رواية تيك توك حكاية توبه الفصل الرابع 4 بقلم محمد منصور
بسم الله توكلت علي الله. وهو رب العرش العظيم
خلصت الحلقة اللي فاتت علي توبه اللي كانت واقفة قدام بوابة دوار جدها هشام وكانت خايفة تخش بعد ما افتكرت اللي حصل في امها وهنا اتفتحت البوابة ولقيت قدام منها جدها هشام اللي بص لها وقال لها
انت مين يا بت وعايزا اية
اتخضيت ومابقتش عارفة اقول اية. مع اني اول مرة اشوف جدي لكني عرفته ماعرفش لية شوفت دم امي في ايديه وهو كرر السؤال تاني وبعصبية
ما تنطقي يا بت. انت مين.
توبه
انت المعلم هشام
هشام
انا هشام انتي مين بقي. شكلك مش من البلد
توبه
عرفتك من وصف حجاج ليك. انا توبه بنت عبلة
هشام
حجاج وعبلة.
توبه
فاكر بنتك عبلة اللي.
هشام مقاطعه لها وبصوت حزين
ما تكمليش. انا ربنا انتقم مني شر انتقام وبدفع ثمن اللي عملته فيها لغاية دلوقتي
توبه
معقولة تكون حسيت قد اية انت ظلمت بنتك وظلمتني يوم ما كتبتني باسم حجاج
هشام
حقك عليه يا بنتي. وعايزك تسامحيني وتخلي امك تسامحني انا ما بعرفش انام بسببها.
ويبص هشام لجسمه وقال
انا يا بنتي جسمي كان قد كدة مرتين لكن قلة النوم والكوابيس اللي بشوفها واللي فيها امك. خلت المرض يتمكن مني ومابقتش عارف اعيش زي الاول
وقرب هشام مني وخدني في حضنة ولقيته بيعيط وهو بيقول
انتي ربنا بعتك ليا علشان اكفر عن ذنبي. وانا مش مش هارفض هدية ربنا ليا ومش هاموت الا وانتي مسمحاني يمكن لما امك تعرف اني بكرمك ترحمني وتسيبني انام.
ودخلت توبه الدوار وقفل هشام البوابة. وفي الوقت دة كان سامح واقف تحت شجرة قدام الدوار وبيبص للي بيحصل وبيقول لنفسه
باين عليه جيت متاخر.
وضحك ضحكة صفراء ورجع قال لنفسه
بس مش متاخر اوي. وزي ما خدها ودخلها بيته. اخلي برضو يطردها وساعتها. يبقي حلال عليه. ماهو انا ابقي حمار لو سيبتها تطيع من ايدي دي اللي هاتبقي سبب شهرتي وسعدي.
ومشي سامح من قدام الدوار وهو ناوي علي الشر وفي نفس الوقت كانت توبه بتحط رجليها لاول مرة جوة بيت جدها وهي حاسة بالامان والخوف اللي اتولد جوة منها بدأ يروح وخصوصا مع حنية جدها عليها اللي بعت يشتري لها احلي هدوم وخلي اللي في البيت يعملوها احلي اكل وكلت توبه وشبعت ونامت في اوضة امها اللي كانت بتنام فيها قبل ما تتجوز وبمجرد ما حطيت جسمها علي السرير فتح جدها باب الاوضة بعد ما خبط ودخل لها وبص لها وقال
كلمتي امك
توبه باستغراب
اكلمها ازاي بس وهي ميتة
هشام
اة. ما انا عارف بس هي انا ديما بسمع حسها في الاوضة هنا. فقولت ممكن تكوني شوفتيها
بصراحة قلقت بعد ما كنت بدات ارتاح وحسيت ان جدي مش طبيعي لكنه قال
انا هاسيبك تنامي وترتاحي ولو جيت لك قولها انا عملت علشانك اية. وخليها تسيبني انام.
