رواية حبشتكا الفصل الاول1بقلم حياة محمد الجداوي
رن جرس الباب بصوره متكررة فتحت الباب سيده في الأربعين
أحمد: مساء الخير يا فندم معاكى محمد رمضان من الشركه الدوليه العالميه للأدوات المنزلية
بصت له أم حسين وقالت: الله يسهلك
أحمد : إيه الله يسهلك دى هو انتى شيفانى جاى اشحت منك لا ده أنا مندوب محترم لشركه محترمه
ام حسين: شركة إيه دى .ده انت بتبيع شويه بلاستيكات على شويه كوبايات ولا دى شركه من تحت السلم
احمد: مين اللي قالك إنتى عارفه قيمة البلاستيكات دى إيه وهتكسبك إيه
ام حسين يزهق: لا معرفش ليه؟
أحمد: لأن دى عروض يتقدمها الشركه إنتى لو اشتريتى منى ب٢٠٠ جنيه بس هتدخلى على سحب على اجهزه كهربائيه هديه من الشركه
ام حسين: سحب إيه هو أنا باكل من الكلام ده تاخد الفلوس وتقولى حظ سعيد المره القادمه صح
احمد (بمسكنه ): بقى أنا هعمل كده طب أنا بقولك اشتري ب٢٠٠ جنيه وأدخلى السحب ولو مافزتيش أنا هرجع لك الفلوس من جيبى
ام حسين: ماشي (( وخرجت ٢٠٠ جنيه من جيبها)
وأدى ال٢٠٠ جنيه
أحمد: اتفضلى إسحبى أى ورقه من هنا
مدت أم حسين إيدها وسحبت ورق و فتحتها بصدمه : إيه ده ده مكتوب مبروك كسبيتى ثلاجه ١٦ قدم
أحمد: مش قلت لك يا فندم ألف مبروك
إستنى هبعت رساله بإسمك على الواتس للشركه
ام حسين بفرحه: تحب أجيب لك البطاقه
أحمد: لا يا فندم كفايه اسمك
وبعد دقيقتين وصلت له رساله فعرضها عليها وقال: شوفى يا فندم دى صورة التلاجه بتاعتك ( وعرض الصورة عليها فإنفجرت أم حسين بالزغاريد)
أحمد: أحمد ألف مبروك يا فندم منتظرينك تيجى مقر الشركه عشان تستلمى جايزتك
ام حسين: و الشركه دى فين
أحمد: في اسكندريه
ام حسين بحزن: ياااه دى بعيده أوى مش هعرف أروحها طب معندكش حل تانى عشان خاطرى
أحمد بابتسامه: فيه طبعا إنك تدفعى مصاريف الشحن والشركه هتبعت لك التلاجه لحد عندك
ام حسين بفرحه: أدفع وماله عايز كام
أحمد: ألف وخمسميت جنيه بس.
ام حسين : كتير متعرفش تهزهم عشان خاطرى
أحمد: عشان خاطر وشك السمح ده هخليهم ألف بس
أم حسين بفرحه: الله يكرمك يا استاذ محمد رمضان الله يخليك أنا هدخل حالا أجيب لك الألف جنيه
&&&&&&&&&&&&&&&&&&&
فى نفس الوقت فى بيت تانى فى نفس القريه
وليد: شوفتى يا أم على قعدتى تترددى لحد ما راحت عليكى الثلاجه
أم على: أنا
وليد: عارفه الست أم حسين إللى فى أول البلد أهى دى دخلت السحب وكسبت الثلاجه
أم على: بجد يا خساره
وليد: مش خساره ولا حاجه إحنا لسه عندنا اجهزه كهربائيه كتيره هتدخلى السحب
أم على: أه هدخل اتفضل ال٢٠٠ جنيه هاخد لهم شويه حاجات
وليد: حلو أوى كده تدخلى السحب يالا سمى بالله واسحبى
سحبت الورقه بفرحه وقعدت تزغرط: كسبت بوتاجاز ٥شعله
وليد: ألف مبروك
أم على: سؤال هو الفرن بالمروحه ولا الفرن عادى
وليد: عادى إيه يافندم هو احنا بتوع العادى بالمروحه طبعا يالا إيدك على ألف جنيه مصاريف الشحن
أم على : اتفضل يا استاذ أحمد عز بس هستلم البوتجاز بتاعى إمتى وإزاى
وليد: يوم السبت الجاى بعد صلاة العصر هتيجى ملعب البلد هتلاقوا كل الاجهزه موجوده وكمان صاحب الشركه هيكون موجود و كمان الكاميرات عشان هنصوركوا فيديو وانتوا بتستلموا الأجهزه عشان تنزلوا في التلفزيون
أم على: بجد ده على كده لازم اتزوق واحط مكياج عشان ابقى زى القمر في التليفزيون
وليد: إنتى قمر من غير حاجة بس بسرعه هانى الألف جنيه عشان أبعت رساله للشركه تسجل أسمك مع الفايزين
&&&&&&&&&&&&&&&&&&&&
وبعد فتره كان احمد سايق العربيه الربع نقل وجنبه وليد
أحمد بفرحه: ياااه ياااه شفت عمليه ميه ميه مااخدتش منا ساعتين إنت كسبت كام
