رواية خطايا واجتثات الفصل الثالث والعشرون 23 بقلم نور علي البصري

رواية خطايا واجتثات الفصل الثالث والعشرون 23 بقلم نور علي البصري

‏كلشي أنت بالنسبة الي

شمس الگمر والماي والغيمة 

وما دام احنه سوه 

ضيمك وضيمي علي 

مو كلمن وضيمه

(ماجدة ♥️ماجد) 

ــــــــــــــــــــــــــღــــــــــــــــــــــــــــــــ

 مـــــــــــــــ♡ ــــــــــــــاجدة

ظليت أرجف خوف من الشفته مد أيده و سلم على بابا سـهيل.. بلعت ريكي.. 

: شلونك رفيقي رغم كنت أنتظر دعوة منك رفيق سـهيل.. بس كلت اجي اهنئ حضرتك بزواج ربيبتك..

جان بابا سـهيل.. يحاجيه من ورى خشمه.. 

: شكراً يوم اللي نحضر زواج أولادك.. 

بعدين دار الحديث عن مبادرات الزواج الجماعي ومديح للرئيس و لأبنه المسؤول عن هيج مبادرات و كان ايضاً مسؤول عن وزارة الشباب والرياضة..

: أكو حفل بعيد ميلاد الرئيس زواج جماعي التفاتة حلوة من نجل الرئيس وهاي مساعدة للشباب الما عدهم إمكانية بظروف الحصار.. 

: أي الحمد لله على هيج مبادرات تفرح شبابنا الغير متمكنين الله يطول عمره و يحفظه ريسنا بس كون يكشف ويعالج الفساد بين صفوف الاستخبارات و أمن الدولة..

الرجال جان يباوع لبابا سـهيل.. وفهم بسمارة لذا حول مسار كلامه.. 

: مبارك زواج بنت لؤي.. بس تبقى بنته مو بنتك رفيق سـهيل.. شفت محضر لؤي.. أنت المشتكي و الأدلة الي قدمتها ممكن تستأنف لصالح لؤي.. ومن يطلع يقبل؟ زوجتها وهو واعدني بيها؟ 

باوعلي بابا سهيل.. بحذر يعني هو ورى سجن بابا و أني كلت هذا الرفيق هو السبب درت وجهي عن بابا سـهيل..

أخاف يخرب العرس و يأخذ مـاجد.. لجهة مجهولة لو يتبلى عليه.. 

رجع يحاجي الرفيق.. 

: الأب هو اليربي و المهم تكفلتها من هي و طفلة واليوم أسلم الأمانة لصاحب الشأن زوجها..

: رفيق لؤي.. قضيته انفتحت و ديحققون من جديد بالأستئناف توقع يطلع يقبل بتزويج بنته دون أذنه؟

سألتك السؤال مجاوبت تتهرب تخاف لا بنته تسمعك وتعرف أنت ورى سجنه! حتى ليزوجها إليه شوف رفيق سـهيل.. أنت أعلى مني درجة وهذا الشي اللي مسكتني.. 

: الجد موجود و الجد يقر أبنه مو كفو لذا يا رفيق جمال.. هذه قضايا عائلية لا تشغل بالك بيها.. 

سكت الرفيق و هو يباوعلي بنظرات يبتسم و يركز الحقير عينه على مفاتن جسمي المغطية بثوب زفاف.. 

مـاجد.. مفاهم شكو حالة حال الأطرش بالزفة بس حسيته كوة ساكت و متوتر أعرف بزمنا الزلمة الميذب حاله تهلكة فظل ساكت بس من أبتعد الرفيق 

مـاجد.. سألني.. 

: شنو هذا نظراته الج؟ ممرتاح اله هو مركز وياج شيفض الحفل والله رجل أمج ورطني بهيج زواج جماعي آني وين وهاي الناس وين لو علي حفل بسيط بيتنا وفضت.. 

بس طمنته.. 

: هذا رجال چبير شايب و أكبر من بابا عادي نظراته الي كنظرات ابوية..

بس مـاجد دومه جان ذكي..

: هواي نظراتة أبوية عود آني غبي صح وكفت بعيد من يتهامسون بس مركبلي اذانات لاقطة ترى سمعته هذا سرسري ولا يخجل شلون يباوع الج أستغفر الله مال اعمي عيونه لو ما أخاف انعدم ناس ميخافون الله والله ما ردت عرس بقاعة ردت عرس اهلنا.. 

: جان هذا شرط جدي ناسنا هواي و لازم نوافق حتى لا يرفضوك أصبر مبقى شي و نروح للفندق.. 

جان الرفيق بعيد ممنتبه فصار مـاجد.. يبيع بطولات يمي و يخوزر

: ماجد.. وجهك صار يخوف والله صرت أخاف شنو هيج تخوزر بالرفيق أخاف عليك لا يشيلوك ولله وتروح مثل هالشباب الراحت.. 

: ساكت ساكت آخ لو ما زحمة من رجل أمج الأستاذ سـهيل.. والله بيست بطنه..

صفنت بي

: أكولك تحجي صدوك لو تهنبل؟ ترى هذا چبير بالدولة.. 

