دماءٌ ودَهاء
عقولٌ وذَكاء
فقراءٌ وأغنياء
نارٌ ومَاء
ظلامٌ وضِياء
إذلالٌ وكِبرياء
إنتحالُ الضُعفاءِ
قويةٌ شَمطاء
كاسيةٌ عَرجاء
داهيةٌ بَتراء
عَجوزٌ كهلاء
هكذا هي الأجواء
بعيدةٌ عن الاحتواء
بقلم عبير إدريس
___
تقربت من الزعيم وهمست بإذنه كلام مسموع الية لان جنت قريبة منهم
سيادة : زعيم خلي البنات ياخذون اماكنهم ونحجي بعدين
غمض عيونه بقوة فتحها رفع راسه باوعلها بغضب مكبوت وكال
اينار: سيادة البنات مو للعبادة
سيادة : ليش زعيم خالفت اوامرك اني؟
اينار : كسرتي كلمتي
سيادة : بس مشيت على القواعد، المهم اتركك هسه اخذ راحتك عندك مناقصة وضروري نكسبها
اينار : فعلتج هاي ما راح انساها خليها ببالج
سيادة : نصفيها بعدين مو هسه
حجتها وخلت ايديها على كتفه ومسدته التفتت علية باوعتلي بنظرة حقيرة وكالت
سيادة : ايدج مكانها هنا وعلى وكفتج ما تتحركين
خيلاء : منو كالج اني حارس حتى اوكف وراه
ابتسمت مستهزئة وكالت
سيادة : انتم للسادة عبيد
خيلاء: يتهيألج ما نعبد غير الله والباقي مخلوقاته مصيرها نار جهنم وبئس المصير
سيادة : يلا حبابة اخذي مكانج وخليج طبيعية واتذكري اللي حجيناها بخصوص سديل
جريت نفس وزفرته بدون ما اجاوبها ربتت على كتفي اخذت كف ايدي وثبتتها على كتف الزعيم وراحت حركتها وترتني صرت اعصاب، حس على رجفة ايدي خلى كفه على كفي وربت عليه مال براسه ناحيتي وكال
اينار : اهدأي لأن ما متحمل وجودج ابد
خيلاء : لا اني اللي ميتة على وكفتي يمك
اينار : عنادج وصلج لهنا
خيلاء : اموت ولا اصيرلك بيوم
اينار : الموت اشرفلج بهواي من وكفتج هاي
خيلاء : كل اللي هنا يؤدي الى نتيجة وحدة للأسف يعني كل الخيارات اللي متاحة مباحة بس مليانة قباحة
اينار : عاتبي اللي وصلج لهنا ليش تتذمرين علية؟
خيلاء : وانت منو حتى اتذمر عليك!!
لهناك وبدأ اللعب على الطاولة عدد اللي كاعدين اربعة رجال واربعة بنات كل وحدة ماخذة وضعية تشبه وضعيتي وكلهم من الوادي عدا وحدة جانت كاعدة والفرو الطبيعي يحيط اكتافها مبين عليها الترف، اول ما اشتد اللعب تقربت وحدة من البنات وكفت من الجهة الثانية للزعيم وخلت كفها على كتفه مررت اصابعها على ظهره بطريقة المساج التفت عليها وبيده الورق همسلها
اينار : سكرة مو يومج هذا ابتعدي
دنكت حجت وياه ورجع همس بأذنها رفعت راسها باوعتلي شايطة نار والوجه مصبوغ أحمر بحركة سريعة كرصت ايدي اللي جنت خالتها فوك كتفه سحبتها متأوهة بألم التفت علية عاكد حاجبه مستفهم سبب الصوت ماجاوبته رفعت راسي وباوعت للجهة البعيدة عن الطاولة مر شخص من يم الطاولة لفت انتباه الكاعدين بعدما راح واحد بيهم حجى موجه كلامه للزعيم
سحبان : يعجبني بهذا الولد اهتمامه الساذج بالجرائم والمحرمات احب بيه حب العمل وإتقانه للمهنة
استطرد الصوت بنبرة خشنة قاطعه بذكاء وكال
اينار : اكو شي زاعجك بس ما كاعد اعرفه شنو بالضبط
مجرد شمر كلامه هذاك صار عصبي وكأنما نبهه على شي او ذكره لأن انتفض وكال
سحبان : هتان وسمعان عندهم شغل لهذا اجيت اني وباقي الوكلاء، نعقد الصفقة ونروح وتعرف هي بسيطة ما تحتاج لمتهم الجبيرة
الزعيم وهو يرتب بالورق رفع راسه علية واشرلي اسحب الجكارة من بين شفايفه اخذتها وهمس
اينار : طفيها بالنفاضة ذيج
باوعت يأشر على النفاضة القريبة من اللي اسمه سحبان
اخذتها وطفيتها رجعت بمكاني حسيته عصب باوع للزعيم بغضب وكال
سحبان : لازم غثك كلامي
جاوبه وغلبت على صوته نبرة ارتياح
اينار : ابداً
حجاها والتفت علية اشرلي ادنك دنكت قرب حلكه من اذني وهمس
اينار : الأحمر وترني حاولي تنسحبين بطريقة كلاس وغيري فستانج بفستان اسود يضم مفاتنج واكو شغلات تغطي الشعر حاولي تستخدميها وتعالي بفترة عشرة دقائق لا تغيبين هواي
خيلاء : وليش ارجع سريع وشبيه الفستان اصلاً؟
اينار : راح اخسر من وراج روحي غيريه بعدين نتفاهم
خيلاء : فهمني هسه مو عندكم شوط ثاني وهسه استراحة!!
