رواية العروس في الثوب الاسود الفصل الواحد والاربعون 41 بقلم عبير ادريس

   رواية العروس في الثوب الاسود الفصل الواحد والاربعون 41 بقلم عبير ادريس

رسيل تكول 

ارسم بيك على الحيطان 

واحضن بالهوى العفته 

واصيح فلان

عطرك وين؟؟

صدري النسمة خانكته

وافز مرعوب 

والكى فلان غير فلان 

مو انت

وارد ردود على الحايط ارسمك واحضن الصورة 

واسولفلك سوالف كان ياماكان 

بس شيفيد؟؟؟

شيفيد مثل اليعتني للماي وبيدة الجرة مكسورة

_________

ايهم

خاسرها خاسرها ويدور ربح 

حسباله اكو يعوضونها

كولوله هي نسمة عشك 

شتنفست من دونها ؟ 

سحروك؟

اقنعنا بسحر يقوى على سحر عيونها

___________

حسام يكول 

حاب كبلي وحابني وحاب بكفاي 

ومن تجيني تكولي غيرك ماهويت ؟

شهالصلافة وجايني بيا عين جاي 

المثلك يضم راسه لو باحلامه اجيت

انا ما كاتلني غير گلبي الغشيم 

يدري بيك تكرها بس يشتاكلك 

______________________

اي يارسيل اي هذا طريق بصرة بغداد  رجعتي مثلما اجيتي 

لا لا اوكفي لحظة شنو مثلما اجيتي ؟

لعد شنو؟

اني تغيرت مو نفس ذيج البنية

لعد منو انتِ؟ 

هااا ما ادري 

يمكن اكدر اكول بقايا انسان او بقايا روح اي جسد راجع بلايا روح 

زين ليش مو جانت هاي امنيتج ؟  ترجعين لبيت جدج واستقتلتي عليها ؟ 

ليش هسه ما ترديها ليش؟ 

معقولة لأن اجتي متأخرة !!

اه اه يا امنياتي المتأخرة

تجين بوقت ما اريدج 

ولا منتظرتج واكون ناسيتج وتأقلمت جريت حسرة جبيرة اكبر من الوضع اللي اني بيه ، دكت بينا السيارة سند بهذلني ما متعلم على طريق طويل ، من طلعت سنة ابوه واخذنا للنجف موتني الطريق كله يبجي ياسر وايهم حاروا بيه لهذا ما حسيت هواي بالتعب عكس هسه مجلب بية ومستغرب حسام يريد ياخذه مني ما يقبل يدفعه و يبجي اوف يا سند شنو راح نسوي بية هناك ؟ وانت متعلم على جدك و عمامك و مدلليه شلون راح تتأقلم يا امي اوف اوف انت مثل حظ امك من هسه ماعندك مكان ثتبت بيه وين ما تتعلق وتتأقلم وتعيش تجيك عصفة ريح وتقلعك من مكانك وتاخذك لمكان ثاني الضاهر اني وياك نبتات بس بدون جذور  اقل هوية تقلعنا من مكانه 

محمد: لك ها جدو حبيبي هسه نوصل واوديك للألعاب واشتريلك مصاصة وجبس 

ألتفتلي حسام 

حسام: جيبيه رسيل شوية ارتاحي 

رسيل: متشوفه ما يقبل ..

حسام: اني اقشمره معليج

اخذه مني كعده بحضنه بالبداية بجة بعدين طلعله موبايله شوية ألتهى بيه

رجعت راسي ليورا غمضت عيوني ونمت نومه عميقة من التعب والبجي ، حلمت اي حلمت بيك ايهم بس حتى بالحلم ما يخلونا نتهنا ؟ 

حسام : رسيل رسيل يلا اكعدي وصلنا 

فتحت عيوني صار بوجهي واكف ومبتسم شايل سند

رسيل: هواي نمت ؟ 

حسام: لا بس شخيرج زرف اذني 

حجاها وضحك من باب يلطف الجو ما اعرف بس ما طايقته...

رسيل: تعبانة 

حسام: بية ولا بيج التعب..