: و أذا چبير ترى چبير على روحة مو علي شوفي الأستاذ  سـهيل.. ورطني بهيج مهزلة وعرس حاس نفسي بحفل سياسي مو عرس حتى أهلي تكتروا خايفين من جمهره رجل أمج المهم بعرسنا الأغاني كلها وطنية هو هذا العرس اللي تمنيناه يا مـاجدة.. ؟ 

: حبيبي مو مهم العرس المهم ننجمع سوه و أذا أغاني وطنية ليش الوطن ميستاهل؟ 

: يستاهل بس هذا عرس مو حفل سياسي حسسوني الريس العريس مو أني؟ 

كرصته بيده

: أستر علينا لا أترمل و لسه مشفت دنيا! 

ضحك لزم أيدي ظليت اتفيك بعرسنا الما عاجبه.. 

: اصلاً عرسنا مال أمراء شبيك مدلغم ميلوگلك بس البشاشة.. 

باوعلي

 : عمي آني لا أمير ولا ملك و لا أبوي محافظ ولا وزير آني رجال فقير وعلى كد الحال و ما أحلم بأحلام مو كدي لا تنكسر رگبتي مـاجدة.. 

مد أيده فبيدي لزمتها حيل من أجه الحزبي وهو يباوع عليه و نظرته حادة وتخوف ردت ابجي.. 

: مـاجد.. خايفة شكلة يخوف..

: هسة صار يخوف هو آني زلمة و خفت مو بعد أنتِ هو هذا هم بشر لو مستعارينه من عالم الجن دشوفي عيونه فكور مس تمن (زروف).. 

هاي خلقة الله مو مال أعيب بس ربج من كد أفعالهم والشر ماسخه بأقبح وجه مابي نور لا رحمة.. 

: مو توك تكول لو ما زحمة دفته دوف هسة تخاف مو كتلك تهنبل عموماً  صوتك لا يسمعوك ويتحول عرسنا الى مأتم..

: سكتت و انجبيت.. 

: ديصفكون وي الأغنية ويهوسون صفك لا تجيب العين علينا عفية بس مشي هالليلة.. 

باوعلي ممقتنع و يحس تورط بهيج حفل ظل يكمز و يصفك بس يرزل ما يغني.. 

: الله شلون قرقوز سويتوني ولج عرس وبيتنا و بين أهلنا هسة آني شنو ذنبي أصفك و أكمز حتى أرضي غرور أزلام الريس.. 

ظليت أصفك آني هم و اترنح عود مندمجة على أغنية الله يخلي الريس الله يطول عمره نهديله كل ساعة غالي حلوة طباعة.. 

: يلة مـاجد.. بين فرحتك.. 

: ترى آني مو قرقوز.. 

: هسة لو عرس بيت ما تصفك فرحان و تغني تطرب وي المطرب.. 

: أي طبعاً هو الواحد كم مرة يعرس هي مرة بالعمر اكعد ادلغم لو أفرح واگلبها گلاب.. 

: لعد أفرح هسة هي ليلة بالعمر.. 

: لا اله الا الله.. 

شاعر القى قصيدة مدح للريس و لأبنه.. و ختمها بهوسة مديح للريس فعلاً تحول العرس لمنحى سياسي.. 

شفت البقية تهوس على هوسة الشاعر وتدبج ضربت مـاجد.. بعكس أيدي.. 

: تفاعل مثلهم لا تجيبلنا العين ومشي هالليلة فدوة.. 

المسكين مـاجد.. أني اكوله مشيها يلة ديدبچون ادبچ وياهم يباوعلي بنظرة مال يريد يخنكني بس نفذ كلامي 

و حتى نصار.. كابله و جماعته.. 

صديقاتي اعتذرن ما گدرن يجن سفر للعاصمة صعبة بس شـيلان.. و آزاد.. أجو و من طول الحفل أشعار وأغاني ترخصوا و راحوا قبل الزفة لفندقهم 

كالت شـيلان.. تبقى وي رجلها كم يوم بالعاصمة للونسة وسياحة.. 

أبو مـاجد.. ما حضر تحجج بالمرض و بناتة الأربعة من مرتة المتوفيه ما حضرن بس أم مـاجد.. و بناتها اجن 

و يهلهلن احسهن دأيتلوكن لأن مجني ولا فرحن لمـاجد.. اجن بس متفرجات على أجواء العرس.. 

أخيراً زفونا والله خفت عليه من الرهبة لا يجفص مـاجد.. ويضيع روحه أكثر من رهبة ليلة العرس.. 

بالفندق دخلنا لغرفتنا و سد الباب  وباوعلي حسيته متوتر نزع سترته و الربطة علكهن وظل بس بالقميص فتح أول دكم و أبتسملي.. 

: بيه عطش مال واحد ماشي صحراء ما شارب ماي..

باوع أكو بطل ماي ممفتوح.. 

: أي الله يرحم والديه الي خلالنا ماي.. 

و ظل يشرب ماي و يباوعلي لون وجهه تغير عركان متوتر شوي كال وحسيته يطلع حجج بسبب التوتر مو سبب الحفل.. 

