رواية غبار الذهب الجزء الثاني من وادي الزعيم الفصل الرابع 4 بقلم عبير ادريس
طلع برا جسمه يرجف ما يسيطر على اعصابه
يدور على الظرف بجنون كسر السنادين كام يشيل بيهم ويركعهن بالكاع تقربت للسندانة الكال عليها عواد رفعتها وطلعته من جواها تقربت منه مديت ايدي وهمست
نهيل : هذا الظرف وشمايكون بيه على كيفك وية نفسك ياخوية ما يصير تسوي هيج
اخذه مني بإيد ترجف هوة للكاع وارتاج على الحايط لازم الظرف بيده والايد الثانية حاطها فوك راسه و يعصر بعيونه ما يرديها تبجي ، لهناك وانهارت اعصابه باوعلي كال..
همام : لشوكت ابقى هيج تعبان ؟ شكد ابقى اخسر ؟ تعبت يانهيل تعبت بعدما عندي طاقة لا للجدال ولا للمطاردة ولا للمشاكل روحي تعبت اريد ارتاح اريد استقر تتذكرين من جنتي تجين لبيتنا ومرات تشوفيني ساكت ومنزوي تسأليني ليش واجاوبج معليج
هزيت راسي : اي اتذكر
همام : من هذاك الوقت واني اعافر واسعى واخطط واتعب في سبيل اعيش وية عائلتي براحة بال ، ترة ما ردت مال ولا غنى ولا منصب ردت بس نرتاح وين الكى الراحة وين ؟ اذا تشترة مستعد اشتريها والله بالعندي والماعندي
يحجي والظرف معصور بيده استرسل بالكلام
مرات تمر علينا لحظات نتعب بيها ونكول كافي لهنا وبس نريد كلشي ينتهي مو مهم ينتهي بسعادة لو تعاسة المهم يخلص ، ياناس مليت من حياتي مليت شنو صعبة واحد يرتاح يوم ويعيش طبيعي مثل العالم والناس صعبة ؟ ها نهيل احجي صعبة ؟
نهيل : لا خوية مو صعبة بس الدنيا عبالك مانة علينا بعيشتنا ما تريدنا نرتاح
همام : من اني وصغير جبتها تعب بتعب وشايل هم امي واختي وشايل هم الدنيا ربيت ابيت مليان حرام اتذكر مرة جنت بالمدرسة واريد اشتري مديت ايدي بجيوبي ما بيهن فلوس مثل كل مرة بالرغم ابوية جيبة مليان بس جان يقصر علينا بحجة اذا حرمتك تصير رجال ، طفل صغير وجعت بس عزت علية نفسي اطلب من صديقي ينطيني من لفته بسبب الجوع صارت رجفة بجسمي هزت اعظامي ابد ما انسى هذا اليوم
نهيل : نفس الموقف عشته بس بطريقة ثانية جنت اشتغل عند ناس امي تعرفهم وبيومها جانت عندهم عزيمة جبيرة كل الموجودين ناس كلاس شلون عزايمكم نفسها بالضبط ، جهزنا الاكل وكلشي على حسب الاصول اشتغلت من ساعة ثمانية الصبح امي دزتني على لحم بطني كالت هناك تاكلين ، ههه ولحد ساعة بالستة العصر كفينا الغدة وخلصت العزيمة واني ما ماكلة شي ، تعرف شنو صار ؟ اجتي ام البيت لملمت بقايا الاكل بجيس اسود وكالت اخذيه لأهلج وهاج هاي فلوس خدمتج .
اخذت منها الجيس ومشيت بيه الدنيا جانت تمطر وبدأت تصير ظلمة مرت سيارة سريعة من يمي وطشرت الطين علية وعلى ملابسي وعلى جيس الاكل الشايلته رحت كعدت على الرصيف انكث بملابسي والحركة بصدري كأنه نار وشبت بية ، بقيت اسأل نفسي ليش امي هيج تسوي ؟ ليش تذلنا ؟ شنو ذنبي اني وشنو فرقي عن باقي البنات اللي شفتهم بالكعدة ، ياهمام اني وانت وخيلاء وسديل ويمكن حتى تيام كلنا عشنا مثلما رادوا اهلنا محد عايش بكيفه ..
نزلت دموعه على خده الكعدة جانت مساجلة بس مو شعرية مساجلة بالألم ..
نهيل : اول مرة اشوفك بهذا الضعف ! خلي ببالك مو عيب الانسان يضعف عيب اذا يبقى قوي ويمثل القوة على الناس وهو بداخله هش ..
هزت راسه وصار يركع بيه بالحايط يحجي ويرجف..
