" السوء ال أنت بتصنعو
مصيرو يأذيك في يوم ..
ماف سوء بحمى صحبو للأبد .."
#عنده_ملك :
ملك:انا .. كنت
مروان:كُنت شنو؟بتعملي شنو هنا ؟؟
ملك:امبارح شفت زول ف الحديقه .. يعني م متأكده بس حاسه اني شفته زول .. فاهمني؟
مروان:امممم
ملك:م قدرته افتح التسجيلات حقه امبارح .. م عرفته
مروان جا وقف جمبي و عمل حاجه ف الجهاز
بس حسيت من وشو انو في شى م طبيعي
ملك:مالك؟
مروان:ماف .. تسجيلات يوم امبارح كلو ماف
ملك:لي ؟؟ مش الكاميرات شغاله؟
مروان:م عارف .. يعني اتمسحت عديل ..
لمن مروان قال كده و لمن شفت تعابير الإستغراب ف وشو
إتأكدته إنو البحصل ف البيت ده ما شى بسيط ..
ملك:منو ح يكون مسح التسجيلات؟
مروان:انا ح اعرف و ح اتصرف
ملك:كيف يعني .. ح تعرف و تتصرف براك ؟ انا عايزه اعرف لي ماف تسجيلات و لي اتمسحت و كان فيها شنو عشان تتمسح اصلا
مروان:ممكن تهدى .. م فاهم شنو ال مضايقك للدرجه دى ؟شفتى شنو انتى امبارح؟
ملك:و لا ش .. بس م مطمنه
مروان:تمام و انا قلت ليك انا ح احل الموضوع و اشوف لو ف شى غريب .. عايزه شنو تاني ؟
ملك:…
مروان كان طالع بس وقفته قدامو
ملك:ح توريني لو عرفته شى ؟
مروان:انتى في شى م كويس حصل معاك؟وريني عشان اقدر اساعدك
ملك:شكرا ليك بس كأنو ما فضل غيرك يساعدني!
مروان:اسف .. انت مرة اخوي ف النهايه ..
ملك:قولها ..
مروان:اقول شنو؟
ملك:الحاجه ال انت من سنين م قادر تقولها
مروان سكت و ملامح وشو إتغيرت
ملك:ما تخت الحق على الحياه و لا تختو فيني و لا ف اخوك .. انت الغلطان يا مروان .. انت ال كنت ساكت و انت ال م عملت شى عشاني .. فما تجى حسي تتصرف معاي كده كأني عدوتك .. انت ال اخترت اننا نكون ف الطريق ده .. انت حتى م قادر تقول ال حاجات ال انت مخليها جواتك ده كلو .. لانك ضعيف .. اضعف من انك حتى تعترف بالحاجه دى لنفسك ..
طلعت من الغرفه و انا زهجانه شديد
كُنت حاسه اني مرتاحه لاني قلت كل الكلام ال ف قلبي
كان لازم اقولو ..
لازم ..
…..
#عنده_مهند :
كان قاعد ف مكتبو و منتظر اروى تجى ..
هيا ال مشت تتأكد من افاده سالم
بس ال كان مستغرب فيهُ انو فعلا اشاره تلفون سالم ل يوم الجريمه و ف وقت الجريمه كان ف البيت ال مشو اخذوهو منو ..
و ده بأكد على كلامو و انو كان ف البيت ف الوقت ده ..
