" أنك تعانى براك ..
نوع من انواع العذاب ..
أنك تتقاسم حزنك مع شخص .. علاج "
#بلسان_ملك :
كُنت قاعده في الكنبه و ببكي ..
عمار قاعد قصادي و ماسك السكينه و بحركه يمين و شمال ..
عمار:لي هو؟لي مروان ما انا ؟
ما رديت عليهُ و هو في اللحظه دى قام و بدء يرمى كل الحاجات ال حولينو و بصرخ
عمار:جاوبي .. على القليله خليني اعرف السبب .. امكن لمن اعرف سببك حا اشوف انو عندك حق .. ها ؟؟ اتكلمي ..
ملك:عمار روق عليك الله
عمار:اروق؟انا ال مفروض اروق؟طيب ..
عمار اخذ نفس و قعد تاني ..
عمار:ملك بصوره جاده .. لي هو ما انا ؟
ملك:عمار انا حاولتا .. الموضوع ما بيدى .. يعني الزول ما بقرر هو عايز يحب منو
عمار:بس بقرر يوقف عن حبو للزول ده .. بقرر انو ما عايز يقدم ليهُ مشاعر
ملك:انا ما قدمته مشاعر ل مروان ..
عمار:ملك انك تصديني و تصدى حبي ليك دى ما مشاعر تعتبر ل مروان؟اننا نكون في بيت واحد بس كأنك ما معاي دى ما مشاعر ليهُ؟أنك تاخذى الحبوب دى من وراي .. دى ما مشاعر ليهُ ؟؟
عمار طلع حبوب منع الحمل و رماها قدامي ..
عمار:انتى حتى ما عايزه تكوني عيله معاي .. انتى رافضه تديني فرصه ل درجه انك رافضه تجيبي مني طفل .. في رفض اصعب من ده ؟؟
عمار عيونو كانت بتلمع ..
كان ماسك دموع كتيره ..
ما كنت عارفه انى جرحتو للدرجه دى ..
ما كنت عارفه انى كنت سيئه للدرجه دى ..
بس ما كان بيدى ..
ما كنت عارفه احب ..
عمار:حلبي كلامو صح ..
لمن قال حلبي أستغربته ..
عاينت ليهُ و واضح انو في راسي في مليون سؤال ..
عمار:الغلط ما منك .. الغلط من مروان .. هو الغدر ب اخوهو في النهايه ..
ملك:مروان ما حاول معاي ابدا .. ما كان بعاين لي اصلاً .. بعدين حلبي دخلو شنو؟و انت بتعرف حلبي من وين اصلا؟
عمار:قدم لي مساعده بسيطه عشان اشوف حاجات ما كنت بشوفها .. انتى عارفه انى كنت حا اكون اعمى كده للأبد ؟ انا ابدا و لا واحد في الميه ما كنت حا اتوقع انكم تعملو فيني كده
ملك:انا و مروان ما بينا شى .. و عمرو ما حا يكون بينا .. مروان محترم علاقتي بيك و ما قاعد يحاول يقرب مني اصلاً
عمار:انتى بتدافعي عنو؟خايفه إنى اعمل ليهو شى؟
ملك:عمار .. انا ما عارفه قالو ليك شنو .. ما عارفه انت في راسك في شنو .. ما عارفه حلبي دخلو شنو .. بس متأكده انك شايف الموضوع بطريقه غلط .. حلبي بحاول يعمل في حاجه ما كويسه .. هو انسان ما كويس .. هو ال سبب انو امي تموت .. ال حقيقيه .. شوف انا حا اشرح ليك .. عبد الوهاب ..
قبل اتم كلامي عمار اتكلم ..
عمار:ما ابوك .. عارف
ملك:من وين عرفته؟و متين عرفته؟
عمار:عبد الوهاب قبل يتوفى قال لي
ملك:دقيقه .. يعني انت كنت عارف من زمان .. و ما قلت لي ؟
عمار:امي متورطه في ده كلو .. لو عرفتي حقيقه ابوك و حقيقه قصتك ف أنا متأكد انو الموضوع ممكن يكبر .. حا يضروك و حا يضرو امي .. انا كنت بحاول احميكم
قمته من مكاني و حسيت قلبي بتحرق ..
