رواية العروس في الثوب الاسود الفصل الخامس 5 بقلم عبير ادريس

    رواية العروس في الثوب الاسود الفصل الخامس 5 بقلم عبير ادريس

شجن : صباح الخير 

حجتها مبتسمة جاوبناها اني وبابا، صباح النور..

شجن : ليش انت تسوي ريوك جان كعدتني !

صادق : مايحتاج متعلم ..

شجن : اي جنت وحدك هسه عندك زوجة تهتم بيك وبكل تفاصيلك وتحبك ..

سكت بابا ما جاوبها..

صادق : رسولة من يمج ناوشيني الملح ...

حست بتجاهل بابا الها لهذا ضاجت و رجعت لغرفتها سدت الباب .

نزلت ريناد كعدت على الميز ، كعد بابا بصفها يحجي وياها ساكتة متقبل تحجي شي ، خليت الريوك تريكنا وهي صافنة كملنا ورفعت السفرة وكمنا على البيت ...

مر اسبوع على زواج بابا والحال كما هو عليه بابا بغرفته وشجن بغرفتها ، من يجي بابا هي ببيت جدو يم عمة زهرة ومن تجي يطلع يتحجج بشغل او يروح يم خالو محمد حتى على الأكل صرنا ما ننجمع سوى مثل قبل اذا هي ويانا يكول ما أشتهي واذا ما موجودة ياكل عادي ونادراً تصير..

انتبهت شجن لتصرفات بابا وبدت تضوج  مرة من المرات جنت توني راجعة من المدرسة دخلت لبيت جدو ما لكيت احد بالمطبخ فتت جوة واسمع عمة زهرة تحجي ويه شجن . 

زهرة: اتحملي ياعيني بعدة مامتعود عليج انطيه صبر هسه شوية شوية يتعود خوما رأسن .

شجن: أكلج عفية قابل اول زواج ويتعود لو يخجل مني المفروض اني اللي اخجل مو هو والله مدري شلون تحجين انتِ.  

زهرة: دادة على كيفج هالله الله بالرجال ترى بعده جرحه ما طاب وعلى ايدج يطيب أن شاء الله .

شجن: عشتو والله خوش يطيب على ايدي شنو يمة شفتيني دكتورة؟ واطيب جروح !شو الرياجيل على الاربعين ويتزوجون العينتين صارله ثلاث سنوات ياجروح البقت عنده؟

زهرة: شفتي كلتي الرياجيل يعني مو صادق وخلي ببالج شغلة مو كل اصابيعج سوة

شجن: واذا مو كل اصابعي سوة شكو جيتي خطبتيني و من اجيتي ورا ما كعدت اني وياه وحدنا وكلتلج على الحجي مال صادق ليش اكلتي بعقلي حلاوة وكلتيلي معليج هذا حجي ما راح يصبر هسه يكوم يحبج ويدللج مثل ما جان مدلل زوجته؟

زهرة: احجي حظج وبختج الرجال قصر وياج شو ذهب انتِ اللي اختاريتيه وملابس ارقى شي جابلج وغرفتج تجنن بعد شنو تريدين؟

شجن:عيوني شسوي بالغرفة وهو مابيها اكللها من يوم الي تزوجت لحد الآن ما بايت بغرفتي ينام وحده ومن ناكل يصيح ما اشتهي مرات اتعمد اكل قبلهم اريد اشوف شيسوي واطلع الكاه كاعد ياكل وية بناته وطول ما اني بالبيت هو طالع يجي توالي الليل ومن اني يمكم هو يروح للبيت شنو معناها حرب هاي..

زهرة: وعيونج بس يرجع محمد اخليه يحجي وياه وشوفي شلون راح يتغير.

شجن : نشوف يازهرة نشوف راح امشي وراج واشوف تاليها ..

كلش ضجت من طريقة حجيها على بابا هاي شجن مبينة لسان ومو فقيرة الله يستر منها..

من رجع بابا طلع هو وخالو محمد واكيد خالو محمد حجى وياه لان اول ما دخل لبيت جدو كال لشجن حضري روحج باجر نطلع اني وياج والبنات .. 

رسيل: بابا عندي امتحان ما اكدر ..

ريناد: اني هم 

جر نفس وكال براحتكم اندار على شجن وهمس بتعب..

صادق :  وانتِ عندج شي لو لا ؟

جاوبته بفرح ...

شجن: لا لا شعندي قابل افرغ مني ماكو ..

حجتها وتضحك..

باوع عليها بابا ودار وجهه اعرفه ما يحب هيج نوع من النسوان يحب الثكيلة اللي تعزز بنفسها ،  هو ليش يحب ماما وما كدر ينساها لان تعب يلا حصلها ودائماً يكول اللي يجي بسهولة يروح بسهولة .

ثاني يوم طلعوا هي وبابا ،طبعاً شكد عندها ملابس بابا جاب الها بس تلبس عباية مال راس وشحاطة ام الاصبع والاصابع مصبغتهن ما اعرف ليش هيج لو تلتزم بالحجاب عدل لو تنزعه عبالك رايحة تشتري من المحل..

راحوا ورجعوا جنا بعدنا ببيت جدو وصرنا  شبه مقيمين هنا بس النومة بالبيت مالتنا..

طبت شجن من المطبخ وتصيح تعالن يبنيات وينجن ؟ 

عمو وحسام واحد باوع على الثاني وضحكوا بس من طب بابا سكتوا ..

طلعت من العلاكة لعابات لثنين كبار وقراصات وبدت تشمرهن علينا..

شجن :  هاج ريناد هاي الج وهاج رسيلة هاي الج ..

اخذتها منها وضحكت هزيت ايدي باوعتلي وبطلت تعلج الضحكة بدت تخف عن ملامحها ..

شجن : شبيج ؟ 

كلبت باللعابة وحجيت..

رسيل :  اني شسوي باللعابة عمري مال لعابة  يعني ؟ 

باوعت لبابا حسيته ضاج جاملتها وكلتلها شكراً ورجعتها بالجيس..

ريناد: هاج ما اريدها شنو شفتيني اول ابتدائي وتنطيني لعابة ؟ 

خزرها بابا..

صادق: ريناد اخذيها عيب 

ريناد: لا ما اخذها واني ما كلت الها جيبيلي اذا احتاج شي اجي عليك

زهرة : رنوود ليش عمة هيج تسوين فوك ما تذكرتج وجابتلج هدية ؟ 

ريناد: واني ما عايزة على هديتها خلي تنطيها تذبها بالزبل شعلية..

