رواية خطايا واجتثات الفصل السادس والعشرون 26 بقلم نور علي البصري

رواية خطايا واجتثات الفصل السادس والعشرون 26 بقلم نور علي البصري 

خايف اخسره..

أُمداي شگد غشيم

هو شباقيلي حتى اني اخسره؟ 

چنت اعاتب باللوكت عرفني بيك

وهسه مِن خلاني اعوفك اشكره

غلطة الشاطر بألف واني اكتفيت

وراح اضل كل عمري نادم ع الجرح.. 

ـــــــــــــــــــــــــــღــــــــــــــــــــــــــــ

جرني ويسحل بيه ومرته وراه تشهك وتلطم تكمز مثل المخبلة وهو يجرني يريد يبيع شرفي النذل ظليت أتصارع وياه بكل قوتي بس هو جان أقوى سحلني من شعري وشمرني بوسط الصالة.. 

: هي الك.. بس المقابل تعرفه..

خلا كمال الكأس عالطاولة وكام يتقدم بأتجاهي لزمني وسحب رأسي وبدأ يشم بشعري وبرگبتي ظليت أتلاوى وياه أقاوم أموت ولا أحد يلزمني لو أعرف أنتحر.. 

شلت مخدة القنفة وضربته بيها حيل ومن كد ما جان مخمور وما متوازن ترنح ووكع بالكاع وهو يغني بصوت يرجف ومنتشي بخموره رفسته بكل قوتي بين رجليه هذا يأخره عني حتى أشرد.. 

فجأة ضربة غدر أجتني على رأسي من وراي أكيد هذا الإسمه أبوية بلحظتها دارت الدنيا بيه وصار كل شي غواش دوخة وألم اخترق رأسي وكأنما قسمه نصين ووكعت بالكاع جثة لا حس ولا نفس.. 

ثواني ما فات وكت هواي و رشة مي  على وجهي أنتفضت جفلت بخوف وفتحت عيوني و آني أصرخ.. 

: وخرررر لا أقتلك..! 

أشوف الشي كدامي أثنين الرؤية مغوشة رأسي جان يضرب علي مثل الطبل ألم مو طبيعي ثولني وخلاني ما أجمع أفكاري الصدمة منا ومنا الضربة اللي على رأسي دوخة مو طبيعية.. 

بس وسط هالضجيج والدوخة فزيت على صوت رج المكان وهز كياني صوت جدي.. ما أدري منين طلع ولا شلون وصل بهيج وقت.. 

صوته جان مثل حبل نجاة انمد لغريق بنص طوفان توبيخه الغاضب ونظراته الشرسة بأتجاه لـؤي.. كأنما هو أبوي.. و خايف علي واليحميني واليسندني

صاح جدي بنبرة هزت الحيطان.. 

: لوين تريد توصل بيك النذالة بعد يا لـؤي.. كلما أشوف سوايتك أندم على يوم اللي طاوعت بي التفات.. وأخذت قراري شكد نادم يا الله شكد نادم.. 

​رد عليه بابا بصوت خشن نبرة جانت خالية من أي ذرة احترام أو تقدير لشيبة جدي.. صوت كله قسوة وكأنما ديحجي وي عدوه مو وي أبوه وكف بوجهه بكل عين صلفة وكال..

: دتعيرني؟ ها أنتم كلكم راح تتندمون بس أنتظر وشوف ناري شلون راح تحرقكم واحد واحد وكلمن راح يجي دوره يا حجي.. بس أنتظر.. 

: بحالة وحدة بس تكدر تسوي اللي تريده بيوم اللي أموت ذاك الوكت اعتبر الساحة إلك بس طول ما بيه نفس آني لك بالمرصاد.. 

جانوا يتنابزون بالحجي فوك رأسي و آني واكعة بالكاع عيوني مغوشة بس أذاني جانت تسمع كل كلمة مثل السكينة اللي تنبت بگلبي.. 

الضربة اللي برأسي خلتني مصفنة بس أحاول أستوعب اللي ديصير بابا؟ سندي؟ اللي جنت أشوفه ملاك يوم عن يوم كامت تهتز هالصورة داخلي.. 

يطلع رايد يسلمني لـ مسؤوله؟ هيج بكل بساطة؟ وين الغيرة؟وين الشرف؟ لهالدرجة الحقد والانتقام من أمي أعمى عيونه لحتى يحرگني بناره بس  يچوي گلبها بيه..

 بس هو تناسى آني أمي وأخواني أصلاً تبروا مني ديحاربني وينتقم مني لشيء آني أصلاً ما دأفهمه ولا أعرف شنو هو ذنبي يعني أمي خلاص دمرتها وسمعت صارت بيها حالة نفسية.. 

لشنو هسة جاي تدمرني إلي؟ بس خليني أفهم هل كل هذا الانتقام لأن أخذت حبيبي دون موافقتك معقولة؟ ميوصل بيك الحقد تبيع شرفي لأجله.. 

أنكساري وخيبتي جانت أكبر من جرح رأسي لسنين و آني أدور على ملاذ الجأ اله ورسمت صورة نقية لهذا الملاذ بوسط خيالي.. 

بس الصدمات الأخيرة غيرت كل شي الهالة اللي جنت أشوفه بيها الصورة النقية تلوثت بغبار الحقيقة المرة أبوية فاسد قاتل وكل الشر بي أبوية صار الشيطان بعينه.. 