اينار : هو ﻷن استراحة اريدج تروحين تغيريه من نبدي لعب ما اكدر ادزج
خيلاء : زين ليش غير افهم!!
اينار : مو شغلج تفهمين
خيلاء : شنو شغلي ممكن اعرف؟
باوعلي بنظرة حقيرة وكال
اينار : تنفذين
خيلاء: اعذرني ما اسوي شي اذا ما افهم ليش
سحب نفس قوي ورجع يباوع للطاولة سحب الورق وبدأ يقلب بيهن الى ان استأنفوا اللعب رجعت ايدي على كتفه تلبية لأوامر سيادة اشرتلي من بعيد
كل شوية يتأوه فتح قبضة ايده وسدها اكثر من مرة بقى الوجع ملازمة الى ان خسر الرهان وراحت عليه الصفقة
رفعوا الكؤوس إحتفاء بالنصر بقى الزعيم ثابت بمكانه رغم الاستفزاز المستمر منهم جانت نظراته تتجول بين الكاس والراقصات بالصالة ومتجاهل الضيوف على طاولته حسسهم بخسارتهم الفعلية وبينلهم هو ربحان رغم خسارته، جان الاستفزاز مبين بملامحهم
سحبان : اصابة موفقة زين
اينار : لا يظل ببالك اتخذت اللازم بشأنها
دفع الكرسي وكام اخذ سترته جانت معلقة بظهر الكرسي خلاها فوك كتفه وبقى لازمها بطرف اصبعه وايده الثانية مدها وسحبني مشيت وراه دخلنا ممر مشينا لنهايته جان اكو مصعد ضغط على الزر انفتح الباب ودخلنا باوعتله وهو باوعلي بطرف عيونه بدون كلام انفتح الباب طلعنا وباقي لازم ايدي رغم حاولت افلاتها
وصلنا لغرفة فتح بابها ودخلنا جانت عبارة عن فسحة كبيرة مجهزة بالأرائك والمتكات والسجاد والوسائد المربعة الشكل وعدد كبير من الزجاجات والكؤوس كان كل شي في حالة من الفوضى
همست بصوت خافت
خيلاء: جانت اكو حفلة هنا غير الحفلة اللي بالصالة؟
كال بنبرة كئيبة
اينار : مثلما تفضلتي
يحجي ويشطب بعيونه المكان
طلعنا سد الباب وجرني وراه كرهت طريقته بالتعامل بس ما اكدر اعاند واحجي حتى ما اتأذى
خيلاء: الحفلة خاصة؟
التفت رمقني بنظرة مستهترة رفع حاجبه وكال
اينار : لازم عاجبج تحضريها؟
خيلاء : ما تلفظت بهيج شي
اينار : ليش تسألين؟
خيلاء: من باب الفضول
اينار : فضولج دفنيه حي بداخلج
خيلاء: انت زين لو لا؟
التفتلي عاكد حاجبه بقى مركز بملامحي ثواني ونزلت عيونه لنهاية انفي ورجع باوع لعيوني ومشي
خيلاء : سؤالي صعب؟
اينار : شنو تريدين بالضبط؟
حجاها وهو يمشي
خيلاء: اوكف بمكان حتى اعرف احجي وياك
اينار : ما اكدر اركز بيج وانت لابسة حفلة الشيطان
خيلاء : وشكو تركز بية سألتك انت زين لو تمثل؟
اينار : متحجر الفؤاد الى اقصى حد
خيلاء: ما واضح هالشي بتصرفاتك
اينار : ماشي
خيلاء : شنو ماشي؟
اينار : اللي تشوفيه
خيلاء : انت واحد مُستفز
اينار : وانتِ شرسة بقدرٍ ما وصغيرة بالعمر تصرفاتج مو مال عمرج ابد
خيلاء : وهذا مدح لو ذم؟
اينار : حماقة صبا لا اكثر
خيلاء :مممم
التفت علية باوعلي ورجع باوع ليكدام
خيلاء : خير؟
ماجاوب بس عرفت ال ممم استفزته والتفاته جانت ردة فعل عليها
سحب موبايله واتصل ثواني وردد رمز من عدة ارقام ما حفظتها بس حسيتها شيفرة بينهم
اينار : بأي غرفة؟ اجيت
مشينا ورجعنا نزلنا بنفس المصعد بس طابق غيره
خيلاء : شنو هذا الوادي نظام طوابق؟
اني عبالي كله طابق واحد، شبيك تباوعلي هيج!
