رواية تيك توك حكاية توبه الفصل الثالث 3 بقلم محمد منصور

وقبل ما نبدأ  نوحد الله ونصلي علي خير خلق الله سيدنا محمد. وعلي بركة الله نبدأ 

بسم الله توكلت علي الله. وهو رب العرش العظيم

خلصت الحلقة اللي فاتت علي توبه اللي خدت طوبة في دماغها ووقعت علي الارض وهي بتجيب دم من دماغها وقبل ما يمسكوها اهل المنطقة ظهر اشرف بالتوك توك بتاعه وقال لتوبه

اركبي بسرعه

بصيت له توبه وهو صرخ فيها باعلي صوت وقال

انتي لسة هاتبص لي.   اركبي بقول لك

قامت توبه وركبت التوك توك بسرعه وجري اشرف بالتوك توك. وبقي بيدوس اي حد يقف قدام منه وقدر يهرب بتوبه من مصير ربنا واحدة بس اللي كان يعرفه.  وبعدها بشوية ومن جوة مستشفي كان اشرف واقف مع توبه اللي كانت واقفة قدام منها  ممرضة اسمها عبير.  وكانت عبير بتنظف الجرح اللي في دماغ توبه وبتخيطة تلت غرز.  وبتلف علي دماغها شاش وكان اشرف بيبص لتوبه اللي كانت بتتوجع وهو بيقول

ان شاء الله سليمة. وخلي بالك انا جايبك عند اشطر ممرضة فيكي يامصر. الانسة عبير كورونا.

فتبص له عببر وتقول

بقي كدة. طيب يا اشرف. لولا انك ابن خالي انا كان هايبقي ليا معاك تصرف تاني

وتبص عبير لتوبه وتقول

اول مرة اشرف ابن خالي يبقي جدع. كدة باين عليكي غالية عليه اوي. دة وحيد وملهوش في الدنيا الا امه 

فتتكسف توبه وتبص في الارض ويلاحظ اشرف فيقول

بطلي رغي يا اختي واخلصي انتي بتعملي لها عملية

وتخلص عبير اللي بتعمله وتلم شنطة الاسعافات الاولية اللي قدام منها وتقول

خلصت خلاص

وتبص لتوبه وتقول لها

الف سلامه عليكي

توبه

الله يسلمك

اشرف

ممكن بقي نمشي من هنا علشان انا ما بحبش المستشفيات

فتقف توبه وتخرج مع اشرف من المستشفي. وتركب التوك توك واشرف بيقول لها

بقي اسيب منطقتكم ساعتين ارجع الاقي الدنيا خربانه كدة. دة اية اللي حصل يخلي اهل المنطقة يعملو فيكي كدة وعم حجاج يقابلني وهو خارج جري من المنطقة

توبه

هو انت ما كنتش موجود من الاول 

اشرف

كنت بلف لفتين كدة بالتوك توك. اهو اجيب مصاريف علاج امي.  احكي بقي حاكم انا بعشق الرغي 

فتعيط توبه بحرقة فيستغرب اشرف ويقول لها

اية دة بس مالك في اية.  هو الحوار كبير اوي كدة

توبه

اكبر مما تتخيل.

اشرف

طيب احكي لي يمكن اقدر اساعدك.

فتبص له توبه وتقرر انها تحكي. ،،،،،

ومن جوة شقة ام سامح صاحبة البيت اللي كان ساكن في حجاج يقف فريد قدام حجاج اللي قدروا اهل المنطقة يمسكو واتكتف وكان مضروب علقة موت  واترمي في شقة عم فريد علشان يتربي ومعظم اهل المنطقة كانو في الشقة وهنا يظهر شاب في الثلاثينات من عمره وهو سامح ابن فريد.  وكانت ملامحه حادة وشكلة ما يدلش علي خير ووقف وسط اهل المنطقة وقال لهم

يلا كله بيتك بيتك. خلاص المولد انفض.  

فيقول واحد من اهل المنطقة

طيب وحجاج هاتعملو في اية

فيبص سامح لحجاج ويقول

حجاج. دة سيبوا ليا انتو عارفين اني صحفي وعندي حساب تيك توك. ويوتيوب يعني هاعرف ازاي افضح امه

روحو انتو دلوقتي وتابعو الفضيحة من عندي. انا عارف انكم تحبو الفضايح.  

