رواية العروس في الثوب الاسود الفصل الثالث والاربعون 43 بقلم عبير ادريس

   رواية العروس في الثوب الاسود الفصل الثالث والاربعون 43 بقلم عبير ادريس

رسيل

سلام لگلبك الماحن 

وسلام لدمك الباࢪد 

يالماگتلي اجيك شبية افشل الࢪوح ليش اكشخ وانطࢪك چني متواعد..

ايهم

نحنلكم ومابينا بعد وانتوا ومروتكم

ترة مو زينة صحتنا يكون اخبارنا تهمكم

تعودنا على ريحتكم طبعكم دمكم البارد

ومنقشمر العين بناس بيهم شبه من عندكم

__________ 

مرت الايام والاشهر وحالنا نفس الحال وبيوم من الايام جنت نايمة ودك المنبه ساعة خمسة ونص الصبح مديت ايدي سحبت الموبايل من على الميز طفيته لزمت راسي فركته بهوس صارلي ايام مانايمة تعبانة من التفكير المستمر  بسبب اقتراب موعد عملية حسام شكد ردت اروح وياه رفض رفض قاطع  كعدت مديت ايدي حتى اكعده لكيته ماكو كايم شغلت ضوء التيبلام وكمت مشيت للباب فتحته وطلعت مديت راسي من المحجر صحت بصوت ناصي حتى لايكعدون الجهال

رسيل : حسام انت جوة ؟

اجاني صوته يهمس 

حسام : جوة تعالي تريكي ويانا

باوعت لكيتهم كاعدين بالهول هو وخالو وزوجته لميت شعري بالقراصة ونزلت وصلت يمهم ،صبحت عليهم جاوبوني بعدها خالو كال.

محمد: تعالي يابه اكعدي يمي تريكي 

رسيل : اي خالو..

كعدت اكل وعيوني على حسام مانزل عيونه عن الاكل يتفادى نظراتي ردت احجيه سألته

رسيل : حسام ساعة بيش كعدت؟

بدون مايباوعلي جر صمونتين من العلاكة وخلاهم كبالي وكال

حسام : مانايم اصلاً

رسيل : ليش ؟

جر نفس تنهد وكال

حسام: لان وراية سفر ماكدرت 

اني اعرفه ليش مانايم بعده يفكر بنفس الموضوع حسام صار عنده هوس بالماضي مالتي شكد حاولت انسى واجتاز هاي المرحلة وفعلاً بديت انساها من فترة بس هو بعد الموقف اللي صار ابد ما رجع حسام القديم شكد حجيت وياه وتوسلته كلتله من نطقت بأسم ايهم جنت نايمة وتعبانة ذابة نفسي ابد مو بقصد شلون هيج اسوي بس ما سمعني وصلنا للأنفصال بوقتها وخالو رجعنا ولحد الآن حياتنا مكركبة لكن ما تخلى من الاهتمام والحرص  علية وعلى الاطفال..

جريت نفس بديت اكل سرحت قطع صفنتي صوت عمة زهرة وهي تكول

زهرة : عيونج على البيت ورانا هاي اختج مايعتمد عليها حايرتلي بشعرها والمكياج وكال اظفري انكسر وهاي الخرابيط مالتها 

رسيل : صار عمة لا يظل بالج

حسام : اني راح اسبح واغير ملابسي وانتم لا تتأخرون ورانا طريق واخاف يلزمنا الازدحام

محمد : اي يابه على كيفك لاتنخبص نلحك بعد عندنا وقت

هز راسه وكام دخل للحمام واني صعدت جبتله ملابس ومنشفة نزلت دكيت الباب صاح منو كلتله هاي ملابسك جبتهن جاوبني بحده

حسام : اخذت ليش تعبتي نفسج ؟ 

جريت نفس ورجعت للهول خليت الملابس على القنفة وشلت الصينية رحت للمطبخ غسلت المواعين ورجعت للهول جانت عمة زهرة تلبس بالجواريب مالتها رفعت راسها شافتني وكالت

زهرة : تسوكنا اني وخالج البارحة اللحم بالثلاجة والدجاج قسمته الصدر وحد والجنح وحد والافخاذ وحد وخليتهم بالفريز مال ثلاجة 

رسيل : عاشت ايدج ماقصرتي

زهرة : عيونج على البيت والجهال لا يطلعون يشترون وحدهم ديري بالج

رسيل : صار محتاجتني بعد لو اصعد اكمل الجنطة مال حسام 

رفعت راسها باوعتلي عاكدة حاجبها

زهرة : ليش لسه ما كملتي جنطته وراح نطلع وين جنتي بله ؟ 

رسيل : عمة كملتها بس ظلت كم شغلة هسه راح اصعد واخليهن ليفوك ..

هزت راسها وايديها عفتها وصعدت ماتحبني لو اصبها ذهب من فوك ليجوه دخلت لغرفتي توجهت لميز التواليت اخذت كم عطر خليتهم بالجنطة والفرشة والسبري مال شعر والساعات  خليلته اثنين جنت مدنكة انفتح الباب رفعت راسي دخل همست..

