رواية خطايا واجتثات الفصل الثامن عشر 18 بقلم نور علي البصري

رواية خطايا واجتثات الفصل الثامن عشر 18 بقلم نور علي البص 

 شـــــــــــــ♡ــــــــــــــيلان 

نظرات ألكل بأتجاه عمي غمضت عيوني وذبيت نفس مرتاحة من لفظ أسم بروان.. وحمدت ربي عمي أنسان حقاني ميظلمني بأبنه من صلبه أختار ربيبه.. 

بس بابا من ورى خشمه رد

: تريد أنطي بنتي للي ظل لا أهل ولا عشيرة تلفيه...؟! 

: بلا عشيرة وأحنا شنو؟ هذا أبن أختنا لو نسيت؟ أمه من أقاربنا شوف كاكه ماكو أحسن من بروان.. يناسبنا.. 

أعرف مستغرب ما خطبتها لأبني آدم.. أني أريد لبنتنا الأفضل و بروان.. هو المناسب الها.. 

هنا آدم.. صاح : بس أني أحبها! 

رد عمي..

: وهي متريدك شوف أبني آدم.. صح أنت الجبير بس بروان.. هم أبنا منكدر نتخلى عنه أمه من دمنا و لحمنا خسرها وخسر أخوانه بالإِبادة وأبوه مفقود.. 

رد بابا

: منو يكول مفقود؟ هاا خلي نحجي الواقع أبوه خاين عاف زوجته و أولاده قبل يومين من الإبادة شرد وما أخذهم وياه أبوه معارض لنظام بلدنا.. 

رد عمي

: لا تظن سوء جائز الرجل شهيد ضمن مجهولي الهوية المهم هذا ولدنا ويمنا رابي ما نعوفه كاكه.. 

شوف آدم.. متأكد أذا أسلمك حلالنا بشهر كله تضيعه لو أسلمك بنت عمك مراح تصونها أعرفك كلش زين.. 

لذا أختاريت الانسب اللي يسندك 

و يسندنا و يحافظ على أملاكنا هاي أراضي أجدادنا وحلالنا بكفالته الى أن أشوفك تصير صدك رجال يعتمد عليه.. 

مزارع الحنطة الدولة تعتمد عليها رغم الحكومة مقيدتنا بهواي أمور تخاف من محافظتنا ترتفع أقتصادياً ونرجع لموضوعنا بنت عمك ما ترغبلك.. 

سكت آدم.. و باوع النا بحقد و خلا وركض لبعيد أما بابا بين ممقتنع بقرار عمي بس أني أعرفه أبد ميقتنع ويريد آدم.. زوج الي.. 

لأنه وريث للأرض و الحلال و مناحل العسل حالة من حالي يريده لأسباب مادية بس أبوية و أعرفه ضعيف الشخصية كدام عمي لذا هز راسه 

بـ أي..

و بهيج صرت خطيبة بروان.. أبتسمت وحسيت بفرحته الي متنوصف أجمل عطلة قضيتها وأحلا ثلاث أشهر حفل خطوبتنا أجمل حفل كان والصور عكست بعيوني وعيونه سالوفه عشك كوردي وكورديه بيومها لبسنا الخواتم و الذهب الي تكفل بي عمي.. 

سألته عن وظيفته 

: باجر من تتخرج هم تبقى بالجنوب.. 

باوعلي مبتسم وكال 

: حالياً مدأتحرك على النقل أنتظر تتخرجين ياله عاد أني يمج هناك والله لو نتزوج أحسن حتى متسكنين بالأقسام.. 

دنكت و خليت أيدي بيده وخجلت أكوله أي أقبل نتزوج أفضل النا لأن ما متطمنه لسكوت آدم.. 

أستمرت الأيام هواي نطلع محد يعترض لأن مخطوبين ويمكن عمي راد يوفي لصديقه أبو بروان.. و لروح أم بروان.. لذا فضل بروان.. على أبنه 

و بيوم العائلة كاعدين أحنا و بيت عمي ببيت واحد معازلين حجه عمي  

: كاكا أبو شيلان.. خير البر عاجلة بنتك وحدها بالجنوب ونخاف عليها لذا الأفضل نزوجهم قبل بداية الدوام.. 

جان بروان.. يباوعلي و يبتسم عرفته رايح مقترح على عمي أبو آدم.. يقرب زواجنا رجعتله الإبتسامة دنكت خجلانة.. 

رجع عمي يكمل كلامه

: حتى تسكن وياه متحتاج أقسام وهم الخطوبة الطويلة ما أحبها.. 

: بس أني أريد بنتي تكمل دراسة أول.. 

: كاكه تعاندني يا يوم رفضتلي طلب.. 

دنك بابا أعرفة ميرفض طلب لعمي وكال 

: كيفك أنت أعرف مصلحتنا.. 

: مصلحة بنتك كاكه أبو شيلان.. 

خلا بابا وكام وأني فرحت بالقرار و أحس حتى بروان.. فرح عيونه تبتسم 

وتم زواجنا كان بشهر التاسع قبل لا أرجع للجامعة بأسابيع.. 

وقبل زواجي أتصلت بيه مريم.. 

أستغربت خاصة أخر مكالمة لبيتها طلعلي زوجها و هو يغلط علي وعلى 

خالتي وقوميتي فكلت بعد ما أخابر 

وبيوم دك التلفون جاوب بروان.. وشوي صاحني.. 

: بنت خالتج تريدج ..

رحت بساع فرحانة بس شفت الكاشف الرقم مو رقم بيتهم.. 

         مــــــــــــ♡ـــــــــــــريـم

شهور الهجر طولت وي نصير.. هو معاند الا أني أرجعلة ذليلة وأني معاندة ما أرجعلة مرتاحة بهذا الوضع رغم بسامير بيت جدو.. 