امكن اكتر شى وجعني من بين كل الأحداث الخياليه ال بتحصل ..
انو اكتر انسان كنت حاسه جمبو بالأمان ..
كُنت شايفه انو مستحيل يعمل شى يضرنى في يوم
هو نفسو الانسان ال انا حالياً مصدومه فيهُ
ملك:عملت كده عشان امك ؟
عمار:ملك كده كده ما حا يتغير شى لمن تعرفي الحقيقه ..
ملك:انت دسيت مني حقيقه حياتي .. انت دسيت مني اكتر معلومه ممكن تغير اى شى في حياتي .. و بتقول لي ماف شى حا يتغير ؟؟ عمار انت ما كده .. انت طيب و لطيف كيف حسي انا بكتشف ال حاجات ال غريبه ال ما بتشبهك دى ؟
عمار:دى المشكله .. انى طيب .. انا كنت اضعف حلقه يا ملك .. كنت حنين و بخاف عليكم عشان كده ما شفتوني ؟؟ عشان كده امي لمن قررت تضحى ب واحد من عيالها ضحت ب مروان لانو اقوى مني .. لانو ما حا يخاف لمن يدخل ال عالم ال وسخ داك .. بس انا ؟؟ انا خليني في المكان النظيف لاني ما بستحمل؟عشان كده انتى حبيتي مروان؟ال قاسي .. ها ؟؟
ملك:انت في زول لعب ب راسك .. مستحيل الافكار دى تكون كلها منك
عمار:اي .. في زول لعب في راسي .. و خلاني اشوف حاجات كتيره على حقيقته .. انا متأكد انو ثقتك ب مروان دى كلها حا تكتشفي انها كانت غلط .. و انى انا ال انسان ال صح
ملك:على القليله مروان ما عمل زيك .. مروان اختار يوريني الحقيقه .. اختار يخليني اواجه..
عمار:الحقيقه؟قصدك الكذب ال قالو .. ناصر ابوك؟حلبي و جعفر بينهم خلاف عشان السلطه؟ده ال قالو ليك؟تتوقعي اخوان حا يصلو مرحله زى دى من العداوه عشان سلطه بس؟تتوقعي حا يحميك واحد غريب عشان صحبو؟
ملك:ما فاهمه؟
عمار:ماف اتنين اخوان بصلو مرحله زى دى الا بسبب حب قديم .. و ماف واحد بحمى وحده للدرجه دى الا لو كان بحبها .. بحبها لانها حب حياتو او بحبها لانها بتو .. كل القصه ال قالوها ليك فيها اهم كذبه .. ناصر شخصيه وهميه .. قبل سنين جعفر اخذ ال بت ال بحبها اخوهو حلبي يوم عرسو و حاولو يهربو .. وقتها كانت امك حامل فيك من جعفر .. بس جعفر سمع انو امو دخلت في غيبوبه .. و انو حلبي قال حا يحرق بيت اهل امك و كل ال فيهُ .. هرب امك و رجع عشان يواجهه حلبي و يوقف ال دم ال كان في الارض بسببو .. بس بعدها عرف حقيقه انو لو اجتمع تاني ب امك ح يعرض حياتها للخطر .. و انو حلبي فقد عقلو و قال انو حا يحرق امك عشان يحرق قلب اخوهو .. جعفر حاول يحمى امك و يحميك من بعيد لانو لو قرب من امك ح يكون حكم عليها بالموت .. و باقي القصه انتى عارفاها اصلاً .. بس حتى باقي القصه فيها كذب .. و كذب حا يصدمك
ملك:مستحيل تكون بتقول الحقيقه
عمار:ال انتى اخترتى تثقي فيهُ كذب عليك .. اختار انو يكذب عليك .. لو بكذب عليك فى دى .. تتوقعي حا يكذب تاني في شنو؟
ملك:….
…..
