رواية لكل حب حكاية الفصل الخامس 5 بقلم محمد منصور
وبسم الله توكلت علي الله وهو رب العرش العظيم
★لسة هتتكلم مليكة قالت سمر
اوعي تنطقي ولا كلمة اختك وراكي
بصت مليكة وراء منها وشافت شيماء اللي بتبص ل سمر وعز وقالت
ممكن اعرف اية اللي بيحصل دة
سكتت مليكة من المفاجاة بصت شيماء ناحية سمر وعز ورجعت بصت ل مليكة وقالت بهدوء
مليكة مين اللي مع سمر دة. انا كنت ممكن اتسنط عليكي واعرف مين دة لكني ما حبتش اعرف بالطريقة دي انا اختك الكبيرة واحب لك الخير وعايزاكي تبقي مبسوطة. بس بالاصول مش بالطريقة الصح. انتي طيبة وسهل اي حد يضحك عليكي
مليكة لقيت ما فيش مفر فقالت
دة عز الدكتور بتاع الصيدلية و الله العظيم انا ما عرفش انه جاي هنا. بس هو جه من سمر علشان يقولي انا اسف علشان اللي حصلي بسببه، ،،،،
كان في نفس الوقت عز بيبص للشباك وكلام شيماء مع مليكة وقال ل سمر
تفتكري اني غلط اني جيت لغاية هنا
سمر وهي بتبص. ناحية مليكة وشيماء. قالت
انا اللي غلط لاني جبتك لغاية هنا. بس ما تقلقش شيماء حنينة وبتحب مليكة ما افتكرش انها بتزعق لها.
ورجعت شيماء تبص ل عز وقالت
علي كل حال روح انت دلوقتي وانا هطلع اطمئن عليه.
عز
ياريت لما ترجعي تعدي عليه في الصيدلية وتعرفيني اية اللي حصل
سمر
هشوف ماشي،،،،،،،،،
ومن جوة شقة شيماء تقعد سمر مع مليكة في الصاله وشيماء في المطبخ بتحضر عصير وسمر كانت بتقول في ودان مليكة بصوت واطي
يعني شيماء صدقتك و ما عملتش فيكي حاجة لما حكيتي لها كل الحكاية
مليكة
صدقتني وقالت لي ان الحب مش حرام. بس الحرام لما يبقي حب نخاف الناس تعرفه. واني لازم اخلي بالي من نفسي. انما بقي انتي يا زفته لما هو جاي معاكي ما عرفتنيش لية ولو حتي بمكالمة
سمر
حبيتها اعملها لك مفاجاة
مليكة
هو كان خايف عليه اوي كدة خالص
سمر
خايف وبس دة كان مرعوب عليكي وفضل يعيط ويعيط ويقولي ودوني ل مليكة عايز مليكة
مليكة وهي بتضحك
لية يا روح امك هو انا امه وهو محتاج الرضعه
ضحكت سمر وقالت
والله عيب عليكي تكدبي واحدة من سن امك
ضحكو الاثنين وهنا ظهرت شيماء وهي ماسكة صنية علي تلت كوبيات عصير مانجة. وقالت
ما ضحكونا معاكم
سمر
تعالي اقعدي معانا وانتي تشبعي من الضحك. كفاية بس مليكة تقتح بوقها. وهتلاقي الضحك في كل كلمة بتقولها يا بختة اللي العسل دي هتكون مراته
شيماء وهي بتدي كوبية عصير ل سمر قالت
الا انتي مش ملاحظة ان رجلها خفت بعد شافت الدواء
مليكة
دواء اية
سمر
تقصد عز يا غبية
مليكة اتوجعت وقالت
اأة رجلي رجعت تنشر علية تاني
شيماء
تنشر. اقوم اجيب لك مشابك
ضحكوا الثلاثة ومليكة وشها احمر من الكسوف، ،،،،،،،،
وبالليل ومن جوة اوضة شيماء تقعد شيماء علي السرير جنب فوزي بعد ما حكيت له حكاية مليكة وعز. وقالت بعد ما خلصت الحكاية
اية رايك في اللي سمعته
فوزي بحدة
رايي ان دي قلة ادب من مليكة وصاحبتها. هو احنا فين في امريكا
شيماء
فوزي مش كدة. بعدين مليكة تسمع
فوزي
انا ما بحبش الحال المايل.
