رواية احببت وانا علي ذمة اخر الفصل الخامس والعشرون 25 بقلم نوسه حمد
في اثناء ما سارحه مع الدنيا الهمها عاوز يقتلني الولد القالو لي المدير واقف وبتكلم معاي وانا م قادره اركز بعد زمن حتي استوعبتا انو واقف وانا في مكان شغل قلت ليهو معليش ووقفت عشان اسلم عليهو حسيت اني بعرفو وبعرفو شديد كمان هو بسلم علي بي استغراب وانا كمان وشيلناها سوا قال لي انتي وانا قلت ليهو انت المدير جا داخل قال لينا بتعرفو بعض ولا شنو انا قعدت اتمتم قلت اقول ليهو شنو هسي الولد طلع ذكي قال ليهو تقريبا شفتها في مناسبه في حلتنا قلت ليهو وانا اقول شفتك وين طوالي اتزكرت الولد اللاقيتو في حله ناس عباس المدير قال لينا يا محاسن الصدف يلا اعرفكم ببعض سريع وجيت اقول ليكم م عندنا زمن وعندنا شغل نهايه سنه لازم ننجز قال ليهو الباشمهندس نسيبه حمد روح الشركه واكتر مهندسه كفاءه وشغلها فوق الممتاز قال لي اتشرفنا يا بوص وبقا يعرف فيني علي الولد اسمو مهيد زول شاذ في دفعتو واشتغل في كم شركه واترفد عشان بحارب الفساد وللاسف اغلبيه الشركات مبنيه علي الفساد يعني بقينا تلاته ضد الفساد انا والمدير ومهيد الولد الجديد المدير قال لي خلال اسبوع عاوزو يعرف كل صغيره وكبيره والايام دي حاسيك م مركزه ممكن تخلي مشاكل البيت هناك وتجينا زوله شغل قلت ليهو بحاول ان شاءالله قال لي لا م تحاولي اتصرفي عديل ما تتاثري لي بالضغوطات والله انا لو اتاثرت بالضغوطات زمان كان الشركه دي انهارت بس انا بحارب ضغوطاتي بي انجازاتي واعمل حاجه بحبها قلت ليهو ان شاء الله المدير طلع وخلا معاي الولد بقيت ادرب فيهو علي الشغل حسيتو نفسو يسالني وانا نهاي م اديتو فرصه زي م قال المدير شغاله معاهو حتي ونسه م بتونس كلامي كلو عن الشغل ومحور الشغل وهو ذكي ذكاء خارق حسيتو انو ح يكون احسن مني ومن المدير بجد ولد استاهل يقولو عليهو مهندس مخو يوزن بلد قال لي عارفه ما كنت مفتكر الاقي مهندس اذكي مني بس انتي كملتي كل فهمي قعدت اضحك قلت ليهو لو قلت ليك انا بيني وبين نفسي قلت انت اذكي مننا قال لي بالعكس والله وانتي بتشرحي لي حسيت انك مبالغه وانا فخور اني اشتغلت معاك وبتمني استفيد منك وتستفيدي مني ويستفيد السودان من علمنا ونكون نافعين وما همنا الراتب قلت ليهو اكيد ان شاء الله
رجعت البيت وكنت نفسيا تعبانه بتي الشغاله معاي قالت لي مالك قلت ليها لا لا مافي حاجه بس زهجانه قالت لي عشان موضوع الطلاق ابتسمتا وقلت ليها عرفتي كيف قالت لي سمعت اخوك واول مره طارق يقطع قلبي كنت زمان بكرهو وبقول انتي واحده بشاكلوك وبفضلو غيرك عليك ولمن ضرب هديه كرهتو شديد بس قبيل حسيتو مكسور قلت ليها والله العظيم انا لو علي موضوع انو اتزوج فيني والقصص دي م عندي مشكله وشفتيني براك كنت راضيه بي اي شي بس يظلمني ويقلل من قيمتي بحد مرق من نفسي وانا الما بقدرني م بقدر اقدرو طارق ما عرف مصلحتو وانا عزرتو لانو قدوتو هي السبب قالت لي كيف قلت ليها امو هي السبب جابت عبله وغصبتو يرجع ليها ومن يوم رجع ليها نحنا المصايب هلت علينا وما كده امو بتكرهني انا وهديه بدون سبب والله لو في سبب نعزرها بس بدون سبب والبتستاهل يكرهوها بتحبها قالت لي ولا يهمك خسرانين هم وانتي الف ولد يتمناك قلت ليها انا بعد فارس ونور م دايره لي راجل طارق طمم بطني والله عاوزه اجتهد في شغلي وانسي التسمم الكان حاصل في حياتي قالت لي لخير ي نوسه