#عنده_مهند :
عمر:كنت مبسوط بشكل الدم و بالطريقه ال قتلتهم بيها؛
عارف عملت شنو؟مسكت سكي/ن و ختيتها في رقبتهم .. الدم كان بطير في كل مكان .. ما كان في صراخ لاني قطعت حبالهم الصوتيه قبل يستوعبو اصلاً .. بعد ماتو جا في بالي لي م اطعنهم في بطنهم و صدرهم طعنات كتيره وره بعض ؟ ح اتفشى اكيد و انا بشوف المنظر ده .. حسي ح اعمل فيك كده .. لأنك زيها كنت في المكان و الزمان الغلط .. ما كانت ح تموت اليوم داك لو م طلعت من غرفته .. و انت كمان م كنت ح تموت لو م عرفته الحقيقه .. صح؟
مهند:عمر انت ما كده .. انت ما سئ .. خليني اساعدك
عمر:لازم اكون سئ .. لازم اجيب حقهم
مهند:لو عرفت بتك الصوره ال سيئه ال انت وصلت ليها .. حا تكرهك ..
مهند فتح عيونو فجأه ..
عاين حولينو ..
كان ف المكتب حقو ..
قام من مكانو و شرب مويه ..
كان حلم سئ ..
بس حقيقي نوعاً ما …
اثناء ما كان واقف و حاسس بتعب نفسي و جسدى ..
جا واحد من الشباب و قال ليهُ وعد عايزه تشوفك ..
مهند دخل غرفه التحقيق ال فيها وعد ..
مهند:ها
وعد:حا اعترف ب أى شى ..
#فلاش_باك :
قبل وقت طويل ..
وعد كانت طالعه من جلسته مع عبد الوهاب ..
نزلت و شافت عمر واقف بعاين ليها
مشت عليهُ
وعد:انت منو؟و عايز مني شنو؟كل يوم بتمشي وراي
عمر:عايز أقدم ليك عرض .. حا يغير حياتك
وعد:….
عمر و وعد قعدو في كافى قريب من العياده النفسيه " نفس ال مكان ال قعدو فيهُ مهند و عمر لمن قابلو ملك اول مره .."
عمر:انا عارف اي شى انتى عشتيهُ .. و عارف ابوك بعمل شنو و شغلو شنو ..
وعد:انت عايز شنو؟
عمر:قتلو مرتي و بتي .. و عايز انتقم من اى زول كان ليهُ دخل .. منهم سالم و محمود عمك .. و انا عارف انك عايزه سالم يموت
وعد:انت كيف عرفته؟د كتور عبد الوهاب قال ليك شنو؟
عمر:عرفته من مكان تاني .. اسمعيني لانو ماف وقت .. انا عارف اى شى عملو اهلك .. ما عايزه تنتقمي منهم؟ما عايزه تاخذى حقك منهم؟
وعد:كيف؟
عمر:تقتليهم!!
وعد قامت من مكانها مخلوعه
وعد:انت مجنون؟
كانت ماشه بس عمر مسكه من يدها ..
وعد:العذاب ال عايشه فيهُ حياه .. العذاب ال انتى عايشه فيهُ .. ما عايزه ينتهي ؟؟ انا شغال في الشرطه .. محقق .. انا حا امسك القضيه و ح امسح اى دليل يخصك .. فكرى فيها .. انتى حا تكسبي ف النهايه .. حا ترتاحو كلكم ..
وعد كانت خايفه و متردده بس عمر كان عارف انها حا تعمل اى شى عشان تطلع من الجحيم ال عايشه فيهُ ..
عمر اداها بطاقتو و مشى ..
لمن رجعت البيت كانت امها في المطبخ بتطبخ و سالم واقف معاها ..
كانو بضحكو و بتونسو ..
اسمهان:وعد رجعتي؟
سالم عاين ليها ب ابتسامه ..
سالم:احلى وحده ترجع
اسمهان عاينت ل سالم بخيبه امل
بس النظره اختفت بسرعه و حولت الموضوع ل ضحك و هظار ..
وعد كانت زعلانه شديد ..
كانت عايزه تطلع غرفته بس امها نادته
اسمهان:تعالي قطعى لي السلطه دى مسافه ارسل الرساله دى بس ..
وعد دخلت المطبخ و كانت زهجانه شديد
غسلت يدها و بدت تقطع ..
امها كانت ماسكه التلفون و سالم جا و وقف جمبه وعد ..
سالم:مالك زعلانه؟لمن تشوفيني ما بتتبسطى؟
وعد ما كانت بترد على سالم ..