باوعتله ونزلت اول ما دخلت للبيت حسيت نفس احساسي من رحت لبيت جدو اهل بابا نفس الشعور الحقير عشته

گلبي صار يگولي كافي عاد يومية اني متأقلم وية حياة وناس جدد وننساهم ونرد نرجعلهم نرجعلهم ياريت ؟ 

ياريت ييجي هسه مروان وياخذني وياه اروح بفرحة وبضحكة اروح بدون ما اقاومه بس هيهات تصير بعد مرتين اخذني غصب منا مرة بعد وفاة بابا الله يرحمه ومرة من انهزمت بس هسه وينك؟ تدري اني وابنك هنا؟ تدري ما عندنا بيت ولا مكان نكعد بيه تدري راح نتبهذل عند الناس تدري يامروان لو ما تدري وينك عفتني بوسط الذياب تنهش بية وماترحمني...

 تلكتني ريناد بوستني شافتني خالة سهاد اخذت من خاطري علمود مروان كامت تبجي واني ابجي  عبالك ردتها حجة حتى اطلع ضيم گلبي

ريناد: هاج حبيبتي اشربي مي هاي شصاير بحالج سودة علية اخ وينه بابا ويشوف حال بنته واللي جرالها ؟ 

سهاد: ما ينلام صادق من بعدكم انتم  وامكم عنهم يعرف طينتهم شنو ربج رحمج ريناد ما صرتي يمهم

ريناد: اي والله خالة اني وين اتحمل جان طكيت ومتت

رسيل: لا تخافين يخلوج تتحملين غصب عنج ويربولج گلب جديد

ريناد: اوف من يوم اللي رحتي منا ماصدكت تعيشين هالكد صليت ودعيت ربي يحنن گلب مروان عليج دمعتي ما نشفت ابد ويومية اتصل عليهم مدة اسبوع اتخبلت لا ليلي ليل لا نهاري نهار نصبتلج عزة هنا وما ادري انتٍ عايشة لو لا محد يرد علية تالي خابرت ايهم للمرة مدري شكد يلا جاوبني وكال مروان بالمستشفى وحالته موزينة ورسيل بالبيت مابيها شي لايضل بالج ولهذا السبب ملتهين وما نكدر نرد عليج عاد شوية ارتاحيت ...

ضحكت..

رسيل: ريناد يومية حاجيتلي المقتل ادري بيج خفتي علية كم مرة خابرتج وحجيتيلي ؟ 

ريناد: تدرين مو صوجج غير محروك دمي عليج لحد هسه

رسيل : يمعودة راحت وعشت احداث غيرها نستني هاي الحادثة اصلاً ..

حسام: ريناد وتالي لوك لوك لوك  عوفيها عود باجر سولفي تريد تنام ترتاح ، ولو هي نامت هواي بالطريق...

حجاها وضحك

رسيل:بس بعدني تعبانة واريد انام

ريناد: تعالي فوك بغرفتي نامي

رسيل: لا هنا افرش اني وسند

حسام: لا ناموا بغرفتي انتِ وابنج واني انام هنا 

رسيل: ما اريد ابهذلك 

حسام: على بختج 

كمت اخذت ابني ودخلت للغرفة حسام جابلي الجنط طلعت ملابس  ورحت غسلت لسند وبدلتله واني بس غسلت تعبانة مابيه حيل اغير ملابسي..

دخلت للغرفة ونمنا على سرير حسام للصبح فزيت على ايده يضرب بخدودي

 حبيبي صار عمره سنتين و٩ اشهر...

رسيل: صباحو حبيبي ، جوعان ؟ اسويلك اكل ؟ 

سند: جدو ألوح 

رسيل: ماكو جدو بش راح

شمر روحه بالكاع وكام يصرخ ويبجي

شلته اسكت بيه ماكو على نفس الصريخ والبجي اندك الباب كمت لبست حجابي وفتحته حسام ..

حسام: صباح الخير 

رسيل: صباح النور شنو ماعندك دوام اليوم ؟ 

حسام : لا اليوم سبت عطلة عندي  جيبيه اشتريله بلكت يسكت 

رسيل: اوف هذا كلشي مو بعيونه الا جده ياخذه لو عمامه

حسام: ما عليج بيه احنا شباب واحد يفهم على الثاني هسه نتفاهم ونحلها..

