رواية غلطة عمر الفصل الاول 1 بقلم ندي العمر
واقفة في حوش الجامعة الواسع تحت الشجر حق هندسات بتفتش فيه بين الطلاب ليه كم يوم ما ظاهر خايفة يكون حاصل ليه حاجة صح هو ما ملتزم بمحاضراته لكن مستحيل يغيب عنها وعن الجامعة ده كلو نفسها يركز السنة دي ما يعيد عشان يتخرجو سوا ويعملو خطوة رسمية في علاقتهم
:منى! قطع عليها افكارها فجأة اتلفتت واول ما شافته جرت عليه بشوق:كنت بفتش فيك وينك ليه مابترد على مكالمتي
مسك يدها بحنية:معليش حبيبي كنت مشغول مع ابوي في محلاته الفترة الفاتت لكن بوعدك اعوضك عنها طمنيني عليك
ابتسمت بخجل وسحبت يدها منو بعد اتلفتت واتاكدت من انه مافي زول شافهم قبل ترفع عيونها تملاهم بملامحه الوجيهة الكانت اشتاقت ليها "مهاب البدري" ولد عيلة البديري المشهورة بسلسة محلات الدهب حقتهم والاهم من كده انه حبيبها الدخل حياتها من كم سنة بس قلبها ليها فيها فوق تحت كيف ما يحصل كده؟ومهاب هو فارس الأحلام المثالي البتحلم بيه اي بت فالجامعة وجاهته وشخصيته هيبته وحنيته وجسمه الرياضي قروشه وعربيته موديل 2023 ومكانته الاجتماعية واسم عيلته وفوق ده كله حبه العميق واخلاصه ليها الشهدو عليه كل زمايلهم ودكاترهم
هو كمان كان بتاملها بشوق ولهفة وحب تملك ليها بذات وكيف ما يحب يتملكها وهو اتعود دايما يحصل على أغلى حاجة ومنى احلى واغلى بت في الجامعة كلهم بحسدوه عليها بتقرى كلية الطب متفوقة وشاطرة جارة دفعتها زي مابقولو - كان سنيرها لكن هسي جات حصلته باعادته الكتيرة وفصله وحرمانه كل سنة- ده غير جمالها الطبيعي و عودها الفرنساوي رقتها براءتها واخلاقها البضرب بيها المثل ببساطة كانت جوهرة غالية وهو صايغ شاطر بطبعه عرف يقدر قيمتها
بحس بالغرور لمن يشوف نظرات الحوالينهم ليهم سحبها
من يدها بتملك ومشى بيها لحدي الكافتريا حقت الجامعة بتردد:كنت عايز اطلب منك طلب لكن خايف تفهمني غلط
هزت راسها بالنفي وهي بتاكل في البيتزا بالفراخ وتشرب من العصير - العازمها عليهم كعادته- برقة وعفوية بتخطف قلبه
ابتسم بحنية:اكلي كويس خلي اكل العاصفير بتاعك ده
ضحكت وقالتليه:والله شبعت يا مهاب انا ما متعودة ع كده في الداخلية المهم قولي كنت عايز تطلب شنو انا مستحيل افهمك غلط يا حبيبي-قالت جملتها الأخيرة بنظرات كلها حب
استجمع شجاعته:اشتقت ليك شديد وكنت عايز نتلاقى بره الجامعة وناخد راحتنا بدون ما نخاف من انو زول يشوفنا
منى:انا كمان والله اشتقت ليك اكتر لكن نتلاقى وين كل محل نمشيه الناس هنا بتعرفك لانه عيلتكم دي معروفة وانا كمان بخاف على سمعتي وبخاف زول يشوفني معاك ويكلم محسن اخوي
مهاب:رايك شنو تمشي معاي الشقة بتاعتي؟
منى هنا اتصدمت وعاينت ليه في عيونه تتأكد لو انه جادي
اتنهد:معليش خلاص كنت قايل الثقة البينا اكبر من كده
منى ارتبكت: ما قصة ثقة يا مهاب لكن...
