رواية احببت وانا علي ذمة اخر الفصل السابع عشر 17 بقلم نوسه حمد
طارق بقا ساندني وانا حاولت جاهده احرك رجولي بس حاسه بي خدر قلت ليهو طارق انا م قادره خليني اقعد قال لي لا لا ي نوسه كدي استهدي بالله حاولي اتحركي وبقا يحرك لي في رجلي ويقول لي حركيها قلت ليهو والدمعه في عيني طارق انا م مني م قادره والحمد لله ع ما اراد الله قعدني في السرير ودموعو جرت قال لي نوسه لا لا م تقولي كده استهدي بالله انتي مافيك حاجه انتي كويسه واتصل علي اخوي وقال ليهو تعال نوسه م قادره تتحرك اخوي خمسه دقايق جا بقا ملهوف علي ويحنس فيني اقوم قلت ليهو م مني والله م قادره شالني ومشا بي الدكتور وكان خايف علي وبقول لي نوسه اتشجعي اسندي نفسك لا عندك اخت لا ام عشان تسندك طارق قال ليهو انا اختها وانا امها وان شالله ما تحتاج للبسندها والدكتور يطمنا
دخلنا ع الدكتور وكتب لينا صوره ووكتب لي حبوب قال م علاج بس فايتمينات لمن نتيجه الصوره تظهر طارق واخوي مقلقين ومتجرسين اكتر مني انا ربنا نزل لي سكينه وطمأنينه حمدت الله علي الجاني وربنا يصبرني والحاجه المأثراني بتي محتاجه لي والحمل وكلمنا الدكتور اني حامل دخلنا بالنتيجه للدكتور قال للاسف جلطه وطالما بتكلم وما جاتني في الراس ح تتعالج طمنا شديد واداني العلاجات وجابو لي كرسي متحرك 🦽 احساس اصعب من صعب والاصعب من الاحساس العندي الرافه الشفتها في عيون اخوي وطارق وما قادرين يصبرو يمشو ويجو يبكو علي كنت شايله هم لنور بتي لمن تشوفني في الكرسي المتحرك هي الوحيده الما ح استحمل نظرت شفقتها لي بدل اشفق عليها انا تشفق علي هي رجعنا البيت طارق اتصل علي هديه قال ليها تعالي وجيبي الاولاد هديه لمن جات وشافتني في الكرسي بكت علي باعلي صوت وبقت ماسكاني وتبكي طارق قال ليها هديه ما تتعبيها خلاص وزحاها مني اتجرست اكتر منهم والقطع قلبي نور واقفه جنبي وتقول لي امي قومي امي م تقعدي في الكرسي دا الكرسي دا كعب جدو كان بقعد فيهو ومات طارق قال ليها نور دا كلام شنو امك تعبانه شويه وح تقوم ان شالله انتي فالحه تعالي قالت ليهو لا لا امي م ح تقوم جدو م قام قلت ليها نور حبيبتي انا ح اقوم باذن الله انا عندي رساله ما تميتا لازم اقوم واسندك وبقت تقول لي قومي هسي وتبكي طارق شالني وختاني ف السرير نور قالت لي اي بس تاني م تقعدي فيهو ورقدت في حضني وكنت سامعه دقات قلبها وقلبي انقسم النص م نفسي قلبها انقطع بسببي قلت ليها نور حبيبتي انا كويسه بس عشان انا حامل لازم اقعد في الكرسي دا اول م الد ح اقوم منو قالت لي هديه حامل وما قاعده في كرسي زي حق جدو قلت ليها نور حبيبتي زول لي زول بختلف وجسم زول لي زول بختلف ودي اراده ربنا وامتحان لازم انا اصبر عليهو وانتي ح تساعديني لانك بتي الفالحه قالت لي سمح يا ماما ونامت نوم عميق الشي القاطع قلبي اني ما ح اركع ولا اسجد وح اصلي في الكرسي احساس صعب شديد بس الحمد لله ع كل حال هديه قالت لي م تشيلي هم انا بطبخ ليك وبغسل ليكم وبجي كل مره ازورك وانظف ليك وطارق عافيه ليهو يقعد معاك لانو ما عندك سند غيرو اتزكرت لمن كنت منفصله منو وعايشه براي حمدت الله مرت خالد نزلت المنشور ورجعت لي طارق بسببو والا كان اكون هسي مجدوعه براي بس الحمد لله وعسي انا تكرهو شيئا وهو خيرا لكم انا زعلت من الفضيحه بس كانت سبب في رجوعي لطارق الدنيا دي م عندها امان ممكن بين يوم وليله يحصل لي اي زول نفس الحصل لي بدون انزار كل الكوارث الحصلت لي قربتني من ربنا شديد ورضيت بي قسمتي خير ولا شر والحمد لله.