رسيل : نعيماً

حسام : شكراً

شمر المنشفة على السرير وتوجه للكنتور لبس ملابسه ورجع للميز باوع والتفتلي 

حسام : وين السبري والمشط؟

رسيل : ذني بالجنطة..

حسام : وشلون امشط شبيج رسيل بالج وين؟

بدون ما احجي اخذت الفرجة والسبري وخليتهم على الميز كدامه مد ايده مشط شعره ورش سبريه رغم جماله بس تجاعيد التفكير والتعب غالبة على ملامحه حسام هواي كبر من التفكير وهواي محمل نفسه فوك طاقتها شكد حاولت احتويه وامشي حياتنا بس دائماً جان يكولي هذا كله تمثيل ماكاعد احسج الية ولا احس اهتمامج نابع من گلبج احسه فرض مفروض عليج واداء واجب لا اكثر جنت ابرر وابجي ومرات  اعصابي تنهار لان فعلاً من كاعد انطي من گلبي بس هو هواي يتحسس مني رغم يحبني ويغار علية ويحاول بكل طريقة يسعدني بس مأذي نفسه هواي مرات احسه كتلة من الهم وتمشي بالكاع حتى ضحكاته مصطنعة واحسها كذب

تقرب حتى يخلي المشط والسبري بالجنطة شاف الساعات بالجيب الثاني عكد حاجبة ونتر بية..

حسام : ترة اني رايح حتى اسوي عملية مو سفرة اتونس واكشخ بيها

رسيل : انت شبيك وياية ليش ماكاعد تتقبل مني حجاية واي تصرف يبدر مني سواء بقصد او بدون تسويه مشكلة حسام حبيبي انت ابو اولادي ومستحيل افكر بغيرك شيل هاي الافكار من عقلك الله يخليك

صفن بوجهي عاكد حاجبه نزلت نظراته على شفايفي وهمس..

حسام : تعبتيني رسيل هواي تعبت بسببج

رسيل : انت متعب نفسك ومأذيها بالتفكير وكلتلك قبل فترة شنو اللي يريحك اسويه تريد ننفصل تريد نكمل شنو يعجبك؟انت سكتت وهسه هم ساكت بس تتحجج علية هواي..

دنك راسه بمستوى راسي وهمس

حسام : ليش دائماً تخيريني بين الجنة والنار ليش ؟ وانتِ بقرارة نفسج تعرفين كلش زين حسام بدون رسيل مايكدر يكمل 

رسيل : اذا اني الجنة بالنسبة الك ليش ماتعيش بيها مرتاح ليش تأذيني وتأذي نفسك حسام حبيبي والله انت صرت جزء مني ومن اولادي انت اللي سويته ويانا مستحيل احد يسويه انت انتشلتني من العدم وبفضلك صارت عندي عائلة دافية شنو اريد انسى منك حنيتك علينا لو تعبك ويانا لو تقبلك الية بكل عيوبي وصبرك على سيئاتي تدري ابد ما انسى شلون احتويتني واحتضنتي اني وابني الكل نفرنا بوقت من الاوقات وبسببي عاديت امك بربك تتخيل بعد كل هذا اني اغدر بهيج انسان لو اخونه ؟ بس تبعات الماضي مرات تجي بالبال خصوصاً من اتعب هذا الشي لا بيدي ولا بيدك وجنت نايمة والنايم مثل الميت ما عليه حساب ولا ينوخذ بتصرفاته وكلامه الله يخليك للمرة الالف اطلب منك تسامحني واتمنى لو تقبل اجي وياك واداريك وارجع ولو جزء بسيط من السويته وياية..

جنت احجي وهو نظراته تتوزع على وجهي تقرب اكثر وخلى جبينه على جبيني وكال

حسام : لج انتِ روحي واني كلش اغار عليج تعبت من التفكير والخوف لاييجي يوم وتفضلين ايهم علية خايف ياخذ سند ويلوي ايدج بيه

رسيل : صدكني مايسويها جان سواها قبل لا اتزوج مو هسه عندي ولد اثنين ومستقرة ييجي يزعزع استقراري شبيك حسام فكرلها صح

حسام :اذا هيج ليش عمج ناطي خبر لابوية يريدون ياخذون سند يعيش يمهم ومن ابوية رفض كال خلي تجي وياه امه ونبنيلهم بيت بكاع مروان الله يرحمه

رسيل : احتمال حسوا بالذنب او ضميرهم يوجعهم بسبب وصية مروان ومو بعيدة ييجيهم زعلان بالحلم مثلما اجاني مرة و كال اني مرتاح ومأمن عليكم واجاه ابوه راد يسلم عليه مروان ماجاوبه صدكني يشوفوه بالحلم زعلان منهم لهذا هيج كاعد يتصرفون..

حسام : ما اعرف بالنسبة الية سند ما انطيه لو تصير دم اني ربيته وروحي صارت بيه تدرين مرات احس هو ابني الجبير مو صادق

رسيل : وهو هم صار يصيحلك بابا رغم شكد منعته واحجي وياه اكوله بابا اسمه مروان بابا يحبك واشوفه الصور بس هو يكول اني ما اتذكره بابا حسام حتى بالمدرسة متعارك وية اصدقاءه لان يكولوله انت سند مروان مو سند حسام

حسام : ياحبيبي هاي شوكت شو ما حاجيتلي 

رسيل : العام بس ماصارت فرصة احجيلك لان علاقتنا جانت متوترة بوقتها ونسيت هسة اجتي ببالي..

