رواية جريمة كفر شكر الفصل السابع 7 بقلم محمد منصور

والله قلبك جابك تهدد امي وانا لسة حي يا كلب السكك

اتصدم سليمان و بص وراء منه وشاف الظابط ممدوح اللي قال

مش دة برضو اللي قالو ليك يونس في يوم الخناقه اياها،،،،،،

جريمة كفر شكر

اقتباس وكتابه 

محمد منصور 

**منص**

وقبل ما نبدأ نوحد الله ونصلي علي خير خلق الله سيدنا محمد   

صلاة تحل بيها العقد وتفك بيها الكرب

ونرجع بالاحداث لكام شهر وراء وقت ما كان سليمان في بيت يونس وقاعد قصاد منه وبيقول له

انت عارف ان شفيقة  خطيبتي ازاي تروح تخطبها

يونس

بقول اية يا سليمان انا لسة راجع من الشغل ورغي كتير انا مش حابب وانت عارف وانا عارف ان انت روحت 

ل شفيقة بعد مني وهي رفضتك اصل الجواز مش بالعافية ولا اية يا ابن شيخ البلد

مسكو سليمان من اللايقة وقال

لا بالعافية وبلاش تتحداني يا يونس

هنا ام يونس فتحت باب البيت وصرخت باعلي صوتها وقالت

الحقونا يا ناس سليمان ابن شيخ البلد جاي لغاية عندنا وعايز يضرب ابني

سليمان ساب يونس وراح 

ل امه وقال لها

اية اللي انتي بتعملي دة يا مراة

ام يونس قصاد كل اهل الكفر

قالت

اومال اسيبك تضرب ابني واسكت

يونس

لسة يا اما ما اتخلقش اللي يضربني

سليمان بص ل يونس

لا اتخلق وواقف قصاد منك و هيضربك

ام يونس مسكت سليمان من عبايته وقالت

طيب فكر تضربه كدة وانا اقطع لك ايدك

سليمان شال ايد ام يونس بعيد عنه وقال

اللي هتنقطع ايدها انتي يا مراة يا غلاطه وبكرة اوريكي

يونس

والله قلبك جابك تهدد امي وانا لسة حي يا كلب السكك

سليمان بعصبيه

انا كلب يا ابن ستين كلب

يونس سمع شتيمه ابوه بودانه وما سماش علي سليمان وضربه علقه موت قصاد اهل الكفر كلهم،،،،،،،،

ونرجع للظابط ممدوح اللي قال ل سليمان

معلش بقي لو فكرتك بالعلقة اللي خدها علي ايد يونس

سليمان

الكلام ملهوش لزمة انا ماشي

و اتحرك سليمان لكن ممدوح مسك ايدة وقال

استني بس مش لما اعرف كنت بتهدد ام يونس لية

وبص ممدوح ل ام يونس وقال

عرفت انك سالتي عليه وعلشان كدة جيت لك بنفسي وسمعته بيهددك

سليمان

اهدد مين بس يا بيه دي زي امي

ممدوح

انا ما وجهتش ليك كلام فالاحسن تسكت

ورجع بص ل ام يونس وقال

كان بيهددك ليه قولي ما تخافيش من حد 

ام يونس بصت ل سليمان بقرف وقالت

المراة اللي زي يوم ما تخاف تخاف من راجل مش مراة زيها جايه تتشطر علي مراة عايشه لوحدها 

سليمان بدا يغل وام يونس بتحكي للظابط ممدوح عن ارض الخواجة واللي كانت فيها شفيقة و يونس وخلصت ام يونس كلامها وقال الظابط ل سليمان

دة كدة الموضوع محتاج قاعده و مافيش احلي من القاعده عندي في المكتب

وبدا ممدوح يسحب سليمان ناحيه البوكس اللي هو جاي بي وركب سليمان البوكس واتحرك بي ممدوح،،،،،،،،،

ومن جوة بيت ولاد ابو غالي كان صقر متعصب وقال 

ل اخوه معتز اللي كان واقف قصاد منه  

يعني الجواب اتفتح انا طول عمري اعرف ان بيومي دة خاين للامانه لكن اول مرة اعرف انه غبي  

معتز

قبل اذان العصر يكون راقد قصاد منك جثه

صقر

لا  مش لما اعرف الاول هو حكي مع مين مش ممكن يكون عرف حد الجواب مكتوب في اية

معتز

صح طيب انت شايف ايه

صقر

اروح له واسمع منه و لما اتاكد ان ما رغاش مع حد هقطع لسانه وبعدها هدفنه حي،،،،،،،،،،،

ونروح لبيت عبد الهادي 

و عرفه العسكري واقف بيخبط علي باب البيت وعبد الهادي ابوه شفيقة فتح له وبص له العسكري وقال

حضرة الظابط عايز شفيقة

عبد الهادي اتخض وقال

لية يا عرفه يا ابني 

عرفه العسكري 

والله يا عم عبد الهادي انا سمعت طراطيش كلام عن ان بنتك كانت مع يونس قبل ما يختفي في ارض الخواجة 

