رواية العروس في الثوب الاسود الفصل السابع والثلاثون 37 بقلم عبير ادريس
بارت اليوم جديد
جمدت بمكاني همست
رسيل : مروان
ردت اوكف على رجلي ماكدرت
مروان : شبيج شكو؟
رسيل : لا بس انت شبيك مو طلعت ؟
ألتفت لنور وكال..
مروان : هاي منو طالع بسيارتي ؟
نور : عمي طلع ورجع قبل لا تنزل..
مروان : ادري وين رايح مفرغها من البانزين ما يكول شلون افولها؟ انطيني سويج سيارة ياسر واليرحم ابوج..
نور : صار بعيوني
صعدت نور جابت السويج ونزلت اخذه وراح كمت كعدت بصفها ...
رسيل : لج نور عبالي سمعني من حجيت قلبي راد يوكف..
نور : الله ستر
رسيل : تتصورين سمع وغلس بمزاجه؟
نور : مروان مو من هذا النوع ما يكدر يبيتها صدكي..
رسيل : بعد حلكي لازم اسده واسكت ما بية حيل مشاكل..
نور : اي دادة افضل ...
رسيل : شبيج اليوم تجاوبين حجاية وتسكتين ؟
نور : تعبانة لا نومتي مثل الاوادم لا كعدتي جهالي متطلبين مو مثل قبل يسكتون بأي شي خصوصاً اية
رسيل : حقج ..
ضلينا نسولف شوية الى ان اجتي اية وكفت فوك راس نور الا تريد تطلع تشتري
رسيل : جيبي موبايلج اتصل بمروان يشتريلها عليمن تعصبين عليها؟
نور : تولي لا تتعلم
رسيل : ترة طفلة شبيج وياها ؟
نور : من تريد شي الا هسه وهذا الطبع راح تاخذة وياها للكبر.
رسيل : يمعودة تكبر وتتعلم انطيني الموبايل شبيج..
جابته اخذته منها اتصلت على مروان
مروان : هلا ام علاوي كولي
رسيل : اني رسيل
مروان : ها رسيل كولي ناسية شي ما كتبتيه؟
رسيل : لالا بس اية كاعد تبجي وتريد تشتري خبصتنة وماكو احد يشتريلها هسه كلت بدربك تجيبلها شنو تريد..
مروان : وبنتي الصغيرة ما تشتهي شي اجيبلها ؟
ضحكت..
رسيل : لا سلامتك
مروان : جبس نساتل صمون اي شي بس اطلبي..
رسيل : صمون جيب للعشا
حجيتها وضحكت..
مروان : عساها ما تفارك ثغرج.
رسيل : شنو هي ؟
مروان : ضحكتج الحلوة
رسيل : مروان رصيد نور راح يخلص
مروان : ويخلص اجيبلها غيره
رسيل : هاي اية وياك ، تعالي هاج احجي وية عمو وصيه شنو تريدين ..
خليت بيدها الموبايل وكمت طلعت للحديقة ما اعرف ليش صايرة اختنك هواي واحس نفسي مثل المسجونة رغم كلشي عندي وحياتي مشت عادية بس ليش هيج يصير وياية ما اعرف...
رجع مروان تلكيته جان محمل اشكال والوان اخذت قسم من الاغراض دخلتهم جوا ردت اصعدهم صاح.
مروان : كلشي لا تصعدين انه اجي اصعدهم
رسيل : خفيفات
مروان : حتى لو عوفيهن انه هسه ماخذهن وصاعد فد حضريلي الحمام لان عركت صرت مي..
رسيل : ماشي هسه صاعدة
صعدت حضرت الحمام ودخلت للمطبخ طفيت الثلاجة ونظفتها صعدلي الاغراض عزلت المسواك ومسحت الكاع وكعدت بالهول ، طلع من الحمام مبتسم وكف كبالي وكال.
مروان : اليوم انه اسوي العشا
رسيل : شنو المناسبة ؟
مروان : بدون مناسبة فد عاجبني اسويلج مشاوي
رسيل : هاي شنو ؟
مروان : جبتلج لحم ومعلاك الا بشدة
رسيل : عاشت ايدك
كمت صاح وين
رسيل : احضر الاغراض اللي تشوي بيهن وهم اقطع اللحم والمعلاك اجهزهم للشوي
مروان : كلشي لا تسوين انه اسوي اليوم اريدج فد تفتحين حلكج وتاكلين..
