رواية العروس في الثوب الاسود الفصل الثاني والأربعون 42 بقلم عبير ادريس

   رواية العروس في الثوب الاسود الفصل الثاني والأربعون 42 بقلم عبير ادريس

رسيل تكول

عيوني احطها بيا وجه 

ماشوف انه عيونك

اسمك اكوله بلا وعي للمايعرفونك 

ظلمة وصغتلك جم كمر 

ما اغفى الا وي الصور

وديلي لو بس الظرف 

ماريد حتى شلونك 

______________ 

من سمعت الاغنية گلبي صار يدك بقوة ما اعرف شلون اوصف احساسي شنو معنى الاغنية وليش دزها هسه ؟ 

حب وحدة غيري ويذكرني ويقارني بيها ويريدني اعرف ؟ زين ليش يلمحلي  بالخيانة معقولة يريد يوصل رسالة عباله وافقت على حسام لو يذكرني بزواجي من مروان لو شنو عقلي راح يوكف

لزمت الموبايل وكمت اكتب عيوني تدمع مدري شنو كتبتله حتى ما قريت من حركة گلبي سويت ارسال لكيته حاضرني كمت ادك والطم ليش هيج يسوي بية ليش دمرتني ايهم دمرتني كمت اصرخ بصوت عالي ما حسيت على نفسي ولا حسب حساب اني وين

اجى حسام يركض من الشارع

كعد على ركباته بالكاع يمي 

حسام: شبيج گلبي ؟ ليش هيج رسيل رسيل شبيج ياعمري احجي..

كام يضرب على وجهي  اختنكت انكطع نفسي انعاد علية اليوم اللي رجع بيه من السفر وجايبلي فستان المهر نفس الألم تجدد عندي حسيت مي ينرش على وجهي زدت بالبجي لحدما تعبت صوتي راح گلبي تعب هدأت شوية..

حسام: شنو اللي وصلج لهذا الحال رسيل احجيلي لا تضمين علية اني حسام لو نسيتي احنا مو اصدقاء ؟  احجي اتقبل منج كلشي اعتبريني صديق ولا تخلين ببالج شي ثاني افتحيلي گلبج فدوة رحتلج لا تكبتين بداخلج احجي ترتاحين صدكيني

هنا بديت احجيله قصتي وية ايهم 

يسمعني بهدوء و مرات اشوفه يعصب بس متمالك نفسه ومرات تدمع عيونه

بس هو وعدني يسمعني لهذا سكت لا سأل ولا ناقش بعدها كال..

حسام: شعجب تنازلوا عنكم بسهولة مو ثبروا الدنيا عليج ؟ 

رسيل: جدي مات جان هو الامر الناهي  ومروان هم لحكه عمي علي شخصيته ضعيفة كلش كلمة توديه كلمة تجيبه مروان جان مسيطر عليه لهذا تلكاه بكلمتين من ايهم رجعني لهنا واكيد ياسر أله دور بالضغط على عمي لان راد يتخلص مني بأي طريقة جانت..

بعدها صار عتب بيني وبينه وشلون هيج هان علية وكدرت اتخطاه واحب غيره وهو بعده لحد الان باقي على حبي ، حجيتله شلون وهموني بزواجه ماصدكت الا من خابرت امه واكدتلي هذا الشي ، سكت ما علق بس بقى يواسيني ويطبطب علية بعدها دخلنا جوا وكلمن راح لمكانه نام ، كل واحد بينا جرحه شكل واحتارينا ياهو يضمد جرح الثاني ويوكف النزف مالته 

مر شهرين من بعد كلامنا اني وحسام حسيت نفسيته تعبت خلكه صار ضيق ما يلفي هواي بالبيت واذا بقى يتعارك بس واحد يحجي وياه فهمت اللي سمعه اصعب من ان  يهضمه ويعديه بسهولة..

وبيوم العصر اختنكت كلش رحت جبت دفتر مذكرات مروان كلما اضوج اطلعه واكعد اقلب بيه واقرأ منه شوية ، سبحان الله مروان الوحيد اللي كمت اشكيله شنو سووا بية الاحياء من بعده 

المشكلة بهذا الدفتر اكو اجابات لكل تساؤلاتي عبالك جان يعرف اني احتاج اسأله هيج نوع من الاسئلة فهو مجاوبني بهذا الدفتركعدت على المرجوحة واقرأ ، المضحك المبكي كاتب شلون ضاربني ومجويني والايام اللي 

محاسبني بيها وليش جان يحبني وشلون جان يسهر علمودي 

كاتب يومياته مال سنين بهذا الدفتر اول مرة اعرف بمروان هالكد عاطفي وحساس وجان يحجي همومه واسراره للورق ويفضلها على البشر 

بالمقدمة كاتب جملة هواي عجبتني 

( ثقتي بهذا الورق تفوق ثقتي بالبشر) 

ليجوة كاتب ، اذا بيوم قريتي هذا الدفر اعرفي مروان ما عنده ثقة بأحد لهذا يخلي ثقته بالورق لان الوحيد اللي يكتم سره وشوكت ما يعجبني احركه وانتهى كلشي بس حلك البشر شلون ينسد اذا اختلفنا وياه ؟ وهاي اول شغلة اريدج تتعلميها اذا ما لحكت اعلمج عليها..

