كثرة التساؤلات .. الإستفهامات
أحياناً ما كل الخطوط بتأدى لنفس المكان ..
كان الغلط إنك شايف كل القصه من ثقب واحد
و القصه عندها ثقوب كثيره ..!!
….
#عنده_ملك :
ملك:انتِ؟
حنان:بتعملي شنو ؟
ملك:م فاهمه !!!
حنان:م نمتي لي؟حاساك مقلقه .. في شى؟
ملك:لا بس .. ما قادره انوم
حنان:ارقدى و اكيد ح تقدرى .. م ينفع تكوني واقفه و حايمه ف البيت و تنومي .. صح؟
سكته م رديت عليها .. كانت بتتعامل بطريقه غريبه شديد
اول مره اشوف طريقته دى في التعامل
و ده ال أكد لي إنو فى شى ما طبيعي ..
لو ما كانت جات كُنت حا اقول إنى بتوهم ..
بس حنان خايفه إنى أكتشف ال حاجه ال بتعملها
و خوفها خلاها تعمل حاجات م منطقيه
منها إنها تجى تتكلم معاي ..
حنان طلعت و انا رقدته في السرير
غمضته عيوني و بديت افكر ممكن اعمل شنو عشان افهم الحاصل ..
و لقيت الحل ..
……
#عنده_مهند :
مهند رجع مع عمر القسم و كانت أروى منتظراهم
اروى:عمر؟؟نزلت شغل؟
عمر:اي اجازتي خلصت
اروى:انت كويس ؟
عمر:فل الفل .. الحياه ح تستمر ف النهايه .. ما ح تقيف
اروى:بس ..
قبل اروى تتم كلامها مهند قاطعه
كان حاسس انو عمر بدء يضايق من الموضوع
مهند:خلونا نركز ف المهم .. وين سالم؟
اروى:طلبته يتعقبو اشاره تلفونو هو و مرتو عشان نعرف هما وين .. لسه م جاني رد
مهند:معقوله!!يعني ولدهم يعمل كده؟
عمر:ماف بينهم مشاكل صح؟
مهند:حسب ال قالو ال بنات انو علاقتهم عاديه و ماف اصلا مشاكل في عيلتهم .. لو كان في شى اكيد كانو ح يشكو فيهُ ..
اروى:تتوقعو صدفه؟يعني العرس و تاني يوم الام و الاب يتوفو و نكتشف انو العريس م سافر و حتى لو كان ف عذر مادى للموضوع مثلا م بقدر يسافر بس م عايز يوضح للناس اكيد م كان ح يستمر على الكذبه دى حتى بعد وصلو ليهو خبر وفاه اهلو .. كان ح يجي طوالي يشوف اخواتو
مهند:طيب لو هو العمل ده كلو .. لي محمود بكذب ؟
عمر:انت مركز شديد مع محمود .. امكن كان متوتر او خايف م بالضروره يكون كذب .. امكن بجد كان في بيتو يوم الجريمه بس رده فعلو كانت غريبه بالنسبه ليك لانو حس بالضغط
مهند سكت و كان بعاين من الشباك ..
كل الخيوط ال بجمع فيها كانت غريبه ..
بس كان متأكد انو في شى غلط ..
حتى لو سالم ال قاتل ..
محمود في وراهو سر كبير ..
أثناء ما هما قاعدين في المكتب دخلت عليهم وحده
ساره:اتأخرنا ؟
مهند:صراحه اي
ساره:كان ف مشاكل ف المعمل
دخلت ساره و معاها راجل تقريبا في نفس عمرها ..
في الأربعينات
في يدهم صور كثيره و اوراق ..
مهند:اها ..
