رواية خطايا واجتثات الفصل التاسع عشر 19 بقلم نور علي البصري

رواية خطايا واجتثات الفصل التاسع عشر 19 بقلم نور علي البصري

تستوعب الصدمة

بس تبقى مصدوم 

تموت من القلق

ويكتلك اللوم 

تكره روحك ومن نفسك تخاف وتركض على الضلام تدور النوم 

ماجدة 

ــــــــــــــــــــــــــــ♡ـــــــــــــــــــــــــــ

 مــــــــــــــ♡ــــــــــــــاجدة

ظليت ممصدكة من الي شفته و تخربطت الأمور بعقلي حسيت مو صدمة عادية حسيت نفسي وسط إعصار شالني وشمرني و أفتر بيه المكان..

غمضت عيني وفتحتهن همست

: أنت شدسوي هنا يعني شجابك على زوج أمي يعني... صخام عقلي مديستوعب..  

ظليت محتاره شلون سهيل و (.......) شلون ينجمعون مستحيل بس عيوني متكذب ظل يدفعني سهيل.. للبيت وهو معصب.. 

لزم خدودي بين أصابيعه باطن چف أيده غطت حلكي وضغط على خدودي حيل وبشراسة صك سنونة بغيض شرير وهو رجع يهمس عبالك أفعى..

أي والله حسيت همساته تشبه فحيح أفعى سامة تلتف على كل بريء وتشوه روحه.. 

: لمصلحة الكل الي شفتي متحجين بي تعرفين قصدي زين مو؟ 

شهكت بصوت مخنوك و أني لازمة إيده الضاغطة على فكي بأثنين إيديه أحاول أبعدها عن وجهي أتلوى بين إيديه أريد أخلص منه.. 

: أريد أتنفس وخر عني! 

رجع كرر كلامه بقسوة..

: مفهـوم؟ 

هزيت راسي بخوف ورعب.. صرت ما أعرف أبويه الرباني يوم ورى يوم أتفاجأ بي وبكمية الشر اللي بداخله.. 

وخر عني وهو ينفض أيديه عبالك ينكت تراب بعناد سألته..

: بس جاوبني شلون هيج صارت يعني مستحيل تنجمعون سوى وبشغل واحد وعلاقتكم مستحيل تصير هيج خرب.. خرب... معقولة.. 

ظليت ما أعرف شحجي لف سهيل.. لثامه زين وكال.. 

: أني رايح ولا تدخلين بشي ما يعنيج و أنطيني وعد متحجين شنو شفتي أبوج يدور علي الزلة لأن أخذت أمج منه فلا تحجين.. 

هزيت راسي بــ أي... 

: لأي شخص متحجين حتى لنفسج تمام أقتلج والله وأتبرى منج وعود خلي أبوج الكلب أبن الكلب يفيدج.. 

خلا ولف لثامه زين ورجع التفت عليه بعيونه سوالف ليومنا أتذكر عيونه و نظرته غمض عينه و رجع ذب حسره و كال.. 

: أستغفر الله وعديني متحجين لا تخلين لؤي.. يدمرني حقداً بيه شغلي هذا خطر و اذا عرف بي يضيعني.. 

: أي أي بس لا تورطه بسوالفك القذرة فدوة ترى سؤدد.. تنتظره شنو ضامه بس أريد أفتهم خطفته من عرسه وقتلت أهله.. 

شنو كلت للحكومة معقولة هربته وقيدته هارب منهم بس أنت هنا أخذته لأن يسهلك تهريب خيرات بلدك..

أهاااا أكيد الأغنام الي من فترة علنت الحكومة عن عناصر دتهرب أنت من الي يبيع وطنه علمود.. 

أشرت بأصابعي أشارة فلوس.. 

باوعلي متعجب أستنتاجي بغرور كتله

: أني طالعة ذكية على بابا لؤي.. بساع كشفتك وعرفت حقيقتك.. 

هز أيده وضحك وكال 

: جيد جداً يا ذكاء لؤي.. 

رديت أستفهم

: أنت و ذوله الملثمين شغلة غريبة تهرب خيرات وطنا تخون الوطن و

تهرب وي الغنم أسلحه لو شنو؟ أكيد متنوع التهريب ممممم بس خاف ربك ترى أنت مصيرك جهنم.. 

سكتت أجر نفس تعبت هو ساكت ويسمع عيونه حادة قاسية بس يبتسم شكد شرير يبتسم ممهتم لوساخة أفعاله أخذت نفس شهيق زفير وكملت

: طلعت مو نزيه تهريب و تورط الشباب شلون ورطت حسن.. قتلت أهله بشنو تهدده حتى يساعدك؟ بالتهريب.. 

أكيد تحتاج حسن.. لأن من الريف ويعرف بالعشاير و يعرف وادم على المنافذ تساعدك تبوك وطنك وتخونه تدري لو عرفت الحكومة تنعدم..

رد بعصبية.. 

: معليج بس سكتي والدنيا بخير تبقى.. 

