدها بمعنى تعالي ابوسج او احضنج ، باوعتلها بنظرة كره وحقد وحسرة و ألم كلهن انجمعن بنظرة وحدة تدل على رفضي لهذه العائلة ، لهناك واجاني صوته اللي اكثر صوت اكرها بالدنيا بدون مبالغة ..ابشع الاصوات والاشخاص المرو بحياتي وبعدين تعرفون ليش؟؟؟؟؟؟؟؟

........

تكرار الألم لايسقطنا في هوة الأستسلام ! 

بل يجعلنا نعتاده ، ويتبلد شعورنا تجاهه 

حتى نصاب بخدر تام في موضعه. 

القصة حقيقية

———————-

البارت الاول 

في وقت ما وفي زمن جميل مضى 

كان لدي أم وأب وأخ وأخ ، وفجأة صرت ابحث عنهم وعن اثرهم وعن الطرقات التي مرو عليها

عن الاوطان التي سكنوها وفي النهاية 

تصفعني حقيقة سفرهم الأبدي عن مخيلتي...

فتحت عيوني سرت برودة ورعشة قوية بعظامي اريد اتحرك بعد ما أكدر 

جسمي تعبان ضلوعي احسها متكسرة 

احاول اكوم وافشل ما اكدر شنو ادعي عليك عساك بحرقة گلبي وكل عظمة كسرتها بجسمي كون الله يكسرك ..

تعبت ألهي بعد ما اتحمل كمية الضرب والأهانة وين اروح وين ؟ تعبت اني تعب ياناس...

اباوع للأغراض اللي تحيطني متطشرة على الأرض والتحفيات متكسرة والصالة يرثى لها يمكن مثل حالتي واكثر ..

بس تعرفون شنو ورا كل كتلة لازم اكوم وانظف الهوسة والكارثة اللي صارت بالبيت من اغراض مكسورة وغيرها  وارجع كلشي بمكانه لأن حضرته لازم من يرجع كلشي مرتب ونظيف .

ها  لازم اجهزله الميز بيدي اي اني اجهزه لاتستغربون جنت مجبورة ليش وشلون راح تعرفون...

حاولت اكوم واستند على ايدي بس للأسف اوكع تكررت المحاولات هدأت من  سمعت صوت الموبايل يرن خلصت اول رنة والثانية واني احاول اكوم ماكدر رجلي ما تعيني..

خلصت رنة الموبايل وصار هدوء  قاتل  رجعت حاولت اوكف واخيرا كمت  استندت على القنفة وكمت ، صرت ادور على الموبايل ما أدري وينه راح وية الهوسه وين الكاه هسه !!! 

اباوع منا ومنا بعدني ادور رجع رن من جديد رحت اجر رجلي وامشي بالكوة وصلت للمكان اللي بيه الموبايل لكيته مشمور جوة الطبلة..

دنكت سحبته باوعت رقم غريب ، احتاريت اجاوب لو لا لأن الظالم محذرني ممنوع اجاوب واذا جاوبت  اعرف شنو راح يصير بية ، لهذا تجنباً  للمشاكل مارديت اعرفه شلون راح يتخبل علية اذا عرف ...

انطفئ ضوء الموبايل كعدت على القنفة رجعت راسي ليورا،  بعد شوية لمض  ضوء الشاشة اجتني رسالة فتحتها بإيد ترجف قريت مكتوب رسيل  أني ريناد ردي ..

فتحت عيوني على  وسعهن اريد اتنفس ما أكدر مااعرف شنو اسوي ارتبكت وبنفس الوقت فرحت اريد اتصل على الرقم بس ايدي خانتني ترجف ..

غمضتهن لعيوني بقوة واخذت نفس عميق وشهكت شهكة ردات تطلع روحي بيها  ، بلعت ريكي فتحت عيوني واتصلت على نفس الرقم رن مرة اثنين ثلاثة احسب الدكات وية خفقات قلبي ، واخيراً 

سمعت صوتها اي والله هذا صوتها ، اخ ياصوتج يا اختي ياحبيبتي مجرد كالت الو رجعتني لبيتنا بالأعظمية لبيت أمي وأبوية لمدرستنا لكلشي حلو تركته وراية  لدلالنا وسرحت اتذكر بيتنا ولمتنا...  

بهذا الاتصال رجعت بذاكرتي لقبل سنوات......

بيت اهلي بالأعظمية...

