رواية كيان والشيطان الفصل السادس 6 بقلم محمد منصور
بسم الله توكلت علي الله. وهو رب العرش العظيم
فتحت باب الاوضة وخرجت من الشالية ومشيت وراء خالتي لغاية شاطئ البحر وهي شاورت بصباعها ناحية راجل كان بيغرق واحدة ست في المية وهي قالت
دة نفس اللي عمله حسن معايا.
ماكنش قدامي غير اني اجري بسرعه ناحية المية علشان انقذ الست دي وقربت وانا في وسط المية شوفت بوضوح الراجل دة بيغرق الست اللي اسمها سميرة والراجل دة اول ما شافني جري بسرعه وهرب وفضلت اندهه باعلي صوت عندي واصرخ يمكن حد يساعدني لكن ما لقتش حد لان منطقة الشاليهات دي كانت تقريبا محدوفة بعيد عن العمار سند سميرة وخرجت بيها من المية وهي كانت تقريبا قاطعه النفس فضلت اعمل الاسعافات الاولية زي ما بشوف في الفيديوهات لغاية ماخرجت المية اللي في بوقها ورجع الهواء تاني يدخل الرئة عندها وهنا لقيت خالتي عفاف واقفة قدام مني وبتقول
دة نفس اللي حصل معايا. لان الراجل اللي كان عايز يغرق سميرة جوزها وبيعمل كدة علشان عايز يتجوز شيرين بنت اختها منيرة. لكن سميرة كان حظها كويس ولقيت اللي يلحقها لكن انا موت.
وقربت مني بسرعه وصرخت في وشي وقالت
وانتي السبب.
بعد عنها وانا مرعوبه وهي مشيت وراحت ناحية البحر وكانت بتقول
الدنيا عبارة عن حكايات وكل حكاية شبه التانية بس ابطال الحكاية هما اللي بيتغيروا لكن هي هي الحكاية. والعراف قال وصدق
وفضلت تكرر الجملة دي اكتر من مرة ونزلت البحر وبدا الموج يضرب فيها وهي داخلة وبتكرر نفس الجملة وهنا سمعت صوت اسلام بيقول
امي حصل لها انطقي
اتفزعت وبصيت لاسلام وقولت
اطمئن هي بخير.
وهنا قالت سميرة بصوت تعبان جدا وطالع بصعوبه
ابوك كان عايز يموتني. لولا كيان اللي يبارك لها في عمرها
اسلام وهو بيقيس لها النبض وبيطمئن علي النفس قال
اطمئن عليكي وبعد كدة يبقي ليا معه حساب تاني
وشالها اسلام وهو بيبص لي وقال
حقك عليه كنت شايفك غلط.
كيان
لا. خالص مافيش حاجة حصلت
اسلام
طيب انتي لازم تخشي دلوقتي الشالية علشان تغيري هدومك وما تبرديش
بصيت للبحر اللي الموج بتاعه بلع خالتي عفاف وفضلت سرحانه وهو مسكني من ايدي وقال
اسمعي الكلام هتبردي من الواقفة هنا. هدومك مبلوله
بصيت لايدة اللي لمستني وهو افتكر اني اضيقت شال ايده وقال بسرعه
اسف لو.،،،،،،
خليته ما يكملش وقولت
لا. خالص. يلا ندخل
وبقيت ماشية ناحية الشالية وانا عيوني علي البحر، ،،،،،،،،
وفي الوقت دة كانت جميلة بتتصل بالموبيل بتاع طارق وطارق ما بيردش عشر مرات علي كدة لكنها ما بطلتش رن لغاية ما رد طارق وقال بعصبية شديدة
اية في اية
جميلة
انت فين
طارق بعصبية
وانتي مالك.
