رواية خطايا واجتثات الفصل الثاني والعشرون 22 بقلم نور علي البصري
لا تأمن الفرح، دور جيوبه وشوف
جايبلك دمع من تخلص الفرحة
تاجر دنيتك والسوك ما مضمون
والربحان ابد ليكيف بربحه
مثل مد وجزر ،والدهر ما معروف
ونگاب الليل يگشع لو طلع صبحه
ولا كلمن على بجناحه لاح الغيم
خاف بمطره يبتل ما يرف جنحه
چم صاحي صبح بأيدين چف الموت
وچم معلول طاب من العلل واصحه
ــــــــــــــــــــــــــــღـــــــــــــــــــــــــــــ
مـــــــــــــــ♡ ـــــــــــــــريم
نصير.. جان يرجف إيده على سكان السيارة (ستيرن ) ترجف دون ثبات وعيونه غايرة بوجع ما شفت مثله بحياتي..
صحت بي بوجع وخوف
: أنت شبيك! أجيتني تسحل بيه ترى ما أرجع وياك أنتهينا أوكي دوخر عني عوفني أدري شجاك تخبلت..
رد عليه وصوته يتقطع وحشرجته مسموعه..
: خسرت كلشي مريم.. خسرت كلشي من الصبح لسه ما بقى عندي شي شلون أعيش من دونها وجنان بعد ما أشوفها..
ما فهمت شبي ظل يضرب الستيرن منهار بهستريا..
: ربييي ليش بيهم تعاقبت ليش ربيي..
مالت السيارة وحسيت راح ننكلب لو تجي سيارة تدعمنه من الخوف والرهبة سحبت ياسر.. الحضني حضنته حيل أريد أضمه بضلوعي..
يسوق بجنون يرجف ويرمش بعيونه سريع لو ينهار ويضرب الاستيرن الموت كبال عينه وقتها كلت راح ينهي حياتنا بجنون سياقته هاي..
بس لاف الفلكه و هنا أنتبهت شفت الطريق مو لبيت جدي شاط گلبي..
: ما أرجع لبيتك نصير.. لا تحاول لو تموت ما أرجع..
بس هو ما رد شهك شهگة خلت ضلوعه تتحرك ودموعه عشرة عشرة
: ما بقى منهم أحد مريم.. بس جدي وحالته حرجة دزني عليج يريد يودعج جدي دينازع!
وسعت عيني و الدنيا دارت بيه واللسان إنربط..
: آنت شدتحجي؟ نصير فهمني شكو يا وداع يا جدي؟ شنو رجعت تشرب؟!
أستمر يسوق سريع..
: حادث بطريق الراحولة مريم.. خسرت بنتي خسرت أم جنان وأمي وأبوي وإخواني صرت وحدي مريم.. صرت وحدي هاي حوبة الوادم الأذيتهم هاي نارهم حرگتني دعاوي أهلهم..
ظليت صافنة الفكرة ما جاي تدخل راسي جنان الملاك الصغير؟ وأم جنان اللي ضحكتها ما تفارك وجها ذوله كلهم راحوا..
نصير.. جان متعلق بيهم لحد الجنون أمه وأبوه سند ظهره وبنته جنان جانت روحه من الدنيا..
تذكرت شلون أم جنان رادت تاخذ ياسر وياهم للسفرة يمة أبني لو رايح جان هسه هو ميت گلبي كام يدك طبول من الرعب حضنت آبني حيل أشم بي..
وصلنا المستشفى ونتراكض ريحة الموت بكل مكان بين ممرضين مستعجلين وممرضات تتراكض و أطباء بحالة إستنفار
وصلت أسعاف للطوارئ تحمل أجساد ولغط من الكلام عائلة كاملة متعرضة حادث سيارة خمشني گلبي ولزمت أيد نصير.. بخوف..
اليوم حوادث هواي الممر جان طويل وكئيب والناس تركض بصوب وصوب
أشرلي نصير.. وهو مهدود حيله
: مـنا بنهاية الممر..
لكيت عمي الصغير وزوجته وحماي بيدة كانولا مبين من الخبر صاير عندة هبوط بس زوجته ماكو ما سألت مو مال أسأل عن فلان وعلان أباوع للوجوه مؤرمه من البجي و العيون غركانة دم
عمي همس بصوت مكسور..
: أبوي يريدج مريم.. لسانة ما وكف عن سيرتج يريد يشوفج..