اخذه مني وطلع  كمت طلعت للهول استغربت زهرة ماكو بلة باليل نايمة هسه وينها وجان اسمع صوتها، صدك ابن الحلال بذكره مبينة كاعد تتعارك وية خالو بغرفتم وكفت اسمع...

محمد: يامرة يتيمة وين اوديها ؟  لج هاي بنت اختي مو غريبة..

زهرة: ترجع منين ما اجتي والله ياالله يخلفون ويذبون بزورهم على العالم اني ما مستعدة أربي ابن رسيل فوك ما انكسر ظهري عليها وعلى اخوانها وشبابي راح تالي اكعد اربي ابنها وابن منو ابن مروان اللي ابني تسكط بسببه 

محمد: الرجال ماات والله يرحمه واذكري محاسن موتاج 

زهرة: كلتلك اذا جبتها لو اني لو هي بالبيت ماعندي غير كلام

محمد: بس افهميني شنو اللي ضارج بوجودها على لكمتها ولكمت ابنها لو على الكاشيتين اللي راح تكعد عليها

ترة لا راح تاكل بيتج ولا راح تاكلج لا تشدين وياها 

زهرة: وحسام نسيته؟ 

محمد: شبيه حسام ؟ 

زهرة: توها بدت حياته تترتب الله هداه وقبل يخطب  تالي تجي رسيل تخرب الاول والتالي 

محمد: ورسيل شعليها  بخطوبة حسام ؟ 

زهرة: شلون شعليها اذا ما فركش اني مو زهرة

محمد: واذا رادها شنو يعني الگلب وما يهوى اذا هو هاويها لرسيل شكو منها ؟ 

زهرة: انت تخبلت اكيد تخبلت ليش ابني اعور اعوج حتى ازوجه وحدة ارملة وهم مطلقة

محمد: اذكري الله واستغفري  مو عندج بنية وشبيها المطلقة لو الارملة ؟  مو بشر مو حالها من حالج كافي عاد دمرتيني صار اسبوع تزنين علية من يوم الي خابروني لهذا اليوم...

زهرة: وما راح نرتاح اذا ضلت رسيل هنا.. 

كمت اشهك وابجي انصدمت بحجيها صحيح اني ما اناسب حسام  بس

ما كلت اريده ولا اني بأرادتي رجعت الهم دخل حسام شافني ابجي نزل سند من ايده واجاني مرعوب..

حسام: ليش باجية منو وياج ؟ 

رسيل: ماكو شي 

بعدنا نحجي ارتفع صوت خالو وية زهرة 

فاتلهم حسام بدون ما يدك الباب ...

حسام: اذا بعدج مصرة على رأيج وتريدين رسيل تروح ماشي هسه تروح بس حسبي حسابج اني رايح وياها وبعمرج ما تشوفين وجهي مرة ثانية..

زهرة: ها محمد ها شنو كلتلك ما كلت يريدها بعده يامصيبتج يازهرة 

عافهم حسام واجاني

حسام: ما عليج بحجيها امي هوسه يومين وتمل

رسيل: شبيدي اني لو عندي مكان ما ابقى هنا دقيقة وحدة..

نزلت ريناد

ريناد : صباح الخير هاي شبيج ليش باجية من الصبح ؟ 

حسام: عمتج استلمتها البارحة جانت نايمة..

ريناد: اوف اوف خلصت گلبنا امك شوكت تفك ياخة عاد...

حسام: بنات عوفوا الحجي و امشوا نتريك صار هواي ما ملتمين سوية

رسيل: اكلوا انتم بالعافية وين اكو نفس تاكل بعد ...

كمت مشيت صاح وين 

رسيل : ارجع انام راسي يموتني

حسام: نامي وسند عوفيه يمي 

رسيل: لا يلعب بالغرفة عاشت ايدك من سكته..

حسام: خطية وين حاصرته ؟ما عليج اني ألهيه والعبه مادام عطلة اليوم استغليني..