أشتاقيت هواي لماما الي من بداية زواجي ممتواصلين و انقطعت عنها بسبب نصير.. وأشتاقيت لبنت خالتي الي تبين متصلة على بيتي و نصير.. مرزلها وكايللها لا تتصل.. 

عرفت من سؤدد.. لأن يتواصلن هواي بينهن تلفون طبعاً رغم شيلان.. من دمي و بنت خالتي بس الواقع صارت علاقتها بصاحباتي أقوى و أقرب من علاقتها بيه.. 

عرفت من سؤدد.. أنو شيلان.. راح تتزوج بروان.. الولد اليجيها للجامعة دائماً هو أمه من أقارب أبوها فرحتلها كلش لذا قررت أتصل بيها.. 

جدو وبيبي نايمين قيلولة الظهر ومرت عمي الزغير عند أهلها أجازة زوجية وعمي بالشغل.. 

كعدت بالكلدور فريت الرقم وأتصلت 

بـ شيلان.. جاوبني صوت رجولي و باللغة الكوردية كل الفهمته منه مرحبا منو ويايه.. 

رغم أمي كوردية وأعرف لغتها بس كلش كورديتي سيئة حجيت بكلام كوردي بي أخطاء.. 

: أهلاً أني مريم.. أريد شيلان.. 

شويه وصوته يصيح شيلان.. و كلام كوردي سريع ما فهمته وراها صوت شيلان.. خليط كوردي على عربي أستلمتني.. 

: مريم.. ولج بذات مشتاقتلج وهذا زوجج كلش كرهته.. 

: أكولج حبوبة حاجيني عربي لا ترطنين كوردي والنوب سريع.. 

عادت الكالته الي

: والله يا شيلان.. أني زواجي فشل شسوي هاي الحياة جنت جاهل من تزوجته و محسبتها زين.. 

وكعت تحت مؤامرة و أستغفال من بيت جدي وعمامي ومنه هو هم طلع يحب وحدة وتزوجها وخلف منها أبنية وشامرني بيت جدو.. 

يجي يمر هاي أذا دزوا عليه حتى يشوف أبنه ويجيب بنته وياه مبين متعلق بيها كلش عموماً الله يهدي بالنسبه الي أنتهى.. 

: مريم.. طلبي طلاق.. 

: منو يطلق النوب يأخذون أبني.. 

: شنو كيفهم أكو قانون.. 

: هههه مو على بيت جدي كلشي يكدرون يسوون.. 

ظلت تحجيلي فرحانة بزواجها القريب وعزمتني بس أعتذرت لأن أدري محد ياخذني.. 

: شبيجن ياهيه الأعزمها تعتذر.. 

: أنتِ بالـشمال شيلان.. بعيدة علينا خية وعذرينا من تداومين وتجين النا ندلعج بهدية عرسج.. 

ضحكت خجلانة و يمها صوت شاب بالكوردي يحاجيها من نبرته الوصلتلي ديتغزل ومن ردودها ذايبه بحبه عاد نهيت الاتصال وياها وسديته.. 

ودعيت ألها يارب قسمتها كون أحسن من قسمتي عاد مو كل شلتنا تنتهي نهايات غير جيدة مثلي و مثل سؤدد.. و أتمنالها ولباقي البنات السعادة.. 

شكد حاولت أزعل يم أمي مخلاني جدي.. 

: بوية كعدي واستجني لا أول و لا أخر وحدة يتزوج عليها رجلها.. 

: أول وحدة تنخدع أنتم رسمتوا الي حياة حلوة و شجعتوني أقبل بنصير.. وعدتوني وعود ما تنفذت أستغليتم

جنت مراهقة كلي بالرابع أعدادي بذاك الوقت.. 

جان عون.. اله حق من كال أنتِ صغيرة وقراراتج ما نابعة عن نضج كملي دراسة يلا تفكري بالزواج بس أني غبية سمعت الكم فعلاً قراري كان مو قرار ناضج وحصدت نتائجه دمار حياتي.. 

صاحت مرت عمي أم نصير.. الجاية تزور بيبي 

: شبيج شو تصرفين وتاكلين و تلبسين موتينج جوع لو عريانة لو ملزوم عليج الفلس حمدي ربج جنتي حسرة عليج اللبسة.. 

أنتفضت وعاركتها الفقير ميعيش وي ذوله 

: لا والله جنت شبعانة ممحتاجة شي عون.. ممخليني بحاجة يكص من لحمه وينطيني ..

أكولج شغلة عمة الزواج مو بس لبس و أكل و فلوس أني أحجي على مشاعري من تزوج علي يعني بيه نقص

ممقصرة وياه بشي لذا هنا أعتبر زواجه علي تعدي على كرامتي لذا أني ونصير.. منكمل وأبني أعرف شلون أعيشه.. 

خليت وكمت من يمهم لغرفتي الكل وكف ضدي حتى بيبي و أسمع مرت عمي أم نصير.. تغلط علي.. 

: شلون ابنية لو بيها حظ وماليه عينه ما دور عليها مرة بس هي عوجة مو  عدلة.. 

وبيبي ترد عليها.. 

: عبالج بنات هذا الجيل مثلنا ياما تحملنا ونسكت علمود خلفتنا هسه وين تحاجين الچنة تمد لسانها أطول منها.. 

ردت مرت عمي أم نصير.. 

: جنج تبسمرين بحجايتج عمة.. 

ردتها بيبي : أحححح

بصوت من جدي خلا حد لعركتهن

: بس أحنا نريد نسنع البت وتركد يم رجلها وأنتن عفتن الموضوع الاساسي وكعدت وحدة تعير الثانية أم نصير.. 