شيماء
مليكة طيبة وبرضو هو دكتور اكيد ابن ناس
فوزي
اختك هبلة وفاكرة انها عارفة كل حاجة وعمرها ما حكمت عقلها. قلبها بس هو اللي سايقها ويا ويلة اللي قلبه هو اللي يسوقة.
شيماء
انت لية هتخليني اندم اني حكيت لك
فوزي
هو انتي كنتي عايزا تخبي علية حاجة زي دي. افتح شقتي ل اختك علشان اللي حصل وهي تجيب لي شاب تحت الشباك. والله دي حاجة حلوة اوي شوية شوية. نسيبة يطلع يريح معها حبة في الاوضة
شيماء. بعصبية
فوزي. اللي انت بتتكلم عليها دي اختي وانا اكتر واحدة عارفة هي متربية ازاي
فوزي
ودة بيتي وما حبش اقعد في بيتي وانا قرني
شيماء
اية الطريقة دي يا فوزي. ازاي كلامك يكون بالشكل دة
فوزي حس انه عك وبدأ يهدي شوية وقال
اعوذ بالله من الشيطان الرجيم.
وباس دماغ شيماء وقال
حقك عليه والله ما اقصد. بس انا ما بحبش الجو دة وانتي عرفاني. انا يوم ما حبيتك ما اقدرتش اتكلم معاكي قبل ما ادخل بيتكم هي دي الاصول ماينفعش بقي اجي اقف تحت شباك وابعت رسائل غلط يا شيماء
شيماء
هي حلفت لي بالله العظيم انها ما تعرفش انه جاي وان مافيش اي حاجة بينهم هما الاثنين
فوزي
انا بحب مليكة زي اختي وخايف عليها. عرفيها ان دة ما ينفعش وما ينفعش يتكرر. ولا ينفع تفرح بي.
شيماء
قولت لها والله
فوزي
قولي تاني وتالت ورابع. لازم تعرف اية اللي يصح واللي ما يصحش، ،.،،،،،،،،،
وفي نفس الوقت كانت مليكة بتكلم سمر في الموبيل وبتقول لها
روحتي له الصيدلية زي ما طلب منك
سمر
اة روحت
مليكة
واتكلمتو في اية
سمر
سالته علي مرهم للبشرة
مليكة بعصبية
سمر بطلي استعباط
سمر
الله مش بقول لك اللي حصل
مليكة
وبعد ما سالتي
سمر
قولت له هات لنا منه باكو واتنين
مليكة
هو ريري يا بنت عم مسعد السباك
سمر
الله يرحمه بابا كان يسلك اي مسدود
مليكة
عقبال ما تسالكي زيه. قولي يا سمر اتكلمته في اية. بدل
ما اجيبك من الباروكة اللي علي راسك
ضحكت سمر وقالت
هتعمليها ازاي وانتي برجل واحدة. عرف انتي بتفكريني باية. بالعجاز اللي تحت باطك.
مليكة
عارفة بفيلم المولد. انا ابن مين يا علي يا اعرج
ضحكت سمر اوي اوي وقالت
مش هتقولي بقي انا ابن مين
مليكة
قولي انتي الاول قولته اية
سمر
سالني اختك عملت اية معاكي وانتي زعلتي انه جه لغاية عندك ولا. لا. وقال انه هيبقي ديما كدة يطمئن عليكي مني
مليكة
ودة اية بقي حب ولا. اعجاب.