ابتسمت ودخلت انام بس جذب يانوم اللي يزور عيوني بعد اللي سمعته

كمت افتر بالغرفة كعدت على الميز لفت نظري الصورة شلتها باوعت صورتي اني وياه بحفلة تخرجه يابه الضحكة البريئة  هنا جانت طالعة من كل گلبي  وهو ضحكته ونظراته الية مليانة حب،  حسام  انظلم مدري اني انظلمت 

جريت حسرة ورجعتها بمكانها وكمت مددتت ، مرت يومين اني معتكفة بغرفتي حتى لا اشوف زهرة ولا هي تشوفني وتسمعني حجي سند يمي ومن يرجع حسام ياخذه بعد ما اشوفه ابد   يرجع محمل اشكال وألوان عبالك ابنه شايله على  گلبه ويلعب بيه اني كلت راح يأذي ابني لان يشوف مروان بيه  بس طلعت غلطانة وقررت ما اظن بأي بشر ظن سوء الا اتأكد منه، بعد هاي اليومين كعدت الصبح كلت اساعد ريناد خطية وحدها..

رسيل: صباح الخير

ريناد: صباح الورد رسوله ما مصدكة  انتِ يمي رجعتي..

عافت الطاوة واجتي حضنتني 

ريناد : شوكت تحجيلي ترة كاعد ألوب شنو سالفة ايهم ؟ 

رسيل: اذا تحبيني لا تذكريهم كدامي اني بالكوة اريد انساهم..

ريناد: هيج مأذيج ؟ 

رسيل: فوك ما تتصورين 

ريناد: يلا صفحة وطويتيها من حياتج انسيهم ولا تفكرين بعد وابدي حياتج من اليوم تكدرين مو ؟ 

اشرت الها براسي بمعنى اي بس الحجي شكد سهل  لو على الحجي نحجي جرايد  جريت حسرة وكمت سويت البيض اللي يحبه سند كعدته بديت اوكل بيه 

ريناد: اكلي انتِ اول 

رسيل: متعلمة اوكله يلا اني اكل

ريناد: اني اوكله وية حمودي اكلي انتِ..

رسيل: وليش حمودي صغير وتوكليه ؟  ما ياكل هو ترة جبير

ريناد: وداعتج اخلي الاكل كدامه يصفن  ساعة ساعتين تالي اكعد اوكله واكوم

رسيل: وين نرتاح اذا ما نتأكد شبعوا يلا 

ريناد: اي والله 

رسيل: وين زهرة لعد ؟ 

ريناد: راحت لبيت اهل خطيبة حسام  تريد تستعجلهم بالمهر 

رسيل : ليش هو ما عاقد لحد الان ؟ 

ريناد: لا بس قراءة فاتحة لان عندهم حالة وفاة عمها متوفي يمكن و كالوا شهرين تطلع السنة ويسوون المهر 

رسيل: بعد شكو اصلاً حسام هواي صبر ضلت على الشهرين

ريناد: تخاف لا يرجع ياخذج..

رسيل: يمعودة شكاعد تحجين اني وحسام وين اصلاً ما مفكرة بيه ولا راح افكر 

ريناد : ليش ؟ 

رسيل: حسام حب مراهقة وراح

ريناد: بالنسبة الج حب مراهقة بس هو لا حبه حقيقي ومن كل گلبه لو تدرين شكد خطبناله بنات ونتوسل حتى بس يروح يشوفهن ما يقبل ومرات عمة تكوللهم لاهل البنية ينطوها صورة حتى يشوفها 

يباوع جفيان شر وجوابه نفسه ما اريد

اخ لو تدرين من اخذوج منا شنو صار بيه كام يبجي مثل النسوان يلوب ومن اخابر على مروان عباله صار بيج شي لو كتلوج خطية هالحسام تأذه هواي..

رسيل: لا بيدي ولا بيده الصار لو اني متزوجته من الاول جان ابني بطولي ومرتاحة وماعندي منغصات بحياتي بس بعد كلمن ياخذ قسمته من الدنيا

ريناد : اي صدك كلمن وقسمته..