هذا ذكرني بسوالفنا أحنا البنات بشلتنا المتزوجات يسولفن عن الرجال الجريء خبره و اللي يتوتر ويتردد بعده بتول أنتبهت من صفنتي أضحك.. وهو مستغرب يباوعلي.. 

: شنو اليضحك؟ بله ضحكيني وياج.. 

: ها لا هيج تذكرت حجاية شـيلان.. وصاحباتي المتزوجات من قارنن شغلة تخصكم أنتو الزلم.. 

: وهي..؟

: اووو سوالف بنات ضحكت مو عليك والله مجرد كلام  تذكرته أجه ببالي..

: هـا خوش.. 

رد يشرب ماي والبطل يرجف من لزمه بيده الترجف متوتر.. 

: تعبانين بدلي ننام و نأجل إتمام الزواج لغير وقت.. 

هذا توتره واصل مراحل هسة يعني طلع مـاجد.. بتول بس التقي بصديقاتي اكولهن أني الأولى بحياته أو يجوز يريد ليلتنا بغرفتنا تكون أستحيت وهمست.. 

: كـيفك..  

طلعت من الجنطة الجبتها وياي روب نوم وملابس محظرتهم ماما الي رحت للحمام بدلت و تركت تسريحتي و مكياجي طلعت كعدت على الجرباية.. 

تعجبت من كعد يمي هو صافن بيه تذكرت بوسات الخطوبة وقارنت جان متلهف بس هسة صارت صدوك زواج 

و دخلة و باك هوى..

مدري ليش الله ذب علي فطارية كوة لازمه روحي لا أكركر و أضحك ويزعل بي طبع يتمزعل.. 

: شگد أحبج أويلي و أخيراً صرنا سوى و جمعتنا غرفة.. 

ظل يسولف و هو يصنف طبعة مرح و عيونة تبتسم قبل وجهه شوي وحسيت نظرته تغيرت و كام شرب مي ورجع كال.. 

: أي هو من نرجع بيتنا لا تضوجين إذا خبثو أهلي ما استقبلوج تعرفين هم رافضيج بس يخافون من أهلج فراح تشوفي تعاملهم وياج بتجاهل.. 

أبتسمت وأني مدنكة وظليت ساكتة

و رجع شرب مي واضح هو متوتر كلش

رجع گال.. 

: أحم أي حبيبتي تردين ماي مو؟ 

هزيت راسي بـ لا.. 

: ليش؟ ترى المي خوش سائل يفيد الجسم و الشجرة تنسگي و تعيش إحنا هم نشرب مي..

ظل يخوط بالحچي واضح متوتر 

ما أعرف شبي وبعدها باوع من الشباك

وكال.. 

: تعاي يمي الله شلون سيارات مملية الشوارع.. 

ضحكت من عبارته و صححتها

: قصدك الشوارع مملية سيارات.. 

: ها أي هي هيج.. 

دار وجهه و انتجه على الشباك وحسيته أحمر صار.. 

: هو اللي يشوف يمه هيج حورية يطير عقله وما يحچي صح وحتى الكلام ينساه.. 

رجع شرب وهو يبتسم.. 

: هذا المي شكد مفيد حبيبتي شربي مي...

: هذا المي شكد مفيد حبيبتي شربي مي.. 

صبيتلي كلاص و أني هم شو توترت.. 

: أي طيب هواي.. 

- أي والله الماء سر الحياة.. 

ظل يحاول يبادر و يرجع يشرب مي شوي وترخص و راح للتواليت طلع من الجنطة بجامته وكل شوي يباوعلي مبتسم.. 

: مـاجدة أحبج.. 

بخجل دنكت ترك البجامة توكع من أيده و بكم خطوة اجاني لزمني من جتفي توترت وخفت كلت يمكن راح يتمم حسيت بمغص و خوف دمعت عيوني وهو كال.. 

: راح أطلع شوي حبيبتي أذا تعبانة نامي.. 

ردت اغم روحي عود شجاه خلا و طلع دون ما يلبس سترته ربع ساعة رجع جنت متمددة أباوع مسلسلي المفضل على قناة الشباب خلصت ودرته على قناة بغداد.. 

قفل عليه هو باب الغرفة من طلع وأخذ المفتاح سمعت صوت طكة المفتاح رجفت بتوتر وخجل و سويت روحي نايمة.. 

أخذ بجامتة و راح للحمام أباوع بسكته طلع سابح و ينشف بشعره وراها أجه تمدد و جرني بحضنه.. 

: حبيبتي كاعدة؟ 

سكتت بس من لزمني نزيت بمكاني كشفني اله وكاعدة ضحك.. 

: أثنينا متوترين بس هذا لازم يصير أذا مو هسة بعدين.. 

يحجي وهو بيد ترجف تنزعني الروب جو الغرفة جان ظلمة من طفى الگلوب الرئيسي بس مد أيده شغل گلوب جانبي إضاءة منخفضة وأجواء عرسان 

أثنينهم بلا خبرة ولمسات شاب أول مرة بحياته يستكشف بنت ورى ساعة

و نص متمدد و هو يمسح على خدي

و يمسح دموعي ويحاول يسكتني.. 

