رواية جريمة كفر شكر الفصل الرابع 4 بقلم محمد منصور

عايزك تمسكي نفسك علشان تقدري تساعدينا،،،،

دة اللي ظابط المركز ممدوح ل ام يونس اللي كانت واقفه قصاد منه وقالت

هو في اية يا بية

ممدوح

احنا لاقينا جثة ل شاب مواصفاته فيها كتير من مواصفات ابنك وهو دلوقتي في المشرحة و عايزنيك تتعرفي عليه

لطمت ام يونس وقالت

يا لهوي يا لهوي

ممدوح

لازم تهدي يا حجة علشان نقدر نكمل شغلنا ونعرف الجثة دي بتاعت يونس ولا  لا مش ممكن ما يطلعش هو

ام يونس وهو بتعيط

لا والنبي يا بيه وحياة حبيبك النبي ما تقولش انه هو انا ابني عايش و هيرجع لي انا قلبي بيقولي كدة  

ممدوح

طيب تعالي معايا المشرحة وباذن الله ما يطلعش هو،،،،،،

جريمة كفر شكر

اقتباس وكتابه 

محمد منصور 

**منص**

وقبل ما نبدأ نوحد الله ونصلي علي خير خلق الله سيدنا محمد   

صلاة تحل بيها العقد وتفك بيها الكرب

من جوة المشرحة تقف ام يونس قصاد تلاجة الموتي وممدوح بيقول لها

عايزك تمسكي اعصابك

ام يونس وهي شبه منهاره

يارب اقدر

وبص ممدوح للموظف المسئول عن الثلاجة وقال

افتح الدرج

وفعلا الموظف سحب الدرج اللي في جثة يونس ورفع الملايا عن وشه وشافت 

ام يونس الجثة والصدمة كانت اشد من انها تاخد اي رد فعل وفضلت باصه للجثة ومش قادرة تتكلم فقال لها ممدوح

هو دة ابنك

بصت له والدموع غطيت لون عيونها وهزت دماغها بحركة معني انه هو  و حضنته وصرخت باعلي صوت عندها صرخه بطعم الغدر والقهر،،،،،،

ومن جوه دوار العمده كان العمده قاعد مع سليمان اللي قال باهتمام شديد 

وانت عرفت الكلام دة ازاي

العمده

لسة حالا العسكري اللي في المركز مبلغني

سليمان

اتقتل لية ومين عمل في كدة

العمده

كل حاجة هتبان اصل اللي هيحقق في القضية ظابط عقر اسمه ممدوح الطويل ما جبتهوش ولادا

سليمان وقف وما ردتش علي العمده وخرج من الدوار جري والعمده عمال ينادي عليه لكنه خرج وقفل باب الدوار وراء منه،،،،،،،

من جوة بيت البوسطجي بيومي كان قاعد بيومي وقت ما باب البيت خبط واخته فتحت ولقيت قصاد منها سليمان اللي قال

فين اخوكي

رديت وقالت

جوة في اوضة

دخل له الاوضة ووقف قصاد منه وقال بيومي

اية اللي جابك هنا هو انا ناقصك

سليمان قفل باب الاوضة وراء منه وقعد قصاد بيومي بالظبط وقال 

يونس اتقتل

بيومي اتصدم

يا نهار اسود اية الكلام دة

سليمان

الكلام لسة جاي من المركز حالا

بيومي

اتقتل امتي وازاي

سليمان

وهو انا اعرف منين

بيومي

بقي انت ما تعرفش

سليمان

ايوة ما اعرفش وانا جاي لك علشان الكلام ما يقعش منك

بيومي

انا ما اعرفش حاجة وابعد انت عني يا غراب الكفر ياللي قدمك عليه كان قدم شؤم

سليمان مسك بيومي من هدومه وقال بتهديد

لم لسانك يا بيومي ولازم تعرف ان الحكاية قلبت جد والحكومة دخلت في الموضوع واللي ماسك القضية ظابط عقر الكل بيعمل له الف حساب 

بيومي

وانا مالي ومال القضية اصلا

سليمان

مالك ازاي مش انت كنت عايز تتجوز شفيقة و رفضتك وعملت بسببها خناقه مع يونس

بيومي

ما كل يوم والتاني الكفر في اتنين بيتخانقو معني كدة اني اقتله  اللي قتله بجد اللي كان بيخطط له وراح اتفق مع واحد من مطاريد الجبل 

سليمان برق ل بيومي وقال

شايف انت وسخ ازاي و فاكر انك ماسك عليه واحده وصحيح  انا روحت

 ل مطاريد الجبل واتفقت علي موته لكن انت اللي شوفت شفيقة وهي داخله ارض الخواجة وراء يونس وبعدها يونس اختفي بسبب الخناقة اللي دارت ما بينهم

بيومي 

انا شوفتها دخلت ارض الخواجه وما عرفش بعد كدة اية اللي حصل لاني ماشيت اصلي كنت عايز اخش الحمام 

