رواية خطايا واجتثات الفصل الواحد والعشرون 21 بقلم نور علي البصري

رواية خطايا واجتثات الفصل الواحد والعشرون 21 بقلم نور علي البصري 

شفت أمي واكفة وتنفخ وجهها مزهمر من العصبية أول هدت عليه.. 

​: ولج وين جنتي صارلي ساعة أنتظرج وجدج كاعد بالصالة ينتظرج وجايبلج  عريس! أويلي يابة ما أخلص من هاي الربابة 

هذا الخفت منه لا يوم تكبرين ويدخل جدج بزواجج ساعة السودة الحبيت بيها أبوج وخلفتج لو من الأول ماخذة أبو حارث.. ولا أنحط بهيج موقف..

سحبت نفس طويل أعرف مشاعر أمي من أهل بابا دوم تكول صرت ضحية غلطتي حبيت أبوج رغم تبين تحترم جدي و تهابة بس عدها تحفظ منهم

گلبي جان يدك من الخوف 

: عبالي صاير شي والله يمة عبالي فد مصيبة خوفتيني على كيفج وياي..

جريت نفس وأني الزم أيد أمي بأصابيع ترجف من الهبطة أخليها على صدري 

: شوفي شلون وترتيني..

نترت أيدها مني وغمتني

: ماجدة.. بطلي تمضيك وشوفي أكلج أي عريس يجيبوه الج مرفوض لذلك أنتِ ترفضيه ولا تخليني بموقف محرج وي جدج من أتعارك وياه رجال جبير زحمة.. 

جنت بالمطبخ لأن فتت من باب الي على المطبخ لكيت عالطاولة باكيت فرندو النوع الككو أبيض اخذت منه  قطعه فتحت الغلاف وأني أكل.. 

: مممم جوعانة أطمني ما أتزوج حالياً أفكر بمستقبلي الدراسي أكمل كلية بالأول.. 

جنت محتارة هذا ماجد.. سواها وراح يتوسط حتى نتزوج، لو عريسي غيره معرفت أرفض لو أقبل، فبعت ثكل  وخليت خط رجعة وأني الوج و أكل وأحجي.. 

: بس أذا عريسي هيج فد شي فوق الخيال بطل طالع من الضباب ويخترق النار المشتعلة وما يحترك شخصية كون واو خارقة راح أقبل خاصة أذا يشبه الممثل انطوني بندوريس ،لو ليناردو ديكابريو أويلي يابه.. 

صفكت أمي أيديها و فتحتهن بغمة على كصتي

: الزلمة ينتظرج وأنتِ تحجيلي مسلسلات أجنبية 

: أفلام ماما ؟! 

: شهالخفة الي أنتِ بيها ما جنتي هيج  وصايرة تحجين يمي بمراهقة ترى أخلي الشحاطة تلعب على ظهرج

يله ومثل ما كتلج 

جدو أني أريد أكمل دراستي والزواج يعيقني زين سمعتي ولج تعتذري عن العريس الجدج جايبة..

هنا ردت أجس نبض إلي أجه ماجد.. لو غيره عاد سألتها  

: زين ماما من وين هذا عريس الغفلة الجايني.. 

ضروري أبين نفسي ممهتمة حجيت بحذر لا تحس أتلهف منو العريس  وأبين منتظرة أعرف الشخص هذا منو 

أصلا مريدها تحس إني أنتظر شخص يخطبني وتربطني بي علاقة حب 

هم سكتت فكلت.. 

: عاد كون حلو حتى من أرفضة سمعتي تصير البطرانة..

جانت إنتصار.. تتلفت وعيونها بيني وبين أمي وكالت.. 

: مويجيد.. راح يعرسولج هسه يطلع حلكه شريعه واوية...

غميتها

: لا عيني أكيد من يجي النصيب الطيور على أشكالها تقع أني جميلة الجميلات تتوقعي أخذ واحد أقل مني جمال..  

ظليت أوصف فارس الأحلام وتعمدت بعيد عن وصف مـاجد.. حتى لحد يشك بي بعدين لو خطب ميبين بينا علاقة حب.. 

أمي ظلت متجاهلة وأني مترددة أدخل لجدي شو أستحيت حيل خجلانة لأن تغلب عندي أحساس هذا مـاجد.. توسط يم أقاربه هل أجة جدي..

طلعت أمي بيدها صينية بيها استكان جاي و كلاص مي ضيافة.. 

ضحكت

: شنو فاتحة وأمي تقدم جاي غير شربت بمناسبة الخطوبة ههههه (حالياً عصير ) 

ضحكت إنتصار.. وكرصتني.. 

: خلي أكرصج حتى بلكي أتأهل وياج خطوبتي طولت

مديت لساني

: هو بعدنا مشفنا العريس ولا أجة للرؤية الشرعية و التعارف وأمي أستقبلتني تهلهل علي رفضيه وتعذري بالدراسة 

وأنتِ ااوي ولج أخ وخري شنهاي كل شوي كرصتيني شبيج متلهفة للعرس تردين أجرج وياي تطمني مدام الست الفاضلة مديرة مدرسة ال&&&&  بالوجود ثقي راح تعرسين قبلي وأني أعنس وأكابلها هي ورجلها ال... 

سكتت ردت أغلط وتذكرت إنتصار.. بنته يمي ههههه بس مدري ليش رغم السواه بالعالم و بابا لؤي.. داخلي مكدر أكرهه.. 

: نصورة.. أحجي شسمعتي عن عريس الغفلة الجايبة جدي.. 

​

: ولج يكول أبن أقارب واحد يعرفه و

وياج بالجامعة شكو؟ شنو السالفة؟ عاشگة وما ندري؟

ضربتها بجتفها

: شنو عاشگة تأدبي قابل أني حظي مثلج أنتِ وأبن عمج حب ورسائل غرام ومحد أنتبه لمن خطبج.. 

: أبن عمي خبيطي أقصد خطيبي.. 

سكتت وزاد قلقي من دخلت أمي وجهها معصب أكثر.. 

: يكول جدج واحد وياج بالجامعة أي أحجي أحجي أعترفي ماشي المي من جواي وما أدري مو؟! 

شنو ماما أنتِ عاشگته شلون يخطبج ومن الجامعة ودون علاقة بينكم لا عبالج ما أعرف سوالف الجامعات واليصير بيها من تكبل وياما ياما صارت.. 