: هاي خيانة بلد ودتورط شباب بلا ذنب رجع الولد لمرته وأهله بشنو دتهدده حتى يطيعك..؟ 

رجع نفخ بغضب 

: بنت الكلب ما تصيرلج جارة كتلج معليج..! 

راح طلع و رجعت أرجف من القلق الملثم الثاني مكدرت أعرفه منو بينما الملثم الأول هذا شلون جره لدروبه 

شلون ياربي ولا أعقلها مستحيل.. 

أكول منيله فلوس وصدكت ماما من تكول هو من عائلة غنية تزوجته غني أهل أمه تجار طلعت السالفه خايسه.. 

سنين سؤدد.. تباوعلي بلوم و كره بسببه خاطف رجلها يستغل نفوذه بالعشاير الله يدري بشنو هدده يجوز كله أسلمك بتهمه الكتاب الشفته وأنتماءك للمعارضين فخاف..

شفت نظرات أمي الخايفة بينت الموقف خطير جداً وهم ظلت تتوسل ما أحجي واسكت.. 

ظليت أيام وأني أفكر شتسواله يورط العالم لو يخطف والله يدري بمصير الي خفاهم كله لأجل المادة من العن أبو الفلوس الي نتيجتها أرواح بشر تنتهي..

باوعت للتلفون بس أعرف ماجد.. رفض بعد نلتقي صح أوقات ما أكدر ما أتصل أذا طلعلي هو أحاجيه واذا مو هو تطلع أخته اسمعها تململ..

هم نفس الرقم كلة من ماجد.. ما يسلمه للشكاوي وتركع التلفون بوجهي

 شــــــــــــ♡ـــــــــــيلان

تزوجت والحمد لله حفل زواجي مر بدون مشاكل آدم.. سافر الى أقصى البلاد شمالا أبتعد وأبوه شجعه يروح فترة ويراجع نفسه وأفكاره.. 

باوعت لزوجي أي زوجي وأحلا كلمة بروان.. زوجي صار لزم أيدي و إحنا ندبك الدبكة الكوردية على أغانينا

رغم صيف ونهاية شهر التاسع بس الجو معتدل حبينا الحفل يصير بسهولنا وأراضينا ما ردنا مكان مغلق

حضني و همس

 : أحـبج.. 

خجلت يمكن توتر عروس بليلة دخلتها وأجت ساعه الزفة أيدي بيده 

بروان.. رفض نسكن بالبيت الكبير وفضل الكوخ الي بناه بيده أول ما  شب و طلب يستقل ببيت وحده بأرضنا 

فتح باب عشنا الصغير و دخلت وياه خجلانه بوسط هلاهل و أفراح ظليت كاعدة بالصالة الصغيرة الي بيها كرويتات خشب كلشي بسيط ومن راتبه حبيت بي مو أعتمادي مثل آدم.. 

 مدلل أمه.. 

بيده وردة خلاها بفتحه صدر فستان العرس خجلت من حركته و ضحك

: ناوية تخلصيها خجل؟! 

كمبص على تك رجل والثانية مدها وراه و هو يخلي راسه بحضني 

: أفيش الحمد لله الي ما فرقنا

بأصابيع ترجف خجل خليت أيدي على راسه وامررها بشعره رفع رأسه و عينه التقت بعيني محسيت إلا جرني للكاع وحضني

: بس الكاع... 

ضحك : الكاع فرحانه تحضن إثنين عشاق لا تخافي ما أضيع أجمل ذكرى ليلة دخلتنا بس هيج نلعب شويه 

رديت بفطارية 

: شنلعب وكت لعب هسه 

ضحك : الا وكـته..

جريت نفس من دنك عليه...... وراها شالني بين أيدي لغرفتنا و برجله سد باب الغرفه...... 

ثاني يوم فتحت عيوني وأني بين ذرعانه كلش أستحيت من أمس بساع رفعت رايتي البيضاء و بساع كدر يملكني رغم خجلي وصابني توتر كلش بس ما أعرف شلون كدر يزيل عني مخاوفي و كدر يغريني بسهوله.. 

أذكر بالجامعة من جنه نسولف أني و صاحباتي المتزوجات يكولن الرجال اذا عنده سوابق و تجارب ينعرف من أول ليلة أذا جريئ و تحسينه خبرة مو فاهي هذا مجرب.. 

هنا قلقت معقولة بروان.. يعني حبني من طفولتي شلون اله نفس بغيري بطبعي العفوي كتله

: أنت خبرة و الا شلون بساع كدرت تغويني لدرجه نسيت خوفي من أول ليلة.. 

أستند بعكسه مستغرب أندفاع كلامي الي ملاه غيرتي عليه.. 

: أي وأنتِ شعرفج بهيج أمور؟ 

: صديقاتي المتزوجات تحجي كلشي يمنا.. 

: و هسه أنتِ متزوجة يعني باجر هم تسولفيلهم لعد وين الخصوصيه..؟! 