​كمت من الكاع وآني أعدل بروحي أيدي ترجف وعيني ما فارقت أبوية أخزره 

أحس بخذلان السنين كلها متجمع بصدري خذلان لما يكتشف إن الحصن اللي جان يحتمي بي ويظنه أمانه طلع هو السجن والجلاد بنفس الوقت.. 

ولك عرضك.. آني جنت أريد أصرخها بس صوتي جان مخنوگ بالعبرة والألم برأسي منعني أحجي ​المشهد كدامي تحول لغابة من العنف.. 

بابا تهجم على مرته رنا.. يغلط ويصيح بصوت مرعوب من الفضيحة.. 

: هاي سوالفج مو أول مرة تخلين هذا يجي يخرب كعداتي لج عوقت لسانج وما تبتي متجوزين الظاهر حنيتي أرجعج للسرداب أحبسج وأقبرج هناك مجنونة.. 

من كلامه عرفت بابا جان واعي مو سكران لدرجة الفقدان وهذا اللي زاد الوجع وجعين يعني هو بكامل قواه العقلية وبكل برود راد ينطي بنته قربان لمنصبه القذر؟ يا عار هذا اللي شلته على كتافي يا أبوي.. 

جدي دفع بابا بعوچيته وهو يرجف من القهر.. 

: ولك لـؤي..

جدي سكت غصت الكلمة بحلكه وهو يشوف مسؤول أبنة طينة من السكر كاعد يغني ويمدح بالنظام.. 

بابا يدفع بجدو ويصيح متوتر خاف المسؤول يحس شيحجون رغم سكران طلع جدي برى الصالة للهول العائلي وهناك تعاركوا 

: أطلع أخذها ههههه نقذتها مني مو؟ مثل ما نقذت أمها مني أكرهك بوية أكرهك وتعرف ليش أكرهك من صغري  

ولك هنا نار بگلبي منك ما تطفى.. 

بس الله عاقبك وأخذ شاكر ههههه شاكر الملاك المنزه من الخطايا مووو؟ و آني  الشر الشيطان اللي يدور بمحيط أفلاكم ويجتثكم من الأعماق واحد واحد.. 

رجفة أخذت جدي.. وهو يهدده.. 

: أستجن ولا تهوبز يا لـؤي.. دربالك بعد تأذيهم لا رنا.. ولا ولدها فاهم؟ 

وكف كدامه و لزم بياخته وكمل.. 

: أما مـاجدة.. بس تنمس شعرة من راسها أنت تعرفني زين و تثق بيه شگدر أسوي لو ما تثق؟ 

أگدر أمحيك من الوجود ولامهن عليك وحدة وحدة لتخليني أطلعهن وأنسفك نسف اللي مسكتني عنك لحد هسة هي مصلحة مشتركة مقابلها ساكتلك دربالك بعد زين.. 

صاح لـؤي.. بغضب

: خليها ببالك آني أقتلك بيدي قبل لا تدمرني وتدمر سمعتي مفهوم؟ وليش بعدك عايش على حنينك لشاكر وتمدح بي كدامي تريد أدزك يمه تسامرون سوى ههههههه يا ضيم العيشتني ياه.. 

تجاهل جدي يباوعله وعيونه تلمع بدموع القهر و الوجع همس.. 

: لتلوث اسم شاكر بلسانك يا خسيس شاكر طاهر ومات شهيد لأجل الوطن بس أنت شنو اللي دتسوي أنت دتهدم الوطن بفسادك ونذالتك.. 

 التفت الي وكمل جدو.. 

: جيبي جنطتج يله خلصيني مليون مرة كتلج تبقين يمي بس أنتِ كلش غبية ومع الأسف الغباء وراثة بهالعائلة بساع تصدكون عالفطرة عايشين تمشي بالنيات لو الثمن؟ شنو هااا الثمن..؟ 

سكت وما كمل ظل مقهور وهو يرجف كوة كاض عوجيته رديت عليه بشهكة شكت صدري..

: جدو ردت أجي بس هو ما خلاني أجيكم ما أدري شلون صدكته وهو سجلني مبلغ سري عن بابا سـهيل.. أي حقك تكول غبية بس هددني ولمح يعدم مـاجد.. و أنت تعرف مريت تجربة بابا سـهيل.. 

صرت أخاف جدو والله أخاف أفهمني عفية دوم يخليني واجهة أعماله و آني صح غبية بساع أتقشمر بس هاي المرة رجلي بخطر يعني هاي المرة مو غباء حماية لرجلي وأهله.. 

كلت هو يريد مضيفه وعوائل جماعته تحضر وسبق سواها وجالسناهم آني وحماتي وياي جلبت الا تجي و آني شايفة الحفلات الخيرية و الندوات معبالي كعدة سرية وخاصة وشايفة التجمعات والعزائم بين عوائل الرفاق والمنتسب للأمن والاستخبارات.. 

نسيت تربيت ببيت منو ومتعودة هيج زيارات ورنا.. خرسة وجودها ميخدمة لذا قبلت كلت هي كعدة وي عائلة رجال بالدولة متضر متوقعت اااخ..