دزيت عليج تقنعيها ترد لرجلها مو تهيجينها علينا.. 

: يا يا عمي وأنطي بأبني المظلوم ظلمتوه بهاي العوجة العوبة والله رحتله لبيته قبل لا تجيب مرته چان عدها آلام ولادة و البيت يلمع ولا جنها تطلك لو هاي جان خاس بيتها على ما تولد وتخلص نفاس ريحة البيت تطلع.. 

بيبي : نصير حفيدي و مريم هم ما أفرقهم وأذا وكفت لنصير.. لأن حقه يتزوج الرايدها وشارط علينا أذا تزوج مريم.. نقبل يأخذ حبيبته بس مال تكولين مريم.. قذرة لا ما أقبلها منج شو أنظف منج ها نسينا يا أم نصوري.. من أنتِ نفسة وجواج الگلك.. 

جنت واكفه بباب الغرفة بالممر همه ميشوفوني بس أتصنت عليهم هزيت أيدي ودخلت غرفتي.. 

عاد بقت الأوضاع كما هي لا هو الي يتنازل يجي يراضيني ولا أني الرجعت.. 

كلش يحترك گلبي من اشوف أبني ياسر.. أبوه ميسأل عنه وهو يدلل و يدلع بنته جنان.. من ذيج مرته يارب يحرك گلبك مثل ما حارك گلبي.. 

 بيوم عجايز المنطقة ملتمات يم بيبي دوم بينهن تواصل أسمع وحدة منهن تسألها

: شنو أم ياسر ما رجعت لبيتها؟ 

بيبي : لا والله معاندة وذاك هم مرتاح انخابرله يكول قررت أخليهن بيت واحد أحسلي عاجبها ترجع ترجع معاجبها تبقى عدكم.. 

: بس هذا مو حال وهو شعجب تزوج؟ شو مرته مريم.. صغيرة وحلوة ومخلفتله ولد ما عنده حجه عليها؟! 

: ذيج جان رايدها من زمان بس قنعناه بمريم.. ملكينا طريقة نأخذ بنتنا من أمها الا هاي الطريقة بنيتنا وبيت أمها بي رجلها يشرب وأبنه هم يشرب والبنت كبرت ماكو حل الا نزوجها.. 

أسمع وأغم روحي الف مرة شكد جنت مغفله فطيرة مشيت ورى الجاه والمال رغم عون.. يكدر يوفرلي أحتياجاتي دون طمع بس أني الطمعت بالأكثر وردت أعيش عيشة الاميرات دكليها بتبنها يا مريم.. 

ظليت أسمع الهن وأني أرضع أبني شويه وسألتني أم حاتم 

: بيبي وين وصلتي بالمدرسة؟ 

ردتها بيبي 

: يا فلك منين مدرسة ولكم هاي  وصلت كلية! 

: ها ولا مبينة كصيرة ونويعمه الله يخليها أكول خالة ما أجيبلج حفيدي تدرسي و أنطيج حق تدريسج اله شالع گلب أبوه ما يفتهم طايح مكمل

بـ الإنكليزي ورياضيات.. 

بساع بيبي كالت

: لا رجلها ما يقبل.. 

بس هنا تجرأت وحجيت 

: أي جيبيه أدرسة.. 

بيبي تخزرني بس أني ما أهتميت أريد أعتمد على نفسي و ما أبقى بمنيه نصير.. أبو النسوان و شراب العرك لازم أصير قوية..

و فعلاً بدأ مشواري بتدريس الطلاب وأول طلابي أكمال وراها من وحدة لوحدة صار الي صيت حتى سويت دورات تقوية تعلم القراءة و الكتابة 

يعني أول مشواري بالتدريس أني طالبه جامعية و أدرس أبتدائي بالبيت دروس تقوية ومكملين..

و بليلة من الليالي فزيت على شي أنفاسه يم وجهي و ريحة الشرب التكتل ويه بوساته.. 

حاولت أميز منو هذا.. 

: مشتاقلج..

حتى نبرة صوته شبعانه عرگ مو بس أنفاسه حاولت أستوعب أحلم لو واقع لمن كدرت أميز فزيت دفعته عني.. 

: عوفني وخر شتريد مني ها..؟ 

: ترجعين للبيت يله گومي نرجع أشتاقيت الكم أنتِ وياسر.. 

ضحكت بقهر..

: أشتاقيت؟ ولك كم شهر راكني وملتهي بذيج مرتك حتى أبنك من تجي لبيت جدي صاير يستغربك ما فطن عليك ولا يعرفك كم مرة تشيلة ميريدك ويبجي..

: مريم كافي يله بدلي.. 

باوعت للساعة جانت بـ ٢ بليل وقت متأخر هزيت أيدي

: هه حلمان أنت دتشوف الساعة بيش؟ 

: مريم.. يله كومي كتلج نرجع لبيتنا.. 

عاندت ما قبلت أرجع وياه عصب وسحلني من شعري بيد وتناوش أبني بيد وهو يجرني لبرى لا حجاب لا ستر على صريخي فز عمي ومرته و جدو وبيبي.. 

: شكو..؟! 

كلهم بصوت واحد شكو هه أي شكو مستغربين ذلة مريم.. و دمارها صحت

: الله أكبر عليك ولك عوفني متت يا ربي ولك عوفني شتريد مني؟ 

دفعته عني وردت أخذ أبني منه بس رفعه أعلى من مستواي 

: مريم.. يله كتلج لبيتج.. 

ظليت الطم على خدودي

: يبوووي يبوووي كتلك ما أريدك ما أرجع يا ظليمتج يا مريم.. جايني بالثنتين بالليل حلمان شنو ولك أتركني أعيش حياتي كافي دمرتني دمرت مستقبلي جيب الولد أختلس.. 