رسيل : يلا براحتك راح نتعبك ابو شاهين
مروان : تعبج راحة ياماي العيون..
جر نفس ما اعرف حسرة قوية ودخل للغرفة بدل وطلع للبالكون طلعت وراه ، حط الفحم على المنقلة وشغل النار ، دخل للمطبخ كصكص اللحم والمعلاك شيشهم ..
مروان : طلعي طماطة وبصل وفلفل حار من يمج.
طلعت من كلشي اثنين باوعلي وكال .
مروان : هاي شنو؟ قليلات
رسيل : يبقى حرامات
مروان : ما يكفي يابه هسه راح يجون الولد ونور يتعشون ويانا.
رسيل : ها شعجب ؟
باوعلي عكد حاجبه متسائل
مروان : شبيج ضجتي ؟ ماتريديهم يجون ؟ انزللهم اكلهم للحديقة وانه وياج ناكل هنا..
رسيل : لالا بس استغربت هذا هو
مروان : تنغصتلهم ويانا
رسيل : شكو بيها
مروان : شيلي هاي الصينية وروحي قبلي هسه اجي وراج..
طلعت واجى وراية جايب المشاوي وبلش يشوي بيهن..
رسيل : ما اسوي زلاطة طرشي شي ؟
مروان : ما عليج يا بنت الناس انه اسوي اكعدي واتفرجي .
رسيل : ها هي كعدت ..
قرب يخلص اندكت الباب باوعلي وكال
مروان : كومي البسي حجابج الولد اجوي..
دخلت للغرفة عدلت مكياجي وغيرت دشداشتي لبست حجاب وطلعت للبالكون لكيت ياسر سلمت عليه ودخلت للمطبخ دقايق واجتي نور جايبة وياها صينية..
رسيل : هاي شنو ؟
نور : سويت نواشف خفت ما يكفي.
رسيل : اطلعي وشوفي مروان شكد مسوي ولح عليمن متعبة نفسج
نور : يلا ما ينذب الزايد يجوعون تالي الليل وياكلوه ، وين راح نتعشا بالهول لو وين حتى اجهز السفرة
رسيل : بالبالكون
نور : تمام
طلعنا يمهم التفت مروان وكال.
مروان : رسيل اتصلي على ايهم من موبايلي تأخر..
ياسر : خليج انه اتصل
مروان : اذا جايب موبايلك ما اتصلت صار ساعة اكولك اتصل عليه
ياسر : موبايلي ناسيه بالشغل مو الف مرة كلتلك.
مروان : رسيل اتصلي على ايهم وانت تعال ساعدني..
شلون بلوة هسه الا اني اتصل بيه اتصلوا انتم ، رحت اخذت موبايله بيه رمز ..
رسيل : مروان رمز موبايلك شكد؟
مروان : مواليدج حياتي.
اسمع ياسر يكوله اول تالي واكع هيج وكعة حتى الرمز مواليدها جاوبه مروان
مروان : ومن الحب ما قتل .
حجاها وضحك ، طلعت اسمه وجسمي صار يرجف من وحده ما اعرف من اقرا حروف اسمه لو اشوف رقمه وضعي يتخربط مو بيدي ياناس موبيدي اللي يصير اكو شي بداخلي ما اكدر اسيطر عليه ، اتصلت عليه خلصت الرنة وما جاوب اتصلت مرة ثانية مارد توني ردت اسده انسحب من ايدي ألتفتت واكف ..
رسيل : انت هنا واني اتصل عليك ؟
ايهم : ما بقى غيرج يتصل ؟
رسيل : شسوي الكل مشغول وطلبوا مني اتصل عليك..