خلصت سالفته على هيج ، ومشت الايام زهرة شدت وياية فد شدة حتى سند

حاربتني بيه حجيها سم لازم تزوهرني تضوج تشوفني كاعدة لو اضحك وية ريناد لو وية الولد مرات ننجمع و نسولف باليل تكوم ترجف لو تذكرني بمروان لو بوضعي عبالك جنت ناقصتها مرة جنا نايمين الظهر اني وسند هو كعد قبلي وطلع من الغرفة ما ادري بيه كعدت على صوت صريخه طلعت اركض مفزوعة  بدون حجاب والكاها جارة اذنه وتعيط عليه مدري شنو كاسر من التحفيات

تخبلت رحت شلته وعطت بيها ما تحملت ..

رسيل : ادري هو طفل مو حرام عليج هيج تكسرين گلبه وفوكاها يتيم ليش كسرتي خاطره ؟ شنو اللي كسرة الج اني اجيبلج درزن ابداله 

زهرة : صلف وما متربي ربيه..

رسيل : هو طفل شعليه باللي بيني وبينج ليش تطلعين حقدج عليه تدرين هذا شلون جان مدلل بزود ابوه بس عمت عين الوكت اللي ذبنه عليج...

كمت ابجي اجى حسام على صوتي كمت اصيح يمكن جان بالحديقة وسمعني

حسام يداوم الصبح وباقي الوكت يكضيه لو بالبيت لو يطلع ساعة ويرجع  هاي من اني هنا هيج نظامه قبل هيج لا ما ادري 

حسام: شبيج رسيل شصاير ؟ 

زهرة: يمه عيني العرمة شنو سويت لابنها وانهدت بية ؟ شلون لسان صايرة ما جانت هيج

رسيل: من اجيت لحد الان حرتي شنو حجيتي وتجاوزتي ودعيتي سكتت ما جاوبتج بس مال توصلين يم سند احرك البيت وعلية وعلى اعدائي زين لو لا...

عفتهم ودخلت للغرفة اعصابي ترجف.. شدعي عليك ايهم هسه مرتاح ؟ مستقر ؟  ادري واذا طلكتني اني عندي شقة مال مروان وكاعدة بيها ومنجبة لا رايحة يمك ولا واصلتك بس بعد حظي الاعوج  شلون يتعدل صار العصر اندكت باب الغرفة وسمعت صوت صاح..

حسام: رسيل كاعدة افوت ؟ 

لبست حجابي وصحت فوت فتح الباب مد راسه مبتسم..

حسام: بيج حيل نطلع ؟ 

ضحكت..

حسام: ليش تضحكين ؟ 

 هو هم كام يضحك 

رسيل: حسام بعدك نفس طبعك ما تغيرت 

حسام: شلون يعني ؟ تصدكين ما اتذكرلي طبع لان اطباعي كلها اختلفت من بعدما رحتي

حجاها وجر حسرة..

رسيل: جنت كلما اضوج لو ابجي وحالتي النفسية تتعب تجيني امشي نطلع نتمشى واني شنو جان جوابي الك؟

حسام: اتذكرت تكوليلي حسام مو وقتك 

رسيل: اي والله حسام مو وقتك.

حسام: شوكت ييجي وقتي شوكت ، شبقى من العمر ماتكوليلي؟ 

رسيل: حسام اذا متأمل ارجعلك اكطع الامل من هسه لان اني ما اصير لا الك ولا لغيرك 

حسام: ليش بلة شنو السبب ؟ 

رسيل: اني روحي ماتت داخلي متهشم  ما اكدر اكون حياة من جديد واكعد احب وانحب 

حسام: زين والتسع سنوات اللي انتظرتج بيها ما الها حوبة عندج؟ 

رسيل: انت وردة ورجال والنعم منك وصافي گلب بس الخلل بية اني ما مستقره لا نفسياً ولا عاطفياً ولا اجتماعياً اني انسانة عبارة عن كتلة امراض نفسية ما افيدك ..