همام : منو كال اني قوي منو كال اضعف انسان على وجه الكرة الارضية هو اني ، شايفتلج رجال طول بعرض يخاف من لون ؟ هسه اذا لبستي شي احمر ومريتي من يمي مستحيل اكدر ابقى اباوع عليج اكثر من ثانيتين هذا شنو تسميه ؟ مو ضعف ؟
نهيل : لا مو ضعف كل انسان عنده نقطة ضعف وعنده ثغرات بحياته تضعفه بين الحين والآخر بس مو معناها هو ضعيف وبدون شخصية ، انت تحجي هيج لان وصلت مرحلة تعبت واكتفيت من الغدر والخذلان صدكني انت قوي وقوي هواي..
همام : لج نهيل تعبت اريد ارتاح اريد احجي همي ، تشوفين هذا الظرف
هزيت براسي اي
ما اريد اشوف شنو بيه ولا اريد اعرف تيام ليش حاول يكتل خيلاء ولا اريد اعاديه مرة ثانية ، اريد اعيش بسلام اكتفيت ..
رفع ياخة القمصلة على وجهها ولف نفسه بيها
نهيل : اذا بردان نفوت جوة ؟
همام : مخنوك ما اريد افوت
نهيل : براحتك بس شنو راح تسوي ورا ما ترتاح
_بوهن ، ما اعرف
_شنو رأيك تفوت تنام وترتاح
_ ارتاح !! شوكت ارتاح عمري كله خلص تعب وترقب وانتظار حتى ارتاح فوتي نامي وراج كعدة وية خيلاء طريقنا الظاهر طويل
_ كول ياالله وكلشي يتسهل
_ كايل ياالله
تركته ودخلت جوا ، من قساوة الحياة تعلمنا هاي المواقف تكون عابرة ما نتأثر بيها ، مو بيدي تعلمت من محيطي القساوة والحجي الجارح ودائماً اكون بموقف هجومي ودفاعي وية الشخص المقابل وتعلمت اكون ند بند وياه ، مو بس اني حتى اخواتي بيئتنا علمتنا نحط راسنا براس الرجال وننتر بالحجي مجرد ما عجبنا ، محد علمنا اسلوب الرد اللطيف فقط عند اللي نخدمهم حتى يحبونا ويبقونا يمهم واسلوبنا وياهم تمثيل وهذا اللي خلانا نحقد اكثر ، اتذكر مرة اكو حارس مال مدرسة شمرلي حجاية حب وكذا عود حالي حال البنات ، ما بقيت حجارة كبال المدرسة ما شمرتها عليه ، من سولفت لخيلاء ضحكت كالت احنا مو شكولات حب وغرام احنا ما نريد اصلاً واحد يكون حنون ويانا ونستغرب اذا شفنا حنية من احد كبل نهجم عليه نحس اكو وراه غايات مو غاية وحدة..
ودائماً امي جانت تكول لتأمنون بأحد كل شخص يريد يسويلكم زين حطوا جوه زينيته الف خط لهذا نشكك بكل اللي يحبونا ويحاولون يحمونا ونكول اكيد يريدون منا شي خصوصاً اني و خيلاء و سديل جنا ضايعين وطعم سهل للقريبين والبعيدين بس احنا جنا نعرف شلون نحافظ على نفسنا رغم اللي صار جان خارج عن ارادتنا .
اني متأكدة تصرفاتهم وية ازواجهم مثل تصرفاتي لان عشنا نفس الحياة ورقصنا على نفس الجراح ..
دخلت للحمام فرشت اسناني ورجعت لخيلاء غيرتلها الفوطة واخذت السجادة فرشتها بالهول وبديت اصلي عندي فروض هواي فايتتني ، قررت من عندي فراغ اصليهن احسن ما ألتهي بسوالف ما الها معنى ، لا مسلسل طاير ولا الموبايل ولا الناس ، بس العمر يمشي مثل رمشة عين ما تحسه الا خلص واحنا ما مقدمين شي لدارنا الاصلية غير الذنوب اللي جمعناها ...
طبعاً احجي عن نفسي ما اخص احد بكلامي..
صليت وكملت غمضت عيني و گلبي صار يدك سريع من سمعت اصواتنا واحنا نصيح لا خيلاء لا ولكم ماتت ماتت الله لايوفقكم عساها بحظكم وابختكم ولك ثروان جايب جيش وياك يحمينا لو يفنينا ...
