رواية لقاء السحاب الفصل الثامن عشر18بقلم حياة محمد الجدوي
سميحه بفرحه: بجد طب قولى مين وأنا هخطبها لك فوراً
سامح بابتسامه: ليليان بنت عمى كريم
سميحه: مين.!!!!!.... ليليان...... مش معقول.
سامح: ليه بس يا ماما . هى مخطوبه ولا فيه حد متقدم لها
سميحه: لأ أنا مفصدش بس أنا متفاجأه . أما ليليان فدى زى بنتى وأنا بحبها جدا وهبقى مطمئنه عليك وانت معاها زى ما هتطمن عليها وهى معاك بس قولى( وبغمزة عين)بتحبها
ضحك سامح وقال: تقدرى تقولى عجبتنى شقاوتها خفت دمها حبيت جنونها برتاح وأنا بتكلم معاها يعنى مش مغرم بها بس أنا من أنصار إن الحب بيجى بالعشره والإحترام مابين الزوجين. المهم هروح أخطبها إمتى
سميحه: أصبر أنا هجس نبض أمها وربنا يسهل
فى المستشفى
جلس عرفان جنب إيناس على السرير وهو ماسك إيدها وبيبوسها: حمد لله على سلامتك يا حبيبتي
إيناس بتعب: آه ابنى فين ...جرى له حاجه
عرفان: إرتاحى إنت بس أن شاءالله هيبقى بخير
إيناس: جيبت لك الولد إللى كان نفسك فيه
مسح على شعرها وقال: أنا عايز أمه تبقى معايا ..أنا ماكنتش حاسس بقيمتك إلا لما حسيت انى هخسرك.
إيناس: عايزه اشوفه
عرفان: هو في الحضانه دلوقتي بس ان شاء الله هيبقى بخير ونشوفه كلنا بس قولى يا رب
إيناس: يارب
&&&&&&&&&&&&&&&&&&
دخل عبد العزيز البيت وهو تعبان ومرهق
فقربت منه سميحه وخلعت له الجاكيت: حمد لله على السلامه
عبد العزيز بتعب: الله يسلمك
سميحه : احضر الغداء هو عادل جاى وراك
عبد العزيز: لأ أنا اللى جاى بدرى
سميحه: مالك تعبان!؟ فيك حاجه
عبد العزيز: لأ أنا كويس بس زهقت قلت اروح واقعد معاكى شويه عارف ان النهارده هتخلصى شغل بدرى .
ضحكت سميحه وقالت: رحت اشوف سامح ليكون محتاج حاجه لقيته مرتب الشقه وخليها زى الفل اجدع من اجدع شغاله لأ وطابخ كمان
عبد العزيز: ماشاء الله
سميحه: اهو الواد ده مكنش بيعرف يسلق بيضه قبل ما يسافر
عبد العزيز: الغربه بتعلم الواحد المسؤوليه تعرفى أنا كنت زيه كده بعمل كل حاجه بس بعد ما اتجوزت بقيت اتدلع على مراتى
سميحه بضحك: فكرتنى أنا النهارده عايزه اروح بين أبو محمد ( كريم)
عبد العزيز: ما احنا كده كده بنروح اشمعنا النهارده
سميحه بضحك: أعمل إيه الواد سامح مستعجل بقاله عشر سنين ساكت وفجأة خلاص مش قادر عايز يتجوز ويستقر
عبد العزيز: وطبعا انتى ماصدقتى طب لقيتى له بنت الحلال
سميحه: هو عايز يتجوز ليليان بنت كريم صاحبك
عبد العزيز : بجد طب ليه مش كنتى تعرفينى و كريم ماقلش ليا ولا عشان سامح مش ابنى خلاص ماليش دور في الموضوع
سميحه: أقول إيه ده أنا لسه هجس نبضها يعنى كلام ستات في الاول ولو حصل رضا والبت وافقت نبقى نروح وبعدين أنا عرفتك أهو يعنى لارحت ولاجيت لسه .بس إنت تتوقع أن ليليان ترفض
عبد العزيز: هو ابنك يترفض ده ماشاء الله راجل يملى العين والف واحده تتمناه بس ليليان بنت كريم مخها بيحود شمال يعنى محدش يتوقعها
ضحكت سميحه وقالت: في دى عندك حق
&&&&&&&&&&&&&&&&&&&
فى الشركة
دخل عادل المكتب وهو ماسك شويه اوراق وقال: إيه ده يا ليليان فيه غلطات في كبيرة في الحسابات
ليليان بزهق: إرحمنى بقى أنا على أخرى وبقالى يومين مش عارفه أنام
ضحك عادل وقال: ليه في بيتكم ناموس
ليليان: لأ في بيتنا فار طوله شبر واحد بس ماشاء الله فاتح السرينه ليل ونهار مابيفصلش وطبعا إيناس تعبانه وماما مشغوله معاها فيمن غيرى إللى هيشيل في الفار ده ويحطه غيرى
عادل بروقان: احسن تستاهلى فرحان فيكى وبعدين حد فى الدنيا دى كلها يسمى إبنه عبدالله الأيام دى
ليليان بمسكنه : بودى حبيبى وبعدين عرفان سماه على اسم أبوه وهو حر
عادل: كده طب احسن يارب يجننك كمان وكمان
ليليان: ليه بس ده أنا غلبانه ومسكينه وطيبه خالص
عادل: انتى أعوذ بالله منك وبعدين تستاهلى عشان حركاتك القرعه إللى عملتيها في السبوع بتاعه
ليليان بزهق: يادى النيله كنت عملت ايه بس
عادل بضيق: ولا حاجه بس كنت بقعدك بالعافيه وانتى مابطلتيش رقص
ليليان: الله مش ابن اختى ولازم أوجب معاه
عادل: كده طب اقعدى بقى صلحى كل الأخطاء دى وراجعى لى الاوراق دى كلها دلوقتي
ليليان: حرام عليك يا عادل إيه ده كله .