مصطفي:تمام هو صراحه الدنيا ح تكون شويه جايطه بس حاولو انكم م تضيعو
اروى و عمر وقفو جمبهم و كانو بعاينو للصور
ساره:الجثه الأول جثه محمد ابو البنات سبب الموت الطعنه ال كانت في حلقو .. سبب نزيف و قطعت الشريان الأساسي هناك .. غالباً إطعن و هو واقف بعدها وقع ع الارض .. لانو ف آثار في راسو نتيجه الوقعه القويه ال هو وقعه
مصطفي: كان في أثر ضغط قوي جداً حوالين الفم والأنف… آثار اختناق يعني
مهند:يعني اتطعن… وبعدين اتخنق
ساره:ايوا .. بعدها ف باقي الآثار ال ف جسمو و باقي الطعنات
مصطفي:الزول الارتكب الجريمه كان بفرغ ف غضبو إتجاه ال جثه .. عشان كده حتى بعد إكتشف إنو مات استمر إنو يطعن ف الجثه ..
عمر:واضح إنو غضب فظيع ده
ساره قلبت الورقه و جابت الصوره الثانيه
ساره:الضحية التانية… سبب الوفاة مختلف تماماً.
مافي طعن قاتل .. الموت كان بسبب ضربة حادة في مؤخرة الرأس.
مصطفى:والضربة جاية بزاوية مائلة من فوق لتحت…
ومن الاتجاه اليسار.
سكت لحظة…
وبعدين رفع عيونو فيهم.
مصطفي: زاوية الضربة بتدل إنو الضارب غالباً أعسر… بيستعمل يدو الشمال
اروى:على القليله اخيرا في يدنا ف شى
ساره:في يدكم ف حاجتين .. م حاجه وحده
عمر:كيف؟
مصطفى:جثه محمد كانت فيها طعنات متعددة بس كلها بنفس زاويه الإتجاه و معظم الطعنات جاية من اتجاه اليمين لليسار
مهند:دقيقه يعني هنا استعمل يدو اليمين
ساره:بالضبط .. طبعا ف جثه اسمهان كان في طعنتين برضو بس م هما سبب الوفاه السبب زى ما قلنا الضربه ال كانت ف الراس ..
مهند:ايوه
مصطفى:لمن قارنه بين الطعنات ال في اسمهان و ال ف محمد لاحظنا انو زاوية الدخول مختلفة تماماً عن الحالة التانية.
حتى قوة الدفع مختلفة…
واحد بيعتمد على قوة مفاجئة وسريعة و التاني كانت قوه الطعن شبه معدومه ..
عمر:معليش .. بس كأنو انتو قصدكم انو ما عندنا قاتل واحد هنا ؟
ساره:بالضبط .. ال كانو ف مسرح الجريمه امكن اتنين
مهند:و امكن اكتر ..
اروى:المهم اننا عندنا واحد بستعمل يدو اليمين و التاني بستعمل يدو اليسار
مهند:احنا واحد م قادرين نجيبو .. ما شاء لله
…
#عنده_وعد :
كانت راقده في السرير و بتعاين للسقف
دخلت الغرفه حياه و قعدت جمبها
حياه:ح نرجع البيت داك تاني؟ال ماتو فيهُ اهلنا
وعد:مستحيل .. كل ما اتخيل منظرهم قلبي بتقطع .. مستحيل نرجع هناك
حياه:ح نعمل شنو؟نمشي وين
نون دخلت و هيا سامعه بدايه الحديث
نون:نبيعو .. انا كمان مستحيل ادخل البيت داك .. خلونا نبيع البيت كلو .. م عايزه و لا شى يخلينا نتذكر ال يوم الاسود ده
وعد اخذت نفس عميق
وعد:نون قلتِ ليهم ؟
نون:قلت شنو و ل منو ؟
وعد:الشرطه .. لمن دخلنا ليك غرفه التحقيق و كُنتِ بتبكي .. قلتِ إنو ضغط عليك ف موضوع الدكتور النفسي .. قلتِ ليهُ السبب؟مهند عرف يا نون الحقيقه؟
نون سكتت
وعد:نون .. انا م عايزه يشك فيك .. انا م عندى قوه انى اخسرك انتى كمان !!