سكتت و هو حسيته فر الموضوع و غيره وبقى بداخلي هاجس بروان.. عرف قبلي بنات وهذا هضمني.. 

طبعا أحب أنوه كل كلامنا أحنا الأكراد بلغتنا..

بروان : أسبوع و تخلص إجازتي و نروح للجنوب بس قبلها عندي شغل بوسط البلاد بالأول أروح اكمله و بعدها أرجع أخذج للجنوب.. 

: شنو عندك شغل بوسط البلد وأنت أصلا شغلك بالجنوب.. 

رد باوعلي و أبتسم 

: هاي شنو تغارين؟ 

 ظل يدغدغني وهو يتحكرش بيه حسيت طبعه يغير بالمواضيع بس حبي اله جان أقوى من أظل الح سكتت وأندمجت وياه بلحظات علاقة زوجيه.. 

وراها كعدنا على دك الباب اجو أهلنا كام بسرعه هو يلبس ملابسه وأني  بساع أخذت الروب إلي واكع يم السرير التفت الي مبتسم.. 

: صبحية مباركة يا أحلا عروس

خجلت ومجاوبت ظليت أربط الروب وبقيت بالغرفة خجلانة أطلع شويه و دخلت أمي ومرت عمي.. 

أما بروان.. طلع للصاله يم بابا و عمي أبو آدم.. أمي مبينه فرحانتلي و مرت عمي عيونها تذب سم وهي عينها علي ذبت حسرة و طلعت.. 

طلعت مرت عمي وهي تكول لأمي جهزي بنتج و أني أخذت ملابسي ورحت للحمام سبحت وراها طلعت لابسه فستان صباحيتي 

رحت سلمت على بابا و عمي أبو أدم.. 

كعدت يم بروان.. الهمسلي 

: أحسن مني إني لا سبحت لا بدلت أهلنا أجو سوو علينا أقتحام

أبتسمت بخجل ويمكن أهلنا فهمو همساتنا فكام عمي وترخص وهو يأشر للبقية

: يله نعوف العرسان.. 

راحوا و بروان.. باوعلي وكال 

: شيلان أول طفلة تجينا أسميها آيتن..

: وأذا ولد.. 

: محمد على أسم النبي صلى الله عليه واله وسلم.. 

: أحلا أسم ويصيحونك أبو محمد وأني أم محمد..

: او أبو آيتن وأم آيتن منو يدري جائز هسه شالت بطنج طفلنا.. 

حجاها وحضني و هو مدنك دافن وجهه بركبتي و أيده تتلمس بطني وأبتسامة على شفايفنا تحجي أجمل قصه حب جنا عايشيها.. 

جائز حامل هيج جنت أمني بروحي أحمل من أول ليلة بس القدر ما كتب 

طبعاً عمي ما قبل بروان.. يروح لوسط البلاد وحدة كله أني أجي وياك.. 

بروان : بس عمي راح تتعب ويايه.. 

: لا تروح وحدك والأفضل متروح قبلك رحت وقابلت أبو مهند و سألته مقبل ينطي معلومات عن أبوك يكول ما اعرف ما أريد أبتلي و عائلتي تضيع

أحنا أكراد عايشين من كم جيل بوسط الوطن 

دائماً اتسأل ليش عمام بروان.. وسط الوطن مو بالشمال ومرة أمي سولفت الي كالت جد بروان.. طردوه العشائر الكرديه من الشمال بتهمه سرقة وارد محاصيلهم 

بعدين تبين هو بريئ وبقى بالوسط هو وأولاده الي منهم أبو بروان.. بس أبو بروان.. حاول يحسن علاقته بعشيرته 

وبيومها أمي أبتسمت وكالت أبو بروان.. جان إنسان لبق و محترم لدرجة هواي حبوه من الاكراد و طالبوا يرجع للشمال.

فتزوج أم بروان.. بموافقه جدج الي حيل حبه وعمج هم جان يموت على أبو بروان.. و صاروا أصدقاء مقربين.. 

بس أبوج كرهه و جان رافض زواجه من أم بروان.. فمشت كلمه جدج و عمج.. 

المهم ترك وسط الوطن و عاش بالقرية على أمل أولاده يتربون بطباعنا الأكراد 

بينما إخوانه بقوا وي أبوهم الله يرحمه بوسط الوطن..

أما جدج ابو أبوج باع أراضيه بالقرية و أجه هنا أشترى أرض أكبر و الشغل هنا أوفر و بعيد عن سلطه الحكومة 

رغم نضطر لقانون جبايه و مضيقه علينا الحكومة من قررت الها نسبة من وارد مزارعنا.. 

هذا الكلام قبل  الأبادة الي صارت 

بالقريه فأحتمال الرجل ضمن المعتقلين أو هرب منعرف مصيره

بروان.. ما قاطع أمل يلكاه.. 

أنتبهت من شرودي على كلامه المقهور 

: بس ردت أني أحاجي جائز يخاف يحجي يم عمي ردت أأمنه بلكت يطمني أبوية عايش لو أيس من حياته.. 