انفتح باب المصعد طلع قبلي بقيت واكفة التفت ربع التفاتة ومد ايده سحبني طلعني منه وهو يتأفأف، رحنا للغرفة اللي بلغوه بمكانها اول مافتح الباب باوعت المكان عبارة عن مكتب دائري من خشب وتحيطه كراسي الجدار عبارة عن زجاج مغطى بستائر من التول الابيض اللي عرفته هاي قاعة الاجتماعات المهمة بس تعجبت شلون دخلني لهذا المكان والاستغراب جان واضح على ملامح البقية من البنات والرجال
اللي كاعدين عرفت منهم سيادة والحجي وسطام وجزار وسكرة اما البقية جهلت هويتهم لان ما متعرفه عليهم
سيادة حجت بأستغراب بعدما شمر الجداحة بوسط الميز اللي كاعدين عليه وسحب كرسيين اشرلي اكعد وهو كعد
سيادة : زعيم شلون تدخلها لهنا؟
اينار : منا وبينا صارت
عواد : شلون يعني منك وبيك مافهمت!
حجاها بأستغراب واضح وشديد اللهجة
رجع جاوبه ببرود
اينار : منا وبينا كلنا واولهم انت لأن عليك هواي علامات استفهام
حجى كاز على اسنانه شايط
عواد : اينار لا كدامها امشي نحجي برا
اينار : لالالا الحجي كله كدامها ما اتزحزح منا
سيادة : زعيم شلون تأمن هاي إدارة نادي كامل
اينار : ومن دخلتيها علية بأهم صفقة شنو تفسريها؟
حجاها بصوت عالي مبين عليه العصبية المكبوتة
سيادة : هي اختارت لون الفستان وشعرها
ردت احجي مد ايده سد حلكي بكفه بدون ما يلتفت
اينار : منو حاسبج على الاطلالة!!
سيادة : على شنو تلمح؟
اينار : شلون عرفوا بخيلاء جديدة؟
سيادة : وشلون فسرت هم عرفوا بيها جديدة؟
معقولة تشك بينا نخلي ايدينا بيد العدو ضدك؟
اينار : جانوا ماخذين حذرهم بالشوط الأول، الشوط الثاني احتاج يستخدم الحمام من وصل يمي كعد مترهي وواضح عليه جايه باص مرتب
سيادة : اذا شكيت ليش ما اخذت حذرك؟
عاط بيها خلاها تنخلس
اينار : كم لعبة تيست نلعبها ونكشف اوراق الغش والخداع كلها كدام البنات يلا يتعلمون عليها؟
سيادة : خمس مرات واكثر
ضرب بأيده على الميز بقوة وكال
اينار: شلون تريدين افوز واسيطر على اللعب وعليهم اربعتهم وانتِ جايبتلي وحدة ماعندها اي خلفية عن موضوع اللعب ولا الشغل وفوك كل هذا عنودية وفضولية ما تسوي الشي إلا تستفسر وتعرف شنو ما شنو
خيلاء: اني فضولية؟
التفت باوع بوجهي وكال
اينار : انجبي انتِ
ورجع التفت يكمل كلامه شهكت وحجيت بصوت حتى اسمعه
خيلاء: شكد بيئة
ماجاوبني رجع يكمل نقاش وياها
سيادة : زعيم اللون هزك والسبب هي تجهل الاشياء اللي تأذيك مو عمداً سوتها
اينار: هي مو عمداً سوتها بس انتِ عمداً نزلتيها وكسرتي كلمتي وسويتي شي راح تتحاسبون عليه كلكم
سيادة : زعيم الصفقة هاي كلش مهمة وانت خسرّتنا لان بالك متشتت من يوم اللي دخلوا البنات هنا
اينار : اللي جابهم هو ناوي على خراب الوادي اني اجيت لكيتهم بوجهي
سيادة : المهم خسارة اليوم منو يعوضها؟
اينار : انتِ
سيادة : اني! ليش؟
حجتها وكامت ترجف
اينار: الصفقة اللي راح تجي ولا وحدة من البنات تنزل حتى انتِ واريد اشوف شلون تكسبوها
سيادة : زعيم!!
اينار : لهنا وانتهى الكلام لو اعلنها حرب
حجاها وكام سحبني من كفي وراه مشيت واتعثر بالفستان التفت علية وكال
اينار : لابسة بردة الوادي ذوقيش هذا!
خيلاء : وانتَ صدكت اني اللي اختاريت ألبس هيج واطلع؟
اينار : لا طبعاً
خيلاء : وليش ما دافعتلي وتجاوزت علية تكولي انجبي
التفت علية وبدأ يتقرب واني ارجع بخطوات حذرة ليورا
خيلاء : ها سالمين شكو؟
اينار : منو صخم وجهج وكال اني زوجج واللي بالمكتب اهلي وحجوا عليج لأن ما غاسلة مواعين الريوك وجاية تنكدين علية..
