رواية العروس في الثوب الاسود الفصل الرابع 4 بقلم عبير ادريس

   رواية العروس في الثوب الاسود الفصل الرابع 4 بقلم عبير ادريس

طلعت ريناد تمشي سريع طلعنا وراها بابا كام يركض  حتى مادفع الحساب جانت تمشي سريع والشارع العام كبالها 

لحظات فززنا صوت هورن سيارة جان عالي ما اعرف شلون بابا جرها ، جان نمردت حضنها وكام يبجي

من الخرعة اغمى عليها بحضن بابا شالها ودخل بيها للمطعم دخلها للحمامات غسل الها وكعدت،ارتاحت شوية ورجعنا للبيت اول مادخلنا صعدنا فوك ،ريناد مددت بابا أطمن عليها وراح لبيت جدو جاب آران واجى نزلت جوة بعد ما نامت ريناد رحت لغرفة بابا دكيت الباب 

رسيل: بابا ادخل..

صادق: تعاي رسوله ..

طبيت كعدت يمة ..

رسيل : شلون صرت بعدك تعبان من اللي صار؟ 

صادق: والله حيلي انهد لولا لطف رب العاليمن جان صارت كارثة وراحت اختج من ايدي.

رسيل: الحمدلله والله موقف اليوم كل ما اتذكر شلون بينها وبين السياره شعراية اتخبل .

صادق: الحمدلله الله يكفيكم الشر باباتي..

رسيل: بابا لاتتزوج عفية شفت ريناد شلون تأذت احنا مانحتاج احد يساعدنا واذا على عمة زهرة اني كبرت واروح يومية اساعدها .

جر راسي على صدره شبكني وكال..

صادق:  هاهي اني اصلاً جنت رايدها من الله واجتي عدلة برفض ريناد

رسيل : اي عفية بابا مانريد وحدة تشاركنا بيك..

ابتسم بتعب بعدها ضلينا نسولف لحدما غفيت يمة كعدت الصبح لكيته ماكو هو وآران عرفت رايح لبيت جدو .

كمت غسلت ورحت وراهم طبيت واسمع بابا يحجي ويه عمة وخالو بغرفة بيبي كعدت بالهول حتى يحجون براحتهم..

محمد: هذا كلامك الأخير ؟

صادق : اي وما اغيره وما اريد اي واحد يفتح الموضوع وياية او كدام بناتي مرة ثانية .

محمد: ادري ليش غيرت رأيك مو قبلت وكلت هذا هو اروح اشوفها..

صادق: أكلة اطرش يكولي غنيله

أكلة بنتي رادت تموت البارحة وربك نجاها بمعجزة يكولي ليش غيرت رأيك؟

محمد: مال اطرش اي انت اطرش وابصملك بالعشرة بس مال تغنيلي لا واليرحم والديك صوتك صوت معزة تعتعت ..

صادق: خلف الله عليك وبعدين انت وين سامعني أغني.. 

محمد: هههه منو يومية ساعة ٣ بليل يكعد يغني وينوح بالحديقة عبالك ما ادري بيك ؟

صادق: وهاي انت ماعندك شغل وعمل تكعد تتسنط علية ادري خفاش حتى بليل تضل كاعد ؟

محمد: والله مرات اضوج واطلع اكول هسه بدا ينحب واكعد اسمعلك من تكمل اطب جوة ..

صادق: هاي تكعد تضحك علية واني حال الضيم حالي مشكور خوية ...

زهرة: يمعود هو هيج يحجي يومية يكعد على الكرسي وتشوغ روحه يكضيها بجي واني اوكف على صفحة ابجي على بجيكم وتالي من انت تدخل جوة هو يدخل يصلي ويقرأ قرآن للمرحومة وينام وهذا حالنا يومية..

خالو جر نفس وكال

محمد :الحمد لله الله يصبرنا 

صادق: همزين الله كتبلي عمر علمود اعرف عندك احساس ...

محمد: اني گلبي رهيف من زمان بس انت ما ملاحظ .

زهرة: يلا كوموا نتريك حروح اصيح البنات واجي اذا تبقون تتناكرون ما ناكل لليل ..

طلعت عمة زهرة شافتني كاعدة بالهول ابتسمت وكالت 

زهرة : ها يمة صباح الخير شوكت اجيتي؟

رسيل : توني فتت شفت بابا ماكو وريناد نايمة ضجت وحدي ..

زهرة : زين تسوين توني اريد اجيكم اكعدكم حتى تتريكون ويانا بقت ريناد اصيحها اني لو انتِ؟

رسيل : اني حروح اصيحها واجي ...

زهرة: يلا علما اصب الجاي ...

رحت اصيح ريناد اول مافتحت الباب حسام صار بوجهي جان جاي بالبايسكل من المحاضرات ..

حسام : ها وين ؟

رسيل : وين يعني لبيتنا 

حسام: شو وحدج؟

رسيل : منو يجي وياية وهو البيت هياته وخر عفية .

حسام: اخ من عنادج امشي صيحيها واني واكفلج هنا

رسيل : مايحتاج محد راح ياكلني ..