حجتها وصفنت لحظات شوي أنهدت بيه وهي تضربني

: عاشگة ولج؟! شسوي بيج كليلي ها أم الفواين والمصايب شحصلت منج ومن أبوج هااا وعود أبوج دماري جانت لو أنتِ هسة يالعاشكة.. 

​راددتها بضوجة لأن الكلمة غثتني

: هسة بابا يمج بكرباج أنتِ التركتيه  مو هو وكل بيت بي مشاكل أنتِ الي ما تحملتي و عفتيه ومكتفيتي بهذا وكعدتي عليه وربيتيني رحتي عرستي  على واحد جبير بالدولة حتى تتقوين بي على المسكين بابا 

أما كلمة العاشگة وعشگتي عيب ترى! ترى البنية من تنخطب وتتلطم مو شرط عاشگة أني الكل يحلف بتربيتي وأكيد مرغوبة للزواج..

ليش هيج تفكرين يجوز هذا أنعجب بأخلاقي وتقدم بس ترى أكو بنات تزوج عن حب وعشق مو شرط التعشك مو شريفة أذا عشگ حلال شكو بيها.. 

​عفتها واكفة بمكانها ورحت للصالة  شفت جدي كاعد هيبته تملي المكان بس عيونه بيهن تعب الدنيا ركضت حضنته ريحة جدي هي الأمان.. 

: شلونك جدو؟ مشتاقتلك كولش

​باوعلي وأنرسمت أبتسامته من بين ثنايا تجاعيد تركها زمن بوجناته..

​: يا هلا بمجودة.. الكبرت وصارت مرة يخطبوها مني كعدي بوية خل نسولف  

​دنكت رأسي مستحية بس البال مو يم الخطبة البال يم بابا لـؤي.. الي صارله أسبوع ماله أثر.. 

: ​جـدو بابا شخباره؟ والله مشتاقتله  وأتصلت على بيته ومحد يجاوب شصاير؟ 

​شفت جدي لزم سبحته حيل وعصرها بيده لدرجة عبالك راح تنكطع ووجهه تغير ملامحه قست فجأة بس حاول يسيطر على روحه وزفر حسرة طويلة تحس كأنها طالعة من نص گلبه.. 

: ​أنقل للشمال عود يخابر جدتج.. 

​رجع صفن بعيد وعيونه تاهت لبعيد هاي الحسرة دومها وياه لو بس أعرف ليش هلگد شايل بگلبه على بابا؟  

باوعتله صافن بسبحته وكل شوي جر نفس وذبه حسرة مسموعة يا جدي شضام بگلبك شنو الأسرار الي بعد معرفتها وخلتك تحارب وتكره وتقسي على أبنك سألته.. 

​: ليش جـدو؟ بعدك شاد وياه؟ بابا ميستحق هاي القسوة فوك ضيم الزمن أنت هم ضده! 

​هنا صوت جدي صار بي رنة غضب مكتوم غضب حسيتة مدفون سنين طويلة لزم السبحة أكثر وكال.. 

​

: لا بوية مو ضده بس هو عصبي وأني ما أتحمل عرايكه ومشاكله فمتجنبه الواحد بعد هذا العمر مابيه حيل طلايب..

​أستغربت بابا عصبي؟ أني الي أعرفه هادئ وحنين شوكت صار هيج؟ لو جدي يشوف شي أني ما أشوفه؟ 

سكتت والشك بدأ ياكل بيه بس جدي حسم الموضوع وفتح سالفة مـاجد.. والخطبة وجان يبين عليه مستعجل يريد يزوجني ويخلصني من هاي الهوسة كلها.. 

: جايج عريس هو وياج بالجامعة زميلج و يمدح بتربيتج وأخلاقج يريد يتقدم يطلب أيدج أسمه الولد مـاجد.. و لابد سامعه بي أذا قابلة أرد خبر يجون يخطبوج و خير البر عاجلة شكلتي بوية؟ وأني بوية ما دايملج.. 

رديت..

: بس بالأول خابر بابا الأصول منه أنخطب..

دار وجهة صفح و جر نفسوهو ينفخ بضجر.. 

شوي دخل سـهيل.. وسلم على جدي..  

: شلونك حجي شخباركم؟ زارتنه البركة حجي.. 

: جدي وبابا سهيل.. تحاضنوا أني أعرف من زمان بينهم الفة ومودة أكثر من الي بين بابا وجدي..

حظ بابا أبوه وي الغريب زين الي هو ند وعدو لبابا وويه أبنة كولش أحسه ظالمة.. 

: الحمد لله بويه بخير..  

ظل بابا سهيل.. يسولف مواضيع عامة لمن خلى عينه بعين جدو و سأله.. 

: أجيت بوقتك وصل سلامي لربعنا.. 

بعيونهم غمز وهمز شكو ومنو ربعنا ما أهتميت هو علاقة جدي وبابا سهيل.. مبينة قوية كلش خاصة بأخر سنين هواي أسمع بابا سهيل.. يخابرلة ويتواعد وياه يشوفة لأمر مهم..

رجع بابا سهيل.. باوعلي و أبتسم وهو يحجي..

: كالتلي أم ماجدة.. جايب خطابة مو أعتقد بعدها صغيرة على مسؤولية الزواج.. 

سكت ورجع بأصرار يحاجي جدي.. 

: اذا العريس بضمانتك أقبل أزوجها  بلكت الرجال يعدلها صايرة لسانها طويل و تدور ثارات وياي.. ههههههه

لويت حلكي عود يشاقى يصنف لو يصوغوك ذهب فلا بعد أرضى عليك أبو التهريب وخيانة الوطن تهرب خيراتنا للجيران حيل أتزعزعت صورتك المثالية بعقلي.. 

باوعلي جدي وضحك 

: يمعود والله هاي تتزوج أحسن النا والها..  

تعجبت بابا سهيل.. هز رأسه بـ أي.. ذول شو متفقين يزوجوني وبسرعة بس بابا سهيل.. أستفهم عن مـاجد.. 

: حجي الولد على ضمانتك شيصير الحساب وياك يصير.. 

: أولاً أنت مو أحرص مني على حفيدتي من بقيتها يمك تربيها بمزاجي وإلا من تزوجت أمها أكدر أني أربيها أما الولد على ضمانتي..