وسابني جدي وخرج من الاوضة وانا مستغربة وخايفة بس قولت لنفسي
اكيد جدي بيهلوس بسبب قلة النوم. معقوله يعني يكون في عفاريت
وعديت اول ليلة ليا في البيت ونمت ما حسيتش بنفسي كنت تعبانه اوي اوي وبمجرد ما صحيت لقيت جدي داخل عليه الاوضة بعد ما استاذن وكان باين عليه انه مبسوط وقالي
ما جتش عبلة ماجتش. انا نمت يا توبه شكلها رضيت عليه انتي عرفتيها انا عملت معاكي اية. صح
ماكنش في رد قدام مني غير اني اخده علي قد عقلة وقولت
عرفتها يا جدي وهي سامحتك. وفرحت جدا باللي انت عملته معايا
هشام
كنت عارف انها هاترضي عني لو انتي رضيتي. مش انتي راضيا عني ومرضيا
توبه
الحمد لله يا جدي. انا ما كنتش بحلم باكتر من كدة
وقرب هشام منها وقعد جنبها وفجاة ضربها بالقلم ومسكها من شعرها وقال
طيب لية بقي تزعليني منك
توبه وهي بتتوجع
هو كنت عملت اية بس
هشام
حد جالي من اهل البلد ومعه فيديو علي النت لحجاج وهو مضروب وبيقول انك كنتي معه في السرير. صح الكلام دة.
توبه
ياجد،،،،،،
وقبل ما تكمل ضربها هشام بالقلم وقال
ازاي تعملي كدة مع ابوكي
توبه وهي بتعيط
مش ابويا. بلاش تكذب الكذبة وتصدقها
هشام
صح. مش ابوكي بس برضو لية تعملي معه كدة
توبه وهي بتقف
انا تعبت وقرفت وزهقت. ومش كل شوية حد ينصب لي المحكمة ويحكم عليه باني الفاجرة الوحيدة اللي في الدنيا كل الظلمة فاجرين. بس كل واحد فاجر بطريقته. انت فاجر علشان ذبحت بنتك وشبهتها بالبهيمة اللي عندك في الزريبة. وبدل ما تجيب حقها من اللي عمل فيها كدة نصبت المحكمة وحكمت عليها بالاعدام. وياريتك سكت علي كدة. لا عملت فيها نبي وطلعت فتوة اني انكتب علي اسم حجاج وابقي بنت فراش سيبت حفيدنك بين ايدين راجل غريب اهو انا كبرت وحجاج طمع في جسمي. لكن اسمعني كويس انا مش عبلة ومش هاخليك تذبحني زي ما ذبحتها ولا هاعيش معاك وعندي الشارع اولي بيا منك
وجريت توبه ناحية الدولاب وسحبت العباية بتاعتها والحجاب والجذمة وهشام بيقول لها
رايحة فين يا توبه
لكن توبه ما تردش وتخرج من الاوضة جري وهشام جري وراها وهو بيقول
حقك عليه طيب استني نتكلم دة انا ما صدقت ان امك رضيت عني وسابتني انام. يا توبه ردي عليه
لكن توبه خرجت من البيت كلة وهي حافية وفتحت البوابة وخرجت للشارع وفضلت تجري لغاية ما وصلت عند محطة القطر وبدات تلبس العباية وحجابها وركبت القطر وهي بتعيط وبتبص للطريق وهنا ظهر لها سامح وقعد جنب منها وطلع منديل وادهولها وقال لها بنعومه الثعابين.
ما بحبش اشوف حد بيعيط.
بصيت له توبه وقامت من جنب منه وراحت لكرسي تاني فراح وراها سامح وقال لها
انا مش قصدي اضايقك ومالك خايفة لية مني كدة. انا سامح جاركم ابن عمك فريد
بصيت له توبه وقالت
اة انا افتكرتك. كنت بشوفك ساعات وانا طالعة او نازلة
سامح بمكر
طيب كويس. بس انتي بتعملي اية في الصعيد هنا وفين عم حجاج
توبه
انا كنت عند، ،،،،،
وسكتت توبه فقال سامح
لو مش عايزا اقول لك انا. انتي شكلك كدة جيتي هربانه من الفضيحة اللي حصلت
توبه
انت عارف اهو
سامح
عرفت من النت زي ناس كتير. وبصراحة صعبتي عليه اوي ازاي عم حجاج يعمل كدة ويستغل بني ادمه رقيقة زيك ويضحك عليها
توبه باستغراب
هو انا بجد صعبانه عليك
سامح
جدا. وعلي فكرة بقي انا كنت في البلد هنا مش بالصدفة لا. قاصد اني اجي واشوفك واشوف اقدر اساعدك ازاي. لان لازم حقك يرجع لك. والبني ادم الزبالة اللي شهر بيكي وبفضيحتك ونزلها علي النت لازم يتربي. علشان يعرف ان الله حق. دي شغلتي بقي انا صحفي وهابقي اعلامي وهاعرف ازاي اجيب حقك
توبه
هو انت تعرف مين اللي عمل كدة
سامح
لغاية دلوقتي لسة ماعرفهوش بس مسيري هاوصل له واجيب لك حقك. وبالنسبة لحجاج فدة لازم يتحاكم في ميدان عام علي اللي عمله فيكي.