مسح وجهه وجر نفس حسيته مقهور كاتم  دمعته مررت أيدي على آثار حروق بجسمه حروق قديمه ترجع لسنة الابادة.. 

: بروان حبيبي أذكر الله الحي لابد يتلاكه أذا عايش يجي يوم تلتقون.. 

لذا لغى بروان.. سفرته لوسط البلد وظل يروح و يرجع علينا من خلص أسبوع إجازته لمن بدت دوام الجامعات اجه عليه وسافرنا للجنوب.. 

  ســــــــــــــ♡ـــــــــــــــؤدد

جانت أمي تطبخ و هي تباوعلي شويه و كالت

: يمة سؤؤد.. أنه إيست من رجعه حسن.. شوفي يمة نسأل بيها شلون تفسخين منه هو مداخل بيج والله أنتِ بنيتي وحيدتي وهاي السنين تمشي بيج و حسن.. مرجع 

هنا صحت 

: لا تكولينها يـمة.. 

لزمت أية الكرسي التزين صدري والله ثم والله ما أبالغ من أكلكم حسيت وأني أحجي نار گلبي تسعر بيه ونبض گلبي شلون معايش واحس بي عايش لو ميت جان حسيت.. 

أني اتبع إحساسي و أحسه عايش ويجي يوم ونلتقي ونسد باب الفراق بقفل ونفتح أبواب اللقاء الابدية.. 

شويه و الباب يندك طلعت أمي أسمعها تهلي بخالي جلال.. و حسين. طلعت سلمت عليهم.. 

: شلونك خالو شخبارك شلونك حسين. 

سلم عليه خالي الصار وحيد و حضني حيل.. 

: هلا ببنية أختي.. 

أجت عيني بعيون حسين.. و سلمت

: شلونك حسين.. شخبارك شلون عمتي و أخواتك شخبارهن

أقصد أمه و أخواته 

: هلا بنشغه حسن.. هلا بريحه أخوي.. 

دمعت عيني وهم رجعتلي الغصة بلعومي واحس نار تسعر بيه بلعت الغصة و زدت غصة دنكت مدمعة..  

: تفضلوا.. 

ضيفتهم و أسمع أمي تسولف وياهم شويه و حجت

: يمة حسين.. شو أيست من رده حسن.. و يمة بنيتي وحيدتي وأريدن حل أريدن تزوج تخلف موش تنطر وهم.. 

دنك حسين.. و همس 

: حقج عمة و حقها.. 

ورجعت عيونه خبطن حمر.. 

: جان حلم و ضحيته لخيي و لا أني من الحلم و لا من أخوي.. 

لكفت تلميحه بس رد هز رأسه.. 

: هسه هي تدرس لمن تكمل دراستها ننطر خيي أن رجع خير هاي أمنيتي وأن لا نأيس منه حقها بعد تشوف حياتها شتكول عمي جلال.. 

: والله هو الشور شورها تريد تتزوج ماكو داعي تنتظر حسن.. الي منعرف وين أراضيه ماكو داعي تبقى لمن تتخرج.. 

هنا عارضت و رزلتهم صدك ميستحون شلون أخون حسن باجر ورجع شيكول مرتي مهرفلة عالعرس رديت بين أستهزأ من فكرتهم وبين أرزل. 

: أني مشتكية الكم  لو هيج ميته عالزلم وأريد رجال لا فدوة خالي و أنت حسين.. الله يخليكم شوفولي حل أني راح أموت أذا ماكو رجال الله يخليكم دبروني أريد رجال 

صچيچه صجتك حسين.. بله خالي مكدر أتجاوز فشلة وزحمة من أمي أغلط على أخوها الصغير.. 

رد خالي : عفاااا..

و حسين.. أبتسم 

: و شبقيتي ينشغة.....  

توقف مدري شراد يكول رد كمل أسم حسن.. 

: لحد يدخل من أريد رجال عود أجي أكلك حسين.. دبرلي زلمه ترى كلش متوازيه عالزلم صچيچه صجتك

ضحك خالي جلال.. وغمز لحسين.. رده حسين.. 

: لا تلمح ما أكدر بطران أنت بيا حال وأخوي ما أعرف شحاله

: ولله حجيتلك يا أبن أخوي و كتلك الياخذه صدام ميرجعه و أيس من حياته

: لا لا تكولها أن شاء الله عايش ويرجع لمرته و ينترس حضنهم جهال.. 

مدري ليش مرتاحيت لحجيهم عاد ترخصت 

: فال الله ولا فالك خالي بيش طالبني أترمل وأني ما دخلت دنيا.. 