بس ما دليل قاطع .. ال حاجه الوحيده الممكن تثبت لو اروى مشت تشوف الكاميرات ال قريبه من هناك و إتأكدت انو م طلع فعلاً
مهند بدء يشك في نجاه و سالم
صح لمن حسي م اكتشف الدافع
بس فكره انو القاتل شخصين خلتهم الاتنين ف منطقه الخطر
أثناء ما مهند بفكر و ف بالو ميه فكره
دخلت مره كبيره ف العمر المكتب
مهند:اتفضلي ؟
زاهيه:انا زاهيه .. اخت اسمهان ال اتوفت قبل كم يوم
مهند:اتفضلي اقعدى
زاهيه دخلت و قعدت
مهند:عايزه تقولي حاجه؟
زاهيه:البنات معاي ف البيت .. بيت العزا .. و سمعته شى غريب
مهند:شى غريب زى شنو؟
زاهيه حكت ل مهند كل الكلام ال سمعتو
مهند:و انت ما عندك اى فكره ممكن السر ده يكون عن شنو؟
زاهيه:لا .. بس ال فهمتو انو حاجه سيئه .. حاجه ممكن تخليكم تشكو فيها .. انا م عارفه لو هيا ممكن تعمل شى زى ده .. بس اختي ماتت .. ما مستعبده اي شى
مهند:البيئه ال كانو عايشين فيها عموماً .. يعني لمن اختك و راجله كانو عايشين .. كانت بيئه كويسه؟
زاهيه:شوف انا ح اقول الصراحه .. لمن كانو صغار ابوهم كان قاسي عليهم .. يعني ف التربيه و كده .. هو م بحب البنات عموما .. كان عايز كل اولادو يكون اولاد .. فحاول انو يربيهم بقسوه عشان يتحملو المسؤليه لمن يكبرو .. بس علاقتهم كانت عاديه .. يعني م كان ف مشاكل .. على القليله قدامنا .. كانو متفاهمين و حتى كل الاهل بحسدوهم على الحياه ال هاديه ال هُما عايشنها .. انا م عارفه منو ممكن يعمل حاجه سيئه زى دى .. و للأمانه ما شاكه فيهم بس موضوع السر ده خلاني اخاف .. عشان كده جيتك
مهند سكت و كان بفكر ف كلام زاهيه
المواضيع بدل تترتب كانت بتتعقد اكتر ..
بعد استبعد تماماً البنات .. و بعد نسى موضوع نون
فجأه إتفتح تاني قدامو ..
مهند ما كان بأمن بالحظ و لا بالصدفه
و كان عارف انو موضوع الإكتئاب ما دام إتفتح تاني
يبقا ف خيط مهم لازم يمسكو ..
…
#عنده_عمر :
دخل و قعد ف غرفه ال تحقيق ال فيها سالم
كان قاعد و بعاين ليهُ بس .. م قال و لا كلمه
سالم اتوتر شديد .. الصمت ال كان ف المكان و نظرات عمر كانت مخيفه
سالم:ده اسلوب تعذيب جديد و لا شنو ؟
عمر:انا محقق .. اسمي عمر بس خلينا ننسى ده .. حاليا اتعامل معاي كأني واحد من الشارع و م شغال هنا اصلا
سالم:اها
عمر:انا عارف انت لي قعدته و م سافرته .. و عارف انت شغال مع منو ..
سالم سكت و م رده ..
حصلت لحظه هدوء و بعدها كسر الصمت صوت عمر
عمر:م ح اقول شى .. لا لمهند و لا لغيرو
سالم صلح قعدتو
و بصوت واطى قال ل عمر
سالم:انت جاى من طرفو ؟
عمر:لا انا من الطرف التاني خالص ..
سالم:م فهمته ؟
عمر:ف الغالب م ح يلقو دليل عليك و لمن المسا ح تطلع .. عارف ح يحصل شنو بليل ؟
سالم:شنو؟
عمر:انت و الوراك ح تكونو ف خبر كان
سالم:انت عايز شنو؟و انت منو اصلا؟م فاهم شى انا ..
عمر:قول للفوقك .. كلها فتره و كلكم ح تقعو ف يدي .. انا رجعته .. و صدقني لا انت و لا الحولينك ح تقدرو تهربو مني ..
سالم:لي م توريهم لو انت عارف حاجه .. الشرطه قصدى ؟؟ انت شغال هنا ف النهايه .. مش شغلك تكشف الحقيقه و تقبضنا؟
عمر:لا دى شماعه .. انا هنا عشان اكون جمبكم بس .. لكن م خاتى ليكم نهايه لطيفه زى انكم تتسجنو
سالم:و نهايتك شنو ال خاتيها؟غير السجن
عمر:موت ..
سالم:….
….