باوعت لنصير.. بغضب ووجع..
: ليش توكم يا الله دزيتوه يجيبني ليش عفتوني لأخر لحظة..
عمي جاوبني والدمعة بطرف عينه..
: بنتي مو وكت العتب جنا بمركز الشرطة والقاضي لازم يوقع.. الحادث مو قضاء وقدر الحادث مفتعل قتل!
عفتهم ورحت أركض بالممر لا شايفة دربي ولا مستوعبة الصدمة دخلت الغرفة شفت جدي.. هذا الي جان مالي الدنيا بصوته هسه مغطى بالدم وعيونه مسبلة..
: جـدي..
فتح عينه نص فتحة وعلامات الضربة براسه توجع الگلب نطق بكلمات كأنها وصية أخيرة..
: مريم.. ظلمتج أبريني الذمة يا بعد جدج أبريني الذمة..
دموعي نزلت تحرك بخدودي صحت بي..
: لا جدو لا تموت والله مبري الذمة بس لا تموت..
بس هو شهك وطلعت روحه كدام عيني أول مرة أشوف الموت شلون ياخذ الروح دخلت بحالة صدمة أصيح وأصرخ
: جدي أسمعني مبري الذمة والله مبري الذمة..
نصير.. سحبني لحضنه جان يرجف كأنه هو الي دينازع مصيبته جبيرة خسر أهله ومرته وبنته بلحظة وحدة
طلعنا من الغرفة ونقلوا جدي للثلاجة ويا البقية مشيت وياهم أودعهم شفت أجسادهم والضربات الي بيهم..
: مقتولين منو يتجرأ يقتلهم؟ شمسوين بدنياهم..
دنك راسه وعينه على جنان بنته مد إيده يمسح على شعرها ويذب حسرات تهد الجبال عمي حجه بصوت ناصي
: المكان طريق زراعي والسلابة هناك ذياب سنين والحكومة تطاردهم وماكو نتيجة الحصار والجوع سوه الناس وحوش..
باوعت لذهب أم جنان وعمتي بعده عليهم..
: بس السلابة يبوكون الذهب ليش بقى..؟
عمي رد بطمعه المعهود..
: سجلناهن عهدة وراح نستلمهن..
كلت بگلبي حتى بهالمصيبة تفكر بالذهب يا عمي؟
: والله يا عمي أرواح راحت الذهب شيفيد بعد..
كعدت بالكاع أبجي لزمت إيد بيبي وحضنت جدي ودعت جنان الملاك وأمها المبتسمة دوم.. نصير.. جان منهار يدك على رأسه ويصيح
: يارب عاقبني بواحد مو كلهم يمة فدوة كعدي حاجيني..
سحب أم جنان وبنته لحضنه يشم بيهم ويشهك..
: ما وفيتلج وعدي كلت أعيشج ملكة بس الشيطان أخذني يارب شسوي! جنان بابا كعدي فدوة لعينج..
أستلمنا الجثث بالليل ورى الغسل والتكفين سار موكب الحزين الى مثواه الأخير وإنصبت جوادر الفاتحة
مرت الأيام والناس خفت بالفاتحة وبيت جدي صار وحشة أمي جانت تجيني تعبانة ومرضها يأكل بيها حضنتها وبجيت..
: يمة لا تروحين أنتِ هم فدوة لا تعوفيني شبيج ضعفانة وجهج أصفر
حضنتني وهمست
: الأعمار بيد من ملكها يا بنتي آني المرض تعبني موتي راحة لي من الألم
كعدتها يمي و عيني ما تفارگها أخاف أخسر أمي حيل وقتها الموت بقى بعقلي من الجثث الشفتها وشفت الدنيا رخيصة و أحنا ضيوف بيها لابد نغادرها نرجع لبيتنا هناك بيت الأعمال والحساب..
مرت الشهور ونصير.. بقى كاعد ببيت جدي يخاف يرجع لبيته الي خلا من ضحكة جنان.. جان عايش على الجاي والجكاير وعيونه غركانة بسواد الهم..
و بيوم كعدت الفجر أصلي وشفت نصير.. واكف يصلي ويبجي بمرارة سجد وطول بالسجود وهو يتوسل برب العالمين..
: يارب سامحني غرتني المادة وخسرت ناسي يارب أرحمهم واحفظلي مريم.. وياسر..