سالم:بعدين رتبي الدولاب حقي .. عندى هدوم ما مرتبه
وعد عاينت ل سالم و رفعت السكينه ف وشو
وعد:انت ما بتخاف ربنا؟انت ما بتحس؟انت انسان اصلا؟
اسمهان لمن شافت المنظر جات على وعد سريع
اسمهان:انتى ال مجنونه ال ما بتخافي ربك .. نزلي السكينه دى .. السكين فيهُ شيطان يا بت
وعد:الشيطان واقف قدامك .. انتى ما عايزه تشوفي بس
اسمهان:وعد .. انا عندى ولد واحد بس .. نزلي السكينه دى و استغفرى ربك
وعد:و انا ؟؟ انا بتك ما مهم ال بعيشو؟ما مهم حالتي النفسيه ال زى الزفت ال وصلت ليها بسببو؟ امي ولدك ..
قبل وعد تتم كلامها امها ادت كف ..
سالم ابتسم ابتسامه عريضه و كتف يدو و كان بتفرج ..
اسمهان:اوعك .. انتى لو لميتى نفسك ما بحصل ليك شى .. ولدى ما عمل شى الا لو انتى سبب فيهُ .. ما تختى اغلاطك على الناس .. احبسي نفسك في الغرفه لو ما عاجبك تعيشى كده ..
كلام اسمهان وقع على وعد زى الصاقعه ..
هيا كانت متعوده على ردات الفعل دى
و متعوده على انهم في صفو ..
بس تعبت ..
كيف ام تشوف ده كلو و تسكت؟
كيف؟
وعد طلعت غرفته و كانت بتبكي .. بتبكي
بتبكي لأن ال بيت ال كان مفروض يكون مكان أمان ليها
هو منبع الخوف ..
سالم وقف جمبه باب غرفته و بدء يخبط الباب ..
سالم:افتحي .. وعد افتحي الباب عشان ما اكسرو ..
سالم كان واقف جمبه الباب و حاسس بغضب ..
كأنو عدم سيطرتو على وعد بتخلى يحس انو ضعيف ..
سالم بدء يتذكر كلام ابوهو ..
#فلاش_باك :
" كان عمرو 13 سنه بس "
محمد:حا اخذك معاي الليله تشوف شغلي
سالم:بجد؟
محمد:انت بقيت راجل .. و اصلا انت بعدى حا تمسك الشغل حقي .. لازم تستحمل المناظر ال ممكن تشوفها .. انت راجل حسي يا سالم .. انا مبسوط شديد انو عندى ولد عشان حا يشوف معاي العالم ال ما مفروض زول يشوفو غيرو
محمد مسك يد ولدو و اخذو الحديقه ..
كان كل ما يحس برعب بمسك يد ابوهو قوي
بس محمد فك يدو ..
محمد:ما حا تخاف .. انت المتحكم هنا ..
كل ال حاجات ال كانت بتشوفها حياه من ورى الشباك ..
سالم كان بشوفها من جوا ال غرفه ..
كأنو بخلو يتعلم درس ..
كأنو ال بعملو كان شى طبيعي ..
سالم كان مرعوب..
كان خايف لدرجه بعيده ..
بس كان مجبور يمثل العكس ..
كان مجبور يستحمل !…
…..
سالم كان بدق غرفه وعد و بتذكر جمله ابوهو
" انت المتحكم هنا "
وعد كانت بتبكي و مسكت البطاقه ال كان فيها رقم عمر ..
كان الخلاص من العذاب واضح ..
كان لازم تخطى خطوه زى دى حتى لو ما عايزه ..
#فاصل
#تحليل_نفسي :
في حالات الاعتداء بين الإخوة، الدافع الأساسي ما بيكون رغبة جنسية خالص .. بل إحساس بالقوة ..
الدكتور Bessel van der Kolk اتكلم في كتابه The Body Keeps the Score
إنو الشخص المليان بعجز داخلي أحياناً يحاول يعوضه بالتحكم في الأضعف منه و طبعا الحلقه الاضعف في البيت وقتها كانت وعد ..
سالم ممكن يكون ..
•. عاش شعور إهانة أو قهر.
• يكون اتعرض لإهمال عاطفي.
• أو نشأ في بيت فيه عنف غير مباشر.