مرت الايام واخوي غصب طارق وشال منو كل القروش الاديتن ليهو وقسيمه طلاقي حسيت انو انزحا مني هم وكنت مبسوطه شديد
بقيت امشي لي هديه لانو طارق بقا في روحو وشبه نسا هديه وكانت مبسوطه وحاولت تقنعني انها تشتغل بس اخوي رفض شديد
مرت الايام وعرفت انو طارق خسر كل شغلو وبقا قاعد من دون شغل وعبله اتطلقت منو وام طارق مضايقه منو لدرجه انو مقعداهو في المظله ورفضت تساعدو لغايه م جات اختو بقت واقفه معاهو اختو جات تترجاني اني ارجع لي طارق بقت تحنس فيني قالت لي عشان نور وفارس وطارق اخوي م يستاهل قلت ليها كنتي وين لمن طارق ماسح بي كرامتنا انا وهديه الارض ليه م قلتي لي امك غلط البتعملي فيهو دا بدل تمش تعمل لي انا الاعمال كانت تمسك طريق ربها دا العمر م معروف بقت خجلانه غلبها الرد حسيت انها م قادره تقعد مع طارق ومن ناحيه تانيه ما قادره تفوت تخليهو قلت ليها الشي الما عارفاهو انتي طارق سلمني ورقه طلاقي خلاص زعلت شديد وقالت لي الحمد لله يا نوسه بس طارق اخوي عين واصابتو من لحظه وقع في الشيطان دي قلت ليها ي داب عرفتوها شيطان بعد دمرت حياتو وحياتنا انتي فكرك انا هسي عاجبني الطلاق انا اتزوجت طارق عن حب وكنت طايره بيهو السماء وكل طلباتو مجابه وانا وهو كنا واحد امك الغيره مسكتها من شافت حبي ليهو مفترض تفرح ليهو لانو دا ولدها ودي حياتو والطبيعي انو يكون بحب مرتو بس امك عاوزه زوجه لي طارق تكون م بتسمع كلامو وما تحس انها بتحبو زي عبله الاكتشفت انها في الاخر ما بتحب طارق وللاسف متزوجاهو عشان مصلحه وبالاماره الشقه المشترياها وراهو هو هو عندو علم بيها ولا عندو علم بي عبله بتطلع وين ليه دايما الراجل بحب البتكون متحرره وبتهرشو والبتكون مثاليه بفتش فتيش للمشاكل معاها انا تجربتي كانت سيئه رغم اني اتزوجتو وكنت فخوره بي حياتي وبيهو نفسي كان اعيش مستقره بس امك كانت عندها نظره تانيه انا م بقول ليك امك هي السبب بس اقسم بالله امك تسعين في الميه هي السبب في كل مشاكلي ونقاشاتي مع طارق وكانت شايفه حبي ليهو خنقه انا كنت ببكي ليها بكا عشان م يخرب حياتنا كنت شايفه انو مستحيل انا وهو نطلق لغايه ما سمم جسمي وكل يوم بديني جرعه لغايه ما وصلت للنهايه وانا الحمد لله رضيانه بي قسمه ربي وبدل تقنعيني انا الاستلمت ورقتي امشي اقنعي عبله واتكلمي معاها لانو في النهايه في بينهم اطفال قالت لي م عارفه اقول شنو ولا ابرر الغلط بشنو نسيبه خليك منك ومن الحصل ليك امي انا لو م بتصداها كان زمان اطلقتا كل ما اجيهم تشتغل لي نظريات في راجلي ونسابتي وبيتي ولبسي واولادي وما حصل شكرت لي شي وفي حين انو انا مبسوطه لدرجه م يعلم بيها الا ربنا راجلي والله شايلني من الارض شيل اي نعم ما عندو شي بس م حصل نومني جيعانه ولا نومني زعلانه واهلو والله الما عندي بجيبو لي هم يعني انتي معاك