عفته ورحت كعدت ريناد غسلت وبدلت جانت نايمة بهدوم الطلعة من خلصن طلعنا من البيت واشوفه بعده واكف صافن من شافنا عقج وجهه.

حسام :  ادري رحتي تصيحيها لو نمتي يمها ؟

رسيل: والله ماطلبت منك تنتظرني ..

حسام : شلون لسان عليج شو انتِ ما تحترمين الجبير ابد

رسيل : انت ملاحظ احنا بالشارع واكفين؟

حجيتها وطبيت جوة رحت يم عمة حضرنا الريوك وكعدنا بالهول تريكنا كلنا سوى..

مشت الايام عادية ماكو اي شي جديد خلصت السنة الدراسية ونجحت رحت للثالث متوسط وريناد أول متوسط صرنا بنفس المدرسة ،حسام كمل سادس وطلع معدل ٨٥ طلع القبول مالته بكلية القانون جامعة بغداد هو رادها وخلاها اول شي

قبل الدوام بأسبوعين اجوي بيت خالو علاء هو و ولده أحمد الكبير عمرة ٣٠ سنة يصير زوج نبراس بنت خالو محمد و وليد اصغر من احمد عمرة ٢٥سنة وزيد ١٩ سنة بعمر حسام والبنات ولاء عمرها ١٧ سنة وافنان ١٤ سنة نفس العمر اني وياها من اجوي التهينا نطب ونطلع جنا يومية نروح لمكان لمة صارت كلش حلوة صدك تونسنا وبيوم بليل ساعة ٩ ونصف جنت ببيت جدو 

كلنا كاعدين  بالهول مخلصيها  شقة وضحك وناس تلعب طاولي ناس دومنة اباوع على حسام الوحيد اللي خلقته مكلوبة طبعاً قبل ما جان هيج بالعكس  مرح وبس يضحك هسه طول وكته معبس خصوصاً من يشوفني ما أدري شبيه ...

زيد: ماطول غسلتج كومي سويلنا جاي ...

ولاء: ما اسوي والله لو مدري منو يجي ...

زيد : طبج طوب هسه بنت عمتي الوردة تكوم تسوي 

كمزت ريناد: والله معلية قابل اني الخسرت واصلاً ما اعرف اسوي 

زيد: وانتِ منو كلج  سوي اني اقصد رسوله تسويلنا بيديها الحلوات ..

ضحكت وجاوبته

رسيل : هو اعرف تاليها براسي ناس تلعب وتخسر ورسيل تسوي الجاي ..

دزلي بوسة بالهوة..

زيد : من فدوة لعيونج الحلوات..

كمت رحت للمطبخ توني لزمت القوري جان تنمد ايد عصرت جف ايدي حيل ألتفتت واشوف حسام عيونه براسه متخبل...

رسيل : اخ هاي شبيك ايدي حتنكسر وخر ..

حسام: اذا هسه ما وليتي للبيت اكسر سنونج صارلج ساعة تتمضحكين شبسرعة صارت هاي الميانة من شوكت انتِ وزيد هيج تصرفات خفيفة وشقة بيناتكم 

رسيل: شفت شقة انت كاعد تكول شقة يعني عادي وبعدين شبيك تخبلت شنو هذا الحجي هو حاله حالك معتبرته مثل اخويه 

حسام: ها حاله حالي ؟هذا اللي ما صارله اسبوع من أجى صار حاله حالي وبعدين شنو هذا البوس اللي يتطاير بالهوا اني هيج مسوي وياج قبل شلون تسمحين لنفسج هيج تنهانين؟

رسيل : اي نفس الشي ثنينكم ولد خوالي ولا تتدخل بية صار الف مرة كلتلك واذا ضليت هيج خانكني اروح على بابا واكله...

حسام: اني رايحلة هسه واريد اشوف يقبل بهاي تصرفاتج سويتيها بلا ملح ..

رسيل: روح شتسوي سوي اني بابا عنده ثقه بية مو مثلك 

حسام : زين لعد يصير خير

عافني وطلع راح لبابا وركع باب المطبخ بقوة وراه...

صبيت الجاي ورجعت للهول خليت الصينية بالوسط وكلتلهم يلا تعالوا 

كعدنا نشرب جاي وراها جبت حب شمس نكرز ونسولف وكلمن عنده موقف يحجيه ونضحك وصل السرة الي لازم اني هم احجي موقف صار وياية ..

رسيل : يعني مصرين لازم احجي؟

كالو بصوت واحد اي...