أبني فرفرح من البجي أخذه و طلع وجدي يدعي علية عبالك أني الظالم مو المظلوم..

: الله لا يوفقج شهرتينا بهالليل الأسود على راسج بس بعد أمج منو مشوفين مفضوحة تصرخين لا تلمي العالم علينا 

وهدت بيبي تكتل بيه.. 

: يله روحي لرجلج و بيتج فكونا شركم منين الله بلانا بيج و بي ولك نصير.. سكران عيونك حمر.. 

تقربت تشمه و تدك وتلطم.. 

: حجي هذا شارب!

هد عليه جدو بعوجيته وما أسولفلكم هذا اليوم صار ملاحم أما عمي الزغير وكف متفرج مل من المشاكل وظل يدردم.. 

: مو بيت مينعاش بي بوية شوف حل لأبن أبنك و مرته لا أهج بجهالي ومرتي خارج العراق.. 

أعرف هاي أمنيته واللازمه أهله.. 

: حتى جهالي تعقدت من مشاهد العنف العدكم.. 

حجاها و دفع مرته لغرفتهم وركع الباب حيل رد نصير.. علية

: يله هسه أرتاحيتي أنتِ وحدة (........) 

وظل يفشر علية 

: أنتِ وحدة (.........) مترتاحين الا مشاكل وتنكتلين كومي ترى مو سكران هو كأس شربته من ضيمج

(.......) كومي لج لمن سويتيها طلابه فاخت (........) 

هزيت أيدي الوضع صار أوفر وعلني جدي طرده وطردني.. 

: أنت يمتى تبطل السم التطفحه شلون ولد جنت هسه شغيرك؟! الله يلعن ولد الحرام مدري حوبة عون.. وعدته و ما وفيتله وأنتِ ولج بنت أمج بعد طبة لبيتي ما تطبين زين

لا أنتِ و لا رجلج وأنت بس بقضايا الشغل تشرف.. 

أنطردت  من وراه وين أولي يربي لملمت غراضي وعدلت نفسي لبست حجاب وعباية رأس.. 

وأني لازمه جنطتي وجنطة أبني وهو شايل ياسر.. يلاعبه ركبت سيارته منزلة رأسي تستاهلين مريم.. حل بيج يطبج طوب و هاي حياتي وياه.. 

: كتلكم رديت لنصير.. بس مجانت حياة سهلة قبل هاي السنة يشرب و يلتقي بناس مشبوهة وحتى شهد على شخص ظلم و ذاك أنعدم و يتم أولاده

يعني ما ظل شي مسواه.. 

عيشتي وي ضرتي ماكو بينا مشاكل كلمن عايشة لروحها وكلمن تحس أنظلمت بنصير.. وأنبنت بينا صداقة وصارت ضحكتنا وسوالفنا تملي البيت.. 

ممكن بالحالات الطبيعية الضراير تعيش هيج اجواء اكشن لشخص يستحق الغيرة ويستحق تتقاتل لأجله 

بس الي أسمه زوجنا للأسف ميستحق.

ويمكن هذا غاض نصير.. الي راد يعيش دور الرجل الي تتصارع عليه زوجتين وتتعارك علموده يعني راد يشوفني اني وضرتي تصير من الروس 

وحدة تغار من الثانية عليه و لأن مشاف هيج انفعلات من عدنا قرر يذلنا يهين كرامتنا من وكف وهو بغيض يكول..

: شنو ما تغارن علي؟! عجيب أول ضراير متفقات هو هذا هم حظي  محاس تتنافسن علمودي.. 

إلى أن أجه بيوم صدمنا صدمة عمرنا بمقترح نذل وهي بليلة من الليالي  كشف عن وجهه الثاني ويا كثر الوجوه  العنده لا تعد لاتحصى.. 

وجه نذل وما يتخيله عقل طلب منا طلب يتعرق اله الجبين و تشمأز منه الأنفس.. 

راد يجمعنا وياه بمجلس واحد و بطريقة لا ترضي الله ولا الشرع ولا يقبلها البشر راد يكسر فطرتنا الفطرنا الله عليها يذلنا بليلة وحدة ليلة منحرفة عن المبادئ والاخلاق بعيدة عن أوامر الله بأصول الخصوصية الزوجية.. 

وكفت بمكاني والدم جمد بعروقي من الصدمة أيدي وجبيني تعرقن من الخجل والتوتر هذا عاقل؟ لا والله خبل منحرف.. 

ضرتي أم جنان.. صاحت بي وهي ممصدكة.. 

: ياا ولك أنت تدري شتطلب؟ يا دين يقبلها؟ يا عقيدة أحجي؟! ولك معقولة أنت نصير.. الي عرفته و حب سنين العمر لعد شكد أنغشيت بيك وبمثالياتك الكذابة! 

جنت أسمعها وأحس الكلمات تطلع من گلبي مو بس من لسانها أنغشينا بالورع الكاذب لسنين..

ظليت ساكتة أراقب السقوط مالته بمرارة والندم ينهش بروحي على أختياري الأغبر.. 

رجعت أم جنان.. تتوسل بي بذمة بنته

: أحجي نصير.. بداعة بنتك اللي تموت عليها هذا المقترح يا عرف يرضى بي؟ يا دين؟ تريدنا بمكان واحد هذا حرام يلي تعرف الحلال والحرام دطير..! 

ما تحمل كلامها هجم عليها بالضرب ورفس وبوكسيات من الخوف شردت لغرفتي وقفلت الباب وبقيت أسمع صريخها يرج البيت..

