رواية غدر وقدر الفصل الاول1بقلم دانيا
بين خمسه قُرى يضمهم سوق واحد " جميع سكان القرى الخمسه بجتمعوا وبشتغلوا في سوق واحد نسبة لصغر المساحه وكثافة السكان في المنطقه وكل حتى المدارس في مدرسه واحده اساس اما الثانوي مافي طريقه إلا نمشي المدينه عشان نقدر نقرأ وكذلك المركز الصحي واحد جنب السوق ".
اسمي غفران بدرس في الصف الثامن اساس وخلاص الإمتحانات على الأبواب والدنيا رمضان طلعت من المدرسه قريب الظهر مع صحبتي هاجر ودعتها هي مشت على السوق لأنو م ساكنين في نفس القريه .... وانا اخوي الأصغر مني طوالي كان منتظرني بكارو الحمار عشان اركب معاهو ونرجع البيت والشمس تلفح وحاسه عروقي نشفو من العطش .
مشيت ركبت معاهو وساق الحمار ماشين على البيت طلعت لي كتاب من شنطتي ختيتو على راسي وقلت لأخوي " يا معتز دق الحمار دا خليهو يمشي بسرعه العطش داير يقتلني " قال لي سمح .
وصلنا البيت حاسه عيوني بشوفن طشاش طشاش دخلت جوا لقيت امي بتجهز في الفطور قالت لي تعبتي الليله خشي ارتاني .... مشت نمت م صحيت إلا قريب المغرب على صوت اخوي معاز الأصغر من معتز عمرو عشرة سنه جاء قال لي قومي ساعدي امك دي خلي نايمه زي البرميل ،، قمت اتزهجت فيهو قلت ليهو خليني انوم يا عارض انت امي جات داخله قالت لي هوي يا بت احترمي نفسك تتنهري في اخوكي كيف يعني دا بدال ما تحترميه قلت ليها ياامي احترم ليهو شنو هو المفروض يحترمني الأكبر منو ؟
قالت لي الولد ولد لو كبير او صغير تحترميهو " بت وكمان دايرة تقلي ادبك " للحظه دموعي جرن قلت ليها انتي دائماً بتعملي فرق بيناتنا يعني شنو بت ويعني شنو ولد ؟ في النهايه البعملو الولد ممكن تعملوا البت وفي بنات بكونن احسن من الأولاد .... تشوفو بكره لمن اقرأ واتخرج ح ابقى احسن من الف ولد بفتخرن بيهم امهاتهم .
عاينت لي بطرف عينها واخواني بدو يضحكوا طوالي قالت لي كدي امشي حلي العصائر دي انتي قايله نفسك ح تقري جامعه يعني ؟ م عندنا بت بتقرأ جامعه نحن انتن البنات من غير جامعه الله يستر منكن .... حدك السنه دي بس نحن بنعلمكن عشان تعرفن الصاح من الغلط وعشان تقدرن تزاكرن لأولادكن بعدين .
كلامها حسينو زي الخناجر في صدري قعدت ابكي وقلت ليهم ياحليلو ابوي لو كان هنا م كان قدرتو تقولوا كلامكم دا " الله يرحمه " ومشيت منهم بقيت بعمل في العصير والعبره خانقاني .... بكره الصباح مشيت المدرسه برجليني م انتظرت معتز يجهز الحمار زاتو قلت ليهو تعالوا فيهو انت ومعاز.