جميلة
لا مالي ونص. انتو ابو بنتي وعشره عمري ومش هاسيبك تقتل حسن
اتصدم طارق ووقف بالعربية اللي كان سايقها وقال
انتي عرفتي منين. هدير قالت لك صح. ما انتم مع بعض
جميلة
انت تصدق اني اتفق مع اي حد عليك. دة حتي لما طلقتني علشان تتجوز عيلة في ثانوي ما قدرتش اكرهك
طارق
اومال عرفتي ازاي
جميلة
انا وصلت للعراف وبعديها عفاف كلمتني. وهي اللي قالت لي ماتخليش طارق يقتل حسن. ودة تقريبا نفس اللي قاله العراف في رساله ليك. ولو مش مصدقني تقدر تفتح موبيلك وتشوف الرساله اللي جت لك علي الجيميل بتاعك
طارق
وانتي عرفتي ازاي اني جت لي رساله
جميلة
انت كنت سايب اللاب بتاعك مفتوح
استغرب طارق وقال
انا. حصل ازاي دة.
جميلة
مش دة المهم افتح واقراء رساله العراف وقابلني علشان احنا الاثنين محتاجين لبعض
وتنهي جميلة المكالمة ويفتح طارق النت ويشوف الرساله اللي بتقول عليها جميلة وهي
★ سر وراء سر وفي اخر الاسرار حقيقة هتقلب حياتك جحيم اتقبل الحقيقة مهما كانت واوعي الدم★
طارق
عرفت السر اللي فعلا هيقلب حياتي جحيم وهو ان بنتي ما كنتش بنت بنوت. واللي سرق شرفها الكلب اللي اسمه حسن
ويدور العربية مرة تانية وينطلق بيها، ،،،،،،،،،
ومن جوة الشالية وانا قاعدة في اوضة اسلام ولابسة تيشرت وبنطلون من هدوم اسلام بعد ما غيرت هدومي اللي اتبلت دخل عليه اسلام بعد ما خبط علي الباب وكان معه طبق شوربة خضار وقرب مني بالطبق وقعد قدام مني وهو بيقول
7 سنين في طب علشان في الاخر اقف في مطبخ واعمل شوربة خضار
ابتسمت لاني ما بقتش عارفة للضحكة طريق وقولت
تعبناك
اسلام وهو بيحط المعلقة في شوربة الخضار وبيطلع بيها مليانه ورايح بيها ناحية بوقي
بعد اللي عملتي مع امي. لو اطول اقدم لك عمري كله مش قليل
بصيت له باستغراب وبصيت للمعلقة اللي في ايدة ورايحة ناحية بوقي وخد من ايدة المعلقة وقولت
شكرا. بس انا بعرف اكل لوحدي.
اتحرج وقام وهو بيقول
طيب اسيبك تاكلي. وبعدها لازم ترتاحي
حسيت اني كنت قليلة الذوق معه فقولت له
مش عايزاك تزعل بس انا ما توعدش اني حد يحط لي الاكل في بوقي
ابتسم وقال
انا اتكبست واللي حصل حصل
وفتح الباب ولقيت نفسي وقتها بقول
هو انت مش قولت هتبات عند صاحبك. اية اللي رجعك تاني
وقف اسلام عند الباب وكانه ماكنش مستني السؤال دة لكنه بص لي وقال
في حد اتصل بيا وقالي الحق امك
كيان
واحدة اللي كلمتك صح.
اسلام
صح. بس انتي عرفتي ازاي
كيان
اصلها هي برضو اللي جت وخبطت علي شباك اوضك وبسببها لحقت مامتك. وكمان عرفت باباك عايزا يقتل مامتك لية
استغرب اسلام وبص لي وانا بكمل واقول
علشان شيرين بنت خالتك منيرة
بعد ماكان اسلام خارج رجع ووقف قدام مني بالظبط وقال
مين الست دي وعرفت حكاية امي ازاي.