سوسن : يلا رسيل ماما كومي  وكعدي اختج صار وقت المدرسة يلا حبيبتي حتى خالو يوديج بدربه تأخرت على دوامي يادوب الحك ابدل وخليتلكم الريوك بالمطبخ عود تريكوا واخذوا لفاتكم زين امي...

رسيل : اي ماما كايمة.. 

كمت والنعس بعيوني اني من النوع كلش احب النوم واكره كعدة الصبح خصوصاً بالشتاء والدنيا باردة اتعاجز اكوم اسمع صوت ماما تبدل وتصيح علينا يلا  يا بنات خالكم راح ييجي فضوها عاد ...

رحت اكعد ريناد هم مثلي ويمكن اتعس بالكوة تكوم تنبل مال نوم ع كولت خالو محمد ..

رسيل : ريناد ريناد ..

احجي وانغها بإيدي حتى تكعد ..

رسيل : ولج كومي تاخرنا . 

ريناد: كمت والله بس شوية حبابة

رسيل: لاحبابة ولا شي كومي ترى تجيج ماما معلية ..

تركتها و رحت غسلت ورجعت لغرفتي لبست الصدرية والقميص هنا اني  جنت صف خامس ابتدائي وريناد صف ثالث اكبرها بسنتين...

وماما حبيبتي جانت تريد جهال بعد بس بحكم شغلها ماتكدر لان مايصير حامل وتداوم . 

خلي اعرفكم شوية بعائلتنا ..

بابا حبيبي اسمه صادق يشتغل موظف بمطار بغداد الدولي مضيف طيران..

وماما سوسن هم وياه مضيفة طيران ...

تزوجوا بعد معاناة واخذوا بعض بعد علاقة حب كبيرة دامت خمس سنوات يلا صارت الخطوبة..

اول سنة ماصار عندهم اطفال بالأتفاق  مارادوا بحكم عملهم ..

اجيت للدنيا من بعد سنتين زواج ، بابا سماني رسيل..

معنى أسمي_ الماء العذب 

بعد سنتين اجتي اختي ريناد للدنيا وهالمرة جان الاختيار على ماما هي اختارت الاسم ... 

ومعنى اسمها _ نبتة طيبة الرائحة _ يستخرج منها العطور . 

بابا راد اسم ألينا بس بيبي أم ماما رفضت كالت صعب حتى ما ينلفظ ..

معنى الينا _ من الين والرقه . أي اجمل نساء العالم وكذلك بريق الشمس .

كملنا تبديل ونزلنا اخذنا اللفات خليناهن بالجنطة وطلعنا بدون ريوك لان ما

نشتهي الصبح ، لكينه خالو وابنه ثائر بالسيارة صعدنا ليورا .

رسيل : صباح الخير شلونك خالو حبيبي شلونك ثأوري .

محمد : هلا بخالو شلونهم الحلوات اليوم شبيها رنوده ضايجة و ماتسلم منو مضوجها .

رسيل: محد مضوجها ماتعرفها من تكعد الصبح شلون تقلب خلقتها...

حجيتها وضحكت هي باوعتلي صفح وكالت ..

ريناد: انتِ يايوم ماحجيتي بيه علية ماتصدكين خالو يحجي حتى انتِ تحجين..

ضحك خالو وكال..

محمد : ولج ام لسان شلون بيج منين تجيبين هذا الحجي سمعي رسيل هاي اختج مو سهلة شوفيها من هسه مسيطرة ..

رسيل: خالو بعدها صغيرة تكبر وتتغير .

محمد: هم صحيح يلا حبيباتي نزلوا وصلنا ..

نزلنا ولوحنا بيدنا بيباي ،  وراح دخلنا للمدرسة نركض أني وريناد وثائر  المدرسة اللي احنا بيها مختلطة ثائر اصغر مني بسنة 

..

وصلنا للساحة واكفين الطلاب كلهم اصطفاف اصطفينا وياهم وراها دك الجرس للصفوف اندارينا  واحد ورا الثاني دخلنا للصفوف...

خلص الدوام اجى خالو ورجعنا لبيت بيبي لان ماما وبابا بعدهم ما راجعين من الدوام..

اول ما دخلنا نزعنه الجنط ورحنا نركض على بيبي جانت كاعدة بباب المطبخ تلكط خضورات لان ماتشوف إلا على ضوء الشمس نظرها ضعيف شوية ، تقربت بستها بخدها وسلمت...

رسيل : هلو بيبي حبيبتي اشتاقيتلج ..

البيبي : هلا رسولة هلا بنيتي شوكت لحكتي تشتاقيلي البارحة شفتج ...