نون:هو ح يعرف ف النهايه .. يعني لو لسه م نسى الموضوع .. ده ما شى ح نقدر ندسو .. كل الناس ح تعرف ف يوم .. انا مجهزه نفسي لليوم ده .. فصدقيني م فارق معاي المحقق الغبي ده ح يشك فيني و لا لا ..
وعد:….
أثناء نقاشهم خالتهم زاهيه كانت بتسمع ف كلامهم كلو
و الأفكار السوداويه كلها بدت تجيها
شنو السر ال بتكلمو عنو ؟
و لي السر ده ممكن يخلي نون في موضع شك ؟
و معقول نون يكون ليها يد ف الموضوع ؟
في النهايه ال ماتت اختها
و حتى لو ح تكون مجبوره انها تضحي ب بت اختها
المهم تعرف الحقيقه
منو ال قتلهم ؟..
….
#عنده_مهند :
كانو قاعدين في المكتب و بعاينو للصور و للملف ال جاهم من ساره و مصطفى ..
لمن ما دخل عليهم شاب
_لقيناهو .. لقينا سالم
مهند و عمر طلعو و معاهم تاني شباب من القسم
اتحركت ثلاثه عربات شرطه للعنوان ال جاهم
أثناء ما مهند سايق و عمر جمبو
عمر اتكلم
عمر:شكرا
مهند:على شنو؟
عمر:عارف انك فهمته اني بضايق لمن زول يقول لي انت كويس و لمن زول يفتح الموضوع داك معاي .. فشكرا لانك بتقفلو .. عارف انو ده م وقتو .. بس عايز اعبر ليك عن إمتناني لوقفتك معاي الفتره ال فاتت
مهند:عشان تتجاوز مفروض الناس تبطل تحسسك انك مفروض تتجاوز .. انا فاهم احساسك صدقني
عمر:اصلا انا م ح اتجاوز .. بس مع الوقت ح اتعود ع الألم ده
مهند:عمر انا عارفك .. حافظك .. انا متأكد انك م خليت الموضوع ده .. انت لسه بتبحث عن العملو كده .. خليني اساعدك
عمر:ال انا بعملو ممكن يوصلني ل طرق م قانونيه يا مهند .. انا م عايزك تتورط معاي .. دى مشكلتي
مهند:عمر ..
قبل مهند يتم كلامو عمر اتكلم
عمر:اقفل الموضوع على كده ..
عمر كان بعاين للشارع و واضح من وشو إنو ما ح يسمح ل مهند يدخل في شى
مهند كان سايق و شايل هم عمر و بفكر ممكن يساعدو كيف ..
بس هو عارف انو ماف شى ح يقدر يعملو ل صاحب عمرو .. ماف شى ممكن يخفف عليهُ
و ماف شى ح يخلى يبطل يفكر ينتقم ..
و لا شى ..
#فلاش_باك :
قبل سنه و شهرين:
عمر كان في قسم الشرطه
جاتو رساله :
" خطوه غلط .. ح تكلفك أعز الناس عندك "
عمر اثناء ما بقرى الرساله جاتو رساله ثانيه
بس كانت عباره عن صوره
فتح الصوره و لقى صوره بيتو ..
عمر:لالالا
عمر فجأه رمى التلفون و جرى
مهند جرى وراهو و هو ما فاهم شى
ركبو السياره و سألو في شنو
عمر قال ليهُ عن الرساله
في اللحظه دى مهند ضرب للقسم و طلب من الوحدات المتحركه تتجه لموقع بيت عمر ..
عمر كان بتصل على اسماء مرتو بس م كان ف رد
عمر:لو حصل ليهم شى ح احرق الدنيا .. ح احرق الدنيا يا مهند
مهند:تمام روق .. ح يكون مجرد تهديد .. اكيد م ح يعملو شى
فجأه بعد قربو من البيت لاحظو انو في دخان اسود ف السما
عمر كان خايف لدرجه انو م شايف قدامو
مهند:عمر انتبه ح نعمل حادث
عمر:الدخان .. ده إتجاه بيتي .. مرتي .. بتي يا مهند
مهند كان بحاول يمسك اعصابو ..