بحنية :خلاص حبيبتي انا فاهمك والله ومعليش لو ضايقتك بطلبي انا بس كنت عايز انفرد بيك في عالمي الخاص بتاعي
اتنهدت بضيق واتلفتت حوالينها شافت العيون كلها عليهم حسد وغيرة وفضول مهاب البدري بكل مميزاته هو محط الانظار في الجامعة خصوصا من البنات وطبيعي تكتر عليهم الاشاعات عشان كدة هي بتتجنب تطلع معاه كتير لانه اخوها لو عرف حيتكيها ضبحها بدون مبالغة محسن متشدد شديد وماعنده لعب او تسامح في الامور الزي دي
يمكن هو ليه حق في انهم محتاجين يتلاقو بعيدا عن العيون لكن هي ما بتقدر تعملها مع انها بتثق فيه لكن ما بتقدر تتقبل الفكرة دي بسهولة خصوصا مع تربيتها التقليدية المتحفظة
لاحظ ليها سرحانة:مالك حبيبتي؟ طلبي ضايقك للدرجة دي؟
منى اتنهدت:لا ابدا بالعكس انا قعد افكر فيه
مهاب بحنية:خلاص انسيه ما تفكري كتير
ردت بثبات:لا انا بثق فيك يا مهاب اكتر من نفسي
ابتسم ليها ابتسامته البتخطف قلبها مهاب من النوع البعرف كيف يرضي عقل الأنثى المعاه ويشبع عاطفتها ويرضي قلبها
مع انه اكبر منها بتلاته سنة بس لكن بتحس انه عقله وفهمه للحياة اكبر من كدة بكتير من خلال مطالعته وثقافته ونشاطه السياسي والفعاليات والبرامج البشارك فيها خلال سفره بره السودان وشغله مع ابوه ده كلو خلي خبرته بالحياة اكبر من عقل طالب جامعي في سنته النهائية مهاب ما مجرد شاب اتولد في خشمه معلقة دهب لا هو انسان طموح وده اكتر شيء بعجبها فيه قاطع حبل افكارها وقال بأسف وهو بعاين لساعة يده:حددي المكان العايزانا نمشي ليه هسي
لاني ما حاقدر اقعد معاك اكتر من ساعة عندي مواعيد
اتشجعت وابتسمت ليه:ماعندي مانع اشوف الشقة بتاعتك
*****
فتح الباب حق الشقة براحة ومد يدينه قدامها بحركة درامية:
اتفضلي يا اميرتي lady's first دخلت قدامه بتردد وهي بتتامل في الشقة بانبهار كانت شقة فخم بتليق بمهاب البديري مع ذوق راقي وبسيط بليق بحبيبها البتعرفو
كلها بالاسود والابيض والرمادي كانت الوانه المفضلة
قعدت في طقم جلوس اسود فخم جا قعد جمبها وقال بحنية:ما مصدق انك جيتي معاي هنا عارفة؟
تاني حامنع اي زول يقعد في الكرسي ده بعديك
ضحكت بخجل:انا ما جيت معاك عشان تقعد تتغزل فيني يا باشمهندس بس جيت عشان اطمن عليك واعرف اخر اخبارك مع والدك العزيز شنو؟
اتنهد ورجع براسه لورى :لسه الفجوة بيناتنا قعد تكبر اكتر واكتر تسلطه علي احلامي وطموحاتي بخليني اكرهه واكره نفسي اكتر لاني ولده الوحيد القاعد يحاول يخلق منه نسخة مطابقة ليه شايفني مجرد امتداد لمحلاته واستثمراته لكن رغبتي انا شنو دي حاجة ما مهمة عندو نهائي
بشفقة:معليش حبيبي منو العارف مش يمكن الايام تقرب بينكم؟واثقة انه حيجي يوم ويعرف قيمتك ويقدر رغبتك
ابتسم بحب:شكرا لانك دخلتي حياتي عشان تكوني النور الوحيد وسط ضلمة روحي وضياعي ومشاكلي دي كلها
حاولت تغير الموضوع بمرح زي عادتها:ما كنت قايلاك بخيل كده ما حتعزمني على شيء في بيتك يعني؟