فضحك اهل المنطقة وبدأ يخرجو من الشقة وفضيت الشقة علي صحابها وقفل سامح الباب وبص لحجاج وقال

منور يا اللي هاتكون سبب سعدي

فريد

واد يا سامح انت ناوي علي اية

فيبص سامح لابوه فريد ويقول

ناوي اركب التريند واعدي الفقر.  

ويروح سامح ناحية حجاج ويقول له وهو بيبص في عيونه. 

والراجل الهزق دة هو اللي هيساعدني في كدة. 

وسابو سامح ودخل اوضة وخرج الموبيل بتاعه واتصل برقم ورد واحد اسمه سعد واول ما سمع سامح صوت سعد قال

الباشا الكبير

سعد بضيق

سامح انا مش فايق لك كفاية سيرتي وسيرة ابني اللي بقيت علي كل لسان في مصر

سامح

هاخليهم ينسوك يا باشا. وينسوا ابنك

سعد باهتمام

ازاي بس 

سامح

اب في سرير المتعه مع بنته.  اية رايك في الخبر دة

سعد

انا مش فاهم حاجة

سامح

بعدين يا باشا المهم تحضر لي مبلغ 20 الف جنية. واتنقل من مجرد صحفي تحت التمرين  لي اعلامي في قناة حضرتك

سعد

وفي المقابل حوار ابني وشنطة المخدرات اللي اتمسكت معه في المطار يتنسي

سامح

ولا كانه كان موجود اصلا

سعد

وريني كراماتك وانا اوريك العز والدنيا اللي عمرك ماشوفتها

سامح

حصل ياباشا.  ابقي افتح بس التيك توك النهاردة واتفرج علي سامح فريد وهو بينقل فضيحة هاتهز مصر وتخلي الناس كلها ما يتكلموش الا عنها، ،،،،،،،

وخرج سامح من الاوضة وراح ناحية حجاج ومسكه من ذراعه وقومه فقال له ابوه

رايح بي فين 

سامح

هاصور فيديو يليق بي

وزق سامح.  حجاج ناحية اوضته وقفل الباب وراء منه وقعد حجاج علي الارض وقعد سامح قدام حجاج وطلع الموبيل بتاعه وشغل بث مباشر علي التيك توك وبص للكاميرا وقال

انا النهاردة معاكم ومن اوضي ومعايا في الاوضة حجاج الراجل اللي اتمسك مع بنته في السرير. 

وودي الكاميرا ناحية حجاج اللي بص في الارض وهو بيقول

مش بنتي

فضحك سامح وقال

ما انت لازم تقول كدة. وبص بقي انا عرفت ان توبه هربت من المنطقة مع واحد في توك توك. ماتعرفش مين دة

حجاج

ماعرفش

سامح

تبقي بنتك وماتعرفش مين بيلاغيها

فيبص له حجاج ويقول

ماعرفش. بس توبه ملهاش في المشي العوج. 

فيضحك سامح ويقول

قالو للشمال توبي. دة انت وبنتك كنتو في السرير يا راجل يا ناقص

حجاج

مش بنتي وهاقولها باعلي صوت مش بنتي

وفضل البث شغال لغاية ماخلصه سامح وهنا رن موبيل سامح وسمع صوت سعد بيقول

الله ينور عليك. لا تستاهل تبقي مذيع عندي في القناة بس تبقي بطل لو اول حلقة تعملها مع توبه نفسها

سامح

بس توبه اختفت

سعد

لا. دي لازم تيجي من تحت الارض علشان تبقي نجم.

وقفل سعد وساعتها بص سامح لحجاج وقال له 

 ما تعرفش الاقي توبه فين

حجاج

توبه ماتعرفش في الدنيا غيري. وجدها هشام وهي مستحيل تروح له بعد ما عرفت انه قتل امها

سامح

توبه عيلة ولما الجوع والبرد والخوف ونومه الرصيف يتعبوها. هاتروح لجدها لانها ماتعرفش غيره.

حجاج

هو انت عايز منها اية

سامح

هي الفضيحة تبقي فضيحة من غيرها.  دي هي البضاعه اللي هابيع علي حسها

حجاج

تعرف انك واطي اوي

فيضحك سامح ويضرب حجاج بالقلم ويقول

زيك يالظبط يا هزق.