بس اول ما استوعب انو ده فعلاً بيت عمر
م قدر يعمل شى
ما كان في شى ممكن يعملو ل صحبو ف الوقت ده
الإنهيار حاجه طبيعيه لأى زول في محلو ..
عمر نزل من العربيه و جرى للبيت ال شبه إختفى
النار كانت في كل مكان ..
المطافى كانت بتحاول تطفى النار ..
الشرطه كانت واقفه و كل الرجال بحاولو يمسكو عمر ..
عمر:بتي و مرتي جوا .. انتو مجانين خلوني
مهند كان واقف و خاتي يدو ف راسو
عمر:انا عايز اموت خلوني .. خلوني ادخل ليهم ح يكونو م قادرين يطلعو .. خلوني ادخل .. بتي عمرها سنتين بس .. سنتين بس !!! خلوني اموت معاهم م ح اقدر اعيش مع العذاب ده .. يا رب .. يا رب م ح اقدر و الله
مهند دموعو كانت بتنزل و هو بسمع كلام عمر ال كان بقولو بصوت عالي ..
عمر:ما يموتو عليكم الله .. بتي عمرها سنتين بس .. ما ح اقدر اعيش انا بالعذاب ده ..
عمر قعد ف الارض و كان ببكي كأنو شافع عمرو سنتين ..
مهند قعد جمبو و حضنو ..
فضلو قاعدين ف الارض لمن النار وقفت
رجال الإطفاء دخلو جوا
طلبو سريرين نقل
في اللحظه دى عمر قام وقف
كان كأنو جثه بتتحرك ..
نظراتو كأنو ما واعى بالدنيا
عاين ل اول سرير متحرك طلع من البيت
م كان ظاهر شى لأنو مغطينها كلها
بس كان واضح انها اول جثه
و نسبه ل حجمها كان واضح انها اسماء مرتو
بعدو السرير المتحرك ال ثاني
كان واضح انو مغطين حاجه حجمها صغير شديد
كانت بتو ..
عمر حس انو م قادر يقيف
مهند سندو ب يدو
مهند:عمر ..
عمر:بسببي .. العيله ال أنا عملتها ماتو بسببي!!!!!
عمر اثناء ما بقول الكلام ده عيونو كانت بتغمض
جسمو كان مهبط ..
قلبو فجأه بدء يدق بسرعه خياليه
كان شايف الدنيا بتلف
مهند مسك عمر قوي لمن حس انو عمر بدء يفقد وعيو ..
مهند:عمر .. عمر .. عمر عاين لي ..
….
#في_الوقت_الحالي :
عمر:هي بتفكر في شنو؟
مهند:و لا شى ..
عمر:ده البيت حسب الوصف
مهند وقف جمبه عماره كبيره في شارع متحرك
و باقي العربات وقفت وراهو
نزلو و طلعو ال طابق ال قاعد فيهُ سالم و مرتو نجاة
دقو الباب و فتح سالم ..
مهند:سالم محمد
سالم:ايوا
مهند:تعال معانا القسم .. مفروض نسألك شويه حاجات بخصوص موت الوالد و الوالده ..
سالم عاين وراهو كانت واقفه نجاة بتعاين ليهم ..
مهند:و مرتك كمان ح تتفضل معانا
سالم:تمام ..
سالم و نجاة طلعو معاهم من غير أى اسأله ..
الشباب نزلو معاهم تحت و ركبو العربيه
في الوقت ده مهند و عمر كانو واقفين في السلم
مهند:اتمنى م اكون لاحظته براي المره دى
عمر:كان عارف .. كان عارف اننا جاين ناخذو
مهند:ما استغرب و لا حتى سأل أى سؤال .. حتى مرتو كانت واقفه ببرود من غير تخاف او تتوتر
عمر:رد فعل ما طبيعي .. المره دى انا معاك .. سالم و مرتو وراهم شى .. شى ما صغير
مهند:….