حضنتها حيل وكلتلها

رسيل : بيبي ليش اني اتحمل ما اشوفج حتى لو ساعة هم اشوفها هووواي علية ..

ريناد : والله بيبي اني هم اشتاقلج ..

البيبي : تعالي ولج ام لسان تعالي ابوسج 

اشرت على ريناد اجتي يمها باستها ودخلنا للمطبخ جانت زوجة خالو محمد  زهرة واكفة تسوي غداء ،كلش حبابة وطيبة ، وهي وماما صديقات كلش لهذا تحبنا ومداريتنا ابد ماحسينا بيوم هي جنة بهذا البيت ...

من ماما تتأخر نبدل ونتغدا يمهم ومرات ننام ونبلش ندرس  يلا تجي.

ومن عندها سفر نبقى ببيت جدو واذا بابا ماعنده رحلة يرجع يمنا وبس بليل يروح لبيتنا يبات هناك 

حياتنا كلش هادئة و حلوة مرتاحين واحلى شي واكثر شي يفرحنا  من بابا وماما عندهم عطلة بيومها نطلع ياخذنا بابا لأرقى الاماكن واحسن المطاعم..

جنا اني واختي كلش مدللين ما اتذكر يوم من الايام طلبا شي وماشتروه الية لو لأختي ..

وحتى غرفتنا جانت من ارقى الغرف كلشي بيها من متطلبات البنات والعاب والكنتور مليان ملابس وبدلات وكلشي البنية تتمناه موجود متوفرلنا...

ماما عندها اخوان اثنين خالو محمد عايش وية بيبي وخالو علاء مسافر بعمان هو وعائلته ..

وعندي خالة وحدة بس مريضة مقعدة .

بعدما تغدينا كعدنا بالهول نقرأ دخل حسام باوعلنا وضحك...

حسام : ياهله بالحلوات شلونكم ..

جاوبنا اني وريناد بصوت واحد زينين ..

حسام : تحتاجون مساعدة عندكم درس صعب اقريكم ..

حسام جان صف رابع عام كلش حباب ومؤدب ومرات يدرسنا لأن هو كلش شاطر ...

رسيل : لا ما نحتاج من نشوف شي صعب احنا نجي عليك ..

حسام : عفية بنات عمتي سباعيات..

ريناد : حباب من تطلع اريد اجي وياك اشتري ..

حسام : بعيني تدللي ..

ثائر : اني هم اجي وياكم ..

ريناد : اهووو هم نبص روحه انت شكو ..

ثائر : شعليج قابل راح تشيليني على ظهرج ..

رسيل : اسكتوا ثنينكم تروحون واللي يسوي هوسة اكول لبيبي بعد ماتنطيه فلوس ...

حسام : يلا كملوا واجباتكم واخذكم و اللي مامكمل ما اخذه ..

ريناد : اني راح اكمل ع السريع ...

ثائر : اني هم 

استمرينا ندرس بحماس صارت تقريباً ساعة ستة ونصف سمعت صوت بابا برا بالطرمة يصيح وينهن بناتي الحلوات ..

طلعنا نركض كنبص بالكاع اخذنا لحضنه اني وريناد وبقى يبوس بينا..

صادق : يايابة هسه يلا ردتلي روحي ..

سوسن : واني ماكو بوسة لماما .

ركضنا عليها بوسناها ..

صح  يومية نشوفهم بس وقت دوامهم طويل مانشبع منهم هوواي ..

سوسن : يلا جيبوا اغراضكم حتى نرجع للبيت...

دخلنا ركض اخذنا جنطنا مال مدرسة والملابس ورجعنا لبيتنا اللي هو بصف بيت جدو حايط على حايط.

ثاني يوم الصبح 

سوسن :  اكول ابو رسيل..

صادق: كولي عيوني أنتِ ..

سوسن : شنو رأيك نسوي طفل؟

صادق : والله اني اتمنى بس بنتج بعدها صغيرة ..

سوسن: منو صغيرة ريناد يمعود صف ثالث ، اذا حبلت وجبت تصير رابع يعني مو صغيرة..

صادق: انتِ هيج تكولين ..

سوسن : اي والله اني هم اريد اخ للبنات وانت هم تحتاج ولد يسندك بكبرتك ويشيل اسمك قابل نبقى على البنات...

صادق: شلج بهذا الحجي سوسن تعرفيني كلش زين  مافرق بين الولد والبنية عندي بناتي يسوون الدنيا ومابيها. 