: كافي يا عمري موتي روحج بچي هي هاي سنة الحياة هسة صرنا مو بس عشاق و حبيبين صرنا رجال ومرته ولج مرتي صرتي ممصدك... 

حضني وهو دافن وجهه برگبتي احس بوساته بدت تتعمق بساع كتله.. 

: لا ما اريد.. 

ضحك ووخر.. 

: خامس مرة تكولين ما أريد وتالي رغم هاي الدموع و البجي بس من أخليج بحضني تذوبين.. 

الصراحة خجلت يمكن ما نمنا بين سوالف ونتبادل مشاعر العشق بصمت وخجل و بين أفكر شنو موقف بابا لو طلع ومعقولة يتقبل زواجي دون رضاه.. 

كلش خايفة لا اخسر أبوية لا ما معقولة بابا عاش عمرة مجاهد حتى يستعيدني أكيد راح يغير فكرته لمن يشوفني سعيدة وي زوجي اللي أختاريته.. 

حسيت مـاجد.. غفى نام جان ضهري على صدره وهو حاظني ماكو أي حاجز بينا درت بين أيديه شوي تحرك ورجع جرني حيل لحضنه.. 

جريت نفس جان نايم هو و أني اراقب ملامحه ابالغ لو اكول مـاجد.. جماله باهر لا هو جاك بتايتنك ولا جمس بوند الي أحب سلسلة أفلامة ولا أنطونيو دي كابريو.. 

صح بعيني أحلا رجل وأجمل من كل النجوم و الفنانين بس كشكل عام هو وسيم شكلة يذكرني بجمال باكستاني 

العيون واسعة جداً و بنية فاتح جداً لدرجة اول نظرة اصورهن عسلي غامق رموش طويلة.. و شعر ناعم ببشرة حنطاوية فاتحة وطولة مربوع  بالنسبة لطولي.. 

ضوء الجانبي جان اصفر ما أكدر أمد أيدي اطفي لأن مـاجد.. حاضني وأيديه صايرات على أيدي محاوطتني.. 

باوعت لشفايفه و أني مبتسمة أول مرة أنتبه عندة ببطن شفته السفلية شامة سودة ناعمة.. رموشة وهو مغمض أكول عيونة تبين كحلية لأن  رموشة حلوات و معقوفة مسكرة رباني.. 

ما أعرف اذا أبالغ بوصفه مدري هو هيج بس رغم شكله عادي مثل أي شاب جنوبي بي جاذبية ظليت ملتهية أباوعله لمن نعست و نمت.. 

كعدنا متأخرين التوتر زال و تقريباً الخجل بينا قل محد أجانه الصبح عوايد أهله مدري خباثتهم بس هو يبرر

: شعرفهن بهيج طول عمرنا نتزوج ببيوتنا ستر و غطا مو بديرة غريبة تلكيهن طلعن يتسوكن من أسواق العاصمة لو يفترن خطية.. 

رديته أشاقيه.. 

: ليش عيني تجمع روحك شنو متزوج سابقاً.. 

ضحك وباسني 

: وعـد أنتِ الأولى و الأخيرة.. 

بس الوعود مجرد كلام من غير سطور مثل هوة منثور يتبخر بأي لحظة..

ورى حمام سريع بدلنا وطلعنا كال منروح هسة خلينا أول نتريك أخذني لمطعم عائلي شعبي بالسوك.. 

: ماجي جيجي حبيبي شوفي هذا المطعم رهيب مرة أجيت أشتغل بالعاصمة قبل خمس سنين جنت أتريك بي.. 

استحيت أفوت ممتعودة بهيج مكان 

سلم  على صاحب المطعم و طلب أكل أكلت قليل ولاحظت مـاجد.. كولش حساس من يشوف ما أتقبل اشياء ممتعودتها بساع كال.. 

: المن طلبت كل هذا اذا ما تأكليه ترى المطعم صح شعبي بس نظيف..

: دأكل والله ترى  أكلي هيج قليل.. 

: لا أعتقد أنتِ تستنكفي مطعم بسيط بس نظيف و جنت هنا أشتغل و أتريك و أكل بي..

كل شوي وأجه واحد سلم عليه وباركله مو أباوعلهم و أبتسم من راحوا رزلني

: مـاجدة.. دنكي ترى ذول مو الجامعة و لا زملاء ولا تربية مناطقكم هنا الوضع مختلف لا تباوعين عليهم وتبتسمين وتضحكين من يسلمون عليج شوي ثگل.. 

تفشلت من كلامه ليش فشلني.. 

: للعلم أني متربية عالاصول و اصلاً ماما متقبل أحاجي غرباء بس أني من ضحكت على شقاهم وياك.. 

حس زعلت و مد أيده همس.. 

: عيونج بس الي تباوع أغار والله.. 

شاقيته.. 

: مو أذا أظل أباوع بس الك بله نتمشى و أدعم عامود لو أعثر.. 

ضحك ورى ما كملنا أكل أبتسم و كام.. 

: نروح لبيتنا نرجع نسافر أكولج لشنو نبقى أيام هنا.. 

: حساب الفندق مدفوع.. 

عصب

: و أني جبت طاري حساب النعال.. 

