رواية جريمة كفر شكر الفصل الثالث 3 بقلم محمد منصور
مش هتقوم تفتح
دة اللي قالته حوريا ل رفعت اللي باصص للباب وهو لسه مرتبك وقال
روحي شوفي مين
حوريا
انا اللي هروح اشوف مين وانت قاعد
رفعت بعصبية
مش عايز رغي كتير روحي شوفي مين ولو اي حد سالك عليه انا مش هنا
حوريا
لية هو انت عامل عامله
رفعت بعصبية شديدة
من غير ليه هو كدة وخلاص يلا روحي افتحي
ومشيت حوريا وراحت ناحية باب البيت علشان تفتحه ورفعت وقف وراء باب اوضه وبص بطرف عينه علشان يشوف مين علي الباب وفتحت حوريا الباب علشان تلاقي،،،،،،،،،،،
جريمة كفر شكر
اقتباس وكتابه
محمد منصور
**منص**
وقبل ما نبدأ نوحد الله ونصلي علي خير خلق الله سيدنا محمد
صلاة تحل بيها العقد وتفك بيها الكرب
فتحت حوريا الباب و شافت ابن اختها فاتنهد رفعت وقال لنفسه
هو انت يا مقصوف الرقبه لسه عيل و خبطتك زي خبطة المخبرين نشفت ريقي
ورجع قعد مكانه وشويه حوريا رجعت له و بدات تغير هدومها فبص لها وقال
رايحة فين
حوريا
رايحة مشوار مع اختي وراجعه تاني علشان نكمل كلامنا
مسك رفعت اللي بتاع الشيشة وحطه في بوقه وسحب نفس طويل وقال في سره
روحي الهي ما ترجعي تاني مراة بومه،،،،،،،،
و بعدها بكام ساعه وقبل المغرب علي طول و من جوة اوضة شفيقة كانت شفيقة قاعده علي السرير وقت ما باب اوضتها اتفتح ودخلت عليها صاحبتها اللي زي اختها صبيحه اللي بصت لها وقالت
شفيقة اية اللي انا عرفته دة
شفيقة ارتبكت اوي وقالت
عرفتي اية انا ما كنتش عايزا اعمل كده لكن الشيطان وقع بيني وبينه ان،،،،،،،
وسكتت لانها انهارت من كتر العياط خدتها صبيحه في حضنها وقالت
اهدي يا شفيقة مالك يا اختي وشيطان اللي وقع بينك وبينه
شفيقة
انا تعبانه ومش عارفه انا بقول اية
صبيحة
لازم تتعبي ما انا عارفه ان غياب يونس عنك مش هيعدي عليكي بالساهل
شفيقة بصت لها و عيطت اكتر وقالت
يونس
صبيحه
هو انتم اتخانقتو ولا اية يا شفيقة وهو ساب الكفر علشان كدة
شفيقة
مين قال الكلام دة
صبيحه
سليمان ابن شيخ البلد داير في الكفر كله يقول انكم اتخانقتو وهو طفش
شفيقة بعصبية
سليمان دة كذاب و خسيس وناقص وانا هعرف ازاي اوقفه عند حده
صبيحه
طيب روقي واهدي وادعي ربنا يرجع لك يونس بخير
شفيقة بحسره
يرجع يا ريته يرجع وانا اعيش خدامه تحت رجله
هنا دخل عليهم عبد الهادي
و بص لهم وقال ل صبيحه
خليها تاكل يا بنتي اي لقمه واقعدي معاها شويه لاني
ما اعرفش هي مالها
شفيقة
يا با ما تقلقش عليه انا بخير
عبد الهادي
لا مش بخير ولو تعرفيني اية اللي حصل بينك وبين يونس يخلي يطفش زي ما سليمان بيقول
شفيقة
ما حصلش حاجة وما تسمعش ل اي كلمه يقولها سليمان
عبد الهادي
اومال يونس راح فين
شفيقة بحده
ما اعرفش وكفايه بقي انا ما بقتش قادره،،،،،،،
قبل اذان العشاء بكام دقيقة ووقت ما كان سليمان خارج من البيت يلاقي قصاد منه ام يونس بتبص له بص لها وقال
وسعي يا مراة من وشي خليني اروح أذن لصلاة العشاء
ام يونس
اللي انت داير تقوله في الكفر دة عن ان يونس اتخانق مع شفيقة وطفش دة كذب ولا صدق
سليمان
من امتي وانا بكذب يا مراة دة حتي ربنا قاله في كتابه العزيز **ففهمناها سليمان**
ام يونس
وهو ربنا كان يقصدك انت اللي بتعملو مع الجهله اللي دينهم قليل ما تعملهوش معايا انا دة انا برضو متعلمه وواخده اعدادية
سليمان باستهزاء
دة اية العلم دة كله احنا بعد كدة نقول لك يا دكتوره ام يونس
ام يونس
بطل مسخره عليه وقولي اللي انت قولته دة حصل فعلا
سليمان
ما تسالي السنيوره
ام يونس
سالتها وقالت انك كذاب
سليمان
كذاب اللي يسامحها انا لولا اني متوضي كنت قولت كلام قبيح لكن معلش هطلع انا ابن اصول و اسكت وانتي ارجعي ليها وقول لها سليمان مش كذاب باماره ارض الخواجه
ام يونس باستغراب
ارض الخواجة
سليمان
ووسعي بقي خليني اروح أذن ل صلاة العشاء
ومشي سليمان و سابها وام يونس بتبص عليه وعماله تردد
ارض الخواجه،،،،،،،
ومن جوة مكتب ظابط المركز اللي اسمه ممدوح كان العسكري واقف قصاد ممدوح وبيقول
تم العثور علي جثة ل شاب في اوائل العشرينات مواصفاته مطابقة لمواصفات
يونس الشاب المبلغ عن اختفائة
وقف ممدوح باهتمام شديد وقال
لقيتوها فين
العسكري
في الارض الغربيه قبل مدخل بنها ب 10 كيلو
ممدوح
حضر القوة وخلينا نروح هناك بسرعه،،،،،،،،
وبعدها بشويه وصل ممدوح وفريق البحث الجنائي عند الجثة وبعد الكشف علي الجثة اتاكد ممدوح ان دة يونس لكن اكتر شئ لفت انتباهه سلسلة كانت موجودة جنب منه،،،،،،،،،