و احنا عارفين اقرب خيار في حاله سالم انو عاش في بيت فيهُ عنف ..
و من هِنا نستنتج حاجه مهمه انو كان بشوف نفس ال حاجات ال شافته حياة و هيا صغيره ..
فـ يبدأ يبحث عن مكان يحس فيه إنه “المسيطر”.
وأقرب ضحية؟
الطفل الأضعف في البيت.
في نقطه مهمه ثانيه :
غياب الحدود الأسرية
الدراسات في مجلات Child Abuse & Neglect بتشير إن البيوت اللي فيها:
• غياب رقابة.
• أسرار كثيرة.
• ضعف تواصل.
• خوف من الأب/الفضيحة.
بتكون أرض خصبة لحدوث الاعتداء بين الإخوة
و في بيت سالم كانت كل الاسباب ل غياب الحدود الأسريه فعلاً حاصله ..
#نصيحه_توعوية :
السكوت ما بيحمي الضحيه ..
السكوت بيحمي المعتدي ..
الطفلة أو البنت البتتعرض لاعتداء غالباً:
• بتحس إنها مذنبة رغم إنها ما غلطت.
• بتخاف ماف زول يصدقها.
• بتخاف تكون السبب في تفكك الأسرة.
• وبتتعلم إن ألمها أقل أهمية من “شكلنا قدام الناس”.
وده أخطر درس ممكن يتزرع في روح إنسان.
لو في رسالة واحدة لازم نوصلها فهي دي:
لو حصل اعتداء ..
الكلام هو بداية النجاة.
ما عيب تتكلمي.
ما خيانة للأسرة.
ما خراب بيت.
الخيانة الحقيقية إننا نختار نسكت.
_احمو البنات ..
_صدقو أصواتهم ..
_واسألو بدل ما تسكتو ..
الطفلة ال ماف زول صدقه
ممكن تكبر وهي شايفة نفسها السبب في جريمة ما ارتكبتها !!
وما في وجع أصعب من وجع بيت كان المفروض يكون أمان…
وبقى ساحة خوف …
….
#في_الوقت_الحالي :
مهند:عمر كان عايز يغطى عليك و ينزل في القضيه عشان يبدى ينتقم .. بس كيف عملتيها .. عمر ما فارق معاهو ديل ما اهلو .. بس كيف قتلتو امكم و ابوكم؟ديل .. ديل اهلكم
وعد:بتتكلم عن الاهل كأنهم شى مقدس .. و دى حقيقه .. بس لمن يقدمو ليك ال حاجات ال بقدموها ال اهل ال حقيقين .. انت عارف احنا شفنا و عشنا ف ياتو حاله .. تتوقع حا نكبر و نكون مبسوطين منهم؟و لا مره .. و لا مره كنا عيله طبيعيه .. امي اصلا كان عندها نفسيات بسبب ابوي و شغلو و خيانتو ليها المستمره كل يوم مع وحده جديده .. كانت بتقفل نفسها ف الغرفه بس .. ممكن تطلع من غرفته و تتونس مع سالم عارف لي؟لانو حاسه بالامتنان اتجاه سالم .. ابوي بكرهه البنات و ما كان عايزنا .. كان بس بحب سالم لانو ولد و لانو ح يقدر يستلم شغلو بعدو .. فكانت بتنبسط معاهو كأنو هو الانتصار الوحيد .. و احنا ؟ و لا شى .. كأننا كرسي ف البيت .. الوقت الوحيد ال بتتكلم معانا فيهُ لمن يجو ضيوف او لمن نمشي ل ضيوف .. عشان لازم نكون عيله طبيعيه قدام الناس .. انا ما عندى مشاعر اتجاهم اصلا .. ما حاسه ب شى و لا حاسه انو وجودهم فارق في حياتي .. هما لو الاهل ما عرفو يكونو اهل .. هل حا تتأثر لمن يختفو من حياتك؟بس عموماً امي ما كنت في مخططاتنا.. م كنا عايزنها تموت .. كنا شايفين انها مظلومه برضو .. بس هيا جات في الوقت ال غلط ..