…..
#عنده_وعد :
كانت ف الحمام بتغسل وشها
وعد:تمام .. ماف وقت تنهارى .. اخواتك محتاجين ليك الفتره دى .. لازم اكون قويه .. لازم احاول اني اكون قويه
وعد كانت عايزه تطلع
بس فجأه باب الحمام ما كان بفتح معاها ..
وعد دقات قلبها بدت تدق سريع ..
بدت تعاين حوليها .. ما كان ف شباك
بدت تخبط الباب قوي
وعد:لالا .. لالا ما ينفع .. افتحو .. افتحو ..
أثناء ما وعد بتخبط
دموعها نزلت
و بدت تتذكر مواقف و هيا صغيره ..
#فلاش_باك :
وعد:انا بخاف .. م تخلوني هنا .. انا بخاف
وعد كانت بتصرخ و بتحاول انها تفتش طريقه عشان تطلع من المستودع ..
كان ف فيران صغيره و تراب و ظلام بس ..
وعد:ما ح اعمل كده تاني .. طلعوني .. انا اسفه .. بابا طلعني .. انا بخاف
وعد قعدت ف الارض و بدت تبكي و تشهق
لمن نامت ..
#في_الوقت_الحالي :
وعد:انا اسفه .. طلعوني .. ما بقدر اقعد هنا ..
وعد قعدت في الارض و هيا بتتذكر كل ال حصل معاها و هيا صغيره
كانت بتبكي بصوره هستيريه
فجأه باب الحمام فتح ..
حياه:وعد .. انتى كويسه؟
حياه قعدت جمبها ف الارض و بدت تهدى فيها ..
حياه:تمام .. انا هنا خلاص اهدى .. ما حصل شى ..
حياه حضنت وعد قوي و كانت بتمرر يدها ف شعرها ..
حياه:انتى ما براك .. اهدى
….
#عنده_ملك :
صحيت و انا ما عارفه نمته قدر شنو اصلاً
عاينته للساعه كانت سته صباحاً يادوب ..
م نمته غير ساعتين امكن ..
بس م كنت حاسه انى قادره انوم
قمته و وقفت جمبه الشباك
فجأه الباب فتح و انا اتخلعته
عمار:مالك اتخلعتي؟و لي صاحيه بدرى كده
ملك:م قدرت انوم
عمار:تعبانه؟حاسه ب حاجه؟
عمار وقف قصادى و خته يدو ف جبهتي
عمار:ماف حمه
ملك:ماف شى م تخاف ..
عمار:اتذكرتي ابوك؟
م رديت عليهُ
عمار:نطلع صدقه الليله ب اسمو؟
ملك:بجد؟
عمار:اكيد بالجد .. م تضايقي .. طيب؟
هزيت ليهُ راسي بمعني طيب
عمار:ح ادخل استحمى .. مفروض اطلع بدرى الليله الشركه
ملك:طيب ..
عمار دخل الحمام و انا فضلت واقفه جمبه الشباك ..
حسيت راسي ح ينفجر من التفكير ..
بفكر ف مليون احتمال و بفكر ف مليون شى ..
م عارفه شنو ال صح و شنو الغلط ..
بس م قادره اطمن .. ابداً ..
عمار طلع من الحمام لقاني لسه واقفه ف مكاني ..
عمار:ملك ف شنو؟
ملك:كنت عايزه اسألك لو الكاميرات شغاله .. ال كاميرات ال بره
عمار:اي حسب توقعي .. بعملو ليها صيانه كل كم شهر .. حصل شى؟شفتى حاجه ؟؟
ملك:لالا .. فضول بس
عمار:امممم .. نومي و بعدين بجي باخذك من هنا نرجع بيتنا .. تمام؟
ملك:طيب ..