وصار هذا حالنا يومية يطلب نفس الطلب القذر ومن نرفض لازم وحدة بينا تصير ضحية لغضبه ويطلع حرگة گلبه بضربها.. 

بيوم شفت أم جنان.. تبجي سألتها 

: ليش ساكتة؟ 

حجت بكسرة خاطر.. 

: ما أكدر أدعي عليه والله عشگته من صدك من أيام الجامعة هو جان خوش زلمة ويخاف الله بس أهله رافضيني وبقينا سنين نقاتل يله تزوجنا بس ما أدري شصار و تغير فجأة!

كلمة (فجأة) خلتني أصفن تذكرت عون.. وشماته بيه تذكرت حجاية كالها وما جنت فاهمتها معقولة عون.. هو الي جان ورى تغيير نصير؟ ومن وراها أختفى من حياتي.. 

وبيوم دخل علينا نصير.. وعيونه حمر صاح بينا.. 

: كومن للمطبخ جاييني ناس!

وحدة تباوع للثانية وصاح بينا بعصبية

: يـلـه!

رحنا للمطبخ وصرنا نباوع من الممر دخلوا رجال ونسوان من أشكالهن ولبسهن ومكياجهن مبينات مو راحة

ضحك وعربدة وصوت موسيقى عالي

باوعت لأم جنان.. وكلت الها.. 

: اكولج آخر المطاف بيتنا صار (.......) 

شويه و كعدت تبجي 

أم جنان : شكد أندعيله بالهداية بس ما أعرف ليش دعائي مدايستجاب..   

نسمعه يكول للبنات مناك المطبخ.. 

كتلها: عوفي الدعاء هسه جيبي بنتج وتعالي لغرفتي خلي نقفل علينا الباب وأي شي يصير ندافع عن نفسنا.. 

قفلنا الباب والاصوات الي تجينا من الصالة قمة بالانحطاط أني أدعي الله ياخذه ويريحنا من عاره وهي تندعي ياربي رجعه لبيته مثل ما جان استغرب شلون تحب شخص ما شافت منه غير الضيم والأذية!

كعدنا الصبح البيت هدوء طلعنا للصالة لكيناه نايم بمكان مقرف وبقايا السهرة الوسخة حواليه وملابس نسائية مبعثرة يم رأسه.. 

هزيت أيدي بأحتقار وأم جنان.. كامت تبجي وتلطم من شافت هذا المنظر المذل.. 

: ليش ولك ممكفياتك أني و مريم.. تدور علينا ذني متخاف تتمرض و تمرضنا.. 

فز على صوتها ظل صافن مذهول لا ضربها ولا صاح.. 

شال القطعة الي جانت يمه وشمرها وكام وهو يترنح..

: مريم.. حضريلي الحمام رأسي راح ينفجر..

أني هنا فقدت شلت بقايا كأس جان عالميز وشمرته بوجهه.. 

: مو خدامة أهلك أني ولا تستاهل من يخدمك يا عار!

ركضت لغرفتي وقفلتها علي وأسمع صريخه وهوسته مبلش بأم جنان.. كتل وتالي سكته كلت عزا بس لا ماتت بيده.. 

مشيت بالممر على كيف باوعت للصالة 

خجلت من شفتهم بوضع (.......) غميتهم بسكته ورجعت لغرفتي معقولة يكتلها وهسه تخلي يتقرب الها 

طاح حظها وحظه.. 

        مــــــــــــــــــ♡ــــــــــــــاجدة 

صرت هواي أضم على أمي وصرت هواي أكذب و أحتال حتى التقي بماجد.. 

وأحس ماجد.. واكع محتار ما بين يحب يشوفني ويلتقي بيه و ما بين ما يحب أطلع لمكان وأهلي ميعرفون بيه وين رحت.. 

يعني مو مثل الجامعة معروف رايحة للدوام وصل بي خلا حد للقائنا خارج الجامعة.. 

تدرون شلون خلوني أسولفلكم.. 

أشهر العطله قاربت تنتهي وأني ما أعرف شنو مصير حبنا بس المهم يوم عن يوم يزيد حبي اله.. 

وما أنسى مساعدات وحيدة.. بتحفيز نصار.. حتى تقاربنا و صرنا صديقات من بعد ما جنت أني ما أطيقها. 

كذبة اليوم كالآتي أجت وحيدة.. لبيتنا 

حجت وي أمي.. 

: خالة أمي تسلم عليج و تكول بلكت أخذ وياي ماجدة.. أقترب الدوام نريد نشتري ملابس..

: ترحن بوحدجن؟  

: خالة هياته السوك قابل بعيد.. 

: لا ماما ماجدة.. ممتعلمه تطلع هيج طلعات.. 

: خالة أمي تجي ويانه.. 

راحت أتصلت بأم وحيدة.. أمي دوم تدقق متقتنع بساع ورغم هذا بس كدرنا نحتال عليها شويه سدته..

: روحن أمج تعهدت هي تاخذجن يله هم يا الله حتى ترجعون من وقت ولو ردت أشتري لماجدة.. ملابس على ذوقي أعرفها فاهية.. 

ضجت دوم تنطي بيه دوم تقلل مني بيه نقص عود بس رفعت معنوياتي لهفتي التقي بحبيبي طلعنا أني و وحيدة.. نتمشى..

أنفتح باب بيت سؤدد.. جانت كالعادة  بالأسود اللي صار يرمز لحنينها شافتني أني ووحيدة الي تعمدت تلزمني من عكس أيدي و تدخل أيدها 

و تبين لسؤدد.. صداقتنا قوية

خاصة وحيدة.. و سؤدد.. ميطيقن بعض هزت أيدها سؤدد.. من مرينا يمها و غمتنا.. 