رسيل : ممم ماشي

جريت حسرة قوية وبديت احجي 

رسيل : بعد وفاة ماما بثلاث شهور  بداية السنة الدراسية بالضبط جنت متعلمه على ماما هي تكعدني الصبح وتسويلنا ريوك ولفات ناخذها للمدرسة

كعدت ونزلت جوة المطبخ فارغ مابيه امي ، ولا الريوك ولفاتنا ماكو شي على الميز نقهرت وطلعت برا صعدت بالسيارة خالو كال

هاي لفاتكم سوتهن عمتكم اخذناهن ورحنا للدوام جنا نمشي بلا روح ومن خلص الدوام رجعنا للبيت  اول ما دخلت  لحظات نسيت بيها ماما ماموجودة طبيت بلهفة اريد ابوسها واحضنها لان كلش مشتاقتلها اول ماشفت باب المطبخ مفتوح ركضت حسيتها  موجودة والله ريحتها اجت بخشمي طبيت صحت ماما حبيبتي أني رجعت ومن ادخل جوا الكى بابا وعمة زهرة كاعد يطلعون بملابسها حتى ينطوهن للفقير ما اوصفلكم الحسرة والقهر اللي حسيته بهذيج اللحظة  اكو مثل يكول.

لن تفهم ألم شخص ما حتى تجرب نفس الألم بنفسك ..

يعني هسه أني من كاعد احجيلكم يجوز انقهرتوا صح ودمعت عيونكم بس ما تحسون الاحساس اللي حسيته بيومها 

كلهم عيونهم دمعت وحسيتهم انقهروا كمت اريد اروح للبيت لان اختنكت شفت بابا واكف ودموعه عشرة عشرة ينزلن سوى ،جان واكف وما ادري بيه وسامعني ركضت لحضنه وابجي وهو هم 

بيومها بدينا السهرة بسالوفة وضحكة وختمناها ببجية وقهر بعدها كلمن راح لغرفته ونمنا

ثاني يوم على الريوك بابا كال ...

صادق: رسيل اريدج تخففيين شقاج وية زيد والبقية هذا خفيف كلش وتصرفاته ما محسوبة ما اريد اسوي مشكلة من وراه خلي تكضي هاي الكم يوم و يسافرون بدون مشاكل الله يخليج اني اعرف اخلاقج شنو وعندي ثقة بيج بس بزيد ماعندي ثقة هذا تربى بالخارج ما نعرفه شنو ماشنو اللي اريده منكم انتِ واختج تروحون ساعة زمان وترجعون ما أريد تبقون لليل تمام ؟

رسيل: هذا هو بابا اللي تريدة يصير.

ضليت يومين ما أروح لبيت جدو كلش انقهرت من موقف حسام أني ما مسوية شي بس هو ما اعرف شنو حاجيله لبابا وهسه بابا اخذ نظرة عني محلوة بسببه كلش ضجت وقررت ما احجي وياه ابد حتى سلام ما اسلم عليه والمكان الكاعد بيه اكوم منه..

صار العصر وطلعت للطرمة ارش بالزرع منصيه و اغسل بالكراج سمعت واحد يصيح رسيل رفعت راسي واشوف زيد ماد راسه من فوك الباب .

يغني وين الحلو غايب صار يومين ماشايفه؟

رسيل: والله فزيت هاي شصعدك ؟

زيد : ليش يابه ما كاعد تجين مو راح نسافر بعد اسبوع تعالي اليوم مو مت ...

بعده يحجي وانجر من الباب ما اسمع بس العياط شمرت الصوندة من ايدي وطلعت فتحت الباب واشوف حسام وزيد متلازمين واحد يعيط على الثاني....

حسام: شلون هيج تباوع من فوك الباب مثل الحرامي ما تستحي ماكلت العالم شتكول اذا شافوك وبيت بيه بنات طايح الحظ .

زيد: ما مسوي شي غلط ومحد يحجي بعدين اني ابن خالها مو غريب .

حسام: ومنو يدري انت ابن قندرتها..

حجاها و ضربة بوكس على خشمة كام يطلع دم.

على الهوسة طلع خالو علاء ومحمد وبابا فاككوهم ..صاح خالو بنتر..

علاء: لكم هاي شنو شصاير واحد مدمي الثاني مو عيب ماتستحون تتعاركون بالشارع ؟

خالو محمد جر حسام ودخله يدفع بيه للبيت وبابا دخل زيد 

محمد : احجوا شصاير وهيج فضحتونا كدام العالم 

زيد: والله خالو

بعده يحجي وعاط حسام 

حسام: سد حلكك لا اكسرك  ادبسز هم الك عين وتحجي؟

دفعه خالو محمد حيل 

محمد: لك شو انت ما تستحي خاف عبالك كبرت وما اكدر اضربك احترم نفسك وخلي نسمع شنو السالفة بلا غلط وتهديد.

زيد: خالو دكيت الباب على رسيل حتى تجي يمنا لان صار يومين ماكو عبالي مريضة شو هذا بعدني ادك بالجرس جرني وضربني وحتى سبني .

حسام: لك انت شكد جذاب ايا ناقص غيرة لك وين دكيت الباب مو جنت صاعد وتباوع من فوك الباب وتسولف مثل الحرامية واني اجيت من بعيد وشفت شباب يباوعون على بيت عمو صادق وتخبلت والله زين مني ما موتك.

صادق: رسيل تعالي بابا احجي شنو الصار ومنو الحجي مالته صحيح ..