تقرب حضني ودفن راسه برقبتي باس راسي ورجع حضني للمرة الثانية بادلته الحضن و همست بأذنه

رسيل : وراح تصير اب للمرة الثانية

وخرني من حضنه مصدوم رمش بعيونه وميل راسه صافن بملامحي رجع عدل راسه وكال

حسام : رسيل بدون شقة ترة وراية سفر وعملية يعني ابد مو وقتج

بضحكه همست..

رسيل : شوف اني ادري قبل كم يوم بس ماحجيت حتى ما تتأجل سفرتك 

قاطعني عاكد حاجبه

حسام : ليش هسه حجيتي ؟

رسيل : حتى يصيرلك حافز تتعالج وترجعلنا لان راح يصير عندنا نونو جديد..

 دمعت عيونه حاول يخفي دموعه بس خانته ونزلت تنهد بعمق وكال..

حسام : بربج رسيل هذا هو بعد ماكو عناد ولا خبال ولا زعل ولا اريد انفصل تره تعبت اريد ارتاح

لفيت ايدي حول رقبته وتقربت منه همست بدلال

رسيل : ماكو 

حسام : اكيد؟

حجاها ونظراته تتوزع على وجهي مستفسرة 

رسيل : اكيد ياروحي انت

ضحك هز راسه والتفت على الجهة الثانية كال

حسام : هم حامل وهم بطلت خبال وزعل وهم حاضنتني واخرها تتغزل بية وياها ياروحي اكولج لزميني اخاف مصخن وكل هذا يطلع هذيان و وهم..

شال ايدي خلاها على جبينه ضحكت ورفعت نفسي طبعت قبله على خده بادلني بمثلها وكال

حسام : اكمل لبس حتى اطلع تأخرت وان شاءالله ارجع معافى سليم لعيونكم تصدكين هسه يله حبيت الحياة يارسيل

رسيل : اعتذر عن كلشي صار وأأكدلك مو بيدي واللي عشته شي مو هين يكفي عذاب الضمير مرافقني بكل الفترة اللي راحت

حسام :صدكيني ياحبيبتي تحملت اشياء اكبر رجل مايتحملها لو جبل كان انهد  خصوصاً الموقف الاخير لهذا ردة فعلي هالمرة جانت عنيفة وياج

رسيل : الاعتذار يكفي برأيك ؟ 

حسام : طفلي بداخلج اهتمي بيه ولا تفكرين بأي شي ثاني وديري بالج على نفسج وعلى سند وصادق وعيونج على ريناد وجهالها ترة هاي هم طفلة بس امي تغيب عن البيت تلتهي عن جهالها

رسيل : اعرف لاتوصي حريص روح وفكر بنفسك وارجعلنا سالم

حسام : بحيل الله حبيبتي هاي مصرف خليلتج واي شي تحتاجين تندلين الفلوس وين اخذي اللي يكفيج ماشي ولا تبخلين بشي على نفسج وعلى الجهال..

رسيل : حسام عندي ومكفيتني شنو الفرق بيني وبينك

حسام : هو لان ماكو فرق اريدج تصرفين مني اني الرجال مو صحيح؟

رسيل : صحيح

حسام : يله يابه اني رايح لاتنسين اي شي وصيتج عليه..

حجاها شال جنطته تقرب باس راسي وطلع بنزلته صعد سند صاح بابا ترك الجنطة دنك شاله باسه وسند حضن رقبته

رسيل : ثكيل عليك حسام انزل ماما حبيبي

حسام : عوفيه مرتاح 

رسيل : ياحسام 

حسام : لخاطري عوفيه 

سكتت نزل شايله وصاح على ثائر صعد نزل الجنطة  وصتني عمتي على كم شغلة وخالو هم وهواي اكدوا علية بخصوص ريناد جانت واكفة مبتسمة على سوالفهم طلعوا مودعيهم بدموعنا متأملين رجوعهم بنتيجة زينة وناجحة بأذن الله..

بعدها اليوم مر عادي مثل كل يوم بين الاكل والترتيبات ثاني يوم كعدنا الصبح ساعة تسعة جنا كاعدين نتريك وريناد بعدها كالت

ريناد : رسوله اريد اروح للسوك شلون ؟

رسيل : وحدج لو وية ثائر؟

ريناد : ياثائر وين يقبل يفتر اريد اروح وياج 

رسيل : والجهال وين نخليهم ؟

ريناد : يم ثائر 

حجتها وضحكت

رسيل : شكد سخيفة وين يتحملهم ولج وكحين

ريناد : روحي اسأليه تروح وية ريناد تشتري ملابس لو تخلي الجهال يمك واني اروح وياها وشوفي جوابه شنو

رسيل : معليه استحي احجي وياه ،  تريدين انتِ كوليله 

ريناد : طبعاً اني اكوله بس حبيت اكولج رجلي ما يتحمل فرارة..

