رواية لكل قلب حكاية الحادي عشر 11 بقلم محمد منصور

رواية لكل قلب حكاية الحادي عشر 11 بقلم محمد منصور

وبسم الله توكلت علي الله وهو رب العرش العظيم

وبعدها ب اسبوعين. ومن جوة المحكمة يقف عز جوة القفص وقدام القاضي تقف الست اللي اتبلت عليه وتغير كل كلامها. فيقرر القاضي بعد استشارة معاونية الافراج عن عز فرحت اوي وداد. وحضنت اخوها سعيد وبصت ل عز اللي كانت فرحته مكسورة بعض الشئ. لكن ما نقدرش ننكر انه فرح وخرج براءة وفتح الصيدلية من تاني وبارك له كل اهالي المنطقة. وامين وقف من بعيد بيتفرج علي عز اللي بيسلم علي اهل المنطقة وجه وحيد وقف وراء منه وقال

لو اعرف خرج منها ازاي بس

امين بعصبية 

وحيد شوف حالك،

وسابه امين ومشي ووحيد بص عليه وقال باستغراب

هو ماله دة. ،،،،،،،،

وفي نفس اليوم بالليل كان عز قاعد في صاله  شقته بيشرب شاي وهو مهموم قعدت قصاد منه وداد وقالت

مالك

عز بص لها وقال

مافيش

وداد

شيفاك مش فرحان يعني ان براءتك بانت

عز

لا. فرحان بس،،،،،،

وسكت عز علشان موبيلة رن واللي بتتصل بي مليكة

 ف بصت وداد علي الموبيل وقالت

هي دي اللي مخلية فرحتك حزينه كدة

بص لها عز وهو بيكنسل علي مليكة وسكت فقالت وداد

اوعي تقولي انك علشان بتكلمها كل يوم لمدة اسبوعين يخلوك تحبها لدرجة انك تبقي زعلان يوم برءتك

عز

مش حب. بس هي صعبانه عليه.

وداد بحدة

تاني. انت اية ما بتزهقش

عز

ازهق من اية.  انتي ما تعرفيش انا بالنسبة لها اية

وداد

هو انت هتسيبها دلوقتي. انا اتفاقي مع امين لازم يتم وهو انك هتخطبها كام شهر كدة وتحصل مشكلة بينك وبينها ويبقي كل شئ نصيب وهتنساك وتحب غيرك وهاتتجوز كمان

يرن موبيل عز تاني وبرضو مليكة. ينكسل عز ويقول بعصبية

هو اية دة وازاي. مليكة بتحبني ازاي اخطبها واعشمها باني ليها وانا عارف اني هسيبها

وداد

يعني اية عايزني اطلع قدام امين ست ماليش كلمة. دة اتفاقي معه علشان تخرج من القضية

عز

انتي اللي اتفقتي معه. مش انا وبعدين انتي مش عايزا تفهميني اية اللي حصل بينك وبين امين يخلي يغير كلامه وفجاة كدة يقرر يساعدني.

وداد

اللي حصل. حصل. وانت يا عز تنفذ اللي بقول لك عليه وبس مفهوم

عز

مابلاش اخدع مليكة لحد كدة وبلاش اخطبها وانا هخليها تكرهني طالما مش هتبقي لية

وداد

وامين يرجع يسلط عليك تاني اللي تخرب حياتك وضيع مستقبلك

عز

ما هو ممكن يعمل كدة لما سيب اخته واحنا مخطوبين

وداد

مش هيقدر

عز

لية. مسكتي اية علي امين يخلي ما يقدرش يأذيني 

وداد

مش شغلك

عز

اومال اية هو شغلي اكسر خاطر وقلب البت الغلبانه 

وداد

باين كدة انك وقعت. وحبيت البت الهبلة دي

عز

مليكة مش هبلة مليكة اطيب بت انا عرفتها وقلبها من الالماظ ويبختة اللي تحبة مليكة

رفعت وداد حاجبها وقالت

واية كمان يا دكتور عز

عز

عارف انتي عايزا تقولي اية. انا مع مليكة ما ببقاش دكتور عز. ببقي عز البني ادم اللي محتاج للحب. واللي لقي الحب مع مليكة

وداد

حبتها يا عز

عز

ما عرفش. ما عرفش. بس كل ما بقرب منها بحس انها حتة مني.