توبه وهي لسة مستغربه وكان باين اوي الاستغراب علي وشها فقال لها سامح
مالك مستغربة لية كدة
توبه
اصل انت الوحيد اللي قررت تساعدني حتي بعد ماعرفت اللي انا عملته
سامح
علشان انتي ضحية واي حد هايشوفك غير كدة يبقي بني ادم ظالم. ويستاهل الحرق.
استغربت توبه اكتر ومابقتش قادرة تصدق اللي بتسمعه وسامح استغل الفرصة وقال زي الثعبان لو كان الثعبان بيتكلم.
انتي بنت صغيرة وحجاج طمع في جسمها كنتي هاتروحي فين وتسيبي الشقة اللي انتي كبرتي وعيشتي فيها. تروحي تنامي علي الرصيف. لا. طبعا كنتي لازم تستسلمي ودة اللي حصل. حتي لو في الحرام
توبه
بس هو كان هايتجوزني بس بعد مايغير اسمي
سامح
انتي طيبة اوي يا توبه. هوانتي فاكرة تغير الاسم بيكون بالساهل دي اجراءات كتير صعب تخلص بسهوله
توبه
يعني حجاج كان بيضحك عليه
سامح
اللي يطمع في جسم بنت من سن بنته. مستحيل يكون بني ادم دة اكيد خنزير
توبه
معاك حق. انا ازاي صدقت انه ممكن يتجوزني اللي زي حجاج دة ما يفرقش كتير عن جدي هما الاثنين خنازير
سامح
وانا معاكي هجيب لك حقك من كل اللي ظلموكي.
وعديت كام ساعه وفضل الكلام رايح جاي بين توبه وسامح وتوبه فتحت قلبها لسامح وفضلت تتكلم وتتكلم لغاية ما وصل القطر محطة مصر وساعتها بصيت توبه لسامح وقالت
وصلنا وما حستش بالوقت
سامح
طيب كويس اني ماكنش دمي تقيل علي قلبك
توبه بابتسامه خفيفة
لا. خالص
سامح بخبث
ودلوقتي بقي عندك حد في القاهرة اوصلك لي
توبه بكسره نفس
لا. بس ممكن موبيلك اعمل مكالمة
اتصدم سامح وقال
هتكلمي مين
توبه
واحد معرفة
فقال سامح لنفسه
واحد معرفة مين بس. دة حجاج ما اكد لي انها ماتعرفش الا هو وجدها والاثنين خلاص مابقوش في سكتنا
لحظت توبه سرحان. سامح فقالت
لو مش عايز تديني الموبيل بلاش.
سامح
لا. خالص
وخرج سامح الموبيل بتاعه واداه لتوبه واتصلت توبه برقم اشرف لكنها لقيت الموبيل مقفول. فرنت كمان مرة ولقيت الموبيل مقفول فقال سامح بمكر
هو دة رقم حد من قرايبك
توبه وهي بتجرب ترن تاني
اة.
وهنا سامح افتكر ان توبه ساعه ماهربت من المنطقة هربت بتوك توك فقال
هو دة سواق التوك توك اللي هربتي بي من المنطقة
استغربت توبه وقالت
اية دة انت عرفت ازاي
سامح
توقعت كدة. بس سامحيني انتي تعرفي كويس
توبه
يعني
سامح
مافيهاش يعني. فيها اعرفة او ماعرفهوش
توبه
اعرفة من كام يوم بس هو الوحيد اللي ممكن يشوف لي مكان اقعد في
سامح
وهو انا روحت فين. ولا انت باين عليكي مستقلية بيا
توبه
لا خالص. بس مش عايزا اتقل عليك.
سامح
ماتقوليش كدة. انتي هاتكوني معايا لغاية ما اجيب لك حقك واجهز لي اول حلقة من برنامجي التيلفزيوني وانتي هاتكوني ضيفتي
توبه
انا هاطلع في التيلفزيون. لية
سامح
علشان تفضحي كل اللي كانو السبب في اذيتك
توبه
بس انا مش عايزا حاجة منهم لو عايز تخدمني بجد شوف لي شغلانه ومكان انام في وبس. او خليني اوصل لاشرف سواق التوك توك
سامح
توبه اسمعي كلامي انتي اللي شوفتي مش شوية ولازم حقك يرجع.