​بجيت بحرگه على بابا سهيل. الشخص اللي رباني وتصورت يوم من الأيام  يريد يحرمني من أبوية طلع هو اللي يحميني من هذا الوحش شكد ظلمته وشكد جانت أمي شايفة من هذا النذل حتى شردت بجلدها وخلفت وراها بس الذكريات السودة وطفلة ضايعة بينهم ​

جدي باوع لرنـا.. اللي جانت واكفة ترجف بمكانها وصاح بيها بنبرة مليانة حنية وقوة.. 

: رنا.. بنتي لمي مستمسكاتج والجهال وبساع امشي وياي أتركيه لهذا هذا ما منه نفع والله مسكينة أنتِ وهذول الأبرياء شلون بقوا بين أيدين هذا الحقير كل هالوقت.. 

رنا.. جانت تباوع بذهول ممصدكة إن باب الرحمة انفتح گدامها أخيراً.. 

والتفت لبابا بتهديد هز أركانه.. 

: إلى متى تبقى عار مو من مصلحتك تعارضني فاهم لو لا؟! 

: حجيي وين مأخذ؟ مرتي وجهالي حجي مو من حقك أبد.. 

: وأتركهم بين أيديك؟ عازم مسؤولك وكعدات شرب بنص عائلتك وفوكاها تريد تقدم حفيدتي هدية لكعدتك ولك أمحيك من الوجود بس جرب..

: حجي.. كلامك هذا يوديك بتهلكة دتتهم رجال الحكومة بالفساد والزنا والتحارش هذا الكلام يوديك للمشنقة لو كمال سمعك والمشكلة كمال سكران وهذا بس يسكر يفقد

وهم لأجل عيونك طلعتك بالهول بعيد عنه خاف يفهم شنحجي شفت شلون أخاف عليك؟ هههههه إحمد الله أنت بحمايتي.. 

: بوية.. كلشي بيدنا و بمقابلة.. و أنت فاهم قصدي زين.. 

​حجاها وأخذنا وطلع يمشي وأحنا وراه بس جان يدردم بصوت ناصي والله لو ما الفضيحة جان طلعت المستور وفضحته باللي ضامه عليه.. 

يمكن جان من صالحي إن جدي شال وكعد بمنطقة بابا اللي صار جاره لبيت سهيل بمسافة كم بيت بس حتى  براحته يخطط وينتقم و أنتقم فعلاً.. 

​لو ما جدي قريب من رنا.. أستنجدت بي ومخليه أبنها يطلع يصيحه ويجي بساع جان هسة آني خسرت شرفي.. 

جدي يمشي ودموعه تجري يعاتب حظه ويعاتب الدنيا اللي أنطته ولد عاق وعار مثله.. 

رنا.. تمشي كدامنا لازمة أيد جهالها وتبجي بصوت يكسر الصخر والجهال يرجفون من الخوف.. 

: ماما ليش طلعنا بابا يكتلنا بالكهرباء.. 

​بذيج اللحظة جريت نفس عميق رحت للطفل لزمته وحضنته ردت أحسسه بالأمان اللي فقدته آني بذيج الليلة ليلة السقوط من عين نفسي قبل ما أسقط من عين الدنيا.. 

بيت جدي جان ركن بنهاية الفرع وگف جدو والتفت لؤي.. جان بعده بمسافة كم بيت بس ضوء البروجكتر جان يعكس عليه ويظهره مثل كتلة لهب من بعيد حسيته نار حقد ممكن يوم من الأيام تحرگنا.. 

حسيت رنا.. خافت والتفتت إله جانت مثل مغناطيس يأثر بيها من بعيد ويرهبها بس آني لزمت إيدها بقوة وفوتتها داخل حديقة جدي وتبعونا الجهال وجدو دخل وسد باب الحديقة وهو يحاجي رنا.. 

: لا ترجعين مليون مرة گتلج آني أساندج عوفي سبق وساندت هـديل.. وما أتعاجز منج يا بنتي هذا العاق المريض ما يستاهلج ولا يستاهل هاي الذرية هذا أنتقام وكله من أم ريمة.. 

بيبي الواكفه سمعته.. 

: وشبيها أم ريمة؟

ركضت حضنتها و آني أبجي نزلت بيبي إيدها عني وصار جدي بوجهها عيونه تجدح نار وصوته بي رنة حزن وقهر السنين التفت عليها وگال بصوت مخنوگ بس حازم.. 

: خليني ساكت مو ما أريد أحجي هو هيج وهايج النذل لو حجيت يمحيكم كدامي.. 

صاحت بعصبيه تعاركه تريد 

: أبو لؤي.. أنت صدك ما عندك حظ وبخت.. 

: حظ وبخت يا ألتفات.. هاي آني؟ اللي ما عندي حظ وبخت ولج المصايب اللي إحنا بيها هسة منين؟ غير لأن عندي حظ وبخت وطاوعتج.. 

سكتت وهي تتهرب منه..

: الأفضل تسميني أبو ريم.. أو بإسم أبني الشهيد ما أتشرف بلؤي..

جر حسرة وصوته تحشرج 

: كول ما أتشرف بي..

خابرني يبجي شاد وياه دومك تقسي عليه رجع المرة والجهال لبيتهم.. 

: من خابر ما حسيتي بنبرة صوته؟ شارب أبنج يا هانم شارب ومسوي كعدة شرب وخمر وجايب هاي المسكينة تونس كعدتهم..

و أشر علي..

