رواية لكل حب حكاية الفصل الثالث 3 بقلم محمد منصور
وبسم الله توكلت علي الله وهو رب العرش العظيم
وهنا وبالصدفة عيون مليكة تيجي في عيون عز اللي حس قد اية هو محرج منها. وفي نفس الوقت تلاقي امين واقف تحت الشباك بيبص لها وبيبص ل عز انفزعت مليكة ودخلت جري اوضتها وهي بتقول ل سمر
يا ليلتي السوداء
سمر بخضة
في اية يا بت
مليكة
امين شافني. وشكله ناوي لي علي الشر. قفلي دلوقتي اما الحق اتصل. ب ممدوح اخويا. يجي يلحقني من ايدة
وقفلت سمر واتصلت مليكة ب ممدوح لكن موبيله كان مشغول رنت تاني وتالت وهنا لقيت باب الشقة بيترزع اتفزعت وراحت تقفل باب اوضتها بالمفتاح لقيت الباب اتفتح وامين في وشها بصت له وهي مرعوبه وقالت
وعهد الله لو ضربت او مديت ايدك عليه ل اضربك انا مش بخاف منك. فاهم ولا. لا.
ابتسم امين وهو بيقول في سرة
بلاش الضرب دلوقتي مع اني كنت طالع اكلك بسناني. لكن ناجل الضرب شوية بلاش ابقي غشيم. مليكة دي هبلة وممكن تطلع مظلومة. واللي اسمه عز دة بجح فيها لما عرف انها اختي
كل الحوار دة بيدور جوة دماغ امين ومليكة بتبص له وبتقول
انت بترسم خطة علشان تعرف هتبدأ تضربني من فين. انا عارفة كل حاجة
امين بمكر
واضربك لية بس يا عسل. دة انتي اختي حبيبتي
مليكة باستغراب
ودة من امتي
امين وهو بيحط ايدة علي كتفه وبياخدها تحت باطة. قال
طول عمرك وانتي اختي حبيبتي
مليكة بصت له باستغراب شديد جدا وقالت
حاسة انك هتقتلني وتدفني تحت السرير
ضحك امين وقال
لية يا بت. شيفاني عبد العال جوز ريا.
مليكة في سرها لكن صوتها كان طالع برة
انت ريا نفسها
امين بص لها وضحك تاني وقال
وربنا انتي هبلة. انا سمعتك علي فكرة
مليكة
انا ماقولتش حاجة
امين
طيب مش مهم وروحي سخني لي لقمة اكلها
ومسك امين راس مليكة وباسها في جيبنها وفي الوقت دة يدخل للاوضة عماد اخو مليكة التاني وهو بيقول
شيل ايدك عن مليك،،،،،،،
لكنه استغرب لما شاف امين بيعمل كدة وقال امين
في اية يلا
عماد
عمي وعم عيالي. دة انا كنت معدية قولت افوت اخد الجمعية. عايزين حاجة
وخرج عماد تاني من الاوضة وبعدي خرج امين وبعد امين خرجت مليكة وراحت المطبخ. تسخن اكل ل امين دخل امين اوضه من هنا قام عماد جري وراح دخل وراء من مليكة المطبخ ووقف جنب منها وقال وهو بيبص علي جيبنها
انتي محتاجة تطعمي ضد الفيرس بعد البوسة دي
ضحكت مليكة وهي بتحط الحلة علي النار وقالت
انا والله مستغربه ان امين بقي حنين كدة عليه
عماد
دي سمر صحبتك كلمتني وقالت الحق اختك امين هيقتلها سبت اللي في ايدي وجيت جري
مليكة
انا كمان قولت كدة. انت لو سمعت رزعت الباب كنت قولت اما اروح انادي الحانوتي يجي يلحق حاجة اي حد فيا تنفع تدفن
عماد وهو بيضربها في ذراعها ضربه حبيب
بعد الشر عليك يا قمر انت. دة وربنا من بعدك اضيع
مليكة
قلب اختك من جوة.
عماد
خلي بالك انا كنت هخرب الدنيا مع عز. بسبب اللي عمله. بس ممدوح قالي انه خلاص اعتذر والحوار خلص
مليكة
ما تفكرنيش ورحمة امك. دة انا لغاية دلوقتي مش عارفة ازاي دة حصل
عماد
حصل خير بس اهو درس يارب تتعلمي بقي. مش اي حكاية تدخلي فيها بقلبك حكمي العقل وشوفي اللي هتعملي دة ينفع ولا. ما ينفعش
مليكة
وان طلع ما ينفعش
عماد وهو بيضحك
اعملي علي طول وانتي تخربي واحنا وراك نصلح يا قمر
ومسك دماغها ولسة هيبوسها افتكر بوسة امين فراح بابسها في قفاها وقال
مع ان قفاكي شبه كعب رجلك لكن كدة احسن
بصت مليكة لكعب رجلها وقالت
وهو ماله كعب رجلي
عماد وهو رايح يخرج من المطبخ. قال
قمر يا قمر.