: بابا سـهيل.. وماما عازمينا ترى الغدة عليهم وهم نتونس بالعاصمة لشنو راجعين.. 

كوة لازمته حتى ميكول نرجع والله أمه وإخواته سافرن همزين فكه ولا حبني ولا حبيتهن.. 

بقينا أسبوع لمن اكتفيت من العاصمة قررنا نرجع بالقطار وهم بابا سـهيل.. حاجزلنا غرفة منام.. 

وهم سافروا قبلنا بيوم هم كال لماما نجدد شبابنا وبقوا يفر ماما يونسها..

هو يحب ماما هواي لو ما ألغموض 

و الأسرار العرفتها عنه لو ما سوالفه الكرهتني بي والا هو خوش رجال..

: همزين ما نرجع وي امج ذلتنا ذل كل شوي دكت باب غرفتتا ولج ما أنسى اول أمس تدك باب الغرفة علينا 

الساعة بالعشرة بالليل بس خوش انضربت بوري مخليتج تفتحينه الها.. 

: بس ليش مـاجد.. عيب والله.. 

: تحسسني بايك بنتها منها و تباوعلي من فوك لجوة بس والله فضل جدج فلا أنساه هو اله الفضل أنجمعنا.. 

دنكت خجلانة.. 

: ماما رافضة و زوج أمي اعتقد راد يخلص مني بطريقة ما يسلمني لبابا هيج عناد و خبث يحرم بابا لؤي مني..  للأبد بتزويجي والله لو ما أحبك ولا أقبل.. 

: أبوج رافضني؟ 

: هاا أي أي بس والله هو طيب هو يخاف من الأكبر منه بالمنصب وإلا ما تنازل عني لأمي لو ما خوفوه و هددوه طبعاً يخاف..

لزم أيدي و دفع حساب المطعم وطلعنا نتمشى أيد بيد.. 

: الصراحة لو بنتي أموت ولا أكتب تنازل أعتبر أبوج جبان شلون أب كدر يعوف بنته لرجل طليقته عجيب..

باوعتله أبسمره 

: ليش هو منو ميخاف من الحكومة ورجال الحكومة و سهيل.. هنا حكومة وداهية هسة أنت أمس تهوس تردح للريس هيج حباً؟ لو شنو أكيد خوف.. 

سكت وذب حسرة

: سدي الموضوع بس أكولج من توصل لعرضي لو ضناي ما أتنازل و أبوج هم غلطان.. 

: يله كافي سد السالفة و أني ما أقبل تحجي على بابا مو كافي الدنيا ظلمته والله نقلوه لآخر الدنيا كله من سهيل.. 

وفوكها أتبلى عليه و تهمة و سجنة بس الله موجود وأن شاء الله شهور الأستثناء تثمر و تتكحل عيني بطلته.. 

: أن شاء الله.. 

سافرنا بس وصلنا نزلنا من القطار بالمحطة وراها أشر لتكسي.. 

: متواعد وي نصار.. يجي علينا هنا يأخذنا بس فلت أبن اللذين.. 

: تلكاه يفكر يعرس هو و وحيدة.. سوينالهم واهس.. 

باوعلي و ظل يتغامزلي و يضحك عيونه تتلامض.. 

: ليلة الدخلة كد ما جنت متوتر بس بعدين كلت يارب حلالك حلو.. 

: مـاجد.. كافي لا تحرجني.. 

ضحك

: بس أنتِ كضيتيها عليه تبجين شبيج تبجين طفلة أنتِ.. 

ظل يضحك عليه.. 

: عيونج السبني ورمن من البجي بعد لا تبجين هاي العيون ترى أموتج بس تبجيهن ذني العيون حبيباتي.. 

قطع كلامه من وكف تكسي راح يعاملة ما أقتنع بالكروة ظل ينتظر غيرة و غيرة مليت من الوكفة ممتعودة هيج 

ميوم عاملنا تكسي شيطلب ننطي ماما متعامل شيكللها التكسي بس يالله تصعد و نوصل وجهتنا.. 

أخيراً جريت نفس من وكفت سيارة داتسن ظل يداهرة و يعامله لمن السايق أقتنع 

صعد يم السايق بعد ما فتحلي الباب

صعدت وگعدت ورى السايق بس  التفت وشافني باوعلي بغيرة و أشرلي بيده أتدنى وأصير ورى مقعدة هو..

: تعاي منا وين مناك! 

تدنيت صرت وراه حسيت راح أعاني من غيرته بس الحمد لله غيرته مو مرض غيرته خوف وكد ما يحبني.. 

وصلنا لبيتهم نزلنا وحاسب السايق و لزم أيدي و بيد ثانية يفتح الباب الي عبارة عن جينكو ملحوم و مصبوغ رصاصي جان الباب طلاقة وحدة و ضيق.. 

مد أيده وجر السيم بباب الحوش المخلي حتى ينفتح دخلنا باوعت لطرمتهم زغيرة و أكو مرجوحة مسوينها من بواري مي الحديد و لاحمينهم و بواري اكبر تسند السناسل..  

بيت أهله ماكو مظاهر عرس ولا فرح ولا أحد ينتظر جيتنا او أجه علينا ولا ذبحو جوة رجلينا ذبيحة او دجاجة مثل ما أسمع الأعراس.. 