سحبت نفس صافنة بزماني فكرة تاخذني وفكرة تجيبني احن واكره  اشتاق واحقد  اتمنى ارجع لهناك اي اريد ارجع اني تعلمت عليهم صارلي سنوات يمهم  شلون ما كادرة اتأقلم وية وضعي هنا شسوي اختنكت ، حسيت واحد كعد بصفي ألتفتت حسام درت وجهي عنه وسديت الدفتر...

حسام : شنو هذا الدفتر اللي بيدج؟

جريت حسرة وبداخلي حسرة اكبر منها لو طلعتها تهد جبال 

رسيل : هذا دفتر مروان 

حسام: شنو مكتوب بيه ؟ 

رسيل: تريد تقراه ؟

اشر براسه اي  واخذه مني ما اعرف ليش ما منعته او ليش خليته يقراها يمكن لان اريده يشيل فكرة الزواج مني ردت يقرا شكد مروان نفسه بية بلكت يبتعد من وحده ويكول ما اريدها

بدا يقرأ ساعه يعكد حاجبه وساعة تدمع عيونه بدا يختنك بعبرة كال ...

حسام: هاي هالكد متحملة ظلم ؟ هيج مسوين بيج ؟ ولج وين مجويج شو شوفيني..

مديت جف ايدي شافها ضرب رجله بقوة وكام يعيط ويغلط على بيت جدي ويسب بيهم وبعدها رجع يكمل سحبته منه ..

رسيل: عوفه لا تكمل تتأذى

حسام: وين لكيتي هذا الدفتر؟ شنو سالفته احجيلي عنه 

رسيل : بيوم اللي حجيت لايهم الحقيقة وتفاجأت جان يعرف من طلعت منه رحت على نور سلفتي زوجة حماي..

حسام : اي 

رسيل:نور تعالي احجيلي منين ايهم يعرف باللي صار وياية والسواه حازم ؟ 

نور: انه حجيتله 

رسيل : شوكت ؟ 

نور : من اول مرة عمي طلب منه يتزوجج ورفض رحتله كلت بلكت من احجيله تنجمعون سوية...

رسيل : اي وشنو صار ؟ 

نور: ايهم عندي حجي اريد احجيه الك 

ايهم : كولي ام علي اسمعج 

وحجيتله الاول والتالي صدمني من كال

ايهم: اعرف ماكو شي جديد

نور: شلون عرفت ومنو حجالك ؟ 

شال دفتر اسود جلد خلاه بيدي من كلبت بيه طلع دفتر مذكرات يحجي بيه عن لسان مروان تركته ما قريت منه شي

ايهم: تفضلي هذا الدفتر بيه جواب لكل تساؤلاتي واذا جان عندي امل برسيل واحد بالمية هذا الدفتر قتله

نور : شنو يعني هسه ؟ 

ايهم : يعني اني ورسيل مستحيل ننجمع بمكان واحد وبينا مروان جاي اشوفه بعيونها ولج شهكاته من يبجي عليها ما تروح من بالي خصوصاً بيوم اللي طرحت ابنها شكد بجه ونحب جان يكولي موبيدي اللي اسويه اني عصبي وهي تخليني افقد السيطرة على نفسي وانجبر أأذيها..

نور: فد انت تحبها وهي هم تحبك انطوا لنفسكم فرصة واللي مات الله يرحمه بعد شنو تسوون ؟ 

ايهم: لو متزوجها حازم  ومطلكها الف مرة اخذها واتزوجها وموبعيدة اقتله واخذها منه فد هذا اخوية نور هذا مروان مو اي اخ ما اكدر اخذ شي جان نفسه بيه ..

نور: بكيفك خوية الله يبرد گلوبكم اللي علية سويته حتى يرتاح ضميري واخلص من التفكير

ايهم: نور انه جاي اموت من اشوفها كبالي وما اكدر ألمسها اعصابي تعبت خصوصاً من اسمع صوتها  وما اكدر اسولفلها اللي بگلبي واللي حاسس بيه

نور : هذا عذاب ياخوية ليش اجيت احجي وياك ردت تتزوجون وتعيشون سوية ويخلص هذا العذاب 

ايهم : اللي لمروان مستحيل بيوم يصير لأيهم حتى لو حياتي جانت متوقفة عليه 

هاي وضعيتي وهاي نفسيتي مو بيدي يانور ..

رسيل: وشجابه الدفتر يم ايهم ، وليش عنده مو عندي ؟ 

نور: اخ خية غير من الضيم المر علينا نسيت انطياج..

رسيل: من شوكت عندج الدفتر ؟ ومن شوكت اخذه ايهم؟

نور: بيوم جنا كاعدين انه وايهم وياسر بغرفتنا اجى مروان دك الباب طلعتله قبل لا يروح للموصل بأسبوع واحد...

نور: ها خوية تعال فوت..

مروان: لا مو مال افوت نورة انه ملتحق هذا الاسبوع وهاي دنيا كلشي يصير بيها هذا المفتاح تنطيه بيد رسيل بحالة اذا صار علية شي لان ما أأمن بغيرج  وهذا المفتاح يضمن كل حقوقها هي وسند من بعدي ممنوع يوكع بيد واكد ثاني غيرها

نور: اسم الله عليك خوية عمرك طويل ان شاءالله ليش متفاول على روحك؟ 

مروان: هاي اعمار بيد الله ما اريدهم ينذلون عكبي وامانة امانة المفتاح يمج يضل 

نور: هذا هو يمي لا تخلي اباك 

وراح من بعد ما طلعت العدة مالتج  جنا انه وياج جوة صعدت اخذ ملابس لعلاوي ، اجاني ايهم يسأل عن مفتاح القاصة..