ومسك سامح رقبة حجاج وقال له

قولي عنوان جدها ،،،،،،،

ونرجع تاني للتوك توك بعد ما توبه حكيت حكايتها كلها لاشرف واشرف بص لها بقرف وقال

انا لو اعرف انك كدة. ماكنتش ادخلت يارتني سيبتهم يخلصو عليكي

اتصدمت توبه من الرد لكنها قالت.

معاك حق. انا الموت راحة ليا

ونزلت توبه من التوك توك واشرف كان بيقول

هاتي الموبيل اللي انا اديت هولك

توبه

مش معايا

فينزل اشرف من التوك توك ويبص لتوبه بغل ويمسكها من عبايتها ويقول

طلعي الموبيل يا بت وبطلي مسكنة

توبه وهي بتبعد ايد اشرف عنها

ابعد ايدك. وماتمسكنيش كدة انا مش حرامية

اشرف

ضيقك اوي ان ايدي لمست جسمك. يا طاهرة

توبه وهي بتعيط

انا مش طاهرة والرخيصة اللي زيي تستاهل ان يحصل فيها اكتر من كدة. ومش هالوم عليك

وتستعد توبه لانها تمشي لكن اشرف يمسكها من التحجيبة بتاعتها ويضربها بالقلم وهو بيقول

الموبيل يا بنت الكلب يا حرامية

فتقع توبه علي الارض وهي بتصرخ من قوة القلم وبتبص لاشرف وبتقول 

قولت لك مش معايا مش معايا.  وانا ماسرقتش منك حاجة وماطلبتش منك موبيلات. انت اللي جيبته لغاية عندي

اشرف بحرقة

علشان كنت فاكرك غير اي واحدة انا شوفتها لكن طلعتي زي اللي عرفتهم. رخيصة وبعتي لحمك 

توبه 

انا ما بعتش لحمي. انا ماكنش قدامي غير اني اعمل كدة واسيب كلب واحد ينهش في لحمي احسن ما اترمي في الشارع وبدل الكلب يبقي ميت كلب وكلب.  

وتعيط توبه وتقول بحرقة

انا من ساعه ما وعيت علي الدنيا وانا ماعرفش غيرة هو كان بالنسبة لي مش اب وبس دة كان كل عيلتي.  انت لية مش قادر تفهم وتقدر  انا لو كنت قولت لا.  كنت هاعيش فين واكل منين واشرب منين. اية كنت عايزاني اروح انام علي الرصيف.

وتعيط بحرقة اكتر واكتر وتقول

انا ماعملتش كدة معه علشان عايزا اعمل كدة انا عملت كدة علشان افضل عايشة.  وبعدين انت اللي دخلت حياتي وكنت ديما عايز تقرب مني. انا ما طلبتش منك مساعده. وانا كان علي الجرح اللي قريبتك خيطته ونظفته فاهو

وخلعت توبه الشاش عن دماغها ورميته علي الارض وخبطت نفسيها في سن الرصيف في نفس مكان الجرح علشان الجرح يتفتح تاني. والدم يبدأ يجري علي وشها فجري اشرف ناحيتها وكتم الجرح بايدة وقال

لية بس عملتي كدة

توبه وهي بتبعد اشرف عنها

علشان ما يبقاش ليك جيملة عليه. امش بقي وسابني انت عايز مني اية تاني 

اشرف

عايزك. يا توبه. انا مابقتش احب اليوم بتاعي يعدي من غير ما اسمع صوتك او اشوفك. مش عارف لية عايز ديما اكون قريب منك 

توبه وهي لسة بتعيط بحرقة

وانا مش عايزا حد يقرب مني.  

اشرف

بس انا عايز اكون قريب. بس بعد اللي عرفته ما بقتش عارف المفروض اعمل اية

فتقف توبه علي رجليها وتقول

المفروض تسيبني وتمشي.  دة الصح.

اشرف

اسيبك كدة في الشارع

توبه

دة المصير بتاعي وانا راضية بي. وكنت لازم اختاره من الاول وما كنتش رجعت لحجاج 

اشرف

بس دة مش حل

توبه

عندك حل تاني.  امي وماتت. وابويا ما طلعش ابويا. واللي انا من صلبه ماعرفهوش 

اشرف

ترجعي لجدك هشام

توبه وهي بتتفزع

ارجع للي ذبح امي.