سوسن : ادري ياعيني قابل كلتلك ماتحبهن بس اني هم احب الجهال ،، وتعبت من الدوام على الاقل يبقه دوامي يومي مو طيران ورحلات وتعب وهم من اجيب اخذ امومة لان رسولة السنة بكلوريا اريد اتفرغ الها .

صادق: والله حاسبتهة ومخططة يا ام رسيل..

سوسن : حبيبي انت الخير والبركة من بعدك يعني.

كمت بسته بخده وهمست 

سوسن : الله لايحرمنه منك ومن طيبتك ..

صادق: ولا يحرمني منج ومن بناتج ..

رسيل 

دخلت للمطبخ لكيت ماما حاضنة بابا استحيت ردت اطلع صاحني بابا 

صادق : تعالي رسيل تعالي باباتي ..

رجعت بخطواتي اتجاه بابا..

رسيل: نعم بابا ؟

صادق: شنو رأيج ماما تجيبلج اخ صغير تلعبين وياه ..

ضحكت وعيوني دمعت فرح

رسيل : الله بابا اتمنى يصير عندي اخ لو اخت واربيهم لان ريناد كلشي ما اتذكر منها جنت صغيرة وهسه لا صرت افتهم .

سوسن : رحت فدوة لحبيبي اللي يفتهم تعالي ابوسج..

رحت يم ماما شبكتها وباستني..

رسيل : ماما كلش احب ريحتج...

سوسن : ياروح امج واني اموت عليكم وعلى كلشي بيكم الله يخليكم الي انتِ واختج وما يحرمني منكم،  يلا صيحي رنوده حتى نروح نتريك يم بيبيتج ماطول اليوم عندنا عطلة وهم نطلع العصر نروح نحتفل بمولد الرسول الاعظم( صلى الله عليه واله ) ..

فرحت كلش وركضت على ريناد حتى اكعدها 

رسيل : رنود كومي نروح نتريك بيت بيبي بالحديقة ...

طفرت من نومها وكالت..

ريناد :  صدك كولي والله اليوم بابا وماما بالبيت يعني ويانا يتريكون ؟ 

رسيل : اي شبيج يلا منتضرينا جوة غسلي وبدلي راح انزل كدامج...

عفتها وطلعت ،، فرحة ريناد مو اقل من فرحتي، اني وياها ابد ما شبعانين من ماما وبابا لان على طول مشغولين دوام وسفر صح بيت بيبي مامقصرين لكن مو مثلهم .

رحنا لبيت بيبي ،، بابا جاب صمون حار وو وياه كاهي وكيمر دخلنا لبيتهم  بدون ماندك الباب لان خالين مثل السيم مجرد نسحبه ينفتح الباب .

الجو كلش حلو بداية شهر الثاني وشمس الشتاء حلوة وبيها برودة ...

باوعت المنظر يفتح النفس الميز منصوب بالحديقة وعليه قوري الجاي والاستكاين والاجبان والمخلمة ياويلي 

بابا خله الكاهي والكيمر صارت سفرة تخبل كعدنا كلنا على السفرة ، بيبي وخالو وزوجته وحسام وثائر وحتى خالة سهاد جبناها بالكرسي وكعدت يمنا ..

بابا اندمج وية خالو محمد سوالف وضحك جانوا كلش مقربين من بعض واغلب الاحيان سرهم واحد 

كملنا ريوك رفعنا السفرة وماما ساعدت خالة زهرة بالمطبخ بقينا يمهم للعصر

جنا  نلعب بالغرفه اني وريناد اجتي  ماما ..

سوسن : بسرعة غسلوا وتعالوا ابدل الكم..

نزلنا نركض مانعرف شكو

بدلت النه ولبستنا فساتين يخبلن جايبيهن من الخارج فستاني سمائي وريناد وردي وكفنا كبال المرايا ونباوع على روحنا متعجبات بشكلنا ونضحك ما ندري شنو الدنيا ضامتلنا 

اجه خالو سمعنا صوته ونزلنا نركض بوسناه كلنا بصوت واحد

رسيل ريناد : هلو خالو ..

محمد: هلا بحبيباتي شلونكم ؟يلا كملتوا ..

ريناد: اي خالو كملنا و نريد نصعد وياك بالسيارة..

رسيل:  انتِ اصعدي وية خالو اني وية بابا ..

ضحك خالو وكال

محمد :  فدوة تعالي رنودة وياي.

ربت على شعرها ، صاح بابا ..

صادق : يلا عيني استعجلوا ما بقى وقت ..

سوسن: لحظة نسيت الشموع همزين تذكرتهن ..