حجيتها بمرارة وقهر و عفتهم عاد بقوا عدنا أيام و كل فترة يزورونا هم أنعم الله عليهم من يطلون على حرم وحدهن و ما قصروا ينطون لأمي مصرف كلما يجون الحمد لله هم البقوا من ريحة حسن.. و الحمد لله على صلة الرحم

بالنسبة لعمي مازن.. نلتقي بالجامعة كم مرة أعزمه يرفض يجي يمكن بعده زعلان من أمي 

والله لو تقبل بي وتهاجر على الأقل أكمل كلية وتدز عليه بس ما تقتنع حاولت أقنعها تردني

: هو دزج مو شنو عمج الشفية مجاز مني..؟  

: لا والله يمة ولا يجيب سيرتج أبد بس أني اكول عريس ميتفوت وكافي تضحي بشبابج كبرتيني و علمتيني وزوجتيني بعد المن باقية تزوجي

ردت تضحك بقهر

: عرستج يسويدة ليش يمة هو وين العرس الي صار فاتحة موش عرس ينشغه حسن..

نزلت وجهي و سكتت حتى لو أتناساه يذكروني بنشغه حسن.. اااخ يا حسن.. 

باوعت لأمي حسيت دمعة بعيونها تكتمهن بست أيديها اليلجن بياض 

: شكد تعبت أيدناتج يمة بس حتى تكبريني شلون أجازيج؟ 

مدري ليش أريد أبجي حضنتها و أني أبجي قهري و سنيني و گلبي وكل همومي الفقر العوز لو البخت المايل 

لو أبجي على الغايب الماردلي لو على الخوال الي تكتلوا لو على منو ومنو  لو على أمي الفنت عمرها لأجلي لو غيرها تتزوج و تعيش..

: يا يمة ولج سويدة سوادي سؤود تبجين يبعد كل هلي و طوايفي حظج حظ أمج يبعد روحي بس أمج خلتلها خلفه خلفتج الا أنت حال البيت الوگف..

: الله كريم يمة هم يرد حسن.. و أمليلج البيت جهال الاشقر على أبوه و الأسمر عليه وها حتى نخلف حنطاوي   مشكل يالوز يمة والله نذر عليه لو ردلي حسن.. لسويهم ١٢ طفل..

أمي تباوع مأيسه من ردته وأني الأمل تارس روحي إحساسي يكول عايش ما معقولة يكذب أحساسي الله كريم بلكت يردلي داومنا و السنة هاي لحكت القبلها ماكو حسن.. 

          مــــــــــــ♡ــــــــــــريم

بده الدوام وداومنه والتقينا أول يوم تجمعنا بي كلنا الشلة المنحوسة طبعاً مو كلنا منحوسات يعني بينا الي عاشت سعيدة.. 

حضنت شيلان.. ولا عبالك أقارب هم نتشاوف من سنة لسنة وتباركناله عالزواج وعدناها بهدية.. 

شيلان : أني من اسبوع بالجنوب..  

: ولج غير تكوليلنا..؟ 

: والله مو بالاقسام تعرفون زوجي موظف بالجنوب و أجرنا بيت هنا بنات أني عازمتكم على الغدة باجر مو تنسون و لا تنسون الهدايا.. 

سؤدد : تدللين حبيبتي

تحاجي شيلان.. بس تخوزر ماجدة.. بعدها وياها مو على حال رغم السنين المرن يمكن بصمتها تحمل ماجدة ذنب دمار زواجها.. 

ظلت ماجدة.. مدنكه أحساس الذنب و أحس بعيونها كلام تريد تحجي بس برود سؤدد.. قطع سبل الوصال بينهم شلة وحدة و كعدة وحدة بس ميتحاجن سألتني سؤدد.. 

: شخبارج الدبة حميسة مرشقة.. 

ضحكت بداخلي مرشقة أي ترشيق القهر و رجيم المعاناة والإختيار الخاطئ كتمت معاناتي شكول و شحجي الأفضل أكتم.. 

: أي رجلي يحب عود شخاط أصير 

ضحكت رحاب.. و تصنف

: لعد ديري بالج لا تحرقينه النوب ينشوي.. 

وضحكن حقهن البطرانات اليدري يدري والميدري يكول فورة عدس التطورات الحجتها ماجدة.. الخجولة البريئة الي تخاف ظلها صدمتني 

 : لج ماجدة.. شنو هاي التطورات.. 

: أحبه والله مكدر أعيش دونه.. 

: وأهلج؟ 

: ما اعرف بس أني أؤمن بالله و بلطفه و أن شاء الله ننجمع.. 

: الله كريم حياتي يلا تزوجي شوفي الزواج حلو.. 

بگلبي غميت روحي أقشمر عالناس مدري على روحي شيلان.. أيدتني 

: أي والله حلو الزواج خاصة أذا الزواج عن حب سألوني..

رديت : اي أني هم سألوني فد حلو و تفاهم مشترك أويلي لو دخل عليج وهو بيده باقة ورد و حضنه وبوسة وغزل أفيش ولكم أني مريم.. من السعادة أخاف أنحسد.. 

ردت رحاب 

: أقري المعوذات يمعودة ما يحسد المال إلا أصحابه لا أنتي تحسدين روحج.. 