سليمان

اومال لية قولت لي انك سمعتهم بيتخانقو سوي وصوتهم علي و يونس وقتها قال انه هيسيب الكفر ويهج

بيومي

كنت عايز اطلع منك بقرشين اصرفهم علي مزاجي لان نسوان الكفر وصي عيالهم اللي في مصر ما يبعتوش فلوس تاني في البوسطه بعد ما عرفو اني انا حرامي

سليمان

يا ابن الكلب يا رمه يا رخيص

بيومي

ما بلاش غلط بقي وخلينا نشوف هنعمل اية

سليمان

احنا مش مع بعض علشان نفكر انا جيت لك النهارده علشان بس احذرك ان بلاش الكلام يقع منك و سيرتي تيجي قصاد الحكومة بحساب

بيومي

طيب انا كنت عايزك تحميني من ولاد ابو غالي

سليمان

مالهم ومالك ولاد ابو غالي

بيومي

اصلي فتحت جواب جاي 

ل كبيرهم وعرفت انهم تجار سلاح وفي شحنه جايه قريب ليهم و هيخزنوها في الكفر وانا عرفت مكان التخزين 

سليمان

وفين الجواب دة

بيومي

معايا و خايف اسلمه لكبيرهم لبعدين يعرف انه اتفتح قبل كدة ويقطع رقبتي

سليمان 

ومش هينفع ما تسلمهوش لانك استلمته من البوسطه واكيد انت مضيت علي كدة  دة انت ايامك كلها هتبقي حزن عليك وعلي دماغك  وانت عارف ولاد 

ابو غالي ما بيتكلموش 

الا بالبارود

بيومي

طيب والعمل

سليمان

بطل تفتش في جوابات الخلق اديك وقعت في شر اعمالك

بيومي

يعني مش هتقف معايا

سليمان

انا مش فايق لك دلوقتي وعندي الاهم منك حل مشكلتك دي بنفسك

و سابو سليمان ومشي،،،،،،،،،

ومن جوة مكتب الظابط ممدوح اللي كان بيمد ايده بكوبايه ليمون ل ام يونس

عايزك توحدي الله و اتاكدي ان باذن الله اللي عمل كدة في ابنك مش هسيبو الا لما يتعلق في حبل المشنقة

بصت له ام يونس وقالت

عايزا ادفن ابني يا بيه

ممدوح

حاضر ساعتين بالظبط وتقدري تاخدي ابنك من المشرحه

وحط ممدوح ايده في جيبه وطلع السلسله اللي كانت فوق جثة يونس وقال

السلسلة  دي لقيناها فوق جثة ابنك ما تعرفيش مين صاحبتها

بصت ام يونس للسلسلة وقالت

لا يا بيه ما اعرفش

رجع ممدوح السلسلة تاني في جيبه وقال

طيب كملي كوبايه الليمون بتاعتك عقبال ما اخلص شويه اوراق بره وارجع لك 

وخرج ممدوح من المكتب وقال للعسكري

ابعت هات المرشد بتاعنا في الكفر  قطه

العسكري

قطه هنا يا فندم عند الساعي بيشرب شاي اروح اندهه له 

ممدوح

لا خليك انت انا رايح له

وراح ممدوح عند الساعي وبص ل قطه اللي اول ما شافه حط كوبايه الشاي جنب منه وقال

معلش يا باشا اصلي واكل طعميه معموله بزيت مواتير وصدري قايد نار 

ابتسم ممدوح وقال ل قطه

امسك كوبايه الشاي بتاعتك وتعالي معايا نتكلم واحنا بنتمشي

قطه

ما ينفعش يا باشا

ممدوح

اسمع الكلام

قطه مسك كوبايه الشاي وخرج يتمشي مع ممدوح اللي بص له وقال

عايزك تنزل الكفر وتمشي وسط اهالي الكفر كلهم وتقول ان يونس اتقتل وان الظابط ممدوح قال للمديريه ان في خلال يومين اللي عمل كدة هيكون قصاد منه في مكتبه متكلبش وان دي اسهل قضية هو مسكها 

قطه

هو انت عرفت مين اللي عمل كدة فعلا

ممدوح

لسة بس كلامك دة لما يتقال في وسط الكفر  هيخليني اعرفه لان ببساطة اللي عمل كدة هيتحرك الحركة اللي تخليني اعرف هو مين 

قطه

والله يا باشا يونس دة كان يتحط علي الجرح يطيب ما اعرفش مين ابن مؤذيه عمل في كدة

ممدوح

هنعرفه باذن الله بس انت اعمل اللي انا قولت لك عليه،،

وفعلا قطه عمل كدة وفي نفس اليوم دة بالليل رفعت خرج من البيت من وراء حوريا وراح ناحية الزريبه بتاعته وبدا يحفر و يحفر لغاية ما،،،،،،،،،،،،،

                 الفصل الخامس من هنا