انا شفيقة بنت الحج عبد الهادي من اقدم الناس في كفر شكر وللي ما يعرفش فين كفر شكر دي ف دي بالقرب من بنها او تقدرو تقولو في بنها اصل بنها دي محافظة كبيرة المهم الحج عبد الهادي ابويا داخل علي السبعين هو بالظبط عنده 68 سنه وعايز يجوزني قبل ما يموت ما هو ما عندوش غيري وكمان هو اتجوز كبير بعد ما عدي الاربعين وخلفني اول ما تم الخمسين يعني بعد 10 سنين جواز وما تعرفوش هو بيحبني قد اية ولما تميت ال18 سنه واتقدم لي اربع عرسان وانا يوم ما وافقت علي واحد منهم اخترت اخر واحد كان موافق عليه ابويا وهو يونس عامل بسيط باليوميه في اراضي الفلاحين اصحاب الاملاك اللي ابويا واحد منهم ومن اللحظة دي بدات حكايتي
مستوحاة من احداث حقيقية من ملفات المحاكم الجنائية حدثت بالفعل في سنه 1983 واتعملت مسلسل اذاعي
جريمة كفر شكر
اقتباس وكتابه
محمد منصور
**منص**
وقبل ما نبدأ نوحد الله ونصلي علي خير خلق الله سيدنا محمد
صلاة تحل بيها العقد وتفك بيها الكرب
**مش هتجوز الا يونس يا با وبلاش و حياة حبيبك النبي تخليني اعيش مع حد غيره**
دة اللي انا قولته ل ابويا عبد الهادي لما كنا قاعدين في قلب بيتنا بعد ما غديته وعملت له الشاي وهو رد عليه وقال
الله ما صلي عليك يا نبي لكن يا شفيقة دة عامل بالاجرة يعني يوم مع فلوس ويوم لا تربطي نفسك بواحد زي دة لية
شفيقة
علشان ابن حلال يا با واجدع راجل في البلد يتشرف لما يونس يرمي عليه السلام وكفاية يا با انه حنين عليه زيك
عبد الهادي
بقي ترفضي سليمان ابن شيخ البلد علشان يونس
شفيقه باستهزاء
سليمان بعد اللي عملو في مرسي انا يستحيل اعيش مع، ،،،،،،،
ونرجع بالاحداث لكام يوم وراء لما اهل البلد كلهم كانو واقفين قصاد بيت شيخ البلد اللي اسمه عويس وابنه سليمان ماسك حرامي من جلبيته وبيقول
دة شرع ربنا وانا دلوقتي مكان ابويا العيان ولازم اقطع ايد الحرامي اللي كان في بيتنا بيسرق ذهب امي واخلي عبره لاي حد يفكر يسرق في كفر شكر
يطلع من وسط الناس شيخ الجامع اللي اسمه ناصر ووقف قصاد سليمان وقال
مش من حقك تعمل كدة سلم الحرامي للمركز وهما يتعاملو مع
سليمان
بقي انت اللي بتقول كدة يا شيخ الجامع دة انت المفروض حافظ لكتاب الله وسنته و الدين بتاعنا قال نقطع ايد السارق علشان يكون عبره وسيدنا محمد قال لو ان فاطمة بنته سرقت،،،،،،،
الشيخ ناصر قاطعه وقال
يا ابني افهم الكلام دة ما بيطبقش في زمنا دة احنا تبع دوله وليها قانون ما ينفعش تقطع ايده انت مش ولي الامر
سليمان بجبروت
انت قاطعتني وانا بتكلم
و اكراما ل سنك انا مش هحاسبك لكن هتوقفني عن تنفيذ شرع ربنا هعتبرك مع الحرامي ومش هعمل احترام ل سنك او مقامك
ومسك ايد الحرامي الشمال وحطها قصاد منه علي تربيزة معدن وقال
من النهاردة شرع ربنا هيطبق في كفر شكر