عبد الهادي اتصدم

ارض الخواجة المهجورة وكانت مع بتعمل اية

عرفه

ما اعرفش هو دة اللي انا سمعته  ودلوقتي بقي اندهه لها خليني ارجع بيها علي المركز 

عبد الهادي 

طيب روح انت وانا هاجبها وجاي وراك

عرفه

مش هينفع يا عم عبد الهادي لازم تيجي معايا

عبد الهادي

ما ينفعش تجر بنتي من بيتي لغايه المركز الناس هتقول اية اعمل حساب للعشرة دة احنا كلنا ولاد كفر واحد

عرفه فكر ل كام ثانيه وقال 

طيب انا هامشي و استناك قبل المركز بكيلو وانت هدها وانا برضو هدخل بيها المركز

عبد الهادي

طيب يا ابني

ومشي عرفه وعبد الهادي فتح باب اوضه بنته لقاها فاضيه وشباك الاوضة مفتوح جري بسرعه ناحيه الشباك وبص ناحيه الارض اللي ظهر البيت لقي شفيقة بتجري باقصي سرعه ندهه وقال باعلي صوته

شفيقه رايحه فين،،،،،،،،،

ونروح لبيت صبيحه صاحبه شفيقة اللي كانت رايحه ناحيه الباب بسرعه بسبب الخبط اللي كان علي الباب وفتحت ولقيت عبد الهادي قصاد منها وبينهج فقالت

عم عبد الهادي خير في اية

زقها عبد الهادي بعيد عنها وقال

فين شفيقة

صبيحه

ما شوفتهاش النهارده

عبد الهادي بياخد نفسه بصعوبه لكنه قال

يا بنتي ما توجعيش قلبي عليها اكتر ما هو موجوع فين شفيقة

صبيحه

والله العظيم ما جت هنا

عبد الهادي رمي جسمه عند اقرب كرسي وقال

اومال بس هتكون راحت فين دة انا قلبت عليها الكفر، ،،،،،،،،

في نفس الوقت دة ومع اذان المغرب كانت شفيقة جوة زريبه مستخبية وسط البهائم

وقت ما دخل عليها رفعت ابن عمها وكان مع صنيه اكل وبيقول

شفيقة ما تخافيش انا رفعت

ظهرت له شفيقه وهو قعد قصاد منها وقال

مش عايزك تبقي مرعوبه كدة وشك اصفر

شفيقة

هو انت جبلا  بقول لك سمعت بوداني عرفه العسكري بيقول ان الظابط ممدوح عرف اني كنت في ارض الخواجة مع يونس قبل ما يختفي

رفعت 

جبلا الله يسامحك يا بنت عمي بس انا عاذرك وعارف انك مخضوضه من كل اللي حصل بس اقول اية لو كنتي وافقتي عليه من الاول ما كانش حصل اللي حصل دة 

شفيقة

رفعت وحياة حبيبك النبي انا فيا اللي مكفيني مش ناقصة كمان كلامك وقولي هتعرف تهربني من الكفر ولا لا

رفعت

ههربك طبعا بس في الاول نتجوز

شفيقة

بتصطاد في الميه العكرة

رفعت

ما انا يا بنت عمي مش هفضل اساعدك ببلاش لازم يكون في مقابل

شفيقة

وان قولت لك اني كرهت الجواز

رفعت

هتحبي معايا يا شفيقة انا عايزك 

شفيقة لطمت وقالت

وانا ما بقتش عايزا حد  وعايزا ابعد عن الكفر وكل اللي في  بس لما اخد بقيت حقي

رفعت اتصدم وقال

بقيت حقك من مين

شفيقة

من اللي كانت السبب في اني اقتل يونس

رفعت لسه مش فاهم وقال

هي مين دي

شفيقة

سميه بنت الحج صالح

رفعت

انتي كدة اتجننتي رسمي ولا تكوني حبيتي طريق الدم

شفيقة

يعني تكون السبب في اني اقتل يونس و اسيبها تعيش حياتها

رفعت

ايوة سيبيها و سيبي الكفر كله و نتجوز و نخلف صبيان وبنات

شفيقة

عايز تتجوزني يبقي مهري رقبه سميه

رفعت

الله يخرب بيتك انتي اية قلب من غير عقل

شفيقة

دة اللي عندي ولو خايف دخلني بيتها وانا اخنقها بايدي

رفعت بص لها وسكت،،،،،،،،

و تاني يوم الصبح ومن جوة بيت الحج صالح  كانت مراته بتنادي علي سميه اللي ماكنتش بترد والحج صالح قال ل مراته

هي بنتك نايمه دة كله معقوله

ام سميه

انا عارفه في اية لما اقوم اشوفها ما بتردتش ليه

وقامت ام سميه وراحت ناحيه باب اوضة بنتها وفتحت الباب وشافت،،،،،،،،

الباب بيخبط هقوم اشوف مين وارجع لكم ولو ما رجعتش يبقي بكرة باذن الله اقول لكم شافت اية   ولا تقولو انتو عقبال ما افتح انا الباب

ايوة ياللي بتخبط جاي اهو

                الفصل الثامن من هنا