مليكة وهي بتبعت بوسه علي الهواء
وربنا انت اللي قمر. يارب والنبي عريس زي الواد دة. حتي لو اسمه عز انا راضية. يا. يا عز.
وفضلت سرحانه شوية في عز. وهوب شمة ريحة شياط بصت للحلة وقالت
يا ليلة كحلي. امين هينفخني، ،،،،،،،،،
ودخل عماد اوضه اللي بينام فيها مع اخو التاني عمر اللي قاعد علي اللاب بتاعه وبيبص بطرف عينه ل عماد اللي بيغير هدومه وبيقول
هو انتم اية حكايتكم. البت دي بتعرف ازاي تاكل بعقلكم حلاوة
استغرب عماد وقال
بت مين
عمر
مليكة هانم
عماد
والله افتكرت بتتكلم عن واحدة غريبة
عمر
ما هي فعلا. غريبة. في تصرفاتها. وغبية في قرارتها. ورغم كدة كلكم بتحبوها. حتي البلطجي امين. اخوكم بدل ما يكسر عضمها دخل وباسها وكان ناقص يديها كاس العالم في قلة الادب
عماد باستغراب
هو انت بجد ولا بقيت مجرد سوفت وير ونسخة ويندوز. زي اللاب اللي علي حجرك. انت بتتكلم عن اختك مش واحدة جايبنها من الشارع
عمر
بحكم العقل هي غلطت وكان لازم تتعاقب.
عماد وهو بيقعد قدام عمر
والقلب ملهوش مكان في دنيتنا دلوقتي
عمر
القلب بيخسر اي حد يمشي وراء منه. وانتم دلعته مليكة زيادة عن اللزوم ولازم تتربي
عماد باستهزاء
ونربيها ازاي بقي يا عم الانسان الاندرويد
عمر
تتعاقب بانها ما تنزلش الشارع تاني ل غاية ما تتجوز وبعد كدة جوزها يبقي حر فيها
عماد
مش كفاية انا شايف اننا كمان كل سيجارة نخلصها نطفيها بين حواجبها. اول اقول تروح تجيب مية نار ونرمي علي وشها يمكن لما تبقي وحشة نطمئن انها ما تحبيش لينا العار
عمر وهو لسة بيبص في اللاب قال
هو دة اللي انت شاطر في. تتريق. ربنا ابتلاني في اخواتي الكبير عامل فيها بابا الشيخ والتاني بلطجي وسوابق وانت مجرد حد تافة مالكش اي قيمة في الدنيا. ومليكة عيلة هبلة ملهاش برضو اي لزمة في الدنيا. وشيماء. واحدة كان كل همها تتجوز. وتبقي زي الجاموسة العشر
عماد
وانت اية
عمر بص له وقال
انا الباشمهندس عمر.
عماد
العاطل. اللي انا واخوة الشيخ بياكلو. تخيل التافة واللي عامل فيها بابا خيرهم عليك.
وقفل عماد اللاب بمنتهي العصبية وقال
اللاب دة. انا جيبته ليك بفلوسي. هدية عيد ميلادك
ومسك عماد هدوم عمر وقال
الترينج دة بفلوس ممدوح.
ومسك عماد الملايا اللي عمر نايم عليها وقال
ودي ملايا شيماء. الجاموسة العشر
ومسك طبق فاضي كان مطرحة اكل وقال
الطفح اللي كان هنا. عملته ليك مليكة الهبلة.
وقال عماد بعصبية
كلنا خيرنا عليك. وفي الاخر ما حدش فينا عجبك. مليكة مش هبلة مليكة بت جدعه وطيبة واخدة الدنيا ببساطة مش معقدة زيك. طول عمري اعرف ان الغيرة في النسوان لكن اول مرة اشوف راجل بيغير ومن مين اخته. يا اخي جتك القرف، ،،،،،،،،،،،،
وبعدها بيوم ووقت ما كان واقف قدام الصيدلية بتاعته بيكمل تصليح اللي باظ فيها تيجي عينه في عين مليكة اللي عملت نفسها بتنفض شباك اوضتها وعز ابتسم وقال لنفسه
هو اية حكاية مليكة دي. كل ما ابص بالصدفة القيها بصة ناحيتي. عايزا اية بس. هتعوز اية من واحد قليل الذوق زيك. فرج عليها الشارع ما عرفتش تعمل راجل علي ضربوك لكن عرفت تعمل راجل علي بت غلبانه. بت زي القمر. البت اللي زي دي ما ينفعش تتعامل معها بقلة ذوق كدة.