و طلع سافوريا من عبايته ونزل بيها علي ايد الحرامي الشمال قطع له الكف قصاد اهل البلد كلهم،،،،،،،
ونرجع ل شفيقة اللي قالت
ل ابوها
تأمن عليه ازاي و تجوزني واحد زي سليمان دة
عبد الهادي
خلاص بلاش سليمان اتجوزي بيومي افندي بوسطجي المركز اهو موظف قد الدنيا ومتعلم
شفيقة
عايزني اتجوز حرامي يا با بيفتش في اسرار الجوابات اللي مع لا وكمان ايدية طويله ولا انت نسيت اللي حصل، ،،،،،
ونرجع بالاحداث ل كام شهر وراء لما اهل البلد اتلمو علي صوت الست مديحة وهي ماسكة في هدوم بيومي وبتقول
يا ضلالي يا حرامي ابني باعت لي 50 ج مع جوابه اللي جاي من مصر وانت تديني الجواب ما فيهوش
ولا مليم
بيومي نزل ايدها بعيد عنها وقال
بقول لك اية يا وليه انا مش حرامي وهو الجواب جاي من مصر كدة
مديحة
جاي كدة ازاي وهو كلمني في التيلفون الارضي عند عم صابر البقال وقايل لي هبعت لك 50 ج في الجواب اللي جاي لك واهو الجواب جه ومافيهوش ولا مليم
بيومي
وانا مالي يا وليه الجواب زي ما استلمته من البوسطه جبته ليكي
مديحة مسكته من هدومه تاني وقالت
لا يا شيخ يعني مش انت اللي بتفتح الجوابات قبل ما تسلمها ل اصحابها دي البلد كلها عارفه وساختك
بيومي قدر يبعد ايدها بعيد عنها تاني وقال
انت وليه كذابه ولو تعرفي انتي ولا غيرك تثبتو عليه حاجة اثبتو
وزقها بعيد عنها وقال باعلي صوت عنده
بوسطي،،،،،،،،،
ونرجع تاني ل شفيقة اللي قالت ل ابوها
تقبل علي بنتك الوحيدة تعيش مع راجل ياكلها حرام
عبد الهادي
بس ما حدش قدر يثبت عليه اي حاجة
شفيقة
يا با اهل البلد غلابه وهو متعلم و دماغه ما فيش زيها في الشر تفتكر يعرفو يثبتو علي اي حاجة
عبد الهادي
طيب كدة سليمان وبيومي بلاش منهم خدي ابن عمك رفعت
شفيقة
رفعت اللي ابوه سرق ارضك زمان وبدل ما كنت تمتلك 10 فدان بقي عندك 4 بس
عبد الهادي
يا بنتي دة كان زمان ودي حكاية بيني وبين عمك وخلصت وانا مسامح ما هو خلاص مات وابنه رفعت غيره و شاريكي دة هو حتي رجع لي فدانين من ارضي
شفيقة
بعد ما كبرت وقلبي ما بقاش جوة منه الا كره عمي وعياله جاي تقولي شاريني انسي يابا اني اتجوز رفعت دة كفايه انه متجوز عقربه اسمها حوريا ولا نسيت هي جت هنا وعملت اية، ،،،،،
ونرجع بالاحداث لكام شهر لما كان رفعت في البيت عند عمه عبد الهادي و قال
كل الارض اللي حيلتي هكتبها باسمها بس هي ترضي و تقول امين
هنا شفيقة وقفت قصاد منهم وقالت
اقول امين علي اية يا رفعت يا ابن عمي
رفعت بص لها بحب شديد حب بجنون وقال
تقولي امين علي جوازنا يا بنت عمي
شفيقة
روح لمراتك يا رفعت وربي عيالك
رفعت
معني اية الكلام دة يا بنت عمي
شفيقة
انت عارف معني اية وبلاش نحكي كتير انا مخطوبه
ل يونس زينه شباب الكفر
رفعت
ترفضيني انا علشان اجري باليوميه ما جبهوش يشتغل في الارض عندي
شفيقة
ارضك اللي هي في الاصل ارض ابويا اللي ابوك ضحك عليه واستغل طيبته وخدها منه