وليد بفرحه: سبع ألاف جنيه غير تمن البلاستيك
أحمد: ياخبتك ده أنا كسبت عشر ألاف جنيه
وليد: يبقى تقسم معايا
أحمد: بعينك عشان تشد حيلك
ضحك وليد وقال: أنا مش مصدق أن شويه بلاستيكات سكه فرز تانى مايسوش يجيبوا كل الفلوس دى
أحمد: لا ده الطمع كل واحدة طمعانه في الغساله والتلاجه بيحسبوا أن فيه حاجه بتيجى ببلاش
وليد: طب هيحصل ايه لما يروحوا الملعب وميلاقوش حاجه
أحمد: يبقوا يشتكوا احمد عز ومحمد رمضان
وبعدها انفجر الإتنين بالضحك
&&&&&&&&&&&&&&&&&&&
فى قسم الشرطة
الرائد محمود: يا فتاح يا عليم يا رزاق يا كريم صول عبدالله إيه الهيصه إللى بره دى
الصول عبدالله: دى ناس جايه تقدم شكوى
الرائد محمود: دول كلهم طب شكوى من إيه
الصول عبدالله : أصلهم اتعرضوا لعملية نصب وواضح إن إللى نصب عليهم شخص واحد
الرائد محمود: طب دخلهم ولا أقولك أنا هخرج لهم
كان الكل بيتكلم والكل بيشتكى
محمود بصوت عالى: بااااااس كله يسكت وعايز واحد بس هو إللى يتكلم
أبو حسين: سبقونا يا بيه نصبوا علينا يا بيه
الرائد محمود: مين دول إللى نصبوا عليكم
أبو حسين: أحمد عز ومحمد رمضان يا بيه
ضحك محمود وقال: ده اكيد انتاج السبكي
ابو حسين:أنا بتكلم بجد يا بيه أخدوا ألف جنيه من كل واحد منا
محمود: طيب خلاص أنا هعرض عليكم شويه صور للمسجلين.نصب يمكن يكونوا هما
وبدأ بعرض عليهم بعض الصور فقال الجميع بصوت واحد هما دول
مسك محمود الصور وقال : أحمد ووليد طه أخين مسجلين سرقه ونصب وإحتيال على العموم أنا هبعت اشاره عنهم لكل مراكز الشرطه وان شاء الله هنقبض عليهم في اسرع وقت
أم حسين: طب وفلوسنا
الرائد محمود: إحنا نقبض عليهم الأول قبل ما يتصرفوا في الفلوس
وبعد ما مشى الناس وهى بتضرب كف في كف قربت أم على من الظابط وقالت: لمؤاخذه يا بيه أنا عايزه اسألك سؤال
محمود: اتفضلى
أم على: إنت يعنى لما تقبض عليهم هتحبسهم صح
محمود: صح
أم على: طب والبتوجاز بتاعى هستلمه إمتى
بص لها محمود بدهشة وقال: نعم بوتاجاز إيه
أم على: البوتجاز الخمسه شعله شوف أنا معنديش مشكله يكون اربعه وراضيه إن الفرن مايكنش فيه مروحه ماشي بس هستلمه إمتى
ضرب محمود كف بكف وقال : تصدقى إنتى حلال فيكى السرقه .
&&&&&&&-&&-&&&&&-&&&&&
فى مكان تانى وهو بيت أحمد ووليد
كان الاتنين قاعدين على السفره وقدامهم الأكل أشكال وألوان
أحمد بتعب: أه يا بطنى أه يا بطنى هموت خلاص الأكل كبس على معدتى مش قادر خلاص
وليد بتعب: آه أكله جامده زى دى محتاجه نحبس بكوبايتين شاى
أحمد شاى من عنيا أنا بس ده أنا هنام ساعتين أهضم الأكل وبعدها هصحى أكمل أكل وأعمل الشاى على طول
ضحك وليد وقال: لا بطريقتك دى هتقوم في المستشفي
أحمد: فال الله ولا فالك ليه يعنى
وليد: عشان إنت حالف تخلص الأكل كله
أحمد: طبعا هو احنا لاقين الفلوس في الشارع ده إحنا تعبنا فيهم
ضحك وليد وقال: في دى عندك حق
وفجأه سمعوا صوت رجلين كتيره على. السلم وخلط شديد على الباب
وقبل مايقوم كان أحمد كان الباب مفتوح
فى قسم الشرطة
خبط الرائد كمال على المكتب بيديه وقال : واد إنت وهو بطلوا لف ودوران واعترفوا يتفسحوا بدل ما اخليكوا تعترفوا بطريقتنا
أحمد بخوف: لا على إيه يا بيه اعترف إحنا إللى نصبنا على الناس
الرائد كمال: حلو أوى فين بقى الفلوس إللى اخدتوها من الناس
أحمد: فلوس إيه يا بيه ما خلاص راحت
الرائد كمال: كلها راحت
وليد: يا دوب يا بيه ويارتها كفت
الرائد كمال: يا سنتكوا السوده صرفتوا ١٧ ألف جنيه في يوم واحد
أحمد: يا دوب ده حتى مفيش معانا فلوس للعشا.