ارتبكت واستحيت الموقف اللي نحطيت بيه ابد محلو اباوع الكل عينه علية ومنتظريني احجي زيد عيونه تتوسل حتى اكول هو صح وحسام نظراته تتوعد اذا كذبت وحرت شنو احجي جان يعيط حسام.

حسام: ما تحجين اخرسيتي لو بس من اني احجي وياج تنطين لسان متر... 

صادق: على كيفك بعدني ما متت وتصيح عليها ما اسمحلك لا تحاسبها ولا تعلي صوتك ،  بناتي خط احمر وهذا الحجي للكل مو بس الك .

بابا صار دم يفور من الاعصاب التفت علية وكال..

صادق :  احجي بابا لا تخافين منو الحجي مالته صحيح..

رسيل: حسام 

من كلت حسام كام خالو علاء وضربه لزيد وترزل من خالو محمد ومن بابا صار وجهه دم  وكالوله منا لحد ماتسافرون ما الك دخل بالبنات واذا شفناك تحجي وية وحدة منهن نطيح حظك ..

من بعد هذا الموقف ما وصلت بيت جدو ابد ، واصلاً بعد يومين ويسافرون اكضيها شلون ما جان تجنباً للمشاكل 

قبل لايسافر خالو بيوم رحت لبيت جدو بطلب من بابا كال عيب باجر يسافرون من الصبح تعالي وياية ونرجع سوى رحنا ، من دخلنا جوا جانوا كلهم كاعدين شافنا خالو علاء وكال تحجون لو اني احجي ؟

صادق: خير ان شاءالله احجي شكو؟

علاء: اكعد اول 

صادق : وهاي كعدت يلا احجي 

علاء : يابة هاي البنية اهلها لحد الان منتظرين خبر من عندكم  واليوم امها شايفة ام حسام بالسوك وتكول نطيت خبر لعمامها ولأبوها واخوانها واني صرت بموقف محلو اذا بيكم جية اهلاً وسهلاُ ما بيكم جية نكول لأبوها صار عندهم ظرف وانلغت السالفة...

صادق: وهاي مامعولين واحد يخطب يجلبون بيه واني مو كلت ينسد الموضوع  ليش فاتحيه يومية ؟ يعني ما اريد اتزوج هي كوة ؟

صار حجي  هواي ونقاش حاد بين خالو محمد وخالو علاء وعمة زهرة ناس ترفع وناس تكبس خلوه لبابا بموقف حيل صعب ضغطوا عليه هواي،  حجة وياهم ويريد يقنعهم بوجهة نظره لحدما تعب عبالك يحجي ويه الهوا آخر شي كال ...

صادق : ريناد ما تقبل واني اهم شي عندي بناتي اذا وافقن اني اوافق .

كالوا اذا هيج عوفها علينا ، كام خالو محمد ورا شوية اجى لازم ريناد بايدة سألها كدامنا

محمد : ريناد خالو تقبلين بابا يتزوج لو لا؟

الكل يباوع ومترقب شنو راح يكون جوابها ..

من بعد سكوت دام لدقائق معدودة سحبت نفس قوي وكالت...

ريناد :اي خالو موافقة 

هز راسه خالو ، باوعلي خالو علاء وسألني ..

علاء: وانتِ بابا رسيل شنو رأيج ؟

باوعت على بابا وانداريت على خالو كلتله بكيفكم ..

علاء: نريد موافقتج مو بعدين صادق يكول جبرتوهن 

رسيل :لا هذا هو موافقة .

حجيتها من لا جارة بعدها صار هدوء ومنتظرين قرار بابا ..

محمد: ها صادق نتوكل هاهي؟

بابا جان منصي راسه رفعه بأتجاه خالو محمد وكال 

صادق: شلون قنعت ريناد شنو كلت الها ؟

محمد: لا قنعتها ولا شي هذيج بنتك واسألها مجرد كلتلها بالموضوع وافقت.... 

صادق: يعني حاوطتوني من كل جهة وخليتوني بالزاويا مو ؟

علاء : ادري اللي يسمعك يكول ذابيك بمصيبة جبيرة وحاوطناك بابا هذا زواج يعني انت ترتاح واحنا نرتاح .

صادق: اني ما ارتاح بس انتم ترتاحون اي ..

محمد: احنا انت ماكو فرق يلا نروح نشوفها ..

صادق: وانت شكو تشوفها هو منو اللي يتزوج اني لو انت ؟ 

محمد: مو ادري بيك ماتباوع زين 

صادق: ها وانت راح تشوفها وتقتنع وتعجبك احتمال اني ماتعجبني شلون بهيج حالة ؟

محمد: شوف اذا يعجبني شي راح يعجبك اكيد لأن اني عيونك الثالثة

صادق: اي بس حولة مع الاسف

بابا يحجي  بأستهزاء وخالو كلبها تحشيش حتى يلطف الجو المتكهرب .

علاء: هسه شكلت شنو قرارك ؟؟

صادق: اروح بس بشرط..

علاء: وهو ؟

صادق: احجي وياها وحدنا

محمد: هاهي خربت لعد ..