هنا صدك ضحكت بطريقة هستيرية لمحت ابتسامة خفيفة لاحت وجهه من بعد الغضب رفع اصبعه حك انفه
خيلاء : اسفة ضحكت بس ذكرتني بعمتي نفس الشي جانت تسويه وياية
اينار : ليش انتِ متزوجة؟
ارتبكت رجعت شعري ورا اذني تفاديت نظراته وهمست
خيلاء : هااا لا
اينار : لعد شنو عمتج تكولين؟
خيلاء : عمتي اخت ابوية
اينار : هاا هيج
خيلاء : اي
اينار : وينها هسه؟
من المرحومين لو المحرومين
خيلاء : شلون يعني ما فهمت؟
اينار : المهم امشي نزعي الحفلة اللي لابستها اخذي شاور وصلي
ابتسم ورجع يحجي بشكل جدي
_وتعشي ونامي
خيلاء : وليش تضحك من وصيتني على صلاتي؟
وشكراً على الغرفة واللي بيها
اينار : اني مو رجلج لا تنكدين علية وتحاسبيني على الحجاية
خيلاء : وين نكدت؟
فتح باب ودخلني بيها وكف على عتبتها التفتت لداخلها ورجعت باوعتله مأشرة عليها
خيلاء : هاي غرفتي شلون وصلنا هنا!
اينار : من النكد ما ركزتي وبالتالي وصلنا اروح انام تصبحين على خير
مشى وهمست
خيلاء : بعد وكت
التفت وكاتم الضحكة كال
اينار : لا تنتظريني على العشا اتعشى وية جماعتي
حجاها وخلى سترته كلى كتفه ونزل الدرج، تأفأفت هاي شنو كاعد يصير اني شلون احجي وياه اصلاً دخلت غرفتي ما لكيت سديل تذكرت هي نزلت وياية للصالة قررت ابدل حتى انزل اشوفها وين واصعدها يلا انام بهالاثناء اندكت الباب رحت فتحتها ودخلت بدون ما اشوف منو توقعتها هي لهذا حجيت
خيلاء: زين صعدتي توني كلت ابدل وانزل اشوفج
_ زين من لكيتج قبل لا تنزلين
التفتت عليها عكدت حاجبي
خيلاء: هم انتِ شرايدة مني؟
ابتسمت مستهزئة
سكرة : اللي اريده ما اطلبه منج
خيلاء : ممكن اعرف سبب جيتج؟
سكرة :اكو امور اكبر من ان تفتهميها ومهما شرحتها ما تستوعبين لهذا اجيت احذرج واطلع
كتفت ايدي باوعتلها بتحدي وحجيت
خيلاء: واذا ما نفذت تهديدج ولا أعرته اي اهمية
سكرة : ابهذلج واشوفج منو سكرة وشنو تكدر تسوي بيج
خيلاء : انتِ ما تعرفيني شكد امووت بالفضول
سكرة : ها هيج يعني؟
خيلاء : اي نعم
سكرة : منو بظهرج انتِ بمنو مستقوية؟
خيلاء : الزعيم اذا سامعة بيه
ضحكت تبعتها نبرة غضب اجتاحت حنجرتها طلقت كلماتها بصوت متشحرج
سكرة : اللي حطيتي ايدج اليوم عليه وحذرتج توخريها وما وخرتي
خيلاء: مو محبة مني خليتها هو جبرني
سكرة : وانتِ منو حتى يجبرج الزعيم وشنو شايفة نفسج ترى انتِ مجرد نكرة هنا
خيلاء : سكرة الشر يخص ما يعم على الكل وبعدين اني شايفة نفسي جبيرة بعيونه هو مغليني وميزني عنكم يمكن لأن ما رخصت نفسي مثل البعض كبرت بعيونه وهذا الشي نادراً ما يكون هنا
سكرة : وانتِ شلون عرفتي احنا هيج منو حجالج عني!
خيلاء : محد خصج بالكلام حجيت بشكل عام
سكرة : لا ما حجيتي بشكل عام خصيتيني بالحجي
كامت تبجي وتصرخ على صوتها كاموا يدخلون اشكال والوان اول مرة اشوفهم حاولوا يهدأوها محد كدر تبجي وتررد بأسم اينار تريده رفعوا اتصال أله طلب منهم ينطوها الموبايل حتى يحاجيها قربوه من اذنها جانت تشهك وتبجي واني صافنة عليها واردد كلمة سم، تهز راسها بلا وتبجي ماحجت ولا كلمة بس هدأت كأنما كلماته مسكن بالوريد
سحبوها ونزلوا بقيت اني واثنين بنات بس يباوعولي محد تتجرأ تحجي وكأنما محذريهم او قوانينهم هيج ما اعرف بعد
دخلت سديل للغرفة جانت تترنح رحتلها سندتها بظهرها باوعتلي ضحكت
سديل : ولج دايخة شو اشوفج أثنين!
خيلاء : صخام بوجهج كون شلون سكرتي؟
ليش سمحتي لنفسج يشربوج!
