رواية احببت وانا علي ذمة اخر الفصل السابع والعشرون 27 بقلم نوسه حمد
#احببت_وانا_علي_ذمه_اخر27
#نوسه_حمد
كنت مبسوطه شديد لحظه التكريم وحسيت انو دي رساله من ربنا انو الجاي كلو خير واتعلمتا انو الانكسار ما حل للمشاكل بالعكس الانجاز هو الحل للخزلان وكنت مبسوطه اني بقيت فخر لي اولادي لو استسلمت لكل الحصل لي وانكسرتا صعب اصل للوصلتا ليهو اخوي هناني وقال لي انتي تستاهلي متفوقه من صغيره وربنا اكرمك والمكانه الادتك ليها الشركه كوني قدرها بزياده م اوصيك وكوني نافعه للبلد ونحنا وراك خلال الحفله اكتشفت انو رامي ورا كل البرنامج دا وهو القام بالاعداد من علي البعد وجاتني تهنيه منو وقال لي تستاهلي ي نوسه بجد انت فخر لينا كلنا وانا اخدت عهد انو اكون وراك لغايه م تصلي للمكان الواقفه فيهو دا انتي ما الانسانه البتنكسر عشان الظروف الظروف مرات بتكون عايق بس حرام تعيق الزيك وكوني بخير اختي وقدوتي نوسه انا بقرا في كلامو العبره خنقتني اتزكرت انو رامي دا حتي في الشركه معرفتي بيهو م كانت كتيره ولجأت ليهو ايام كلام مرت خالد وساعدني وما ساعدني وبس من اول محادثه بينا رجع ثقتي في نفسي الكانت بسبب الفضيحه الالكترونيه ح تتهزا رغم انو اصعب اللحظات دي لا لقيت فيها اخوي لا زوجي لقيت رامي ودا البقولو عليهو الاخ الما ولدتو امك ولا ابوك شكرتو وقلت ليهو م عارفه اقول ليك شنو بس انا عمري م انسا خوتك ولا وقفتك جنبي قال لي تستاهلي يا غاليه وعقبال ما تنورينا في المملكه وما تخافي لو وافقتي مكانك في الشركه ح يكون موجود بس عندنا شغل ف المملكه وعاوزين خبره زيك ان شاءالله سته شهور فكري واستخيري وارجعي لي بي رواقه ويلا اخليك تكملي فرحتك وعلي فكره في هديه لي فارس ح يسلمك ليها مهيد م بنسا لمن قلتي لي انا حامل وكنت تعبانه قلت ليك ح تجيبي ولد وسمي فارس من قبل اشوفو حبيتو قلت ليهو بالغت والله ماف داعي للتعب قال لي لا ماف تعب دي هديه بسيطه من خالو قلت ليهو شكرا ليك كتير ربنا يوفقك ويسهل طريقك ويبارك في كل ايامك هديه قالت لي مشغوله وين قلت حكيت ليها بي رامي قالت لي معقوله في ناس كده قلت ليها موش كده قالت لي ولا عشان انتي طيبه ربنا وقع في طريقك اولاد الحلال قلت ليها الحمد لله ربنا اكرمني رغم انو القلت سبب في سعادتي ما شفت منو غير الخزلان وكسرت النفس والحمد لله عرفت مهيد علي هديه لاحظت ليهو عاين ليها شديد لمن بقينا برانا قال لي دي هديه الكنتو بتحكو عنها اليوم داك قلت ليهو ياها وطبعا يا مهيد هديه حلفت قسم انها م ترجع طارق ولمن انا مشيت اقنعتو وجبتو ليها رفضت وبشده وقالت مستحيل تعيش مع واحد اهين كرامتها قال لي ليها حق ي نوسه راجلك دا اظنو مجنون كيف مرتي اكون عايش معاها وشايف تصرفاتها اصدق فيها سريع ممكن الناس كلها تصدق الا انا قلت ليهو تقول شنو كان اعمي مرتو التانيه بهدلتو وياريتا بقت معاهو فاتت خلتو في عز حوجتو وامو الكان متقوي بيها وشايف كلامها كلو صاح لمن احتاج ليها جدعتو في مظله جنب باب الشارع زي الكلب لغايه ما اختو جات وساقتو معاها قال لي صراحه