حسام: منو يكول ما تفيديني ؟ لاتحجين نيابة عني انتِ ماتعرفين معزتج عندي هي هي ماتغريت 

رسيل: بس اذا تعرف اللي عشته واللي مريت بيه راح تنسحب من وحدك 

حسام: احجي انتِ واني اقرر 

رسيل: مو وقتها حسام 

حسام: شوكت بعد فهميني ؟ 

رسيل: ييجي يوم نكعد كعدة حبايب ونتعاتب للصبح وعد 

حسام: خوما بعيد هذا اليوم ؟ 

رسيل: خليها للوكت 

حسام: امشي وياج يا بنت عمتي واشوف وين توصل 

تركني وطلع ومر شهر كامل على نفس الحال و اي اتصال ماعندي ببيت جدي لزمت موبايلي كلت اسأل على نور  واشوف ايهم شنو صار من عمليته طلعت رقمها كتبتلها على الفايبر  ما يوصل دكيت عليها حاضرتني رجعت دكيت على الخط هم حاضرتني  انقهرت كلش قابل شنو اريد منها غير اسأل عليها ولو هاي سوالف ياسر نور شمعرفها بالحضر بس تعرف تكول الو ومشت الايام وهسه احنا بسنة ٢٠١٥ شهر الثاني 

حياتي بدات تهدأ شوية شوية بس اكيد ماتخلى من مغثات وبسامير زهرة 

وبيوم جنا نسولف اني وريناد اجوي حسام وثائر كالوا يلا بدلوا بسرعة يابة وين  معليكم..

كمنا اني وريناد بدلنا لبست جبة سودة وحجاب شافتني ريناد رزلتني ...

ريناد: شنو هاي جنج وحدة عجوز صدك جذب امشي انزعي الاسود شو رجلج وراح يصيرله سنتين 

رسيل: اني مرتاحة هيج ريناد معليج بية

ريناد: على الاقل اجيبلج مني هدوم سود ولبسيهن..

رسيل: شلبس منج هدومج كلها مو مال حجاب

ريناد: بس انتِ انجربتي عليه  واللي جبرج راح  كافي انزعيه بعد ومنا وجاي لا تسوين شي اذا مو بقناعتج  اني وياج وبظهرج وخابرني آران البارحة سمع بيج راجعة هو هم راح يرجع ويصيرلج سند من بعد بابا..

رسيل: اول شي مروان حتى لو مات ما اخالفه علمني الصح حتى لو كان بالاجبار وخلاني على الطريق الصحيح مستحيل اضيع تعبه هيج  اريده يفرح بية بلكت يشوفني لان يكولون الشهيد يحس ويشوف اهله ....

كمت ابجي ما تحملت حضنتني وبجت ...

ريناد:عمت عيني عليج بس غير شفتج طافية واريد ارجعج للحياة..

رسيل: خليتها لأهلها اني حياتي انتهت بيوم دفنت مروان بيدي..

ريناد: الله يرحمه ويجبر بخاطرج ويعوضج بسند امشي نطلع صوجي اني قلبت عليج المواجع 

رسيل : ما ناسيتها حتى تذكريني بيها..

بعدها طلعنا بسيارة حسام هو وثائر ليكدام واني وريناد واطفالنا ورا

ضلينا نفتر بالشوارع وبعدين دخلنا مطعم طلبوا اكل سألوني شنو تاكلين كلتلهم بكيفكم تعيشنا ورجعنا للبيت  وهيج مشت الايام بهذا الروتين  مرتين بالاسبوع يطلعنا حسام اعرف علمود يغيرلي جو ياخذ ريناد ويانا حتى لا اتقيد وياه ولا ارفض اروح ، بشهر الثالت قبل عيد ميلاد سند بكم يوم جنا كاعدين بالهول رن موبايل خالو

محمد: الو هله ياسر هله بيك الحمدلله بخير وانت ؟ 

ضل يحجي وياه واني مركزة اريد بس اسمع خبر عن ايهم بلكت خالو يسأله ومع الاسف سده وما سأل ضجت ونفخت بضجر درت وجهي حسام يباوعلي ضايج كلت بگلبي لو تعرف شنو من قصة حب اني وايهم عشناها جان شنو سويت ...