ايهم: ام علاوي وين مفتاح قاصة مروان ؟ 

نور: هسه اجيبه فد ليش 

ايهم: عندنا اوراق و وصولات ماجاي الكاهن يمي احتمال عنده والحسابات مال العمال تاهت علية 

نور: صار هسه اجيبه

رحت جبته خليته بيده ورا شوية رجع جاب المفتاح وبيده اوراق مبين مال وصولات والدفتر هذا الاسود

رسيل: يعني اشهر ضل يقرا بيه ؟ 

نور: اي 

رسيل: و وينه هسه الدفتر اريده 

راحت جابت المفتاح وخلته بيدي وطلعت من الغرفة...

كعدت وبيدي مفتاح القاصة اباوع عليه صافنة ليش كال لنور تنطيه الي بالذات غير حقوقنا شنو اكو ؟ كمت رحت للغرفة فتحت باب الكنتور طلعت القاصة لازمة المفتاح وايدي ترجف شنو اللي منتظرني بعد ؟ خليت المفتاح بالقاصة درته سمعت طكة انفتحت الباب اباوع متروسة فلوس  وفوكاهن دفتر جلد لونه اسود  مبين دفتر ملاحظات اخذته وكعدت على صفحة ارتاجيب بظهري للحايط وبديت اقرا..

يا اول حب بحياتي رسيل عشقي المجنون اتمنى تقرأين الدفتر للنهاية وانه راضي بالحكم مهما كان...

اي يابنت عمي يا العزيزة اي يا لهيب الگلب هذا الدفتر اذا وكع بإيديج معناها انه مو يمج والله يعينج واعزيج وبلكت اكدر اصبرج من خلاله ...

قلبت الورقة الثانية كاتب

انه حبيتج من اول يوم شفتج بيه تعلق گلبي بيج من جنتي كارهتني وصادتني انه حبيتج انغرمت بالعيون الخضر من وكعت عيوني على عيونج صرت اسير الها ...

ما انكر غلطي من جبتج غصب عنج و بسببي حياتج تغيرت لكن اللي اسبابي اولها حبيتج من يوم دخلت عليكم للمطبخ وشفت عيونج الحلوة اخ ياعيونج بكل سطر اكتب عنها ما اوفي جمالها وعشقي الها رغم ما شفت بيها حنية ولا محبة ولا بيوم ركزتي بعيوني بنظرة حب هواي انتظرت ابحر بيها بمحبة بس النصيب شنسوي بعد...

المهم اتذكر من كلتلج يا الله اريد افوت وانتِ صافنة علية وعاقجه الوجه عرفتج صلفة ومو هينه فد شسويله لگلبي حبج وتعلق بيج من يومها رجعت وانه احجي براس جدي وابوي وعمامي حتى عمي يرد يمنا وتجين هنا كبال عيوني واشبع بيج وجنت ناوي تصيرين الية لو اجتمعت الانس كلها ضدنا محد يكدر يمنعني عنج حتى انتِ ما تكدرين تمنعين مروان عن حبه الج ورغبتة المميتة بيج..

رسيل تتذكرين بيوم اللي حسام اخذكم للبيت وحدكم وقتها انجنيت وطلبت من ايهم يروح وراكم لو بيدي ساعتها الا اقتله خلاص لكن ضميتها بگلبي ما نسيتها أله...

بيوم وفاة عمي تخبلت ردت اخذج بيوم الدفنة تصدكين ؟ فد محد رضى كالوا مو وقتها البنت حزينة يالكوة صبرت نفسي ثلاث اسابيع واجيتج طاير من البصرة لبغداد رغم جنت اشوف الكره بعيونج فد ما كرهتج ولا هذا الشي وقفني عن محبتج و جيتج لهنا..

اخ اخ لو احجيلج من اخذج ايهم يداريج وانه مالي حجاية عليج لان ظلمتج وما سمعتلج واذيتج وصدكتهم وجذبتج ...

ما نكول مالي حجاية عليج وانما ما عندي جرأة و عين اباوع بعيونج انجنيت احتركت حرك كمت انام بغرفتج اشم ريحتج بفراشج يله اكدر انام صرت مثل المخبل ادور ريحتج بين الملابس لحدما اخدر وانام من التفكير والتعب

انه عشكتج حد النفس حد الموت جنت مستعد اموت في سبيل تحبيني بيوم ..

لو احجيلج من داومتي شلون تخبلت خفت احد يحبج لو يشوفج لو تحبين واحد من بيئة دوامج ردت ابطلج بكل وسيلة صح اللي صار ذنب جبير علية من حرمتج دراستج فد مو بيدي گلبي يكولي خلها تدوام لا تحرمها من شي تحبه وعقلي يكولي لا راح تحب غيرك وتعوفك وتفلس من كل شي ..

اه يا رسيل اه شنو احجيلج بعد ؟ هواي ظلمتج واذيتج خصوصاً سالفة حازم من صارت...

بيوم اللي شفتكم بباب المعهد تخبلت ردت اكسرج تكسر من غيرتي عليج مو لان شاك بيج لا ما جنت شاك بكدما جنت غيران عليج غيران احد يحجي وياج ويشوفج لو احد يشوفكم سوية ويحجي بسمعتج..

