رواية غدر وقدر الفصل الثاني2بقلم دانيا
صلوا على النبي.......
طلعت الصباح من الساعه سته عشان قررت امشي برجليني المدرسه والطريق طويل شديد امي كانت بتعمل في الشاي لأخواني من شافتني مارقه قالت لي ماشه وين يابت من الوقت دا ما تستني الأولاد يشربو الشاي عشان يمشو معاكي !! قلت ليها م بقدر وعدت جاهر إنو اجي بدري عشان ازاكر ليها رياضيات قالت لي كويس .
طلعت من البيت لقيت معتز بجهز في الحمار برا جنب الباب قال لي غفران مالك ماشه برجولك استنيني دقيقه واحده هسي بشرب الشاي وبجي طالع ... قام جاري جوا قلت ليهو لا يا معتز تعالوا فيهو انت ومعاز اشربو على راحتكم الزمن بدري .
ماشه في الشارع بين الأشجار وزقزقة العصافير واشعة الشمس الحمراء وقت الشروق ومخي المليان افكار من جهة احلامي بإني اقرأ واصبح زوله ناجحه واشيل مسؤلية امي واخواني واقدر اطلعهم من المستنقع الهم فيهو دا .... وعلى الأقل اتحمل مصاريف نفسي ومصاريفهم لمتين نحن نقعد نعتمد على غيرنا في معيشتنا ماممكن ابداً ،، واثناء ما انا بفكر في بعدين قاطع تفكيري كلام امي الدائماً بتسمعني ليهو وإنو هي شايفه إنو البنات م ليهن مستقبل غير يعرسن ويطيعن ازواجهن ودي اكتر حاجه بتكسرني من جوا .
وصلت المدرسه وانا كل زهج وطاقه سلبيه لاقيت هاجر في الباب سلمت عليها وخشينا جوا بقت تعاين لي قالت لي مالك ياغفران انا حاساكي متضايقه في شنو ؟ دموعي نزلن والعبره خنقتني ... قعدت في اقرب مسطبه وختيت يديني في وشي وهي قعدت جنبي وبقت تسأل فيني مالك يابت قولي خوفتيني ،، قلت ليها بصوت متقطع من شدة الوجعه حسيت حلقي اتربط قلت ليها " كالعادة يا هاجر نفس الكلام الجارح دائماً " حضنتني وقالت لي روقي يا غفران والله انا م عارفه اقول ليكي شنو ؟ دا مجتمعنا ونحن عارفنو وعارفين كيف بفكرو ودائماً مفضلين الولد على البت في اي شيء لكن انتي م تفكري في الحاجه دي كتير انتي عارفه الإمتحانات قربت لو بقيتي تفكري في السلبيات كتير م ح تقدري تركزي في قرايتك ولو على تفكير امك هي في النهايه امك واكيد م ح تريد ليكي غير الخير وبكره لمن تشوفك نجحتي وجبتي درجه عاليه اكيد ح تغير رايها خاصةً انو انتي شاطرة والشاطرين مجهودهم م بضيع ساي تتزكري كم بت نجحن شالوهن منحه .
كلام هاجر ريحني وحسيت بالأمل اخيراً مسحت دموعي وقلت ليها كلام صح انا لازم اتفوق عشان اقدر اغير راي امي دي ياريت بس لو هي تقدر تفهم إني مجتهدة عشانهم اكتر من إني اكون مجتهدة عشان نفسي ... قالت لي بجي يوم وح تفهمك وتقيف معاكي خلي املك باالله كبير قلت ليها ونعمه باالله ،، انا والله الوضع العايشنو دا كله م عاجبني بقيت بخجل عديل من ناس عمي ديل لمن اخوي يمشي يجيب منهم القروش بداية الشهر نحن لمتين نقعد نعتمد على " إبراهيم "!؟.