محمد: والله لو ناسيتهن ولا ارجع مثل العام رجعتيني عليهن ...

صادق : انت شنو ما تنسى ذاكرة جمل عندك ..

دك على الخشب وكال ..

محمد :  صلي على محمد لاتحسدني هي بس الذاكرة ضالة عندي وخليت عينك عليها؟ 

صادق: دومك تبجي خبصتني قابل حاسد عيونك الزرك لو شعرك الاصفر ؟ 

سوسن : يبووو بلش المناكر ما راح نطلع منا لباجر ..

صادق : طفيتي الغراض تاكدتي منهن زين؟ 

سوسن : اي كلشي تمام والغاز هم تأكدت منه حتى لاتسألني ..

صادق : اي زين يلا اطلعوا علمود اقفل الابواب ..

طلعنا بيومها سيارتين سيارتنا وسيارة بيت خالو 

رحنا على جسر الاعظمية والناس هوسة بالكوة نلكه مكان نوكف بيه كلها تحتفل وفرحانة وناس تعلك شموع تطلب نذر وناس توفي النذر لان حصلت مرادها وماما هم علكت شموع ونذرت ماجنت اعرف شنو اللي طلبته بس بعدين من سألتها كالت اريد اخ الكم حتى يصيرلكم سند . 

احتفلنا وبابا اشترالنا لفات كعدنا على الرصيف نباوع على العالم وناكل 

اجواء حلوة قسم يركصون وقسم كاعدين مثلنا

والشعالات كل شوية عالكين وحدة ونفز من الصوت ونضحك على روحنا صارت ب ١٢ رجعنا للبيت  مجرد خلينا راسنا على المخدة نمنا

مرت الايام والشهور وصار موعد الامتحانات 

امتحنا ونجحنا الحمدلله اني صرت صف سادس ابتدائي وريناد رابع

وماما حبيبتي حامل و وحامها قوي 

اتفقنا اني وريناد نساعدها بكلشي و ابد مانتعبها 

خلصت السنة الدراسية ، وقبل لانكعد بعطلة المراجعة للصف السادس بأسبوع،،

مدرستنا سوت حفل تخرج وحضروا بوقتها بابا وماما وجنت طايرة بيهم ورافعة راسي احس نفسي اسعد وحدة بالدنيا واحسن من كل البنات لان الله رزقني بهيج ام واب..

بس للاسف جانت هاي اخر لحظات الفرح بحياتي ومن يومها ماعرفت شي اسمه الفرح ..

بيوم كعدنه على صريخ ماما عندها وجع مال ولادة

بابا  حبيبي يركض منا ومنا مخبوص مايعرف شيسوي صاح علية اروح لبيت جدو اصيحهم ،، ركضت على بيت جدو اجتي بيبي وعمة زهرة..

اول ما دخلت بيبي شافت وضع ماما كامت تضرب على وجهها...

البيبي:  يايمة شصار ليش عندج وجع  بعدج وينج وين الولادة توج دخلتي بالسابع ..

سوسن: ما ادري يوم لحكولي ما اتحمل بعد صادق فدوة استعجل راح اموت من الوجع ..

طلع بابا يركض شغل السيارة بينما خالة زهرة بدلت الماما وطلعوا

وصلت ماما للباب الخارجي ركضنا اني وريناد نبوس بيها ونحضنها وهي تبجي وتبوس بينا..

حجت بصوت ضعيف وتعبان..

سوسن: ماما لاتبجين من جبتكم هم هيج صار بية هذا الشي طبيعي، اريدج تصيرين سباعية وتديرين بالج على اختج لاتسوون هوسة وتعبون بيبي خطية تعبانة

رسيل : لايضل بالج ماما تروحين وترجعين بالسلامة. 

بوسناها وراحت بس ماجنا ندري هاي اخر مرة نشوف ماما ونشمها لو ادري جان جلبت بيها وماخليتها تروح وتعوفنا ، ماما بعدها صغيرة واحنا صغار ومحتاجيها وماشبعنا منها  ...

مرت الساعات وماكو خبر ، ولا واحد بين لا بابا لا خالو..

بقينا على نار صح صغار بس نفتهم وبيبي كل شوية 

تكول وين صاروا؟  بس لا سوسن بيها شي لو الطفل ؟ 

و لازمة السبحة  وتدعي يامسهل سهل ولادة سوسن بنت افتخار وكومها بالسلامة هي وطفلها...

لهناك فات خالو كال..

محمد : ها خير شو هنا كاعدين ، رحت للبيت لكيت بس  ثائر موجود وسألته عليكم كال يم بيت عمة سوسن .