محمد: رسوله حظري ابنج باجر عمه جاي ياخذه يمهم يكولون جان عندهم ظرف وتأخروا ماكدروا ييجون ياخذوه

رسيل: ماشي

ثاني يوم بدلت لسند وحضرتله جنطة صغيرة مال ملابس لان عنده هناك هواي من طلعنا عفت كل ملابسنا يمهم حتى ذهبي ما جبته بقى هناك جبت كم لبسة اللي نحتاجها بس خابر ياسر اجى خالو اخذ سند وطلع وداه لعمه بقيت خايفة و ألوب گلبي على سند اخاف عليه طريق طويل يعني اني اضل هيج بتعب كاضيه حياتي كلها بس خوف وترقب وقلق

مرت الاشهر ييجون كل شهر ياخذون سند يمهم ويرجعوه ...

بداية ٢٠١٦ شهر الرابع اجوي اخذوا سند بس الضربة اللي اجتي بگلبي من سمعت  بأيهم جاي وية ياسر يعني بيني وبينه كم متر وما شفته  ليش جاي معقولة متأمل يشوفني ؟ اخخخ لجم گلبي ورجع جرحي انفتح من جديد لك شلون هنت عليك صار سنة ونص  لا متصل لا سألت ، هيج گلبك قاسي واسود ...

ورا اسبوع رجعوا سند محمل اشكال وألوان العاب ملابس حتى بلي ستيشن جابوله وايباد ويبقى يخبصني لحد ما يخاذوه مرة ثانية كال عمو ايهم وكال عمو ياسر جدو ودادة على جهال نور 

خلصت ٢٠١٦ اي حدث مابيها سوى جية ايهم اللي كسرتني وطشرتني بعدما لملمت روحي بالكوة ببداية ٢٠١٧ كعدت على صوت عياط زهرة هي وحسام 

ياستار ياربي شكو اسمعها تكوله ليش تفصخ شنو السبب البنية معلكها وعايفها والناس تنتظر اكلوا وجهي على ابو جنتي تتوسلين علمود الشهرين تكولين هواي هسه سنتين شنو حجتكم 

حسام: كلتلج ما اريدها هي شكو مجلبة؟  شو لا عاقد عليها لا متزوجها مجرد حجي وكلتلج من البداية لا تورطين بنات العالم وياية اني ماافيدهن ليش تجيبين وحدة تعيش وياية جبر مو خطية تتأمل تحب وتنحب وتالي ما تشوف مني اي حنية لا تخشين بخطيتها مثلما خشيتي بخطية شجن وصدكي لو جاييها خطابة غيري جان ضربتني جلاق وراحت تزوجت بس ماكو احد كلبها كلتلج انتظره عمر ..

زهرة: ضل ضل بهذا عقلك خلي اشوف وين يوصلك اذا ما طيح حظك فلا اتسمى زهرة ...

ثاني يوم من بعد المشكلة قررت احجي وية خالو بلكت يقبل اشوف شغلة شي وأأجر وحدي واكعد واخلص من القال والقلت رحت وصلت لغرفته سمعته يحجي بالموبايل اللي وكفني وخلاني ابقى من سمعته يكول 

محمد: ابو مروان بنت اختي اخذتوها وردة مفتحة ورجعتوها ذبلانة وخشيتوا بخطيتها بس لهنا وكافي ما ارضى احد يتدخل بحياتها اي اني رايدها لأبني

لالا لا تخاف كل شي يخص مروان من فلوس واملاك خليهن على گلبك ما نريد  هسه هاهي مو تجيني ورا اسبوع تعال طلك ابني تعب هواي واريده يستقر ويرتاح ، تمام ان شاءالله رحم الله والديك في امان الله ..

تخبلت هذا شكاعد يحجي فتحت الباب دخلت لكيته كاعد هو وحسام 

رسيل: شنو هذا اللي سمعته 

جنت احجي وارجف

محمد: بنيتي تعالي افهمج

رسيل: شتفهمني خالو شتفهمني ؟ صرت مثلهم  هم بكيفك تزوجني وما تاخذ رأيي والله اذا سمعت هذا الموضوع انفتح مرة ثانية الا اهج من البيت وما تلكولي اثر...

كام جرني من ايدي وكعدني على السرسر وطلب من حسام يطلع ويسد الباب وراه طلع حسام واجى كعد يمي..