#عنده_وعد :
كانت راقده ف سرير و السرير ال تاني فيهُ حياه
فجأه بدت تسمع حياه بتكورك
قامت و قعدت جمبها ف السرير
وعد:حياة .. حياه قومي .. بسم الله
وعد بدت تهز ف حياه لمن حياه صحت
وعد:انتى كويسه؟
حياه كانت بتبكي و حضنت وعد قوي
حياه:م كويسه .. م كويسه انا
وعد:حياه ده عشان موت اهلنا .. و لا …
حياه:اي .. النوبات رجعت لي تاني
وعد ختت يدها ف قلبها
حياه:حاسه إنى إنتكسته تاني .. انا م كويسه يا وعد .. لازم ارجع ل دكتور .. محتاجه ادويتي
وعد:تمام روقي ..
نون دخلت الغرفه عليهم و هما حاضنين بعض ..
نون:ح تعملي شنو المره دى .. بابا و مات الله يرحمو .. كيف ح تمشى ل دكتور نفسي ب اسمي تاني؟
وعد قامت من مكانها و مسكت نون من يدها قوي
وعد:انتى مجنونه!!وطى صوتك حسي لو سمعك زول؟
نون:ماف زول .. م تخافو ماف زول سمع .. طبعا ده البفرق عندكم حسي .. كأنو م كلهم بكره ح يعرفو إنى كنت بتعالج و اني مجنونه و المشكله انو م لي علاقه و حياه هيا المجنونه
وعد:نون .. ده م جن .. ده مرض نفسي و حاجه عاديه
نون:طبعا عاديه .. عشان كده بابا ختاها فيني .. عشان كده انا ال ف ملفي مسجل مريضه نفسياً ما هيا .. حسي ح نعمل شنو؟يبقو اتنين مريضين نفسياً ؟؟ لازم نمشي ل دكتور عشان انتى عارفه نوباتها لمن تزيد بحصل شنو
وعد عاينت ل حياه بنظره حيره
ما كانت عارفه ممكن تعمل شنو ..
….
#عنده_مهند :
دخل غرفه ال تحقيق ال كان فيها نجاة :
مهند خته ورقه قدام نجاه
مهند:ده الإفاده القدمتيها .. وقعي
مهند كان بعاين ل نجاه بتركيز
مسكت و وقعت ب يدها اليمين
مهند:قلتِ انك م عارفه شغل سالم بالضبط شنو .. و لي أجل السفر كم يوم ..
نجاه:اي .. م قاعده افهم ف الحاجات دى .. يعني الاجتماعات و الشراكات
مهند:امممم .. غريبه يعني سالم م إتأثر بعد سمع بموت اهلو و ما جا العزا طوالي
نجاه:هو كان منهار و الله .. بس كان خايف يتفهم غلط .. مستحيل نصل من السفر بالسرعه دى و م كان عايز الشكوك تكون حولينو
مهند:ما حاجه غريبه؟
نجاه:شنو؟
مهند:في لحظات زى دى .. الإنسان يفكر بنفسو بدل يكون حزين .. و انتى جمبو .. ما حاولتي تقنعي انو ده غلط و انو مفروض تمشو ل اخواتو عشان حالتهم ح تكون صعبه
نجاه:اننا نمشي م ح يغير و لا ح يخفف حجم الالم .. ف النهايه ال ميت م ح يرجع
نجاه سكتت بعد لاحظت انها بتتكلم بتهور
مهند ابتسم ..
مهند:متفهم كلامك .. ف النهايه بينكم عداوه
نجاه:انا م قصدى حاجه سيئه .. بس سالم كمان م عمل شى .. الغلط الوحيد انو استمرينا ف الكذبه .. بس هو مستحيل يأذى أهلو .. هما بحبو بعض شديد
مهند:عليكم برود .. برود غريب ..
نجاه:كيف ..؟ احنا حسي عملنا شنو اصلا ؟
مهند م رد عليها و طلع من الغرفه ..