كيان
دي تبقي خالتي اللي قتلها جوزها في ايطاليا. وقتلها بنفس الطريقة اللي كان عايزا باباك يقتل بيها مامتك. علشان ينفع يتجوز شيرين
اسلام
يعني اللي كلمتني شبح لقتيلة
كيان
كنت من كام ساعه اقدر اقول ان خالتي عايشة وبتنتقم مني علشان حبي لحسن جوزها وماضحكش عليك انا كنت شاكة ان سميرة مامتك هي خالتي. بس عايزا تجنني لكني شوفت خالتي وشوفت مامتك سميرة في نفس الوقت واحدة انقذتها والتانية دخلت وسط البحر واختفت.
وتتنهد كيان وتكمل وتقول
تفسر كل دة باية
اسلام
اي تفسير تاني غير ان في اشباح في 2022
كيان
ما بقتش عارفة اقول لك انت صح ولا انا اللي صح. حل السؤال دة عند حسن. هو فعلا قتل خالتي ولا. لا. ولو ماتت في حادثة عادية لية ماجبش جثتها مصر ودفنها هنا
ولو خالتي عايشة لية بتعمل فينا كل دة. متقول انها عايشة من غير ما تجنني
ومسكت دماغي اللي الصداع اتملك منها ووقعت المعلقة من ايدي ومابقتش قادرة فحس اسلام بيا وخد المعلقة من علي الصنية وقال
واضح ان ضغطك بيعلي ممكن تاكلي علشان اديكي علاج يظبط ضغطك
فتعيط كيان بحرقة وتقول
يارب اموت وارتاح. بدل العذاب اللي انا في دة اخرتها اية بس. انا مابقتش قادرة والله ما بقيت قادرة. بنت عشرين سنه وشايلة هم واحدة في اواخر عمرها.
وصرخت باعلي صوت عندي وقولت
يا خالتي لو عايشة وعايزا حقك مني خدي. دلوقتي اظهري واقتليني وريحيني من العذاب والغم دة. ولو علي الحب اللي كبر في قلبي وهو حرام. مش عايزا طالما اخرة الحب دة نهايتي. مابقتش عايزة اي حاجة من الدنيا دي الا اني ارجع كيان اللي اعرفها مش كيان اللي انتم عايزين تجننوها
وبدأ اسلام يهدي فيا وانا منهارة من العياط ودموع الندم نازله علي خدي ازاي اخون خالتي في جوزها ازاي وقال اسلام
اللي انتي بتعملي دة غلط عليكي. اهدئي بالله عليكي تهدي. وساعديني وكلي علشان اقدر اديكي اي علاج.
ورجع وحط المعلقة تاني في الشوربة وطلع بيها مليانه وراح بيها ناحية بوقي وانا ببص له وهو بيبص لي. وبيقول
كلي علشان خاطر كيان مش علشان خاطري انا
قولت
كيان دي واحدة زباله
اسلام
كلنا بنغلط وانتي غلطي وعرفتي غلطك. ووعد مني هساعدك لغاية ما توصلي للحقيقة ومعاكي هنعرف خالتك لسة عايشة ولا ماتت. بس انتي كلي
وبقي اسلام قدام مني بالظبط بايد ماسكة المعلقة وقدام بوقي وبالايد التانية بيمسح دموع عينية ولقيت نفسي بفتح بوقي وهو دخل معلقة الشوربة في بوقي وانا ببص له ولاول مرة اشوف انعكاس صورتي في عيون حد تاني غير حسن وحبيت صورتي في عيونه،،،،،،،
وفي نفس الليلة كان طارق وحسن وجميلة قاعدين في شقة طارق وحسن بيقول
والله العظيم ما قتلتها ولا قربت ناحية بنتك كيان ولو لمست شعره منها الا لما بقيت مراتي. انت لية مش عايز تفهم ان في حد بيلعب بينا كلنا.