سمر
انتي شايفة اية
مليكة
انا حاسة اني بحلم
سمر
هو انتي وحشة يا بت. دة انتي قمر
مليكة
في قمر اهبل والنبي
سمر
طيب دي احلي حاجة فيكي هبلك
مليكة
اشكرك يا بنت الناصحة
سمر
طيب دلوقتي سؤال وبيطرح نفسه علي الساحة
مليكة
مين معايا. مني الشاذلي. اسئلي السؤال بتاع الساحل دة
سمر
لو طلب مني رقم موبيلك
مليكة بخضة
لا. اوعي
سمر
خالص
مليكة بعد تفكير للحظات
ادي له او خمس ارقام بس
سمر
والباقي
مليكة
لما قلبه يتعلق بيا، ،،،،،،.،،،
وبعدها بتلت ايام وعند منتصف الليل يقف عمر قدام التلاجة علشان جعان وملقاش الا جبنه وبيض نفخ ورزع باب الثلاجة وجه يخرج لقي عماد في وشة بيقوله
مالك بتنفخ لية كدة. هتولع في الشقة
عمر
هو احنا هنفضل كدة لغاية امتي ل في اكلة عدلة ولا هدوم بتتغسل ولا حتي مواعين نظيفة
عماد
عايز اكلة حلوة.
عمر
نفسي
عماد
روح نزلها من علي النت ايها الشاب الاندرويد
وضحك عماد فقال عمر
ليك نفس تهزر وتضحك. والشقة عاملة زي الزريبة وفي يومين بس
عماد
علشان تعرف قيمة مليكة
عمر
للدرجة مليكة دي طلعت مهمه
عماد
البيت اللي من غير بنت عامل زي الشاي من غير سكر بيبقي مر
عمر
انا ما عرفش لية شيماء تتسحب من لسانها وتقول مليكة تيجي تقعد عندي
عماد
اومال كنت عايزها تفضل هنا ومين يخدمها وهي رجليها مكسورة
عمر
مش مهم مين يخدمها المهم مين يخدمنا احنا.
عماد بعصبية
وهو انت كنت عايزها تقف علي رجل واحدة وتعمل لك اكل
عمر
وفيها اية يعني. هي بتطبخ برجليها
عماد وهو بيضرب كف علي كف
والله العظيم انت ما عندك ريحة الدم
وهنا يدخل امين وهو مسطول ويقول
مليكة انتي يا زفته يا اللي اسمك مليكة
عماد
مليكة عند شيماء انت ناسي ولا اية
امين بعصبية
وبعدين بقي في القرف دة. انا جعان وعايز اكل
عماد
خش اقلي بيضين
عمر بخبث
ودة ينفع كبير المنطقة برضو هو اللي يقف يعمل اكل ل نفسه
عماد
خلاص بلاش. خش اعمله انت
عمر
وانا اعرف اعمل اكل. ما كنت عملت ل نفسي.
عماد
اومال انت عايز اية
عمر
مليكة ترجع
عماد
اختك شيماء مش هتسيبها
عمر بص ل امين وقال
وهي برضو شيماء تمشي كلمتها علي امين. دي حتي تبقي عيبة في حقة
امين
عمر بيتكلم صح. مين شيماء دي علشان تقول واحنا نقول امين
وراح امين ناحية باب الشقة قام عماد بسرعه ووقف قدام منه وقال
ورحمة ابوك وامك ما تروحش عند اختك وانت في الحالة دي. هتقوم مشكلة احنا في غني عنها
امين
لا. هروح وعايزها تقول لا. اوعي يلا.
وزق عماد بعيد عن الباب وخرج من الشقة وعماد بص ل عمر وقال
انت اية شيطان
عمر ببصة كلها شر
لا. مليكة هي اللي ملاك اوي.