دخل غرفه سالم و خته الورقه قدامو
مهند:دى إفادتك .. وقع
سالم مسك القلم و وقع
بس الصدمه ل مهند كانت لمن وقع ب يدو الشمال
مهند:انت بتستخدم يدك الشمال ؟
سالم:اي .. ف مشكله؟
مهند إبتسم و طلع من الغرفه من غير يرد على سالم
دخل المكتب حقو و كان في مكان ف الحيطه بعلق فيهُ صور من القضيه ..
كانت ف صور للجثث و صور للمشتبه بيهم
رقم واحد=صوره محمود
رقم اثنين=صوره ل سالم و جمبو صوره ل نجاه
رقم ثلاثه=صوره نون
تحت في صوره ل حياه و وعد ..
كان بعاين للصور و مركز ..
دخل عليهُ عمر ..
عمر:دكتور عبد الوهاب اتوفى من فتره ..
مهند:ممتاز ..
عمر:ها عايز تعمل شنو
مهند:نمشي العياده او المكتب حقو .. نشوف ملف نون
عمر عاين للصور ال فى الحيطه
عمر:لسه شكك الاول محمود؟
مهند:قصه الكاميرات م صدفه .. انت عارف انو سالم بستخدم يدو ال يسار و نجاه اليمين
عمر:م فاهم لي ممكن يقتلوهم !!
مهند:اكيد ف قصه ..
اروى جات داخله و هما واقفين
اروى:انا جيت
عمر:اها لقيتِ شنو
اروى:م عايزه اصدمكم .. بس دى تسجيلات العماره .. د المدخل و المخرج الوحيد من العماره و فعلا نجاه و سالم م طلعو من العماره ابدا ف وقت الجريمه ..
مهند:كاميرا وحده ؟
اروى:اي دى الكاميرا ال ف مدخل العماره .. ف وحده جوا بتورى الممر حق العماره .. و وحده بره
اروى فتحت ليهم المشاهد و فعلاً ما كان ف شى غريب
مهند كان بتفرج على التسجيلات ال بتوضح الشارع ..
مهند:ال شاحنه دى انا شفتها ف حته
عمر:البيضه قصدك؟
مهند:اي .. نفس الرسمه كمان .. وين يا ربي
اروى:المهم يا شباب .. نجاه و سالم بريئين
مهند:قبل دقايق كان هُما اقرب خيار لى
عمر:مستحيل يرتكبو جريمه و هما ما ف مكان الجريمه
مهند اخذ نفس طويل ..
عمر:شكلو ح نستبعدهم يا مهند
مهند:تمام .. خلينا نمسك ف نون .. ح نطلع انا و انت نشوف موضوع دكتورها .. اروى شوفي لي أى ثغره .. لمن بليل لازم يطلع شى .. اى شى حتى لو بسيط .. نون احتمال بعيد .. بس حاليا ما عندنا غيرو
اروى:تمام
عمر و مهند طلعو و اتحركو على عياده كبيره فيها جوا كم مكتب و كل مكتب ل دكتور معين
دخلو و طلبو يلاقو مدير المكان
و دخلو ليهُ ف المكتب
كان راجل كبير ف العُمر :
_اتفضلو
عمر:احنا عارفين انو دكتور عبد الوهاب عندو مكتب هنا و شغال علاج نفسي بس اتوفى من فتره ما طويله ..
_ايوا
مهند:محتاجين ل ملفات تخص مريضه كانت بتجيهو ..
_شوف المكتب حقو لمن حسي مقفول .. من وقت الوفاه و ماف شى إتحرك .. بتُ مفروض تجي تشيل حاجاتو و تورينا عايزه تعمل شنو .. لانو المكتب ب اسمو .. العياده دى كلها شراكه بين كم دكتور و هو من الدكاتره ال ساهمو ف بناء المكان ده .. فما بقدر افيدكم لانو مفتاح المكتب عموما و اي شى يخصو تحت تصرف بتو .. لو عايزين تاخذو شى من المكتب لازم تجي و تفتح ليكم المكتب هيا و تكون موافقه على الحاجه دى
مهند:م مشكله .. عندك رقم ليها؟
_اكيد
الراجل طلع ليهم الرقم و كتبو ف ورقه
_اسمها ملك
عمر:شكرا ليك
عمر و مهند طلعو و وقفو قدام العياده
مهند اتصل على الرقم و ردت ملك ..