طلعت ريناد وراحت للبيت كمت رحت وراها بعدنا بالطرمة و بابا اجى ورانا مشى سريع ولزم ايد ريناد كلت راح يضربها لان قللت الأدب بس اللي صار بالعكس باسها واخذها كعدوا على المرجوحة 

صادق: من شنو ضايجة بنتي حبيبتي ؟

ريناد: ماكو شي 

صادق: شلون ماكو شي و عيونج مدمعة؟

ريناد : مرتك ضوجتني 

صادق: اول شي هي عندها اسم وثاني شي عيب تكوليلي مرتك اني ابوج ما يصير هيج تحجين وياية يابنتي..

ريناد :اسفة بابا بس هي ضوجتني

صادق : شنو سوتلج ؟ 

ريناد :  هواي تدخل بحياتي كلشي وكالت لا هاي ما يصير هيج لازم هيج وليش تتأخرون بالنوم تطير البركة من البيت ومن نرجع من المدرسة انت تدري احنا متعلمين ننام الظهر ونكعد نقرأ  هي  ما تقبل لازم نقرأ يلا نام حجيها كله خواتي هيج جانن واني هيج من جنت ببيت اهلي تريد تاخذ دور الأم وهي ما صارلها اسبوع من اجتي.

صادق: يايابة هذا كله ضامته بكلبج وساكتة عمي اني اليوم احجي وياها ومن باجر ماراح تسمعين حسها بالبيت هسه تمام راضية رنود ؟ 

هزت راسها وكالتله اي 

باليل سمعنا  بابا يحجي وياها كللها اي شي يخص البنات ما الج دخل حياتج وحد وهن وحد ما اقبل اي كلام زايد وياهن ينامن يكعدن يسهرن اي شي يسووا ما الج دخل عليج بنفسج وبس. 

شجن: صار عيوني انت بس لا تزعل

صادق: ما زعلان تصبحين على خير 

شجن : وين عفية ؟

صادق: اريد انام وراية دوام 

تركها وطلع...

مرت الأيام والوضع نفسه ما تغير شي اللي تغير هو الحرب الأمريكية على العراق 

بيوم جنا كاعدين ببيت جدو ونسمع الاخبار الوضع كله مايطمن ناس تكول هذا انقلاب وناس تكول راح تصير حرب ويتغير الحكم وكل شوية خبر شكل واشاعة شكل الى ان كعدنا الصبح على القصف طلعنا نركض من الغرفة بنزلتنا من الدرج شفنا بابا ديصعدلنا وبيدة آران .

صادق: رسولة حضروا كم قطعة ملابس وتعالوا وياية ..

رسيل : وين نروح؟

صادق : لبيت جدكم ننجمع هناك ونقفل البيت ..

رسيل : ماشي..

التفت على شجن..

صادق : شجن انتِ هم استعجلي ..

هزت راسها وفاتت لغرفتها لمينا ملابسنا ورحنا كلنا ببيت جدو ، الخوف والرعب خيم على بغداد والضرب كلش قوي جان بحيث احتركت حرك.

محمد: ترى مو مال نضل هنا امشوا نروح لبيت عمي راضي بالانبار..

صادق: يابيت عمك راضي ليش القصف بس ببغداد اكيد المحافظات كلها ..

محمد: لا يابة بغداد اكثر يصير بيها قصف لان مركز والمحافظات اكيد اقل

صادق: تريد تروح اخذ عائلتك والله وياك اني واطفالي باقين هنا وبالنسبة للحجية وسهاد نسيت وضعهم؟ شلون تاخذهم؟ وطريق طويل بلكت انسد الطريق ولازم تمشون شنو تسوي بهيج حالة ؟

محمد: والله هاي مامحسبلها شمدريني شفت الناس كلها هجت كلت بس احنا نبقى صعبة..

صادق: الشي قبل لا تحجيه فكر بيه من كل الجوانب يفيدك لا يلا تغرد 

محمد: انت ما تصدك تلزم علية لزمة فيلسوف زمانك..

صادق: لان احجي الحق اصير فيلسوف زماني؟ 

ضحك خالو محمد..

مر كم يوم والكهرباء انضربت ضلينا على الفوانيس والليل نكضيه بالحديقة سوالف وضحك ، بابا وخالو وحسام يلعبون دومنة وطاولي وعمة وشجن سوالف صارن صديقات  قوت علاقتهم آخر فترة بحيث ما يتفاركون بس بالنوم..

وبيوم المغرب جنا كاعدين اندكت الباب حيل كام بابا فتحها 

دخلت ام شجن تدك وتلطم وتعيط يبو الحكولي ركضوا كلهم عليها يريدون يلزموها ماكدروا ملخت نفسها 

عمة زهرة تحضن بيها وتهدي وماكو مستمرة الى ان عاطت شجن من مكانها  ابد ما تقربت من امها  الوحيدة ضلت كاعدة

شجن: كافي عاد خلي نفتهم شبيج ثبرتينا ثبر بحسج العالي...

ام شجن: ولج اخوانج راحوا راحوا عزوتج ..

شجن : غير تحجي وين راحوا فهمينا كافي بجي 

ام شجن متربعة بالكاع و تناشغ بالبجي وتحجي 

ام شجن : ولج اليوم صعدوا بالتريلة( شاحنة _ لوري) وراحوا يجيبون حصوا ورمل وطالعلهم رتل مال امريكان ورموا عليهم ....

محمد: منو بلغكم حجية خاف الخبر اللي وصلكم كذب؟

ام شجن: لا يمة لا متأكدين جماعتهم بغير تريلة هم اللي كالولنا...

صادق: لااله الا الله كومي حجية غسلي وارتاحي وهسه نروح اني ومحمد نسال جماعتهم ونتأكد اكثر..

ام شجن : اي يمه فدوة لطولك اروح..

اللي خبلنا وخلى عقلنا  يوكف شجن مابدرت منها اي ردة فعل لا بجت لا عيطت عادي وتتصرف طبيعي احنا بجينا وتأثرنا وهي لا ، بعدها دخلن هي وامها بالهول وبابا وخالو محمد وحسام طلعوا يشوفون شنو الموضوع وعمة زهرة طلعت بالحديقة شالت المواعين واستكاين الجاي..

اني وريناد بالمطبخ بس اللي يحجي بالهول نسمعه...

ام شجن: ولج ادري بيج فرحانة بموت اخوانج بس  بالجذب ابجي نزلي دمعة عليهم كدام عيالج شيكولون عليج.