ورجع يخطف كمان بصة بعيونه ولسة هينزل عينه سمع صوت امين بيقول
في حاجة وقعت منك فوق
وبص امين ناحية شباك اختة اللي شافته وعملت نفسها بتنفض اوي. بص عز ل امين وما ردتش ودخل الصيدلية دخل وراء منه امين وقال وهو بيبص للصنيعية اللي شغالين والصيدلية المتبهدلة
يا. للدرجة دي احنا كنا غشم. دة الصيدلية اتبهدلت خالص.
عز بحدة
افتكر اني واخد عهد عليك في القسم بعدم التعرض
وما حبكش تدخل الصيدلية عندي
امين
بس انا ما بتعرضش. انا داخل اشتري برشام
عز
ما عنديش ليك اي حاجة
امين
لية بس يا صاحبي
عز
انا مش صاحبك ومن فضلك اطلع برة
امين
انت قلبك اسود اوي.
وقرب امين من ودان عز وقال
بس يا تري قلبك اسود مع الناس كلها. ولا في قلبك حكاية حلوة ل حد حلو
عز
تقصد اية
امين
اقصد ان باب قلبك لو فتح غلط. او فكرت تلعب بحد يخصني. هوريك غشيم زيي يعرف يعمل اية
عز
اية هتضربني تاني
امين
المرة الجاية مش ضرب. المرة الجاية قطع رقبه
وخرج امين من الصيدلية وعز بيبص له بقرف شديد وهو بيقول
باين عليه غلط يوم ما طلعت من الحجز حيوان زي دة ،،،
وخلص عز الصيدلية ورجع يفتحها تاني ووقف فيها واستغل امين ان مليكة كانت بتروق الشقة والتراب اللي طلع من الشقة خلاها تكح جري عليها امين وقال
برضو كدة تتعبي نفسك. تعالي اقعدي ارتاحي
مليكة لسة مستغربه وقعدت جنب امين اللي قال
انتي لازم تجيبي دواء كحة علشان صدرك يهدي
مليكة
ملهوش لزوم انا هبقي كويسة
ولسة هتقوم مليكة علشان تكمل ترويق الشقة قعدها امين وهو بيقول
والله ما تعملي اي حاجة في الشقة الا لما تجيبي دواء والكحة تبطل
مليكة
امين انا عندي شغل كتير والنبي سيبني اخلص
امين
انا حلفت الصيدلية جنبينا اهه هتروحي وتقولي له عايزا ازازة دواء كوادفين
مليكة
واشمعني كوادفين دة
امين
دة حلو للكحة
مليكة
طيب لما اخلص اروح اجيب
امين
انتي يا بت عايزا توقعي يميني في الارض انتي هتروحي دلوقتي
مليكة
يعني لسة هقلع والبس العباية
امين
حطي العباية فوق الهدوم علي طول. يا بت انا خايف عليكي
مليكة
انا ما عرفش انت مالك اليومين دول
امين
غلطان علشان خايف علي اختي حبيبتي
مليكة
طيب ما تروح تجيبها انت
امين
انا. حد الله اخش صيدلية اللي اسمه عز دة
مليكة
انا كمان مش عايزا اروح هناك
امين
هي اقرب صيدلية وان كان علي اللي حصل دة خلاص حوار ومات. وعز اعتذر
مليكة
يعني عادي لو روحت
امين
طبعا. دة اخوكي يا بت ولو فيها ضرر عليكي هسيبك تروحي برضو
مليكة
خلاص ماشي هلبس العباية واروح علشان يمينك ما يقعش، ،،،،،،،
ومن اوضة مليكة يقف امين وراء شيش الاوضة اللي كان مقفول ويبص من وراء الشيش علي مليكة وهي داخلة الصيدلية وكان بيقول ل نفسه
انا اهو صبرت عليك يا عز وعلي بصاتك من تحت ل تحت ل اختي وجه الوقت اللي بي هعرف انت اتنازلت عن المحضر علشان في غرام بينك وبين اختي ولا. اتنازلت وخلاص. لو اديتها الدواء يا عز. طيب حكمت علي نفسك ب الموت. ومليكة هكسر عضم وشها اخليها ما تنفعش تاني
بس تخرج بازازة الدواء اللي انت قولتي ما بيطلعش الا بروشته .
وفضل يبص علي باب الصيدلية ويقول بغضب مكتوم
هي البت دي اتاخرت لية دة كله. طبعا تلاقي الاثنين واقفين يرغوا مع بعض ويقالو عرفنا نضربهم علي قفاهم وقال اية مليكة تروح له الصيدلية ويعملو نفسيهم انهم اتخانقو مع بعض. وانا خروف وابلعها
وفي الوقت دة تخرج مليكة من الصيدلية ويبص امين بسرعه علي ايدها علشان يشوف ازازة الدواء خدتها ولا. لا. ف يلاقي، ،،،،،،،،،،،،،،،،