رواية احببت وانا علي ذمة اخر الفصل الرابع والعشرون 24 بقلم نوسه حمد
رامي قال لي عبله دي اكبر واحده قليله ادب والله قلت ما عايز اقول ليك واسترها وما ابقا سبب في خراب بيتها بس انا زول حقاني اتغظت من حركتها العملتا لي هديه الفيها عاوزه تبقي في الناس الأبرياء والله ي نوسه لو قلتي لي هديه غلطت براها وعملت علاقه مع الولد كان قلت تستاهل اي شي وتستحمل نتايج غلطها بس انا زول حقاني ما بحب زول اكون كلو عيوب ويحاول يوقع الناس في الغلط قلت ليهو ما فاهمه قال لي تتزكري لمن كنت مهكر صفحه مرت خالد وعبله كانت متواصله معاي بحساب مرت خالد المهكر كنت للاخر بتعامل معاها عادي بس لمن نزلنا المنشور وفيهو صوره مرت خالد ومعاها الفنان عبله رسلت لي وكانت بتواسي فيني ع اساس اني مرت خالد وفي عز ونستها لي ديك قالت لي طبعا انا بعرف الفنان الفلاني والعازف الفلاني ومرات بنعمل رحل ممكن تمشي معانا وتجيبي معاك الفنان الفلاني دا نفسي اتعرف عليهو لو هو م عندو مشكله وانا هنا ختيت تحت كلامها الف خط يعني انتي ي عبله عايشه حياتك طول وعرض رديت عليها قلت ليها والله انا م بقدر اطلع رحلات بس لو عاوزه تتعرفي عليهو جدا م عندك مشكله قالت لي ياريت قلت ليها تمام ح اخلي يتواصل معاك وطبعا هي صدقت وانا دخلت عليها ع اساس اني الفنان وطلعت خفيفه ولفيفه ومستعده لي اي شي الكلام دا انا م عديت اسبوع وقلت ليها مسافر اتعابطت فيني عباطه قالت لي عازماك عشاء في شقتي ونشرب شيشه مع بعض والله يا نوسه انخلعتا واحرجتها وحظرتها وما اتوقعت انو زوجك يظلمك انتي المهندسه العندك مكانتك عشان واحده صايعه زي دي وهسي انصدمت لمن عرفت انها بتكيد للناس وهي كلها عيوب وهسي لو عاوزة الدردشه برسلها ليك برقمها ومرسله لي صورها وطبعا انا رسلت ليها صور الفنان وهي مصدقه انو البتكلم معاها دا هو والصور الرسلتهن لي لو شافن راجلك دا بطلقها طوالي قلت ليهو والله يا رامي انا مصدومه وانا الكنت مفتكراها بتعمل فينا دا كلو بسبب الضر وانها بتحب طارق وبتغير مننا بس وضحت لي حاجه قالا لي عباس قال لي الزوله دي عاوزه قروش يعني كل هدفها من طارق القروش وعايشه حياتا طول وعرض وما كده وبس الزوله دي حريصه انها تغلط وغلطها ما ينكشف والله ولا لحظه م حسيت انها كعبه ولا احتمال عشان ما محتكه معاها قال لي والله الزي دي ولا تحتكي معاها ليك بنفسك واولادك وراجلك قلت ليهو للاسف طارق من يوم رجعها وانا شبه منفصله منو وعاوزه اشيل قروشي منو وتاني هو في طريق وانا في طريق انا م بقدر علي الحروب دي عايزه اعيش انا واولادي في نعيم قال لي ربنا يهون ليك ي نوسه وما تشيلي هم انتي نيتك سابقاك وما بمعني انك عيشتي تجربه سيئه انو الحياه وقفت لا ي نوسه عندك اولادك بالدنيا قلت ليهو الحمد لله انا هسي همي هديه والفي بطنها قال لي ما بتجيها عوجه وكويس انها لقتك ولا كان راجلك المجنون دا ارتكب فيها ذنبين ذنب الفي بطنها وذنبها قلت ليهو فعلا والله ودعتو وقلت ليهو نتلاقه مره تانيه الليله مأجزه وتعبانه دايره انوم قبل نور ماتجي قال لي تمام ودعتو وقفلت