شجن :شيكولون خلي يكولون ما يهمني وعلى شنو ابجي عليهم خلي ابجي على روحي شمروني لواحد متعقد من الدنيا وراح يعقدني وياه شكد كلتلهم ما اريده اني صغيرة ما ناقصني شي لا الا تتزوجيه خوش رجال وانتِ كبرتي منو ياخذج بعد ونريد نخفف حمل حتى نتزوج احنا  عبالك جنت عالة عليهم وبس يريدون يخلصون مني وعبالج ناسية سوالف الضرب مالتهم  ومن زينوا شعري بالموس قبل اربعة سنوات ومن فشلتج تكولين للكرايب طلعت براسها ثعلبة وزينتها. 

ام شجن: شتريدين اكول للعالم لكفوها اخوانها عندها علاقة بواحد وطالعة وياه لو تريدين اخوانج يطبطبون على ظهرج ويكولون عفية استمري بتلويث سمعتنا بالوحل. 

شجن: مامسوية غلط حبيت قابل كفرت والولد راد يتزوجني 

ام شجن: اي طبعاً كفرتي من تسوين علاقات من ورانا كفرتي وهو وينه؟ شو ما تزوجج ضحك عليج وعافج.

شجن: ليش ولدج نطوه مجال يخطب شو جنزوه تجنز خلوه يصيح التوبة بعد اذا اتقرب لبنتكم.

انصدمت من اللي سمعته ما كدرت استوعب الكلام معقولة هاي هيج قذرة طلعت اندرايت واشوف عمة زهرة وراية تخرمش بخدودها .

زهرة: يايمة تعزينا وتصخمنا عزة بعيني شلون  بصادق اذا عرف يمة رسولة لا تحجين شي اروحلج فدوة والله اذا عرف ابوج يروح بيها .

نحجي همس حتى لايسمعونا جرتني عمة للطرمة .

رسيل: اول مايجي بابا اكوله ما اسكت على شنو تبقى هنا ترجع منين ما اجتي اصلاً بابا ما طايقها...

زهرة: يمة مو وكتها والله اني اتصرف وعد بس انطيني مجال لاتحجين اي شي يجوز كذب الحجي تريد تحرك گلب امها. 

رسيل: شبيج عمة اكو وحده تحجي هيج شي على نفسها وهي مامسويته؟

زهرة: لخاطري بس هاي المرة اسمعي كلامي..

رسيل: عمة الج كم يوم اذا ما تتصرفين اروح لبابا واكوله شنو ذنبه يعيش وية هيج وحدة وفوكاها تحجي عليه وتكول معقد. 

زهرة: اي كم يوم ونخلص منها ان شاءالله بس انتِ اسكتي هسه..

رجعوا بابا وخالو وحسام سكتنا من دخلوا ، كعدوا بالهوال وكالوا..

_للأسف الخبر طلع صحيح 

الام موتت روحها وشجن هي هي نفس صفنتها ، عمة وخالو راحوا جابوا خوات شجن سدوا بيتهم واجوي ...

للأسف بالعشرة طلعن  اتعس من اختهن وخفيفات حيل شلون عمة زهرة أنخدعت بيهن؟  ما ادري سوتهن هن وبس ولو الواحد شمدريه الانسان ما ينعرف الا يتعاشر واصلاً هذا الحجي جان ما عرفناه لو ما سمعناها من كاعد  تحجي هي و امها 

ومرت الايام بين بجي ولوعة ام شجن وبين القصف والخوف من المستقبل

ومرة من المرات كلنا نايمين بالسطح وبس حسام ينزل بالحديقة جان عندنا راديو صغير يسمع بيه باوعت على زينة اخت شجن تلوب كل شوية وتريد تنزل وتعيط امها وين ؟ 

زينة : انزل للحمام 

ام شجن: مو توج صعدتي ؟ 

زينة: احتاجيت حمام مرة ثانية شلون يعني ؟

تالي نزلت كمت نزلت وراها اريد اشوف شنو تسوي  جانت تتلفت منا ومنا خاف احد يشوفها طبت لغرفة حسام غرفتع جانت بنهاية البيت فتحت الباب شافته  ماموجود دورت بالبيت ماكو آخر شي طلعت للحديقة شافته كاعد .

زينة: هلووو ..

حسام : هلة شوو كاعدة ...

زينة: والله ما اجاني نوم وكلت اجي اكعد يمك ..

حسام : لو جاية قبل شوية لان  كلش نعست واريد انام تصبحين على خير.

عافها وصعد نام و هي كامت تشيل بروحها وتركعها اني اباوع عليها واضحك حسام من طب ما شافني لان كهرباء طافية ، امنت وصعدت نمت بمكاني

ثاني يوم بلشنا تنظيف كلنا البنات وحتى خوات شجن...

صاحت زينة..

زينة: اني انظف غرفة حسام 

حجتها وركضت للغرفة..

عمة زهرة تأشرلي يعني لا تحجين

كمت افور ذني شنو من بنات ولا عبالك اخوانهم متوفين ما صار كم يوم خصوصاً شجن سوالفها والضحك عبالك عيد عندها وامهن بس تدير بعينها مبينة فقيرة وما تكدر عليهن .

اجى حسام جان طالع ويه خالو تغدينا وصار العصر بابا ماكو ضل بالنا عليه 

محمد: ماكللكم وين رايح أتاخر لا؟ 

حسام: راح اطلع ادور عليه قابل وين اكيد بالمنطقة قريب.

طب لغرفته يبدل وطلع صاير نار ويصيح

حسام :  هاي منو داخل لغرفتي ؟ 

  الكل ساكت 

حسام : مو كاعد احجي منو داخل للغرفة يوم ما تحجين..

زهرة: شبيها الغرفة غير يحجي.

حسام: تعالي وشوفي شبيها انتِ مو تعرفين بية ما اقبل يتغير شي من مكانه كايلج بس الكاع تتنظف وهاهي كايل لو ماكايل..

زهرة: كايل يمة هسه اني ارجع كلشي لمكانه بس لا تصير عصبي ..

حسام: ما اريد اي احد يدخل وراح اقفلها منا وجاي

جان يصيح ومخبوص  كلت شبيه هيج تخبل ردت اشوف شنو صاير بالغرفة ودخلت محد انتبه علية اباوع دفاتر عنده وصور على الميز اجيت تقربت شفت  صوري شجابهن عنده مديت ايدي اخذت الدفتر و فتحته  مبين دفتر ذكريات قريت اول سطر  وجان ينجر الدفتر مني.