خوش ولد وأنطيك العنوان و أسال عنه بس أني أكولك أمكانيته محدودة الصراحة أني أفكر بالستر قبل كل شي و الولد شاغول وهم بنيتنا منعوفها نساعدها بس عدهم معدومين.. 

بابا بساع كال

: صعب أوافق عليه.. 

: مو من دمه بعيد عنه وموقعين تبرئة بوقت الحدث أبوه مجبور يوقع.. 

: حجي أبوها بالأمن موافقة لازم.. 

دار وجهة جدي وكال 

: شيسوله يطردوه علواه هذا الأريده..

: البنت بنتكم و أنت بالذات حجي أقتنع أني بأختيارك بس تتوقع لؤي.. يقبل يزوجها وهو الأب مهما كان الزواج لا يصح شرعاً إلا بموافقته.. 

أمي أعترضت

: لا مو اله شنو هذا و يصير إله رأي بمصير زواج بنتي أبد ولا أقبل تستشيروه سواء يقبل أو يرفض ممنوع تستشيروه وأصلاً بنتي مو للزواج أني رافضة أزوجها.. 

باوعت لجدي بأصرار وهو غمض عيونه لحظات يشرد من التحدي بعيونها جر نفس و كال.. 

: أنة موجود ومن حقي أصير ولي أمر حفيدتي أذا رفض لؤي.. أني أزوجها.. 

أتمردت أمي

: يرفض يضرب رأسه بألف حايط ماله علاقة بينا بنتي أني الأقرر ورد خبر للعالم مرفوضين كلهم أمها رفضت تزوجها صغيرة نريدها تكمل دراسة.

تجاهلها جدي وكمل.. 

: شوفي بوية هديل.. البنت حفيدتي وأنة موجود وأذا هي مقتنعة بالولد أهم شي راحتها أما لؤي.. أذا عارض أني أوكف ضده أني أزوج البنت غصب عاليرضى والما يرضى.. 

حجاها وهنا رد نظرة تحدي لأمي.. 

رديت : لا بابا لؤي.. ما يظلمني أكيد يعرف مصلحتي.. 

باوعولي جدي وبابا سهيل.. خجلت يمكن كشفت رغبتي بماجد.. 

ذب حسرة بابا سهيل.. من فترة يتجنبني من آخر مرة كلامي وياه قاسي بس والله لو يبطل أذية العالم 

و يتوب يستعيد محبتي اله.. 

كلش مقهورة شلون جند حسن.. لصالحه شنو من غسل دماغ واحد أهله راحوا مجازر و يطيع جلاده بكل خضوع هزيت راسي وجدي أنتبه 

: بـوية بيج شي..؟ 

: لا جدو بس صداع.. 

خزرت سهيل.. الي نفخ وردلي الخزرة بأقوى منها صعدت لغرفتي فرحانة والله كلت صعبة ومالي نصيب وي ماجد..و راح نصارع لحبنا بس الله سهلها.. 

أيام وبابا هد على أمي جان سهيل.. مموجود و تدافع وياها 

: جيبي بنتي ولج لو تنازل الدنيا هم ما أخليكم تزوجونها لواحد يبهذلها وياه بنتي معلمة عالدلال الزواج غير متكافيء.. 

دفعته ماما  

: أنت منو كلك اني موافقة ما أخليها تعيش العشتة أني... 

ضحك

: ليش ندمانه حبيتي؟ مشكلتج هاي المهم البنية أرفض تزوجوها.. 

: أن رفضت وأن قبلت أنت معليك أطلع من حياة بنتي وها رغم رافضته أني بس يجوز عناد بيك أزوجها ومليون مرة كتلك مو من حقك تدخل ببنتي تمام أنت واحد مخبول.. 

دفعها ودخل للهول يصيح

: وينج مـاجدة.. بابا تعاي أني أبوج وأني الي أوافق أو أرفض.. 

كلش خفت أول مرة هيج معصب ومني بالذات نزلت الدرج ولزمني من زندي حيل.. 

: تـحبيه؟ 

بخوف : وياي بالجامعة و خطبني مو شرط عاشگته روح أسأل عليه بالكلية أذا أني مكبلة وي ولد أو ماشية بعلاقة

هسه عرفت ماجد.. صح من رفض نلتقي ورى ما صارت علاقتنا بجد جان حاسب هيج حساب يجوز بابا يچيك ورايه باوعلي بابا.. 

: خوش حجي يعني ما متعلقة بي ولا حابته لذا وصلوا خبر مرفوض.. 

أمي كالتله 

: أنت منو كلك وافقنا والله أبوك الي وافق وخطط يزوج البنت على كولته أفضل متبقى متشتته بينج و بين أبوها تعرس و تعيش حياتها والله عيوني أبوك الحجي جنه مرتاح للولد و يعرفهم..

كعد بابا و سألها 

: منو ذول بالضبط.. ؟ 

: ماجد زيارة خشن..

صفن بابا و كال الإسم مو غريب 

: أي معارف أبوك أقاربهم يعرفوهم فلا و لابد جايكم و سامع بي.. 

: يجوز بس العرفته معنده إمكانية لشنو يورط بنات الناس.. 

هنا تقويت وحجيت 

: أهم شي الأخلاق بابا هو خوش ولد.. 

: و أني مموافق وهسة تجين وياي بلغتي سن القانوني ومو قاصر وأمج مو حاضن بعد يله! 

باوعت لأمي الي جرتني ووكفت تواجهة

: مو من حقك فاهم! 

: البنت بلغت سن القانوني و من حقها تختار وين تعيش.. 

كلت أروح وياه و هم اقنعه 

: ماما أروح كم يوم و حتى اتفاهم وي بابا..

ظلت تغلط عليه متهرفة عالعرس شعرفج بهاي الأمور جنتي بريئة مطيعه شغيرج.. 

بعدني ما طلعت ووصل بابا سهيل.. وكبت عركه جبيرة

سهيل : بعد وين أنقلك وأتخلص منك ولك لا تطب بيتي؟ 

:بنتي عندك وأجيت أخذها.. 

: مالك حق بيها.. 

: كبرت وبلغت سن القانوني ومن حقها تختار.. 

: أني أروح كم يوم يم بابا مشتاقتله هواي لمن يلتحق أرجع..

لميتلي ملابس و كتبي وهاي المرة محد كدر يمنعني لأن صرت راشدة قانوناً أول ما وصلت بيته 

: فوتي جوة أني أروح أجيب المرة والجهال ببيت جدج مبقيهم هاي جيتي كبل عليج ممريت لأهلي.. 