ايهم : لازم مشتاقة لصوتي ؟
رسيل : وداعتك ابد
قاطعنا صوت مروان من صاح
مروان : رسيل ايهم جاوبج ؟
ايهم : هياتني اجيت
طلع يمهم لزمت وجهي حسيت نار تطلع منه اخذت نفس قوي وطلعت يمهم ، الاكل جاهز كعدنا ناكل ، مروان اخذ صحن كبير وشكله وكام
ياسر : وين ؟
مروان : لابوي وامي يتعشون بيه
ياسر : نور سوتلهم وتعشوا
مروان : حتى لو هسه اشتموا الريحة وكالوا محد تذكرنا
ياسر : براحتك ، تريد انه انزله
مروان : لا امي تتحسس هسه تكول دزه مروان جفيان شر
ياسر : تعرفها لشيماء
مروان : الا اعرفها حافظها كول.
نزل وبعدها صعد كعد ويانا كملنا اكل رفعنا الصحون اني ونور وراها صبينا الجاي خدروه على الفحم وبلشوا يلعبون طاولي ، ياسر اخذ نركيلة مروان عمرها بشقته ورجع جايب ٣ نراكيل كل واحد وحدة وكعدوا يلعبون وينركلون رحت للمطبخ اغسل الصحون وانظفه لكيت نور قبلي واكفة على السنك..
رسيل : وخري ياعيني ماتعرفين ترتاحين شوية؟
نور : راح اخلصهن يمعودة شعندي ما تكوليلي ؟
رسيل : ازعل اذا تغسليهن..
نفضت ايدها وكالت
نور : كلشي ولا زعلج.
رسيل : شوفيهم شلون كاعدين اول مرة يلتمون بعد المشاكل اللي صارت.
مدت راسها شافتهم ورجعت ..
نور : الله يبارك بجمعتهم ولا يفرقهم ابد
رسيل : امين يارب ويهديهم واحد على الثاني..
نور : امين ، خية اذا ما محتاجتني انيم الجهال واجيج حتى نسهر شوية نعسوا وعلاوي بين رجلين ابوه هسه يصير عصبي
رسيل : روحي نيميهم وانتظرج مو ما تجين ؟
نور : لا اجي اذا بعدكم كاعدين
رسيل : ما راح ننام لان مروان العصر يلا كعد تلكيه شبعان نوم واني ما نعسانة
نور : ها هي متفقين
اخذت جهالها وطلعت بعدها رن موبايل مروان ، جاوب واسمعه يكول هسه نازلك ، ياسر كاله اني هم اجيت وياك مديت راسي من باب المطبخ صار مروان بوجهي
رسيل : هاي وين رايح ؟
مروان : صاحبي اجى خابرته علمود السيارة ما بيها بانزين شوية ونصعد ما نتأخر.
رسيل : ماشي براحتكم
رجعت اشتغل بالمطبخ انسدت باب الشقة وصعدت دكات قلبي كل شوية اتوقعه يفوت لو يسوي شي يغثني بيه وبالفعل لهناك واحسه دخل للمطبخ فتح الثلاجة التفتت يشرب مي سدها وكال..
ايهم : تأقلمتي ؟
ما جاوبته جريت نفس واستغفرت ربي تقرب سحبني من كتفي صرت كباله ..
رسيل : شيل ايدك مني توك ماكل من زاد اخوك..
عكد حاجبه شفايفه رجفت صار يتنفس سريع بعدها شدد قبضة ايده وجهها علية..
رسيل : تريد تضربني ؟ اضرب بلكت يطيب جرحك وتتركني بحالي اعيش
ايهم : جرح واحد لو جروح مخزنة جوة..
يحجي ويأشر على صدره..
رسيل : مو اني سببهن
ايهم : منو غيرج ؟
رسيل : ايهم عوفني عوفني عوفني كافي عاد
ايهم : ولج افعالج جاي تصيبني بحيرة عقلي راح يوكف شنو من بشر انتِ ؟
رسيل : شو انت كلشي ما يعجبك ؟ جنت انوح عليك ضجت مني ونصحتني ما اخونه لأخوك ، التزمت بنصيحتك كمت تركض وراية وتحرضني على مروان وتالي شنو الحل وياك وتالي ؟
ايهم : متقصدة توصليني لاقصى ذروات الغضب والقهر والحزن والندم بكل مرة احجي وياج بيها
رسيل : شنو تريد تسمع مني ؟ ها شنو ؟ ايهم اني احبك راح اموت بدونك لو تريدني انتحر ؟ نسيت من اخذت كومة علاجات وتالي ؟ شنو اللي صار انت نقذتني لو عايفني اموت بوقتها ولا كل يوم تموتني بكلامك هذا اللي كدامك بشر ويحس مو حديد
ايهم : اول مرة ادري عندج احساس وتحسين حالج حال البشر ..