صراخي وصراخ سديل جنت اسمعه بوضوح كمت من مكاني ورحت اتبعت الصوت وصلت للغرفة بابها جان مفتوح وداخلها اظلم فقط ضوء الحاسبة مضوي وجه همام تقربت كعدت يمه على السرير جان صافن بالفيديو ما انتبه علية باوعت تيام موجه السلاح بأتجاهنا وضرب طلق وحدة منهن صارت بخيلاء وكعت بالكاع ، ترك سلاحه بالسيارة وركض بأتجاهنا ، بقى يعيد بالفيديو كل شوية الى ان طفيت الحاسبة ما نطى اي ردة فعل حسيته متخدر .
نهيل : همام مبين يدافع عنا جان وتصوبت خيلاء
همس بضياع صافن بالفراغ الكدامه : لا مستحيل تيام يخطأ صارلنا سنين طويلة سوية ونفوت بمهام بس اني وياه ما فد يوم اصاب اصابة خاطئة ولا فشلنا بمهمة ، هذا متقصد ، صحيح كلام عواد من كال انتقم لزوجته وبنته واستغل سفرتي .
نهيل : طيب ليش ما نفرض العكس ليش مو عواد استغل هاي الثغرات حتى يكدر يفرق بينكم وبهيج تبقى سديل يمه ويتخلص من تيام ومنك ، عباله من يعرف تيام بسببك تبرأ عواد وبسبب تبرأته انخطفت زوجته ويعرف تيام هجومي اتوقع يصير بينكم خلاف جبير ولا سامح الله يقتلك تيام ، شاف هذا الشي ما صار انتقل للخطة باء ومنتظر هسه ردة فعلك لا تنطيه اللي يريده لا تصير بإيده اداة سهلة.
همام : بعدين نسولف
تركني وطلع من الغرفة ، طلعت وراه واسمعه يحجي بالموبايل : مرحباً اريد اقدم بلاغ عن شروع بجريمة قتل بحق تيام كمال ، جريمته شروع بالقتل اطلق النار على خيلاء اياد واصابتها خطيرة كلفتها هواي ، لا ما فارقت الحياة ، اي نعم عندي ادلة تدين هذا الشخص راح ادزها الكم ، اعتبره بلاغ من مجهول ...
بعدها غلق الموبايل طلع الشريحة كسرها وكعد على القنفة حط ايده فوك راسه ، مكسور تعبان كاره حياته مابيدي شي اسويه واخفف عنه ، حط السلاح بخصره وطلع من البيت ، دخلت يم خيلاء لكيتها على نومتها مددت بصفها بعد الف عركة بدماغي يلا كدرت اغفى .
كعدت على صوت همام يصيح ومنهار ، فزت خيلاء على الصوت ألتفتت عليها : اسم الله حبيبتي اسم الله عليج لا تخافين هسه اشوف منو برا واجيج
خيلاء : وديني للحمام الليل كله ما تدررت
باوعتلها بأسف ما تدري هي تتدرر وما حاسة ..
نهيل : بعيوني هسه اوديج بس انطيني صبر
طلعت واشوفه يفتر بالهول ويحجي تليفون وية تيام جان فاتح سبيكر
تيام : ولك هيج تغدرني على شنو مقدم بلاغ لان ضربتك وانت تستاهلها للضربة ، بشرفك اكو واحد عاقل يسوي سوايتك ويبرأ عواد ؟ شكد نطاك ها ؟ بشكد بعتني ؟
همام : بنفس السعر اللي نطوكياه وصوبت خيلاء لولا لطف الله جان هسه ميتة
تيام : انت شكاعد تخربط
همام : مثلما سمعت ، المضموم انكشف واجه وقت الحساب ، تدري بية وحجيتلك كلتلك بعد ما اوسخ ايدي بدم واحد واريد اعيش حياتي بسلام واخذت هذا العهد على نفسي لهذا بلغت عليك وبأدلة مو مجرد كلام..
تيام : من وين جبت الادلة ؟
همام : انجابت بنص بيتي بعد شنو تريد تعرف؟
تيام : همام خليني افهمك القصة مو هيج واني متأكد عواد يريدك تسوي هيج واروح بيها لو سجن لو تقتلني حتى يتخلص مني وما اتبع اثرهم
همام : منك أله يطبكم مرض مالي غرض بيكم تعبت
تيام : ترضاها ابقى افتر بالشوارع مهزوم واسمي متعمم بالسيطرات ولك بالكوة انهزمت من السيطرة من عرفت مبلغين علية، شكيت بيك وطلع شكي بمحله ، اتنازل الله يخليك وخليني ارجع مرتي وابني وراها وعد شنو تسوي بية سوي لا تخليني بنار الله يخليك همام ابوس راسك .