رفع كمال إيديه لقلت حيله وهو بيقول: غيركوا بيصرفوا وعلى بيتهم وعيالهم ب٦ ألاف جنيه شهر بحاله وإنتوا ١٧ ألف وماكفوش. اقول إيه حسبى الله ونعم الوكيل
&&&&&&&&&&&&&&&&&&&&
قضى احمد ووليد ست شهور سجن بتهمت النصب والإحتيال وبعد ما خرجوا
أحمد: أيوه يا فندم معايا على الخط
ردت عليه وقالت: أيوه مين حضرتك
أحمد: مش حضرتك كنتى مقدمه لوظيفه في التشجير
الست : أيوه بس الموضوع ده كان من زمان قوى
أحمد: ماهو إسم حضرتك موجود معايا في الكشف مش حضرتك مدام منال محمد
الست : لأ أنا سعاد صبحى السيد
أحمد: صح يا فندم موجود في الكشف بعد مدام منال طيب أنا عايز أقولك الف مبروك يا مدام إنتى جالك مكافئه من التشجير حوالى ٥ألاف جنيه
سعاد بفرحه: كام ...بتتكلم بجد
أحمد: أه طبعا والفلوس جاهزه حالا للتسليم معاكى فيزا عشان احول لك الفلوس عليها
سعاد: أه معايا
أحمد: حلو أوى طب جيبي الفيزا بتاعتك كده عشان أتأكد من البيانات قبل ما أبعتهم لك
سعاد: بس كده عنيا ثانيه واحده....أهى معايا
أحمد: حلو أوى طيب الأرقام الموجودة على الڤيزا قوليها لى كده من الشمال لليمين
سعاد: حاضر بس ركز معايا كده وأنا هقول الارقام واحده واحده
أحمد: طب الأول عارفه فيها كام عشان يعنى لما ابعت الفلوس تعرفى
سعاد: أه عارفه أصلها فاضيه فيها حوالى ١٥٠ جنيه
أحمد في سره( بس يا معفنه)
وبعدها قال:طب هقولك حاجه بلاش الڤيزا عشان هتاخد وقت إنتى عندك فودافون كاش
سعاد: لا والله
أحمد: طيب فيه مكتب قريب منك
سعاد: أه في أخر الشارع
أحمد: طيب حلو أوى روحى المكتب وخلينى أتواصل مع اللى بيشتغل فيه بس ماتقوليش له عن المكافئه بتاعتك قولى له إنى أخوكى وهحول لك فلوس
سعاد: حاضر أنا نازله اهو
سعاد:: أنا دخلت المحل استنى أكلم الموظف....يا استاذ عمرو ده اخويا هيحول لك فلوس خد التليفون واعمل إللى هو عايزه
أحمد: بص يا استاذ عمرو هى مدام سعاد فاتحه الإسبيكر
عمرو: أيوه
أحمد: طيب إقفله واسمع منى
عمرو،: حاضر.... ماشي....خمس ألاف
سعاد: ماتخلص بقى يا عمرو عشان هتأخر بقولك هات الفلوس وإبقى خلص معاه براحتك
عمرو: أجيب لك إيه ده إنتى إللى هتدفعى
صرخت سعاد: إيه
عمرو: أه بيقول احول له خمس ألاف وانتى إللى هتدفعى
سعاد بفزع: أدفع إيه وقف كل حاجه ده لا اخويا ولا اعرفه
أحمد: الله يخرب بيتك يا شيخه كان خلاص خطوه وحده ويحول .
&&&&&&&&&&&&&&&&&&&&
قعد وليد جنب أحمد وقال: مالك شايل الهم كده ليه
أحمد: أنا فشلت كنت خلاص مابينى وبين الفلوس تكه وفجأة بنت الناصحه توقف التحويل و كل حاجه راحت
وليد: سيبك منهم إللى فات مات وتعال معايا أنا عايزك في مصلحة
أحمد : هتعمل ايه
وليد: لا دى حاجة جديدة لانج هعرفك وإحنا في الطريق