: أنت تكرهه تريد الصدك لو أبن عمه الكره يخليكم تألفون ضده قصص سودة علي وليدي الليلة ظل وحده ببيته.. 

ضحك جدي و غمها.. 

: صچيچة من أكول الغباء بهاي العائلة  وراثة دخليني ساكت لا أفتح دفاتر القديمة كدام البنات.. 

سكتت هي من تهديده ودخلت للبيت تدردم أو يمكن جانت تحاول تقنع نفسها إن ابنها مظلوم حتى لا ينهار عالمها..

باوعت للتوأم.. جانوا متمسكين بهدوم جدي ويرجفون مثل السعف دخلنا للبيت ورنا.. جانت واگفة بالهول وجها أصفر وعيونها مقعرة من التعب.. 

باوعتلي ولأول مرة شفت بعينها لمعة تمرد وابتسامة أول مرة تحضني بكل قوة شكد جنت أفهم الناس بصورة معكوسة تصورتها تكرهني وما تريدني أدخل بيتهم، طلعت تحميني من الشيطان اللي جانت عايشة وياه.. 

جرتني بيبي ضربتني.. 

: بت هديل.. ام المصايب من وراج بت هديلة ال **** 

فشرت كلمة قبيحة على أمي.. 

: و أمج لو  ما **** ما خلفتج.. 

صاح جدي

: أنجبي ولج أدب سز.. 

آني بذيج اللحظة الألم ببطني وبظهري صار ما ينحمل و الدنيا بدت تفتر بيه وصرت ما أستوعب شيحجون كل فكري جان يم لـؤي.. وصدماته 

معقولة واصل لهيج مرحلة؟ معقولة السلطة والسكر والفساد مسحت من گلبه حتى ريحة الأبوة.. 

​جدي حس بيه راح أوگع سندني بسرعة وصاح على بيبي.. 

​: كافي تدردم عاد شوفي البنية راحت من إيدينا بدال ما تضربيها شوفي شبيها هاي أمانة..

​باوعت لجدي وأني أنهت:

: جدو.. مـاجد.. فدوة لحد يگوله باللي صار أخاف يوصله الخبر إذا عرف والله يحرك الأخضر واليابس على رأسي.. 

​جدي دنك  على رأسي وباسه وكعدني عالقنفة وبهمس مسموع بس إلي..

: افاا وافضح حفيدتي ولج أنتِ روحي بالدنيا آني وياج لحد قطع النفس لو متت عود هنا خافي مدام عايش آني ماكو خوف هسة لازم ترتاحين ورانا ليلة طويلة.. 

ولـؤي.. مراح يسكت والله تخيلت البروجكتر اللي جان واگف جوه خياله مرسوم على الحايط مثل جية عزرائيل أكيد راح يرد على تدخلي ببيته الله يستر منه.. 

راح لبيبي و هو يعاتبها 

: ضايجة على السرسري مو؟ بلكت ضجتي بيوم الجابولي شاكر ملفوف بالعلم بلكت ضجتي على هذول المرة معوقهه تدرين وساكتة.. 

و كلنا سكتنا على جريمته بحقها والجهال سابيهم سباية محول بيته معتقل ويطبق بي أنواع التعذيب 

النفسي وجسدي بحقهم.. 

وكملها الليلة من كاعد يشرب وكدامه بنته تصارع مسؤوله تلاوى وياه وتدافع حتى تحمي شرفها من نجس بايع ضميره مثل هيج شخص أشبهه 

بـ عضو فاسد هذا يستلزم البتر والله  خايف يجي يوم وأشرب من دمه وأقتله وأخلص الناس من شره.. 

​وهي تبجي دموعها جانت حارة ومحملة بصدمة ما تنحمل ممصدكة حقيقة بابا.. شفت حالها وأنعصر گلبي لأن بيوم من الأيام جنت بمكانها جنت مثلها ما أصدك أي حرف ينكال عليه وأكول ذولي يتبلون عليه ويحقدون.. 

جانوا ينبهوني و آني مغمضة عيوني وعقلي هسة من أشوفها أشفق على حالها ما تعرف حقيقته المسمومة ولا راح تصدك بسهولة أبنها اللي تتفاخر بي هو نفسه الي يتوعد بدمار أهله..

ت​دنيت يمها وهمست بصوت مخنوك

​

: بيبي سمعيني آني مثلج ياما حجولي عنه ومصدكت جنت أشوف بي الأب المحروم من ضناه المظلوم اللي الدنيا جارت عليه.. 

جان ماكر ثعلب يعرف شلون يغسل دماغي لدرجة صرت أسلمه معلومات و آني الممنونة بدون ما أحس بغايته ولا بنفسي شجاي أسوي 

جنت مجرد غاية بحياته وسيلة رخيصة حتى ينتقم من ماما وبابا سهيل وحالياً أوف حالياً صرت وسيلة يتاجر بشرفي للي يرفعه كرسي أو ينطيه منصب أكثر.. 

تقبلين حفيدتج تصير بلا شرف؟ صدكيني يا بيبي هذا الجانب البسيط من بحر الشر اللي غارك بيه أبنج.. 

​بيبي لطمت على صدرها وصاحت بحركة..

: سودة علي يمة لـؤي.. عشت مظلوم طول عمرك وهسة أهل بيتك عافوك؟ ولكم ولية خو ما ولية وليتنه شنو؟ 

متفقات عليه أنتِ ورنا عليه.. 