استاهل دا جزء بسيط من حقكم وكل الضغوطات الكان ليكم سبب فيها ح يلقاها وعمرو ما ح يسعد وانتو ربنا ح يوفقكم لانكم ما اخترتو الفراق ولا الطلاق انجبرتو عليهو قلت ليهو الحمد لله والله نهاي م ندمانه علاقتي بطارق كانت شالاني شلل في شغلي م كنت مركزه اول م قررت انفصل ووصلت معاهو لطريق مسدود سلكت طريق النجاح وزي ما شايف إنجازاتي وصدقني هديه دي اقوي مني ذهنيا وطبعا هي صغيره وقالت ح تطلق وترجع تكمل قرايتها لانها اتعظت من الزواج قال لي نوسه م عارف اجيبا ليك كيف بس انا اعجبت بيها شديد قعدت اضحك قلت ليهو ع فكره هديه دي اتجاه واحد اعجاب والقصص دي ما بتنفع معاها قال لي ولا انا وانا وقت اعجبت بيها اديتا نظره تانيه وفي نظرتي التانيه دي اتخيلتها انها مرتي وعايشه معاي في بيت واحد واعتبرتها دي النظره الشرعيه قلت ليهو مهيد استهدا بالله البت لسه في عصمه الراجل قال لي مستهدي بالله بس انتي اختي ووريتك كلام قلبي وما عشان تقولي ليها لا حكيت عشان افضفض ولو ربنا رجعها لعصمه زوجها ربنا اسعدهم ولو اطلقت انت مستعد انتظرها تتم العده واتزوجها ولا متي م تقبل تكون زوجه انا ح اتزوجها قلت ليهو الله اعلم تتزوج لانو ولدها صغير احتمال طارق يهددا يقول ليها ح اشيلو منك وطبعا هي اهون ليها تعيش كده وما تديهو ولدها قال لي اكيد دا احساس طبيعي ولو وافقت ح اكون ولدي قبل ولدها قلت ليهو كدي نخلي الموضوع دا للزمن وهي جايه علينا ما اتلفت شافا قال لي معناتا استاذن وفات بقيت اعاين لي هديه واتبسم ونفسي اقول ليها بس قلت لا لا كده الله بسالني احتمال ترجع لي راجلها او اهلها يقنعوها ما كمان ابقا سبب في تضليلها
لفت نظري خالد وشكلو جاي علينا لمن وصلنا انا لمن هبطتا بس مسكت نفسي وسلمت عليهو عادي بارك لي قال لي تستحقي التكريم قلت ليهو شكرا ليك كتير وسالتو من والدتو قال لي للاسف امي اتوفت تاني يوم من لحظه كلامي معاك وكان متاثر شديد قلت ليهو معليش والله م كنت عارفه قال لي لو عرفتي م بتقصري ي نوسه سالتو من بناتو والحياه معاهو قال لي الحمد لله بديت حياتي واشتغلت براي واتزوجت قلت ليهو الف الف مبروك قال لي تسلمي ي نوسه وبعد شفت اعلان الاحتفال منشور في الحالات جيت مخصوص عشان اهنيك وابارك ليك واشكرك واقول ليك وقفتك معاي عمري م انساها وجاي ارد ليك حقك قلت ليهو حق شنو مستحيل ي خالد قال لي نوسه امي م احتاجت للعمليه ربنا شال امانتو والقروش بتاعتك دخلت بيهم في مشروع علي اساس انو لو طال الزمن ولا قصر ح الاقيك وارجع ليك حقك وكونو انو سبب انطلاقتي في شغلي الاول قروشك الحولتين لي دي براها بالدنيا وعشان اكون مرتاح ح احول ليك قروشك وجزاك الله الف خير وبتستاهلي الفرح لانو بشبهك قلت ليهو خالد م مشكلة انا عافيه ليك اي شي قال لي واثق من قلبك الابيض بس انا م مرتاح قلت ليهو طيب م مشكلة خليهن مره تانيه لمن تثبت نفسك في شغلك الجديد قال لي الحمد لله ي نوسه رضا من ربنا قلت ليهو بناتك كيفهم قال لي كويسين الحمد لله بس بعد عرفو موت امهم تعبو شديد قلت ليهو شنو شنو مرتك ماتت قال لي اي