صادق: لو احجي وياها لو ما اروح 

محمد: احجي بس بوجود زهرة ..

صادق: كلت وحدنا

محمد: اعرفك تريد تطفش البنية شو شنو تكول الها وتخليها تشرد من الموضوع كله 

كام بابا وكال ..

صادق: هذا العندي من تحددون موعد بلغوني 

التفت لخالو علاء وكال 

صادق : ساعة بيش طيارتكم باجر؟

علاء: ساعة عشرة الصبح ولازم قبل ساعتين أحنا بالمطار

صادق: تمام اجي الصبح ونوصلكم اني ومحمد سيارتين نطلع 

علاء : لا يابه تكسي من راس الشارع وفضت راحت 

صادق: وعليمن هالتكسي وسيارتين طابكة بالباب ..

علاء: براحتكم .

صادق : اني رايح بشغلة ام حسام اجيب شي وياي من ارجع ؟

زهرة: بس كيلوين طماطة وخضرة خلصت 

صادق: من عيني تدللي 

اودعناكم 

رد الكل . الله وياك

ثاني يوم كعدنا الصبح ورحنا لبيت جدو حتى نودع خالو وعائلته 

نبراس: ماما راح أشتاقلج كلش هواي 

زهرة: اني هم والله يا امي ماشبعت منج 

علاء : نجي ان شاءالله ما نطول هواي

أم أحمد: والله لولا شغل ابو أحمد جان بقينا فترة يمكم على الاقل نعينكم شوية

محمد: رحم الله والديج ماتقصرين 

صادق: أم احمد كول وفعل 

علاء: يلا يابة كافي سوالف اودعناكم 

زهرة: الله وياكم توصلون بالسلامة 

علاء : الله يسلمج 

سلمنة عليهم وراحوا..

دخلنا لبيت جدو سوينه عمل شعبي وية عمة زهرة من فوك ليجوة .

كاعدين بالمطبخ نحضر للغدة دخلوا بابا وخالو ..

السلام عليكم .

زهرة: وعليكم السلام ها وصلتوا الجماعة؟

محمد: اي وطاروا يلا رجعنا 

زهرة: يوصلون بالسلامة والله تعودنا عليهم البيت فرغ علينا 

محمد: هناك حياتهم مرتبيها ومستقرين  لازم يرجعون بعد ،حسام وينه ماشفته اليوم؟

زهرة: طلع اول الصبح ..

محمد: وين راح  متقصد مايودعهم اني اعرف بسوالفه شكد عيب من علاء هسه شيكول ..

صادق: مايكول شي لاتخلي ببالك بس اطلع منها هي تصفى .

محمد: ها اطلع منها موو؟ لعد حضر نفسك العصر نروح لبيت البنية ..

صادق: الله كريم ...

حجاها ودار وجهه ضايج 

تغدينا صار العصر راحوا بابا وخالو محمد وعمة زهرة وحسام واحنا بقينا يم بيبي وخالة سهاد باوعت على ريناد شقاها هي وثائر ثكيل يعني مو بس بالكلام لا ضرب واحد يضرب الثاني يملخها من شعرها وهي تعضة ضجت كلش عطت بيها...

رسيل : ريناد شنو هذا الشقى مو عيب والله بس بابا يرجع اكوله اذا ماتجوزين 

ريناد: اني وثائر نتشاقى مو صدك نتضارب مو صح ثأوري 

ثائر : اصلاً ضربتي ماتأذي ..

ريناد: ولا اني 

سهاد: عيب تتصارعين انتِ بنية مو ولد صيري ثكيلة

ريناد: هاهي بطلنه ما نتشاقى بس لا تصيحين...

كلبت خلقتها وطلعت من الغرفة لحكها ثائر .

رسيل : مصيبة ريناد شايلة خشم يابس حسرة علية احجي وياها حجاية ترد بعشرة.

سهاد: من زود الدلال كله صوج ابوج كل ما حجينا حجاية وياجن وصاح بناتي خط احمر ..

رسيل: ليش اني شمسوية 

سهاد: ما مسوية شي بس دا اكلج على ابوج .

سكتت ما حجيت.

ورا شوية طبوا بابا وخالو وعمة ..

فرحانين عدا بابا وجهه يريد يطك محتقن 

سهاد: ها بشروا نطوها ؟ 

صادق: قصدج هدوها ..

محمد: شنو هالحجي لو لان خوش ناس وما يتطلبون هيج تحجي .

صادق: كول ما مصدكين كبل كبع واخذ شعندنا غير اعزز بنتي اسويلها قيمة وقدر مو اشيل وانطي فوكاها متزوج وعنده جهال شون ناس والله ياالله...

زهرة: والله ذهب والبنية درة مال الله فقيرة وعلى ايدك شتريدها تصيرلك 

صادق: نشوف الايام تبين هو مو بس حجي ..

زهرة : الله يريح كلبك ياخوية وينطيك على كد نيتك..

صادق: منيلي  گلب حتى يرتاح گلبي دفنتة وية سوسن..

زهرة: تصدكون مرات احسدها لسوسن ..

محمد: ليش بله ..