التفتت حسام واكف يباوعلي ومخنزر 

حسام: ليش تلعبين بشغلات غيرج مو عيب هاي من شوكت  تدخلين لغرفتي بدون علمي ؟ 

يحجي بعصبية ويأشر..

ضحكت وحجيت بنبرة استهزاء 

رسيل: منو داخل غرفتك ولاعب بأشيائك خاف عبالك اني  مطشرة اغراضك ومطلعتهن من مكانهن؟ 

حسام: لعد منو غيرج شفتيني اصيح كلتي اروح ارجع كلشي بمكانه قبل لا يجون ويشوفون شنو مسوية وانكشف.

رسيل: وهاي لان شفتني بغرفتك عبالك اني لاعبة باغراضك يعني لنفترض مثلاً انباكت منك فلوس  وشفتني بالغرفة راح تتهمني اني اللي بكت؟

حسام: والله المجرم وين يلكوه بمكان الجريمة 

رسيل: اللي افتهمته يعني اذا انت ضايعتلك فلوس تتهمني عادي مو؟

حسام: ما كلت هيج ولاتحجين بكيفج

رسيل: اسمعني زين اذا واحد بينا يتحاسب فهو انت شتسوي بصوري كلهن يمك ؟

حسام: ما ماخذ صورج يجوز امي ضامتهن هنا ..

رسيل: والبيت كله ماكو مكان غير غرفتك يخلون بيها الصور وبعدين شجابهن عند عمة زهرة احجي شي واحد يصدكه وغرفتك اني ما داخلة الها وهاي الهوسة اللي دتشوفها مو اني مسويتها شوف منو منهن حاطتك ببالها وتفتر وراك بنصاص الليالي هي اللي دخلت ، ومرة ثانية من تريد تحجي وياية اعرف شلون تحجي هاي اذا سمحتلك تحجي وياية  وبعد عمري ما اباوع بوجهك شايف السلام  الجان بيناتنا

صفكت ايد بأيد وحجيت بحركة گلب

رسيل : بح حتى هذا بعد ماكو .. 

دفعته من كتفه وطلعت كمت اتنفس سريع و عيوني دمعت من الموقف اللي صار يعني طلعني حرامية واني اللي متربية عندهم من نعومة اظافري بسيطة حسام 

من طلعت طلع وراية راح يدور على بابا ورا تقريباً نصف ساعة اجوي،  بابا جان يم الفيتر عنده عطل بسيارته وسواه لهذا تأخر .

ومشت الايام هدأ القصف من بعد ما سقط العراق كلياً بيد الأمريكان  والحياة رجعت لطبيعتها شوية شوية 

اني وريناد امتحنا آخر السنة اللي ما فهمنا منها شي لأن ماداومنا هالكد بس خمسة اشهر تقريباً و بداية شهر الثالث بدأت الحرب وعطلنا ومن انتهى القصف امتحنا و بدت العطلة الصيفية ورجعنا لبيتنا خالو بالبداية ما قبل كال ابقوا هنا بس بابا كله لا نرجع لبيتنا  صح هنا مرتاحين بس مو مثل واحد يكون ببيته..

اهل شجن بهاي الفترة رجعوا لبيتهم وانسد موضوعها لحد الان ما حجينا شي لبابا لان الوضع تعبان مو مال مشاكل.

و بيوم بليل كبت العيطة بينها وبين بابا نزلنا نركض نسمعها تصيح بصوت عالي بغرفته...

شجن: انت ليش تزوجتني لعد ؟

صادق: اتفقت وياج على كلشي وكلتلج على وضعي ومستحيل اتغير وردت بكل طريقة تبطلين بس الله يسلمج جلبتي شسويلج بعد ؟ 

شجن: واني شنو ذنبي بعدني صغيرة ليش ادفن روحي وية واحد ما يحبني وما يطيق يباوع بوجهي 

صادق: مشكلتج شكو قبلتي بية؟ وعفتي ذولة الشباب الضالة جان اخذتيلج شاب بكدج لو يكبرج بسنتين وعشتي عمرج وياه شسوين برجال ارمل نذر حياتع لأطفاله...

شجن: بعد اكلت تبن وتزوجتك شلون ابقى هيج ؟ لو اتطلك برأيك؟

صادق: ابقي ماكلة التبن وكملي حياتج اللي انتِ اختاريتيها..

شجن : بس حرام عليك هيج تسوي بية اني هم عندي احتياج لازم انت تحس بدون ما احجي وياك..

صادق: لا مو حرام اني من اجيتج كلتلج يابنت الناس اني ما افيدج لأن بعدني احب زوجتي وما اكدر اتقبل وحدة غيرها نفسيتي ما تتقبل شسوي وكووومة وضحت سبب زواجج مني وكلت ترى الجماعه رايديج علمود تدارين الحجية وبنتها قابلة بهيج وضع؟ كلتيلي قابلة وشنو سويت اني ؟ نطيتج اسبوع تفكرين بيه وكلت يابنت الناس يا حبابة يازينة البنات لا تتأملين مني شي كلتي هذا هو  ومايحتاج افكر ومع ذلك خليتج تفكرين لمدة اسبوع كامل وردت اكثر بس انتم  دزيتوا علينا وكلتوا موافقين بعد ليش يومية نفس القوانة وشالعة گلبي شو بكلشي ما مقصر وياج شتريدين بعد شتريدين ...

كام يصيح بصوت عالي غير عن عادته..

شجن: كل اللي كاعد تسويه مو بعيني اني اريدك الك اريد اصير زوجتك كافي عاد حس بية حس .

صادق: يعني انتِ كل همج هاي السالفة شو تعالي ....

وراها صار هدوء بالغرفة صعدنا نمنا 

كلمن بمكانها رحت غطيت آران ، آخر فترة بابا اشتراله جرباية وصعده  يمنا..

ثاني يوم نزلت الصبح وبابا طلع من غرفته وهي طلعت وراه فرحانة والضحكة تارسة وجهها ..

شجن: صدوقي اليوم اني اسوي الريوك ..

صادق: ما اشتهي راح اسبح واطلع.

شجن: بس ..

دتحجي قاطعها بابا ..

صادق: رسيل بابا حضروا نفسكم اليوم نطلع ويه بيت خالج .

رسيل: تمام بابا 

طلع وكمل النهار بين الشغل والطبخ صار العصر بدلنا طب بابا بدل وطلع  شاف شجن كاعدة باوعلها وكال...

صادق: كومي اوصلج لاهلج وارجع ..