عمار طلع و انا طلعته بعدو بمسافه
نزلت بهدوء و دخلت كان ف غرفه صغيره جمبه المطبخ فيها شاشات المراقبه و تسجيلات الكاميرا
م كنت فاهمه اعمل شنو و افتح التسجيلات ال قديمه كيف ..
كان ظاهر لي التسجيلات الحاليه
اثناء ما بحاول سمعته صوت وراي ..
مروان:بتعملي شنو انتى؟
ملك:…
…..
#عنده_مهند :
اخذ غفوه ف المكتب بعدها دخل غرفه التحقيق ال كان فيها سالم ..
مهند:ها قول لي .. لي كذبته في سفرك ..؟
سالم:انا ماسك صفقه كبيره و م قدرت اسافر لاني ما كنت عايزها تضيع علي
مهند:عدم سفرك بسبب الشغل ؟؟
مهند ضحك ضحكه إستهزاء ..
مهند:انت ح تستهبل ؟؟ قلت ليك ح اديك وقت تقعد مع نفسك و تفكر انت عايز تكذب و لا تقول الحقيقه .. بس شكلك قررته تكذب ..
سالم:بقدر اثبت ليك
مهند ضرب الطاوله قوي و كان واضح انو بدى يعصب
مهند:انت مجنون؟امك و ابوك اتوفو !!! و بتقول لي انو سببك ف انك كذبته ف سفرك شغل !!!! لا طيب انا صدقتك .. يومين و انت مستمر ع الكذبه دى لي ؟؟ًم مشيت تشوف اخواتك لي ؟؟؟انت بتستهبل و قايل الموضوع لعب و لا شنو ؟؟؟
سالم كان بعاين ل مهند بنظرات بارده ..
سالم:موتهم أثر فيني .. اكيد تعبته و زعلته ع موتهم بس م مشيت لاني م عايز الناس تعرف اني كذاب .. و كمان لو انتو عرفتو كنت عارف انكم ح تشكو فيني
مهند:كنت وين يوم الجريمه حصلت ؟
سالم:في نفس العنوان ال لقيتوني فيهُ الليله .. طلعته تاني يوم الصباح لقيت شركائى الجديدين .. ف كاميرات ف المطعم عشان تتأكد .. انا م سافرته لاني كنت بخطط اني اكبر مشروعي و كان صعب شديد اخليهم يقابلوني .. اتحدد تاريخ اجتماعنا من بدرى و لمن اخذته رأى نجاه م رفضت و قالت انها موافقه انو نأجل شهر العسل
مهند:م فاهم لو قلت لاهلك انك م مسافر بسبب شغل ح يحصل شنو؟
سالم:ابوي م عايز شراكتي مع الناس ديل .. انا ح ابيع ليهم جزء من اسهمي ف الشركه و هو رافض ..
مهند:لي ؟
سالم:عشان عداوتو بعمي محمود .. هو شايف اي زول يكون عندو علاقه ب محمود ح يكون سئ .. و انا م مستعد اخسر ناس و شغل كويس بسبب عداوه بين اتنين اخوان !!!
مهند:م قادر استوعب .. انت بتتكلم ف شغل و ف حاجات غريبه .. و اهلك اتوفو !!! انا م شايف و لا ذره تأثر اصلاً!!!!
سالم:….
عمر كان واقف ف الجزء التاني من غرفه التحقيق و شايف و سامع ده كلو ..
فجأه جات رساله ف تلفونو ..
عمر فتح الرساله و كان مضمونها :
كانت صور فيها سالم و هو قاعد في مطعم مع رجال
" سالم محمد اسمو .. واحد من الناس ال بتفتش فيهم "
عمر دخل التلفون جيبو و كان بعاين ل سالم
عمر:سالم محمد ..
…….
" خطوه واحده خاطئه
و ستقع من على الحافه .."
يتبع …