سد الموبايل والتفتلي باوعلي مضيق عيونه : خيلاء كعدت ؟
نهيل : اي وتريد تفوت للحمام
هز راسه بأي ومشى كدامي اخذناها دخلناها للحمام كعدها وطلع ما ضل يمها استغربت هو مو زوجها ليش ما يبقى فكرت يستحي مني .
كملتلها وطلعت صحته اجه شالها ورجعها لمكانها على السرير كعدها وحط مخاد وراها سند ظهرها بعدها دنك باس راسها وهمس بأذنها ضحكتله ، تقرب مني بتعب
كال: سويلها اكل حتى تاخذ علاجها وانتبهي عليها ترة اني تعبان وبالي مشوش اخاف انسى وقتي الموبايل وضبطي اوقات علاجها واكلها
نهيل : تمام هسه اني ارتب الوضع ، اسويلك ريوك تفك ريكك ؟
همام : ما مشتهي بعدين
حجاها وطلع رحت للمطبج لكيته كاعد يكتب بسجل حاطة فوك الكاونتر ، فتحت الثلاجة طلعت بيض ورحت للطباخ خليت الطاوة وبديت اكلي ، التفتت عليه سألته
نهيل : عادي اسويلها جاي
همس هو ويكتب : لا موزين عليها سويلها عصير فرش
هزيت راسي ورحت طلعت برتقالتين عصرتهم ودرتهم بالكلاص ، بعدها سألته ..
نهيل : ولو السؤال خاص بس باقي بداخلي اريد اسألك
بدون ما يرفع راسه عن السجل كال اسألي
نهيل : ليش تعاملك وية خيلاء رسمي لان هي معتبرتك مثل اخوها لو شنو ؟
ألتفت علية مستغرب : اخوها شنو ؟
نهيل : هي سألتني عليك وكالت هذا اخوية
هز راسه واستغفر ربه تنهد وسكت يكمل البيده
نهيل : الي اعرفه انتم متزوجين
همام : جنا
نهيل : شلون يعني جنتوا ؟
همام : جنا متزوجين وطلكتها من ورا راسها اليابس
نهيل : تكدر ترجعها على ذمتك ؟
همام : فترة العدة خلصت
نهيل: تكدر تعقد عليها هسه وين المشكلة؟
همام : تشوفين وضعها يسمح يعني ؟
تركني وطلع من البيت ، بمذهبنا اذا الزوج والزوجة عقدوا عقد زواج شرعي مستوفي الاركان من ( ايجاب ، قبول ، ولي عند اللزوم ، مهر وشهود ) الزواج صحيح شرعاً حتى لو ما متسجل بالمحكمة ، لكن ما يكون معترف بيه رسمياً
و الطلاق بهذا النوع من العقد اذا الزوج كال لزوجته (انتِ طالق ) بلفظ صريح يقع شرعاً حتى لو ماكو محكمة ولا شيخ ، شرعاً الطلاق يصح عند المذاهب السنية ( الحنفي ، المالكي ، الشافعي ، الحنبلي )
اخذت الاكل ورحتلها للغرفة حتى تاكل فتحت الباب ودخلت .
خليت الصينية يمها وكعدت
نهيل : حياتي ناكل شوية ؟
خيلاء : وينه ليش ماياكل وياية؟
ابتسمت : راح يتسوك كم شغلة للبيت ويجيج
خيلاء: انتظره ناكل سوة
نهيل :يعني ما تاكلين من ايدي ؟
خيلاء : لا بس هو كال اني اوكلج
نهيل : يصير اليوم ناكل اني وياج
خيلاء : لا ما اريد
نهيل : زين شنو رأيج احجيلج قصة صغيرة
خيلاء : ما احب القصص
نهيل :بس اني حابة احجيلج اريد احجي كلشي بخاطري بس عليج تسمعيني ومنها نخلص وقت ضوجة
خيلاء : شكد كالج يتأخر؟
نهيل : هاي انتِ بالج شارد وياه مو وياية ؟
خيلاء : اريده صيحيه
نهيل : ماشي هسه نتصل عليه ونحجي وياه وكوليله كل اللي بخاطرج
خيلاء : يعني شنو اللي بخاطرج؟
نهيل : اللي حجيتيه هسه احجيه اله
هزت راسها بأي رحت جبت الموبايل اتصلت عليه رن قريب ما تخلص الرنة ردت اسده اجاني صوته صاح ها
نهيل : همام انت على السبيكر وهاي خيلاء تريد تحجي وياك
همام: انطي التلفون الها
نهيل : احجي تسمعك
خيلاء : الو هلو