جميلة
اومال العراف قال في نبؤة لي اتقتلت واندفنت برة و،،،،،،،،
حسن مقاطعه لها
كذب والله العظيم كذب. والعراف دة سبب كل المصايب اللي بتحصل لنا من يوم ما حكي لي عنه طارق جوزك
طارق
العراف دة عنده. 5 مليون متابع من مصر بس. دة غير باقي الدول العربية. ومافيش اي نبؤة لي بتبقي كذب
حسن
لية هو نبي انزل دة مجرد نصاب ودجال بيلعب بعقول اللي زيك. مع انك متعلم بس جاهل
طارق
انا مش جاهل واكتر من مرة نبؤة العراف بتبقي ليا صدق وديما بتتحقق
حسن
كذب المنجمون ولو صدقوا.
طارق
انت بتجادل في الباطل دة قبل ما اعرف ان بنتك بنت بنوت بعت لي الرساله اللي بيقول فيها، ،،،،،،
فيقاطعه حسن تاني
قرتها وحفظتها. سر وراء سر وريحة الدم في هدومة كل دة كذب في كذب. والله العظيم تاني بنتك كيان لما دخلت عليها كانت بنت بنوت. يا طارق ما يصحش تشك فيا كدة دة انت صديق عمري. واكتر واحد تعرفني
ويتنهد حسن ويقول
العراف دة ماهو الا دجال بس بدل البخور والسبحة الخضراء والاوضة الظلمة. بقي دجل الكتروني عن طريق النت. دجل بشياكة شوية مش اكتر
جميلة
دجال ازاي بس وبيعرف اللي هيحصل لينا قبل ما يحصل انا بنفسي بعت لي رساله وقالي اختك هتتصل بيكي وفعلا اتصلت
حسن
ماعرفش. بس مستحيل ايماني يضيع بسبب التخاريف دي. وارجع واقول لك تاني انا ما دفنتش عفاف ومستعد اثبت لكم كلكم
جميلة
هتعمل اية يعني
حسن
هنسافر ايطاليا واخليكم بنفسكم تشوفو عفاف وهي متجمدة
فيبص طارق لجميلة ويكمل حسن قائلا
بس بعد ما تشوفو عفاف وحد منكم تاني يقولي العراف قال هيبقي ليا معه تصرف تاني خالص
جميلة
طالما هنسافر ايطاليا. جثة عفاف هترجع معانا وندفنها هنا وسط اهلها
حسن
ماعنديش مانع طالما دة هيريحكم
طارق
وهدير تيجي معانا ونعرف ازاي عفاف ماتت علشان تقول لنا علي عنوان كيان
حسن
كيان. انا مش عارف هي كمان راحت فين. ما هي اصلا الحكاية نقصها،،،،،،،،،
وبعدها بيوم كنت نايمة علي سرير اسلام وبتسلي في قرائة الاوراق بتاعته وعرفت اسمه الثلاثي وهو
اسلام ابو المجد عاطف. دكتور في التشريح ودرس برة مصر في دول كتير معظمها في اوروبا ومتصور صور كتير في اماكن كتير استغربت ازاي حالتهم المادية من حاله الشالية تبان ان متوسطة. وقدر يلف معظم الدول دي لكن مش مهم انا وسط كل اللي انا في دة حبيت اعرف عنه كل اللي اقدر عليه واحلي حاجة في انه فنان بيكتب شعر. وخواطر
★عيشت كتير انا وقلبي احلم باللي يمتلك قلبي ولما شوفتك انتي لقيت في عيونك انتي كل اللي حلمت بي ،
عيشت كتير ارسم في صورتك من خيالي ومهما ارسم واتخيل طلعتي انتي فوق الوصف اللي في خيالي★
وماطلعنيش من حالة الانسجام دي الا صوت خبط علي باب الاوضة واسلام بيقول
الفطار جاهز
وخرجت وقعد علي السفرة مع سميرة واسلام واسلام كان بيقول لسميرة
كيان ما رضيتش تروح بعد ما عرفت انك لسه عندك مية علي الرئة بسبب اللي عمله ابويا. ليلتها. ربنا ياخده ويريحنا منه. سابنا له البلد كلها وجينا نعيش وسط البحر بعيد عنه وبرضة ورانا ورانا
فتكح سميرة وتقول
مش هرب الجبان بعد اللي كان عايز يعمله فيا.