اشرف

هو ذبح امك علشان غلطت لكن انتي هايذبحك لية

توبه

ماقدرش ارجع لواحد مجرم زي دة 

اشرف

المجرم دة انتي حفيده. وهو مستحيل يأذيكي

توبه باستهزاء

اللي يذبح بنته. سهل اوي يذبحني وخصوصا لو عرف باللي حصل بيني وبين حجاج

اشرف

هو السبب في اللي حصل يوم ما نسبك لاب مش ابوكي وطلع فتوا. ما يطلهاش شيطان. بس ارجع واقول لك هو الوحيد اللي ممكن تقعدي عنده. وانك تكوني في بيت جدك الظالم اهون كتير من النوم في الشارع ولية ما يكنش حن ليكي وحاول كتير يوصل لك دة انتي برضو حفيدة 

سكتت توبه شوية علشان كانت بتفكر في الكلام اللي قاله اشرف فقال اشرف.

مافيش اي طريق قدامك الا طريق جدك وانا بنفسي هاوصل لك لغاية هناك ولو حسيتي انك خايفة او في خطر علي حياتك هاخدك ونهرب زي ما عملت المرة دي

توبه

ولو عرف باللي كان بيني وبين حجاج

اشرف

هايعرف منين بس.  حجاج وهرب وجدك وما يعرفش المنطقة اللي كنتم قاعدين فيها

توبه

انت لية عايز توديني هناك وخلاص

اشرف

علشان اطمئن عليكي. لاني لو سيبتك في الشارع هاحس اني قصرت في حقك وماينفعش اخدك عندنا البيت. امي مش هاتسكت.  صدقيني يا توبه انا متلخبط يعني عايز اسيبك وامشي وفي نفس الوقت عايز اساعدك. علشان قلبي يرتاح واحس اني عملت اللي عليه 

توبه

انت غريب اوي من شوية كنت بتضربني وعايز تمشي وتسيني ودلوقتي مش عايز تمشي الا لما تطمئن عليه

اشرف

شكلي بحبك

الكلمة هزت توبه بشدة وكانه زلزال ضرب كل حتة في جسمها لكن اشرف كمل وقال

ومع اني بحبك لكن ما ينفعش اقرب منك اكتر من كدة لان اللي عرفته خلاني تايه.  ودلوقتي قولتي اية هاتروحي بلدكم

توبه

مافيش قدامي الا كدة.  وربنا يستر وحتي لو جدي ذبحي زي امي يبقي ارتحت.،،،،،،،،

وبعدها بكام ساعه وصل قطر الصعيد وجوة منه توبه واشرف ونزلت توبه بلدها  ولسة هاينزل اشرف قالت توبه

ملهوش لزوم

اشرف

انا متفق معاكي لازم اطمئن عليكي وامشي

توبه

هايحصلي اية اكتر من اللي حصلي.  ارجع القاهرة ورقمك انا حفظا. لو احتجت لك هاكلمك

اشرف

انتي متاكدة انك مش محتاجني معاكي

توبه

متاكده.

اشرف

يمكن اللخبطة اللي انا فيها تروح وساعتها ممكن نتقابل تاني

توبه

ممكن لية لا

اشرف

طيب خلي بالك من نفسك.

ويمد اشرف ايده ناحية توبه وتسلم توبه عليه وهو بيقول

لا اله الا الله

ابتسمت توبه وقالت

محمد رسول الله. 

 ومشيت توبه واشرف بيبص عليها. وسالت توبه في البلد عن دوار هشام جدها لغاية ما وصلت عند بوابه الدوار ووقفت قدام البوابة وهنا تخيلت هشام وهو بيذبح امها فخافت وبعدت عن البوابة وفضلت تبص للبوابة وتتخيل دم امها وهو بيجري علي البوابة فقالت لنفسها

اية اللي خلاني اعمل كدة انا مجنونه اني ارجع برجلي لبيت جدي لازم امشي 

 ‏

 ‏وهنا اتفحت البوابة وشافت جدها هشام اللي كان بيبص ناحيتها وبيقول بصوت مخيف 

انت مين يا بت انتي وواقفة لية قدام البوابة

اترعبت توبه ومابقتش عارفة تقول اية، ،،،،،،،،

الفصل الرابع من هنا