رسيل : اذا انتِ كلشي ما يعجبج

ريناد : رسيل شكد صايرة عجوزة تدرين بروحج مو؟

رسيل : اي ادري عفت الشباب الج حبيبتي

ريناد : واحلى عجوزة هم 

رسيل: حقيرة

ريناد : يله كومي حبابة مادام ابني نايم..

رسيل : يله خلصت  اروح ابدل وانتِ  وصي رجلج على صادق ترة عمتي تلعب بينا طوبة اذا كسرلها شي..

ريناد : ماشي

رفعت شعرها ليفوك وطلعت من المطبخ  ريناد صار عمرها ٣٢ سنة ولحد الان روحها طفولية وتحب الحياة وبعدها نفس حياتنا القديمة اللي جنا عايشيها مشت على نفس النمط كلشي متغير بيها لان بنفس المكان ونفس البيئة اللي نشأت بيها وكاعد تكمل حياتها  بس اني اني اخ يا اني وين رحت ويم منو عشت وبمنو تعلقت والمن حبيت اريد انسى مااكدر مشكلتي كلشي صار وياية يعصف بعقلي وبگلبي سنوات من عمري مستحيل اكدر امسحها واتجاوزها كأنما ماعشتها ، انسى مروان الله يرحمه شلون يضحك من يشوفني وشلون حبيته بعد الحرب اللي صارت بيننا لو ايهم اللي فاركني ومابررلي ليش وشنو الاسباب غير دفتر مروان وبس

لو حسام شكد تحملني وشكد حاول يعالجني بالحجي والافعال بس اني جنت منتهية هسه يله نكدر نكول بديت اتأقلم وية حياتي الجديدة..

بس ظل شي واحد وبعدها يبرد قلبي مثل اهل الميت  شلون يعرفون هو مات وخلص يصدكون هذا الشي من يزورون قبره بعد الاربعين اني هم هيج اريد اشوف ايهم واحجي وياه حتى اقطع كل سبل الماضي وكل التساؤلات اللي تعصف بذهني

ابدل وافكر واحجي وية نفسي حسيت دكات خفيفة على الباب التفتت ريناد مخصرة ايدها و واكفة باوعتلها همست

رسيل : شكو ؟

ريناد : رجعنا نحجي وية نفسنا رسيل مو بطلنا؟ 

رسيل : هيج اجتي ببالي فكرة وراحت

ريناد : بابا عيشي حياتج ترة لا راح ترجعين مروان ولا راح يفيدج عمو ايهم

رسيل : اعرف الله يرحم الماتوا ويسعد العايشين

ريناد : من گلبج ؟

رسيل : طبعاً ..

رفعت حاجبها مامصدكه طلعت وكالت

ريناد : يله خلصتي راح انزل قبلج

رسيل : اي اجيت بس اجيب فلوس

اخذت الفلوس خليتهم بالجزدان ونزلت جوا لكيت ثائر كاعد بالهول عيونه مورمة مال نوم وضايج سلمت عليه هز راسه بدون مايجاوبني عرفته ضايج طلعنا ورحنا للسوك افترينا كل المحلات ورجعنالهن مره ثانية وثالثة وريناد ما يعجبها شي وصلت مرحلة من التعب ردت ابجي بس ماحجيت حست بية رمشتلي بعيونها متوسلة..

ريناد : خلصت آخر محل هذا حبابة حبيبتي..

رسيل : ريناد صارت ساعة وحدة تدرين صارلنا اربع ساعات وبعدنا غداء مامسوين.

ريناد : هسه اخابر ثأوري يجيبلنا غداء من برا وريحي نفسج اليوم من الطبخ

رسيل : يابرودج يا اختي..

ريناد : الحياة هيج تتطلب لا تشيلين هم شي تعيشين بسلام وراحة بال ويظل قلبج نقي

رسيل : كملي راح العب بيج طوبة

ريناد : يلة يلة خلصت

وال يلة مالتها نصف ساعة  اشترت هواي اشياء اخذت منها بعض الاكياس وهي شالت البقية رجعنا مشي نسولف و الشمس بعيونا وبالي يم حسام اريد ارجع اخابره اشوف وصلوا لو بعدهم  دخلنا بفرعنا ريناد شهكت رفعت راسي باوعتلها ونترت بيها

رسيل : وسم شكو فززتيني؟

ريناد : عمو ايهم وياسر ونور 

هي نطقت بأسمهم لو الدنيا كلها وكعت على راسي ايدي رخت رجلي ما اكدر اوكف عليها الاكياس وكعت من ايدي

ريناد : هاي شبيج؟

بدون ما التفت ناحية البيت كلتلها

رسيل : بطلي كذب وشقة سخيف عاد..

ريناد : كذب شنو شوفيهم كدامج

تحجي مبتسمة وتأشر عليهم

التفتت باوعتلهم لو رجعت لهذيج السنين كلها من اولها لآخرها وكأنما بعدني عايشة وياهم جرتني ريناد وتهمس

ريناد : امشي رسيل وتصرفي طبيعي شبيج ؟

رسيل : انتِ من كل عقلج تحجين وين امشي وليش جايين شنو الي يريدوه مني يخربون حياتي لو ياخذون ابني ليش جايين من بعد كل هاي السنين ؟ 

ريناد : تسأليني الي امشي ونشوف بس صيري قوية كدامهم لا تضعفين ولا تنزلين دمعة ديري بالج..