يمة يمة الجذب شلون بنات يألفن قصص شلون تألفن ها حجي أنت من الأول تدور حجج وذن رتبنها أوهمنك بالسالفة كلها تتهم لـؤي.. ولا أصدك كذبكم.. 

​التفتت على رنا.. وعيونها تجدح نار.. 

: ولج بت الفكر نكارة فضل مو طلعج يا رنا من واقعج الفكر ورفعج درجات؟ ومن ماتوا أهلج وفقدتي نطقج أن شاء الله ما رجع وتبقين خرسة للموت! 

نسيتي أفضاله عليج تقبلج بعوق لسانج وما جاب عليج ضرة عيشتي محروم من حياة طبيعية وكلما يحجون وينصحوه تزوج يردهم ومينطي بيج و يكول

الرجال يتحمل أمراض مرته حتى لو جانت مخبلة ولج مخبلة وقبل بيج جان يكدر يشمرج للشارع ويجيب أحسن منج تروحين توزين بنته عليه؟

​رنا جانت ترجف بس آني وكفت بوجه بيبي وصحت. 

: بيبي ماوزتني المسكينة نقذتني.. 

​جدتي جانت تحجي وتنفض من العصبية وجدي كاعد بصفها قابض على عوجيته بكل قوته لدرجة عروق إيده برزت وجهه جان يفسر ألف كلمة وكلمة بيبي كملت بصوت يرجف.. 

: شكد ما تخافون الله بس بي حوبة ترى وكيفكم.. 

​هنا جدي نطق وصوته جان مثل الرعد كسر هدوء البيت.. 

: سمعيني أم ريمة لـؤي.. مات من يوم العرفته شنو.. من يوم اللي كشفت الغل والغيرة داخله ولج مات بالنسبة الي من يوم.... 

وسكت.. ​سكت جدي لحظة بلع ريگه المر وكمل.. 

: من يوم اللي سلمني شاكر ملفوف بالعلم..

ظل يبجي وينوح.. 

: بوية يشاكر بوية وجعة بصدري هنا يا بوية اااخ.. 

وسكت يناشغ ويجر نفسه..

: ​ولا أصدگ حجيهم العدو ردنا نتأسر وهو جان عالخطوط الحمراء إحنا سوينا انسحاب وهو أنتحر قبل لا يتأسر ما راد يوگع أسير فگتل نفسه الحكومة اعتبرته شهيد لأن مات وما سلم روحه للعدو بس آني ما اقتنعت بالقصة سكتت لأن مبيدي شي وفضلت سكوتي لسبب ثاني.. 

حسيت ببرودة جمدت دم بعروقي هذا هو سبب المشاكل والزعل والقطيعة بين لـؤي.. وجدي والله يعلم بعد شكو ضامين؟ وشكو أسرار ثانية.. 

​: ما أكدر أخذ حيفي منه هذا مجرم ما عنده مانع يكتلني ويأذيج لا تأمنين بي يا أم ريمه.. لا تأمنين.. 

عشنا ليلة من المخاوف كلنا سهرانين بالصالة ننتظر لـؤي.. راح يرد علينا برد قاتل وقاسي لو راح يسكت خوفاً من تهديد جدي؟

ظلت بيبي تبجي بنحيب يكسر الظهر وجدي أشر النا كوموا ناموا الجهال ناموا عالقنفات و كلمن راح غرفته تلحف بلحاف الخوف وتوجس... 

​ذيج الليلة النوم جفاني عيوني على السكف وبالي يم ألف سالفة أحتاج هواي أمور تنكشف لي من ماما بس من مات بابا سـهيل.. و آني مطرودة منهم و آخر مرة عرفت ناوين الهجرة

وسمعت أمي مو بعقل تام.. 

فزيت من مكاني و آني تذكرت حياة شخصين بخطر من ورى الحجي السمعته عن بيت سـؤدد.. أكو ملفين من العناصر الي ضمن جماعة سـهيل.. 

​هنا أجه حـسن.. على فكري.. شلون أوصل خبر لسؤدد.. شلون أنبهها و آني أحس العيون تلاحقني بكل خطوة 

خاف بيتي مراقب خاف بيت سـؤود.. مرصود وما ألحك أنقذ حـسن.. يا ربي  شسوي؟ 

مديت إيدي للتليفون الساعة دكت بالوحدة بالليل خابرت مـريم.. وگلبي يدك وية كل رنة جنت أحجي بحذر أخاف التليفون مراقب والكلمة محسوبة علي أجاني صوت مـريم.. وهي تتثاوب بنعاس.. 

​: بله منو بهيج وقت شكد ما تستحون 

​

: شلونج مـريم.. آني مـاجدة.. هذا رقم بيت جدي شخبارج شخبار نـصير.. 

​

: الحمد لله ديقرا قرآن وجاي بباله هاي الأيام يصلي صلاة ليل بس مو وقت هيج أتصال ترى هذا يسموه إزعاج ليلي..

وتثاوبت أسمع صوت تثاوبها..

​

: شتردين ولج نعسانة أمداج أكلج شعندج مخابرتني بهيج وقت مو عوايدج.. 

: مكدرت أنام وفكرت ببالي نجمع شلة الإعدادية عزمينا شبيج؟

​

: شنو سكرانة بهيج وقت تدورين عزايم؟ 

​

: أي والله ضايجين..