دايراه انوم سمعت صوت طارق يكورك من جنب الباب قلت ليهو مالك فشنو قال لي ادخلي وطاخ اداني كف وانا قلبي كان عليهو دم طوالي رديت ليهو الكف قال لي بتضربيني انا قلت ليهو وبتضربني ليه مالي عملت ليك شنو حدي الان محترماك يا طارق رغم كل العملتو فيني قال لي ما تحترميني قلت ليهو اي ما ح احترمك وردت فعلي ليك دي بدايه عدم الاحترام لانك م تستاهل قال لي انتي ليه بتغلطي وبتحاولي تعملي فيها نفسك ماغلطتي وكانك م عملتي شي قلت ليهو بحاكي فيك قال لي كترتيهو انتي كيف تقولي لي اخو هديه اني ضربت هديه وتحكي ليهو قلت ليهو لو داير احكي كان حكيت زمان ما هسي بعد هديه ما معروف مكانها وين امشي شوف الحكا ليهو منو قال لي ماف زول غيرك ضدي الان قعدت اضحك قلت ليهو ضدك خلاص وصلت لمرحله انو شايفني ضدك سبحان الله يا طارق انا الكان همك همي وانت انا بقيت الان ضدك م سالت نفسك ليه انا ضاديتك ؟؟واكون لمعلوميتك اتقي شر واحده كانت بتحبك شديد ووصلت لدرجه انها بقت ضدك ما اتكلم معاي وكان مزعج شديد وجاهو تلفون ردا وكان مضايق شديد شكلو اهلو الكبار ادخلو في الموضوع وعاصرين عليهو شديد حسيت انو دا الوقت المناسب البقدر صاحب اخوي يخلص فيهو اتصلت علي اخوي ووريتو قال لي اصلا م تهمي اليوم صاحبي مواعدينو يشترو منو شحنه كبيره وح يصفي فيها كل المخازن ولي بليل كده بكون استلم القروش ودا كلو لا طارق لا اولادو التحتو ما عارفين شي وصاحبي ح يخسرو خساره لو باع الوراهو والقدامو ما ح يقدر يسدد العليهو قلت ليهو بس خلي عبله تبيع ليهو العربات والشقه المشترياها قلت ليهو علي فكره رفع لي يدو وضربني قال لي استحملي لغايه ما نخلص عشان انتي الوحيده البتجيبي لينا اخبارو واول م يخسر انا طوالي بطلقك منو وغضبا عنو قلت ليهو تمام
مرت الايام واخو هديه قالو اعتداء علي طارق وكسر ليهو يدينو ورجلو وطارق بقا في كرسي متحرك اللهم لا شماته اخو هديه اخد ليها حقها تالت ومتلت والسمعتو طارق خجلان يقول الحقيقه قال انكسر في حادث كل الاحداث دي عرفتها من اخوي حكا ليهو صاحبو الشغال معاهو وقال ليهو قدر بنسبه تسعين في الميه خسر طارق وحول كل القروش في حسابي انا حسيت بي انجاز عظيم اديناهو حقو وسافر ولسه طارق ما عرف الحاصل عليهو لانو طريح الفراش وصاحب اخوي سافر السعودية ووصل وقال لي اخوي ماف شي بثبت انو انتو ورا الموضوع خليكم رايحين
مرت الايام واظن طارق عرف الخسارات الخسرهن وغالبو يجي يواجهني واصلا انا عامله فيها نفسي ما عارفه الحاصل عليهو يوم ولد اهلو جابو لينا وكانت حالتو صعبه سلمت عليهو وكفرت ليهو لاحظت ليهو شايل معاهو شنطه عرفت انو عبله قنعت منو بالذات بعد الخسرات الخسرها يعني انا مكان للهم والغم لا لا يا طارق ح تتفاجأ بي رده فعلي البيت بيتي وكده كده انا بطني طامه منو قلت ليهو الحاصل شنو عليك قال لي حادث وطبعا انا فاهمه الحنك كفرت ليهو وضيفتو زيو وزي اي ضيف قلت ليهو بالمناسبه ليك كم يوم ما جبت لي الايراد داير اتهرب مني قلت ليهو بكره لو رجعت الشغل حاول احصر لي ايراد الايام الفاتت لاني محتاجاهو وعن اذنك انا ماشي انوم قال لي انا عندي ادويه وعلاج عاوزك تديني ليهم قلت ليهو تمام اليوم الاول قلت اتم فهمو للنهايه اديتو العلاج لغايه ما جيت طالعه الشغل قال لي ماشه وين قلت ليهو الشغل قال لي تمشي الشغل وراجلك بالحال دا اخدي اجازه شهر لمن ابقا كويس طبعا بتكلم بكل ثقه ع اساس انو انا نسيبه الزمان اللاعب بيها لعب قلت ليهو ضحكتني والله يعني هسي جايب شنطتك عشان تجي تقعد وانا اخدمك