عبد الهادي
ملهوش لزوم الكلام دة يا شفيقة
رفعت
ما انا رجعت له منها فدنين وقريب هشتري من اخواتي باقي الارض وارجعها لابوكي
عبد الهادي
تشكر يا ابني
شفيقة
يا با بطل طيبة دة حقك ولازم يرجع ولا هو ما حليش رجوعه الا لما انا حليت في عيون رفعت
رفعت
سامع يا عمي كلام بنتك
عبد الهادي
عيب يا شفيقة مش كدة
في الوقت دة يسمعو خبط علي باب البيت راحت شفيقة تفتح ولقيت قصاد منها حوريا مرات رفعت بتبص لها من فوق ل تحت وقالت
ازيك يا حلوه
شفيقة
والنبي ما في احلي منك عايزا جوزك مش كدة
حوريا
عرفتي ازاي
شفيقة
ما هو رنه شبشبك ما بنسمعاش في بيتنا الا لما جوزك يكون عندنا
حوريا زقتها بعيد عنها ودخلت البيت وبقيت شفيقة وراء منها وقالت
زعلانه من رنه شبشبي في بيتكم وعادي لما بقيت رنه البلغا بتاعي جوزي علطول عندكم
رفعت قام وقف وراح ناحية حوريا وقال
اية اللي جابك هنا يا حوريا
حوريا
سالت عليك الانفار اللي شغالين في الارض قالو انك هنا قولت اجي اشوف في اية
رفعت زقها في ذراعها وقال
ما فيش ويلا ارجعي بيتك
حوريا بصت ل شفيقة اللي كانت احلي منها وقالت
مش هرجع من غيرك اصلي عايزاك
رفعت
روحي دلوقتي وانا شويه
و جاية وراك
حوريا
لا دلوقتي والا صوتي هيعلي وهقول اللي يخلي الكفر كله يحكي ويتحاكي بي وتبقي فضيحة
رفعت بعصبية
فضيحة اية يا مراة انتي جايه هنا تخرفي
حوريا
اخرف ولا انت اللي بتخرف لما تكتب فدانين باسم عمك علشان ترضي عنك الحلوة وابوها يعمل نفسه مش شايف اللي بينكم
وبصت تاني ل شفيقة اللي قالت
بقول لك اية خدي جوزك وامشي وبلاش غلط
والا كلمة تاني هنسي انك في بيتي وهسمعك اللي يخليك تكرهي نفسك
حوريا بصوت عالي
دة انتي بجحه بجاحه بقي عايزا تتجوزي جوزي وزعلانه اني بتكلم طيب واللي خلق الخلق ل اكون معلماكي الادب يا بنت عبد الهادي
و هجمت حوريا علي شفيقة ومسكتها من شعرها و بدات بينهم خناقة انتهت ب رفعت اللي خد مراته وخرج بيها من البيت، ،،،،،،،،
ونرجع تاني ل شفيقة اللي كانت بتقول ل ابوها
انا ماليش الا يونس يا با هو خطيبي وقريب هيكون جوزي وسندي ومش عايزا حاجة من الدنيا غيره، ،،،،،،
وتعدي الايام قبل جواز شفيقة من يونس ب شهر كان يونس واقف تحت شجرة في ارض الخواجة
و بيتكلم مع حد وشه كان في الظلمة وقت ما جت شفيقة من وراء يونس ونزلت بالفاس علي دماغه ضربه واحدة بكل قوتها لكنها كانت كفاية اوي علشان يقع بعدها يونس علي الارض سايح في دمه بصت له شفيقة وفضلت تعيط وهو بينزف وبيتوجع لكنها نزلت فوق منه بضربه تانية كانت القاضية بعدها مات يونس رميت الفاس ونزلت علي الارض حضنته وبصت للشخص اللي واقف في الظلمة وملامحة مش باينه وقالت
انت السبب روح منك لله انت اللي خلتني اعمل كدة في حبيبي
ورجعت تاني حضنت يونس وهدومها بقيت كلها دم،،،،،،،
ايوة يا بابا جاي اهو