ودخل اوضة. وعماد نزل جري وراء امين ومهما يحاول يمنعه ما كنش في فايدة. ووقف امين توك توك. ومشي بي راح عماد جري ل سنترال اخوة ممدوح وقال
الحق امين
ممدوح اتفزع وقال
ماله،،،،،،،،،،،،،
ومن قدام باب شقة فوزي يقف امين وكان بيخبط علي الباب بمنتهي العصبية وبيقول
شيماء. افتحي
وبعدها بلحظات يفتح الباب فوزي وكانت عيونه مغمضة لانه كان نايم لكنه اول ما شاف امين قال
انت بتعمل اية هنا في ساعة زي دي
امين
انا مش جاي لك انت. انا جاي ل شيماء
هنا تظهر شيماء وتقف قدام وراء جوزها وتقول
اية يا امين عايز اية
امين
مليكة
شيماء
مليكة
فوزي
عايز اية من مليكة في ساعة زي دي
امين
هترجع معايا
شيماء بعصبية
ترجع فين انت مجنون.
امين
عايز اكل. وما ينفعش كبير المنطقة يقف يعمل اكل
ل نفسه
شيماء
انت مسطول بقي وجاي ترمي بلاك علينا. امشي يا امين من هنا ولما تفوق وتعرف انت بتقول اية. ابقي تعالي نتكلم
وبصت شيماء ل فوزي وقالت
اقفل الباب يا فوزي خلينا نكمل نوم
فوزي مارضيش وقال
ما يصحش يا شيماء. دة برضو اخوكي
شيماء
اقفل الباب لانه دلوقتي مش عارف هو بيعمل اية. وممكن يفتح علينا المطواة اللي بيخوف بيها اهل الشارع
امين
لو المطواة هتخليكي تجيبي مليكة يبقي حلال عليكي
وطلع المطواة صرخت شيماء وفوزي مسك ايدة وقال
فوق يا امين واعرف انت بترفع المطواة علي مين
امين
علي اي حد يكسر كلام كبير المنطقة. ومليكة هترجع معايا يعني هترجع معايا
فوزي
ما حدش هيخرج معاك من هنا.
وقدر فوزي ياخد المطواة من امين وهنا وقفت شيماء قدام امين وضربته بالقلم علي وشة وقالت
فوق بقي. وصل بيك الحال لانك تيجي ترفع علي اختك الكبيرة مطواة
وضريته قلم تاني وقالت بمنتهي العصبية
اية ما لكش كاسر
زقها امين بعيد عنه وقعت علي ظهرها وضرب فوزي بالرجل في بطنة ودخل الشقة لما شاف مليكة واقفة من باب الاوضة مستخبيئة منه ومرعوبه وهو راح للاوضة وزق الباب وقع مليكة علي الارض اللي كانت بتبص له وتقول وهي بتعيط وبتترعش
والله ما عملت حاجة والله ما عملت حاجة والنبي ما تضربني تاني
امين بص للجبس وقال
انتي اية هتعملي فيها عيانه
كانت مليكة بتزحف بطرها وهي بتقول
والله تعبانه.
والرعشة بدات تزيد في جسمها من الخوف وهو مسك الجبس من اوله وقال
طيب اهو الجبس اللي انتي بتمثلي بي علينا
هنا وصل عماد وممدوح ودخلو الثلاثة شالو بعيد عن مليكة وممدوح قال
ابعد عنها الدكتور محذرنا اي حركة غلط لرجالها ممكن تعيش طول عمرها بتعرج.
هنا كانت مليكة جالها انهيار عصبي وبدات تقول
والله ما كنت اعرف انه جاي تحت الشباك. انا. بحبة وهو ما عرفش. والله ما عرفش بس جة تحت الشباك يبقي بيحب مليكة وانا بحبه. جة تحت الشباك وانا بحبه
اخويا يموتني. وهو يحبني. اخويا يكسر رجلي وهو يحبني. اخويا مش يخاف عليه. وه،،،،،،،،،،
وسكتت مليكة وما بقتش قادرة تقول اي كلمة تاني جريت عليها شيماء وخدتها في حضنها وهي بتقول
مليكة
تبص لها مليكة ومش قادرة تنطق اي كلمة وبتعيط. وعايزا تتكلم لكنها مش قادرة، ،،،،،،،،