: أي والله عين الحاسود بيها عود كبه بعينجن.. 

وغميتهن أعيش اللحظة وأضحك على روحي شيلان.. تباوعلي أعرف حاسة إني أعاني بس ما فشلتني و سؤدد.. تعرف بعض من وضعي وأشك شامه خبر نصير.. متزوج عليه و مخلف.. 

بس غلست ما أريد احجي همومي و أضوج العالم أني مهمومة شكو أخلي العالم تنقهر من وراي أضم معاناتي بداخلي 

يمكن الحياة الزوجية غيرتني ونضجتني.. صرت أحتوي سوالف صاحباتي أكثر مما اسولف همومي وأسمعهم أكثر مما أحچي.. 

كمل هذا اليوم و أنتظرت برى الجامعة السايق شوي مدت راسها شيلان.. من جامة سيارة زوجها.. 

: يله ويانا نوصلج.. 

: أنتظر السايق خطية خاف يجي ميلكاني.. 

: خلي خبر عند أمن الجامعة.. 

: خوش حل أكيد ينطي هويته قبل ليدخلوه جوة أنطيهم أسمه و أأكد عليهم.. 

ركبت ورى و سلمت سلم بروان.. عليه بنطقه لكنه لغتة الكوردية و أحس عربيته مقلوبه لأن يكلم المرأة بضمائر وأسماء الاشارة الخاصة بالمذكر أعتقد متعلم العربيه من قريب صرت كلما يحجي كوة أضم أبتسامتي بس لا ينتبه عليه من مراية سيارته والله عيب و فشله 

: وصلت لمنطقتي هنا نزلني أريد أتمشى 

التفت الي وأبتسم و بعربيه شبه مكسره 

: خلينا نوصلك لباب البيت.. 

من يحجي يحسسني أني زلمة مشورب

: لا خوية تسلم.. 

رطنت عليه بلغه عربية سريعة وأني أتشكر منه باوع لشيلان.. الي ترجمت اله بعض الكلام الما أفتهمه مني.. 

: أحجي بطيئ لا تشلعين قلب زوجي..

نبهتني وهو ردها.. 

: خلي براحته.. 

ردت أضحك مكدرت فتحت السيارة طلعت بساع و دنكت وأني ارفع أيدي إشارة باي بس هم كال.. 

: خلينا نوصلك لباب البيت..

شيلان يمكن صححت اله وحجت وياه بالكوردي وراها عربي فكر ووراها

: العفو نوصلج لبيتكم.. 

: لا خوية أريد أتمشى.. 

: على راحتك.. 

شيلان.. بعربيه مرحه.. 

: راحتج حبيبي.. 

كرر : على راحتج حبيبي.. 

ركز و صفن ضحك..

شيلان : لتصير ببغاء

ضحكوا بينهم وأني أتمشى ما أريد بصراحه يوصلوني يجوز نصير.. موجود و هو يكره أي شخص من طرف ماما وما أريد نتفاشل أني و شيلان.. وي زوجها..

دخلت للبيت ملكيت سيارته بالكراج أفيش فكه نفتك بس لكيت ام جنان.. بالحديقة توكل بنتها الي بحضنها ويمها ياسر أبني أشرتله ضحك.. 

: أجت ماما أجت ماما..

ضحكت وهو يريد يركض ميعرف بعدها رجليه ثكيله شلته لحضني أبوس خدوده من زواجي خسرت هواي بس ربحت ياسر.. 

باوعت لضرتي : موجود؟ 

هزت رأسها لا بس أحس ضحكه بعيونها

: شكو؟ 

: خابر يكول أجي ساعة بثلاثة تحضرلي مريم.. المزة 

كعدت و غميت كصتي

: وأني يا يوم حضرت مزة لحضرته أني أصلي و أصوم أصلاً حتى جيته لفراشي حرام لأن يشرب وماله حق زوج يمي.. 

بس شسوي معندي اليطلكني منه ولا اليسندني خلي أرفع قضيه خلع تطلعلي العمام و يصيرون زلم عليه ميعرفون يضبون أبنهم.. 

عيني رجلج تسويله مزة تركصيله وليالي حمر أني شعليه لاطش الي اليوم

: والله هاي الأوامر وبلغتج يله حبي يله وراج هشك بشك و هز يوز تسوين أجواء لا يجيب النا راقصه وبيتنا نصير اله رواقيص و (.........) 

غميتها على ملفظها الطايح صبغه

: والله ولا أشجعه على المحرمات يله ماما ياسر.. ناكللنا لگمه و نقفل الغرفة وطز بأبوك.. 

باوعلي هو وكال 

: أبـوك.. 

: أنجب أبـوك أنت 

ضحكت أم جنان.. وهي تكرص خدود بنتها.. 

: يمة فدوة للبنيات عبالج أبنج الفاهي أي علمي على الانجب حتى يرجعها الج ويتعلم يغلط.. 

عفتها وفتت للبيت عاد من رجع ما طلعتله ظل يدفر الباب و يفشر.. 