زهرة : شوف زوجها شلون وفي الها هاي لو اني ميتة جان على الأربعين تزوجت علية ...

صادق: اسم الله عمرج طويل الله لايكولها...

محمد: شدعوة للأربعين والله هواي انتِ بس توكلي اني ثاني يوم خاطب ...

باوعتله عمة وكامت تبجي..

زهرة: هاي تالي التعب هيج جزاتي روح يامحمد گلبي فلا ينظف عليك بعد ...

كام خالو باس راسها وحضنها ... 

محمد: ليش اني الكى اظفرج واروح اتزوج والله اتشاقه وياج موتي وشوفي شلون انصب مناحة يومية اطلع ابجي عليج وجه الفجر...

صادق: خوش تبسمر هسه ارتاحيت من بجيتها لأم حسام والله صدك حرامات بيك التعب اني لو منها كلاص مي ما أناوشك .

محمد: شوف شوف هاي كدامي وهيج تحرضها عليه وراية شتسوي ...

صادق: لا تخاف اني يايوم جاي وانت ماكو اذا حضرتك لازكلي لزك اكدر احجي .

محمد: اي والنعم مني...

بضحكة بابا كال 

صادق :  والله انت فلا تكبر هذا ثائر عقله اكبر منك ...

محمد: اني شاب واكف عندي العمر هاي هم نعمة ...

صادق: والعقل هم نعمة وانت ماعندك ...

زهرة: صلوا على محمد يمعودين هسه خلينا نحجي بالأهم .

الناس يريدون يكملون كلشي هذا الاسبوع وشرطهم يكون كلشي سكتة لان عمهم ميت صارله كم شهر ...

صادق: همزين خلصت من الهوسة بلكت يبطلون بدربهم..

محمد: هاهي بعد براسك براسك ..

هز راسه بابا ساكت..

ورا  يومين طب بابا العصر وصاح سووا  طريق صعدنا اني وريناد فوك وطبوا عمال شالوا اغراض الاستقبال وصعدوهن بالمخزن .

سألت ريناد با ستغراب

ريناد: هاي ليش بابا فرغ الاستقبال .

رسيل : ما اعرف هسه يطلعون ونسأله ...

راحوا العمال وصاح بابا تعالوا بنات نظفوا الاستقبال بسرعة ..

من نزلنا لكيناه طالع  رحت جبت سطل مي وبيه زاهي ومسحت الكاع ورا نصف ساعة رجع بابا وكال 

صادق : بنات صعدوا فوك 

رجعنا صعدنا وهم طبوا عمال ورا ساعات يلا راحوا ..

نزلنة شفنه بابا يضب براغي مال كنتور جايب غرفة جديدة 

كمت اكل باظافري وسألته ..

رسيل: بابا هاي الغرفة المن؟

جر نفس وكال لشجن ..

رسيل: وليش هنا بالاستقبال وغرفتك ؟

صادق: غرفتي تبقى مثل ماهي وهذا الاستقبال محد يفوت بيه كلت استغله ..

رسيل: مو اصدقائك يجون وتكعدون هنا ؟ حرامات..

صادق: اكعدهم بالهول هسه كل سنة مرة لو يجي واحد لو ما يجي..

رسيل: زين تريد اساعدك بشي ؟

صادق: راح تجي عمتج زهرة وانتِ وياها نظفوا وعلكوا البردات بينما اجيب كم شغلة وصتني عمتج عليهن ..

رسيل: ماشي.

طلع بابا اجتي عمة زهرة حيل فرحانة لان راح يتزوج بابا هي على نياتها من اهل قبل وعبالهة بابا راح يفرح اذا تزوج وتتغير نفسيته لان كاعد يشوفوه شلون يعاني من بعد ماما ...

رتبنا الغرفة جايبها جاهزة من الاسواق المركزية  موديل أيطالي لونها صاجي كلش راقية..

غرفة بابا وماما القديمة لونها ابيض هم جانت حلوة بس هاي احدث وحتى البردات مناك جابوهن 

كملنة كلشي واجى بابا جايب علاليك كومة نطاهن لعمة فتحناهن كلهن ملابس وسيتات نوم ودشاديش واحذية مبين جهاز العروس الجديد كعدنا نسفط بيهن بالكنتور طب بابا شايل علاكة طلع منها فلوس وكلها لعمة هاج هاي فلوس اشتروا ذهب بيهن واذا ما كفت كليلي .

زهرة: يااا غير انت تجي ويانا ؟

صادق: واني شكو جاي انتن نسوان طلعن سوى اشترن ورجعن ...

زهرة: يمة مايصير والله عيب...

صادق: يصير ام حسام يصير انتِ بس سهليها هي تسهل .

اخذت الفلوس منه وسكتت بس ما راضية

قرب موعد زواج بابا واحنا بهاي الفترة داومنا بالمدرسة اني ثالث وريناد اول متوسط وثائر ثاني  وحسام اول كلية .

بيوم الخميس رجعنا من الدوام لبيت جدو فتحنا الباب ودخلنا لكينا بس خالو محمد يم بيبي وخالة سهاد .