هديه م قصرت مني واخوي وطارق واقفين لي قلت خسران الما عندو سند اول يوم وانا مشلوله اصعب يوم في حياتي بس كان ايماني قوي انو الحاصل لي خير كبير ولازم استحمل واتقبلو طارق بقا قاعد حارسني قلت ليهو طارق بترجال عاوزه منك طلب بس م تحرجني قال لي م تطلبي انتي تأمري قلت ليهو م عاش ولا كان البأمرك ممكن يا طارق تسمع كلامي للنهايه وما تقاطعني قال لي احكي قلت ليهو طارق زي م انت شايف الحال الانا فيها احتمال اقوم منها واحتمال لا قال لي نوسه اسكتي عليك الله اسكتي قلت ليهو طارق ممكن تفهمني وما تتجرس طمني بس م تتجرس قال لي نوسه م قادر الله لا وراك الاحساس العندي م قادر اصبر انتي م تستاهلي الحصل ليك قلت ليهو طارق استغفر دا قدر لازم نستحمل وعليك الله خليني اتكلم عشان انا نفسيا تعبانه وبقيت ابكي لا شعوريا قال لي نوسه ممكن م تبكي لو بي ايدي اديك عمري وانتي تبقي كويسه اي نعم انا اتزوجت غيرك اتنين بس عمري م حسيت احساس امان مع اي واحده الا معاك ما قاعد احس انك زوجه ي نوسه قاعد احسك امي القست علي وما احتوتني في حياتا ولا حسستني بالأمان بس هي امي لازم استحمل وربنا عوضني بيك وعوضتيني عن اي احساس كنت فاقدو ورغم دا ظلمتك قلت ليهو طارق انا عافيه ليك اي شي وعليك الله اسكت انا لازم اتكلم وتسمعني ولو بتحبني فعلا اعمل كلامي قال لي شنو قلت ليهو انا عندي دهب اشتريتو بجزء من قروشي وعندي قروش في الحساب عاوزاك تبدا شغل براك جديد قال لي مستحيل قلت ليهو طارق بناتك محتاجات ليك وانت شغل العتاله تعبك انا م بنسا يومك الانت غايب عن الوعي وقلت انت موتا كنوز الدنيا كلها ما كانت ح تنفعني طارق القروش كانت ح تعمل لي شنو هسي وانا مشلوله كانت ح تشيلني ح تسندني ح تهتم بي انا لقيتك انت لو م كده كان تكون الحياه صعبه لازم تعمل شغل عشان اولادك وعشان م تحس انو القروش حقاتي وكده انا م عارفه ح اعيش لمتين القروش دي حقت نور واخوها الفي بطني اعمل ليهم شغل احفظ ليهم مالن ناكل منو ويكون محفوظ قال لي بس ي نوسه افوتك كيف قلت ليهو يعني ح تحرسني ي طارق مرتك علي وش ولاده وشوف الانا فيهو عليك الله طاوعني لو مره ولو علي انا جيب لي بت حلال تساعدني واكيد انت م ح تقعد معاي العمر كلو عندك بيت تاني هديه م ح ترضا رايك شنو استخير وعليك الله اقبل عشان ارتاح انا م مرتاحه قال لي طيب ي نوسه ح اعمل شركه صغيره بي اسم نور واكلم امي علي زوجتي انو الحق دا حق نور م حقي انا قلت ليهو حقنا كلنا وربنا يقدرك حسيت انشال مني هم وصفت ليهو الدهب وحولت ليهو القروش وقلت ليهو من بكره شوف لي بت تشتغل لي قال لي طيب قلت ليهو بت تقبل تكون اختي قبل انها تخدمني قال لي ان شاءالله
مرت الايام وطارق بدا شغل جديد وسبحان الله من اول شهر اتوفق وانا بقيت شغاله دلك مع العلاج وطارق جاب لي بت صغيره حبوبه وطيبه وهاديه وزوله ملتزمه شديد غير الله قال والرسول قال م عندها كلام
نور بتي حبتها شديد وهي شكلها ما كملت تعليما بس شاطره لانها كانت بتزاكر لي نور لدرجه انو نور لاول مره جات الاولي ومشت معاها التكريم وادوها وسام الام المثاليه لمن جابتو لي قلت ليها تستاهلي انتي قالت لي انتي تستاهلي الف وسام
مرت الايام وهديه ولدت جابت بت طارق سماها نسيبه قال لي عشان تجي زيك طبعا ام طارق نهاي م جاتني والسمع السمعتو انها شمتانه علي وقالت تستاهل الشلل قلت ليهم ربنا يسامحها العدو م بتمني الاتمنتو لي بس معليش ربنا يشفيها والحصل لي م عيب دي قسمه واتقبلتها بصدر رحب