دمعت عيوني هذا نصير.. الي عرفته أول مرة وكفت وراه ومن خلص خليت إيدي على جتفه دار عليه وحضني دفن رأسه بصدري وهو يشهك
آااخ يا مريم.. أذيتج هواي هاي حوبتج
: لا نصير.. هذا أختبار والحمد لله أنت رجعت لطريق الحق..
ظل يحجيلي عن لحظة الي عرف بالحادث و شلون سوا السيارة طيارة بس حتى يوصل وشلون شاف بنته كأنها نايمة ومبتسمة..
: مريم.. أم جنان دفعت حياتها ثمن لتوبتي جانت دائماً تدعيلي أترك طريق السوء..
جريت نفس وكتله
: أستغفر ربك و أصبر وأن شاء الله توبتك مقبولة..
سألني بخوف
: ما بقالي أحد بس أنتِ وياسر.. راح تبقين مو؟
باوعت بعيونه وكتله..
: أنت أبو أبني ومدام تبت ورجعت نصير.. الي حبيته أكيد ما أعوفك..
حضني وباس ركبتي وهو ينحب
: آخ يابة تعبان..
أستمرت حياتنا و نصير تغير 180 درجة صار إنسان خير يساعد الفقراء بثواب أهله وجانت هاي أجمل سنين زواجي رغم الوجع بس جانت بيها راحة التوبة والاستقرار..
شــــــــــــ♡ـــــــــــيلان
أمي خطية إجت وشالت همي وهم خالتي وگفت وية خالتي وقفة أخت لأختها بوسط ذاك المرض اللعين الي نهش عافيتها..
سنة وشوية وخالتي تصارع المرض كملت جرع الكيمياوي وهسة بدت بالعلاجات الهرمونية الي تهد الحيل وتخلي الواحد ماله خلگ حتى لروحه..
أمي ظلت تروح وتجي عليها تداريها وتغسللها بس بالنهاية بيتها هناك ينتظرها والمسافة بعيدة..
و زوج خالتي مو مريح ومشكلجي
حتى بروان.. ميرتاحله و ميقبل أدخللهم وهو موجود بس شسوي وقتها أمي هناك يمهم وخالتي مريضة لإزم أشوفها..
أُمي قررت ترجع البيت هناك بحاجتها و بابا يتصل وحتى بالتلفون تكول تعارك وياي..
وصتني ما أكطع بخالتي وأبقى أواصلها أشوف إحتياجاتها وترخصت أمي من خالتي وسافرت وعينها تجري قبل لا تصعد السيارة لزمت إيدي حيل ووصتني..
: شـيلان.. خالتج أمانة برگبتج يمة عيونج عليها ترى هي هسه مكسورة ومحتاجة الكلمة الطيبة..
صرت كل كم يوم أروح أتحين الفرص شوكت يطلع زوجها السختجي من البيت حتى أدخل ما أطيق وجهه ولا أطيق ريحته..
وفوكاها بروان.. يغار من ظله ما يقبل أتواجد بمكان هو بي يگول..
: شيلان.. هذا عيونه مو راحة روحي لخالتج من يطلع خلي خالتج تخابرج لو طلع من البيت روحي..
الشهور تمر وبيتنا لساته هدوء ماكو صوت طفل يملي علينا المكان بروان.. ممهتم أو يمكن يظاهر مو هامه يباوعلي وأني أدرس ويگول..
: شيلان لا تستعجلين على الرزق أكيد هسه أحسن إلنا بدون أطفال خلصي دراستج و أخذي شهادتج والطفل يجي بوقته منريد نتقيد و هسه إحنا بعز شبابنا..
جنا نخطط للسفر للقرية وية بداية العطلة الربيعية نشم هوى نقي وننسى تعب المدينة بس زواج ماجدة.. اخرنا بروان.. كعد يمي وكال وهو يطمن بالي..
: شوفي يابة ورى عرس صاحبتج نتوكل ومدام مريم.. أنصلح حالها وية زوجها ورجعت تواصل أمها لا يظل بالج على خالتج مريم.. تكفلت مداراة أمها..
أخذت نفس عميق وكتله..
: والله يا بروان.. فرحت من مريم.. سولفتلي نصير.. تغير وسبحان الله أحياناً الصدمات القوية هي إلي ترجع البشر لمستواهم
نصير طغى وتجبر لمن جانت الدنيا بيده بس لمن دارت عليه الدائرة وخسر أهله كلهم والبقوله بس مريم وياسر.. عرف إن الله حق..