وداد

تخلي واحدة خاطية زي مليكة حتة منك. ازاي

عز

ما كفاية بقي شتيمة فيها.  هي ما تستهلش دة كله 

وداد

قبل بس ما تتحمق علشانها اوي كدة وتفكر تضربني بسببها احب اوريك مليكة علي حقيقتها

وقامت وداد وراحت اوضتها ورجعت بعد كام ثانية ومعها الموبيل بتاعها وفتحته وجابت الصور بتاعت مليكة بهدوم البيت وحطت الموبيل في ايد عز وقالت

اتفرج كدة وقولي رايك. في الملاك البرئ

بدا عز يقلب في الصور واتصدم من اللي عيونه شايفه ورمي الموبيل علي التربيزة قدام منه وقال

جيبتي الصور دة منين

وداد

من اسبوعين فاتو حد خبط علية واداني الصور دي علي اساس انه يبوظ خطوبتك من مليكة. لكن انا خد الصور وروحت بيها ل امين وخليته يخرجك من القضية اللي كان السبب فيها

عز

هو دة اللي انتي مسكا علي امين

وداد

مش كنت عايز تعرف بيساعدك لية.

عز

انتي ازاي عملتي كدة. توري صور مليكة بالوضع دة ل اخوها المجرم دة ممكن يقتلها 

وداد

اعمل اية يعني كنت عايزا اخرجك من القضية وخلاص. وبعدين مش هيوصل الحال لانه يقتلها يعني.  مع انها تستاهل قطم رقبتها وهي واللي اديته الصور دي وفضحها 

عز 

مليكة مش كدة. انا متاكدة دي بني ادمه خجوله جدا. ومتربية. 

وداد باستهزاء

خجوله اوي. ودة باين من صورها

عز

شكله اية اللي اداكي الصور دة

وداد

ما بعرفش اوصف بس لو شوفته تاني اكيد هعرفة وبعدين انت عايز منه اية.

عز

عايز اعرف وصل للصور دي ازاي

وداد

وهو دة سؤال بعتتهم لي مليكة

عز

لا.  انا مستحيل تكون نظرتي غلط.  اللي زي مليكة ما تعملش كدة

وداد

اومال يكون وصل للصور ازاي

عز

دة اللي هعرفه. بس في الاول خطوبتي تتم علي مليكة وبسرعه

وداد

غيرت رايك يعني

عز

علشان خطوبتي من مليكة. هتحميها من شر امين واللي ممكن يعملو فيها. وانتي يا امي الله يسامحك علي اللي عملتي في البت الطيبة دي

وقام وقف عز ودخل اوضة.  وكانت بتبص عليه وداد وهي بتقول لنفسها

ربنا هيسامحني هو انا يعني كنت فضحتها قدام الناس كلها ،،،،،،،،،،،،،

وبعد المغرب وقت ما كانت سمر راجعه من شغلها لقيت امين واقف قدام منها استغربت سمر وقالت

امين عايز اية

امين

هو سؤال وعاوز له اجابه.  انتي صاحبة مليكة الوحيدة لا. دة انتي اختها واللي تعرفي عنها ما تعرفهوش شيماء.  ودخلت بيتنا وكلت معانا عيش وملح

سمر بقلق قالت

خير يا امين في اية قلقتني

امين

حصل حوار كدة مش حلو خلاصة الحوار من غير رغي  تعرفي مين ابن حرام ممكن يكون ضحك علي مليكة بكلمتين الحب وملئ دماغها 

سكتت سمر. مصدومة من السؤال لكن امين قال

الحوار بعيد عن عز خالص. علشان ان عارف ان دماغك فكرت في.  عز دة راجل هيبقي خطيب اختي حواره خلص وانا اتاكد انه مالوش في الشمال.  مين غير عز كان بيلاغي مليكة

سمر

ورب الكعبة مليكة اختك عمرها ما اتكملت مع اي شاب ولا حتي كان في بينها وبين عز اي كلام قبل الحوار بتاعك معه

امين

يا سمر

سمر

ورب الكعبة تاني لو في حد لعب بدماغ مليكة انا كنت اول واحدة هاجي واقول لك.  وانت عارف مليكة اختك مافيش كلمتين علي تربيتها 

امين 

انا ما بقتش فاهم حاجة. ويا اما هي برئية يا اما كانت بتستغفلنا كلنا

سمر

مش مليكة يا امين.  واعمل حسابك مليكة لو وحشة انا  ماكنتش عرفتها 

امين

ماشي يا سمر امشي انتي

ومشيت سمر وهي بتبص ل امين مش فاهمة هو لية قال كدة وامين كانت دماغه مليانه اسئلة وشك يرعب. ونفسه  يعرف مين  اللي ودي الصور دي ل وداد،،،،،،،،،،،،،