البيبي : يمة اختك كاعد تجيب وبعد ماندري بوضعها وتاخروا حيل گلبي مثل النار عليها .

محمد : بيا مستشفى ؟ 

البيبي : بمستشفى الكاظمية اخذوها لاتتأخر يمة طمني عيني ترة گلبي مايتحمل بعد ...

راح خالو محمد والروحة روحة مرت الساعات وصارت ساعة ١٢ بليل اندفع الباب دخلوا بابا وخالو 

ما انسى منظرهم العيون دم وجه بابا ازرك محتقن وخالو محمد مو اقل منه حالهم يبجي الصخر..

بيبي من شافتهم  عاطت 

البيبي : ها ولكم شو وحدكم سوسن وين ؟ 

عاط بابا وصاح بحركة گلب..

محمد :  راحت حجية راحت ام بيتي راحت صديقتي وحبيبتي راحت ام بناتي ..

ويلطم ع وجهها وصدره مثل النسوان  بيبي مجرد سمعت الحجي مال بابا وكعت من طولها ركض خالو محمد عليها 

محمد : يوووم كومي رحمة لأهلج مابية حيل انتِ هم تفجعيني لج يووووم كومي كافي علية سوسن راحت مني.

ما تجاوب لا ايد ولا رجل ، خالو اخذ بيبي للمستشفى وللأسف طلع ضغطها صاعد والسكر معلك ضربتها جلطة خفيفة كال الطبيب بمرور الايام ممكن تتعالج بس لازم راحة واكل صحي بدون دهون وتتبهرز واهم شي الحالة النفسية ...

محمد : صادق الحجية وضعها حيل تعبان صادق مو احجي وياك ؟

صادق: راحت وراح كل الخير وياها اخذت الضحكة والفرحة وحتى العافية..

يحجي بابا ويشهك ويبجي عبالك طفل صغير .

جاوبه خالو بخنكة..

محمد: كوم ياخوية ساعدني نشيل الحجية ونخليها بفراشها والله حتى حيل ما ضل بية.

جاوبه بابا بصوت مبحوح ..

صادق : ليش شبيها الحجية؟ 

محمد: ماتحملت الخبر وسكرها صعد والضغط علك ضربتها جلطة ماتت رجليناتها ...

صادق: شنو يعني بعد ماتمشي؟

محمد: الطبيب كال بالعلاج الطبيعي والادوية ترجع واحتمال لا ...

صادق: الله يشافيها.

حجاها وكام يبجي طلع للحديقة اختنك ..

اني وريناد نبجي ونباوع بالوجوه مانعرف شنو نسوي..

طلع خالو محمد على بابا برا وطلعت وراه اريد اعرف ماما وين راح اتخبل عليها..

محمد: اسمعني صادق هاي زهرة بالمستشفى يم ابنك وابنك بالخدج ينرادله عنايو و سهر يعني زهرة منا لشهر هي مو بلبيت ولا تنسى سهاد مقعدة وتحتاج مداراه ومنا وكعة الحجية وبناتك صغار اخ يابة اويلي على المصيبة الوكعنا بيها لا اعتراض على حكمك الهي منك الصبر وكام يضرب على راسه ،، فهمني شلون بينا شلون راح تدبر..

بابا صافن ويبجي ما حجه شي ..

محمد: تخلص الدفنة و اخلي وحدة من بنات خالاتنا لو بنات عماتنا تجي هنا تكعد علما الله يفرجها وترجع زهرة للبيت..

صادق : خابر على علاء بلغه يجيب اهله ونبراس ونطلب منهم يضلون يمنا هالفترة على ما نوكف على رجلينا وتعدي الازمة..

خالو علاء الكبير مسافر بعمان وعنده ثلاث اولاد احمد و وليد و زيد وبنات اثنين ولاء وافنان ...

نبراس بنت خالو محمد متزوجها أحمد ابن خالو علاء وكلهم مسافرين بعمان مستقرين هناك والولد الصغار كملوا دراستهم بعمان لحد مادخلوا جامعات ،، سنين صارلهم من مسافرين . 

محمد: والله راحوا من بالي هسه اخابرهم وابلغهم حتى يحضرون الفاتحة لان اكيد مايلحكون ع الدفنة ...

بابا هز راسه بأي .

خلص الليل كله يبجي وينوح على ماما وخالو ساعة يمه ساعة يم بيبي ويم خالة سهاد ..

اول ما طلع الفجر راحوا للمستشفى حتى يكملون اجراءات الدفن ...