: كبر لفجن يا عارات

كلش ضجت من حجايتها متحملت عصبت عفت وحيدة و ركضت لسؤدد.. بغضب رفعت أيدي و انطيتها راشدي.. 

: خطاياي هنا بجتفي وربي يدري دون قصد الصار فكافي حقد وتحمليني ذنب كافي سؤدد.. كافي أنتِ صرتي الي عذاب من أشوفج بسبب لقاءاتي بأبوية متدمرة.. 

ظليت أبجي معرف شحجي بس تعبت من أحساس أني مذنبه زين أني شعليه مجنت أعرف حيصيرله هيج.. 

: والله لو جنت أدري راح ياخذون حسن.. فلا أخطي وي بابا لبيتكم خطوة.. 

دفعتني سؤدد.. وبس كلمات نطقتها و سدت باب بوجهي.. 

: كفيني شرج و شر أهلج معندي قرابين ثمن صداقتنا انطيت كلشي روحي من وجهي..  

ظليت أبجي وأني أمشي لوحيدة.. 

: عوفيها هاي معقدة صديق ماجد.. ونصار ميت عليها ولا تقبل بي والله كال بشهر نتزوج وأني متمكن بس هي رفضته..  

: ترى هي متزوجة! 

: دون دخول عزيزتي يعني تكدر تفسخه بسبب سنين مختفي وتعيش حياتها.. 

: وحيدة.. ترى ما اقبل تحجين على سؤدد.. صديقة طفولتي.. 

: عشتو سبينا العنب الأسود.. 

: أي سبيتي فلا تخرطين أوكي بعدين كليلي أمج شلون قنعتيها تكذب على أمي.. 

: أمي دوم تكول تكسر خاطري ماجدة.. و أنتن كبار و ناضجات مبيها شي أذا ترحن للسوك مو الا حرس والله كتلها ماما أمشي ويانا هيج تمويه حتى أم ماجدة.. متشك بطلعتنا وأني أعرف ماما متجي تتعاجز وخاصة عدها خياط الوادم دتخيطه.. 

: المهم طلعنا وحنشوف ماجد.. 

: نصار.. أشتراله تكسي هم يشتغل بيها وهم وسيلة توصيل ليش ما نأجره كخط للجامعة أحسن من الي أجره رجل أمج.. 

باوعت و ضحكت

: يلـه دبري النا.. 

: أني كلي مياخذ مني بس أنتِ معليه بيج ترى أذا ما أخذ أهلج شيكولون؟ 

: وأنتِ أمج شتكول؟ 

ضحكت : متدري أخليهن مصاريف الي 

: بس هذا كذب و أحتيال والله علمتيني دروب مجنت أعرفها.. 

: ماجد.. كايل لنصار.. ماجدة.. صايرة تكذب مدري منو معلمتها درب الكذب والحيل.. 

ضجت ووحيدة بلا أحساس كملت

: طبعاً يقصدني يله لو ما نصار.. فلا أعرفج أصلاً بس هو كال لخاطري دبري طلعات ماجدة.. يشوفها ماجد.. 

و هسه صرت كخه ليش شلون ندبر طلعتج لو ما نكذب و نحتال على أهلج هذا حبيبج بطران و قنقنه هواي.. 

وصلنا و سيارة نصار.. جانت تكسي برازيلي بس شافونه أشر ماجد.. باوعتله بخجل و كال

: نروح للكورنيش..

جان الكورنيش بوقتنا مختلف مدري ليش ضايج بنظراته طول الطريق على أعصابه بس وصلنا كال لنصار.. 

: ورى ساعه تلكونه يم سيارتك منأخر البنات زين...؟ 

: أمرك كابتن ماجد.. 

خزره وكله يله مثل ما أتفقنا باوع نصار.. لماجد.. بقلق وسكت ولزم أيد وحيدة.. و راحوا باوعلي.. 

: شوفي أكولج تبقين مثل ما عرفتج لا الكذب تندلي ولا الحيل لوما وحيدة.. طريقتي أشوفج بيها ولا أقبل ترافقيها 

هواي تكذب و تحتال والله نصار كتله هاي من هسه كذابة محتالة ثعلبة من تتزوجها شتسوي..؟ 

دنكت ليش يرزلني مو كل الكذب والخداع حتى نتشاوف

: بس أني حتى أشوفك.. 

: أخر مرة تشوفيني بطرق ملتوية ما أحب الكذب أبد اليوم تكذبي على أهلج باجر علي .. 

دنكت : أهلي صعبين متعرفهم.. 

: ولج أحس أني خربت تربيتج من شفتيني تعلمتي تحتالي تكذبي و تطلعين دون علمهم.. 

: الحل شنو؟! 

: ما أعرف بس بعد منلتقي لمن ننخطب.. 

: أنت واحد كذاب علقتني بيك وراها تتمنمن علية

كلتها وزعلت أشرت تكسي أريد أرجع وحدي محسيت الا لزمني حيل

: أني وياج شنو مو بعينج ؟شنو هالتصرف أنتِ وحدة مدلعيج زايد المفروض تفرحين لأن حبيبج ميريد تتعلمين سوالف حيل يريد مثل معرفج بنت بريئة نسمه..

دمعت عيني ورجعت عن الشارع وأني أكعد بوحدة من المصطبات الكورنيش وخليت أيدي على وجهي وأبجي بنحيب أسمع صوته تبدل من عصبي الى لطيف.. 

: حبيبتي لا تبجين شوفي أني عصبت لأن حسيت رحت زايد شنو أطلعج من البيت وميدرون بيج وين ما وين تكوليلهم للسوك وهذا كذب أخاف عليج والله.. 