رسيل : انت مريض
ايهم : وانتِ مريضة ، شايفة القدر شلون يعاقب مريض بمريض ثاني مثل علته
رسيل : اي فعلاً احنا مرضه وراح نمرض الناس اللي حوالينا
ايهم : والحل ؟
رسيل : تنساني
ايهم : مو بالكيف هو مو بالكيف لو بيدي انساج وانسى ابوج هم فد مو بيدي افهميني راح انجن عقلي يوجعني والله ياحبيبتي يوجعني..
نزلت دموعي مثل المطر على وجهي
ايهم : ليش حبيتيني اذا ما كدرتي تصبرين علية ليش تركتيني بناري شنو سبب تركج الية رسيل جاي اموت انه..
لهناك وسمعنا صوت باب الشقة انفتح
التفتت على السنك غسلت وجهي وكملت شطف المواعين اسمع مروان وياسر يحجون بينهم كملت وايدي ترجف طلعت باوعت ايهم طالع رحت لغرفتي مددت ...
مرت الايام وزادت قساوة ايهم اضعاف ،كلما نتصادف يذبلي حجي لو يهددني لو يذكرني بخياتني أله ويختمها بحرامات حبيتج ولا مرة جاوبته اخليه يفرغ اللي بقلبه ويروح ...
عدت اشهر علاجي واني عايشة بنعيم حب مروان ، صارلي منبع الحب والامان ، عوضني عن حب الاهل وحب الحبيب والزوج صارلي خير اب احتواني بكل ما تعنيه الكلمة من معنى ، بديت اتعود عليه وعلى دلاله وافتقده اذا تأخر علية بالدوام ، ومن يرجع اضوج اذا عافني وطلع ، مرت ستة اشهر خلصت علاج بيها وقررنا نسوي طفل اول شهرب ما صار ، مروان سألني وبعد ما سأل بء اهله امه بالخصوص هواي تسألني يلا وشوكت ونريد نشوف احفادنا
وبيوم بشهر السابع سنة ٢٠١١ غابت الشهرية الها اسبوع ، رحت يم مروان جان كاعد يتفرج على التلفزيون وكفت كباله وهمست بدلال
رسيل : مروان
مروان : عيونه
حجاها وهو مركز بالفيلم
رسيل : بالك ويايه
مروان : وياج طبعاً
ألتفتلي وطفى التلفزيون بالريمونت..
رسيل : اريد اروح للمختبر
عكد حاجبه مستغرب
مروان : خيرج خوما بيج شي ؟ متأذية ؟ تعبانة ؟ شنو بيج احجي ؟
ضحكت
رسيل : انطيني مجال كلشي مابية بس اريد احلل
مروان : تحليل شنو؟
رسيل : حمل
مروان : الله عليج ؟
رسيل : شنو الله علية شبيك ؟
مروان : اكو حمل اكو طفل صغيروني
رسيل : لا بعد خلينا نتأكد يلا ولا تحجي لأحد هسه احلل يلا
مروان : هذا هو بدلي بسرعة
رسيل : هاي وين ؟
مروان : نازل اشغل السيارة بينما تجين
ضحكت واشرتله
رسيل : وبهذا المنظر تطلع
مروان : وشبيه ؟
انتبه على نفسه بالشورت ضحك وكال..
مروان : غير انتِ ثبرتيني
رسيل : وين ثبرتك انت مثبور من كاعك.
ضحكت ودخلنا للغرفة غيرنا ملابسنا ونزلنا لازم ايدي من باب شقتنا لحدما دخلت حللت الطريق كله يعصر بيها جان متوتر اكثر مني ، اخذت تحليل وطلبوا انتظر ربع الى نصف ساعة ، كعدت وهو يروح ويرجعلي ما كدر يكعد دقيقة وحدة كل اللي بالمختبر انتبهوا عليه صاحوا اسمي بهت باوعلي اشرتله يعني روح جيبه حسيته طفل وما يعرف يتصرف من فرحته راح واجى طاير الوجه احمر والضحكة تارسة حلكه..