شجن: ليش ما اجي وياكم ؟

صادق: رايحين زيارة مريض اخت الحجية طالعة من المستشفى نأدي الواجب ونرجع.

شجن: يعني ابات ببيت اهلي ؟

صادق: لا من ارجع اجي عليج ..

ركضت باست بابا وحاوطت ركبته بيديها

شجن : يعني تشتاقلي اذا بتت؟

وخر ايدها ونترها حيل .

صادق: ديري بالج مرة ثانية تسوين هيج تصرفات كدام البنات 

شجن: قابل شمسوية اني ؟

صادق: روحي لبسي وفضيني مو متت ...

شجن شكلها كلش حلو ونازك والصراحة احلى من ماما وحتى اصغر منها ومرحة بس تضحك المشكلة بأبوية نفسه مو بيها ، طلعنا رحنا لبيت اخت بيبي جانت طالعة من المستشفى ضلينا تقريباً ساعتين ورجعنا لبيت جدو ..

دكينا الجرس طلع حسام فتح الباب دخلنا جوة وكعدنا يم بيبي اول ما شافت خالو كامت تبجي على اختها وبقت تسأل شلونها وشلون صارت طمنها خالو وضلوا يحجون عفناهم ورحنا  للمطبخ اني وعمة زهرة نسوي عشا .

اجى حسام كال محتاجين شي اجيب من برا 

زهرة: ببسي جيبلنا 

حسام: ماشي 

باوع علية وطلع بهاي الفترة كلها ما حجيت وياه من يوم الموقف اللي سواه وياية ولهذا يومنا رجع جايب بيبسي وعصاير لان يعرف اني مو صداقة وية البيبسي عرفت علمودي جايب وحتى ما تبين بس الية جايب اكثر من واحد .

خلينا السفرة ونقلنا الاكل للهول وكعدنا كلنا ناكل وزعوا العصاير والبيبسي ، تعشيت وما شربت العصير عفته متقصدة حتى يعرف ما اريد اي شي منه وما يجيبلي مرة ثانية..

كملنا العشا وراح بابا يجيب شجن انتظرناه بالطرمة ورة دقايق اجوي 

دخلنا لبيتنا وكلمن راح لغرفته  ورا ساعة ضبط سمعت دك على الباب خفيف طلعت من غرفتي باوعت هاي شجن تدك بالباب مال غرفة بابا اسمعها تكله 

شجن :صادق ليش قافل الباب ؟

بقت تدك وتحجي وبابا ما فتح الها ضلت ايام على هذا الحال .

صار اول ما يدخل يقفل الباب عليه وهي تبدل وتتحضر وتروح تنام بغرفته قبل لا ييجي من يشوفها هيج يصعد ينام يمنا واستمر الحال كما هو عليه ايام وليالي..

الى ان اجى اليوم اللي صارت بيه مشكلة كلش كبيرة بينها وبين بابا ..

شجن: افتح الباب انت ليش هيج تسوي اني مو زوجتك اطلع احجي وياية جبان تتختل مثل النسوان جان استحيت...

فتح الباب وركعه بقوة اخذ رقبتها بيده وخنكها...

صادق : لج هاي منو الجبان گلبه اليوم اموتج بيدي ؟

كمنا نبجي خايفين ونبوس بايد بابا حتى يعوفها من حس بيها من صدك اختنكت تركها وكعت بالكاع كامت تبجي وتصرخ ..

شجن : انت واحد ظالم ما تخاف الله .

تحجي وتكح بقوة رحت جبت كلاص مي ودنكت اشربها ...

صادق: اني ظالم وما اخاف الله شكو قبلتي بية ؟ ما غشيتج اني ولا ظلمتج.. 

شجن: لعد ليش اخذتني وعفتني ليش أملتني اكون بيوم زوجتك وام لأطفالك..

صادق: من الملحة مالتج جبرتيني يومية تزنين براسي ردت اسكتج واخلص هالمرة اتفرعنتي...

شجن : من حقي اصير ام ليش تحرمني ها ليش ؟ 

صادق: واني ما اريد طفل منج اللي عندي كافي الحمدلله والشكر والف مرة اعيد نفس الحجي اني متفق وياج ومبري ذمتي امام الله..

شجن : امشي وديني لأ هلي اني ما ابقالك دقيقة بعد جايبني خدامة الك ولغيرك؟ 

صادق: هذا جان الاتفاق ليش قبلتي تصيرين خدامة ؟ وعلى فكرة انتِ حتى عمتي وسهاد شلتي ايدج منهم واني تزوجتج علمودهم حتى تقيمين بواجبهم شو انتِ كلشي ماكو..

شجن: والله خوش عيني جايبني خدامة للغربة شتكول لروحك من مرتك تخدم ببيت مو بيت اهل زوجها حتى اكول غصباً عليه اروح اهل زوجي ذولة..

صادق: خصم الكلام اني ما اريدج تريدين تروحين لاهلج هسه اوديج وبعدها لا توصلين لبيتي ابد..

شجن : اي اروح اريد اخلص عايزة على بيتك اني؟ 

صادق: يلا يلا بسرعة لمي اللي عندج واني طالع بالباب بينما تكملين.

راحت لمت ملابسها كلهن لبست عبايتها وطلعت راح بابا وداها ورجع جان كلش ضايج ومقهور من اللي صار 

طلب من عندنا نعوفه وحده دخلنا جوة وهو كعد برا بالحديقة 

بقيت انتظره بالمطبخ خاف يحتاج شي لو يتخربط لان آخر فترة حيل تعب هم ما يجي للبيت واكله من برا وهم مشاكل وية شجن ...

كل شوية اباوع من الشباك اشوفه مدنك راسه كمت اشوف هموم الدنيا كلها بعيونه بابا جان نسمة وهادئ فجأة انقلب حاله مجرد تزوج وزواجه جان شر لا بد منه...

ومشت الايام وبيوم كاعدين على الغداء  بابا سأل خالوا ..

صادق: محمد !

محمد: هاا 

صادق: شسويت على سالفة المحل ؟ 

محمد: يامحل ؟ 

صادق: هاي شبيك مو ردت تفتح محل مال انشائيات 

محمد: حيل بعدك تتذكر ؟ 

صادق: بلا شقى ترة احجي صدك 

محمد: هو احنا شفنا دربنا ياخوية شو  نوينا النية وصارت الحرب اذا اريد افتحه شنو راح يصير خليني هيج مرتاح .