توبه
ابعدني عن المشاكل انا مش قدها. ولا عايزها. انا عايزا اعيش حياتي بعيد عن المشاكل
سامح
واشرف دة هيخليكي تعيشي حياتك من غير مشاكل
توبه
مش كدة هو قالي لو احتجت لحاجة اتصل بي. وانا مش عايزه منه حاجة غير اللي انا قولتهولك
سامح
باين عليكي عايزا تشوفي وخلاص
اتكسفت توبه لان هي دي الحقيقة فقال سامح
خلاص يا ستي انا هاوصلك لي طالما دة اللي هايريحك
توبه
هاتعرف توصل لعنوانه
سامح
انا ليا واحد صاحبي معرفة في شركة الاتصالات هاخلي يعرفني عنوان اشرف. ولغاية ما وصل لي. تعالي معايا هاوديكي شقتنا القديمة اقعدي فيها لغاية ما اوصل لاشرف.
توبه
انت طيب اوي يا سامح وكمان جدع
سامح
طيب يا ستي شكرا.
وراح سامح بتوبه للشقة اللي قال لها عليها وطلعها الشقة بعد ماجاب لها اكل وسابها ومشي. واتصل بسعد وقال له
الباشا الكبير
سعد
عملت اية يا سامح
سامح
البت معايا وتحت ايدية.
سعد
الله ينور عليك. دة مذيعين مصر كلهم بيحاولو يوصل لها. بس هي عارفة انت ناوي لها علي اية
سامح
ولا تعرف اي حاجة دي حتي ما تعرفش اني انا اللي فضحتها علي التيك توك. و قولت لها هدافع عنك واجيب لك حقك من اللي ظلموكي
سعد
وانت ناوي تعمل كدة. دة احنا كدة نخسر
سامح
عيب عليك يا باشا انت تعرف عني كدة.
سعد
هو دة. جهزها بقي لاول حلقة من حلقات البرنامج بتاعك التريند في مصر
سامح
التريند في مصر اسم جميل. ويستاهل توبه. بس افوق الاول من حوار بتاع واحد هي بتحبه وشغالها علشان تكون في ايدية زي العجينة
سعد
اشتغل وشغل دماغك عقبال ماجهز لك الاستوديو كفاية ان الفضيحة بتاعتها نست الناس فضيحة ابني،،،،،،،
وبعدها بيومين كان اشرف رايح ناحية محطة القطر في بلد توبه وهو حزين جدا وبيقول لنفسه
روحتي فين يا توبه دة انا ما تعرفيش انا مشتاق ليكي قد اية. كان نفسي اشوفك واقول ان اللخبطة اللي جويا راحت وعرفت انا عايز اية. انا عايزك يا توبه ومستعد اتجوزك وتكوني مراتي وكل اللي ليا. بس اوصل لك ازاي والشريحة اللي كنتي تعرفيها ليا اتسرقت مني وماقدرش ارجع اخط علشان مش بتاعي.
وقعد اشرف علي المحطة وهو حزين وبيقول لنفسه
يا توبه. ردي عليه الاقيكي تاني ازاي. عرفت غلطتي انتي مالكيش ذنب هما اللي ظلموكي
،،،،وفي نفس الوقت كانت توبه بتعيط وهي بتبص لسامح اللي كان بيقول
اول ماقولت له اسمك قالي قولها مات ومايحبش يعرف واحدة زيك
وهنا افتكرت توبه زقت اشرف ليها في الشارع وسمعت صوته في ودانها وهي بيقول
اسف يا طاهرة.
وصرخت من الوجع فقال سامح
ماعرفش ان كلامه هاضيقك كدة. بس دي رساله وكان لازم اوصلها ليكي زي ما اتقالت
توبه اللي الدموع غطت لون عيونها قالت
كنت غبية لما افتكرت انه ممكن يساعدني ويقف جنبي كان لازم افهم انه زيه زي جدي ما بيرحمش وشايفني فاجرة
سامح
علشان كدة لازم تطلعي في التيلفزيون والناس كلها تعرف قد اية انتي اتظلمتي. لازم كل الناس تعرف حكايتك يا توبه
وهنا مسحت توبه دموعها وبصت لسامح بجبروت يخوف وقالت
وانا جاهزة.
سامح وهو بيضحك بمنتهي الشر
هو دة الكلام انتي كدة صح.،،،،،،،