مريم.. جانت تحجيلي بحسرة تگول عمهم شال حصته بالورث وطلع خارج العراق هو وحماها أخو نصير.. والورث أنقسم بينهم ثلاثتهم العم وولد أخوه..
أما مريم.. هي خطية أبوها أستشهد وأهلة عايشين ما إلها ورث بس الجد الله يرحمه جان كاتبلها هبة مبلغ مالي..
ونصير.. من شاف الدنيا غدارة وما بيها أمان كال أني بعد ما آمن على روحي لازم أأمن مستقبلج أنتِ وإبنج..
رايح كاتب كل أملاكه بإسم مريم.. يمكن راد يبرد گلبه أو راد يعوضها عن كل دمعة نزلت بسبب جبروته القديم..
بروان باوعلي ورفع حاجبه وضحك بضحكة قصيرة..
بروان : هسة مريم.. صارت مثل
طاسة الدبس اللي تلتم عليها الحشرات..
فهمت قصده فوراً جان يلمح على نوري.. زوج خالتي كتله بضيق
: أي والله هو هذا الخوف أكيد وصله الخبر لأن هاي الأيام صاير يتلوگ إلها و بشكل مو طبيعي مريومة هيج و مريومة هيج وبنتي وحبيبتي مريم..
خطية مستغربة تگول حتى أبني ياسر يداريه وينطيه هداية وفلوس وبس يريدنا نبات عدهم الله يستر من هاي الحنية المفاجأة گلبي ممرتاحله..
مـــــــــــــــ♡ـــــــــــــــاجدة
كملت جهازي والفلوس الي أنطانياهم ماجد.. كمقدم ما كفت لأن آني طبيعة لبسي ونمطي يختلف جذرياً عن نمط أهله..
ما خيطت خياط أشتريت كل شي حاضر وجاهز من السوك وأمي شافتني محتارة مدت أيدها وأنطتني فلوس حتى أكمل جهازي بس طبعاً ما خلتني براحتي ظلت تدردم على راسي..
: هاي أولها ولج ماما فلتي بجلدج من هسة هذا الفگر بخيل وياج أنتِ معلمة على الدلال شلون راح تتعايشين وي وضع مختلف وأقل من وضعج بهواي
شوفي بنتي ترى الحب لا يوكل ولا يلبس باجر تصبحين على واقع مر..
آني سكتت بس بداخلي أكول يمة شتحجين جاوبتها بضوجة..
: لعد ماما ترديني آخذ الي جابه بابا لؤي ذاك وجهة يخوف عبالك مجرم..
خزرتني أمي وكالت
: طبعاً لا بس يجيج نصيب زين فسخي من هذا ماجد.. لا تتندمين بعدين..
: لا ماما هذا إختيار جدي و آني مقتنعة بي..
أمي عضت أصابيعها بقهر وكالت وهي رايحة..
: إختيار جدج لو من ورانا تتمعشگين وياه شلون ما أنتبهتلج شلون..
أبتسمت بيني وبين نفسي ميهمني كلامها المهم صرت لماجد.. وأدري بي ميقصر وحبنا راح يغلب كل الظروف..
فكرت ببابا لؤي.. وهو مسجون كلت الله يطلعه بالسلامة من يشوف أحفاده راح يفرح لأن شافني مستقرة ويه إنسان أحبه..
و بيوم من الأيام إجت أم ماجد.. و أخواته الخمسة الي هن من أمه وأبوه ومن كعدن يسولفن بدت البسامير والمغامز كالن بوضوح
: عليمن هالمصاريف الزايدة وإيجار بدلة غالية شسوين بيها أكو دلالة عدها بالات (ملابس مستعملة) تجنن وبأسعار بلاش..
لعبت روحي من كلامهن بدلة العرس أريدها بجيسها ومملبوسة حتى لو غالية أمي مستحيل تخليني ألبس شي لابسته وحدة قبلي ما تحملت طگيتها بوجههن..
: خالة إذا ما عدكم إمكانية تلبسوني بدلة اوادم ترى أمي ما تقصر وتجيبلي أحسن شي بس آني ملابس لابسهن غيري ما ألبس..
ظلن يخوزرن و بساع ترخصن وأمي ودعتهن من وراء خشمها..
: بعد وقت أبقن..
: لا عيني ورانا نكمل مستلزمات عرس ماجد.. هو وحيدنا شعدنا غيره..