ظلينا نفتر و نتمشى شفت جدي بسيارة تكسي بالتقاطع وياه جدتي بساع درت ظهري وختلت أنتبهلي.. 

: شكو..؟! 

بصوت يرجف

: هذا جدي و جدتي بالتكسي ذيج لك لتركز بيهم لا ينتبهون.. 

رجعت أضم وجهي و التفت على كيف أشوف.. 

: لتباوعي أني أكولج لو راحوا أشارة المرور حمرة يله مشت السيارة.. 

: لا خلي بعد تختفي.. 

: يمعودة أختفت.. 

درت عليه 

: عطشت من الخوف.. 

: هسه عرفتي ليش أني شايل هم الكذب و الاحتيال.. 

: هذا الثمن الي أكدر التقي بيك ماجد.. شو أنت قبل تلاحقني و تصجم و تتغزل هسه صرت... 

قاطعني : قبل صياد يصيد عشقه حتى يأمن المشاعر تكون اله هسه يا حبيبة الروح الوضع مختلف دنلتقي خارج نطاق الكلية يعني أهلج كل تفكيرهم أنتِ بالسوك.. 

: نفس الشي هم بالكلية ميدرون أحاجيك وبينا علاقة حب شنو الفرق لا تأزم الموضوع مدام غايتك زواج مو لعب اللهم الا... 

قاطعني : أنجبي ماجدة.. 

: لعد.. 

: ما اسمحلج أني ما العب بعرض العالم أني لو العب جان كلت طز تطلع بحجه سوك أو مكتبة هو وقت أكضيه وياها والسلام بس غايتي وياج زواج لذا أخاف عليج تنكشفين يأذوج أو يحرموني منج.. 

شوفي يا بنت الناس بعد ما تطلعين هيج طلعات و منا للجامعة الله كريم مبقى شي للدوام أني أعتراضي تكذبين بوجهة طلعتج.. 

لذا بعد ما نطلع خارج نطاق الجامعة أفضل متتأذين حتى لو صدف أحد من أهلج أجه و شافني تتعالج لأن أنتِ بحرم جامعي بس لو هسه لامحج جدج مو تصير طلايب؟ 

هزيت رأسي 

: راح أشتاقلك.. 

: ما بقى شي على الكلية تبدي يله نرجعج بيتكم.. 

طلع من جيبه علبة 

: مو كد المقام و تستاهلين أغلى منها بس الله يمكني أدللج.. 

أبتسمت و أني أفتحها جان علبة موسيقى بيها لعبة صغيرة تفتر بمغناطيس

: شكراً كلش حلوة مبينه أثرية و مو عراقية الصنع.. 

شفته صار أحمر... 

: أشتغل بهيج أمور تحف و ملابس التجي للعراق ملابس مستعملة 

أبتسمت وما حرجته بس هو كال 

: لا عبالج هاي مستعملة صح مثل مكتلج تجي من الدول بس شوفيها بكيسها ممفتوحه أعرفج بزر دلال مجيب شي مستعمل الج..

أبتسمت وحسيته مستحي من هديته فتحت الكيس و العلبة طلعتها وفتحتها أبتسمت 

: شوف داخل العلبة أكسوارات الله أحب هذا الكرستال يجنن.. 

شوي أرتفعت معنوياته من فرحت بهديته والله حلوة و عجبتي.. 

- والله حتى ممثلات وممثلين يجون حجز يحجزون منه أغراض وملابس 

مناقشته هو شغله هذا و الله يرزقه بس لو عليه ما البس مستعمل ما أعرف منو ما منو قبلي لابسهن وغير الأمراض التجي بيهن بعد كلمن ورأيه وما أحرجه.. 

رجعت للبيت أول مطبيت سويت عركه وي أمي أحدى دروب التعلمتها من وحيدة.. الهجوم أفضل وسيلة دفاع بعدها ما حجت وأني صحت.. 

: كله منج عرضتيلي أرتاحيتي محصلت شي بي خير يمكن مرة تجي ترحين ويايه لغير سوك بلكت أحصل شي يعجبني.. 

: على كيفج كل هذا علمود كم قميص و تنورة سهلة ماما خلي أبوج يفرغ الجمعة و ياخذنه ونشتري الج أحسن لبسات..

طلعت الفلوس الي نطتني ياهن

: أخذيهم ماما للجمعة الله كريم.. 

شوي و أخذت العلاكه بيدي

: شنو هاي ومنين.. 

بساع كلت : من السوك

كلبتها تباوع الها بأنبهار للنقوش الاثرية و للاكسوارات المزينه بكرستال.. 

: والله علبة هيج عدنا بالعراق بس شو فلوسج كاملة 

: من مصرفي الي أجمعه مردت أنقص من فلوس الملابس ماما هاي بالات صدفه لكيت كاعدة بيهن مرة

والله عجبتني وكلت هاي مو ملابس وماما ما تقبل تكول بؤرة أمراض و زبايل دول منشتريهن

سكتت ماما

: عقمي العلبة

: والله بجيسها 

: ميخالف 

هزيت راسي أي وعفتها صعدت وأني أتخيل ماجد.. من أسولفله شلون أحتاليت على ماما وأني أقنعها أشتريتها مو هدية.. 

عاد للساعه تسعه بالليل حسيت أكو حركه غريبة بالبيت و فتحت البردة أباوع شاب يعرج و بابا سهيل.. فوته وراها أشر وراه زلم ملثمه.. 

هذا وين يوصل أكيد هذول ربعه مخبرين السريين و خاطفيلهم واحد أتخيل الشاب الي يعرج هم عنده خطيبة لو زوجة هم حسن..

ثاني و نباگ من شبابه.. 