طب خليها لبكره عشان خاطري والله العظيم مبدعه ومش شايفه قدامى ونفسي انام ساعتين قبل ما يبدأ بيدو في العياط
عادل بابتسامه: تصدقى صعبتى عليا وزكاتا عن صحتى هوصلك كمان
رفعت ليليان إيديها بالدعاء وقالت: ربنا يجعل بيت المحسنين عمار طب يالا بقى عشان أنا خلاص هقع من طولى اهو
عادل: طب يالا يا لأ بس عدى الجمايل
&&&-&&&&&&&&&&&&&&&&
دخل الڤيلا وهو بيصفر فقابله عبد العزيز بابتسامه: شكلها الغزاله رايقه
عادل: يعنى
عبد العزيز: طيب اخلى الخدامين يجهزوا لك الأكل
عادل: ماشي بس ليه الخدامين هى ابله سميحه مش هنا
عبد العزيز : لا دى عند عمك كريم
عادل: غريبه ده احنا كنا هناك من يومين
عبد العزيز بأبتسامه : لا المره دى فيه سبب دى راحه عشان تخطب ليليان لإبنها سامح
بص له عادل بصدمه وقال : نعم بتقول ايه راحت فين وتخطب مين!!!!!إزاى إنت مش عارف ان ليليان دى بتاعتى
عبد العزيز: إيه يا عادل هو انت مش قلت لى إنك مكنتش مقتنع بفكره الخطوبه
عادل بغضب: ده كان في الأول قبل ما اعرفها وأحبها بس دلوقتي لأ
عبد العزيز بصدمه : بتقول بتحبها
عادل بسخرية: ليه هو ماكانش باين من علاقتى بها إننا مرتبطين وبنحب بعض مااخدتش بالك إننا بنقضى طول اليوم مع بعض انى بجيبها من الجامعه واقعد معاها فى الشغل لحد ما بوصلها لحد البيت مااخدتش بالك من ده كله
عبد العزيز بتوهان:أنا كنت يظن انك بتتعامل معاه زى اختك الصغيره
عادل بسخرية وغضب: ليه شفتنى مره واحده عملت كده مع حور اختى .
عبد العزيز: طب ليه سكت ماقلتش..ن
قاطعه عادل : ماقلتش إيه مش قالت إنها عايزه تركز في دراستها وأنا كنت مستنى تخلص وبعدها أتقدم لها لكن أن حد يسبقنى لا حد ياخدها منى لأ
عبد العزيز: طيب أهدى وأنا هتصرف
عادل بغضب: هتعمل ايه يعنى
عبد العزيز: هكلم كريم وبعدين انت قلقان ليه مايمكن ليليان ترفض .مش إنت بتقول انكوا بتحبها بعض يبقى هترفض عشانك
عادل: وأنا مش هستنى يمكن أو مش يمكن أنا هتقدم لها رسمى
عبد العزيز:هو ده ينفع
عادل: وما ينفعش ليه هى مراتك اتقدمت رسمى
عبد العزيز: لأ ده مجرد كلام
عادل: خلاص أنا بقى هتقدم لها رسمى (( واتحرك ناحية الباب))
عبد العزيز: هتعمل ايه يا مجنون اعقل كده سبب الموضوع ده عليا
عادل: هتعمل ايه يعني
عبد العزيز: هطلبها من أبوها وانت عارف انى وكريم أصحاب
عادل: يبقى تتصل بيه دلوقتي وتكلمه دلوقتي
عبد العزيز: طيب اقعد بقى واستريح وأنا هتصل به حالا
&&&&&&&&&&&&&&&&
فى بيت كريم قعد كريم وزوجته ناهد في أوضة النوم
كريم بتفكير: يعنى سميحه جت تطلب ليليان لإبنها سامح وعبد العزيز بيتصل يطلبها لإبنه عادل
ناهد: والاتنين متقدمين في نفس اليوم ونفس الساعه تقولش الاتنين متخانقين ولا بيتسابقوا مين يسبق ويطلبها قبل التانى
كريم: مش مهم مين يسبق المهم هتجوز مين وهتبقى مرتاحه مع مين واحنا هنطمن عليها وهى مع مين ده الكلام الأهم
ناهد: صح وإنت تفضل إنها تتجوز مين
فكر كريم شويه وبعدها قال: مع عادل طبعا على الأقل نعرفه ونعرف أصله وفصله وهتبقى
مع عبد العزيز يعنى هبقى مطمن عليها والأهم أنها هتبقى هنا في مصر يعنى قدام عنينا
ناهد: صح ده أهم حاجه ده أنا أموت لوغابت عن عينى يبقى خلاص تتجوز عادل وخلاص واقول لسميحه مفيش نصيب
كريم: ومن ناحية سامح الواد زى الفل مايتعيبش اخلاقه عاليه وطيب وتربى وسميحه عشرة عمر وهى إللى مربيه البنت يعنى عارفين اخلاقها وتربيتها وسامح ماشاء الله عليه مايتعيبش وغير كده منصب كبير ومستقبله عالى اوى جوه مصر وبره مصر
ناهد: يادى الحيره طب وبعدين هنعمل ايه
كريم: مش عارف والله بس احسن حاجه اقول لليليان وإللى تختاره أنا هوافق عليه
&&&&&&&&&&&&&&&&
بعد اسبوع وقفت ليليان قدام كريم وهى بتقول بصوت هادئ: بابا أنا فكرت كتير وصليت استخاره أكتر من مره وخلاص قررت أنا موافقة اتجوز.........