همام : هله بروحي يكولون رايدتني ؟
خيلاء : اريدك تجي تاكل وياية
همام : يابوية روحي تريدني اكل وياها ؟ زين شنو رأيج نتفق اتفاق صغير
خيلاء : شنو احجي
_تتريكين هسه ومن اجي نتغدا سوية
_ اهو ما اريد ، نطتني الموبايل وكالت هاج ، اخذته منها سديت السبيكر وحطيته على اذني
- اسمعك
_اشتعلوا اهلي تدرين اني وين ؟
نهيل : وين ؟
همام: رايح بشغلة ضرورية وابعد عنكم مسافة ساعة ونص تقريباً والشوارع ازدحام يعني اذا ردت اجي اني والظهر زين اذا اوصل
نهيل : ما اعرف ياهمام عنيدة وراسها يابس تعرفها بعد
همام : حتى الضربة اللي براسها ما خلته يلين بقى يابس
ضحكت ، شنو سويت وية تيام؟
همام : ماسويت شي سلمت كلشي بيد الشرطة هو وياهم يتفاصل بعد
نهيل : ما خايف يسويلك شي؟
همام : اني اخاف ؟ هاي شبيج نهيل ؟ كلتلج تعبان بس ما خايف
_ يلا راح اشوف طريقة اقنعها بيها تاكل علما تجي
همام : ديري بالج عليها
- ان شاءالله
- مع السلامة
- الله وياك ، سديته منه وألتفتت عليها همست بصوت خاف وتباوعلي ، ما راح يجي هيج كالج مو؟
نهيل : راح يجيج بالطريق بس يبعد عنا مسافة يحتاجلة شوية وقت بينما يوصل
نترت ، زين زين ، حجتها ودارت وجهها على الجهة البعيدة عني
اللي عرفته من همام حسب كلام الدكتور ، اللي يفقد ذاكرته ونسى بأنه متزوج او عنده عائلة ،غالباً يظل عنده شعور عاطفي اتجاههم ومع الوقت ومع التذكير الدائم والمحفزات الصحيحة مثل (صور ، اسماء ،أماكن ) غالباً يتذكر التفاصيل المفقودة لهذا السبب هي تحن لهمام يمكن محتفظة بمشاعر داخلها اتجاهه حتى وان كانت تظهرله العكس.
استغفرت ربـــــــي باوعتلها وهمست بصوت خافت حتى ما اوترها هيج اشوف همام حجي وياها
نهيل : كان ياماكان في قديم الزمان
عقجت وجهها رادت تحجي ابتسمتلها واسترسلت ، جان اكو بيت صغير بمنطقة شعبية تعبانة مال ناس فقراء واهل الله ، هذا البيت يحتضن ثلاث وردات وحدة اسمها نهيل والثانية خيلاء والثالثة سديل
قاطعتني وكالت ، مثل اسمي ابتسمتلها وحطيت اول لكمة بحلكها ، اكلت ومنتظرتني اكمل كلامي ، عافيات حبيبتي ، المهم هاي الوردات المفتحات رغم جمالهم بس ماعندهم حظ بكل بساطة انولدوا من اب وام سيئين ماعندهم رحمة ولا محنة ومستعدين يقطفوهن ويذبلن كلش عادي المهم يسترزقون من وراهم
الكبيرة اكبر من الوسطانية بثلاث سنوات والصغير اصغر من الوسطانية بثلاث سنوات ، مواليدهم 90_93 _96 .
ذني البنات من طلعن للدنيا وشوية فرفرن بدأت امهم تشغلهم خدم عند الناس.
بس الصغيرة جانت تاخذها وياها تخاف عليها وتبقينا اني واختي الوسطانية نشتغل هنا وهنا ، جنت اصر على امي تشغلنا اني واختي بنفس المكان لأن جنت اخاف عليها كلش .
ما جنت ادري بيوم من الايام اني راح اكون السبب بأذيتهم من حيت لا ادري .
اجتي امي( اميرة ) بيوم جانت فرحانة وطايرة من الفرح وكالت لكيت فرصة شغل تخبل راح ترفعنا فوك فوك .
امي بكثر ما اشتغلت بالبيوت كامت تباوع فوك وتطمح لمستوى اكبر من مستواها .
اختارتني من بين اخواتي اروح واشتغل وياها ليش وشلون ما اعرف
توسلت بيها تخليني اكمل دراستي مثلكم ما قبلت نترتني وكالــــــت انتِ مو وجه نعمة مثل عماتج .