اخوي كان متاثر شديد ومن يوم رقدتا يوميا بجي لي بس مرتو زي نسيبتي نهاي ما زارتني سبحان الله مفتكرات الدنيا دايمه ليهن ما بلومن ديل مغرورات وربنا ينور بصيرتهن وما يصيبن الصابني
يوم فتحت تلفوني لقيت رسايل من رامي كان بطمن علي قلت ليهو رامي انا الحمد لله انشليت ادعي لي ابقا كويسه قال لي نوسه دا الكنت خايف منو ولا حول ولاقوة إلا بالله العلي العظيم قلت ليهو كيف قال لي ايام كنت مهكر صفحه مرت خالد وبتواصل مع عبله من ضمن كلامها لي انها ح تعمل ليك عمل وح تخلي نسيبتك تعملو ليك قلت ليهو اعوذ بالله منهم وحسبي الله ونعم الوكيل انا عملت ليهن شنو عشان يحرمني من الحياه بي سحرهن ودجلهن ما شافن مني الا الخير وعبله عزرتها كانت ضرتي وعشمانه في حقي وطارق بس نسيبتي الفي مقام امي المفترض لو لقتني في الغلط تصلحني قال لي نوسه معليش ونصيحتي مع العلاج اعملي رقيه وشوفي الايات الببطلن السحر وما تستسلمي وتكون عندك اراده وانا دعواتي ليك ومسافر السعوديه اول عمره لي ح ادعي ليك قلت ليهو ربنا يوفقك يا اخوي ويسهل طريقك قال لي امين واسمع عنك كل خير المدير طبعا رفدوهو قلت ليهو ياتو دا قال لي حبيب مرت خالد قلت ليهو الله يهديهم قال لي دا م الكلام العاوز اقولو ليك الكلام المدير الجديد طلبك بالاسم وقال لازم تنزلي شغل وانا حاولت اصل ليك كتير م مفتكر انك مريضه بس ي نوسه انتي زوله م ساهله لو ربنا شفاك وقومتي لازم تنزلي شغل السودان محتاج للزيك قلت ليهو ان شاءالله يا رامي قال لي انا ح ابلغو واقول ليهو هي ح تنزل بس بعد تبقا كويسه قلت ليهو وريهو اني م بقدر اتحرك قال لي حاضر ان شاءالله تامريني بي اي شي قلت ليهو سلامتك يا اخوي قال لي ابقي علي راجلك وبتك عشره واتحصني كتير وارقي نفسك وواصلي في الدلك بأذن الله ح تبقي كويسه انا حاسي كده قلت ليهو ان شاء الله يا رامي نفسي ابقا كويسه بتي محتاجه لي قال لي باذن الله يا نوسه ودعني وقفل رجع لي بي مكالمه قلت يا ربي مالو رديت وطارق كان جنبي سلمت عليهو وكفر لي قال لي متصل عليك عشان ابلغك انو عندك حقوق نزلت ليك عاوزين نحولن ليك في حسابك قلت ليهو طيب مليتو رقم حسابي وقال لي اسف للازعاج قلت ليهو العفو بعد زمن رسل لي اشعار وحقوقي كانت كتيره شديد كلمت طارق قلت ليهو تزيد بيها الشغل وتشتري عربيه عشان مقابلاتي قال لي طيب ح اكتبها بي اسمك قلت ليهو البتشوفو قال لي نوسه تتزكري عربيتي الزمان بعتها قلت ليهو اي قال لي عارفه انها امس معروضه في الدلاله للبيع لمن شفتها قلت يارب تقسمها لي من تاني لانو عندي معاك فيها زكريات عمري م انساها قلت ليهو عليك الله قوم هسي واشتريها قال لي طيب اتصل تلفون اتصل تلفون قالو ليهو في زول عايزها بس قروشو ناقصه لو جاهز تعال هسي قلت ليهو طوالي حولت ليهو جزء من القروش في حسابو وفي حساب صاحب الدلاله طارق كان مبسوط وانا مبسوطه اكتر منو عربيتو دي فيها زكريات ما بتتنسي وما جات بالساهل والحمد لله انها رجعت لي طارق مشا وجا مبسوط بقا يكورك لي نوسه تعالي شوفيها زي الطفل المشتريين ليهو لعبه قلت ليهو طارق اقوم بي وين قال لي اسف حبيبتي وجا شالني وانا كنت مبسوطه عشان هو فرحان قال لي سجلتها بي اسمك قلت ليهو انا وانت واحد قال لي ربنا يخليك لي نوسه عمري ما انسا وقفت الرجال الوقفتيها معاي قلت ليهو وعمري ما ح انسا اغلاطي السامحتني فيها الحمد لله علي نعمه الاستقرار الانحنا فيهو ما عايزه اكتر من كده……………يتبع