: ولج أنتِ هاجرتني شنو بنت الكلب فتحي الباب..! 

تجاهلته وظل يصيح لمن مل و صاح ولج وينج ضحى صوت ضحى ام جنان..

: ها حبيبي أهدأ المن معصب تعال أني أسوي التريده.. 

غميت الباب أي والله سوي اليريده خليني أفتك منه أبو العرگ ومن ريحه السم تلعب نفسي منه.. 

التفتت لأبني سواها لعبة وهم يغم بالباب ومدري شيرطن هو ميعرف يحجي الا كم كلمة التفتت اله و ضحكت رجع ضحك.. 

: تقلدني شنو..؟ 

شمرت روحي يمه أحضن بي و أبوس حيل متعلقه بأبني لأبعد درجة.. 

ولك وليداتي تقلدني يا روح مريم.. بس أنت الطلعت بيك ربحانة من زواجي الاكشر هذا.. 

جر شعري و هو يبجي عرفت يريد يرضع ميهون عليه أفطمه أكول بعده خطية تمددت وهو بحضني أني أرضعه وأفكر بهاي الدنيا شضامتلي بعد لمن نعست غفيت.. 

ثاني يوم صادف جمعة جانت و عطلة معزومين ببيت شيلان.. كتله لنصير.. أريد أروح عزمتني بنت خالتي ونبارك الها على زواجها بالأول عارض بس بعدين مدري شلون قبل الله هداه عليه.. 

وصلني هو مقبل أروح وحدي لكيت البنات واصلات قبلي لكيناها طابخه دولمه كوردية عاد تغدينا وانطيناها هدايا ورجعنا... 

 مــــــــــــ♡ـــــــــــاجدة

أول يوم ما طلعت من وقت من الجامعة كلي أشواق أحاجي ماجد.. الي فترة ممحاجيته واليوم ما أجه ظل بالي عنده.. 

أغلب صديقاتي رجعن لبيوتهم لأن أول يوم شواغر هواي و كضيناها تسخت شفت وحيدة و نصار.. رحت الهم سلمت.. 

: هـلو.. 

: هلا بيج.. 

: أكولكم ماجد.. ممداوم اليوم ما شفته و ظل بالي يمه..؟ 

رد نصار : مريض و نايم مستشفى من يومين.. 

كلش قلقت : وحيدة ليش ما كلتيلي 

: شكولج مقبل نوصلج كال خبلة هاي تجيني للمستشفى و أخاف عليها.. 

: هسه هو وينه طلع لو لا..؟ 

: لا بعده نسبه دمه نازل وعنده تسمم حاد 

بساع سألت نصار : شنو ماكل..؟ 

: ما أعرف والله بس من أيام رحنه عرس صاحبنا و أكلنا كلنا مصار بينا شي إلا هو بس رجع تخربط.. 

بساع كلت

- شنو معدتكم حديد طاحت بالمكرود ماجد.. ؟ 

شوي أجه سامي 

: يله بلغت الولد نتجمع نروح  نزور ماجد.. 

أستغربت من نفسي قبل مجنت أحاجي أحد منعزله بس صداقتي بوحيدة جرئتني أجامل و أسلم و أندرج وي زملائي أقترحت عليهم

: نروح أني و وحيدة لعد وياكم زميلنا شلون منسأل عنه والله البنات بقسمنا طلعن والا هم يرحن بس ميدرن و طلعن من وقت يله اني ووحيدة موجودات.. 

ظلوا الشباب واحد يباوع للثاني منحرجين عزا هيج أني صايرة أحرج الوادم والله فشله بس عين لأجل عين تكرم.. 

نصار ظل متردد و جنه مقابل وحيدة تجي وياهم بس سكت لأن حرجته شوي كال ماجدة.. تعاي أحاجيج

أخذني جانب

: دتشوفين فوك الخمسين شاب من مختلف كليات الجامعة و ماجد.. اله شعبيته حتى أساتذة أفتقدته محبوب وأجتماعي كلش يا ماجدة.. تتوقعين من تجن وسط هاي الشباب كلها ماجد.. يقبل؟! 

متعرفيه لعد صاحب غيرة والا ما كلج مدام ربطنا رباط الحب مال يوميه أفتر بيج يم العالم أشوه سمعتج ما أقبل يشوفوج أهلج تتأذين ما أقبل من ننخطب و تصير رسمي عود تدللين نلتقي وكدام العالم كلها..

سكتت وحسيت حبجي.. 

: براحتكم لعد..  

: لا تزعلين يله أوصلجن..

طبعا خليت أم وحيدة تحجي يم أمي عن نصار وخوش ولد بالجامعة مؤدب وأأمن النا نأجره كسائق خط.. 

أشر للولد

: بعد ولد عدهم محاضرات ننتظرهم يكملون يا الله نروح حالياً أوصل البنات وأرجع مو ترحون من دوني 

: ننتظرك.. 