طلعوا واني دخلت للبيت اباوع ريناد ماكو واصلاً ماشفتها من اجى بابا اختفت كمت اصيح..

رسيل : ريناد وينج..

ادور عليهة وابجي ماكو تخبلت ركضت على حسام وثائر كلتلهم شفتوا ريناد ؟ 

جاوبني حسام بخنكة..

حسام : احم لا ماشفتها مو جانت يمج ..

رسيل : اخر شي جانت بفراشها وصافنة حتى ماحجيت وياها ومن اجه بابا اختفت ..

حسام : اخاف راحت لبيتكم .

رسيل : شيوديها هناك وحدها..

حسام: امشي نشوفها ..

طلعنا اني وحسام دخلنا لبيتنا امشي وابجي هذا المطبخ ماما شكد جانت تحبه اثثته غرض غرض على ايديها سوته ، جنت دائماً  اسمعها تكول هاي مملكتي وابد ما افكر اشيل منا حتى اذا البنات كبروا نضل بيه ، اخ اخ شلتي من الدنيا كلها مو بس من البيت .

اباوع على البيت واصفن كل شوية بالي يروح يم موقف معين ،اجاني صوت حسام فززني من صفنتي ..

حسام : وينج يمعودة صارلي ساعة اصيح وين صافنة ؟ 

حجاها بنترة ..

رسيل : هاا ماسمعتك لكيت ريناد ..

حسام : اي تعالي بغرفة امج نايمة ..

رحت اركض لغرفة بابا وماما لكيتها حاضنة ملابس ماما ونايمة ودموعها تنزل على خدها نمت بصفها وحضنت الملابس ودموعي بدت تنزل بحركة اكثر عبالك حاضنة ماما.

حسام : راح تبقين هنا لو تكعديها وتجون لبيتنا

رسيل : لا خليهة نايمة ..

ما جاوبني سد الباب وطلع واني ضليت اشم بملابس ماما وابجي غفيت من التعب لهناك واسمع صوت عياط وهوسة بيت بيبي ركضنا اني وريناد...

دخلنا للطرمة واشوف شي خشب بعدين عرفت هذا تابوت ،، وكلها نايمة عليه و تبجي الصغير والجبير 

عيوني تدور على بابا ذاك اي والله ذاك بابا بس منتهي فاصل عن الدنيا 

هذا خالو محمد حالته اتعس بعد ،بيبي على العربانة تباوع بعيونها وتبجي مابيها حيل تصرخ لو تحجي..

اخذوها لماما وراحوا يدفنوها راحت وراح  كلشي حلو بالدنيا . 

بدت تتوافد النسوان لبيت بيبي انكلبت الدنيا علينا نصبوا جادر بالباب

ثاني يوم الفاتحة اجوي بيت خالو علاء ،،زوجتة أبتهال و ولدة وبناتة ونبراس بنت خالو محمد.

خالو محمد اول ما شاف عمه ابتهال راح عليها.

محمد: عيني ام احمد بلكت تروحين للمستشفى بمكان ام حسام كلش تعبت خاف هم توكع مابية حيل بعد اريدها شوية ترتاح وتبدل وارجعها وهم تحضر عزة سوسن والله تتخبل اذا ماحضرت هي هناك وتبجي وتلطم لمت الناس عليها لا اكل ولا شرب صارلها يومين ..

ابتهال: تدلل ابو حسام هسه البس عباتي واجي وياك ..

اخذها خالو وراحوا ورا نصف ساعة دخلت عمة زهرة..

هلكد بجت وعيطت ملخت نفسها عبالك توها سمعت بخبر ماما وعلى بجيها النسوان تبجي،

خلص العزة وراحت الناس فرغ البيت علينا وبدت الوحشه ،عمة زهره وعمة ابتهال يتناوبون بين البيت والمستشفى و نبراس تسوي اكل للولد وعينها على بيبي وخالة..

مر اسبوع على وفاه ماما والبيت كئيب وزواياه مملة ومظلمة..

بيوم السابع كاعدين بالهول اجوي نسوان الطرف،، هاي اللي تقرة قران على روح ماما وهاي اللي تصبر بعمة زهرة وخالة سعاد ،،،

ورا شوية سمعنا صوت رياجيل عالي طلعنا نركض للطرمة لكينه بابا واكف وداير مدايره رياجيل ويصيحون بصوت عالي . 