ضحك ومد يده وقفها معاه ساقها ومشو المطبخ الصغير الفاتح في الصالة على الطراز الامريكي عمل ليهم عصير فراولة بلبن قعدو يشربو فيه ويتونسو ويحضرو فالتلفزيون
عاين في ساعته:الوقت مر سريع حبيبي معليش لازم نمشي عشان ما اتاخر على مواعيدي فالشغل وانتي كمان ما تتاخري على الليت حق الداخلية بتاعتك ارح اوصلك في طريقي
هزت راسها شالت شنطتها بسرعة وقامت وراه قبل ما تعاين للشقة وتعلق عليها قبل م اتطلع:شقتك مرتبة ومريحة زيك
ابتسم بحب:ناقصها شيء واحد انك تشاركيني فيها في يوم
اوعدك اني بعد اعرسك حاجيبك اعيشك هنا واكتبها باسمك
يا اميرتي حست بانها عايشة في حلم وزادت ثقتها فيه اكتر
*****
بعدها باسبوعين:
واقفة في حوش الجامعة نفس الوقفة تحت شجرة هندسات تتلفت حواليها بقلق مهاب مختفي ليه اسبوعين حتى تلفونه ما برد عليه ودي ما من عادته الا لو حاصل ليه ظروف صعبة اتنهدت بضيق وهي بتحاول تتصل عليه بس بدون فايدة لايمكن الوصول اليه قعدت في البينشات الخارجية حاضنة شنطتها عليها وسرحانة فيه كانت اتعلقت بيه شديد لدرجة الادمان حاسة انها حتتخنق في غيابه لكن هو بستاهل كل ذرة حب في قلبها ليه كفاية عليها انه حافظ عليها لمن امنته على نفسها ومشت معاهو شقته واحد غيره في محله ونفوذه كان ممكن يستغلها لكن هي كانت واثقة في انو مهاب حبيبها مستحيل يأذيها عيونها دمعت لمن اسمه مر في خيالها خايفة يكون حاصل ليه شيء كيف تقدر تتطمن عليه سئلت كل اصحابه عليه كلهم ما عارفين حاجة فجأة قطع تفكيرها صوت تلفونها شافت المتصل لقته My soul ردت سرعة بلهفة:مهاب وينك؟
سكتت مسافة بعدها سمعت صوته المبحوح :محتاج ليك
قلبها خفق من بحته في نفس الوقت اتقبض بخوفها عليه:
طيب انت وين هسي نتلاقى ؟
رد بتعب:انا في شقة المنشية لكن تعبان شديد ماحاقدر اطلع
اتنهد :خليها بعد يومين حبيبي اكون اتحسنت و قادر اطلع
اترددت شوية لكن القلق الفي صدرها خلاها تتشجع وتحسم قرارها:لا انا حاجيك هسي محتاج شيء اجيبه ليك معاي؟
بصوت مخنوق بالعبرة:محتاجك انتي....انتي وبس يا مناي
حست بيهو زي القعد يبكي وصوت همساته زاد من خفقان قلبها وقلقها اكتر ما حست بنفسها لمن طلبت ترحال من شارع الجامعة للمنشية ما شايلة هم شيء لانه مهاب معودها يسدد ليها تمن رحلاتها كلها بحسابه حق بنكك كانت سرحانة فيه طول الطريق فجأة لقت نفسها واقفة قدام باب الشقة حقته
اصابعها اترددت شوية و عقلها قاليها تتراجع لكن قلبها نهره مهاب مستحيل يأذيها لو كان داير يعملها كان عملها المرة الفاتت وهو بكامل عافيته اخيرا استجمعت شجاعتها ودقت الجرس الباب فتح من اول دقة كأنه كان مستنيها و اول ما عينها وقعت عليه اتصدمت ده ما حبيبها الواقف قدامها ده مستحيل! عيونه فقدت لمعتها ووشه شاحب والخلعها اكتر الشاش الملفوف فوق جبهته شهقت ودخلت بسرعة سئلته:
الحصل ليك شنو حبيبي؟
قفل باب الشقة بوراها واتسند عليه بضهره وغمض عيونه بتعب:اتشاكلت مع ابوي... بعدها عملت حادث بعربيتي لاني ما كنت شايف قدامي كويس بالزعل..بعدها رقدت 3يوم في المستشفى وو...