مهند:اسف لو ازعجتك .. بس الموضوع يخص والدك المرحوم دكتور عبد الوهاب ..
مهند فجأه حس بهدوء
مهند:الو .. سامعاني!!
ملك:ايوا ..
مهند:انا حاليا قدام ال عياده ال كان شغال فيها .. لو بتقدرى تجي .. يكون احسن لو اتكلمنا وش ل وش و لو ممكن تجيبي معاك مفتاح المكتب حقو
ملك:تمام .. نص ساعه و بكون عندك
….
#بلسان_ملك :
المكالمه ال جاتني وترتني شديد
بعد وفاه بابا كل يوم كنت بفكر
الحاجه ال سيئه ال هو اتكلم عنها
معقوله تظهر في يوم ؟
و هل انا ح اكون ف وش المدفع لمن تظهر ؟
الحقيقه اني متأكده انو ماف شى بكون في الخفاء فتره طويله ..
و كنت مستعده انو ف اي لحظه ممكن حاجه تحصل ..
حاجه تغير كل حاجه ..
و بعد المكالمه دى ..
حسيت انو ده الوقت ال ح تتغير فيهُ كل حاجه ..
لبسته و طلعت و من كثر ما انا متوتره
م دقيت كلمته عمار
و لا زول من البيت حتى ..
وصلت و دقيت للرقم ال دقى لي
و لقيتهم واقفين جمبه باب العياده
مهند:ملك؟
ملك:ايوا .. في شنو؟
عمر:موضوع بسيط ..
كان ف كافتيريا جمبنا
قالو لي نقعد و يشرحو لي
و فعلاً مشينا قعدنا
مهند:في بت كانت بتتعالج عنده ابوك الله يرحمو .. سنه ٢٠٢٠ .. اتعالجت فتره و وقفت علاج .. محتاجين للملف حقها
عمر:احنا ماسكين جريمه قتل حصلت من كم يوم .. و محتاجين للملف حقها عشان ف ثغرات ف الملف حقنا
مهند:لمن اتكلمنا مع المدير قال لينا انو مفتاح مكتبو معاك .. عشان كده طلبنا منك تجي
ملك:لو ال حاجه دى ح تساعدكم م عندى مشكله .. هيا اسمها منو ؟؟ المريضه ال كانت بتجيهو
مهند:نون محمد ..
ملك:اممم .. شفتها كم مره مع بابا الله يرحمو .. اوك ما عندى مشكله .. نطلع المكتب
طلعت معاهم المكتب و قلبي كان بدق سريع
دى اول مره اجي بعد ابوي اتوفى
كان احساس جداً سئ
فتحته المكتب و دخلو
الملفات كانت كتيره ..
ساعدتهم و بديت افتش معاهم على الملف ال بأسم نون محمد ..
و بعد مده عمر لقى الملف
عمر:لقيتو .. نون محمد
عمر فتح الملف بس كان فاضي
هِنا كلنا إستغربنا ..
مهند:لي فاضي ؟؟
كل الملفات ال تانيه كانت مليانه الا ملف و كل ملف كان فيهُ صوره للمريضه جمبه اسمها الا ملف نون !!
ملك:غريبه .. ابوي حريص شديد على الحاجات دى
عمر:يعني ده كلو ح يضيع ساي ؟؟ م ح نستفيد شى ..
مهند:ماف مكان تاني طيب بخته فيهو الملفات او ال حاجات ال بتخص ال ناس ال جو اتعالجو عندو ؟؟
سكته مسافه و قعدته افكر
ملك:امممم .. ف التسجيلات، بسجل دايما جلساتو مع المرضى
فتحته درج التسجيلات و بديت افتش على اسم نون
بس ما كان في ..
مهند:لي !!! ماف نون .. الوحيده ال ماف اصلا
ملك:م بقدر افيدكم و الله ..
كان نفسي اساعدهم ..
بس ما كان ف يدى شى
نظراتهم كانت كلها حيره و يأس
و صراحه انا كمان حسيت ب حيره
الموضوع كان غريب شديد ..