أنطاني المفتاح أخذته و طلعت من سيارته دخلت للبيت أباوع للترتيب مرته كلش مرتبة.. 

جنت فرحانة أول مرة أبات يم بابا الحلم إلي من سنين أنتظره كعدت بالصالة ربع ساعة و رجع.. 

صوت أولاد بابا التؤام وهم كبرانين أسمع حجيهم و الزغير ثالثهم

شافوني وكفوا يعرفوني هم بس علاقتهم بيه باردة ما أعرف ليش؟ 

: هـلو.. 

رديت عليهم : هـلو حبايبي 

نظرات مرته الي بيها سوالف ما أعرف تكرهني تحبني مداعرا أوصل لأعماقها ولا أفهمها.. 

: شلونج.. 

هي أصغر من أن أصيحها خالة هزت راسها كلش ضايجة عليها لأن فقدت النطق بأزمه نفسية و ما تعدتها لحد الأن.. 

بس ضايجة على بابا أكثر أكول هم يريد مرة يحجي وياها و بينهم لغة تفاهم بقت تباوعلي ممرتاحة لنظراتها

بابا حاجاها.. 

: تبقى ماجدة.. يمي كم يوم أهتمي بيها.. 

هزت رأسها أي و خلت وعافتنا كلش ضجت الظاهر مراغبتني أو تضوج مني.. 

: بابا كون ما أحرجتك يعني أنت صارلك مدة طويلة بالشمال هم زوجتك تريدك الها وأني أحس نفسي دخيله.. 

: أنتِ الأولى بالعيش وياي بس أمج ورجلها و مؤامراتهم وإلا ربيتي هنا بحضني بعد شنسوي الله يسامحهم المهم كبرتي و بعد تستقري يمي

: بابا والشاب الطلب أيدي خوش ولد والله.. 

تجرأت و حاجيته بس عاند

: شوفي بنتي أخذي الي بمكانتج لتنزلين للأقل أنتِ متعلمة تصرفين ودلال هذا شلون يعيشج الشغلة لازم تندرس.. 

سكتت ورجع أكدلي 

: مبين هواي ما عدكم علاقه حب شوفي ماجدة.. بختج ربتج أمج ولو أني المربيج ويبدر منج غلط ما أسامح وردي خبر للولد لا يجي و يتعب نفسه كوليله مخطوبة لشخص كبير بالدولة.. 

باوعتله : بابا شتحجي؟ 

: عيشي ملكة أفضل من ما تعيشين فگر و لازم أأمن مستقبلج عند الي يستحقج 

سكتت..  

حاسبني : هواي تضمين عليه.. 

: لا أبد كلما نلتقي أو نتخابر أسولفلك بس شغلة الولد الخطبني أنت مموجود و هم الشغلة مفاجأة إلي..

: الله يدري بس أني ما قابل بي.. 

بقيت كم يوم ببيت بابا حاولت أقنعه بس ما أقتنع خلال هاي الفترة ماما يومية تجي حتى تأخذني بس ما أقبل بقلق تكول..

: نكرتيني يا ماما أني ربيتج و تعبت ولؤي.. ماله حق بيج اااخ يا زمن لو يرد لورى اااخ هواي أغلاط جان ما صارت وأول أغلاطي أبوج شكد حبيته عشكته بس أخ من القدر أخ..

حسيت غصت بدمعتها وردت تحجي.. 

: الحمد لله سهيل.. عوض الله الي بعد ما عانيت ما عانيته بس تمنيت لو من الأول متزوجة سهيل.. ولا هالضيم ولا الصار و خلاني أعرف لؤي..

: ماما أرجع لمن نفسيتي تتحسن..

: زين أمشي أخذج لبيت جدج هناك أقبل ترحين.. 

: ابـد..

تعبت مني وراحت

أما مرت بابا حسيت بيها تتجنبني ومرة كتبت الي بورقة طلعي منا لا تجين بعد حيل أنقهرت ممأذيتها ليش هي هيج ويايه؟ وقتها بجيت مقهورة أول مرة أبقى أيام يمها وتطرد بيه..

رجع بابا يلمح على مسؤول يعرفه وبيوم عزمه ومن شفته رفضت فوراً كبير و يخوف ومو ملائم الي كزوج خليت وكمت أبجي وهو يسأله 

: شبيها و يمتى الزواج أني حاضر لكل شي.. 

هذا شلون تنقفل عليه أني وياه غرفة وحدة لا أبد والله ما أقبل بس طلع عاركت أبوية.. 

: أبد ما اقبل بي أبد والله.. 

: ترى أريد مصلحتج.. 

: لا والله سمعته وعدك يرفعك بالمنصب يعني أنت شفرقك عن سهيل.. تبيع و تشتري بيه.. 

أبجي مقهورة وهو يكرر أريد مصلحتج

: مصلحتي؟ لا والله..  

لميت غراضي وأني عيني على مرته تبتسم من لميت غراضي وقررت أروح حسيتها فرحت متحملت شكد هاي تكرهني تبتسم على قهرتي تبتسم لأن أبجي هم أكو هيج بشر غميتها و خليت الجنطة على جتفي.. 

: خليني أطلع..

: تبقين لمن تتم الخطبة.. 

: أي خطبة هاي..

: متطلعين ترديني أعوفج حتى أبوية يزوجج لفكر أبوه متزوج وحدة ولدها معدومين.. 

: قابل أخوانه؟ الله أكبر شعليهم بولد رجال ثاني إلا هيج أحجي وها تريد  أبقى حتى تزوجني لواحد يخوف...

طلع وكال ماكو طلعه خليتة يلتهي عني وبساع أتصلت بماما.. 

: ماما لحكيني بابا حيزوجني لواحد يخوف تعالوا أخذوني.. 

أنجر التلفون مني 

: ما تزوجين الجابه جدج هذا واحد عدهم معدومين سألت عنهم.. 

: ولك بابا أفهم مو إخوانه والله ولد مرت أبوه لا تخلط أرقام صارلي ساعة شخرط وأكلك مو إخوانه.. 

: صايرة ما مؤدبة لسانج أطول منج هاي مرافكة همج وتعلمتي منهم..

: من أعارضك تدمر حياتي طلعت مرافكة همج أما ماجد.. المعدومين مو دمه ولا يمة ولا من عشيرته بعد شكو؟ 

: يبقون ربو سوى يعني نفس المبدأ.. 