فتنا لكينا أخواته التسعة و أبوه كاعد فاتح ماطور المي و يصلحه بنص الهول و الهوسة كايمة سباين و جلابتين و أمور شغل و صوت أمه تلعلع.. 

: گطيعة لجهالچن كاسرين جام البوفية بله زلمجن تخسر أللي أنكسر لو لا.. 

ظل مـاجد.. واكف مغتاض أني تعجبت تدعي على أحفادها عزة باجر أبني يكسر سلعه لو كلاص هم تطكه دعوة شنو من طبع عدها..

مـاجد عاتبهم.. 

: ترى رجعت آني ومرتي و أبنكم الوحيد.. لا أحد كال نجيب دجاجة نذبحها فجران دم لهذا المكرود هسة ملازم على الأقل تتلكونا.. 

أبوه دار وجهه عني ومنها عرفت مستحيل هذا الشخص يحبني أخذ جانب صمت..  

: بالمبارك بـوية.. 

باوع مـاجد.. لأبوه.. 

: هواي فرحان مكلف روحك بوية.. 

: ما أريد أحجي بوية لا تلحك الراحو بعدين نحجي هسة بعد حتى النفس ما نتنفس بهالبيت حطيتلنا علاس و جاسوس بوية أسكت أحسن لا توصل لأهلها وننكرف.. 

بس أمه جانت عرمه ما تخاف أبد ومن نوع متسكت لو تعرف تنكرف تحجي مدري آمنت مني أحب أبنها مستحيل اطگها تقرير يوديها ورى الشمس حتى لو أضوج منها..

: جاسوس صار عدنا.. 

ورجلها سكتها.. 

: أش.. 

تلميحات بتلميحات ضغط على أيدي مـاجد.. عباله أرادد و أمه باوعتلي و سكتت أعرف يخافون من بنت من بيت ينتمي للنظام و هي تجفص ترجع تباوع بخوف..

أستمرت تبسمر ولا تهتم وتخاف هاي لعد شكد بايعه ومخلصه.. 

: مـاجد.. يمة بت عمك أمس نقلوها للمستشفى.. 

: خـير؟ 

: ليش ما تعرف من فسختم الخطبة هي كل تفكيرها عبالها تتصالحون و ألضلع ما يلتم إلا بعضاه يمة.. 

: يمة يلتم يلتم نزرع عود عضو جديد و يتقبله الجسم لابد يتقبله مثلكم لابد تتقبلون مرتي 

بس موقفكم وبرودكم من عرسي أبد فلا انساه يله ماجدة.. همزين عزلت بيج چا أكلوج ذول آكلين لحوم البشر.. 

أخته الزغيرة بعدها مراهقة هاي أخته من أبوه بزر الكعدة جانت مختلفة عنهم كلياً ضحكت أبتسملها وحجه.. 

: رحمة.. زعلان عليج.. 

ردت تضحك..  

: تريد أباركلك وما باركتلي ناجحة هذا الشهر..  

ضحكلها هنا عرفت مـاجد.. يحب رحمة.. وهي مقربة منه اجت تباوع بحذر لأمها وهي تباوسني.. 

: مبروك بعد عايزين بس وحدة وتصير عند مـاجد.. درزن من العنصر النسوي.. 

أبتسمت ألها شوي و أجن أخواته الأربعة من أبوه بعيون الكبار حزن 

: ما نكدر نكسر بيك و ما نباركلك بس يخوي صعب نهوس و نصفك وتعرف ليش الدم ما يصير ماي يخوي.. 

سكتها أبوهن.. 

: أشش وصيتجن بعد ممنوع تحجن على فلان ولا أي شخص من جهته تردن يسبوجن و تتيتم جهالجن و أبوجن شرفه يضيع سكتن أخوجن خوش دخللنا علاس.. 

جر نفس مـاجد.. وكال

: أجيت اشوف شبيكم ما بيكم لأن موقفكم وتجاهلكم مينسي بس الحقد ماليكم.. 

جرني بنتر من ايدي جان معصب على أهله أيدي شعليها.. 

: أيدي.. 

: أمشي صعدي لبيتنا و أكسر رجليج اذا نزلتي بعد عليج ببيتج بس لمن الله يفرجها آني الكم اذا ما عزلت بيت بعيد عنكم ظلوا بحسرة وحيدكم.. 

أبوه : هاي من أولها شفتي أبنج العاق.. 

أمه : أش أسكت بعدين نحجي لا تخابر أهلها ويتبلون علينا و ننسجن.. 

 ردت اهز ايدي عود تخاف و تذب حجي و ترجع تنصحهم سكتوا و بنفس الوقت ما رضيت على مـاجد.. مهما يكون أسلوبه جان كولش مو حلو.. 

صعدنا لمشتملنا جان مرتبة هو و أغلب الأثاث مستعمل ميهمني المهم آني وياه انجمعنا.. 

شوي و رحمة.. دكت الباب جايبة صينية اكل و قوري جاي.. 

: هذا ريوك لأحلى عرسان شفت لا عبالك أعوفك من غير ريوك العرس بيدي جهزته..