صادق: واللي يكولك الفلوس موجودة والمحل موجود ؟ شنو رأيك ؟ 

خالو رد بلهفة وعيونه تلمع من الفرح متفاجئ ..

محمد: لا اكيد تتشاقى كول والله 

صادق: مكذب عليك بيوم علمود احلف هسه ؟ 

محمد: حشى خوية محشوم بس مامصدك ..

صادق : لا صدك وهسه نروح نشوفه حتى اذا عجبك نأجره ونبلش نتسوك ..

محمد: هو وين صاير الموقع على شارع عام بالسوك بفرع؟ 

صادق: ارقى موقع بمنطقة راغبة خاتون شارع الضباط قريب على جامع العسافي 

محمد: بربك لك غالي الايجار هناك ...

صادق: منطقة زينة والشغل بيها ماشي احسن من غير مكان .

محمد: امشي نتكاتب هسه ..

حجاها وكام على بابا حضنه  و نزلت دموعه..

صادق: هسه ليش البجي ترى ابطل ...

محمد: لا سكتت خوية هاي دموع الفرح مامصدك راح يصير عندي عمل واخلص من التكسيات ..

صادق: هو اني ليش استعجلت بيه لان شغلة التكسيات تخوف صارت مو كل منطقة تكدر تدخلها و عصابات كومة لا يروح بيوم يصعد وياك واحد ابن حرام ويسلبك السيارة ويقتلك هسه الموديل الجديد ياخذون السيارة ويقتلون صاحبها .

زهرة: ياخوية الله يزيح همك ويبرد گلبك بجاه كلمن عنده جاه يم الله شكد جنت شايلة هم وحاطة ايدي على گلبي من يروح لحدما يجي اني دمي ناشف.

صادق: هانت ان شاءالله والحلو شغله بوسط اهلنا وكلها تعرفنا بعد ماكو داعي تخافين.

زهرة : ينطيك لحدما يغنيك..

صادق : الله يسلمج عيوني ام حسام..

راحوا بابا وخالو واتفقوا على كلشي وبدوا يتسوكون  و يومية يسوون شغلة بالمحل لحدما كمل 

ساعدوهم حسام  واصدقاءه بشغلة الصبغ والكهرباء وتشكيل الرفوف..

خالو يفتح الصبح وبابا من يرجع من الدوام يروح يمه لو يفتح ويخلي خالو يرتاح بالبيت ومرات من عنده سفر خالو وحسام يفتحون.

مشت الايام حلوة واجى رمضان الخير واستعديناله اجمل استعداد ، هذه السنة قررت اصوم الشهر كله والتزم من ناحية الحجاب والصلاة وما افطر قبل جنت اغلس يوم اصوم يوم لا وبيوم اللي اصوم بدون حجاب وصلاتي متقطعة  اصلي الظهر انسى العصر وهكذا هسه لا قررت التزم .

ليلة اول يوم من شهر رمضان قررنا نتسحر ببيتنا ونجيب بيبي وخالة سهاد يمنا 

سوينا سحور وعصاير طبيعية تمر هند وبطيخ وعنب عمة فنانة بالاكل والعصاير هاي شغلتها تسحرنا الحمدلله  وضل تقريباً لوقت الاذان نصف ساعة فرشنا المصلايات وكلمن قرآنه كدامه

الرياجيل ليكدام واحنا وراهم و اكو مسافة بيناتنا قرينا قرآن وصلينا الفجر الحمدلله جانت اجواء كلش حلوة وراحة نفسية وراها بيت جدو رجعوا واحنا نمنا 

ثاني يوم كعدنا ساعة اربعة ونصف وبوجهنا لبيت جدو اني وريناد كبل دخلنا للمطبخ حتى نساعد عمة لان ما تلحك واحنا عائلة كبيرة..

سوينا الفطور من اذن افطرنا تمر وولبن ورحنا صلينا المغرب وصبينا الاكل 

صادق : اللهمَّ لكَ صمتُ، وعلى رِزْقِكَ أفطرتُ، ذهب الظمأ ، وابتلَّت العروقُ، وثبت الأجرُ إن شاء اللهُ

حبيبي قرأ دعاء الافطار واحنا نردد وراه 

خلصنا اكل غسلنا المواعين و نظفنا البيت وية عمة واجى وقت الحلو سوينا كاستر ومحلبي وخليناهم بكاسات اجتي عمة رشت على الوجه فستق حلب ومكسرات صار يجنن....

واستمرت الايام على هذا الحال ويومية ننقهر لان ينقص يوم من الشهر نتمنى ما يخلص وسبحان الله كلشي يسهل بيه الطبخ والتنظيف.

وبيوم قبل الفطور بساعتين عمة رادت كم شغلة من ابو الاسواق وخالو جان بالمحل وحسام طالع دزتني على بابا للبيت حتى ابلغه ويروح يجيب .

رسيل: بابا عمة تريد شغلات من ابو الاسواق تكدر تجيبهن ؟

صادق: كتبيهن بورقة وخلي اروح اجيبهن واجي 

رسيل : ليش اكتبهن اني حافظتهن اجي وياك وهم اغير جو ضايجة.

صادق: اذا هيج يلا امشي 

صعدت بدلت على السريع لبست صاية وفوكاها شال هالمرة لبسته عدل ولا شعراية طلعت مني .

نزلت شافني بابا حضني وباس راسي وطلعنا توني اريد اصعد بالسيارة طبك حسام بسيارة خالو ونزل..

حسام: ها خير وين ؟ 

صادق: اروح اجيب كم شغلة امك تريدها 

حسام: مو ابوية دزني يريدك بالمحل 

صادق: اجيبهن وامرله 

حسام : روحله انت واني اروح اجيب الغراض ...

صادق: يلا بكيفك رسولة صعدي وية حسام جيبوا الغراض وارجعوا بسرعة ..

انجبرت اصعد وياه لان اذا اكول لا ما اروح بابا يحس اكو شي مو طبيعي صعدت ليكدام وهو حرك السيارة من مشينا شفته عبر ابو الاسواق..

التفتت عليه وهمست..

رسيل: ترى المحل صار ورانا ! 

حسام : اعرف 

رسيل : لعد اذا تعرف ارجع ..

حسام : عندي شغلة وياج احجيها  وبعدين نرجع 

رسيل: رجعني هسه لو تنزلني 

قفل الابواب ومشى سريع 

كمت اضرب بيه على كتفه...

رسيل : مو كاعد احجي وياك وين موديني ؟ 

حسام : شبيج عندي شغلة وياج ما تفهمين ؟ 

رسيل: شنو هالشغلة امشي رجعني يلا ما اريد اروح لأي مكان  غلطت من صعدت وياك.