حق انتي عارفه انا اخر مره لمن اقنعتني وقالت لي خلي راجلك يجي يشتغل هنا والبلد دي فيها شغل وجابتني بليل ونزلنا في بيتك وكنت مفتكره انك فعلا اطلقتي زوجي في الاول اعترض شديد بس شافني انا زعلت وقلت ليهو يلا نجرب حظنا انتي عارفه بعد انتي جيتي والمشكله الحصلت ديك نحنا رجعنا مع امي البيت والله نوم م نومنا راجلي رقد في الجامع اذان الصبح صحاني وسافرنا وحلف علي طلاق تاني ما اسمع كلام امي ولا اجيهم وصراحه ارتحت من نقه امي والحمد لله نحنا ربنا ابتلانا لازم نصبر بس الغلط ما نطاوعها فيهو زي م عمل طارق وانا والله جيت لمن عرفت طارق عيان طارق البفقدني وبشوف حالي ولمن لقيتو مجدوع بره قلبي وجعني طارق البنا ليها البيت طوبه طوبه وميزو ليها لمن احتاج اقعد بره في مظله نار جهنم بس الحمد لله وعلي فكره ي نوسه اهون ليهو يقعد في النار وما يرجع لي عبله تاني واولاد عبله زاتهم ما بلزمونا ديل اصلا لو طلعو اولادو استغفر الله قلت ليها ما لي الدرجه دي قالت لي قلتي عندها شقه راجيه منها شنو قلت ليها عليك الله ما تعملي لي كلام انا والله لساني خزلني وما قصدي شي وعليك الله الكلام دا تنسي هنا ما صاح نشكك في اولادو حرام وربنا بسالنا قالت لي انا م بشكك فيهم بس والله اولادا ما بلزمونا كفايه طارق والحصل ليهو وهديه الهديه الما تستاهل الحصل ليها قلت ليها انا خليني شوفي هديه والعملتو تستاهل ولا كمان الهو ما عارفو عبله اتفقت مع الولد وادتو قروش عشان يقول ليها كلمتين ومن جهه قالت لي طارق اجري هديه بتخونك وامشي شوفها وطارق بدل يفهم الحصل وقع فيها ضرب انا قلت تموت وما كده وبس قال الفي بطنها ما ولدو دا كلام بتقال عليك الله بالذات هديه بت عمك كان تخاف فيها الله وبعدين هديه دي لو قالو ليك خاينه بتصدقي قالت لي ابدا والله بس الحمد لله وخلاص ي نوسه ما تزعلي وحقك علي انا وربنا يحفظك انتي واولادك والله يجمع بي هديه وطارق ح اسوقو معاي البلد ودعتني وفاتت
مرت الايام وعرفت انو طارق ساقتو اختو وما شاء الله بقا كويس وجا يسلم علي نور وفارس وبقا بيني وبينو الاحترام بسلم عليهو وبمشي اول مره جانا فيها قال لي انا اسف وبعتزر ليك عن اي شي حصل مني انتي بت رجال م تستاهلي انا الكنت منحاز زياده عن اللزوم وكل المصايب دي وعيت ليها لمن وقعتا ولخير خلاص انا بقيت افتقر لي اي شي ومبسوط اني رجعت ليك حقك واستحلفتك بالنبي يا نوسه لو عرفتي مكان هديه وريني ياها هي الفضلت لي قلت ليهو طارق انا ما بعرفها قال لي هديه بتحبك شديد متاكد انها ح تجيك انا غلطت في حقها عاوز اعتزر ليها قلت ليهو م معروف احتمال تجيك انت ناسي انها حامل كانت قال لي دا المجنني ياربي هي وين ميته ولا حيه والفي بطنها مات ولا حي كان بتكلم لمن دموعو جرت نور قالت ليهو بابا م تبكي وياريتا ما قالت ليهو كده طارق بقا يبكي بي اعلي صوت كانو ميت لينا زول قلت ليهو طارق ما تعذب نفسك بالبكا والله ما بستاهل قال لي الحمد لله قدر الله وما شاء فعل بس انا كنت السبب قلت ليهو لخير طارق طلع وانا كنت ماشه الشغل قلت ليهو النوصلك حسيتو اتاثر قال لي طيب ركب معاي ووصلتو