سديل : كالولي عصير ولد القنادر شمدريني هيج
خيلاء : امشي كدامي للحمام امشي
سحبتها ودخلتها جوة الدوش فتحت عليها المي وهددتها بنبرة تحذير مأشرة بأصبعي
خيلاء : اغير ملابسي واجيج ديري بالج تكومين
قدمت رجل برا الحمام والثانية بعدها بالداخل سمعتها تكول
سديل : لا تبدلين شادين كاميرات
التفتت عليها عاكدة حاجبي
خيلاء : شنو كلتي؟
حجيتها سديت الباب وتقربت منها كنبصت اريد افهم حجيها المكسر
سديل : شبيج كاميرات شدولنا بالغرفة
خيلاء : شلون عرفتي؟
سديل : غير سمعتهم بأذني
خيلاء : منو سمعتي؟ وشدوهن لو بعد؟
سديل : ما اعرف بس اتوقع بعد المهم من تبدلين انتبهي
خيلاء : وبعد شنو سمعتي؟
سديل : بس هيج
خيلاء : شوية انتبهي على نفسج لا تتصرفين بغباء
سديل : انتِ ليش ما تكولين متزوجة وتخلصين على الاقل يطلعوج منا
خيلاء : وليش هم يفرقون بين المتزوجة والعزباء
سديل : اتوقع اي سمعت من البنات اللي تتزوج او تفوت متزوجة ما يشملها الشغل، الزعيم مالي عليهم هاي الشروط
خيلاء : انت صاحية وتحجين لو بدون وعي تخربطين حتى اعرف شلون اتصرف
سديل : اي مو سكرانة كلش بس دايخة
خيلاء : واعية اكيد؟
سديل : تقريباً واعية بس اني سويت نفسي سكرانة طين حتى اسمع حجيهم ونكدر نسوي شي
خيلاء : اني مو كلتلج لا تتصرفين بكيفج استشاريني بالاول
سديل : مو كلشي ادوخج بيه ما دام اعرف اتصرف واكدر احافظ على نفسي ماكو داعي اشغلج
خيلاء : بيها الخير اسبحي سريع بينما اجي
سديل : تم
تركتها وطلعت اول ما سديت باب الحمام صارت بوجهي بنية رفيعة حلوة وناعمة باوعتلي وكالت
_ الزعيم يريدج بالمكتب
خيلاء : يريدني الية؟
_ اي انتِ مو خيلاء؟
خيلاء : اي اني
_ تمام تفضلي وياية
خيلاء : تمام
طلعنا ونزلنا للطابق الأرضي بالمكتب اللي جان كاعد بيه تيام وسطام دخلت ودخلت وراها جان داير ظهره ويباوع للأطلالة مال شباك
_هذه خيلاء زعيم
سوى حركة بيده اللي بيها الجكارة بمعنى اطلعي وياها كال
زعيم : الباب وراج سفانا
سفانا : صار
طلعت وسدت الباب وراها التفت بالكرسي جان ضايج لدرجة ما باوعلي مجرد لمحة ودنك راسها يلف بالجكارة
اينار : هاي بعدج عايشة دور الحفلة!
خيلاء : وليش انتم انطيتوني مجال انزع بردة الوادي كل شوية مداهمين الغرفة
اينار : انتِ ما تعرفين تسكتين شوية
خيلاء : وليش تصيح؟؟
اينار : تركتج دقايق ونزلت شبسرعة سويتي مشكلة؟
مو وياج ما تحجين بلعتي لسانج؟
خيلاء : شنو هاي التناقضات اللي عندك انت مو كلت ماتعرفين تسكتين شوية واني سكتت
طفى جكارته ووكف كبالي مرر كف ايده على زندي كشيت وابتعدت عنه تقرب اكثر رجعت خطوة تقرب اثنين
خيلاء : شنو تريد انت؟
رفع اصابعه ومررها بخفة على خدي ركز نظراته على شفايفي باوع بعيوني وكال
اينار : لأول مرة اشوف الاحمر حلو هنا
حجاها وأشر على شفايفي بطرف اصبعه ازحت راسي بعيد عنه تحمحمت وهمست
خيلاء : لهذا السبب دزيت علية حتى تكولي كلام فارغ؟
اينار : دزيت..اي اني دزيت عليج
حك لحيته دار ظهره وابتعد وكف ناطيني كفاه وكال
اينار : اني كلت ما عليج بالبنات لو لا؟
خيلاء: هي اللي تهجمت علية بغرفتي وبعدين كامت تبجي دموع تماسيح
اينار : وعفتي الكل تتهمين سكرة؟
ما اتوقع تنزل لهيج مستوى وتتعارك
حجاها التفت علية طلعت ايده من جيوبه وتكتف
خيلاء : قصدك تنزل لمستواية لو شنو بالضبط؟
اينار : اي
خيلاء : ليش هي شنو مستواها وانت شنو مستواك حتى تقارنون نفسكم بية؟
اينار : شنو كلتي؟
خيلاء : اللي سمعته من رخصتك بس قبل لا اطلع حبيت ابلغك اكو كاميرات بغرفتنا زارعيها او اكو هيج مشروع اذا تحب اتحرى عنه لأن مو من رجولتك تسوي هيج شي واذا جان ما عندك علم هاي مصيبة اعظم
تركته وطلعت خليته متبسمر بمكانه صعدت فوك لكيت سديل متمددة اخذت ملابسي ودخلت للحمام تأكدت ماكو اي شكل للكاميرات يلا سبحت بس بنفس الوقت قلقة لأن المفروض ما أأمن بيهم
كملت لبست وطلعت مددت جسمي كله يوجعني مرت يومين بس والوضع هادئ الى ان اجتي وحدة من البنات طلبت منا نرافقها لغرفة الاجتماعات رحنا اول ما دخلنا سيادة احتجت على لبسنا
سيادة : وين فايتات بالتراكات منو كاللكم هاي غرفة نوم؟
خيلاء : ولا كالولنا راح نقابل الوزير لهذا ما اخذنا احتياطاتنا
حجيتها وحسيت واحد بصفي التفتت الزعيم مبتسم باوعلي وكال
اينار : راح تحضر سكرة ويانا اي حديث جانبي يزعجها تتجنبيه ترى هاي عزيزة علية
خيلاء : اذا انت مو عزيز علية تريد أعزّ إعزازك!