وبيوم المحادثات اذيتج صح وضربتج وبطلتج من دوامج بس انه جنت أأذي نفسي اكثر من أذيتي الج كولي مخبل كولي عنده شخصيتين كولي ظالم اناني مريض كلهن سمعتهن منج فد ضيفي وياهن عاشك مجنون عشكتج وعشكت كل نسمة بيج جنت كلما اشوفج تتشاقين وية اخواني احقد عليج واريد أأذيج بأي طريقة حتى تحسين بية لان ما جنتي تعامليني مثلهم ودائماً تتجاهليني ، تصدكين جنت اتمنى تحاجيني مثلهم وتعامليني بطيب 

لو اسلوبج عدل وياية من الاول جان صرتلج الاب والاخ والحبيب وانه جنت كلهن فد ماكدرت اوصلهن لكلبج الا من تزوجنا ومتأخر كدرت اسعدت حتى لو وقت قليل المهم حسيت عوضتج عن الاذية والألم الي خليتج تعيشيه...

يمكن خوفي عليج جان مختلف فد هذا انه ما اعرف امثل اللي بگلبي على لساني دائماً المقابل ياخذ عني فكرة تختلف تماماً عن شخصيتي الحقيقية و الناس عليها الضاهر مثلما يكولون..

خليني اضحكج شوية..

بيوم اللي شفت حازم وياج بالغرفة وقرروا يزوجوكم وصار الاتفاق تعرفين شنو سويت خليني اعترفلج رحتله و حذرته كلتله اكسرك تكسر لو رضيت تتزوجها ترفض وتسافر ثاني يوم وتحلم رسيل بيوم تصيرلك مرة لان جنت خايف عليج منه واحد سكير  وابو نسوان خفت يأذيج وبيت عمي يعيشوج بجحيم هذاك الوقت ما اكدر احميج لان ما عندي سلطة عليج ولا عليهم...

ومن جدي كال تاخذها غصب عنك شكد كابرت وبينت روحي عصبي وطلعت من البيت سويت كل هذا حتى لا احد يلاحظ فرحتي لان راح اتزوجج ما جان يهمني برضاتج لو غصب عنج كل اللي يهمني تصيرين زوجتي وحلالي وتنامين بحضني ومحد يكدر ياخذج مني لو يأذيج...

ياربي هواي كلام بگلبي وهواي اكو مواقف جان عاجبني احجيها الج وجه لوجه فد ما اتجرأ ويمكن استحي منج تخيلي بس مروان السرسري يستحي من زوجته...

تعالي احجيلج سر ، تتذكرين من سافرنا بليلة واحد واحد وانه تمنيت وانتِ سألتيني شنو تمنيت؟ كلتلج الامنية مايصير تنحجي تعرفين شنو طلبت بوقتها ؟ طلبت من ربي تحبيني ويزرع محبتي بگلبج  مثلما انه احبج ويحنن گلبج علية...

اخ اخ هواي اكو كلام وهواي حب بداخلي الج فد اكلج شي واحد لا تنسيه ابد... 

السكران هو مروان الحقيقي ومشاعره كلها جانت حقيقية الصاحي مو انه ابد مو انه ...

احبج وديري بالج على ابني وعلى نفسج وحبيني حتى لو بخيالج وانه ماموجود

وغطي شعرج زين 

يا ليل گلبي 

و اوصيك بية لو متت بين الضلوع ادفني ماريد غيرك بالغسل بدموعك تغسلني وبيدك تحل لية الجفن وتحبني وتنيمني مسموح الك ذاك الوكت تعاشر وليف بدالي صدكني مو دايم الك باجر واشد رحالي...

متت من قريته تأذيت لدرجة حسيت گلبي مات خصوصاً من كتبلي هذا الشعر هز مشاعر بداخلي جانت ما موجودة

كمت املخ بروحي واصرخ فقدت..

كمت احجي وياه واحسه يسمعني اكوله ليش ما حجيتلي ليش يمكن جان حبيتك الك و ما فكرت بواحد غيرك ليش ما جنت افسر خوفك حب الية ليش ما عشت هاي المشاعر الحلوة وياك ليش وليش وليش بس شنو الفائدة من تساؤلاتي رحت بعد...

ليش هيج سويت بية اذا تحبني ليش عفتني من وكت ورحت عني ؟ انتهيت وصلت آخر ورقة بيها مكتوب

الى محبوبتي رسيل 

مروان ابو سند 

كاتب اسمه خليت ايدي على حلكي اشهك وابجي نمدت ايد صغيرة وبريئة على وجهي تمسح دموعي ألتفتت سند حبيبي اخذته بحضني حضنته ونبجي اني وياه ....

ألتفت على حسام وسألته..

رسيل : وهسه بعد اللي سمعته ؟ بعدك رايدني؟ بعد عندك نفس بية ؟ 

بعد كل اللي سمعته هذاك اليوم عن ايهم واللي قريتههسه تريد تبقى وياية  

بعدك مصر علية؟ ترضى تعيش وياية وهنا بهذا الدفتر كتلة مشاعر واحاسيس كاتبها رجل الية؟غير هذا مشاعري متشتتة بين رجلين حبي القديم وابو ابني...

جر نفس عميق وكال..