قاطعته و ختت يدينه على شفايفه بخوف:انت كويس هسي؟
هز راسه بلا وهمس بصوت مبحوح :لا انا محتاج ليك معاي
بلعت ريقها بصعوبة وهي بتقاوم لهفتها وخوفها عليه كانت بتتمنى لو بتقدر تحضنه وتحتوي وجعه وغضبه كله لكن ما بتقدر الا انها تواسيه هسي عشان كده مدت يدها بي كتفه تربت عليه بحنية اتفاجئت بي سحب يدها وسحبها معاها لصدره حضنها شديد بكل قوته وهمس في اذنها بتعب:
محتاج ليك شديد انا
كمل :عارفة انتي اول زول جا في بالي بعد الحادثة حسيت اني محتاج اشوفك وارمي همومي كلها على كتفك زي هسي حس بجسمها كلها برجف بين يدينه وهي حست بارتباك حقيقي دي اول مرة راجل يقرب منها للدرجة دي ورغم انو ضميرها انبها لكن حست بيه فعلا محتاج ليها يمكن لو ما كان عملها كانت براها حضنته من الحالة الهو فيها دي عشان كدة ربتت على ضهره بحنية قالتليه:انا معاك حبيبي اشكي لي همك واحكي لي مالك؟
اتنهد بتعب وهمس في اذنها:هشش ما عايز اشكي ولا احكي حاجة بس عايز اطمن باحساس انك معاي وجنبي هسي
غمضت عيونها وهي حاسة بهمساته الدافية بتحتل كيانها كله
اتمنت انه الوقت يقيف في اللحظة دي وما تفترق عنه ابدا ايوا ده مكانها الطبيعي بين يدينه وراسها على صدره لكن انتبهت لنفسها وزحت من صدره شوية في آخر لحظات بعد رجعت حست بالذنب تاني وضميرها انبها بس لسه محاوطها بين يدينه مابي يفكها نهائي كان ساكت بتامل في عيونها بوجع همس: كيف ممكن العالم كلو يختزل في زول واحد؟
ذابت في نظرات عيونه وحست بروحها عاجزة عن الرد او انها تبعد عنه اكتر انحنى على اذنها وهمس بحب:
انتي عالمي كله يا مناي - ابتسمت بخجل وهمساته بتخترق قلبها وانفاسه تلفح وشها باسها على جبهتها وكمل:شكراً لقدر جمعني بيك عشان تكوني حبيبتي وصحبتي وبتي وتوام روحي ومرتي في القريب العاجل إن شاء الله 🖤
غمضت عيونها وكلمات حبه الصادقة بتدغدغ مشاعرها البكر وتدوخها باحاسيس أول مرة تجربها وهي الكانت مابتصافح
فجأة حست بشفافييه بتمر على كل حته في وشها براحة عشان تفقدها وعيها جزئياً كانت غرقانة في بحر عاطفتها
ما عارفة كيف ومتين اصابعه اتسحبت لزراير بلوزتها تفكها براحة عشان تغرق معاه زيادة فبحر من الأحاسيس المحرمة