بگلبي كلت وحيدجن وتلبسن مرته بالات خوش وحيد..
لليل خابر ماجد.. وطلعله أخوية حارث صارت الشغلة رسمية وكام يتصل براحته حارث.. صاحني
: ماجدة.. تعاي خطيبج على التلفون..
أخذت السماعة بلهفة..
: ألـو هلو مـاجد..
: مـاجدة.. آني أريد أعاتبج..
حارث.. جان واكف يمي يسوي حركات ويعيب فكتله..
: أبقى وياي عالخط لحظة..
ودرت على حارث.. أخزره
: روح منا جاي أحجي ويه خطيبي شلزگت..
حارث.. هز إيده دومه معاجبه العجب ودائماً يعيب على ماجد.. ويكول
: هو وسيم بس ما لايگلج مو ذاك الوسامة الي تنحجي بيها..
: تغار منه تحجي عليه إذا مو مـاجد.. وسيم لعد منو الوسيم آنت مثلاً؟
غمني وكال
: بنات آخر وقت شلون تحاجيني استحي يله أدب سز..
جاوبته
: صح آنت الولد والوحيد ومدللتك ماما بس لا تنسى آني الأكبر فلازم تهابني وتحترمني..
باوعلي بملل وكال
: ولي عاد..
وطلع رجعت للتلفون..
: ها حبيبي أعتذر حارث.. جان لاطشلي
ماجد.. جان صوته غريب
: سمعته مو مهم رأيه الظاهر أهلكم ما معلميكم شلون تتعاملون ويه الضيف وأخوج طالع مثلج ميحترم لا كبير لا صغير صارلي ساعة أنتظر حضرته يكمل صفاقة وهو يتجاوز عليج تربيتيش هاي..
ضجت من أسلوبه ليش هيج يحجي يعني هو ويه اخواته ما يجاكرهم وجاي ينتقد تربيتنا..
: ليش تحاجيني بهذا الأسلوب بعدنا عالبر وهيج لعد لو تزوجنا شيصير؟
: أريد أعتب عليج شنو الحجي الي حجتيه لأمي و اخواتي ورفعة الخشم هاي على شنو ترى الفقر مو عيب..
أنصدمت وجاوبت بسرعة:
: ترى ما حجيت شي يمسهم ولا تكبرت كذابات ووصلولك كلام غلط..
: يعني شلون كذابات عيب كلهن أكبر مني ومنج أحترمي نفسج و أمي مرة كبيرة ومصدوم بكلامج هذا الظاهر أنتم معلميكم أهلكم التجاوز عالكبير عادي وشي طبيعي..
كتله بهدوء أحاول أفهمه..
: شوف راح أسولفلك وآنت قيس رادن يأجرن بدلة بالات أو يشترنها من دلالة و آنت تعرفني ما ألبس هيج أمور مو تكبر والله بس المتعود على شي صعب يغيره فكل الي كلته إلهن..
خالة إذا ما عدكم إمكانية تلبسوني بدلة أوادم ترى أمي متقصر بس آني ملابس لابسهن غيري ما ألبس..
مـاجد أنفجر..
: وهذا كلامج هو الي جرحني شحال أمي و اخواتي أختاري كلام لطيف ويه العالم لا عبالج آني فقير وما أگدر أعيشج وأمج شنو تشتريلج بدلة مو من حقها آني موجود..
كمل كلامه بقهر..
: لو ساكتة ومشية اليوم ومخابرتلي وفاهمة مني جان أحسن أدري بيج مدللة ومستعد أكص من جلدي وأعيشج
بس نبرة العنتكة عوفيها باجر أقل شي تگولين ماما كذا ورجل ماما كذا وتقارنين يابة هاي حياتي آني فقير..
ووعد ما أخليج محتاجة شي بس حسب إمكانيتي تعلمي تعيشين على كد حال زلمتج وبعدنا بأول الطريق من هسة قرري أنتِ ممتزوجة تاجر شوفي روحج تگدرين تتحملين وضعي إن شاء الله ما أقصر ما تگدرين الله وياج..
جان معصب ومقهور يحس كلامي إهانة لكرامته آني كلت بگلبي شدعوة هيج يتحسس ترى هذا واقع..
سمعته يصيح بغضب وعرفت ديحجي ويه اخواته..