ما فهمت حجيها بس توسلتها
نهيل : امي اقبل ارجع اشتغل ابيت ام طلال ما راح اتذمر ابد بس لا تبطليني من المدرسة الله يخليج ماما
للأسف كلماتي جانت عبارة عن صدى ابيت مهجور تصرخين بيه ومحد يسمعج
كأنما تصرخين بالبير والصوت يرجعلج
نهيل : يعني انتِ قافلة الأ نشتغل بهذا البيت شنو عرفتي عنهم بلة ؟
اميرة : هسه انتِ وينج وين السادس مبينة ما تطلعين راس اختاري لو ازوجج لزيبك لو تروحين وياي
نهيل : ماما كل عقلج يا زيبك هذا الاتزوجه بقيني هنا منها اشتغل واجيب فلوس ومنها عيني على اخواتي خيلاء بكلوريا وسديل هم واني
اميرة : ماكو مجال للحجي لا تعبين روحج وهذا مو بس قراري قرار ابوج هم
_ ابوج ؟ ايباه اللي يشوفه يشبع ، ابوية انسان سكير وشنو نشتغل احنا وامي ياخذه ويصرفه على اهواءه من سكر وبنات ليل ، ما جنت استبعد ابوية بيوم يبيعنا اذا اجته صفقة حلوة
وجان واضح الصفقة قنع بيها امي وراح تجر رجلنا وياها
انتبهت على خيلاء بدأت تغفي باوعت على صحنها خلص ريكتها واني احجيلها ما حسيت بنفسي مخلصتلها اكل، كمت اخذت علاجها من المجر طلعت الحبوب حطيتهن بيدي وجبت كلاص المي شربتها علاجها وطلعت من الغرفة باوعت للبيت يحتاجله تنظيف مو عادي تعزيل ، ضحكت بيني وبين نفسي وين ما اروح متعوبة سبحان الله شوكت اشوف الراحة ما ادري ، بدأت اشتغل بالبيت وبنفس الوقت عيني على خيلاء كل شوية افوت اشوفها من غير بالي يم سديل شنو وضعها بيا حال هسه هي من يرجع همام ضروري اسأله عنها واشوف شنو ناوي يسوي اذا تيام فات السجن معناها سديل بعد ما نشوفها بحياتنا
مر وقت واني اشتغل اتصل همام وكال لا تسوين اكل راح اجيب وياية ، فرحت خلصني شوية من التعب لأن بالفعل خلصت طاقتي اداري جروح الناس ومحد داري بعلتي ابني بعيد عني والحادثة اللي صارلتي ما تروح من بالي كلما اتذكرها اشمأز من نفسي سارحة بأفكاري انفتحت الباب دخل همام تلكيته اخذت الاكل من ايده ، الله يساعدك
همام : ويساعدج خيلاء شنو وضعها ؟
نهيل: نامت
همام : اكلت ؟
نهيل : اي
همام : شلون قنعتيها ؟
نهيل : بعد اقتنعت واكلت
همام :عليها بألف عافية
نهيل : الله يعافيك
تركني وراح للغرفة يطل عليها بعد دقايق رجع كعد بالمطبخ على الكرسي باوعتله تعبان ومبين روحه بخشمه
نهيل : تتغدا ؟
همام :لا وية خيلاء من تكعد
نهيل : همام تعرفني لا ألف ولا ادور
همام : وهذا اللي يريحني احجي شعندج؟
نهيل : وضع سديل كلش قالقني شنو ناوي تسوي حتى ترجعها ؟
همام : اصبعي مابية احركه
نهيل : شلون واختي شنو مصيرها؟ عوفك من اختي تعالي كولي انت ليش ساعدت عواد وبرأته شنو اللي صار
همام: شي اكبر منج ما تفتهمين بيه
نهيل : عشت وياكم سنين طويلة واعرف الاكبر مني والاصغر
احجيلي راح افتهمك
همام : واذا مـــــــــا حجيت ؟
حجاها وباوعلي معصب
نهيل : ما اجبرك تحجي بس لو خيلاء بعقلها مستحيل تخليك لحظة متهني اذا ما ترجعلها سديل وانت تعرف كلش زين شنو سوت علمودها ، همام احنا طلعنا من الدنيا بخوتنا ما عندنا شخص نزايد عليه لو نعيش سوية لو نموت سوية
همام : هلمرة الشي اكبر مني وما اريد اوسخ ايدي بالدم واذا دخلت بهذا الموضوع راح اوسخ ايدي
نهيل : وسخها هالمرة اذا مو لخاطر سديل لخاطر خيلاء
همام : سويت هواي وتعبت ماعندي طاقة افوت حروب جديدة خصوصاً اذا جانت لصالح تيام