حسام: اللي صارلج وصارلي لا بكيفج ولا بكيفي اثنينا انجبرنا واني ما ألومج كد شعره على اللي صارحقج تحبيه لان دافعلج  و وكف بجانبج وساندج 

واني صرت بعيد عنج والبعيد عن العين بعيد عن الگلب ومن قريت الدفتر لو اني بمكان ايهم هم جان ما قبلت بيج 

حقه وحقه  هو هم انظلم بس اطلب منج تنطيني فرصة رسيل 

رسيل : اي فرصة حسام اي فرصة ؟ 

حسام : فرصة اطيب جرحج واداويج 

خلي نلم جروح بعضنا ونرمم اللي كسره الزمن بينا...

رسيل : ما تكدر ترمم مني شي ولا راح تكدر تنسيني ليش تاخد وحدة عبارة عن جسد بلا روح ؟ 

حسام : اني قابل بكلشي واتحمل كل النتائج

رسيل : حسام تزوج وحدة تحبك وتحبها وعيشوا حياتكم من الاول و...

قاطعني وكال...

حسام : اي نقاش ما اريد بهذا الموضوع بالنسبة الية حاسمه...

عافني ودخل جوا بقيت كاعدة بمكاني اتمرجح ومرت بية الايام شفت بيها اشكال وألوان واليوم يصادف

 ١٢/ ١١/ ٢٠١٩ 

كاعدة على مرجوحة نفس مكاني القديم من جنت صغيرة رجعت لنفس مكاني من بعد ما فرتني الدنيا صعدتني بالدولاب ونزلتني..

اليوم عمري تم ال ٣٢ سنة حيل هواي مو ؟ البعض عنده السنوات مجرد رقم ويحسبها بس اني ما شوفها هيج

لعد شلون اشوفها ؟

٣٢ سنة عذاب كسر مرار غدر فقد ضياع 

ألم حرمان ....

عشت حياتي ما بين حب وحب

مابين لوعة حب ايهم العاشق الولهان وما بين حب مروان الزوج والاب والحبيب، عشت بين نارين وجان لازم اصير بينهم مثل الثلج حتى امنعها تاكل بعضها فنيت عمري اطفي نار وارجع اطفي الثانية...

انطفت النارين وخلفت رماد وسحاب اسوووود بسماء حمرة وليل اظلم 

خلفت عروس بثوبها الاسود

بس اكو من بين هاي الاحداث المؤلمة كلها بصيص امل عاشت هاي العروس علموده حصدت ثمرة من النار 

وهي ابني سند من مروان 

ابني حبيبي نسخة ابوه شكلاً ومضموناً

نفس الاعصاب نفس الشخصية نفس الهدوء نفس الغضب نفس التركيبة نفس الطيبة نفس الملامح نفس عقدة الحاجب صدك لو كالوا الخلف ما مات 

فززني من صفنتي ابني صادق راد يوكع 

عطت حسام وينك ألحك صادق..

ركضنا اني وياه شاله ابوه

اليوم اني ام للمرة الثانية 

تزوجت حسام من بعد محاولات عديدة وضغط منه ومن الاهل قبلت جان عقد بسيط بس بهاي المرة لبست الابيض جان ثوب نوعه شيفون جابته ريناد من السوك وصار عندي صادق سميته على اسم بابا الله يرحمه...

بيوم العقد جنت فوك نايمة راسي يموتني من التفكير وكثر الضغط اللي صار علية اسابيع مرت والحجي براسي اقبلي واقبلي 

خالو من صفحة توسلات حسام من صفحة ثانية وريناد وحتى ثائر اضافة لمشاكل زهرة كلبت البيت عزة علينا تبجي وتدعي علية وبيوم العقد طلعت من البيت راحت زعلانة لبيت اختها ضلت اسبوع بعدها راح خالو رجعها ...

بيوم العقد صعدتلي ريناد ...

ريناد : ها رسيل شو شاده راسج ونايمة تره ما ضل شي للعقد ساعة اربعة الموعد ييجي الشيخ...

رسيل: عوفيني الله يخليج قابل راح اروح صالون هو ثوب والبسه

ريناد: شبيج متشائمة يمعودة كومي ياعيني وغيري حياتج كافي خلصتيها حزن وقهر

رسيل : هو شيلوك للفاتحة غير اللطم يا ريناد

ريناد : اعوذ بالله كومي تعوذي من الشيطان واللي باعج بيعيه صار كم سنة سأل حاول يتواصل وياج اجه دك بابج لا على شنو باقية على ذكراه فدوة لله..

رسيل : لان هو هم متأذي اني اعرفه ايهم هسه حال الضيم حاله بعد اتعس من حالتي هسه يفكر اني خنته للمرة الثانية مو بس هيج مروان ماكاعد يطلع من راسي ولا اكدر انسى نظراته ولا كلامه وتوصياته ويخاف لا تطلع شعره من راسي شلون هسه راح انكشف على رجال غيره صعبة علية يا ريناد صعبة حسوا بية شوية..

ريناد: حجينا وتناقشنا بهاي المواضيع هواي وكلتلج بالنسبة لأيهم صرتي بين ايديه وهو تنازل عنج ومروان راح الله يرحمه وهاي سنة الحياة ولازم تكمليها وانتِ ما مسوية شي غلط ولا عندج اب يسندج ولا ام تدافع عنج كافي رسيل معيشة روحج بالاوهام وغركانة بالماضي..