من شفتهم ابتسمت 

رسيل : هلو

محمد: هلوو شكبرج تصيرين ما تعرفين تكولين السلام عليكم ؟

رسيل : يلا السلام عليكم وين الباقين ؟

حجيتها وادور بعيوني عليهم...

محمد: اليوم ابوج يتزوج وراحوا للمحكمة يرجعون كبل للبيت راح اجيب غداء من برا وية اللي سوته عمتج لان اهل البنية هنا يتغدون وانتِ رتبي البيت  علما اجي وابقي هنا يم بيبيتج 

اختنكت احس شي نام على صدري شلون راح اتحمل الوضع الجديد ما اعرف ..

رسيل : ماشي بس ابدل ملابسي واجي

محمد : يلا انتظرج 

رحت للبيت بدلت ورجعت لبيت جدو جانت اكو مواعين مال ريوك على السنك غسلتهن ومسحت الكاونترات وكنست البيت ومسحته لان عمة ماملحكة تنظف بس طابخة ورايحة باقي على تنظيف البارحة مسحت الاثاث وطلعت اغسل بالكراج وطبت بنية لابسة عباية مال راس وراها امرأة كبيرة وعمة زهرة وبابا ...

زهرة : يمة رسولة تعالي سلمي وباركي لأبوج 

خليت الصوندة على صفحة وسديت البوري رحت بوست المرأة الكبيرة وبوست البنية 

شجن: هلوو حبيبتي انتِ اكيد رسيلة 

رسيل: رسيل اسمي مو رسيلة ...

شجن: ادلعج حبيبتي

حجتها وبوستني.

كلت بگلبي بدينا

رحت على بابا بوسته  وباركتله

صادق: الله يبارك بيج بنيتي 

حجاها وباسني براسي عيونه تباوعلي بقلق يريد يشوف ردة فعلي شنو ، لهذا اتصرفت طبيعي حتى لايضوج بالتالي هو انجبر مثلنا..

طبوا جوة كعدوا بالهول ورا شوية طب خالو جايب اكل سمج ودجاج وتمن وكباب مشوي وعمة جانت مسوية فاصوليا وتمن.

بدينة نصب بالاكل

صاحت عمة..

زهرة: رسيلة هاج فرشي السفرة بالهول ..

لزمت السفرة بيدي وكلت لعمة ما احب هذا الاسم لا تصيحيني بيه ..

زهرة : يلا امم ما احجي بعد وخلت ايديها على حلكها .

ضاجت عمة  خلي تضوج بعد ماصار ساعة من اجتي  ست شجن كاموا يصيحوني باللقب اللي طلعته الية..

رحت للهول فرشت السفرة طب حسام

حسام: السلام عليكم اليوم عندنا خطار

محمد: اي هاي مرت عمك سلم عليها 

حسام : مبروك شايفين كل الخير..

شجن: الله يبارك بيك 

صادق: الله يبارك بيك حبيبي

والله  هذا طالع حلو بالزي الجامعي وعبالك كبران صح هو من قبل شكله حلو بس هسه حسيته احلى واكبر يمكن لأن صار كم يوم ما شايفته ضليت صافنة عليه انتبه علية رفع حاجبه بمعنى شكو ...

نزلت عيني ورحت للمطبخ خلصت فقرة الغدا ورتبنا كلشي بمكانه ،وشجن اساعد واسوي واصب جاي خبصت روحها تركض كدام عمة تالي عمة حجت وياها ...

زهرة: عيوني انتِ عروس اليوم ارتاحي وباجر عود تعالي اذا تحبين اما هسه اني  اسوي كلشي 

شجن : شعندي قابل اصلاً اتونس بالشغل ..

زهرة : هاج لعد ودي الجاي ..

اخذت الصينية وراحت للهول رحت وراها من باب الفضول اريد اشوف بابا شنو تصرفاته وياها يمكن لو غير واحد متزوج ما انتبه هيج بس لان بابا احسه مالتنا واجتي وحدة غريبة تشاركنا بيه طبيت وكعدت هي وزعت الجاي 

شجن: تفضل ابو حسام عيوني 

محمد: غالية خيتي الله لا يصغرج ان شاءالله 

وزعت للكل وصلت لبابا ..

اخذ الاستكان بدون مايباوع عليها وهي رادت تاكله بنظراتها 

صادق: مشكورة ..

شجن: تتدلل تاج راسي..

حجيت بصوت ناصي شبسرعة صار تاج راسج وانتِ البارحه عرفتيه

حسام: ديري بالج راح يطكج عرج 

انداريت وشفته كاعد بصفي ويضحك هذا شوكت اجى ولا انتبهت هالكد ما مركزة وية شجن ..

رسيل : هاا 

حسام : علاه شبيج راح تطكين ترى ابوج تزوج ما باك 

رسيل: وانت شكو شعليك بيه اطك اموت شلك دخل وثاني شي اني ما احجي وياك

حسام: ديلا عيني هسه اني الميت عليج وعلى حجايتج

درت وجهي ونفخت بضوجة..