: رحمة، سعاد، فريال، سماح، فضائل.. وينجن بله أنتن گلتن لماجدة.. راح تجيبن بدلة من دلالة آني شگلتلجن ها؟
سمعت وحدة منهن تجاوبه بصوت عالي..
: صخام لسة ما تزوجت وهديت علينا أشتكتلك مو؟ لا أبد خوية ولا حاجين هيج شدعوة عليها متحزمه خطيبتك على الطلايب بعدها ما دشت بيتنا
جان متعمد يسمعني كلامهن بس وحدة منهن دافعتلي كالت..
: خوية آني ما أدافع لماجدة.. بس هي وين تعرف تحتال وتألف البنية طبيعتها متكذب الي بقلبها على لسانها..
وحدة ثانية ردت
: بلة رحمة.. أنجبي خوش وازته علينا ومن البداية تريد عزال وشرطت عليك خوية لذا أيسنا منك..
مـاجد صاح بيهن
: عليمن أيستي؟ خطار أنتن وبيت رجلج باجر وتولن وأنتِ فضائل ترى كبرتي كون تصيرين أم وتحتوين الموقف مو تخلين أمي تگول أقتراحات و تأيدونها..
آني خفت السالفة تكبر فكتله
: مـاجد.. لا تتعارك ميخالف اخواتك
رد عليه بقهر
: أنتِ بالذات تنجبين وتسكتين! أسسس ولا صوت..
شهگت هاي شنو؟ غلط عليه؟
: يـا هيج صارت..
رديت عليه وسديت التلفون بوجهه
شوية ورجع اتصل رفعت السماعة كال..
: كرريها وسدي التلفون أطيح حظج تعاركت وياهن من ورى فهاوتج حجي متعرفين تحجين أرتاحي هسة..
: شبيك ترى ما وزيتك نقلتلك الصار هن الي وزنك وغيرن بالكلام..
هنا هدأ شوية وكال
: حبيبتي تجنبي الطلايب لا تداهريهن و آي شي يصير كليلي آني أتصرف ما أريدج بالواجهة..
كتله : هاي هي أتفقنا..
كملنا ترتيبات العرس أمي أصرت إلا نحجز قاعة وحسيت مـاجد.. أنحرج حيل فبسرعة كلت
: ببالي سفرة للعاصمة ما أريد نعزم أحد نروح بالقطار الله مـاجد أمنيتي والله..
أمي جانت تعض شفة ومـاجد.. فرح وكال
: حقج وتصيرين أحلى عروس..
تدخل زوج أمي أبو حارث..
: شوف أبني هدية عرسكم أحجزلكم بقاعة المهندسين..
مـاجد.. رفض بعزة نفس..
: لا ما أقبل آني أتزوج على إمكانيتي أعذرني أستاذ..
رجع أبو حارث..كال
: زين الحكومة تسوي حفل عرس جماعي راح أرفع أسمكم..
مـاجد أتضايق لأن الحكومة هي اللي عدمت الأخوة من مرت أبوه الي ربى وياهم وكال..
: أستاذ الحكومة ما تقصر بس...
أبو حارث لح..
: ماكو بس هاي التفاتة من القائد و آنت ترفض التفاته الأستاذ وسيادة القائد؟!
بخوف بساع كال مـاجد..
: لا لا ما أرفض الله يخلي سيادته النا كلنا أبناء الوطن..
ردت اضحك من الشعارات الي كالهن مـاجد.. حسيته جر بوش..
مـاجد رضخ للأمر الواقع حتى يوفر مصاريف. وتفاجأت بيوم جايبلي هدية ثمينة كعدنا بالصالة وأمي كالعادة ما تقبل أطلع وياه مـاجد.. أنشلع گلبه وهو ساكت تالي كال:
: خالة.. ردت آخذ ماجدة.. تشوف المشتمل خاف ناقصه شي..
أمي كالت
: لعد أكوم أجيب جنطتي وألبس جبة..
ترخص يخابر راح للكلدور يتصل شوي و رجع
: خابرت نصار.. يجيني ياخذنا..
كعدت أمي رجل على رجل
: تمام لعد كومي ماما مـاجدة.. بدلي..
شوي وهورن سيارة وكف مـاجد..
: يا الله هذا هو وصل نصار يله ماجدة..
وصلنا لبيت أهله أمه من ورى خشمها تباوع وتسلم كعدنا بصالتهم باوع لأمه
: يمة أخذ ماجدة.. تشوف المشتمل أنتِ وخالة أخذن راحتجن بالسوالف والألفة
باوعت أمي صفح ورادت تكوم وياي بس أمه جرتها..