شالت الاكياس من الارض ومشت تجرني كأنما اني اختها الصغيرة طيلة المسافة البيني وبينهم عيونه مانزلها من علية وكل النظرات جانت عتب بعتب نظراتي بيها قساوة ونظراته بيها اسف وصلت يمهم نور ركضت علية حضنتني بكل قوة هيجت شكو جرح غافي بية وصحى مروان اللي بداخلي صحى جرح ايهم صحت جروحي كلها اي يارسيل من نويتي تعيشين رجعولج صدفة لو هذا حظي هيج ما ناوي يجيبها البر..

نور : رسيل انه اعتذر والله موبيدي اكطع منج هذا ياسر صوجه وجبته وياي واجيت ماقبلت اجي وحدي حتى يبررلج موقفي..

تحجي وتبجي وتأشر بيديها على ياسر

باوعتله يباوعلي ويرجع يدنك اما ايهم منتجي على البنيد ومكتف ايديه ميل راسه يباوعلنا وعيونه متروسه دموع

بلعت ريكي بقهر اريد اصرخ اريد افتهم ليش هيج صار بية ليش هذا گلبي كل مرة يتكطع ليش انعادت علية حياتي القديمة مو نسيت وبديت اعيش صح

قطع تفكيري ياسر من كال

ياسر : شلونج بنت عمي؟ 

باوعتله خزرته ردت اضربه لوما واكفين بالشارع جرتني ريناد دخلتني جوا لان شافتني من اتجهت عليه عرفتني راح اسوي شي لان هو وايهم قطعوا كل سبل الوصول الهم وماخلوني اعرف شي عنهم كل هاي السنين خلوني بحسرتهم وذلونا اني وابني دخلت جول وكفت بالهول وهم دخلوا وراية تقدم ياسر جان راسه مشيب ومبين كبران مو مثل من عفتهم وايهم هم شعره متروس شيب 

ياسر : هسه هنا اخذي راحتج احجي صيحي تعاركي احنا جايين نتبارة الذمم

التفتت عليه باوعتله وعطت بدون وعي

رسيل : ولك ياذمم اللي جاي تتبارة عليها ؟ ها ياذمم التحجي عنها ارملة اخوكم شمرتوها بدون معيل بدون ماتعرفون مصيرها ومصير ابنها هذه وصية اخوكم ؟ عفية عليكم خوش طبقتوها ابن مروان العزيز يتربى عند ناس مو اهله يا حيف وياوسفة عليكم وعلى شواربكم اي والله..

ظليت احجي ودموعي تنزل من وحدها والرجيف اخذني بعدها ريناد جابتلي مي نور غسلت وجهي وكعدتني ظليت اتنفس بصعوبة احس نفسي انكطع ورجعلي من بعد سكوت دام اكثر من ربع ساعة سمعت صوته وهو يكول

ايهم : شلونج رسيل ؟

رفعت عيوني باوعتله لو انهارت الدنيا علينا هو يبجي واني ابجي هو يشهك واني اشهك ، صح غلط اللي كاعد يصير ويمكن خيانة بس المشاعر والاحاسيس والاشياء اللي صارتلنا مو بالايد رغم اثنينا تزوجنا وعشنا حياتنا بس فراكنا جان غصب مثل الطفل من يفطموه من امه بدون ارادته 

ريناد : من رخصتكم تعالي نور وياية ياسر تعال ثائر يريدك بالمطبخ

بعدين عرفت ثائر متعارك وية ريناد لان جايين بدون علم خالو وحسام بس ريناد قنعته يتم اللقاء بيني وبين ايهم بدون مايسوي مشاكل، حتى تنحط النقاط على الحروف وكلشي ينتهي لهذا اختصر كلشي وطلب ياسر يروح وياه

طلعوا كلهم وانسد علينا الباب جان كاعد كبالي وايديه ترجف رجليه تهتز جبينه ينقط مي شفايفه كأنما طفل ويبجي كلشي جان بيه يريد ينفجر مسح وجهه واستغفر ربه وكام مشى وصل يمي كعد على القنفة اللي جنت كاعدة عليها بمسافة تفصلني عنه اقل من متر

رجليه تهتز صابني دوار حجيت بصوت مبحوح واشرت على رجليه حتى يوكفها

رسيل : عفية دخت

ايهم : آسف 

جريت نفس منتظرته يحجي اريده هو يبادر كأنما قرأ مخيلتي كال

ايهم : يا رسيل يابنت عمي ياغالية يامرت الغالي ياحبيبة الگلب الماكدرت انساها اجيتج اليوم حتى ابرد گلبي واحجيلج اللي صار حتى تكونين بالصورة وبنفس الوقت اعيش حالي حال البشر لان انه ما عايش انه ميت تدرين بية لو لا؟

التفتت عليه عيونه مورمة ولونهم احمر

رسيل : صوجك وهذا اقل عقاب الك تستاهل اللي صارلك ولو ما اعرف شنو صار بس تستاهله لك تدري انت شنو سويت بية ؟ من يوم اللي دزيتلي الاغنية وخليتني اسمعها وبعدها حضرتني اني ماصحيت وخطيتي بركبتك بكل شي سيء عشته