جريت حسرة وكمت سبحت نشفت شعري ولبست الثوب جان كلش بسيط وعادي تقربت ريناد حطت كحلة بعيوني ورسمت شفايفي بالحمرة ورفضت تضيف شغلات ثانية لان ما ألي نفس...

رسيل : وين سند؟ 

ريناد: راح وية حسام للحلاق 

رسيل : ها زين يسوي شعره طولان هواي

ريناد : فدوة شلون عصبي ويصيح على حمودي وعود هو اصغر منه 

رسيل : اي ابنج جبان وهذا مستقوي عليه

ريناد : الله يحفظهم 

رسيل : امين

ورا شوية نزلت ريناد كعدت ارتب بشعري انفتح الباب دخل سند 

سند : ها ماما حلوة طالعة تخبلين شنو هاي خدودج حمرات...

رسيل : حبيبي حمرات شنو كول احمر  بعدك ما تعرف تجمع صحيح 

لازم خدودي ومستغرب شكلي لان دوم وجهي اصفر وشاحب ولابسة اسود

سند : معلمتنا مال رياضيات موزينة شسوي كلتله لعمو حسام كال انه اقريك 

رسيل : اروح فدوة لليكول انه مثل ابوه 

سند : ماما شوكت نزوره انتِ مو كلتي هاي الايام

رسيل : نروح عمو حسام وعدني ياخذنا بس يحصل اجازة 

سند : الجمعة نروح كوليلة..

رسيل :تدلل هذا هو الجمعة الجمعة..

ورا شوية صاحت ريناد نزلت لكيت حسام واكف لابس قميص وبنطرون ضحكت

حسام : شو تضحكين شنو طالع محلو ؟ 

يحجي ويباوع على ملابسه..

رسيل : لا بس ليش مزين مثل سند ومشترين نفس الملابس؟ 

سند: هو يقلدني كال للحلاق زيني مثل سند 

حسام : اي فعلاً اني احب استايلك انت كشاخ ورجال ليش ما اقلدك  تعال وياي نشوف جدو محمد شوكت يجيب الشيخ 

لزمه من ايده وطلع اجى ببالي مروان  من جان يشتري ملابس يجيب نفسهن لسند مرات اكوله مروان شلون تجيبهن فيت نفس ملابسك وهو طفل صغير  وين تلكه يكولي اروح للخياط اشوفه الموديل وانطيه القياسات ويخيطهن جان طاير بيه يكولي هم يجي يوم واشوفه بالمدرسة ، ابد ما يروح من بالي بكل موقف يصير وية سند اتذكر مروان حسيت عيوني بدت تدمع تعوذت من الشيطان قريتله الفاتحة وكمت رحت يم ريناد حتى انهزم من التفكير بعدها كالوا اجى الشيخ كعدت وعقدنا جنت مجلبة بإيد ريناد ايدي ترجف وهي تهدي بية مر كدامي شريط حياتي كله وخاصة موقف طلاقي من ايهم دمره لگلبي ولا اكدر انساه  يحجي الشيخ واني ابجي على حضي وعلى اللي صار بية..

خلص العقد والشيخ راح دخل حسام طاير من الفرح كعد ولزم ايدي 

جر حسرة وكال

حسام: واخيراً رجع الحق لأصحابه

اخذوج مني بقوة ورجعج الي الاقوة منهم كلهم رسيل فرحان وما انطي فرحتي لاحد  

رسيل : الله يفرح گلبك دووم ويريحك لان تستاهل ...

بعدها سولفنا شوية وكملنا الاحتفال جان بسيط كلش ...

على اساس بس عقد ودخلة بدون عرس لان اني رفضت يسوي اي هوسة شرطي جان عقد بسيط بحفلة بسيطة وبيناتنا ، خلص الاحتفال والمفروض نروح لغرفتنا سوية بس ماكدرت رجعت لغرفتي وبقينا فترة تقريب شهر كلمن بغرفة اني يم سند وهو بغرفته الى ان خالو تدخل وحجه وياية هواي لدرجة فشلني من نفسي واخذني من ايدي ودخلني لغرفة حسام واخذ سند كال انيمه يمي اخذوا راحتكم بمرور الايام ومحاولات هواي من حسام كملت العلاقه بينا صار عندي حمل من اول شهر وطول فترة حملي حسام يداري بية ويجيب ويتسوك ويتوسل حتى بس اكل جنت ما اشتهي لان حملي صعب ضعفت كلش ومن قرب موعد ولادتي اخذني للمستشفى ولدت بالجناح الخاص والحمدلله الله تمملي حملي واجى ابني بخير وسلامة ونور علية دنيتي..

من شفت خوف حسام وقلقه علية مو بيدي اجى مروان ببالي شلون جان يلوب علية وخايف بوقت ولادتي

تذكرت حجايته من يكولي

مروان : لو يصير اشيل الوجع عنج جان شلته 

رسيل :ألحكلي مروان..

مروان : راحلج فدوة كون 

يمعودين ماكو احد ييجي يشوف ليش جاي تتألم 

وهيج تجي الذكريات من خلال المواقف... 

مرة جنا راجعين من السوك اني وريناد خلينا الجهال يم عمة زهرة وصلت لكيت سند عمه جايبه جان يمهم بالبصرة..