رسيل: ها مروان بشر؟
مروان: حامل يرويحتي حامل
حضني بقوة ونزلت دموعنا سوية جانن كم وحدة كاعدات كامن يسألن ليش شكد صارلكم وهذا اول طفل؟ وشعجب ابوه جبير هسه يلا صار جاوبتهم بشكل مختصر باركولنا وطلعنا لزم ايدي عصرها عصر..
رسيل : مروان شجاك ؟
مروان : اسف اسف فد فرحان بودي آكلج اكسرج ما اعرف شنو اسوي
رسيل : حتى بفرحتك تعبر عنها بعنف؟
مروان: مبارك حبيبي مبارك
رسيل: الله يبارك بيك مبارك علينا اثنينا..
مروان: والله لا ادللج دلال كم ام شاهين عندي ؟ ها كم وحدة ؟
رسيل:احتمال بنية شمدريك ولد؟
مروان: كلشي ييجي نعمة واذا مثلج حضي من السماء بعد فد خايف من شي لو اجتي وتشبهج
رسيل: ليش ؟
مروان: توكع كلوب وتولع ناس وتخليهم يركضون وراها
ضحكت...
رسيل : مروان حباب اذا ولد ما اسمي شاهين عاجبني اسم ثاني
مروان: شنو ؟
رسيل: سند
مروان: ومنيلج هذا الاسم ؟
رسيل: شبيه مو حلو ؟
مروان: لا فد غريب ما سامع بيه قبل
رسيل: اي اني اريد ابني اسميه سند حتى من يكبر يسندني بدنيتي
مروان: وانه وين رحت؟ تراج قهرتيني حيل
رسيل: الله يطول بعمرك ويخليك النا بس ابني يختلف
مروان: هذا بعده ما جاي وكام ينافسني بطلت ما اريده
حجاها وعكد حاجبه حسيته من صدك ضاج..
رسيل:هاي شنو ؟ توك جنت طاير بيه هسه بطلت؟
ابتسم وكال..
مروان: الله يخليكم الية انتِ وسند فد ها الطفل الثاني اسميه شاهين
رسيل: شعجب الا شاهين ؟
مروان: كل جماعتي يصيحولي ابو شاهين حتى الكرايب وجنت مقرر اسمي ابني الاول شاهين فد انتِ ردتي سند وهذا هو سند يعني سند يلا ننزل يا ام سند وصلنا
دخلنا ايد بإيد وجانوا الكل ملتمين مروان بضحكة كال...
مروان: باركولنا اجاكم سند بالطريق...
لازم بطني ويحجي ايهم كبل كام صعد فوك بدون ما يحجي الباقين باركولنا الا هو ، حتى مروان انتبه عليه وضاج ..
مروان: شبيه هذا سبيته انه وما ادري ؟
علي: لا ضايج هسه خابر عمك جواد
مروان: شيريد ؟
علي: يكول لو ترجعون رغد، وتاخذون غيداء لو ماكو زواج
مروان: وطز خله يبطل شلونها غيداء عاد اكيد تطلع تك اختها..
علي: مالنا شغل بيهم اللي طلبوا طلاك نطلك ما طلبوا تضل بنتهم معلكة لا للسماء ولا للكاع
مروان: وايهم علمودها ضايج ؟ اذا يحبها زوجهم يابه ، واذا تريد انه احاجي عمي
علي: عوفه هو يقرر هسه كلناله ماقبل اي شي نتصرف وبعدين حقه يضوج عرسه بعدله يومين وجهز كلشي وتالي ماتالي يخرب بسبب زوجتك
مروان: حجي فرحانين لا تضيع فرحتنا بدفاتر قديمة..
علي: لا يابه شايفين كل الخير ويتربى بعزكم
تقربت نور حضنتني وهمست بأذني
نور : بالمبارك ياخية واخيراً دنيتج راح تضحكلج وماعليج بأيهم لا يكدر فرحتج.
رسيل : الله يبارك بيج حبيبتي لا على شنو اضوج بعد..