​

: أي والله شنو؟ صخام سافر الزلمة والمرة صارت تشرب عرگ..

: لا ولج أقصد عزمينا.. 

: الظاهر شغلة مهمة عيالج طردوج لو رجلج طلع متزوج ومصدومة تتصلين هيج وقت شوفي أن شاء الله الجمعة هو أزعجتينا بهاليل ما أردج دون عزيمة و آني بنت الاجاويد.. 

: ضروري باجر مـريم.. مشتاقتلج ولج..

​

: مممم مدري شوراج حلمانة؟ يارب رجع إلها مـاجد.. لأن المرة طكن فيوزاتها.. 

عاد ​ثاني يوم الصبح بالتسعة طلعت و گلبي يندعي يارب تجي سـؤدد.. للعزيمة.. 

تركت بيت جدي والكل نايم بس بيبي كاعده تسبح شافتني وزعلانة مانطقت ولا سألت وين كلت بگلبي بعد أحسن.. 

​وصلت لبيت مـريم.. شفت ياسر يلعب  وبسته من كل گلبي صاير يخبل دبدوب ينسي الواحد همه تلكتني مـريم.. بضحكتها.. 

: هاي سوتها وإجت أم بطن تدور عزايم ولج كلت حلمانة.. 

: شغلة ضرورية مكدر بتلفون لازم تسحليلي سـؤدد.. فدوة لازم أحاجيها..

: أكلج وراج طلابة ترى مالي حيل طلايب..

: لا لا أبد والله.. 

: نتبع النجار لباب دار الله يستر منج أم طلايب إنتِ شوفي ملحك أطبخ بس سمك شوي و عندي مرق باميا بايت.. 

​

: الله طبخج أحبه لو جان جاي وخبز بس دزيلي سـؤدد.. تجي..

​

: صدوك ولج نـصير.. يكول مو عوايدها تتصل بوقت متأخر صاير وياها شي ومكدرت تحجيه بالتليفون؟

​هزيت رأسي بـ أي والدمعة بعيني.. 

: ما أكدر أحجي يم رجلج هو منا شلونه بساع ينهظم..

​

: أنجبي واحترمي روحج عشتو عيني يا عيني رجلي تغير وزين بس إذا مواضيع بيها هجمان بيوت عفية مبيه حيل لا تدخلين بيتي بهيج شغلات.. 

​

: معليج سـؤدد.. خلي تجي لو صدك صديقتها وفيه حياة أو موت تجي.. 

: الظاهر شغلة مهمة خوفتيني تدرين نـصير .. يلمح خاف تجيبلنا تايهات بس أستحي أكوله هاي صديقتي وما أكدر أتركها ولا ما أعزمها كتله البنية مالها غرض لا هي ولا أمها أصلاً بنت شهيد فدى بروحه للوطن.. 

أتصلت مـريم.. بسـؤدد.. واجت.. 

: سـؤدد.. اللي جانت تباوعلي بخزرة متروسة شك وعتب وتدنك أنتظرت الفرصة المناسبة لما كعدنا بالحديقة منعزلين بين ما يكمل الشوي.. 

: مـريم.. عوفينا.. 

: يااا.. 

: أي والله الافضل متدخلين حتى أي شي يصير متعرفين ليش التقينا ببيتج.. 

كامت عافتنا وبعيونها فضول تدنيت من سـؤدد.. وهمست.. 

​

: سـؤدد.. لازم نحجي عوفي مواقفج مني أخذيها مني نصيحة لازم يغادر الوطن تعرفين شقصد لتسوين روحج متدرين عايش اللعبة مكشوفة ترى.. 

ضروري يختفي ترى مراقبين بيتكم منتظرين طبته عليكم ولحد مايوكعون بالعنصر الأكبر منهم ما راح يرتاحون..

أكو وياهم شخص مثل بابا سـهيل.. حزبي بس الأمن ما عرفوا أسمه سمعت يكول لمسؤوله.. 

عرفنا أسماء كل العناصر الي تحت إمرة سـهيل.. هنا أجة ابالي حـسن.. الظاهر رجلج سوابق ومراقب من زمان.. 

​دنكت و آني أحس الذنب يأكل بروحي وهمست بصوت مبحوح.. 

: كلمات الأسف ما تغير ماضي جنت بي مغفلة وصرت سبب بضياع ناس بس كل اللي أكدر أصححه هو إنقاذ رجلج ممعقولة متعرفينه عايش وهاي سنين خوش مثلتي علينا الحزينة حتى تنقذينه متجيبين النظر الكم ويلزموه... 

آني ما الومج حقج أكيد تممتم الزواج تلتقون بالسر لذا نبهيه لا يلزموه ترى حملات أعتقالات حصير من وجهج مبينة أكدتيلي كلامي السابق صح حـسن.. عايش.. 

​طفرت دموعي ما كدرت أحبسها أكثر

: سـؤدد.. أعیش أصعب فترة أبوي مو مثل ما عرفته وعمو سـهيل جان بريء ونزيه..

​سـؤدد.. همست وهي عيونها بالأرض 

: أعرف بعمو سـهيل.. شنو هو بس مجنت أكدر أجيب سيرة أبوج و أحجي أخاف على اللي بقوا إلي.. 