جان معصب وأني معصبة ماكو إلا دقايق وبابا سهيل.. دخل ووياه جدي و كم رجال من الأمن تراجع بابا لأنه أقل رتبة و سكت يخاف يتعاقب.. 

: يله بابا..  

ما حضنت سهيل.. لأن هو الشر بذاته إذا بابا فكر يزوجني للغني و العنده مكانه ذاك لعب لعب بالشر.. 

هذا حظي بين أبهات واحد شر بشر والثاني تبين يريد يوصل منصب ويستغل بنته الحارب حتى بس يشوفها أو يمكن تصرف بهذا التصرف لأجل عناد بجدو لأن ميتحاجون من فترة رجعت بيت أمي و سهيل.. هدد بابا.. 

: لـؤي لا تندك بيه والا..... 

: الشر لابد ينتهي بنهاية مأساوية و أنت ممقصر بذنوبك الحمد لله أني أب ردت أحمي بنتي بشخص اله مكانه و يحافظ عليها مو مثلكم تنطوها للفكر.. 

تمرضت ورة هذا الموقف ما كدرت أستوعب أتزوج هذا اليخوف وأعوف مـاجد..

سمعت ببابا رجع التحق حلفت ما اأحاجيه الا يعتذر مني على أقتراحه أتزوج من واحد مثل الجابه الي بس طول بغيابه بعدين عرفت من جدي فاصليه من شغلة وينفذ عقوبه.. 

: ليش شمسوي وعاقبوه أكيد بابا سهيل مو؟ 

التفتت لبابا سهيل.. 

: حرام عليك.. 

رد : وأني شكو تلكين الراد يزوجج اله دبرله تهمه لأن رفضتي كل الفهمته فصلوه من شغله و مسجون بحكم عسكري وهذا من صالحج.. 

أنقهرت عليه هسه فهمت ليش يلح أخذ المسؤول الظاهر مهدده.. 

: إذا أضحي وأقبل بلي جابه الي يطلعون بابا.. 

صاح بابا سهيل.. وأمي و جدي

: أششش تضيعين حياتج لشخص ما يستاهل 

هاي أمي ورأيها و سهيل.. أكتفى 

: فكري بنفسج و مدام أنسجن هنا جدج يتولى تزويجج.. 

رديت : بس.. 

جدي : تنجبين هو حكم ينفذه و يطلع قابل يعدموه و إذا على الشغل يشتغل ويايه ويترك بعد أشغال الحكومة خلي يلزم صنعتنا والله ما أعتبره كفو الي يجيب رجال لبنته واسوء خلق الله.. 

ظليت مدنكه كام جدي.. 

: الجماعة يجون العصر وأني أمر عليكم أتفقت وي أبو الولد على كل شي.. 

ردت أمي 

: ما أحب أنطيها لهيج قسمة تعيش بعوز.. 

ردها جدي بأصرار.. 

:أني أنطيت ومو بكيفج تمنعيني!

: بحالة وحدة أرفضه أذا بنتج كالت ما أريده.. 

دنكت خجلانه من سألني

: تردينه لو لا..؟ 

أشرت براسي أي و سكتت ما حجيت أبتسم جدي

: على بركه الله العصر يجوكم الجماعة نسوانهم و الولد حتى تتفقون على كل شي و الخميس كعدة خطوبة ومهر..

بس راح جدي أمي هدت عليه موقفها مو قوي مثل قبل لأن بلغت سن القانوني أكدر أعوفها بأي وقت

: ها ولج ها متهرفلة عالعرس لو ما عندج وياه علاقه ما طلبج.. 

: طلبني على أخلاقي.. 

رد سهيل.. 

: كافي خليها تعرس الي رادته تتزوج قبل لا يطلع أبوها أفضل هيج نأمنها يم رجلها هذا لؤي.. ميجوز يزوجها لمسؤوله رجال شكبره شكده متصابي.. 

ما يهمني موقفهم من أبوية المهم عندي أخذ رادتي طبعاً ما أجت أمه و الحجة مريضة وأمي على أعصابها طباعهم مختلفة عن طباعنه 

اخواته معدهن ثقافه و أحسهم عبالك عرب بلبسهن و طريقة حجيهن جنهن مراغبات بس يخوزرن بأخوهن 

أمي ما عجبها المقدم و المؤخر بس جدو الظاهر ما أمن لأمي لذا دز بيبي وعمتي أتفقن وي أهله باوعلي ماجد.. مبتسم و كال لأمي 

: خالة حقج تخافين على مستقبل بنتج بس الله يقدرني أدللها و ماأخليها تحتاج شي لو أكص من جسمي لحم.. 

ردته أمي بحدة.. 

: ما أريد تكص لحم شرطي ما أغيره تعزل بيها عن أهلك.. 

كامن أخواته من أمه وأبوه 

: ليش عيوني أخونا الوحيد تردن تبوكنه.. 

هدأتهن أخواتهن من أبوهن

: سكتن بنية بنت دلال وعز شتردن منها خوية ماجد.. بيت أهلي طابقين أخذ الفوك وأعزل بيها.. 

 ظل ماجد.. بين أخواته الي أنقسمن جبهة أخوات من الأم والأب و جبهة أخوات من الأب سكتهن و باوع لأمي 

: صار راح أعزل بيها.. 

آخر شي أنتهت الكعدة على خير و أحس أمي مجبورة الظاهر بابا سهيل.. قرر يتخلص مني بأسهل الطرق تزويجي وهيج بابا ما يحصلني لو طلع.. 

و نفس الوقت يتخلص من مراقبتي لنشاطه تالي الليل وشكوكي الردت أوصل الها شنو علاقته بحسن.. 

وليش حسن.. من فترة رجع أختفى ألف علامه سؤال وألف علامه تعجب؟! 

وشنو يشتغل سهيل.. و حسن شنو طلعاتهم المشبوهة و الشباب اليجيبوهم منو 

كل هاي الأسئلة موصلت إلا سهيل.. اول جند حسن.. لتنفيذ أحكام سرية بشباب أو أمور ما تطلع للعامة.. 

: يوم الخميس جانت الخطبة وبس صوت الهلاهل مالي البيت بدلتي حورية أو قبل نسمي الموديل ذيل السمكة وكانت ضيقة ولونها سماگي

فرحانة رحت صالون وحفيت و تمكيجت لان أمي متقبل هيج أمور عدا الشارب جنت أشيلة وطرك كحل جنت و مبيض أبو تاج.. 