وصل وحيدة و كلتله

: أني أنزل هنا أهلي طالعين متفقه وي ماما من ترجع هي تمر عليه

: تمام و لا تزعلين مني بس أعرف ماجد.. كلش يغار ويخاف عليج 

هزيت راسي و نزلت فعلاً يغار حتى مرة طلب مني أتحجب بس من شاف ضجت سكت ورى مكال بس هاي العبارة

: أعرف تكولين ممقتنعه بالحجاب 

بس الحجاب واجب يا ماجدة.. مثل الصوم و الصلاة هيج أعتبري لو هم ما تصلين؟ 

: شبيه ما اصلي! 

وقتها سويت زعله و بعد ما فتح أي موضوع بهذا الخصوص.. 

بقت وحيدة واكفه تسولف وي نصار لمن كال لازم أروح الحك الجماعة ليرحون دوني..

: أن شاء الله ميرحون دونك. 

خلا وراح ورى ما سلم باوعت لوحيدة

: بيا مستشفى ماجد.. 

باوعتلي بعين ضيكتها 

: لـيش؟

:  هيج مجرد سؤال..  

: أعرف لمن كذبتي أهلي طالعين وتجي أمي عليه أبقى يم وحيدة.. شوفي أني ما أروح وياج وراح أكول لأمي ماجدة.. شعبتها ما طلعوا بعدهم خاف تخابر أمج تجيك وراج.. 

: عفية وحيدة فضل ما أنساه الج.. 

: يله بساع لا أمي تطلع و تشوفج.. 

رحت وأني بين امشي وبين أركض فاتت تكسي أشرت وصعدت ووصلت للمستشفى.. 

سألت عن أسم ماجد وبيا غرفة دزوني وين أروح و بيا طابق و يا قسم بالمستشفى من وصلت محد جاي بعد من جماعته 

دخلت قاعه كبيرة بيها اسرة تفصل بين كل سرير فاصل بردات ظليت أوخر بالبردات لمن لكيته ويمه شاب بي من دمه أسمعه يكوله

: ماجد.. ماجد.. أبن العم يله شلون شوربه عمتي مسويتها.. 

صوته ضعيف و مريض 

: مـا أشتهي.. 

: الدكتور كال لازم سوائل لا يصير بيك جفاف يله خوية يله.. 

بس رفع راسه شافني وأرتبك ماجد.. 

و أبن عمه ظل صافن.. 

: ها خوية متيهة ؟ 

بساع كلت

: ما متيهه أجيت أشوف ماجد.. 

ماجد : خوية عوفنا دقايق.. 

ظل يباوع لماجد.. بفضول وطلع هنا حاول يسند ضهره بمخده و هو معصب

: ما تكليلي شجابج هنا؟ ها! شجابج؟ 

: ظل بالي عليك و مشتاقتلك شنو متريد تشوفني وأني مشتاقتلك.. 

: ويا بنت العالم جاين جماعتي ما أريد يسمونج صاحبة ماجد.. أريد من أخطب وأن شاء الله عن قريب طلع واحد من أقاربي اله معرفة بجدج.. 

: عزا منين يعرف جدي فدوة لا يعرف أحبك.. 

أبتسم يمكن كلت شي ممعقول  بفطاريتي هأي.. 

: يعني أقاربي مثلاً يروح يكول لجدج بنتكم تحب أبنا ولج شهالعقل شوفي حبي أعرف أدبرها يله روحي للبيت لا تخربين عليه الشغل يله لا أحد عرف و يلمحج لو ربعي و يشيع خبرنا.. 

هزيت راسي  وطلعت من جنطتي قلم حبر منقوش بغلافة حرف (M) جنت ناوية من نداوم أهدي اله.. 

: كل عام وأنت بخير عيد ميلادك قبل أسبوع بس أنت مقبلت نلتقي ردت بمنتزه و أجيب كيكه نحتفل.. 

: حبيبتي أخاف عليج لو ما حبي صادق الج ما أخاف عليج من الهوه لو فات يله روحي ترى نصار من أمس بلغني الشباب جماعتي يتجمعون بالجامعة و يجوني 

تصرف لا ارادي فجأة دنكت و بست كصته أنتبهت لحالي لوين وصلني حبه وخرت بساع وأني خجلانه من تصرفي أما هو ظل متفاجأ همست.. 

; أسفة والله.. أعرفك ملتزم متقبل بهيج تصرفات والله أني هم مو متعمدة ما أعرف لويش هيج بستك بس عذري أحبك.. 

حجيتها وبساع شردت متفشله والله لو أسولف لصديقاتي المقربات ينصدمن ماجدة.. التخجل تبوس كصة ولد؟

وأني امشي تيهت ما أعرف وين أني وبيا قسم هذا دخلت للطوارئ شفتها مكتوبة الطوارئ مشيت منها لباب الخروج مو مستشفى هاي متاهة! حتى من اجيت كوه اندليت

وأنجريت.... 

: مااااااجدة.. أنتِ شدسوين هنا؟! 

الفصل العشرون من هنا