سند : ماما حبيبتي

رسيل : حبيبي شوكت اجيت ؟ 

سند : قبل شوية

محمد : قبل لا تجون بربع ساعة جابه عمه ايهم وراح

من كال هيج  گلبي انعصر ودكاته مثل الطبل صارت يعني لو جاية قبل ربع ساعة احتمال اشوفه وما اعرف شنو ردة فعلي وفعله بوقتها همزين ما تلاكينا..

رسيل : شعجب مو ياسر مو هو تكفل بروحته ورجعته..

محمد : يكول مريض وماكدر يسوق  وسند رايد ييجي باقي يبجي عليهم خبصهم اريد ماما وجايبة وجاي

دخلت للغرفة روحي معصورة يعني كل ما انسى لازم اكو شي يذكرني بيه و شلون انسى وابني بيني وبينهم  راح اضل طول العمر هيج بعدها صاحني خالو طلعت..

محمد : يابه تعالي امسحي تسجيل الكامرات مال اليوم 

رسيل : ليش ؟ 

محمد : اخاف ييجي حسام ويشوف ايهم جاي ويتكدر خاطره 

رسيل : ماشي 

طلعت التسجيلات مال اليوم 

طلعلي الفديو مالته باوعت شلون نزل ونزل سند وبعدين نزل جنطته بوسه و حجه وياه ابتسمله وراح جريت حسرة حركتني حرك وهاي المرة الوحيدة اللي شفته بيها بعد الفراك مسحت التسجيل ورحت كملت شغلي استغل وگلبي معبه هموم مشت الايام داريت حسام مثل المي اللي بالصينية جنت وياه وياه ابد ما قصرت ولا هو قصر ويانا...

طلبنه منه ياخذنا للنجف واخذنا زرت بابا وماما ومروان جان يوم ثكيل علية بشكل بجيت هواي وعاتبت مروان شكيتله عن اهله شنو سووا بينا اني وابني وشلون تخلوا عنا وشلون تأذينا وانذلينا من بعده..

وراها رحنا للامام علي عليه السلام  اسمع حسام يتشكر من الامام ..

حسام : سيدي ومولاي شكد اجيتك وبجيت بحضرتك سنين يابو سنين وكاتلك اول ما تصير الي اجيبها وياي واجي تأخرت عليك بسبب ظروف صارتلي واليوم جبتها الف الحمدلله..

نزلت دموعي عليه وعلى نفسي المشكلة وين ما اروح الذكريات تتجدد يعني نفس الاماكن نزورها بس الاشخاص تتغير  مرة اجيت اني ومروان على بابا وتعاهدنا نبدي من جديد وحلف يم قبره ما يأذيني والجية الثانية مروان متوفي وايهم يصبر بية وهاي الجية وية حسام وكاعد يتشكر من الامام لان اخذني شلون دنيا غريبة ...

بطريق الرجعة حجيت هواي وية حسام علمود يشوف جاره لرجليه ويسويلها عملية كال بس تصير عندي فلوس اخذكم واسافر هم اني اتعالج وهم اونسكم ...

مرت الايام تشبه بعضها وروتين عادي جداً سند بيني وبين بيت جده صار صف ثاني ابتدائي مرات اسأل سند اذا ايهم متزوج او لا يكولي ماما هواي عندهم بنات ما اعرف منو زوجة عمو هو صحيح هواي ييجون لبيت عمي بحكم زوجة عمي مقعدة وييجون بناتها وبنات بناتها يدارون بيها ويساعدون نور ويبقى طفل مو فطن حتى يعرف شنو معنى زوجة عمه هو نور لحد عباله عمته اخت ابوه..

نور مرة وحدة خابرتني بس ومن اختها بالبوكة سألت علية وعاتبتها كلتلها ليش اراسلج وما تردين ومرات يطلعلي مرئي يعني شايفة رسائلي حلفت مو هي بس تكول مرات اشوف الموبايل بإيد ايهم طلع هو يفتح الحضر عني يقرأ رسائلي ويرجع يحضرني ، سألتها على حالته الصحية كالت زينة شنو اخباره ما قبلت تحجي شي كالت رسيل انسيه وعيشي حياتج...هاي المكالمة الوحيدة اللي وصلتني بيها اخبارهم بعدها التهيت بحياتي ردت ارجع اقدم  على الدراسة المسائية لان عمري كبير بس للأسف ما كدرت بسبب اطفالي صغار ومحتاجيني  سند مدرسة وصادق صغير شلت الفكرة من راسي وكعدت رغم تشجيع حسام واصراره اكمل..

بيوم اجى سند كسر گلبي من من كال

سند :ماما عندنا اجتماع اولياء الامور ويريدون بابا يروح...

دنكت لمستواه حضنته حتى ما يشوف الدموع بعيوني بعبرة همست ..

رسيل : هسه اكول لعمو حسام يروح باجر ماشي حبيبي

مد ايده مسح دمعتي مبتسم..

سند : بس بابا يدري بية اخذ عشرات مو ؟ 

اختنكت بلعت ريك وهمست

رسيل : اي يعرف ..

تركته ورحت اتصلت على حسام بلغته وكال..

حسام : همزين كلتيلي حتى اخذ اجازة على باجر

رسيل : ولو زحمة عليك عيوني جان رحت اني بس رايدين ابوه..

حجيتها وبجيت..

حسام : هسه ليش البجي اني هم مثل ابوه ان شاءالله ماكو فرق..

رسيل : تسلم

بقينا نحجي شوية وراها سده..