نهيل : بس هاي اختي للمرة الألف اكولك هاي اختي اذا تحب تسوي سويها لخاطر من خاطر ياهمام
همام : اجلي الحجي بهذا الموضوع تعبان
نهيل : زين ممكن اعرف ليش برأت عواد ؟
همام : لا حـــــــــــــــول ولا قوة الأ بالله العلي العظيم
نهيل : تعرفني ما راح اسكت الا اعرف واذا انت ما حجيت اعرف عن طريق مصادري الخاصة
ضحك مستهزء
همام :ليش ضلت عندج مصادر ؟
نهيل : ماكو واحد يخلى من العلاقات
بنفاذ صبر فرك وجهها وكال
همام : هسه شرايدة ؟
نهيل : عواد ليش برأته ؟
همام : هذا اللي جان لازم يصير
نهيل : واﻷ؟
همام : ما اشوف ابني بعد
نهيل : هددك بآدم ؟
هز راسه بأي
نهيل : وين لكاه؟
همام : شنو وين لكاه ليش هو من سافر مو سافر لبنته
نهيل : اي وشنو صار بعدين من سافر ؟
همام : خابرني وكال اذا ما برأتني وحجيت اللي اريده وتسجل كلشي صوت وصورة بتبرأتي من هاي التهمة ما راح تشوف ابنك زور جنسيته وجوازه وسمه ابني بأسمه برأيج شنو اسوي ويريد
يطلع لدولة اوربية
نهيل : بنته تدري ؟
همام : منو سارة ؟
نهيل :اي
همام : ابوها اكيد عندها علم بسوالفه بس من سألتها نكرت بعد يم الله العلم
نهيل : شنو طلب منك بالضبط ؟
همام : راح احجيلج بس حتى اخلص من النك ، لان اعرفج ماراح تفكين ياخة مني الا تعرفين كلشي
نهيل : تربيتكم
باوعلي وكال تصوري تيام مددني بالكاع ودك بوكسيات ما حجيتله ولا رفعت ايدي دافعت بيها عن نفسي بس مال اتحمل نك لا اطك واموت هسه
نهيل : احجيلي حتى انت ترتاح واني افكر بحل دام انت تعبان
همام :خابرني وشوفني الجوازات انطفت الدنيا كلها بعيوني ما جان عندي خيار غير انفذ اللي يريده
عواد : هسه شنو كلت ؟
همام : شنو المطلوب
بضحكة كال
عواد : هسه حلوت الدنيا اسمعني زين ابن اخوية كل التهم تبرأت منها ولبستها لناس فقراء مقابل عوائلهم تعيش
همام : شالو الليلة قصدك؟
عواد : بالضبط بقت بس سالفة خطف البنات واني جبتهم للوادي اريدك تبرأني منها وتشيلها انت
همام : شلون اشيلها اني وما عندي اي علم بيها ؟
عواد : بسيطة اني اكولك شنو تسوي وشلون الك علم بيها
همام : احجي بلة واختصر ترة لعبانة نفسي منك حيل
عواد : ولا اني عاجبني اطول وياك ، اسمع تروح للبنات سديل وخيلاء تقنعهم باللي احجيلك عنه ومن بعدها تاخذ وحدة منهم وتشهد على كلامك ، واللي سويته انت جان بدافع الحب لا غير
همام : بس اني فعلاً احبها لخيلاء من زمان وما راح اسوي اللي تريده اذا جان بيه اذية لمشاعرها
عواد : معناها خلص الكلام وابنك ودعه هاي اخر مرة تسمع صوته بيها
همام : انتظر اسمعك احجي
عواد : تكول لخيلاء اني اعرف كلشي عنكم من يوم امج اشتغلت يمنا وبدأت تأذي امي كمت اتحرى عن واحد واحد بيكم وجمعت معلومات كافية وبقيت مراقب الوضع لحدما عرفت بزواجج من ثروان تجننت واعرفه راح يأذيج ردت اخلصج منه ورسمت خطة معينة
همام : انت تعرف كلش زين من سمعتها تزوجت كفيت نفسي عنها بعد شلون راح تصدكني بكل هذا التسفيط والجذب
عواد : تصدك تصدك المرأة عقلها صغير بحجاية تتقشمر
همام : هاي اللي يمك مو النسوان المعدلة
عواد : على العموم معلينا ، اريدك تكول اعرف زوج سديل وراح انطيك معلومات كافية عنه وعن يوم الحادثة وتكول عنده سوابق بالجرائم والحشيش ،خطفته وهددته وطلبت منه يطفش سديل
بطريقة يحسسها بخطورة الرجعة لبيتها
همام : متأكد انت سويت كل اللي حجيته وخطفت الولد وهددته حتى تنهزم سديل ومن باب لباب توصلك