عمر:طيب قلتِ انك شفتي نون كم مره .. ما لاحظتي شى لمن شفتيها؟
ملك:لا صراحه .. كانت بس لمن تجي الاجواء بتكون غريبه .. شفتها مره مع ابوها .. م كان عايز زول يعرف انها بتتعالج .. حتى لمن دخلته عليهم ابوها زعل اني شفتها ..
مهند فتح تلفونو و جاب صوره نون
مهند:دى الشخصيه ال بتتكلمي عنها صح؟
ملك:لا .. اول مره اشوفها
عمر:كيف ؟؟ دى هيا نون محمد .. ح تكوني لخبطى
ملك:لا انا متأكده انو ما دى ال كانت بتجي ل بابا
مهند استغرب شديد
و جاب لي صوره وحده ثانيه
مهند:دى؟
عمر:دى وعد العلاقه شنو؟
ملك:لا م دى
مهند جاب صوره ثانيه و كانت صوره حياه
مهند:دى ؟؟
ركزته ف الصوره
ملك:ايوا .. دى ال كانت بتجي ل بابا .. انا متأكده .. شفتها زى ثلاثه مرات ..
ما كنت فاهمه شى
بس تعابير الاستغراب و الخلعه ف وشهم كانت واضحه جدا
نظراتهم لبعض كانت غريبه شديد ..
….
#ققزه_زمنيه :
بعد كم ساعه من الأحداث الفوق :
مهند كان قاعد ف المكتب و سرحان
فجأه جاتو رساله ..
محتوى الرساله :
" روان كانت بريئه .. و انا عندى الدليل .."
مهند قلبو بدء يدق بسرعه .. يدو كانت بترجف ..
و فجأه رجع بالزمن ورى ..
#فلاش_باك :
مهند:اصدقك كيف يا روان ؟؟ اى شى ضدك .. فاهمه يعني شنو اى شى ضدك ؟؟؟
روان:معقوله !! انا حبيبتك .. انا روان يا مهند !! ما مهم عندى الأدله و لا مهم عندى شى .. مهم عندى انت .. معقول تصدق ده كلو و تكذبني !!
مهند:اصلاً من البدايه م كان مفروض اثق فيك .. ما اتوقعته انو ده كلو يطلع منك .. كنت شايفك انظف وحده ف الحياه .. بس حسي !!! حسي عرفته حقيقتك
مهند كان طالع بس روان مسكت يدو و قعدت ف الارض
روان:ح اموت .. بس م ح اموت بسبب الظلم ال انا فيهُ .. ح اموت لانو اكتر زول اتوقعتو حافظني و ح يصدقني خذلني .. الوجع ال جا منك .. اسوء مليون مره من ال كل الحاصل ..
مهند سحب يدو و طلع ..
كان حاسس بألم م طبيعي ..
قلبو واجعو ع حاله روان ..
بس م كان بقدر يكذب كل ال منطق ال قدامو ..
بعدها بكم ساعه سمع الناس جايطه ف القسم و الحركه م طبيعيه ..
و بعدها سمع صوت بكا و ناس واقفين جمبه غرفه التحقيق ال كان فيها روان ..
كان حاسس خطواتو تقيله ..
م قادر ياخذ نفس ..
خايف .. كان خايف من المنظر ال ح يشوفو هناك ..
بس شافو ..
حبيبة عمرو ..
في الارض .. حولينها دم ..
ما كذبت لمن قالت انها ح تموت ..
م كذبت لمن قالت انها ح تموت بسببو ..
كان ألم خذلانها السبب الحقيقي عشان تستسلم
ما الناس .. و لا وضعها ..
كان مهند السبب ..
ماتت مُنتحره ..
ماتت و ثبتت عليها التهمه
أنها خاينه ..
" أحياناً العشم ال بنختُ لناس معينه ..
و ثقتنا أنهم ابداً ما ح يغدرو فينا
هو اول اسباب هزيمتنا ف الحياة ..
عشان كده ..
ما تثق، ما تتعشم ..
ما تحب ."
يتبع …