ورا شوية عمة كالت

زهرة: لو جايات البنات ليش ما اجوي على الغداء خطية.

ام شجن: والله يستحن يجن 

زهرة : حروح اجيبهن واجي خطية يتغدن هنا شو اكل وخير من الله وهم يغيرون جو 

ام شجن: خاف تعبانة هسه هذا الوليد يجيبهن شسمك يمة ..

حسام: حسام ..

ام شجن: يحفظك لشبابك وينطيك العافية تكدر تجيب البنيات هن هنا بعد كم بيت مو بعيد...

زهرة: كوم حسام اني وياك نروح ...

الكل استغرب من تصرفها شلون حسام شاب ويروح لبنات للبيت وهن وحدهن بيه ومراهقات هاي انحسبت نقطة ضد بيت شجن .

خلص اليوم ورجعنا لبيتنا يابيتنا اللي راح تشاركنا بيه وحدة غريبة صعدنا فوك حتى ننام..

رسيل: رنودة شو هادئة شبيج اليوم لا حجيتي ولا جيتي سلمتي..

ريناد: وهو منو بحالي اذا سلمت واذا اجيت كلمن ملتهي بروحة...

رسيل: كلنا نحبج  ليش هيج تفكرين منو مثل دلالنة شو بابا اي شي نأشر عليه ثاني يوم يمنا اذا مو نفس اليوم ليش هيج صايرة قبل ما جنتي هيج ..

ريناد: ماكو شي لا يضل بالج ..

رسيل: يلا نامي حبيبتي لا تفكرين بأفكار موحلوة تصبحين على خير ..

ريناد : وانتِ من اهله ..

نمنا وما نعرف شنو منتظرنا بالأيام الجاية

ثاني يوم كعدت الصبح ساعة ستة

اول مرة بحياتي اسويها واكعد وحدي ما اعرف يمكن لأن الليل كله ما مرتاحة وما اعرف شلون اتصرف وية وضعنا الجديد وسكوت ريناد حيرني اكثر..

اول ما نزلت طلع بابا من غرفته مبين هو هم ما نايم 

باوعتله ابتسمت ...

رسيل: صباح الخير حبيبي 

حضنته وبسته ..

صادق: صباح العسل اليوم حبيبي كاعد من وكت مو من عوايدج .

دنكت راسي وهمست

رسيل : ماكدرت انام زين 

صفن علية بعدين كال..

صادق: تعالي ياروح ابوج امشي نطلع برا ماطول الجو زين .

تنهدت وهمست..

رسيل : يلا 

طلعنا برا بالحديقة الجو بيه برودة و الشمس مو كلش قوية .

ماعرف شبية عبالك استحي احجي وية بابا وهاي اول مرة هيج يصير انتبه علية عبالك قراني بابا كلش نبه خصوصاً بالاشياء اللي تخصنا..

صادق: رسيل بابا حياتنا تبقى مثل ما هي ما يتغير اي شي ولا تفكرين هواي ،لا عبالج راح اتغير عليكم او يقل حبكم بگلبي لو اهتمامي اني مثل ما اني واي شي يضوجكم اي كلمة تسمعوها ما تعجبكم تعالوا كلولي ما اريد تضمون اي شي عليه ترى ازعل اذا عرفت بعدين ...

رسيل: الله يخليك النا بابا لتشيل هم اعرف ومتأكدة من الحجيته..

صادق: الله يخليكم الية ويحفظكم من كل سوء، حجيتي ويه اختج وضعها ما  عجبني البارحة بس ساكتة ومنعزلة...

رسيل: حجيت والله بابا بس هي كتومة ما تفتح قلبها لاي احد ...

ضحك وكال..

صادق: نسخة امها نفس الاطباع يا سبحان الله اتذكر اول ما تعرفت عليها بالمطار جانت بالكوة تحجي وياية وخشمها يابس وتحجي بعنتكة وما يعجبها العجب .

رسيل: بس انت عجبتها وماما  جانت تموت عليك ...

صادق: بعديش بعد خمس سنوات شلعت گلبي وركضتني وراها يلا قبلت بية..

جر حسرة ممزوجة بألم وكال..

صادق : تاليها راحت مني بسرعة...

كمت كعدت على رجليه وحضنته..

رسيل: صدك بسرعة ماما راحت ما شبعنا منها ولا من حنانها والله يابابا عبالك حلم مرات اصفن اكول شيصير لو ليهسة عايشة ...

صادق: هذا امر الله بنتي كومي خلي ندخل جوا لأن طلعت الشمس وصارت حارة ..

سد الموضوع حتى ما اتأثر بالحجي وابجي مثل كل مرة دخلنا جوة وبدينة نحظر بالريوك...

صادق: كعدي اختج تجي  تتريك ويانا 

رسيل : تمام ..

بطلعتي انفتحت بابا الاستقبال اللي صارت غرفة شجن وطلعت منه معناها بابا نايم بغرفته مو يمها.

                    الفصل الخامس من هنا 

لقراءه باقي الفصول من هنا