نزلت على كيف أريد أتصنت بس مكدرت حارث.. يفتر متوتر بالممر رحت للمطبخ و خليت طاوة حميتها وكليت بيض بحجه جوعانه رغم متعشين.. 

 و لأنشغالي وفضولي أريد أعرف سهيل.. شوراه بلكت أوصل لخيط أرجع حسن لسؤدد محسيت بأمي من دخلت وتصيح نزيت لصرختها 

: ماجدة ماجدة 

 تصيح وهي معصبة 

: ها ماما

رفعت أيدها وهي تراويني الطاوة والبيضه فحم

: من دون البنات خارمه شوفي أختج أنتصار.. شنو مشميتي الدخنه أحتركت بيضتج يالغبرة أجيت أركض عبالي حريق بالمطبخ.. 

دخلت أنتصار.. تسوي حركه تحنص بيها شكد بينا علاقة أخوات بس وقت الترزيل كلمن تفتخر بروحها و هسه هي فرحانة مدحتها الست هديل.. 

: أنتصار.. بطلت من المدرسة وحدة كسولي... 

رد أنتصار.. عركة خوات دون حقد وضغينه

: أم بيت قصدج شسوي بالمدرسة عشتو و أني أبن عمي خطبني.. 

غميتها : عابت عابت شهادتج سلاحج دولي يله أبن عمها خطبها هو نسخة عن عمه سهيل.. 

شمرت أمي الطاوة بالسنك بعصبية

; صايرة هواي تتجاوزين على الرباج ؟ 

ظلت تحجي أمي عن بابا تريد تشوه صورته بعيني.. 

: والله لأن فقير ومظلوم أنتِ دومج ظالمة و رجلج بركبته شوفي كم واحد أختفى ااخ ولا أنسى حسن.. الي صار من خطاياي وما أعرف مصيره.. 

صديقتي دتموت لو أدري بسهيل.. هيج ولا أورط سؤدد.. وأفوت أقابل بابا  بيتهم بس بعد.. 

ضربتني راشدي

: تربيتج صايرة كلش وتتمردين هواي أولاً أسمه بابا سهيل... وتحترميه لا قسماً بالله لسوي بيج سوايه.. 

إنتصار : ماما لا تعصبين هي متقصد شي وأنتِ ماجدة.. على كيفج عيني أختي وأحبج بس أبوي خط أحمر مثل ما تقبلين على أبوج ما أقبل على أبوي

وأحنا نسولف دخل حارث متوتر وخزرني وكال

: ولا مرتاحلج يله روحي غرفتج بابا أجه وياه جماعة.. 

أشر لأنتصار هم... 

: بس أحنا بالمطبخ

صيح عليها

: فوتن غرفجن لا تظلن هنا أوامر أبوية

وأحنا نطلع أسمعه يحاجي أمي

: أبوية يمتى يتوب من هاي السالفه بس كوليلي يمة بيدج تخلين حد لا تكبر الشغله وتنعكس ضده.. 

: ياما حجيت نصحت ميفيد أششش هاي ماجدة.. بالممر تسمع 

: مو بيت حتى جواسيس بي.. 

: أنجب و لتجيب سيرة أختك بالباطل

وخرت بساع لأن راد يجرني ويضرب ميحترم أني أكبر منه غميته و شردت

: شفتيها هاي ما أرتاحلها ظلي ظلي مبقيتها بيتنا لمن تهجمه على روسنا.. 

قفلت غرفتي وتمددت طلعت صور الي وي ماجد.. مرة طلعنا للمنتزه أحنا الرباعي نصار ووحيدة أني وماجد.. قربت شفايفي وأني أبوس صور ماجد.. يمتى أصير مرتك هيج و بختي يكعد

لليل وأشوف أنعكاس لايتات سيارة سهيل.. بحايط غرفتي كمت بساع أباوع من الشباك وأشوفه يسند شاب ووياه ثنين زلم.. 

ودخلوا السيارة المشغل لايتها واحد من الزلم فتح باب الكراج وطلع بابا سهيل.. بسيارته سد الزلمه الباب و رد صعد السيارة.. 

منو ذول و شديصير هاي المرة وين ناوي  يالأسمك بابا و متستحقها معقولة خطف الشاب السانده مثل مسوى وي

حسن.. واختفى وذول ديساعدوه

زين باجر لو خطبني.. ماجد خاف نفس المصير معناتها لازم أحمي حبيبي... 

تكررت هاي الحاله كل فترة يجيب شاب و نفس الزلم اليساعدوه على خطف شباب 

أكيد يخفي كل شخص يضايق منصبه أو ما أعرف أحسه مو صاحي مريض نفسي سادي و أمي تقشمرت بوجهه الملائكي الطيب.. 

حاولت هاي المرة أركز بالملثمين الي وياه حسيتهم مألوفين نزلت من غرفتي أمي ترفع أيدها تندعي.. 

منتبهتلي الوقت جان كالعادة الثـانية بعد منتصف الليل هذا وقته الي يغادر بي هو والمفرزة الملثمه و الشاب المخطوف.. 

منتبهت الي أمي من بساع طريت الممر  أتختل بالحياطين و طلعت ركضت أريد أبينله ما أخاف وأني أعرف شديسوي واجهته.. 

- حرام كلمه بابا بيك أنت ورى أختفاء حسن.. و هسه جايب شاب تريد هم تقتله مو كولي حسن.. ميت مو.. 

هو تعجب من جرئتي و عصب 

: فوتي جوة يله شلون تطلعين و يمي زلم.. 

ظل يدفع بيه منطاني مجال واحد من الملثمين عصب ووخر اللثام وسعت عيني متعجبه... 

الفصل التاسع عشر من هنا

 لقراءة باقي الفصول من هنا