ومن جوة اوضة نوم تقعد مليكة علي السرير وهي زهقانه وعمال تبص للموبيل وتقول

هو انت بتكنسل لية يا عز. مش عايز تكلمني لية

ويرن عز علي مليكة بعد ما يدخل اوضة فترد بسرعه مليكة وتقول

انا زعلانه منك بجد

عز بصوت حزين 

علشان كنت بكنسل 

مليكة

انت عارف اني ما بحبش حد يكنسل عليه

عز

معلش ما كنتش عارف ارد عليكي.

مليكة

عايزا اقول لك مبروك البراءة

عز

سمر قالت لك

مليكة

ما هي كانت المراسلة بتاعتي من قلب المحكمة. بس ازاي الست دي غيرت كلامها قدام القاضي

عز

ضميرها صحي وسيبك بقي من الست والقضية دي. وخلينا في حوار خطوبتنا

مليكة بضحكة كلها دلع وهزار

مستعجل لية اوي كدة

عز بجدية 

مليكة انا ما بهزرش. 

مليكة باستغراب

مالك يا عز

عز بصوت متوتر

مالي نفسي ابقي خطيبك قدام الناس كلها فيها حاجة دي

مليكة

طيب افك الجبس

عز

هتفكي امتي

مليكة

كمان اسبوع

عز

خلاص بعد عشر ايام هاجي رسمي انا وامي ونتمم الخطوبة دي.

مليكة باستغراب 

بسرعه كدة

عز بصوت قلقان

اة. وياريت ما ترجعيش ببتكم ولا تخلي امين يشوفك لوحدك لغاية ما تم خطوبتنا 

مليكة

لية يا عز

عز

امين ما بيحبنيش وممكن يعمل اي حاجة علشان يبوظ خطوبتنا

مليكة

ما تخفش ممدوح وشيماء هيقفوا له.

عز

برضو ريحيني خلي الكام يوم دول يعدوا علي خير وربنا يستر،،،،،

وعديت الايام وفكت مليكة الجبس والحمد لله رجليها رجعت ل طبيعتها واتفق عز مع ممدوح علي الميعاد اللي هيجي يقراء في الفاتحة وفعلا راح عز مع وداد شقة ممدوح وفتح لهم ممدوح وعماد وامين ودخلو ووقفت شيماء مع مليكة وراء باب اوضة مليكة وكانت معهم سمر والثلاثة فرحانين وهنا يخرج عمر من اوضة بالصدفة علشان يشوف وداد وعز وجت عيونه في عيون وداد. فدخل اوضة تاني واتصدمت وداد وعمر فضل في اوضة يقول ل نفسه

اية اللي جابهم دول مش المفروض الصور اللي اديتهم ل ام عز. تبوظ الجوازة دي.  

ويسمع زغروطة شيماء فيحط ايدة علي ودانه ويقول

بس.   كفاية لية هي تكسب كل حاجة وانا ما اكسبش اي حاجة. بعد كل اللي عملتوا هتفرح مليكة وهتاخد اللي بتحبوا.  مليكة اللي كانت السبب في انها تحرمني من اللي بحبها.  سندس

ويسمع كمان زغروطة ويحط ايدة علي ودانه اكتر ويصرخ صرخة مكتومة ويقع علي الارض ويفتكر اللي كان. ،،،،،،،

ونرجع بالاحداث لكام سنة لما كان عمر عنده 14 سنه  وبيلعب مع سندس بنت خاله حبة الاول والاخير وهنا تظهر مليكة وتقف قدام منهم وتقول ل سندس بهزار

كنت عارفة اني هلاقيكي مع عمر

سندس 

بحب العب معه

مليكة بهزار

وهو كمان بيحب يلعب معاكي اوي.  لكن حاسبي منه. دة في لحظة يسيب الدنيا كلها ويروح جري علشان يلعب اتاري

 **الاتاري دة للي ما يعرفهوش جهاز العاب فيديو جيم بس القديم **

عمر

انا بلعب اتاري بس لما بتكون سندس مش موجودة

مليكة

والله. طيب انا كنت جاية اقول لك الاتاري فاضي دلوقتي هه هتختار تكمل لعب مع سندس ولا هتروح جري علي الاتاري

عمر

الاتاري طبعا. دة كويس ان الجهاز فضي

وسابهم عمر وجري علي الاتاري. ومليكة بصت ل سندس وقالت

مش قولت لك.