ايهم : خلصتي ؟

رسيل :ما خلصت لو اشرب من دمك مايبرد گلبي 

ايهم : هم حقج بس انه تعبان اكثر منج تدرين انه فقدت  اعز اثنين على گلبي وبنفس الفترة هم اخوية وصديقي وبمثابة ابوية مروان الله يرحمه وهم حبيبتي والوحيدة اللي گلبي رفلها ودك دكات مخربطة وما انتظمت بعدها وهي انتِ ، رسيل انه شكد ما نفسي بيج شكد ما حاربتها ما تعرفين شنو سويت حتى اكف عن حبج اللي صارلي محد يتحمله

رسيل : كل اعذارك واهية واصلاً حرامات اكعد اعاتبك ولو انت صدك تحبني ولو شوية جان عفتني بشقتي وما تطلكني لو اذا تريد بعد فترة طلكني جان احنا لحد الان باقين تحت ظلكم واني باقية على ذكرى اخوك مو هيج تشمروني وما تسألون علية لهذا اي عذر ماعندكم واي تبرير مرفوض والف الحمدلله من الله رزقني برجال صدك عوضني عن كلشي شفته وياكم..

ايهم : رسيل مستحيل اخليج كبالي بنفس البيت وما اسوي شي وتدرين انه نفسي بيج 

رسيل : مو تكول تحرمتي علية من قريت دفتر مروان بعد شنو؟ 

ايهم : صح ولحد الان بعدني على نفس الرأي 

قاطعته بحدة

رسيل : لعد ليش اجيت؟ تعكر صفو حياتي لو تطلكني حتى ارجعلك ونعيد ايامنا ليش راجع؟

ايهم : اجيت حتى ابلغج بطلب امي  تريد تشوفج لان هاي ايامها الاخيرة 

اخذ نفس طويل وزفرة بعدها كال

ايهم : واجيت اشوفج واشوف سند واريدج تبريني الذمة

رسيل : كلهم ممكن ابريهم الذمة الا انت يا ايهم مستحيل وامك ما اروحلها ولا اريد اشوفها احتمال اخابرها اي...

فتح عيونه وبهت بعدها همس مخنوك

ايهم : زين ليش؟

رسيل : لك انت خليت بگلبي وبكل كل شخص عرف بقصتي غصة ما تنسي وتكولي شنو سويت

ايهم : لو شايفة الانه شفته تسوين اللي سويته واكثر  يارسيل

رسيل : شفت كلشي وقريت بس مع ذلك ما اعذرك جان كدرت تخلينا جوة جناحك وقريبين عليك وتدارينا مو شرط تتزوجني

فرك وجهه بتوتر ضرب ايد بأيد بعدها كال..

ايهم : لا ماشفتي ولا قريتي كلشي

عكدت حاجبي مستغربة

رسيل : شنو يعني مافهمت؟

ايهم : لو شايفة كلشي مروان كاتبة جان ماكدرتي تعيشين وتكملين حياتج يارسيل جان لحد الان انتِ تنوحين وما متزوجة غيره خليتج تقرين الاشياء الخفيفة حتى ماتحسين بذنب ولا توكف حياتج يم هذا الحد٣

رسيل : وليش هسه تريدني اشوف هسه وبهذا الوقت؟

ايهم : ما اريدج تشوفين بس كاعد اوضحلج اللي قريته مستحيل اكدر انساه لو اتجاوزه مروان يتنفسج يارسيل يحبج ومات وهو خايف لا اخذج انه..

رسيل : شنو يعني ؟

ايهم : مروان كاتب وصية اذا مات محد يتزوجج من عندنا لا اخوانه ولا واولاد عمامه وهو طلب بالوصية اجيبج لخالج 

صفنت بوجهه ظليت باهته عقلي ماكاعد يستوعب اللي اسمعه..

رسيل : منو يكول كلامك صحيح؟

ايهم : يايوم مكذب عليج ؟

رسيل : شوفني وين كاتب؟

ايهم : تتعبين عوفي

رسيل : اني اريد اتعب شوفني رجاءاً

ايهم : رسيل لاتعاندين

بجيت بغصة وعطت بصوت مكتوم

رسيل : اريد اشوف لعبتكم يا اولاد عمي شنو سويتوا بية انت واخوانك وشلون لعبتوا بحالي لعب..

بقهر كال

ايهم : وانه ما صرت لعبة للقدر يا رسيل انه انظلمت اكثر منكم كلكم 

رسيل : بس جان كدرت تكعدني كبالك وتفهمني وتخليني اختار مو انت تحدد حياتي وتجبرني اعيش شي اني ما رايدته واتأقلم على شي جان الموت علية اهون منه 

ايهم : مو انه اللي حددت حياتج ولا انه اللي جبرتج هاي وصية زوجج وابوي من سمع وقرأ كلشي وافق ترجعون لهنا  الا برأيج انه وابوي وياسر نفرط بيكم بسهولة لوما وصية مروان

رسيل : هسه انت ضربتني على راسي تدري لو لا ؟ شوفني اريد اقرأ كلشي ما اريد اي حرف تخفيه عني مروان ليش هيج وصة وليش هيج تصرف عقلي راح يوكف..