#فلاش_باك :
وعد:انتو خايفين؟
حياه:احنا حا نعمل كده بالجد؟حا نقتل ابوي؟
نون:كأنو حا يفرق معانا يعني .. عمل شنو كأبو اصلاً ؟
وعد:ركزو معاي .. انا ما بقدر اعمل كده براي عشان كده كلمتكم .. بس لو ما عايزين .. ممكن نوقف ده كلو
نون:انا معاك .. صدقيني حا نخلص الحياه من واحد زى الزفت .. مفروض نأخذ جائزه
حياة:انا كمان .. انا كل ما اشوفو .. بتذكر ..
حياه دموعها نزلت ..
وعد مسكت يد حياة ..
وعد:انا حا اعمل كده عشانك .. ما عشاني انا بس .. حا اخليك تتخلصي من كل العذاب ال عشتى فيهُ بسببو
نون:انتى متأكده من موضوع سالم؟
وعد:ايوا .. هو ما مسافر .. ما عارفه لي بالضبط بس عندو شغل ما كويس شكلو .. راجعت الحجوزات و ما حجز .. غير انى سمعتو بتكلم انو عايز يألف موضوع السفر ده كلو عشان ابوي ما يعرف انو حا يقابل ناس ما عايزو يقابلهم
نون:طيب حلو .. كده كده حا يشكو في سالم اول زول
وعد:المهم اننا ما نتكلم ابداً .. ما حا نعترف ابدا
حياه:تمام
نون:تمام ..
#بعد_العقد :
الساعه 10:00pm
عمر جاب السكينه ل وعد جمبه البيت
عمر:حا تقتلي ب دى و بعدها انا حا اخذها منك لمن تخلصو ..
وعد:لي ده بالذات؟
عمر:ده سلاح الجريمه .. اهم دليل .. فريق الجنائيه لمن يجو حا يفتشو ع سلاح الجريمه لو لقو انو ب سكينه من البيت او عموماً لو وصلو ل اي تحليل يخص انو ال حاجه اتقتل بيها ممكن تكون واحد في الميه من مطبخكم ده شى حا يقلب الشكوك ناحيتكم ..
وعد:حا تودى بعدين السكينه وين؟
عمر:حا ارميها البحر .. الهدوم ال حا تكونو لابسنها ح تدوني ليها برضو .. اقل لبسه ح يكون فيها اثر دم دى مشكله .. حا انتظرك هنا لمن تخلصي حا تجينى طوالي
وعد:تمام ..
وعد رجعت البيت من غير زول يحس بيها قبل تطلع
أنتظرو لمن الساعه 2:00am
نزلو و قعدو ف الصاله ال قدام ال مطبخ ..
ابوهم كان بصحى الساعه 3:00am كل يوم
بطلع يتمشى و برجع مع طلوع الشمس عشان يشتغل ..
نزل و كان لابس هدوم الرياضه ..
وقف في المطبخ و كان بشرب مويه
وقفت قدامو حياه
محمد:انتى صاحيه لي ؟
حياه:ما قدرت انوم
محمد:لسه بتفكري في الحاجات ال ما مفروض تفكرى فيها؟عشان كده كنت عايز ولد .. حسي سالم ده شاف اكتر منك .. حصل ليهو شنو يعني ؟؟ كلام فاضي .. يعني شنو لو قتلو زول قدامك ؟؟ يعني شنو اصلا لو اتفرجتي و انتى ساكته على زول بموت .. هو استاهل يموت يا حياه .. الموت بختار الناس ال ضعيفه .. بختار ال ناس ال غبيه .. انت عارفه انا لي عايش؟لاني بقتل .. لانو دمي بارد و م بخاف .. انتو البنات بس مفروض تسكتو ..
محمد خته يدو على فم حياه كأنو بسكتها ..
محمد:ضعيفين .. مخلوقات ضعيفه غبيه .. ما منكم فايده .. مخلوقات غبيه
أثناء ما بتكلم بأستفزاز و حياه بتعاين ليهُ و بتبكي
وعد كانت وراهو و بحركه سريعه مررت السكينه حولين حلقو من قدام ..
حياه كانت حا تصرخ لانو كل الدم طار في وشها
بس نون جات لحقتها سريع و مسكت خشمها ..
نون:من غير صراخ .. من غير صراخ ..