بعدها صعدنا فوك اول ما وصلت باب الشقة دنك شالني دخلني لغرفة النوم
رسيل : هاي شكو ؟
مروان : وعدتج ادللج دلال واشيلج من الكاع شيل وديري بالج تسوين شي بوجودي لو بغيابي ازعل عليج
رسيل : مروان هاي تسع شهور لا يوم ولا اثنين منو يخدمني بلة ؟
مروان : انه موجود بعيوني اخليكم
رسيل : وايام دوامك شلون ؟
مروان : نورتنا موجودة وانه احضرلج كلشي ماكو داعي تسوين شي
رسيل : ادري لازم بعلج وهيج خايف باجر اروح للدكتورة وتكولي وضعي شنو وعلى اساسه نقرر مو من هسه دك قرارات .
مروان : كالت زين وضعج وان شاءالله زين بكل الاحوال ما تسوين شي ...
راح المطبخ سوا عشا وكفت يمة اتفرج عليه يا هدوءك ويا حنيتك ويا طيبتك ليش شوفتني وجه ثاني غير هذا وجهك شكد يعجبني اسأله هيج اسأله بس ما اريد افتح دفاتر قديمة تضيع فرحتنا بالطفل ...
ثاني يوم كعدت على صوت دك برا قريب على بلكونتنا فتحت الشباك باوعت اكو رياجيل بسرعة سديت الشباك هاي شكاعد يسوون بالبالكون مال ايهم...
من رجع مروان سألته كال مسوي درج على الحديقة يريد يعزل نفسه الكل استغرب تصرفه الا اني اعرف ليش هيج سوا و منا بدت عزلته عزل عنا كلنا كام يطب ويطلع من الحديقة مرت الايام كمت ابد ما اشوفه طيلة فترة حملي لو مرة لو مرتين لمحته ومن بعيد ..
بهاي الفترة مروان دللني دلال ببيت ابوية ما شايفته شكد جنت اكول بابا مدللني مروان دللني اضعاف شكد ما احجي ما اعبر عنه لو اقصر بوصفي ، بنزلته يشتغل بدالي ويطلعني كل يوم يغيرلي جو لدرجة مرة كلتله راح تفسدني بهذا دلالك ضحك وكال
مروان : انه عندي اثنين جهال بنتي الكبيرة وابني ان شاءالله ينور حياتنا دلالي وتعبي كله الكم ما اريد بيوم تكولون بابا قصر علينا بشي لو حرمنا من شي...
جابلي موبايل جديد احدث موبايل نازل السنة ،كملت شهور حملي على خير وسلامة قرب موعد ولادتي صادفت بشهر الثالث ٢٠١٢ والفرحة ببيت عمي ما تنوصف
جنت اتألم وهم يدكون ويركصون
رسيل : مروان حبيبي تعبانة كلش احس روحي تريد تطلع
لازم ايدي ويطمن بية
مروان : هانت ياعمري هانت هسه راح تفوتين وتطلعين انتِ وسند..
حجاها وغص بالكلمة ترك ايدي ودار وجهه عرفته كام يبجي اخذوني منه ودخلوني لصالة الولادة ، مرت سبع ساعات واجى سند نور الدنيا وحياة امه وابوه اول واحد دخل للغرفة مروان جان طاير بيه ، اخذه من ايد الممرضة وهمس.
مروان : هذا شلوت اشيله ؟ اخاف يوكع من ايدي
ضحكت الممرضة وعلمته شلون يشيله ، اخذه منها بإيد ترجف اذن بإذنه وكبر ونطاه للمرضة جابته بحضني حتى ارضعه لان جان يبجي ، تقرب مروان باسني براسي وجان يتفرج علينا ، عاوج رقبته وعيونه مدمعه..
رسيل : راح تبقى دموعك تنزل ؟ كافي مو كمت بسلامة وابنك بخير ليش هذا البجي ؟
مروان : ما اعرف لسه گلبي خايف ويرجف عليج حمدلله على سلامتج ياروحي
رسيل : الله يسلمك..