حدي البيت وامو كانت في الشارع سلام الله م اديتو ليها نزلت طارق ومشيت الشغل اتعوذت منها قلت الله اكفيني شرها وصلت الشغل وكنت ما طبيعيه مهيد قال لي مالك فشنو قلت ليهو لا لا ماف شي اها الجديد شنو قال لي الامور ظابطه وقبل انتي تجي لمن شفتك اتاخرتي اشتغلت شغلي وبديت ليك في شغلك عشان الليله ننتهي قلت ليهو يا ريت انا عندي فكره امشي السعودية قال لي خير قلت ليهو اولادي مأجزين قال لي ماشين لي ابوكم ولا شنو ابتسمت وقلت ليهو بما انك م سالتني تتزكر لامن لاقيتك وقلت ليك مثل معاي انك اخوي عشان طليقي وراي قال لي اي اي متزكر قال لي بس الزول الشفتو داك ما من الحله الجابكم حلتنا شنو قلت ليهو سؤال وجيه بتعرف عباس فضل الله قال لي كيف حق المعرفه عباس دا كنا بنقرا سوا وكان شاطر جدااااا بس بعد اختو اتطلقت ومرضت امو اتوفت وما كمل جامعه جمد قلت ليهو انت جادي قال لي اي جادي معاك انتي بتعرفي من وين وجيتو لشنو قلت ليهو دي قصه طويله طويله شديد قال لي ممكن تحكيها لو مافيها ليك ازعاج قلت ليهو في حاجات خاصه م بقدر احكيها بس ح احكي ليك الشي العامي وبقيت احكي ليهو قال لي طيب انتي جيتي لشنو وطليقك جا لشنو وليه ادسيتي منو قلت ليهو مابقدر احكي اعفيني قال لي تمام يا مديره وطبعا اخت عباس اتوفت قلت ليهو انت جادي قال لي اي والله ضربتا عربيه ليها شهر لانها بتتصرف ساي قلت ليهو شفتها ربنا يرحمها وممكن طلب عاوزه اديك امانه وصلها لي عباس قال لي جداااا انا بكره راجع عندي بنيان بشطب فيهو قلت ليهو تمام واديتو ظرف فيهو قروش قلت ليهو سلمو ليهو وفات
مشيت لي هديه وكلمتها بي طارق قلت ليها طارق قال عاوز يعتزر ليك قالت لي لا يعتزر لي لا بيني وبينو اعتزار اتفاجات بي رده فعلها قالت لي نسيبه انا طيبه واي شي بس لمن اقفل من الزول لو بقا قبله م بقبل عليهو وطارق طالما بسمع كلام النسوان م بنفع معاي الد بهنا وبرجع اهلي بطلق منو وغصبا عنو يديني ورقتي واشوف باقي قرايتي اكملها واربي الفي بطني دا حسيت رده فعلها صارمه وليها حق طارق كان حابسها عشان تموت انا الطلعت هينه وبرضا بي سهوله واخدت درس عمري ما انساهو قالت لي الدكتوره حددت لي العمليه وانا ي نوسه تقلتا عليكم انتي واخوك قلت ليها العفو ي هديه انتي جبرتينا نحنا القلنا ليك وبعدين ما بينا نحنا اخوات قالت لي شاكره ليكم عمري كلو م بنسا انك انقذتيني
مرت الايام وهديه ولدت وكنت مبسوطه وجابت بت برضو قالت لي ح اسميها نسيبه علي بتي الماتت رجعت الشركه ووزعت الحلاوه مهيد قال لي خير قلت ليهو هديه ضرتي ولدت سكت م قال لي حاجه لمن الناس فاتو قال لي نوسه انا عرفت كل شي و ما شفتي عباس شكلو بقا كيف وحكا لي انو سبب في دمار اطيب واحده في الدنيا وحكا لي اي شيء وقال لي انو يوميا بفتش ليها قطع قلبي قلت ليهو ليه لكن قال لي حاسي بالذنب وقال لي انا لو موتا النموت بس م اموت بذنبها قلت ليهو طمنو قول ليهو هديه انا السوقتها من اول يوم وكنت خايفه عليها والحمد لله ولدت وكده كده قالت بعد تلد ح تمشي اهلا قال لي كويس والله
يوم في الشغل مهيد جا داخل ومعاهو عباس ………………..يتبع