ضحك ضحكة طويلة وكال
عواد : شنو اسوي عاجبتني
همام : وشلون راح تصدكني خيلاء وهي تعرف اني جنت مختفي اربع سنوات
عواد : ارجع واعيدلك تتقشمر بكلمتين ، نكمل ، تكول اتفقت وياه على يوم جان عندكم مناسبة وهروبج راح يكون اسهل بنص هاي الهوسة ولو تركزين وتعصرين دماغج تتذكرين وجه عواد لأن جان معزوم بالحفلة وانت هنا ما كذبت اني فعلاً جنت موجود بالحفلة
همام : رحت حتى تأمن على مخططك يمشي صح
عواد : تعرفني ما احب تفوتني فايتة ، وحتى تقنعها لخيلو اكثر تكوللها من اشتغلتوا بالمعمل مال خياطة والولد اللي اجاكم وشمر الرقم لسديل واخذكم لصالون التجميل للمرأة الكبيرة اللي بسببها انطردتوا لطيبة وللكوفي هاي كلها خطة منك حتى ترجعها لحضنك
همام : وشلون راح اقنعها مو اني اللي خطفتها من الكوفي عواد راح تخبلني
عواد : سهلة تكول جنت مخطط على اساس شخص يدخل للكوفي ويتهمكم بايكين ويخيركم ابو الكوفي لو يجيب الشرطة لو تنطردون بدون راتب وترجعون اللي سرقتوه ومن خلال الكلام الولد يتنازل عنكم ومن تنطردون تكون سيارتنا جاهزة تاخذكم واطلعكم تهريب واجيبلج تينا بس عواد جان اسرع مني بهاي الخطوة واخذكم جابكم للوادي
همام : شلون راح اقنعها اذا اني ما مقتنع اساساً
عواد : هاي مرتك وانت اكيد تعرف مفتاحها وين ضلت يمك بعد
همام : رحت حجيت لخيلاء وبصعوبة قنعتها وراها حجيت وية سديل واخذتها للمركز تنازلت عن كلشي يخصها
نهيل : وخيلاء ما تدري باللي صار مو؟
همام : لا ما تدري عبالها اني خططت وخربت حياتهم واني اللي وصلتهم لهذا الحال وبعدت بنتها عن حظنها واني كل ذنب ما الي بكل اللي صار اصلاً انصدمت من شفتها بالوادي
نهيل : وشلون ما انسجنت اذا اعترفت على نفسك وبرأت عواد ؟
همام : محد مشتكي علية وسديل حجت للضابط عن زوجها وعن تحشيشه ونطتهم عنوانه واني حجيتلهم عن ثروان وسوالفه بوقتها جان موقوف عندهم وشغلته تازة بعدها ، هذا كل اللي صار
نهيل : وترك ابنك وفه بوعده لو غدرك ؟
همام : تركهم هو وسارة بمصر ورحت سافرتلهم ومن تصوبت خيلاء رجعت اني وآدم
نهيل : عقلي راح يوكف سوة كل هذا الشي حتى بس يحصل على سديل شكد مريض ، زين خيلاء ليش خرب حياتها معقولة اتفاقية بينه وبين ثروان ؟
همام : كلشي توقعي لعد بيت مليان ناس وحرس هيج يسمحون لخيلاء وبنته يطلعون بسهولة وفوك هذا كله السايق يطلع يعرفهم ويعرف وين يوديهم بربج هذا الشي تعقليه اكو شي اكبر من اللي عرفناه
نهيل : عقلي راح يوكف شنو من بشر هذا ؟
همام : لهذا السبب اكلج تعبت ومابية بعد افوت بحروب خسرانة وية عواد وسمعان
نهيل : وراح يتركوك ؟
همام : ما اعرف ، كومي خلينا نتغدا صار وقت علاج خيلاء
نهيل : يو نسيت
اخذنا الغداء لغرفة خيلاء تغدينا سوية بعدها اخذت علاجها ودخلناها للحمام سبحت رجعها للسرير كعد يمها ماكو دقايق ورن موبايله جاوب قمر عمته الصغيرة
همام : ها قمر ؟ هم اتخربطت ؟ شنو سالفتها ليش ما تقبل تلتزم بعلاجها ؟ تمام جاييكم مسافة الطريق
غلق الموبايل والتفت علية كال
همام : رايحلهم الحجية تعبانة عينج على خيلاء والباب ما ينفتح لأي واحد
هزيت براسي اي وطلع ، بقيت يم خيلاء الى ان رجع واتفاجئ ما راجع وحده ، وياه امه الحجية وقمر وآدم ، فتحتلهم الباب بهتت من شفتها باوعتلي بنظرة اعرفها كلش زين وعرفت جيتها مو سببها تعب لو مرض جيتها هدفها اني واخواتي ....