والله اتوفت في حادث حركه وللاسف ما عرفو وفاتها الا بعد شهرين من موتها قلت ليهو زوجها وين قال لي زوجها الله يسامحو هو سبب تعاطيها الخمره وطلعت شاربه وحصل الحادث علي قول الناس وهو حتي ما عرف ولا جاب ليها خبر لمن اخوها فقدها وسافر ليها عديل وبقا يفتش عليها لغايه ما لقاها في تلاجه الاموات وما كتيره علي ربنا بس كان نفسي تموت موته احسن من دي وتموت وهي تايبه وخاشعه لي ربها بس الحمد لله قسمتها كده قلت ليهو ممكن ما تحكو لي بناتها سبب موتها عشان م ينكسرو قال لي اكيد ي نوسه
خالد اثرني شديد م يستاهل الحصل ليهو بس كلو بيد ربنا خلصنا الاحتفال ورجعنا البيت هديه قالت لي بكره اخوي ح يجي يسوقني قلت ليها خلاص انا بكره باخد اجازه وبجي اقعد معاكم لغايه م تسافري قالت لي م تتعبي نفسك ح اغشا اودعك ونمشي قلت ليها لالا انتي بتك صغيره بجيك انا وصلت البيت وكنت تعبانه مسافه صليت جيت نومتا واول مره ف حياتي احس نفسي نايمه مرتاحه
قبل م انوم رسلت لمهيد رساله قلت ليهو انا بكره م جايه الشغل ح امشي لهديه عشان مسافره لمن صحيت قال لي اخدي راحتك ولو قدرتي تمشي معاها تكوني م قصرتي عشان تطمنيني عليها ورسل لي ضحكه مع الرساله قلت ليهو م جادي ي مهيد يا ولد مستحيل هديه تقبل بيك حتي لو اطلقت قال لي ماف شي بعيد من ربنا وبعدين ما تقولي م جادي انا جادي شديد بس اذا بقت رجعت لي زوجها ربنا يسعدها ويهنيها ولو اطلقت انتي اختي ح تقنعيها لي قلت ليهو خليها ع الله ويلا انا عندي قصص كتيره لو عندي شغل غطيهو لي تمام قال لي معقوله م محتاج اصلا تقولي لي انا ح اقوم باللازم شكرتو وقومتا جهزت وقلت لي بتي الشغاله نمشي بيتكم عشان هديه مسافره ونتصل لي المشرفه عشان تنزل نور هناك قالت لي هديه ح تفرق مع اهلي واختي اتعلقت بيها شديد قلت ليها هي زاتا بتكون مضايقه عشان ح تفوتهم بس كمان م ينفع تقعد اكتر وضعها حساس قالت ل ي فعلا قلت ليها وما ح تنساكم اكيد كل مره ح تجيكم ان شاءالله ونحنا كمان م ح ننقطع منهم
مشينا عملنا الكرامه لي هديه وكانت زعلانه انها ح تمشي وكانت خايفه من رده فعل اخوها بس اخوها لمن شافها بقا حاضنها ويبكي معاها قطع قلبنا كلنا ساعه ماسكها ويبكي لمن فكيناهم من بعض سلمت عليهو وقلت ليهو حمد لله على السلامة وشكرني قال لي انتي بالف راجل قلت ليهو العفو هديه دي اختي ما ضرتي ولا كانت محسساني بي كده ولقيتها لمن احتجتا وافديها بي عمري وان شالله ربنا يوفقها ويسعدها قال لي امين وربنا يوفقك انتي ويعوضك بالاحسن اصلو طارق دا م يستاهل قلت ليهو قسمه واخدناها
يوم كان صعب علينا وعلي هديه بالذات اهل البت الشغاله معاي اتجرسو شديد العشره م ساهله شهور وشهور قلت لي هديه شهر تعالي لي وشهر بجيكم قالت لي تمام وشغلت التلفون الجبتو ليها وقالت لي ح انزل مدرسه طوالي عشان امتحن قلت ليها تمام فكره حلوه ما تخلي الحزن يأثر عليك قالت لي حزن شنو والله يا نوسه انتي مسكينه انا لمن احزن بحزن علي زول قدرني وقيمني بس الزي طارق دا كل م اتزكرو ح ادعي عليهو قلت ليها لا لا عليك الله مهما كان دا ابو بتك والمسامح كريم قالت لي المسامح كريم دا برنامج بزيعو في التليفزيون ماف اي مسامح تاني والحلاك انتي يحلني انا قلت ليها ان شاء الله اخوك اتفاهم مع طارق بالهداوه وان شاء الله تتحلا قالت لي ي رب