حسام: وليش خايفة قابل راح اكلج ؟ 

رسيل:حسام امشي رجعني 

حجيتها وكمت اضرب على الباب ..

لزم ايدي قوي وهمس بين شفايفه شبيج ترجفين اول مرة اعرف بيج خوافة..

انداريت عليه وعيوني تجدح نار .

رسيل: يابرودك اكله رجعني ماريد اولي مو حتى ريكي نشف حرام عليك صايمة ...

حسام: لحالج عصبتي وترجفين هو شنو الصار ابن خالج واخذج وياه ليش خفتي ؟

رسيل: ما خفت بس ما يعجبني انجمع وياك بمكان واحد

سكت حسيت بيه انقهر يمكن اني بالغت بردة فعلي بس ما اعرف احس بيه يلعب بأعصابي وما افتهمه شيريد ما كاعد  اميز تصرفاته خوف علية لو يريد يفرض رأيه وخلاص..

واساساً اني منا ماخذة موقف منه  لان هواي يتدخل بلبسي وآخر موقف خلاني اضوج منه هواي..

ورا شوية طبك السيارة ونزل حتى ما كال وين باوعت اكو محل ملابس نسائية دخل ورة ربع ساعة طلع شايل كيس مشى شوية دخل محل ثاني يبعد مسافة عن محل الملابس وراها طلع و  اجى يمشي شايل الاكياس صعد خلاهن على الكشن ليورا...

رسيل: شنو ذني ؟ 

ماجاوبني سكتت حرك السيارة ومشى وصلنا لأبو الاسواق ...

حسام : كليلي شنو وصتج امي  اجيبهن واجي لاتنزلين انتِ 

عددتهن نزل تسوك واجى صعد وصلنا للبيت نزلت ونطاني علاكتين وهو شال البقية اول ما دخلنا تلكتنا عمة بالصياح .

زهرة: صدك جذب وين رحتوا نمتوا خوما نمتوا صارت ساعة ستة الا ربع بعد ما  الحك اسوي اي شي ..

حسام: ناكل شوربة وبس ..

زهرة: هاي منو يحجي ابو بطن ...

جرت العلاليك من ايده ودخلت للمطبخ تدردم ادري وين رحتوا ؟ 

سكتت ما حجيت ردت كالت 

زهرة : مو وياج هو اخرس انتِ هم اخرسيتي ..

حجيت بنفاذ صبر ...

رسيل : سألي حسام..

عفتها ورحت لبيتنا صار وكت الفطور اجتي ريناد .

ريناد : رسيل رسيل وينج تعاي صار الفطور بسرعة..

رسيل: جيت جيت شبيج تعيطين

ريناد: مو تدرين وكت فطور هسه ليش ماجيتي ؟

رسيل : نايمة جنت ..

ريناد : ديلا تعالي ..

دا اطلع بعدني بالطرمة دخل ثائر شفت بيدة علاكة كبيرة ..

رسيل: هاي شنو بيدك ..

ثائر : هااا ذني اغراض عمو دزهن ..

دخل العلاكة جوة ورا شوية طلع سدينا الباب ورحنا لبيت جدو كملنا الفطور وكمنا على البيت كملناه عفتهم ورجعت للبيت.

جنت حيل مخنوكة ما اعرف شبية صعدت فوك دخلت لغرفتي واشوف العلاكة اللي جابها ثائر على جربايتي فتحتها لكيت بيها ملابس تنورة وقميص وشالات عرفت هاي من حسام لان هو اليوم نزل يم محلات الملابس رجعتهن بالعلاكة ورحت لبيت جدو جانوا يصلون صلاة العشاء دخلت لغرفته خليت الملابس على الميز مالته واخذت ورقة صغيرة  وقلم من على الميز وكتبت ( لا تعيدها تعرف ما اخذ هدايا من احد جان قبلت هدية زيد علمود اقبل بهديتك)

خليتها فوك العلاكة وطلعت رجعت للبيت .

ورا ساعة تقريباً اندك الجرس ريناد وآران ببيت جدو وبابا بالمحل وبس اني بالبيت منو يجي هسه؟  طلعت صحت منو؟ 

جاوبني حسام بعصبية..

حسام: اني 

فتحت الباب  دخل وبيده الورقة رفعها وخلاها كبال وجهي ...

حسام: هاي شنو ؟

رسيل: ورقة ..

كز على اسنانه وحجى..

حسام : اعرف ورقة مو طفل كدامج بس المكتوب بيها شنو ؟

رسيل: شنو مكتوب ما فهمته لو ما تعرف تقراه ؟ 

لزمني من زندي حيل وعصر ايدي..

حسام :اسمعي لج مو اني اللي تتصرفين وياه هيج خاف عبالج ساكت گلتي اسوي اللي يعجبني واهين كرامته ترى بعدج ماشايفة وجهي الحقيقي ..

باوعت على مكان لزمة ايده لزندي ورفعت راسي بأتجاه عيونه...

رسيل: هد ايدي ..

حسام: احجي لج شوكت زيد جابلج هدية وليش؟

رسيل: مالك شغل ..

حسام : لا تخبليني شنو مالي شغل احجي لا ادميج ..

رسيل: مثل ما رفضت هديتك رفضت هديته وخلص ..

حسام: شنو جابلج وشوكت نطاها الج و وين جنتوا ومنو يمكم جان..

يحجي ويهز بية قوي واني اجاوبه بكل برود..

رسيل: ما شفتها واول ما نطانياها رجعتها واذا خلصت كلامك عوفني اريد انام تعبانة..

هد ايدي وبعده خازرني انداريت اريد ادخل جان يكول ...

حسام: شفت الحجاب حلو عليج وحبيت اجيبلج ملابس على ذوقي بس طلعتي ما تستاهلين وحدة حقيرة وانانية وزعطوطة وعقلها مجيم وحرامات بيج التعب..

اني وامشي كلتله..

رسيل : اني ما استاهل لا تعب نفسك وياية تصبح على خير وعافية..

دخلت للمطبخ سديت الباب وكعدت على الكرسي اريد اهدأ ، انفاسي سريعة عبالك راكضة كومة  ، مشاعري متضاربة  ما اعرف شنو كاعد احس وليش هيج احب استفزة ليش بس وياه هيج اتصرف ليش ليش احجي وية نفسي راسي راد ينفجر كمت صعدت فوك مددت من وجع راسي غفيت كعدت قبل السحور بساعة نزلت لكيت بابا يقرأ قرآن 

شافني صدق وابتسم...