حجى علي ابو مروان اخو بابا الكبير ( بعدين عرفت هذا عمي )

علي : اسمعني صادق المرة وراحت لدار حقها وانت صارلك سنين مقاطعنا واللي بسببها صارت القطيعة و المشاكل وقطع الارحام راحت يم رب كريم .

جاوبه بابا منتفض...

صادق : هاا يعني ام رسيل هي اللي جانت تدور مشاكل وقطعت الارحام مو جزاك الله خير جاييني مناك لهنا ومتعني وقاطع مسافة وجايب هاي الزلم كلها وياك علمود تهيني وتهين زوجتي وتكسر عزاها ما استحيت ماخجلت من نفسك ؟ 

صاحوا الرياجيل كول ياالله ابو رسيل مايصير هيج كلشي بالتفاهم . 

حجى جواد أبو حازم اخو بابا الثاني 

جواد : صادق خوية احسن الله لك العزاء اللي جنت مقاطعنا علمودها راحت واحنا بهاي جيتنا نريدك ترد لديرتك وعشيرتك وابوك الحجي هو اللي دزنا عليك وكال ماتجون اذا ما تجيبوه وياكم. 

صادق : بلغوا الحجي الله يطول بعمره خلي ينسى عنده ولد اسمه صادق هو مو تبرء مني وطردني من بيته كدامكم وكدام نسوانكم وخجلتوني وية زوجتي بعد شكو ؟ خصم الحجي لا ادوخكم ولا تدوخوني اني ماعندي اهل اهلي بيت ابو علاء وبس. 

حجى جابر ابو قسور اخو بابا الثالث 

جابر : والله ما مرجية منك ياخوية يا ابن ابوي عيبة عليك وكفتنا هنا وتحجي هيج حجي لو ما عندك عزة جان عرفت شلون اتصرف وياك امشونا مالنا حجي وياه بعد . 

علي : ماكو ما يضل هنا يرجع ويانا و يلزم حلال ابوه وبناته يتربن عندنا مو عند الغرب. 

خالو محمد صار عصبي كال...

محمد: ياغرب ابو مروان عيب هالحجي احنا اهلهن واني ربيتهن على ايدي الله شاهد مافرقتهن عن أولادي .

صادق: خوية ابو حسام انت الاخ اللي ماجابته امي 

انت سندي بهاي الدنيا واني للموت ما اعوفكم ولا اعوف بيتي وبناتي يربن بحضن ابوهن بعدني الحمدلله اتنفس ومامتت حتى تكول يربن عند الغرب و الغرب اللي ما عاجبيك  اقرب منك لبناتي انتم غربة بالنسبة الي والهن ،  ابو مروان لم اخوانك و ولدك وروح منين ماجيت اني رجال مو معزب من رخصتكم .

علاء : من رخصتكم اني صار ساعة اسمع حجيكم واتهامكم الباطل لأختي ، طلعتونا غرب ومايصير عرضكم يتربى عندنا وساكت اريد اشوف ليوين توصل وياكم سمعوني زين بيوم اللي اجة اخوكم يخطب اختي اني مارضيت انطي مرة مو لان اختلاف طوائف لا والله شاهد علية بس مارضيت لان جاي وحده واجاني مرة ومرتين وعشره واني ما ارضى الا يجيب اهله لحد ما دخل ناس كبار ومشايخ يلا رضيت والحمد لله لهاي اللحظة ماندمان زوجته اختي لان زلمة والنعم منه بس هذا حجيكم اني ما اقبل بيه وانتم سمعتوا رأي اخوكم تريدون تباتون هنا اشيلكم على راسي ماتريدون الله ومحمد وياكم ترافقكم السلامة  

علي: احنا مو شغلة طوائف سنة وشيعة مارضينا ناخذ بنتكم لصادق ،،كل مافي الأمر ولدنا وبناتنا ما يتزوجون من الغرب لان ناس ماخذة من ناس كلنا ولد عمام وجنا رايديه ياخذ بنت عمنه من عندنه وبينا حتى الحلال مايطلع للغريب وهذا تفكير الحجي و شبينا على هذا الشي مو هسه انت تجي تعلمني الاصول من تالي وكت  ناس معزبين لو يجي كاتل ابننا مانرضى نوكفه بالباب ونحجي وياه نفتحله الدواوين وياكل ويشرب واذا النا حك يمه ناخذه مو مثل وكفتنا هاي وحجاية التنكال تعالوا دخلوا انت رجال مامعزب يلا يابة امشونا و لاتنسى خلي ببالك بنات اخوي مايطلعن للغريب في امان الله

                    الفصل الثاني من هنا 

لقراءه باقي الفصول من هنا