بعد ما اتحط خط احمر للأخ عفركوش ميقدرش يخطيه الا وهو التحصين (ايوه اثبت مكانك لتولع وانت واقف) البنت مبقتش بتتحرك من الاوضه تقريبا ومش بتنام غير فيها حتى لو بالنهار وعدى وقت والامور استقرت وهنا بقى اتطمنت البنت وبدأت تتعامل بأريحيه ف بيتها على اساس انه خلاص اختفى من حياتها (متفرحيش اوى كدا ياختى الخازوق قاعدلك مستنى تخرجى)
المهم بعد ما اولادها الكبار ينزلوا المدرسه كانت بتجيب الصغيرين يناموا معاها ف الاوضه عشان مينفعش يكونوا لوحدهم وطبعا بعد ما اتطمنت ان الامن مستتب قالت هروح انام انا معاهم بدل ما اقلقهم
(عفركوش لما لاقاها هتنام ف الاوضه التانى اخيرااااا جاتلى برجلها حسره عليها ياحسره عليها ما جت رجليها ما جت رجليها)
يادوب حطت دماغها ع المخده ولاقت باب الشقه اتفتح واتقفل وفى خيال واقف ف الصاله باين ف باب الاوضه قالت مين وندهت على جوزها تسأله انت رجعت يقوم البجح يرد يقولها لا دا انا يافلانه تعالى عاوزك (ايه يالا الصراحه الى ف امك دى وايه الادب دا بتستأذن تعالى عاوزك عازتك جهنم وادفت بيك يابعيد)
البت قالتله امشى انا مش هروح معاك ف حته وهنا صوته اتغير لصوت حد من قرايبها وقالها تعالى انا فلان يالا نمشى انا عارف انك تعبانه من العيشه دى وعاوزه ترتاحى تعالى معايا وهتبقى مبسوطه برضوا رفضت بدأ يقرب من الاوضه وطل بدماغه من جمب الباب ومادد ايده ليها عشان تقوم معاه بس هى قاومت وبدأت تقرأ قرءان البجح يقولها انسى انتى عارفه انى مش هتأثر وممكن اقرأ معاكى كمان (الشيخ عفركوش المغربى لجلب الحبيب ورد المطلقه بروح امه)
يأست البنت وبدأت تعيط وقالتله مش هسيب ولادى وقامت سحبت العيال واتحمت ف حضنهم وهى بتعيط وتقول من جواها يارب بعد ما لسانها اتلجم ومبقتش عارفه تقرأ قرءان قام سابها ومشى
#كفاية كدا النهارده اشوفكوا ف الحلقه الجايه
عشان نعرف الاخ عفركوش ظهر تانى ف هيئه مين واتبع ايه عشان يقنعها تمشى معاه