محمد كان في الارض و بتحرك بطريقه غريبه ..
ما مات طوالي بس كميه الدم ال كانت خرافيه و بتطلع منو خلتهم مخلوعين و بعاينو ليهو ..
وعد ادت السكين ل حياه
وعد:وريهو يعني شنو مخلوقات ضعيفه ..
حياه اخذت السكينه و بدت تطعن في محمد بصوره عشوائيه و بغضب
كانت بتبكي و بتطعنو كل مره
كأنها بتطلع كل الحاجات ال سيئه ال عملها من سنين
رمت السكينه و ختت يدها ف فمو
و بدت تضغط قوي
حياه:انت المفروض تسكت .. انت الضعيف .. ها اتكلم .. قول احنا ضعفاء .. الموت م بختارك.؟؟اتكلم .. اتكلم
في اللحظه دى جات امهم و كانت واقفه مخلوعه
اسمهان:لا .. لا .. ما عملتو كده ..
كانت بترجف و بتعاين ل حياه و وعد ال كان شكلهم مخفى بسبب كميه ال دم ..
قبل اسمهان تستوعب حاجه
نون ضربتها من وره بحاجه تقيله كانت في البيت
اسمهان وقعت في الارض ..
وعد:ماتت؟
نون ختت يدها تشوف النبض
نون:نبضها ضعيف شديد .. حا تموت .. او ماتت .. ما عارفه
حياه:احنا كان ع اساس ح نقتل ده بس .. ديل اتنين !!
وعد:هيا ال جات في وقت غلط ..
وعد وقفت قصادها و بتعاين ليها بقرف
وعد:حتى هيا مذنبه في ال احنا عشناهو .. نون اطعنيها
حياه:لي؟
وعد:عشان ما يشكو في شى .. حا نقتله بنفس طريقه ابوي .. لازم تطعنيها
نون مسكت السكين و يدها كانت بترجف
وعد:هما دفعو ثمن كل الحاجات ال سيئه ال شفناها .. ما تتردى في انك تاخذى حقك منها .. تتذكرى قالت ليك شنو لمن عرفتي انك ما بتها ؟
نون دموعها نزلت
وعد:قالت ليك انك بت حرام .. لولا احساسها بالذنب ما كان عايزه تشيلك .. قالت ليك ابوك كان بسكر .. الله اعلم انتى جايه من ياتو وحده معفنه من الشارع ..
وعد و هيا بتتكلم نون بدت تطعن في اسمهان و تبكي ..
وعد:دي النهايه ال كانو يستاهلوها ..
وعد اخذت هدومها و هدوم اخواتها و اخذت السكينه و ال حاجه ال ضربو بيها اسمهان في راسها و طلعت الساعه
4:15am
قابلت عمر و أدتو كل حاجه ..
عمر:الجزء حقك خلص ..
وعد:انت وعدتني تقتل سالم
عمر:وعدتك احرقو .. و حا احرقو ..
وعد:…
…..
#بلسان_ملك :
عمار مسكني من يدي قوي
عمار:حا تمشي معاي
ملك:وين؟و لي .. انا ما عايزه امشي معاك مكان
عمار:ده ما خيار يا ملك .. انا ما حا اخسر اللعبه زى جعفر
ملك:ما فاهمه ..
عمار:جعفر اتخلى عن امك بسبب حلبي .. انا ما حا اتخلى عنك بسبب مروان
ملك:انا بقرر انا عايزه اكون في صف منو .. ما انت
عمار:انتى ما واعيه .. مروان ال طرف ال غلط .. مروان بلعب ب افكارك و مشاعرك .. كذب عليك .. انتى اصلا عرفك شنو انو جعفر ما عايز يقتلك ؟؟ حتى لو بتو .. انتى نقطه ضعف في حياتو حسي .. مروان ال يد اليمين ل جعفر يا ملك
ملك:و انت في صف حلبي .. ال زول ال قتل امي !!
عمار:حا اخذك عندها .. عشان تعرفي جزء مهم في القصه انتى ما عارفاهو
ملك:شنو؟
عمار:حا اوريك لمن نصل ..
ملك:….
" عمار في يدو أهم ورقه رابحه ..
عمار في يدو حقيقه حا تقلب كل القصه .."
يتبع ..