هسة خلتلي أم الصالون سمر كيك و خبطته وي شوي أبو التاج ورسمت عيوني وركبتلي رموش والمكياج طوخ وشفايفي سماگية 

وخلت لمعة لشعري الرفعته تسريحة المحابس وياه بكلة فوك وتنزل منه  برچم عالگصة خفيفة وزلف ملتوي... 

كعدت مستحية من أهله رغم حسيت نظرات سم من أمه وبعض أخواته هن الله يحفظهن هواي.. 

وأنقسمن فريقين فريق يباوعلي نظرة كره و يلون حلكهن لو هاي التهز بيدها

رغم بعضهن ما يعرفني وأول مرة يشوفوني.. 

رجعت التفتت للفريق الثاني من أخواته هن الأجمل شكلا وأكثر بشاشة بوجهن المرح و التفاؤل والابتسامة الي بوجه ماجد.. جذبت نظري أصغرهن مبينة المدللة كل شوي ضحكت لو تهلهل لو تغني.. 

أختي يمي شاورتني

: حمواتج جنهن فريق رياضي الي بهذا صوب تابع لرياضة المصارعة وحدتهن شكبر أفادها ومو حلوات ذن على أمهن.. 

أما الي بالصوب الثاني عبالك راقصات باليه جمال و ملامح حلوة جميلة خاصة الصغيرة أحلاهن يمكن يشبهن الاب عاد رجلج طالع على يا فريق هههه

حجيت بصوت ناصي

: نصيرة أنجبي لا تحجين عليه يخبل.. 

: مممم شفته من شباك حنطاوي يله لزعلين حليو.. 

ضجت تعيب على رجلي وهي خطيبها الاصلع.. 

: على الأقل مو أصلع مثل خطيب بعضهم.. 

: أشش أجت أمي سكتي هسة نترزل تسمعنا نتعارك عالزلم.. 

: ماما لابسة كوستم عبالك رايحة مدرسة مو حفل خطبة بنتها.. 

ضجت لأن لبست ملابس دوامها.. العادية كعدت أمي رافعة خشمها تباوع للعالم بطرف خشمها ومتجاهلة الجميع.. 

كامت إنتصار.. وطلعت المسجل وخلت بي كاسيت وأغاني مال أعراس وهي تركص فرحانتلي حتى صاحباتي مقصرن 

وإخواته البشوشات هم هلاهلهن هوساتهن ويصفكن وفرحانات أما الفريق الثاني مبوزات و حسيت مراضيات بيه.. 

بعدين العرفته البشوشات أخواته من الأب فقط يعني ذن الي أخوانهن من أمهن أنعدمو أما الي عابسات أخواته من الأب وألام.. 

أخذ جدي الوكالة مني وراح يكملون العقد وأخيراً سمعنا صوت الصلاة عالنبي.. 

التفتت أخته الصغيرة 

: تم العقد وكلللوووش أخونه خوش أخو يستاهل الهوسة.. 

وصرنا حلال لبعض

أمي لوت حلكها من طب وكعد بصفي مدنك أحمر من المستحى وكل شوي 

مسح وجهع بجفيته حتى مباوعلي بس همس بصوت متوتر يرجف ولا عبالك ماجد الصلف أبو لسان الاعرفة

: شـ شلونج..!

وأني أزيد منه مستحية أريد أرجع السلام مكدرت عاد جريت نفس وبخجل

: زينة أنتٓ شلونك.!

رد

: أني هم زين شخبارج..

: الحمد لله شخبارك أنت.. 

: وشخبار الأهل والجهال..

حسيت صوته قوى وصارت نبرته بيها ضحكة مكتومه و مرح رفعت راسي والله مخليك تحرجني باوعتله وكتله

: الجهال يسلمون على أبوهم هياته بصفي يسولف.. 

كامت أمي من ورى خشمها

: المن السوالف دلبس حلقات يحظي نصرة.. صوريني وي أختج من أنطيهم   الحلقات.. 

حسيته ضاج لأن فشلته ..

يمكن أمي أخذت دور أمه ولزمت علبة الذهب البسيط الجابوه نيشان فكامت أمه مدت أيدها للعلبة بس أمي فتحتها وخلت العلبة عالطاولة منطتهياه بيده 

لبسنا الحلقات ولبسني ساعة نبض  وذهبي.. 

لبستة الحلقة ظل لازم أيدي و صابيعنا  مشابكه وهو يرد على اليهنوؤ

جانت الدنيا ما واسعتني من الفرح عزمت صديقاتي كلهن  ردت الكل يشوف حظي ونصيبي فرحتي أخذت حبيبي.. 

بس سؤدد.. ما أجت ختولي ​جنت قبل أحس بذنب حسن.. راح بسببي وألوم بروحي ليل نهار بس هسه لا هي الظلمتني مو أني 

والمفروض هي التعتذر وتجيني مو تتجاهل فرحتي وحفلة خطوبتي

رجعت أهمس وي روحي بس خوالها راحوا بذاك اليوم  لو ما أروح التقي ببابا ببيتهم ما صار الصار ظل شعور الذنب بخصوص خوالها.. 

بس بخصوص حسن.. ضجت من حسستني أني دمرت زواجها وهو عايش حيل انقهرت ما صارحتني و تكتمت علية بموضوع حسن.. عفت كل ضيمي ورا ظهري وركزت 

بـ ماجد وبس 

ورى أيام عقدنا محكمة وأخذت وياي علبة جكليت وحلويات للجامعة بالكافتريا سوينا حفل بسيط 

​

وزعت الجكليت على الطلاب والضحكة من الأذن للأذن  ومـاجد.. واكف يمي مثل السند وعيونه تلمع بفخر وهو يباوعلي سألتني وحيدة وهي تضحك.. 

: يمتى زواجكم؟ من تتخرجون؟

جاوبتها بثقة. .

: لا بعد شهر..

​أهنا نصار ما سكت ضحك وكال

: شبيكم مستعجلين؟

أني متت خجل ودنكت رأسي بس ماجد.. ما قصر صاح بيهم وهو مبتسم

: ترى خجلتوا مرتي عوفوها شوفوا الخدود بويااي ذبن الوان ههههههه 

النوب هو علي مو بس نصار.. ​كلمة مرتي منه جانت تسوى عندي الدنيا وما بيها طلعنا نتمشى كدام الكل إيد بإيد وفنه اليحجي حجاية أو يباوع بنظرة مو زينة.. 