غمضت عيونها وهي تسرد اللي صار تحچي وصوتها مخنوگ بوجع سنين و آني عيوني أنملت دموع شگد ظلمته للموت ما راح أگدر أتجاوز خطاياي  بسب غبائي صرت السبب بنهاية أحن گلب أب ظلمته وهجرته وآذيته وصرت العاقة لرباه وسبب نهايته.. 

​ظليت أستمعلها وعيني على وجهها الأسمر التعبان ملامحها تحچي قهر ما تشيله جبال چانت تهمس همس عبالك تخاف لا أشجار حديقة بيت مـريم.. يسمعها ويبلغ الحكومة أو كأنما هاي الحيطان الها آذان تسجل كل نفس..

​تحسرت سـؤدد.. وكملت..

: إجانا عمو سـهيل.. يومها ما گدرت أنام كل تفكيري بـحسن.. شلون يريدون يجرجروه لسوالف بيها هلاك إنتو شباب تدرسون شعلیکم بالممنوع فكروا بمستقبلكم ​هيج بذيج الليلة أعاتب روحي وأحاچيها وعيني ما غفلت عن باب غرفته الضوه جان يسرح من جوه الباب وهج أصفر منخفض يگول صاحبه منايم

​جرت سـؤدد.. حسرة طويلة وغصت بشرگة هزت كيانها وهي تكمل.. 

: ولج آخ يا مـاجدة.. آخ هنا الغصة عن ذيج الليلة أگول لو شارد من يومها جان موصلنا لهنا وجان خوالي ما راحوا بمجزرة..

​ضربت الگاع بإيدها بقهر ورجعت تغوص بذكرياتها وهي تسردلي عن ليلة اللي شاف لـؤي.. الكتاب واخذه بابا سـهيل.. 

: صوت جرس الباب فتحت باب غرفتي وبنفس اللحظة فتح حـسن.. بابه وجهه جان مخطوف يرجف مثل السعفة.. 

: إجو ياخذوني راح أنعدم؟

​شفت الخوف بعيونه يا مـاجدة.. جان طفل كدام الموت. سودة علي جاوبته أحاول أطمن روحي قبله إسم الله عليك أذكر من أندك الباب صرنا نتلاطم خوف.. 

رفعت سـؤود.. رأسها وهي تهمس 

: يومها  أمي تلبس شيلتها و هي كوة تلبس نعالها وبس تقرأ آيات (وجعلنا من بين ايديهم سدا ومن خلفهم سدا... ) يارب استرنا بسترك

لبس حـسن.. شحاطته و طلعلها نهته أمي ميتبعها خافت عليه 

: وين جاي وراي بس كون الله يفكنا الا أردنك لهلك تريد تصخمنا منهو منهووو بالباب.. 

صاحت وكررت منهو... 

: آني.. 

سمعت أمي صوت عمو سـهيل.. بيد تتراجف و آني ورى حـسن.. لزمت بقميصه واتراجف من ورى ظهره مدلي أيده وتشابكن أصابعنا حسيت رجفه أصابيعه غلبت رجفة أصابيعي.. 

ضربت سـؤدد.. الكاع بيديها مرة ثانية وهي تبجي وتشهك و تذكر و تسولفلي 

: مـاجدة.. يومها بلسان كوة ينطق كتله لعمو سـهيل..

: عمو راح تاخذوه.. 

سؤال بسيط ونبرة توسل جاوبني و آني غمضت عيوني بكل قوة وظل يحجي هواي وهو داخل حديقتنا 

: راح أنقذه..  

والتفت لحسن.. 

: أنت تدري شدسوي هيج كتب ممنوعه شجابك عليها تريد تطفي بيتكم و ياخذوكم كلكم هيج ناس عدها توجهات مشبوهة شوداك على هذا الطريق أنت خوش ولد أتركهم  أبتعد عن هيج كتب بيها دمارك و دمار عائلتك.. 

دنك حـسن.. و هو يتوسل خايف.. 

: سيدي شتريد حاضر توبة والله توبة وراح أنهي علاقتي بالولد بس يصبح الصبح أرجع الكتاب  

: تريد تبيت دليل أعدامك ببيتكم لا الكتاب آني آخذه وأتلفه بيدي بس سؤال عايف ديرتك لشنو؟ 

: أدرس و أحقق حلم أبوي بالطب و أحقق مستقبلي عبني موش رايد أبقى عالفلاحه أريدن آخذ بنت عمتي وهاي متقبل بيه أذا موش مكمل دراسة.. 

: إذن أهتم بدراستك و أنتِ بابا أكلكم لـؤي.. ما أقبل يفوت هنا ويلتقي بنتي مـاجدة.. ياريت تنهون هاي السالفة من يمكم هو لو آدمي ما أمنعه يشوفها..

هذا شيطان متجسد ببشر ميدخل مكان الا يخربه و أكو أشياء متعرفوها تستوجب أمنعه من بنتي أمور متخصكم..

قابل آني ما أخاف الله أمنع بنت من أبوها بس هذا مستحيل يكون أب شريف ويحافظ على بنته و أصلاً ميحقله أبوته لمـاجدة.. متنازل عنها..

إنسان مصلحجي يبيع عرضه شرفه و حتى نفسه بس حتى يخلي رأسه برأسي و يوصل لأعلى مكان إنسان كاسر ركابي ناس و سبب إعدام شباب مثل الورد.. 