أخذ منها الصينية وما كسر بخاطرها و لا كللها متريكين و جرها لحضنه 

: رحمة.. أنتِ صدك اسم على مسمى.. 

: شلون ما أداريك و أفرحلك أنت أخوي الوحيد..

ظل يشاقيها و يشجعني اخذ و انطي وياها بالكلام جانت رحمة.. صديقتي الزغيرة ويوم عن يوم قوت علاقتنا... 

احلام المراهقة بعيونها الحلوة  وهي أجمل أخواتها الحياة والبشاشة وحب   المستقبل بعيونها تشبه عيون مـاجد.. رغم هي جميلة جداً نظراتها للأن مرسومة بعيوني.. 

مرت أيام و أجن صاحباتي يتباركن وجابن الهدايا وكالعادة جلستنا و سوالفنا

مـاجد.. كال نازل يم أهلي أخذن راحتجن همست بحزن.. 

: سـؤدد.. ما أجت عموماً مالي ذنب سنين محملتني ذنب شي مالي علاقة بي.. 

ردت رحـاب.. 

: شلون يعني صدك سمعنا بيكم صديقات من الطفولة ليش هسة علاقتكم متزعزعة.. 

كرصتني مـريم.. ما أحجي فعلاً امور الماضي تبقى طي الكتمان.. 

: سالفة قديمة.. 

باوعت شـمس.. الي

: مو جنج سمنانة.. 

: ههههه أي شوي.. 

: شلون مدبرين الأكل و أنتِ متعرفين تطبخين؟ 

: مـاجد.. يعرف و يعلم بيه و رحمة.. ما تقصر.. 

شوي صعدت رحمة..  

: محتاجة شي مـاجدة.. 

ضحكت

: لا تعالي يمي شوفن هاي صرت أعشقها والله أخاف تأخذ معزة مـاجد.. 

أبتسمت رحمة بخجل 

رحاب : البنية تستحي من عدنا أكولج هاي حلوة كلش وبيضة گطن  مـاجد.. حنطاوي رغم وسيم بس أخته أجمل لا والله حسناء بالجمال كولش بيضة ولا عبالك جنوبية.. 

: شبيجن ترى مو كل الجنوب حنطاوين وسمر ترى آني بيضاء.. 

وضحكت رجعت كملت 

 : عمتي ام مـاجد.. كلش حلوة وبشرتها بيضة حمرة حتى عيونها ملونة و رحمة أمها يكولون جمالها يسولفون بي.. 

: لعد مـاجد.. عليمن؟

: أبوه مو هلكد شكله عادي تعالن أكلجن مـاجد.. ترى وسيم وجذاب عود شنو تعيبن؟ 

: والله رجلج بالضيم..

: انجبي والله حلو عبالك باكستاني يخبل.. 

: لا عمي حلو حلو لتزعلين..

وضحكن يشاقن وياي.. 

: عندي أحلا رجل حتى لو شكله عادي بس وسامته وجاذبيته طاغية..

: أي عيني القرد بعين مرته غزال.. 

رزلتهن يعيبن على زوجي خوما اسكت.. 

غيرنا الموضوع باوعت لمريم.. 

: شخبار نـصير.. هم بعده ما تعده الصدمة.. 

: يمكن الصار بعائلتنا صدمة خلت نـصير.. يراجع حياته حالياً الحمد لله مستقرين ويصلي و يصوم وملتزم.. 

رجع نـصير.. أللي عرفته قبل و حيل متمسك بيه و بأبني و كال يسجل أملاكه بأسمي و كولش يخوفني من يحجي بهيج.. 

; خليه يأمن حياتج أنتِ و ياسر.. 

: بس أخاف من خطوته هاي أخاف وراه شي.. 

: مو تكولين تاب ورجع مثل الأول.. 

: أي والله و أحسن من الأول بعد.. 

: الحمد لله و الشكر.. 

أنتهت زيارة صديقاتي و راحن طلعلهن مـاجد.. وهو يضحك وياهن و يسولف ميانة زملاء جامعة وحدة ورى ما سد باب وراهن صعدنا للمشتمل لزم أيدي.. 

:  تونستي وي صاحباتج سوالف و ضحك أنتِ هنا اهلي متجنبينج.. 

: رحمة.. ما تقصر أكولك حبيبي خوما بعدك زعلان من أهلك.. 

:  لا بس حيل أنقهر ميحبونج ولا متقبلينج.. 

: أتركهم الزمن يعلمهم مـاجدة.. ما تأذيهم و أذا أهلها ناس بعثية مو معناتها تصير جاسوس عليهم او أذيه الهم بعد هم صاروا أهلي.. 

باس رأسي و حضني.. 

: ماما عازمتنا باجر على الغدة.. 

: فشلة ما عزمناهم شوفي أذا نعزمهم بمشتملنا.. 

: والله أمي تتعذر من الجية تعرف هي و أمك ما يتلاكن وبابا سـهيل.. قليل موجود أغلب وقته بره.. 

تعذرت منه لا يعزمهم لأن اعرف امي ما راضية بزواجي و تستنكف تجي أجت مرة و بعد كالت ما أجيج هذا بيتج الجنه گن دجاج ما يلوگلج بس شكول على جدج..