تركته ورجعت لغرفتي غيرت ملابسي وانتظرت سديل غيرت ملابسها لبست وكالت
سديل : ليش تجادليهم لا يأذوج
خيلاء : محد يكدر يأذيني امشي نشوف شنو يريدون
طلعت وتبعتني وصلنا للغرفة دكينا الباب ودخلنا جانوا عبارة عن بارود بلحظة يشتعلون نار
خيلاء : غيرنا ملابسنا واجينا تفضلوا؟
عواد : اكعدوا بنات
اخذنا مواقعنا من الجلسة بعدما اشرولنا وين نكعد
عواد : أعلنّاكم بالإجماع من ضمن الكادر المؤسس للوادي
اينار : وشنو المؤهلات؟
عواد : اني اعرف بشغلي
دفع الكرسي وطلع تبعته سكرة وصلوا للباب حاوط خصرها وطلعوا رجعت التفتت عليهم وهمست
خيلاء : شنو يعني ما فهمت؟
عواد : اي شي نسويه انتم راح يكون عندكم علم مبسط بيه واكيد نستشيركم وتكدرون تنطونا آرائكم
احتجت سيادة وكالت
سيادة : اكثر خطوة غلط اخذتها بتاريخ الوادي مع الأسف
تركته وطلعت بس قبلها رمقت سديل بنظرة تنبأ عن كارثة حتمية
ورجعت أنطت الحجي نفس النظرة وطلعت ركعت الباب بكل قوتها، باوع لسديل وكال
عواد : مبروك
دفعت كرسيها وكالت
سديل : يلا خيلاء نعست اريد انام
انسحبنا بهدوء رجعنا لغرفتنا وكعدت استفسر منها ما نطتني اي شي يبرد قلبي ثاني يوم بلغونا اكو صفقة حيل قوية بالوادي راح تتم واللي يرأسها الحجي وسيادة واينار اصرّ بهاي الكعدة محد من البنات تحضرها
صار وقت الكعدة واحنا ماخذين اماكننا بالصالة بس بعيد عن الطاولة اللي تتم بيها المناقصة
حضر شكيب زوج ستيرة وياه مجموعة صكوك ودفتر شيكات ، واجوي الضيوف اخذوا اماكنهم بعدها حضر الحجي كعد ورافقته سيادة لعبوا الشوط الأول جان تعادل وبالشوط الثاني نزل الزعيم بنفسه وتقرب من الطاولة حجى بأذن الحجي كلام خلى سيادة تغادر المكان وهي تشتعل نار
بعدها كعد على طاولة قريبة منهم نزلوله كاس وياه شغلات خاصة بالكعدة جان يشرب وياكل بنفس الوقت يراقبهم عن كثب
خلص الشوط والطرف الآخر هو اللي كسبها احتفلوا سريعاً وطلعوا، الحجي صار عصبي اتصل على تيام اجى وتوجهوا للزعيم يريدون ينقّضون عليه
يباوعلهم ببرود ويحجي
اينار: صبولهم كاس حتى ينسون شوية
تيام : غبي انتَ غبي اينار
اينار : نار ياحبيبي نار
تيام : شلون تخسرّنا هيج مناقصة؟
ااينار : ليش منو لعب؟
اتوقع الحجي
تيام : وانتَ تعرف كلش زين اللعبة يصير بيها غش اذا ما جانت عيون ثالثة ورابعة بالمكان
اينار : وشنو سويت اني فكست عيونهم؟
تيام : سحبت سيادة وهذا يكفي يكون سبب للخسارة
اينار : من يمتى وجاي نعتمد على نسوان الوادي اتوقع الحجي تعب مو مال يفوت بهيج مناقصات
تيام : الخسارة ملايين دماغك مستوعب اللي كاعد نحجيه!
اينار : وداعتك مستوعب وفاهم الوضع كله بس اكو مثل يكول كما تدين تدان واني من النوع اللي ما احب أقضي ديني متأخر
تيام : دكتك الناقصة هاي ما تنسي
اينار :هي كلها نواقيص بقت على دكتي اترخص عندي شغل
ارتشف من الكاس تركه وطلع من باب الصالة انكلب المكان وراه بالعياط بسببب اللي صار
سيادة : انتَ ليش مبقيه يتصرف بكيفه؟
حجت موجهة كلامها للحجي
عواد : كلتلج راح يضمها وبعدين يطلعها ابن اخوية واعرفه
سيادة : بطله اطرده شنو ذنبنا هيج نخسر ماكلين شاربين!