اسلام
هرب بس انا عملت له محضر مظبوط وهيتجاب يعني هيتجاب.
كيان
ربنا ينصركم علي الظالم
سميرة
بس كيان يا بنتي. انتي لازم تروحي علشان زمان اهلك قالبين الدنيا عليكي
كيان
ارجع لمين بس وانا ما عرفتش انام الا وانا هنا وسطيكم
سميرة
برضو ما يصحش انتي مالكيش الا بيت اهلك وجوزك
كيان
باين عليكي زهقتي مني
سميرة
انا. والله ابدا. ربنا وحدة اللي يعلم انا حبيتك قد اية. بس الصح هو اللي انا بقول لك عليه
كيان
حاضر. هطمئن عليكي وامشي
وخلصت فطاري وقومت وخرجت برة وقعد قدام الشالية وبعدها بشوية خرج ورايا اسلام وقعد جنب مني وبص لي وابتسم وقال
اوعي تكوني زعلتي من امي
كيان
لا خالص. بس هي مش قادرة تحس قد اية انا مرتاحة هنا عندكم وحاسة اني بخير
اسلام
لا. قولي بقي ان اكلي وسريري مش هتلاقيهم في اي مكان تاني
ابتسمت وقولت
ياريت الراحة في النومه والاكل وبس ما كنش بي في مشكلة.
اسلام
اومال الراحة فين عند حسن
كيان
طول عمري كنت فاكرة كدة لكني دلوقتي اتاكد اني غلط وان ساعات كتير بيبقي في حب سبب موت صاحبه وفي حب يخليك تعيش مهما تعيش تحس انك انت في نفس السن اللي بدات في تحب حبيبك
اسلام
يعني افهم من كدة اني لوحبيت واحدة وانا عندي 25 سنه. طول ما انا بحبها. احس ان عندي 25 سنه
كيان
يعني حاجة شبه كدة. ودة اللي كنت بحسه ديما مع حسن اني طفلة وهو ابويا وجوزي وحبيبي وصاحبي اللي كبرت بي وقدامه.
واتنهد وقولت
بس تعرف اني لو رجع بيا الزمن ما كنتش هحب حسن وكنت ديما هشوفه زي بابا وبس. وهعمل بنصيحة صاحبتي الوحيدة سوسن وافتح شبابيك قلبي لحب ما مايكنش السبب في موتي
وبصيت لاسلام وقلبي بدأ يدق الدقة اياها واسلام حس واتنحنح وقال
انا هخش جوة بقي علشان اعمل لينا اثنين شاي عنب
ضحكت وقولت
في دكتور يقول شاي عنب
اسلام
انا وعادي يعني، ،،،،،،،،،،،،
ومن ايطاليا وبالتحديد قدام مركز الابحاث اللي في جثة عفاف يقف طارق وحسن وجميلة وهدير ويقول طارق
هو دة المركز
يقول حسن
هو.
ودخلو الاربعه للمركز وبدأ حسن يتكلم ايطالي مع دكتور باين عليه انه يعرفو كويس وانفعل حسن وراح بسرعه ناحية اوضة من الاوض الازاز واللي جوة منها توابيت من تلج لكنها توابيت شفافة مبينه جثث اللي جوة التابوت ووقف وهو هيتجنن فبص له طارق وقال
في اية يا حسن
حسن
جثة عفاف اتسرقت من التابوت
انصدموا كلهم وقالت جميلة
بتقول اية. ومين بس عمل كدة
حسن
دكتور مصري كان بيعمل ابحاث هنا
طارق
واسمه اية الدكتور دة
حسن
اسلام ابو المجد عاطف،،،،،،،،،،،،