قال لي اي كنتي مشلوله وانا خدمتك قلت ليهو دا القالتو ليك عبله يلا لمن انا كنت مشلوله نفوسنا كانت طيبه وكنت طارق الزوج المثالي هسي انت طارق الما بعرفو انا ولا عايزه اعرفو وليك شهور انا معتبراك غريب هسي بقيت راجلي بعد عبله طردتك بي شنطتك الشي الما عارفو يا طارق اني انا ما عايزاك ولا ح ابقا ليك زوجه ولا ح اقول اقيف معاهو ما وقفت معاي انت في ايامك الحلوه والبي صحتك تجيني مكسر ودايرني اراعيك ممرضه انا وين امك العملت عمايل الدنيا دي كلها عشان تفرقنا خليها تراعيك وين مرتك المن اتزوجتها دايسه علي وكانت المفضله عندك انت م طارق الزمان ولا انا نوسه الزمان نوسه البتتكلم معاك دي انت الوصلتها للهي فيهو هسي دا انا البيني وبينك اولادي ديل والشغل واعمل حساب انك تصفي لي الشغل طارق بقا مصدوم لا قادر يقنعني لا قادر يأثر علي عرف اني وصلت معاهو لطريق مسدود شديد طلعت خليتو محتار اتصلت علي اخوي قال لي هو هسي في البيت قلت ليهو اي قال لي يلا بعد كده الكلام ابقا بينا نحنا الرجال وما عندك معاهو شغله والله دي مهازل مشيت الشغل وقلبي مقبوض م عارفه احساس الطلاق صعب حتي لو كنتي مضرره وتاني شي قاطع قلبي طارق يخسي عليها عبله قليله الاصل هو زاتو داقس واحده همها الماديات ح تعاين ليك لمن تكون م عندك اصلا لا ومفهوم عبله مفهوم البنات العاملات فيها انهن محوررالكون وانهن ممكن يعملن اي شي ومباريه المشاهير وفاكاها في نفسها وما شايفه نفسها انها خصمت من رصيدا كتير في الحياه وحسبي الله ونعم الوكيل فيها اخوي اظنو مشا واتكلم مع طارق وقال ليهو اختي خلاص قنعت منك ولازم تصفي الشغل البينكم وتطلقها وكلامي ليك دا زي ما دخلنا بالمعروف نخرج بالمعروف من غير محاكم وغيرو ولر عاوز محاكم خلال شهر قسيمه طلاق اختي بجيبا طارق حاول يقنع اخوي واخوي قال ليهو هي لمن رفضتك قعدت معاك عسي ولعل قلبك يلين بس انت للمره التانيه قلبك في اتجاه تاني واختي عداها العيب وانا اختي عندها كرامه ما زي م انت وامك ومرتك فاهمين اها قلت شنو بي اخوي واخوك ولا بالمحاكم طارق قال ليهو خلاص بس ع شرط ما نصفي الشغل طبعا طارق خجلان يقول الشغل خسرو اخوي قال ليهو موافق بس تديها القروش الادتك ليهم من غير فؤائد رايك شنو قال ليهو تمام وفي كل الحالات انا م خسرانه اخوي قال ليهو بديك اسبوع تسلمني القسيمه والقروش واولادك تجيهم كل جمعه في الاسبوع واختي لو لقيتا واقعه في الشارع ما ترفعها قال ليهو تمام اخوي قال لي اتصل علي ولد اهلو جا ساقو بي شنطتو وفات وما بعرفو فات وين من ناحيه مبسوطه ومن ناحيه تانيه والله قلبي وجعني شديد واليوم داك كلو في الشغل سرحانه والمدير قال لي جاي مهندس جديد تدربيهو علي نفس المستوي البنشتغل بيهو انا وانتي قلت ليهو تمام وما كان عندي استعداد اشوف زول خلي كمان ادربو بس شغلي اهم هو الح ينسيني الحاصل علي وخلاص انا اتقبل اي شي بصدر رحب وما اتاثر كل م ادي نفسي طاقه ايجابيه احساس الحزن الجواي يكسرني وفي اثناء ما انا سرحانه سامعه صوت ولد بعيد بقول لي يا باشمهندسه واظنو واقف من بدري بس انا التفكير متملكني في النهايه قدرت أستوعب انو في زول واقف قلت ليهو عليكم السلام وقومتا علي حيلي الولد قدر ما عاينت ليهو حسيت اني شفتو قبل كده وشكلو نهاي م غريب علي تفتكرو دا منو ……………يتبع