خطيبي وسندي وأسمه منقوش بحلقتي الي تلمع بإصبعي مد إيده وبكل حنية شبك أصابعه بأصابعي وعيونه تحجي غزل قبل لسانه..

: أحـبج..

همسها بصوت دافي ذوب قلبي

ضحكت وكلتله

: جنت أتصور راح ينشلع گلبنا يله ننجمع بس ربك سهلها من سابع سما.. 

​

​وهنا فاجأني وهو يباوعلي بنظرة كلها خوف وحرص علي.. 

: ماجدة.. راح أعزل بيج بيت وحدنا أعرف أمي و اأخواتي صعبات وما ينرادن بس من هسا أكلج تعلمي كم طبخة تبيض الوجه.. 

أستحيت منه وكتله.. 

: مو عيب شنو قصدك ما أعرف أطبخ أطمن أعرف أطبخ كم طبخة.. 

أبتسم : والـ هي؟!  

: بيض سلق وبيض عيون و بيض بطماطة و أعرف أسلك حتى البتيتة.. 

صفن بيه وكال

: خلي فترة الخطوبة أمج أو أختج يعلمنج.. 

قلد صوتي يصنف

: أعرف كم طبخة والله يا الله أم البيض

ضحكت و ضغطت أيده حيل و بدلع

: وشمدريك ما أعرف أطبخ؟

ضحك وكال

: مبينة من عيونج ترى أني مشتغل حتى بمطاعم وأعرف من نظرة عين.. 

​كتله بشقة.. 

: لعد هاي هي حلينا مشكلة الطبخ حبوبي الطبخ عليك!

باوعلي بصدمة ووراها أنفجر ضحك وكال.. 

: أعلمج وأطبخ وياج بس ما أريد أهلي يدرون خليها بينا

جاوبته بحدة وقوة

: وإذا عرفوا ؟ هاي حياتنا ومحد اله  دخل بينا.. 

رد علية وهو يحاول يهدي الأمور

: ما أريد مشاكل يا ماجدة.. تمام؟ 

هزيت رأسي بالموافقة وعيوني غركانة بعيونه ببحر من العشق المهم انغي وياه والباقي كله يهون

        مـــــــــــــــ♡ـــــــــــــريم

انتهزت فرصة سفر نصير.. و رحت لخطوبة ماجدة.. و ماجد.. الله يستر عليهم جنهم كناري.. 

رجعت للبيت جان بالتسعة بالليل دخلت وأني عفت ياسر.. يم ام جنان.. لكيت نصير.. راجع من سفرته لزمني حيل من زندي

: وين جنتي..؟ 

: بحفل خطوبة صاحبتي.. 

: وأني راخصج؟ 

ى محصلتك حتى أكلك هاي صديقتي من أول الإبتدائي ليومنا هذا.. 

: أها...  

لزمني من حجابي و جره

: أكيد مصاحبة مو؟ لذا متجيني وترضيني تقفلين الغرفة هاجرتني

: وخر عني أنت شارب شنو...؟ 

: راح أعلمج الطاعه الزوجية.. 

جرني حيل من شعري لغرفتي وشمرني وهو ينزع 

: من كم شهر هاجرتني ها ولج عاشگه لو تلعبين وي غيري؟ الا اليوم...

وترك كلمته دون تكمله حاولت أتصارع وياه بس أنتهت المعركه بخسارتي

ثاني يوم أباوع لوجهي أزرك من ضربه 

شلون أداوم ظليت أدك على روحي و أبجي يارب خلصني منه يارب حادث ويموته لو هذا الموت عايفه ورايح للزينين.. 

جان مموجود رايح للشغل بس أم جنان.. شافتني ضحكت

: عزا شمسوي بيج هههه كالوا أشتياق بس مو لهيج درجة

: كافي أنتِ شنو معندج أحساس؟ ولج هذا شابعنا دك و كتل و حتى يعتدي علينا بس يشبع رغبته أنتِ ما عندج كرامة؟ شنو معدنج؟ عجيب! 

أني رايحه لأمي كافي تحملته أروح أكولها شنو نسيتيني أني بنتج حرمونا من بعض ليش أستسلمتي بهاي السهولة.. 

: نصيحة لا ترحين.. 

حضنتها

: خاف أطلك و ما أشوفج بعد راح أشتاقلج والله أنتِ طيبة وغبية مثلي وكعتي بيد نصير.. فلتي أنتِ وبنتج ميفيد.. 

: لا ما أكدر أني أحبه وعندي أمل بيوم يتوب و جاي أندعيله هواي متأكدة الله يستجاب مستعدة أدفع حياتي ثمن توبته.. 

أني عكسج أنتِ تزوجتيه للماديات و مشيتي ورى الجاه أني تزوجته لأجله هوه أني أحبه واليحب يصبر و يسعى لمن ينعدل حبيبه يمدله أيد النجاة..

شلت أبني وأني محملة جنطي.. 

: ظلي ظلي مكفخة.. نسوان تحب الكفخ ساعديني أطلع الجنط للشارع على مجيب تكسي.. 

دنكت شلت جنان الي تضحك.. 

: راح أشتاقلج يا حلوة أموواه.. 

بستها من كل گلبي وطلعت وصلت بيت أمي أعرف عون.. عزل عنهم و سمعت من زمان سافر برى البلد  يشتغل هناك و بيته مأجره و خالة يدزلة فلوس الإيجار فتحت أمي الباب و شهكت.. 

: ولج مريم.. هاي أنتِ ممصدكة أفيش يا يمة.. 

حضنتني تبجي شحالها ضعفانة و صفرة 

: شبيج يمة؟ 

: مريضة بلياج والهم كتال صاحبه يمة مريم..

دمعت عيوني وأني أباوع حال أمي أويلي وين الوجه الوردي وين جمالها

وين صحتها وأمتلاء الوجه والجسم الفتان الكدامي شبح  نحيل وجه شاحب وعيون مبيضة مصفرة 

وشفايف الجانت مروية هسة جافة بيضة.. 

: يمة شبيج خيرج يمة.. 

بخوف ولهفة لزمت أيديها وأني 

 أدخل البيت.. 