ايهم : ما انصحج تتأذين انه علمودج  بالعكس الراح تشوفيه تلكين بيه برائتي بس اذية الج

رسيل : اريد اشوف مهما يكلف الامر

ايهم : يعني مصرة؟

رسيل : اي

جر نفس طلع موبايله من جيبه رفع ايديه فرك وجهه تأفأف وظل يقلب بالموبايل تحمحم وكال

ايهم : هاي الاوراق قطعتهن من الدفتر حتى ما تقريهن وهاي الوصية مصدقة من محامي عائلتنا اقري شنو مكتوب بالوصية مالته..

اخذت الموبايل من ايديه قريت الوصية مكتوب بيها كلشي يضمن حقوقي وحقوق ابني بكل املاك مروان ومن ضمن الورثة امه وابوه هم ومذمم عليهم اي واحد بيهم يتزوجني  وكاتب اذا واحد من اخوانه جبروه ياخذني سواء ايهم او ياسر يرفض رفض قاطع ويرجعوني لبيت خالي اني وسند بدون ما يبلغوني  بالاسباب وكاتب يشترون بيت ألنا بأي مكان يعجبني وبأي محافظة بس الأفضل ابقى يم خالي للأمان اكثر بينما يكبر ابني ونكدر نطلع وحدنا قلبت الصورة طلعت مذكراته جريت نفس وبديت اقرأ وعشت من جديد ذيج الاحداث نفسها

مروان 

صباح الخير ياحبيبتي الدافية ياشمس الشتاء يا هواء تشرين..

رسيلتي تدرين بيه شكد احبج مو؟ لا ماتدرين 

اريد اكلج شغلة وخايف احجيها كدامج حتى لا تشيلين همي وتظلين تفكرين بسوء وتتعبين بس ما اعرف من جنت اغني هاي الاغنية وانتِ تمنعيني اغنيها

تره جنت حاسس بيها وحاسس هاي ايامي الاخيرة وياكم ، ...

وكاتب كلمات الاغنية وبعدها كاتب

صدكيني انتِ وابني من اجمل الاشياء اللي صارتلي مرات افكر اكول لو رسيل ماكو بحياتي هم جان تغيرت هم جان بطلت سوالفي هم جان اتمنى انام سكران بشفايفج واصحى بخضار عيونج ؟

انتِ طلعتي افضل بهواي مما جنت متخيلج وألطف انسانة من تكونين بقمة هدوئج 

تتذكرين من جنتي دائماً تكولين مروان خلينا نبتعد عن بعض ونشوف منو يضعف ويشتاق اكثر انه لو انت  ؟

ماجنت اكولج انه الخسران بكل مرة انه اضعف وانه الاحن ولج طلعت جبان بالحب ، انه جمع الاضداد ومن كل ضد ضد..

جنتي تكولين خاف تمل مني يامروان وانه اجاوبج على نفس الوتيرة حتى لو اصيب بالتخمة ما راح امل منج

جنت اخاف ييجي يوم وتنسيني  ولحد الان خايف امانة يارسيل امانة لاتنطين روحج لرجال ثاني ولا ترتمين بحضن غريب ولاتحبين وممنوع تنحبين  لان حتى وانه ميت راح اغار  واحس بيج لا عبالج ما احس شلون بية اذا رحتي لغيري شلون مجرد فكرة تحركني حرك  رسيل لا تستغربين حبي الج بأنانية انه ماصدكت لكيت روحي بيج جنت ضايع ولكيت نفسي وكأن خضار عيونج تعكس صفاء روحي ونقاء قلبي  لكيت نفسي برسيل وما اظن الانسان يلكى نفسه مرتين مثلي مرة من صرتي حبيبتي وخاصة بية ومرة ثانية من صرت اب لأبنا احبج يا اغلى ممتلكاتي ديري بالج على نفسج...

اقرا دموعي بللت شاشة الموبايل ألتفتت على ايهم اكتافه تهتز كأنما اليوم مات مروان وانعاد علينا كلشي بشهكة كلتله

رسيل : مذمم عليكم اتزوج غيره شلون ما حجيتوا شلون ليش خليتوني اتزوج  غيره ليش ؟ المفروض اعرف واني اختار اكمل حياتي بالطريقة اللي تعجبني مو انتم تقررون عني..

بصوت مخنوك كال

ايهم : تتذكرين يوم الي خالج خابرنا وطلبج من ابوية ؟ 

بلعت ريكي مخنوكة هزيت راسي بأي..

ايهم : انه جنت جاي لبغداد ارجعج بس ابوي وعمامي منعوني اجي وكالوا عوفها تتزوج وتنستر اخوك مذمم عليكم بس ما ذمم على ابن خالها

كمت اضرب على رجلي واصيح 

رسيل : بكيفه ابوك يحدد مصيرنا اي ليش يا ايهم مو الف موبايل يمك جنت تكدر تتصل بية وتحجيلي ليش خليتوني اصارع حياتي وافكر هاي المدة كلها واحلل واستنتج واحقد واكره واريد انتقم ولك اصعب شعور عيشتوني بيه اصعب شي من تجهل الحقيقة  وتكعد اخمن بكيفك..