صادق: صح النوم هاي كلها نايمة ؟ 

رسيل: تعبانة بابا...

صادق: ليش خوما بيج شي؟ 

رسيل : لا بس ضايجة شوية وهسه صرت احسن..

صادق: اكيد؟ 

رسيل: اكيد والله ..

صادق: يلا لعد لبسي حتى نروح نتسحر ببيت جدج وساعدي عمتج اليوم بس تدردم عليكم انتِ وحسام ليش تأخرتوا هالكد من طلعتوا ؟ 

رسيل: مو حسام كال الاشياء اللي عمة موصيتنا عليهن نصهن ماموجودات لهذا افترينا على اكثر من سوبرماركت يلا لكيناهم..

اول مرة اكذب على بابا بس شنو اريد اكله اوووف منك حسام..

صادق : بعد عمتج تعرفيها من تنخبص تعصب وتكوم تحجي شيش بيش...

رسيل : اي حقها بس صارت بعد..

صادق : يلا يابة امشي نروح..

هزيت راسي ورحنا لبيت جدو دخلت للهول خالو وعمة كاعدين اول ما شافتنا عمة كالت..

زهرة: ها نبلش بالسحور ؟ 

صادق: اي يادوب تلحكون ..

زهرة: شنو مشتهين ؟ 

محمد : ركي وجبن عاجبني رحمة  لاهلج ..

زهرة: وانت ابو رسيل؟ 

صادق : اني هم سوي شي خفيف شو ما مشتهي..

سوينا السحور  وجبناه للهول كعدنا ناكل طبت عمة تصيح حسام وطلعت ..

محمد: ها وينه؟ 

زهرة: ما قبل ياكل يكول شبعان 

محمد: شبيه هذا اليوم مو على بعضه 

صادق : ربك ستر اليوم من انت اجيت قبلي للبيت وضلينا اني وياه بالمحل اجى رجال راد يرجع غراض مشتريهن من قبل اسبوع بعدني كاعد اتفاهم وياه وكلتله ما يصير ارجعهن صارلهن هواي بس كال الرجال ما اريدهن وهواي علية وما اعرف شنو ، بعدني اريد اجاوبه وما ادري حسام منين طلع تلازم هو وياه بالكوة فاككتهم التمت العالم و صارت هوسة شكبرها .

زهرة: هو ورا الفطور مابيه شي يضحك ويسولف شو طلع ربع ساعة ورجع وجهه مگلوب  وبس يتعارك شسوة بثائر خطية حتى كام يبجي .

محمد: اكلوا انتم واني اروح اشوفه شبيه ...

راح خالو ورا شوية اجى كال نايم كعدته رايح بسابع نومة..

صادق: عوفوه على راحته احتمال ضايج من شي واحنا ما ندري ..

المشكلة الكل يسأل ويريد يعرف حسام شبيه اني الوحيدة اللي اعرف سبب ضوجته 

ولازم اصحح الموقف يمكن جانت ردة فعلي قوية  ردت اردله اللي سواه وياية بس اذيته هواي..

مشت الايام وخلص الشهر الفضيل وباجر اول ايام عيد الفطر المبارك باليل عمة عجنت كليجة وكعدنا نسوي وياها نحشي ونخليها بالقوالب شويناها وكملنا ، نظفنا البيت ونمنا..

ثاني يوم كعدت الصبح سبحت وبدلت لبست فستان اصفر بيه ورد صغار سشورت شعري ، طلعت كلش حلوة الفستان تناغم وية بياض بشرتي ولون عيوني التنطي على خظار النتيجة اشبه ماما  بشعرها الاسود قبل لا تصبغه وتلعب بيه  ، ريناد تشبهني بس الفرق عيونها سوداء وسمرة على بابا...

كملت تبديل لفيت شعري  وانتظرت ريناد تكعد حتى ننزل سوى نعايد بابا.. 

كعدت آران حبيبي غسلتله وبدلتله مشطتله شعره ورحت كدام المرايا فتحت شعري ورتبته .. 

بقت بس ريناد رحت اكعدها ماقبلت عفتها ونزلت اني وآرن باوعت بالبيت بابا ماموجود عرفته رايح للجامع وية خالو علمود صلاة العيد ومناك يروح لبيت جدو طلعنا شفتهم واكفين بالباب بابا وخالو وحسام عايدت بابا وخالو وبوستهم .

التفتت على حسام حتى اعايده ما لكيته دخلت جوة اعايد البقية لكيته واكف بالمطبخ يشرب جكارة تقربت عليه وبسته بخده هاي اول مرة اسويها..

رسيل : كل عام وانت بالف خير .

تفاجئ بقى مصدوم ما جاوبني درت وجهي ومشيت وصلت باب المطبخ اللي يودي للهول جان يكول ..

حسام: عبالي الله هداج وتحجبتي كلت شعجب بس الظاهر العبادة والحجاب بس بشهر رمضان وباقي الايام عادي.

انداريت عليه ابتسمت ..

رسيل : يوم تخرجك..

رفع حاجبه ضحكت وعفته ما اريد اجادله لان اتعب وماكو نتيجة اعرف 

طبيت عايدت الكل وبوستهم طب خالو جايب الكيمر والكاهي وسوينا وياه بيض وجاي واجبان وكعدنا بالهول نتريك كل شوية ارفع راسي اريد شي من السفرة والكى حسام عينه علية ويوخر  يسوي روحه ياكل...

بعدها طلعنا نعايد الاقارب القريبين علينا  و البعيدين خابرناهم لان ازدحامات وبابا يخاف يطلعنا من الوضع  وهيج خلصت ايام العيد بخير وسلام ...

وبدت المدارس اني صرت صف رابع اعدادي  وريناد ثاني متوسط وثائر ثالث بكلوريا  وخالو شد عليه حتى يقرأ زين وحسام  صار مرحلة ثانية جامعة..

الصبح رحنا للدوام ورجعنا لروتينا العادي ، صار العصر التمينا بغرفة بيبي عمة جابت جاي وكعك 

اندك الجرس كسروا الباب تكسر من الدك  طلعنا نركض اني وعمة فتحناها  طب خالو عصبي ويرجف اول مرة اشوفه بهيج حال شاف عمة وصاح..

محمد : لج زهرة لحكي مصيبة وكعت على راسنا

زهرة : ياستار شكو ؟ ...

                الفصل السادس من هنا 

لقراءه باقي الفصول من هنا