الحجي : حجي لسان واطرده على اساس ما تعرفين بيه مساهم كبير بالوادي
سيادة : نشتري الحصص مالته
تيام : جربت وياه اكثر من مرة رافض اكو شي بباله يريد يسويه وراح نعرفه بعدين، بس شغلة وحدة اريد اعرفها شلون خسرتوا؟ وبالشوط الاول جنتوا فايزين
سيادة :مبينة من كمت اني نزلوا جوكر مزور بالكعدة وإلا شلون يفوزون هيج
جان مركز وياها بشكل بعدها التفت ناحيتنا وكال
تيام : شكو ليش ذني هنا وعادي تحجي كدامهم كلشي!!
سيادة : بكل بساطة الحجي ضمهم لمجموعة الموؤسسين للوادي
تيام: كلش حلو القادم اجمل
سيادة : تخبطاته مميتة
تيام : باقي هنا وتارك كل شغلي واريد اشوف شلون يمشي كلامه على الكل
تركناهم وطلعنا وهم ناس تردم ناس من القهر والخسارة اللي هم بيها
ثاني يوم جنا كاعدين نتريك كلنا بالمكتب دخل الزعيم لابس اسود بأسود وكفوف جلد حتى براسه لابس شي ماعرفت اسمه كأنه قناع او هيج شي
اول ما دخل ارتبكوا لمنظره حجى الحجي مستفهم
عواد : منو ناوي تصفي؟
اينار : مو شغلك شغلي
تركه وطلع بهاي الاثناء تقرب من تيام همس بأذنه، الأخير كام من مكانه وتبع الزعيم، بعدها اجى الحجي يمي وكال
عواد : كومي البسي لبس يليق ترافقين الزعيم بيه
خيلاء : وين اروح يعني؟
عواد : وراه بسيارة ندزج، مهمتج تمنعيه يقتل
خيلاء : شنو يقتل؟ وتريدني اني امنعه! انتَ صدك تححي من كل عقلك؟؟
عواد : سيادة تولي امرها
سيادة : صار حجي اخذ راحتك
صعدت ودخلت غرفتي لكيت ملابس تشبه ملابس الزعيم باللون والهيئة، طلبوا مني البسها لبستها وشديت شعري وكفت كبال المرايا لبست الكاسكيته وسيادة بصفي تملي علية الكلام مثل ناقوس الخطر... هيج تدك براسي
لبست بوت جلد ونطوني كفوف سود من سألت لمحوا حتى ما تبقى آثار لبصماتي، وبقى الشك يتراود بيني وبينهم
اخذني واحد جديد اول مرة اعرفه من طلعنا وكف الحجي بالباب وصاح عليه بصوت خافت..
عواد : باهي وصلها ودير بالك ينتبه عليكم
باهي : صار حجي
عواد : يلا وليدي سبع وانتِ اريدها منج هاي المهمة الاولى وضروري تمنعيه يقتل احد
خيلاء : قتل شنو؟
عواد : مثلما سمعتي
خيلاء : انتم شنو كاعد تطلبون مني؟؟
عواد : روحي يلا
حجاها وسد باب الوادي الخلفية، سحبني اللي اسمه باهي عتيت ايدي منه ونترت بيه
خيلاء : اندل طريقي
رحت وراه وصعدت السيارة المقرر نطلع بيها، تبعناه بعدما صعد ومشى بسيارته بس جان باهي يسوق بحذر ومبين الخوف عليه فات بهواي طرق ملتوية في سبيل الزعيم ما يشوفه او يلمح سيارته
بعدها صف سيارته بمكان مقابيل بناية كلش كبيرة ومعروفة ببغداد خمنت راجعة لواحد من العملاء اللي يترددون للوادي
دقائق ونزل من البناية شخص صعد سيارته ومشى تبعه الزعيم واحنا وراه..
باهي : هذا اللي شفتيه هو المستهدف من يصفون بمكان اريدج تمنعين الزعيم او تعرقلين شغله..
خيلاء : خوش والله حتى يخلي المسدس براسي اني
باهي : ما راح يسويها بس اسمعي كلامي ونفذيه بالحرف الواحد
خيلاء : وبلغ سيادة توفي بوعدها اذا منعته نطلع اني واختي من الوادي..
باهي : هي هيج وعدتج؟
خيلاء : اي
باهي : راح توفي وياج المهم تمنعيه
خيلاء : اللي اكدر عليه اسويه
باهي : يلا نزلوا انتظري شوية وننزل وراهم
خيلاء : وين هذا المكان؟
باهي : صيرفة حاولي تنزلين هاي على وجهج وغطيه من الكاميرات
حجاها مأشر على الكاسكيته اللي براسي ما عرفتلها لان شكلها غريب نزعتها وسحبها هو رجعت لبستها التفتت فتحت المرايا الي كدامي وغطيت وجهي نزلت بعدما طلب مني انزل، مشيت ورا الزعيم دخلنا بفرع جانت حركته سريعة وخفيفة وبدون اي صوت
وكف مسافة تبعد عن المستهدف عشر امتار وجه سلاحه تقربت لزمت ايده وتوسلته
خيلاء : لا تقتل نفس بدون حق، انت كبير بعيوني ومتخيلتك شي جبير لا تسوي هيج
التفت علية باوعلي وعيونه مليانة تساؤلات وغضب همس بحدية..