: صخونة ما تفكني يمة وتعبانه كلش

: بس يمة فدوة ليش ما تحللين وضعج كلش معاجبني شنو صايرة هيكل خلي نوري أبو الدكات عشاير يرتاح.. 

: فوتي يمة نظل هنا واكفين رجفة ودوخة توديني وجيبني.. 

: والله يمة أنتِ هواي هاملة روحج منو ينفعج نوري؟! 

دخلت وأني أباوع للبيت بي كم ذكرى وذكرى 

: والله ولا يفيدج أحد بعده نوري و سوالفه متبطل راح يسلج من فواينه.. 

هزت راسها أي اي 

: مـريم يمة شبي وجهج؟! 

: ماكو شي بس نصير.. يشاقيني.. 

: أسم الله ولج ماكل لحم وجهج شيشاقيج شنو كاتلج عاضج هذا الهمجي.. 

سولفتلها ضيمي و عاتبت أختياري وهم ذبت الصوج بيها هي أساس من خلا فكرة نصير.. بعقلي عبالها ما يمنعوها مني 

بس دخل نوري.. 

: شتسوين جاية تردين تبلينا؟ 

: جاية لبيت أمي الي أشترته بذهبها.. وأنت خوش قشمرتها مثل ما ورطتني بنصير.. أريد أطلق.. 

: وأني شكو روحي لجدج يله برى؟ 

: والله بيت أمي ما أطلع و يطبك طوب.. 

بقيت مداومت لمن الأثر خف وعالجته بالمكياج و هم أحس أقل نظرة الي أكول العالم تباوع الأثر حتى صاحباتي ميزنه عود مخلية سمر كيك وأبو التاج خلط حتى ميبين الأثر.. 

يمكن مر شهر حاول نصير.. يرجعني و تعارك وي رجل أمي بس راح هد عليه 

رجل أمي كتلني أني وأبني وشمر جنطنا و غراضي بالشارع و طردني بالظهرية أني وياسر أبني الفرفح بجي أخذت تكسي لبيت جدي بس دخلت تعاركت وي جدي.. 

: ظلمتني من زوجتوني نصير.. قشمرتني مراهقة مالها خبرة بالحياة وتميز الصح من الغلط يله كلي وين زماطك بأبن عمي مو كلت سندج أبن عمج و يحميج هو هذا اليحميني وين وعدك جدو بهذلتوني قشمرتوني لو ماخذة عون.. مو هذا حالي.. 

محسيت ألا أنسحلت طلع نصير.. عدهم ما أنتبهت

: تتمنين عون.. تحبي؟ من هيج هاملة حقوقي يله للبيت كدامي

دفعته 

: والله ولا أروح وياك و هسه تطلكني

بيبي دفعته

: كافي ترى هواي سكتت الك ولك أنت شلون ولد جنت شغيرك؟ عوفها خلي ترتاح بعدين نتفاهم وأني ما أرجعها الك ألا بشروط.. 

تعجبت موقف بيبي و جدي الي أيدها منين هاي منكم من الشيطان...

صيح جدي على نصير..

: مو كايلك ما تفوت بيتي ألا تتوب ترجع ذاك الولد اليخاف ربه وأذا على واردي من الشغل دزهن بيد أبوك لو أخوك يله برى من مساع أطرد بيك متروح.. 

: مجاي لأجلك جدي بقيت أنتظر تشرف العروس أخذها وأطلع.. 

رجع جدي بعصبيه وحزم  يغلط و يطرد بنصير.. الي من شافهم حازمين وياه أنسحب و قرر يطلع.. 

وأستمرت الحياة ببيت جدي يتيمة و أبني حالة حال يتيم دون أبو يسأل عنه بس على الأقل نفسيتي شوي أرتاحت 

سبحت أبني بدلتلة اليوم حفل بالجامعة و نصير.. سمعت هم مسافر لشغله المشبوه و سوالفه المكسرة.. 

لذا جدي كال تجي أم جنان.. عدنا قبل أنتن سوى ما تستاحش خطية جابها حيل فرحت و ضحكت

: ها مو كلتي نتوادع خاف أطلك و منتشاوف عبالج يطلكج هاي أحنا تشاوفنا

بوستها و بوست جنان 

: يمة فدوة للدبية ولج أنطيني منج خدود تدرين يا خية لو شايفتني قبل لا أتزوج النذل شلون جنت دبية و موردة الخد وهسه جني سلبوح سيان

ضحكت : لا بعدج حلوة لا تشبهين روحج هيج.. 

حيل فرحت بوجود أم جنان و مرت أيامنا دون نصير.. كالعادة سوالف و ضحك و سفرات و طلعات وي بيت جدي.. 

كلها متعجبين شلون ظراير و شلون هيج متفقات ما يدرون الي مشاركين عليه ما يستاهل الغيرة ولا الخراب والعرايك بالليل كال جدي.. 

ى باجر نروح لأطراف المحافظة هناك خوش مكان للسفرات 

الكل فرح و تجهز بس عمي و مرته وأبن عمي أخو نصير.. هم كال عندي شغل أعتذروا

: هاي المرة ما نروح أحنا والله عندي شغل و مرتي حامل تعرفون كوة حبلت علاجات مو مال طريق بعيد كد ساعتين و نص

أما عمي نفس الحجه أما أني أعتذرت من سمعت بيت عمي أهل نصير.. يجون آخر روحه همه أجو و تعاركنا أني وعمتي أم نصير.. لذا أختصرتها ما أريد ضيكه خلك و هم عدنا حفل بالجامعة.. 

عاد ثاني يوم من السبعه بدلت و كملت و بدلت أبني أخذه وياي رغم أم جنان تبرعت تأخذه للسفرة وتهتم بي ما قبلت لأن خفت يشلع گلبها وكيح أبني 

وصلنا للجامعة و أبني صار من أيد لأيد بين الطلاب و الطالبات للأن أذكر شلون ياسر.. مميز بشكله محبوب كلش و مرح يسوي معزه متعلقه بي كلش.. 

يمكن للثنتين نهاية الدوام توني طلعت أريد أرجع للبيت شفت نصير.. وجهه أحمر عيونه مورمة شبي هذا أجه 

و بس شافني ركض وحضني ما مهتم لنظرات الطلاب 

: مصيبة مصيبة.. 

بس يردد مصيبة و مبين كوة يحجي 

جان كوة يتنفس... 

الفصل الثاني والعشرون من هنا

لقراءه باقي الفصول من هنا