: شو كعدي أي خية نتشكر من الأستاذ أبو حارث ماقصر والله ماجد.. يمدح بي چا خية شبيج دومج معبسة أحجي سولفي..
أسمعهن وأني طلعت للحديقة الدرج مال المشتمل خارجي همزين مو بداخل بيتهم فكة منهن..
أول ما صعدت مـاجد.. باوعلي وبسرعة باس خدي أول بوسة وتقارب بسيط بيننا..
: يله أخطفج قبل لا أمج تجي أشك هم تتبعني تقطع الأنفاس علي..
ضحكت
: أمي حبابة أمك النسرة..
: أنجبي ماجدة.. عيب تجاوزي..
نظراته جانت غريبة شبي هيج يباوع يا شو خفت.
: لا ماجد نظرتك تخوف دور وجهك عني..
ضحك وجرني وحضني حيل وبدأ يشم برگبتي..
: أويلي ولج شيجيب العرس حموت مو رگبة مرمر..
طفرت من حسيت بإيده تحرشت بيه ما توقعت منه هاي الجرائة وشلون كرصني..
: ترى عيب..
جنت أرجف من التوتر ورجع هو كعد عاقل من سمع صوت كعب أمي فرني بغرف المشتمل جان بسيط بس ذوقه حلو أمي بس تباوع وتلوي بحلكها مستغربة شلون ساكتة كأنها بس تريد تخلص وتزوجني..
أشرلي مـاجد.. ودخلنا لغرفة النوم وأمه هم صعدت والتهت ويه أمي بالمطبخ كل وحدة تبز الثانية بحجاية..
أمه تعتبر أمي متحررة و آني ساحرة أبنها وأمي تدردم تكول بنتي أميرة ومكانها ويه الأمراء بس مالها حظ..
بغرفة النوم ماجد حضني وباسني بشفتي خطف وكال بشقة..
: خليهن بالمطبخ وحدة تاكل الثانية المهم آني أفترسج..
وقلد صوت نمر و زأر عليه ضحكت من كل گلبي..
: أول ما شفتج كلت هاي مرتي حب من أول نظرة..
: و آني ما أعرف يمتى حبيتك بس هيج تسللت لگلبي..
قبل لا نطلع لبسني الهدية جانت سلسلة ذهب بنهايتها حرف M ..
: هذا حرف أسمنا أثنيننا أمانة برگبتج لو تدرين شكد تعبت حتى أشتري هاي المدالية غالية تره حتى تداينت وكملت سعرها..
تذكرت المحبس الي أشتريته غالي ومصمم دون شذرة بس نقش حرف M مزخرف وقتها ضميته بالجنطه ونسيت أنطيهياه
بس شائت الصدف لبست نفس الجنطة والصدفة وي هديته طلعت المحبس ولبستهياه
: توارد خواطر بينا آني هم فكرت أهديلك هذا أوعدني متنزعه تحسني وياك بكل وقت..
نسينا الامهات الي تباوع بقهر وحقد والي مغرورة ومتعالية بنظراتها..
رفع اصبعه الي بي المحبس وباس النقش..
: شلون أنزعه و آنتِ هم القلادة دوم لبسيها..
أمه جانت تخزره من القهر وأمي أبتسمت أخيراً لأن شافت كلادتي الذهب مبينه ثگيلة وغالية..
الله يدري خطية شكد تعب حتى يلم فلوسها لو يكول تداين..
: مـاجد ليش تداينت ما اريدك تتحمل دين حتى ترضيني..
: حبيت أشوفها تزين هالرگبة..
التفتت وأني بباب الغرفة دارت عيني على الجرباية وكلت بگلبي بعد أيام هنا راح أصير مرته وهنا لهفتي لحضنه راح تكتمل..
تزوجنا بعطلة نصف السنة بوقت الربيع بحفل زفاف جماعي والدولة هي نظمت الحفل وتكفلت بكل شي نقل العرسان وأهاليهم للعاصمة والإقامة بفندق لمدة ثلاثة أيام
ماجد.. ظل يدردم معاجبه الوضع بس يخاف يرفض وأهله هم خافوا عليه من سهيل..لا يطلع مـاجد.. خاين رافس كرم الريس..
واحنا بالحفل شفته و خفت لزمت أيد ماجد.......