عند إبراهيم :
اسمعني يامعلم القروش دي رسلهم كل مبلغ براهو زي ما اديتك ليهم واكتب على كل ظرف واحد اكتب عليهو ابوي والتاني اكتب عليهو بيت عمي وم تنسى ترسل ليهم تحية العيد يلا سلام .... سلمت القروش لبتاع التحويلات وقمت ماشي ناداني وقال لي استنى يا مستر " جولص " وقفت عاينت ليهو وقلعت النظاره وقلت ليهو نعم ؟؟ دنقر في الجهاز حقو قمت رجعت عليهو عاين لي وقال لي في رساله ليك !! اتأفأفت وقلت ليهو ااي ااي ما كالعاده رد على ابوي دا وقول ليهو وانت بخير وانا كمان مشتاق ليكم وبس انت كل مره بترد هسي الإختلف شنو ؟ .
قال لي انا م رديت لأنو المره دي الرساله اختلفت الشخص إختلف .... عاينت ليهو بإستغراب ورفعت حاجبي وقلت ليهو قصدك شنو انت ؟ قال لي المره دي الرساله م من ابوك من امك الرساله ،، زاد إستغرابي اكتر قلت ليهو سريع اقراها لي دنقر في الجهاز حقو وقال لي الرساله بتقول " السلام عليكم ولدي وضوء غيوني علك كويس .. انا الليله جيت السوق بدل ابوك عشان هو عيان ولو م غلطانين دا نفس مرض عمك بعد الشر وربنا يكضب الشينه وهو طالب شوفتك منيتو يشوفك بس وقال كان ما جيت م عافي منك والقروش الداير ترسلها لينا للعيد دي خليها معاك يا تجي بيها انت يا إما تاني ما ترسل لينا ... من امك البتريدك " .
في اللحظه دي حسيت بشيء جواي إنهار كلياً بقيت واقف وبشوف ضلام ... قاطع تفكيري صوت بتاع التحويلات وهو بقول لي " اها يامستر قررت شنو "؟ عاينت ليهو مسافه وبعدها قلت ليهو رسل القروش ورد على الرساله واكتب ليهم " سلامتو ابوي تاج راسي وتسلمي لي امي الغاليه وانا بإذن الله بعد العيد بكون معاكم بس حالياً الشركه فيها نقص موظفين وانا سادي خدمه م بقدر اجي هسي " كتب الكلام القلتو ليهو وقلت ليهو خلصت ؟ هز لي راسو وطوالي مشيت منو .
لبست نظارتي وطلعت تلفوني اتصلت لهيثم قبل انضم معاهو قال لي اهلاً يا مستر اها خلصت ؟ قلت ليهو م عارف اقول ليك شنو ؟ قال لي في شنو يازول ؟ قلت ليهو مصدع شديد والله لاقيني وجيب معاك بندول قال لي ياساتر خلاص تمام خمسه دقائق بس وبكون معاك .... ركبت العربيه ودورك وسايق بسرعه كإني م شايف غيري في الطريق ،، وانا مخي مزحوم بالأفكار وصلت محلنا المعتاد " جنب البحر والمغرب عل. وشك وقفت العربيه ونزلت لقيت هيثم واقف وبعاين للمويه بتمعن اول ما جيت اتلفت عاين لي ومد لي الكيس الفي يدو شلتو منو ومشيت ورا شجرة من الشجر الجنب البحر غيرت ملابسي وجيت ،، قال لي وهو بعاين للبحر ارح انجز ابوك رسل ليك شنو المره دي وترك كدا ؟ وقفت وختيت يديني في جيوبي وقلت ليهو المره دي م ابوي .. عاين لي بإستغراب وقال لي اذا م ابوك منو الملكه ضايقتك ؟ هجت فيهو وقلت ليهو م تجيب لي سيرتها وانا بحكي ليك عن ناس البلد .
قال لي خلاص خلاص احكي وختى اصبعو على خشمو نظام ح اسكت ... شلت نفس عميق وقلت ليهو " اتخيل امي الجات السوق وقالت ابوي مريض شديد وخايفين يكون نفس مرض عمي وطالب حضوري وقال لو م جيت م بعفى مني " قال لي طيب وانت ح تعمل شنو ؟ عاينت ليهو وبنبرة غضب قلت ليهو انا لو عارف اعمل شنو بتصل ليك ؟! انت ما عارف إني م بقدر امشي هناك وفي نفس الوقت م بقدر اكمل بدون رضى ابوي انا اهم حاجه عندي ابوي دا واهلي انا سلكت الطريق دا عشانهم