مرت الايام وهديه اتصلت علي مبسوطه قالت لي الحمد لله استلمت قسيمتي قلت ليها مبروك وكانت فرحانه شديد وانا كنت متاثره شديد الدنيا دي ماليها امان واصعب حاجه فيها بعد فرحك بقسيمه زواج تصل لمرحله تفرح بقسيمه الطلاق دنيا قاسيه كنت في الشغل لمن بلغتني وكنت سرحانه مهيد قال لي بقينا نحب ولا شنو قلت ليهو مهيد انت ما جادي حب شنو قال لي كيف حب شنو انتي بت صغيره ما عيب لو اتزوجتي تاني قلت ليهو في الحب اخدت نصيبي واتخزلتا وفي الزواج كذالك قال لي والله كلامك دا كلام زول بطنو طامه قلت ليهو فعلا وكان نفسي اتجاوز واتخطا زي هديه قال لي نوسه رغم انك متعلمه بس تسمحي لي اقول ليك انتي ضعيفه قلت ليهو احتمال بس ي مهيد م اوصف ليك انا كنت بحب طارق قدر شنو رسمت حياتي معاهو من اول ارتبطنا فيهو لغايه ما كبرنا وعجزنا وبقينا بي احفادنا بس الله انتقم منها عبله دخلت حياتي وجاطتها قال لي عليك الله انسي وطلعي القصص السيئة دي من راسك وواستغفري قلت ليهو م قادره قال لي غريبه ياخ انتي ربنا يهون قلت ليهو يارب وعشان كده انا عاوزه اشيل اجازه ماشه السعوديه احج واعمر وادعي ربنا يتقل قلبي قال لي فكره والله وانا هنا بشتغل شغلك وشغلي قلت ليهو م بتقصر وعلي فكره ي مهيد هديه هسي كانت بتتكلم معاي ومبسوطه استلمت قسيمه طلاقها قال لي جاده انتي قلت ليهو جد قال لي طيب ما تخدمي اخوك انا والله قاصد خير خلينا نتعرف علي بعض قلت ليهو مهيد استهدا بالله هو ما طوالي كده قال لي لا لا ي نوسه لازم تكلميها قلت ليهو طيب بكلمها وامري لله قال لي بس تمام طلعت مشيت للمدير وكلمتو اني محتاجه ابعد من الشغل شويه وامشي عمره رمضان وبعديها الحج قال لي طوالي والله اخدي راحتك بنتابع معاك بالتلفون وشيلي اللابتوب بتاع الشغل عشان من بعيد تظبطي معاي الشغل قلت ليهو تمام اتصلت كلمت اخوي قال لي كويس والله ربنا يوفقك امشي انتي وانا بلحقك بعد رمضان قلت ليهو كويس واتصلي كلمي طارق عشان ديل اولادو استاذني قلت ليهو تمام
اتصلت عليهو وكلمتو قال لي ديل اولادك وانتي احن عليهم مني وواثق منك ي نوسه اخدي راحتك م تتوقفي في شي ومبروك نجاحك فرحت ليك شديد تستاهلي كل خير الدنيا قلت ليهو تسلم كتير قال لي ممكن اجي يوم اسوق معاي نور اودعها قلت ليهو طوالي
اتصلت علي رامي قلت ليهو انا ح اجي السعودية فرح شديد وقال لي اعتبري الاقامه عندك قلت ليهو انا ما جايه لشغل نفسي اتفرغ للعباده قال لي ومالو ادينا من زمنك بسيط وانا وانتي بنظبط الشغل رايك شنو قدر اقنعني ووافقتا قال لي رسلي لي جوازاتكم بس وابدي جهزي حالك قلت ليهو شبه انا جاهزه وعاوزه اجيب معاي بتي الشغاله قال لي ولا يهمك كلو بخلصو ليك باذن الله قفلت منو ورسلت ليهو الجوازات بتاعتنا
تاني يوم ماشه الشغل لاقتني عبله في وشي لمن خوفتا منها …….يتبع
تفتكرو عبله جات لشنو ؟