شوف بابا حـسن.. نصحتك أبتعد عن اثنين عن أي شي ضد الحكومة لا يكون سبب نهايتك وضياع مستقبلك 

و أبتعد عن لـؤي.. أنت رجال هذا البيت و تحكمه إمنعه من  دخوله لبيتكم..   

هاي المرة ماكو دليل عند لـؤي.. راح آخذ الكتاب واتلفه مرة التجي مكدر أحميك أو ما الحك حتى أهربك آني وراك وأنقذك أذا كدرت بس الأفضل متخلي نفسك بموقف ممكن ماألحك  أهربك خارج وطنا أو ملحك عليك.. 

هنا كتله : عمو وأنت شعجب تنقذ أنت َتهربهم مو؟  

يومها توتر حس نفسة جفص وراد يعالج الموقف بس ظلت بعقلي..  

: مجرد كلام بنتي جيراني إنتم قابل أعوفكم بشدة ..

وظل يجيبها منا و يحطها منا بس حتى يداري جفصته باوع لساعته.. 

: أجيتكم بوقت مو لائق بس مكدرت للصبح أنتظر لازم أنبه واسوي العلي.. 

سكتت سـؤدد.. و بگلبي احجي لو مكايلتلي زاد شعوري بالذنب والقهر آني سبب موت أبوي اللي رباني جان شكد يحميني آني الثولة..  

ظليت أبجي أحن لوجودة أحس أريده  أريد أكولة بابا آني غلط موتني كسرني ياريت جنت وياي قاسي و ياريت وياريت شكد جنت غبيه اااخ..

مسحت عيوني و باوعت لسـؤدد..

: مو مال نضيع وقت لازم نسبق لـؤي منعرف شيخطط خاف يندل مكانه خاف ينتظر يجيكم ويعتقله فدوة سـؤدد.. ما اريد يلزمون من حقهم يعيشون شبابهم

لازم أحد يبلغهم يغادرون البلد هم محجوا بالاسماء بس من كلامهم شباب هواي و آني سبق شايفه حـسن يم بيت بابا سـهيل..

بيتكم مراقب ملكيت حل التقي بيج الا هنا واحتمال توقعي مراقبيني ومراقبيج الحكومة متكدر تفوت عمق الهور أن شاء الله يطلعون بسلامة..

: مـاجدة.. هذا جميلج ما أنساه الج أعرف شلون أوصللهم خبر لهنا دورج أنتهى ومشكورة و يجي يوم واردلج هالجميل.. 

بغصه كتلها

: أي جميل هذا ولج ترى آني أذيتج دون قصد بس بعد أنحسب علي إثم و سبب جنت بالصار ما اطلب من الله بس يطلعون بسلامة ما أريد أتحمل ذنب جديد سـؤدد.. تبريت منه هيج إب ما أتمناه ولا أريده.. 

ظلت سـؤدد.. مدنكه يمكن داخلها تكول آني كلبه بنت كلب وساعه سودة اللي عرفتني بيها و صرنا صديقات شحصلت مني غير الأذيه.. 

أخيرا حجت 

: الصار بخوالي مو شويه بس حملتج ذنبهم وبعدين عموماً ما أعرف شلون أتشكر موقفج الاخير و ما أكدر أكولج مكانهم وين آسفة مكدر أثق مرتين شحصلت منج بس كل اللي اكدر اكوله يبقى رغم كلشي أنقاذج الهم موقف مينسي.. 

من حجيها هاي مو بس حـسن.. مشترك شخص آخر من عائلتها كامت سـؤدد.. لمـريم.. 

: أكدر أستعمل التلفون.. 

أستغربت مـريم.. توتر سـؤدد.. وبس أشرت براسها أي بحزن راحت للكلدور تخابر أجت مـريم

: سمعت سـؤدد.. تتصل بخالها.. 

باوعت لمريم 

: مممم هاي الظاهر متفقه على رموز وي أقاربها معقولة دتوصللهم شفرة متفقين عليها وألا شلون تتصل وتنبهم بصريح عبارة.. 

: خالها ساكن بالهور شنو جرو تلفونات عبالي كلهم ماتوا.. 

: لا ولج سامعة من سـؤدد.. بالعاصمه  عدها خالها الزغير الي بالأهوار أنعدمو بعرسها.. 

: أي صح أعتقدت كل خوالها أنقتلوا 

أجت سـؤدد : مـريم شعليج أنتِ ها.. 

بعصبيه حجت وعرفت مكانتي يم سـؤدد.. بعدها ممأمنه بيه و حقها 

ظلت تسولف ومشى هذا اليوم أتصلت بيت جدو كتلهم معزومة لا يظل  بالكم عاد للعصر ترخصت وطلعت تشكرت من مـريم.. على العزيمه 

وراها طلعت أشرت لسيارة بس توقف لـؤي.. 

: ركبي يله... 

: أبد.. 

: مـاجد.. شكد عزيز عندج؟  

: هواي.. 

: لعد ركبي لا تخسريه..

عيني بس على جهته بس صوت مألوف حاجاني خلاني بخوف أباوع للكشن الوراه والصوت الي يحاجي  لـؤي.. بخوف و عصبيه... 

الفصل السابع والعشرون من هنا 

لقراءه باقي الفصول من هنا