ثاني يوم رحنا اني وحسام للمدرسة نا ردت احسسه ابوه ما موجود بكل مرة احاول اعوضه الحرمان ولو حرمان الاب ما يتعوض بس ابقى احاول ..

حسام فعلاً صار اب لسند ويحبه ويداريه اكثر من ابنه الحقيقي صارلي زوج واب لأبني بمعنى الكلمة 

ريناد صار عندها بنية وآران استقر بالاردن بس يروح ويجي علينا...

خالو حبيبي نفسه هو هو ما تغير النسمة الهادئة الحنين احتواني اني وابني 

عمة زهرة بس مشاكل ومرات تفش تحس ابنها انغبن ومرات انطيها الحق 

حالها حال البعض من العمات يريدون كلشي زين لاولادهم واني من الناس...

 طبعاً مو بس الية مأذيتني حتى ريناد بس احنا مسايريها نجيبلها هدايا بين فترة وفترة دشاديش لو تكرمون شحاطة لو نجمع اني وريناد نجيب قطعة ذهب هم تعبت ويانا قبل نتذكر مواقفها خوما ننسى كلشي ونعاديها ومهما يكون مرأة جبيرة اذا حجت قابل راح نموت هي بطرك اللسان من شافتنا نسكت ومداريها بدت تلين شوية وتتغير ...

مرات تجي ريناد تحجي وياية من تشوفني ضايجة ومهمومة..

ريناد : مو تزوجتي وصار عندج طفل جديد وحياتج استقرت ليش مو سعيدة وضايجة دائماً ياعيني ؟ 

رسيل : صح تزوجت وكونت عائلة بس افتقد للأستقرار النفسي وهذا اهم شي بالحياة اذا فقدناه صعب نكمل يا ريناد

ريناد : وليوين تبقين عايشة بالماضي يارسيل..

رسيل : اني صح دفنت الحبيبين بگلبي ونسيت حبهم حب ايهم وحب مروان بس اكو غصة جبيرة بصدري ما اعرف ليش ما اكدر انساها ولا اتجاوزها

هسه تكولين شلون تحبين لثنين بنفس الوقت هو گلب لو شنو ؟ 

ريناد : فعلاً مرات افكر بيني وبين نفسي بهيج اسئلة بس احترام لخصوصيتك ما اسأل شلون تكدرين هيج او شلون كدرتي؟ 

رسيل : اني اكولج شلون بالنسبة لأيهم الحب اللي اني اختاريته بس للأسف ما حصلته وعانيت ما عانيت لحد ما تناسيته بس ما نسيته دفنته بزاوية من گلبي اما مروان الحب اللي الظروف اختارته الي حبه غريب خوفه حرصه لهفته تخليج تحبيه غصب عنج وهم ما دام للأسف 

ريناد : شنو الفرق بين الحبيبين بالنسبة الج ؟ 

رسيل :ايهم الحبيب لحد العشق اما

مروان حبيب العشرة والتعود و ابو ابني 

هذا الفرق بينهم ..

ريناد : حبهم لو حب حسام ؟ سؤال تافه بس خطرلي اسألج..

رسيل: اكو فرق جبير بس جان لازم ادفنهم وانساهم لان كونت عائلة وية حسام صعب بعد افكر بغيره تعتبر خيانة مو صح؟ 

ريناد : بس عفية شنو هاي الخربطة الله يساعدج..

رسيل : يمكن اكون الملامة مرات على ليش قبلتي بحسام كان المفروض تبقين على ذكراهم ...

ريناد : اجاوبج اني مثلما كلتلج سابقاً رسيل انتِ بدون سند ماعندي اب الي يحميج من الزمن ويوكف بظهرج ومن تكولين بابا ما اريد هذا  راح يكولج تم 

الشي الثاني ماعندج مصدر مالي او وظيفة حتى تكدرين تعينين نفسج وتعيشين منها انتِ وابنج منها 

رسيل : بس مروان عافلي فلوس تعيشني اني وسند سنين ليكدام وبيوت بأسم سند  لكن عمي الله يوفقه ما اكول غير شي اخذ كلشي و ودعه بالبنك على اساس ضمان لسند من يكبر 

ريناد : زين منه من يدز فلوس كل شهر مصرف لسند ...

رسيل : عبالج حسام ابد ما يقبل اصرف منهن لا علية ولا على ابني يكول مادام اني موجود اصرف عليكم ضميهن الفلوس الج ...

ريناد : الصراحة حسام يستاهل ينحب ويستاهل يكون عائلة رجال والنعم منه من مواقفه وياكم انتِ وسند

رسيل : بس للأسف اجى بوقت غلط و اختار الشخص الغلط  اني ميتة من الداخل خالية من كل مشاعر ما راح اكدر اقدمله الحب اللي يستاهله واسعده كله مجرد تمثيل

ريناد :بس هو مبين راضي بيج بكل حالاتج واللي صار وياج مو صوجج ولا بيدج القدر هو اللي رسم حياتج بهذا الشكل وهو انتظرج هواي حاولي تعوضيه..

رسيل : وارجع واكول بكيف الظروف نعيش محد عايش بكيفه بالمختصر ياريناد كلمن رجع لمكانه الصحيح اني من الاول رحت بمكان مو مكاني وعشت ببيئة مو بيئتي وعاشرت ناس مو ناسي....

            الفصل الثالث والاربعون من هنا 

 لقراءه باقي الفصول من هنا