ضحكت سندس وقالت

خلاص هكمل لعب معاكي انتي ،،،

وبعدها بيومين يتغير المشهد ونشوف خال عمر بيلم شنطة وبيجهز للسفر برة مصر بسبب ظروف شغله. وسندس واقفة قدام عمر اللي بيقول بصوت حزين

بلاش تسافري معاهم.  انا بحبك سندس

سندس

بتحبني ولا بتحب الاتاري. زي ما مليكة قالت 

عمر

لا مليكة كذابة انا بحبك انتي اكتر

سندس

اومال لية اخر مرة سيبتني وجريت علشان تلعب اتاري

عمر

ضحكت علية وخلتني اسيبك. مع اني ما كنتش هسيبك

سندس

زي ما انتي سيبتني انا كمان هسيبك علشان تلعب اتاري براحتك

وضحكت سندس لانها كانت بتهزر ومشيت لكن عمر خد الكلام جد وفضل يعيط وشاف مليكة وقال بعصبية

انتي السبب.  انتي اللي خليتي سندس تسافر وتسيبني 

مليكة ب استغراب

انا عملت اية ل دة كله

عمر

مش عارفة.  مش انتي اللي روحتي وقولتها ان بحب الاتاري اكتر منها

مليكة

دة هزار. وسندس عارفة اني بهزر

عمر

لا. مش هزار انتي بتكرهيني وبتكرهي تشوفيني مبسوط.

مليكة

عمر انا اختك اللي بتحبك وسندس كانت هتسافر سواء انا قولت كدة او ما قولتش

عمر

انا بكرهك.

وسابها عمر ومشي، ،،،،،

ونرجع للاوضة عمر اللي فاق من ذكرياته علي زغروطة تانية. وقام من فوق سريرة وراح ناحية دولابه وفتح الدولاب ومد ايدة علي الازازة اللي فيها العمل وقال

طالما الصور ما جبتش نتيجة يبقي جة وقت الشر، ،،،،،،،

ومن جوة شقة عز تقعد وداد قدام عز وهي بتقول

والله هو.  دة عينه جت في عينيه ودخل الاوضة جري يعني عرفني زي ما انا عرفته

عز

عارفة اللي انتي بتقولي عليه دة يبقي مين. يبقي اخوها عمر

وداد

اخوها ازاي وحتي مجاش يقعد مع اخواته واحنا بنقراء فاتحة اخته

عز

دبما مليكة تقولي عليه انه عايش لوحدة كدة وملهوش دعوي بحد.  

وداد

الواد دة خبيث. وشيطان يفضح اختة قدامي ويجيب ليها صور زي دي.  دة مش بعيد يكون هو اللي صورها

عز

الغريبة لية اخ. يوصل بي الحال انه باذي اختة بالشكل دة

انا لازم اعرف مليكة تخلي بالها منه

وداد

لا. تبقي غلطان. مليكة لو عرفت انه جاب لينا صور زي دي. هتبقي مشكلة كبيرة اوي. ممكن بسببها تقاطع اخوها طول عمرها

عز

انا مستغربك والله صعبانه عليكي مليكة دلوقتي

وداد

ما ضحكش عليك صعبت عليه. لما اخوها  يعمل فيها كدة اومال الغريب يعمل فيها اية. وكمان انا لما شوفت البت حستها طيبة اوي ودخلت قلبي بسرعه

عز

علشان تعرفي انها ما تستاهلش اللي انتي عايزا تعملي فيها

وداد

انا مش وحشة كدة يا عز. انا ام وشافت مستقبل ابنها بيضيع. كنت عايزني اقف اتفرج عليك عملت اللي قدرت عليه وبالنسبه ل مليكة ربنا يبعت لها اللي احسن منك. لكن هي تكون مراتك. لا.  ،،،،،،،،،

وبالليل وسط الهدوء يفتح عمر باب اوضة ويبص ل باب اوضة مليكة ويتسحب بمنتهي البطئ والشر وعند عتبة اوضة مليكة يفتح الازازة ويرمي كل اللي فيها ويرجع تاني للاوضة ويبتدي الشر بمجرد ما تاني يوم الصبح تفتح مليكة باب اوضتها وتدوس فوق عتبة اوضتها.  وفعلا ابتدي الشر، ،،،،،،،،،،،

           الفصل الثاني عشر من هنا

لقراءه باقي الفصول من هنا