بعدها دخلوا نور وياسر وشيماء وازهار تحمدولي بالسلامة ورجعنا للبيت ، اول ما وصلت ذبحوا ذبايح جوا رجلي وجابوا مزايق ، دخلت جوا البيت مكتض بالاقارب عازميهم وراها اجوي اصدقاء مروان جايبين مزايق طلعلهم برا شالوه ويركصون وياه الدنيا انكلبت بيومها اجتي نور باتت يمي بالغرفة دارتني ومروان جان يروح وييجي علينا ويبجيب بهل مسواك وراج ليورا عبالك عنده عشيرة ، ورا اسبوع شال الاثاث اللي بغرفتي القديم نطاها لعالم فقرة
وجاب اخشاب لسند وترسها العاب رحتله جان كاعد بالنص ويرتب بيها..
رسيل : بعد وقت على هاي السوالف ليش هيج خابص روحك ؟
ألتفتلي مبتسم
مروان : فرحان حاير شنو اسويلكم وشلون احسسكم بفرحتي الدنيا ما لامتني يا روحي انتِ اجمل واحلى شي صار بحياتي وجبتيلي هدية لو ابقى طول عمري اشكرج عليها ما اوفيج..
رحت كعدت يمه بالكاع لزمت ايده دموعي نزلت وهمست..
رسيل : انت اطيب اب واحن زوج وكلش فرحانة باللي كاعد تسويه النا بس ياحبيبي ما اريد تعبك هيج يروح حرامات هاي الفلوس الحلوة تنصرف على اشياء مبالغ بيها
مروان : وانه المن رايد هاي الفلوس ؟ اذا ما صرفتها عليكم احركهن احسن.
رسيل : الله يخليك النا
قاطعنا صوت سند وهو يبجي ركض مروان كدامي رحت وراه جان واكف فوك راسه ويحجي وياه..
مروان : وين اكو رجال يبجي ؟ مو عيب ولك خزيتني
رسيل : مروان وينه وين سوالفك هاي
مروان : لا ولج يفتهم شوفيه شلون سكت هاي جدة تكول من تحجي وية ابنك وهو ببطن امه يطلع للدنيا يسمع صوتك يسكت وهاج شوفي شلون سكت معناها يفتهم.
رسيل : اي صحيح بس ما يفتهم كلامك سكت على صوتك وانت كاعد تهزه ...
ومشت الايام على هذا الحال نفس الروتين الحلو نفس الدلال عيالي تغيروا تغيير جذري وياية من فترة حملي لحد ولادتي محد مضوجني ولا مسمعني كلمة ، بعد ايهم عني ريحني هواي وبديت شوية انسى واتعود على حياتي الجديدة وكمت احبها ، ابني ماخذ كل وقتي مروان مقدر هذا الشي وحابه ، وبيوم اجى كعد يمي وكال..
مروان : عاجبج نبقى بهذا البيت ؟ لو نطلع ببيت جديد وتأثثيه على مزاجج؟
رسيل : نطلع بيت ؟ شعجب ؟
مروان : اريد ابني يتربى ببيت مستقل وتكون عنده شخصية مستقلة محد يتأمر عليه ولا ياخذ من هذا ومن هذا اريد يتعلم مني ومنج وبس..
رسيل : فاجئتني ، نخليها من يكبر سند شوية حتى ما اضوج وحدي هنا وياية نورة نلتهي سوية خصوصاً من تلتحق ..
مروان : براحتج كلت اخذ رأيج ونشوف شنو الانسب نسويه فد اذا حابه تبقين انه ماعندي مانع..
رسيل : وهذا البيت مشتريه لو تريد تشتري ؟
مروان : مادام لغيتي الفكرة اتركي السالفة لا تسألين بيها بعد
رسيل : ها هي نتركها وما نسأل
مروان : زعلتي ؟
رسيل : لا كبرنا بعد على الزعل والتزعطط
ضحك وكام يلعب وية ابنه و بيوم سألته شوكت نطهر سند كال وية عيد ميلاده حتى الحفلة تصير بحفلتين كبر حبيبي و صار عمره سنة شهر الثالث ٢٠١٣
جهزناله حفلة كلش كبيرة وياها عزيمة
عدا الثيم مال عيد ميلاد ، الصبح طهرناه والعزيمة صارت الظهر ، والعصر احتفلنا بعيد ميلاده وهاي جانت اسعد ايام حياتنا وية بابا مروان....