محمد: بنيتي اللي كاعد اسويه لمصلحتج اني ما دايم الج  وانتِ مو وحدج عندج طفل يحتاج تربية ويحتاج  اب فوك راسه الدنيا طويلة وما تكدرين تربيه وحدج وانتِ بعدج صغيرة وماكو واحد مثل حسام حنين ويحبج ويحب ابنج ما تشوفيه بهاي السنتين شلون يداري بيه ومتعلق بيه مهما تكون المرأة قوية بس تحتاج رجال يسندها خصوصاً اذا جان يحبها واذا رفضتي انتِ تتندميين تعرفين ليش؟ اني اكولج  اختج متزوجة ومستقرة مهما تسويلج وتقدملج مو مثل زوجج واخوج هناك حياته واتعلم عليها حتى لو يرجع مجرد زيارة وبس وحسام اذا تزوج راح يلتهي عنج ومستحيل زوجته تخليه يداريج لو يداري ابنج وحسام ما يتخلى عنج وراح تكب مشاكل يا بنتي فكري قبل لا تردين الجواب ....

طلع بعدما گلبي انكسر من جديد، هسه اكيد ايهم سمع وصله خبر شنو ردة فعله شنو رأيه راح اروح منه للمرة الثانية وراح يخسرني من جديد معقولة ما راح يتحرك اني ما اريده كزوج بس اريد منه موقف يوكف كل هاي المسرحية ويأمنا اني وابني ببيت قريب عليهم ...

لليل ألوب البيت صار ما يلمني اخذت موبايلي وطلعت للحديقة كعدت بالمرجوحة اهز بيها بلكت ادوخ وانسطر وانام بسرعة فزيت على صوت اشعار اجاني على الماسنجر  وكفت المرجوحة فتحت الموبايل رسالة من حساب ما ضايفته بطلبات المراسلة فتحتها 

گلبي انخطف هاي صورته هذا اسمه هذا اسمه اي اسمه فتحت الصورة اكبر بيها واكف وبيده عوجيه زايدته جمال فوك جماله ياترى شنو دازلي ؟ رابط دست عليه وداني لليوتيوب 

اغنية مال كاظم الساهر اسمها تناقضات فتحتها وبديت اسمع 

وما بين حبٍ وحبٍ احبك انتِ

وما بين واحدة ودعتني وواحدة سوف تأتي

أفتش عنكِ هنا وهناك كأن الزمان الوحيد زمانك انتِ

كأن جميع الوعود تصب في عينيكِ انتِ

فكيف أفسر هذا الشعور الذي يعتريني صباح مساء

وكيف تمرين بالبال مثل الحمامة

حين اكون بحضرة احلى النساء ...

هنالك خمس دقائق لكي اطمئن عليكِ قليلاً و اشكو إليكِ همومي قليلاً وأشتم فيها الزمان قليلاً هنالك خمس دقائق بها تقلبين حياتي قليلاً

قولي قولي قولي قولي قولي

ماذا تسمين هذا التشتت؟

هذا التمزق هذا العذاب الطويلا

وكيف تكون الخيانة حلاً ؟ وكيف يكون النفاق جميلاً؟

احبك حين اكون حبيب سواكِ

ويعثر دوماً لساني فأهتف بإسمك حين انادي عليها

واشعر أني اخون الحقيقة

حين أقارن بين حنيني اليك وبين حنيني اليها

فماذا تسمين هذا انفصاماً

سقوطاً هروباً ضياعاً دماراً جنوناً

قولي قولي قولي قولي قولي

ماذا تسمين هذا التشتت

هذا التمزق هذا العذاب الطويلا

وكيف تكون الخيانة حلاً وكيف يكون النفاق جميلاً

كيف كيف كيف

___________

لم اكن انوي ان يكون هذا لقائنا الاخير 

وقفت امامه في مشهد قصير 

هل يا ترى هذا وداعي الاخير 

ولكن عندما رايت عندهم ثمني قليل 

بعتهم واشتريت نفسي

               الفصل الثاني والأربعون من هنا 

 لقراءه باقي الفصول من هنا