ايهم : رسيل انه عشت اللي كاعد تحجين عنه وما اريد اذكره هسه ،اليوم اجيت حتى احجيلج واتمنى تسامحيني لان عندي طفل واحد وماصار عندي غيره شغلي واكف وحياتي كلها سودة مامرتاح اريدج تسامحيني حتى اعيش وانتِ هم عيشي حياتج كافي اللي صارلنا..

رسيل : مو من حقي اسأل بس من باب الفضول اريد اسألك

ايهم : اسألي انه اليوم اجيت حتى نحجي كلشي بگلوبنا..

رسيل : كدرت تتقبل غيداء و تنساني؟

ايهم : تتذكرين من دزيتلج اغنية كاظم الساهر واللس تكول

أحبك حين أكون حبيب سواكِ

ويعثر دوماً لساني فأهتف بإسمك حين أنادي عليها

وأشعر اني اخون الحقيقة

حين أقارن بين حنيني إليكِ وبين حنيني إليها

فماذا تسمين هذا؟ انفصاماً؟

سقوطاً، هروباً، ضياعاً، دماراً، جنوناً؟

ماذا تسمين هذا التشدد؟

هذا التمزق، هذا العذاب الطويلا

وكيف تكون الخيانة حلاً؟ وكيف يكون النفاق جميلاً؟

هذا جوابي الج ماعندي غيره الله يوفقج بحياتج ويسعدج وحاولي تنسين اللي صار واللي حجيناه قد اكو شغلة انه هم اريد اعرفها..

رسيل : وهي ؟

ايهم : يا اغنية جان يغنيها مروان قبل لايموت ويكولج احس بيها

جريت نفس طويل وزفرته

رسيل : اوصيك بية لو متت بين الضلوع ادفني ماريد غيرك بالغسل بدموعك تغسلني بيدك تحل ليه الجفن وتحبني وتنيمني مسموح الك ذاك الوكت  تعاشر وليف بدالي صدكني مو دايم الك باجر واشد رحالي

ومن يغنيها جنت اصيح بيه ويكولي اخر شطر مو الج اغار انه اغار

هز راسه وجر نفس ، مسح وجهه وطلع للطرمة اجوي البنات نور وريناد ظلوا كاعدين يمي هم بوادي واني بوادي ثاني بعيد عنهم انفرشت السفرة واني بالي مو وياهم وية مروان واللي صارلي وبين ال ليش وشمعنى وبين الملامة ما اعرف شنو اسوي شعور ما اتمناه لاحد ألوب من قهري كعدوا يتغدون وكعدت نفس كعدتنا القديمة ببيت عمي هذا مكان مروان بصف ياسر وشقاهم وضحكهم يتردد بأذني شيصير لو عايشة بنصهم بعدني شيصير لو حياتي ظلت مرتبة الحمدلله على كل حال ايهم مد ايده ناوشني خبز رفعت عيوني باوعتله نظرته مكسورة اشرلي براسه يعني تهون هزيت راسي اخذت منه الخبز تغدينا وشربوا جاي  اسمع ريناد تسأل نور عن احوالهم تجاوبها واني استمع ماشاركت اللي سمعته من ايهم يكفيني عمر ليكدام 

نور وياسر صارت عندهم بنية وايهم عنده ولد عمره سنتين وبعد ماصار عنده اثنينهم مابيهم شي مايعرفون السبب منين وهذا كل اللي صار بعدها اخذوا سند كالوا اسبوع ونرجعه وراحوا بعدما فززوا كل جرح غافي بية بعد روحتهم وكعت طريحة الفراش اللي سمعته واللي صارلي ابد مو قليل يتصل حسام يتطمن وفرحته ما سايعته لان عمليته نجحت  وكالوله راح يشوف نتيجة ٧٠ بالمية تغيير ماحبيت اطفي فرحته  دست على نفسي وشاركته حس بية شي كلتله  عندي وحام ونفسيتي تعبانة تفهم الوضع وسكت، بعد اسبوع كمت على البيت لان قربت جية حسام رتبنا كلشي ثائر راح تسوك كلشي محتاجيه ، رجعوا من السفر يوم السبت تلكيناهم من الباب بالجكليت والهلاهل لخاطر ضحكته وفرحته قررت انسى كلشي واهتم بيه وبأولادي المهم عرفت الحقيقة صح جانت مرة بس ما اكدر اغير منها شي جنت حابة اكمل دراستي بس ما اعتقد راح اكدر بعدما صرت حامل بطفلي الثالث مسؤليتي كبرت والحمدلله على كل حال رجعت علاقتي بنور طبيعية ومرة سويت اتصال بأم مروان حجيت وياها وبريتها الذمة لخاطر مروان وخاطر سند لأن يبقون اهله حجت وياية وعبرت عن ندمها وطلبت مني ادير بالي على نفسي  وسند وكل شوية تعيد وتكرر سامحيني ، بعد فترة بسيطة سمعت بيها توفت..

      الفصل الرابع والاربعون والاخير من هنا 

 لقراءه باقي الفصول من هنا