اينار : اللي جابج ترجعين وياه وحسابكم بعدين
حجاها ومشى سريع يتبع أثر خطوات المستهدف، ركضت وراه صعد عمارة قديمة كلش صعدت اني هم صار هذا الولد كبالنا ركزت بوجهه نفسه اللي كعد على طاولة الزعيم من ضمن الفائزين بالصفقة، رفع راسه باوع للزعيم بعدها رفع ايده وكال..
_ ما مسوي شي اخذ كل اللي عندي حلال عليك..
اينار : سد الجنطة
حجاها موجه عليه السلاح
_ زعيم؟
اينار : اي زعيم يلا سدها وبدون صوت
_ حلال عليك زعيم بس لا تاخذ روحي
اينار : طبعاً حلال علية
خيلاء : اخذ الفلوس وامشي لا تقتله الله يخليك
بدون ما يرفله جفن مجرد الجنطة صارت بيده اطلق عليه رصاصات استقرت براسه وصدره، صرخت مرعوبة ما توقعته يسويها بدم بارد يقتل نفس، تقرب سد حلكي وسحبني شبه رافعني من مكاني مشى سريع وصلنا لمكان سيارته واني ارفس برجلي وابجي منهارة فتح الباب الخلفي شمر الجنطة بعدها فتح الباب الامامي صعدني وراح صعد.
خيلاء : انت شلون تقتل بدم بارد شلون هيج تسوي انت مجرم انت احقر شخص شفته بحياتي، لك شنو من بشر راح اتخبل، هيج بلحظة اخذت روحه وحرمته من اهله وعائلته اويلي ياربي شلون كدرت شلون نطتك نفسك تقتل ولك بزونة نخاف نضربها لا نفوت جهنم..
رفع القناع عن وجهه وضرب الستيرن
اينار : سدي حلكج لا امردج مرد اسكتي كافي كافي
خيلاء : مو كافي شلون تقتل شلون ؟
اينار : منو كالج اني امام جامع منو كالج اني من سلالة الصالحين اني مجرم وهاي شغلتي..
خيلاء : شوف مصيرك شنو راح يكون وتذكرني بوقتها راح تتندم هواي بس بعدين بعدما تخسر كلشي، حسبي الله عليك شنو من قلب شايل صدك متحجر الفؤاد ..
فر الستيرن وغير طريقه بشكل مرعب ساق سريع وصلنا بعد ساعتين من البجي والكلام الجارح اللي وجهته أله
وكفنا كدام بيت فتح الباب ودخلنا بعدها قفله صابني الرعب سمعت أذان المغرب بجيت بقوة سحبني بكل قوته للداخل، دفعني وسد الباب وراه قفله واخذ المفتاح كمت ادفر بالباب..
خيلاء : انت شلون هيج تسوي ليش قتلته ليش؟ ليش ساكت ها ليش؟
حجيتها وتقربت عليه جان يطلع ملابس من الجنطة اللي شايلها تركني وفات للحمام، ربع ساعة وطلع متوجه للصالون رحت وراه لكيته يفرش سجادة صفنت عليه بهتت ماكدرت اسوي اي شي تربطت ايديه ولساني حسيته انشل، وصلت يمه كبر وصلى، سجد وبعدها وكف تقربت بقوة ما اعرف من وين اجتني وعتيت السجادة من جوة رجليه راد يوكع سيطر على نفسه..
خيلاء : تتوضى بدماء الابرياء وتصلي، بدمكم يمشي الرياء، عليمن تضحكون علينا على نفسكم على رب العباد؟
انتم اللي حاكمين البلد ومتآمرين على خرابه، كرهتك بعد اكثر من كرهي المعتاد، ولك لا تنكس سجادة الصلاة، لا تصلي لا تتقرب من طريق رب العالمين شتان بينك وبين هذا الطريق، سكر قتل مخدرات زنا شلون رهمتها!
احجي وانهارت اعصابي كمت الطم واملخ بخدودي الى ان تقرب اخذ كفوفي حصرهم بكفه من معصمي مثل باقة الورد من تنشال وفرني، ظهري صار بصدره حضني بقوة يحاول يهدأني تمتم بكلمات همسها بأذني..
اينار : اش اش اهدأي اش خلص
خيلاء : وخر مني وخر
احجي وادفر بيه وهو يزيد تلاصق بية لدرجة تمادى وصار يشتم بشعري رخت ايده التفتت عليه جان مغمض وعاكد حاجبه فتحها ببطئ بلع ريكه عكد حاجبه مغضب لهناك واندكت الباب بقوة تبعها صوت طلق ناري..