ثاني يوم رحنا لأهلي و حسيت بـماجد.. متضايق امي كضتها عليه لوم و عتب و بنتي مدلله و شو ضعفانة ما توكلونها والعكس صح اصلاً عالزواج سمنانة وجهي متفح.. 

ظل ساكت لخاطري بس عينه عليه وكل شوي ينفخ.. تجاهلته أمي وحاجتني.. 

: الخميس عرس أختج مو ما تخليها تجي.. 

بساع كال مـاجد.. 

أكولج عمة ترى آني بنتج تزوجتها مو أستعبدها فلا يظل بالج يله مـاجدة.. تأخر الوقت نروح.. 

هنا وخر بابا سـهيل.. وجهه من الجريدة 

: بعدة الأكل ما أنهضم شبسرعة ترحون أبقوا للعصر أوصلكم.. 

: لا عمي عندي شغل آني رجال أشتغل مو بس طالب جامعي.. 

أبتسم الي

: محتاج مساعدتي بشغل يا مـاجد.. 

بكبرياء رد مـاجد.. 

: تسلم عمي بس مستورة شغلي معيشني ومعيش مرتي يله مـاجدة.. 

كمت بوست أختي إنتصار.. 

: أحلا عروس خيتي.. 

ضحكت بخجل دخل حـارث.. سلم و تعامل وي مـاجد.. بغرور و بابا سهيل.. يخزره لأن تكبر على زوجي ضجت منه كمت.. 

: يله حبيبي تأخرنا عود ردولنا الزيارة

حارث : هة... 

مـاجد.. حسيته أنحرج من تصرف حـارث.. لزمت أيده و طلعنا و طلع ورانا بابا سـهيل.. 

: يـله أوصلكم.. 

مـاجد.. رفض

 : لا عمي مشكور.. 

أبتسم بابا سـهيل.. 

: يله أبني دنيا ظهر وأنتم متوازين طلعتكم بالظهاري.. 

: شغل عندي عمي.. 

: الله يفتحها بوجهك يله باجر تتخرج و تتوظف بشهادتك دير بالك على مـاجدة.. 

درت وجهي بعدني مو على حال وياه بس شسوي مجبوره اسايسه يبقى لخاطر ماما

 وصلنا لكيت رحمة.. منظفه المشتمل و دتعطره شافتنا ضحكت..

: أجيتم شنو كلت تبقون للعصر فخليني أنظف المشتمل.. 

باسها أخوها 

: لا تتعبين نفسج البيت نظيف.. 

شوية صعدت عمتي طبعاً تتجنب عرايكها وياي شسوي تعارك بمـاجد.. 

دخلت 

: أي زين نضفتي جيفة مـاجد.. 

هاي جيفة مـاجد.. تقصد مرت مـاجد.. جان مـاجد.. وجهه مبين ناوي يعصب عضيتله شفة عود ليستفزوك و يبقون أهلك دوم أوصى عليهم ظلت تفتر بالمشتمل تكلب بالغراض وتهز أيدها 

: خوش أكول شغلك وينه ثاريك كاضي على خراميتك.. 

خلت و طلعت باوعت رحمة.. وضحكت

: صدك مـاجد.. ليش جايف و خرامية عندك ههههههه 

ضحك مـاجد .. باوعتلهم

: ترى أفهم تقصدني.. 

رحمة : عندج واسطة متحاجيج بصورة مباشرة..  

: أكولج حبي واسطتي الله الله يهديها والله مرة چبيرة أكول و مثل أمي خلي تحجي يمعودين الحجي ينباع ينشري.. 

: مـاجدة.. ليش ما تختلطين جوة حتى أهلي يتقربون منج.. 

جان كلام رحمة.. بس مـاجد.. عاند

: لا يمعودة تصير مشاكل خلونه مرتاحين.. 

مـاجد.. ما يقبل أطلع للسوك وحدي و طلب مني اتحجب جنت أرفض بس مرة من أجه عمهم و صعد يسلم فشلني لأن بلا حجاب.. 

هنا كلت ليش اجيب حجاية لمـاجد.. تحجبت وقتها بس دون قناعة و ظليت أفتر بالسوك وي رحمة.. كتلكم موصيني كلما أطلع كون وياها.. 

تسوكت فستان لعرس أختي و أشتريت لرحمة.. هاي أمي كل فترة تدزلي مصرف تعرف وضع مـاجد.. وتعرف ما ألبس مثلهم مستعمل ففرحت رحمة.. بفستانها و عزمتها تروح وياي لعرس أختي.. 

: اذا أبوية قبل وهم أمي يجوز ترفض.. 

: بلكت مـاجد.. يقنعهم والله تتونسين و نركص و نفرح آني كلت لمـاجد.. أبات بيوم الحنة وأرجع ورى ما يخلص العرس.. 

برجعتنا للبيت أسمع عمي أبو مـاجد.. يبجي يتوسل و مـاجد.. مكلبجيه و صعدوه بيكب و شدو عيونه 

شهگت من اجت عيني بعين .......

الفصل الرابع والعشرون من هنا 

لقراءه باقي الفصول من هنا