رواية غدر وقدر الفصل الرابع4 بقلم دانيا
صلوا على النبي......
قالت لي عندك كلام شكلك شلت نفس عميق وقلت ليها ااي في حاجه داير اقولها ليكي وانا لسه بعاين ليها والتوتر ظاهر في وشي ، قالت لي قول طوالي اي حاجه عاوز تقولها لي م تتردد فيها نحن واحد اتشجعت وقلت ليها انا داير امشي البلد كم يوم وصلني خبر إنو ابوي عيان شديد والله على الأقل اشوفو لي منو خمسه سنه ،، من سمعت كلامي دا فكت يدي وقبل ترد لي الجرسون جاء جاب الأكل سكتت بعد ختاهو ومشى كنت منتظر ردها سكتت مسافه وهي ساندة ضهرها على الكرسي وبتعاين لي .... بعدها قالت لي الموضوع دا م نتناقش فيهو تاني ناس بيتكم ماكلين وشاربين ولابسين وابوك كان مرض يودوهو المستشفى انت م دكتور ،، انت العليك ترسل ليهم المصارف وبس .
كلامها خلى الدم يغلي في عروقي بس مسكت اعصابي اصلاً اتوقع منها شنو غير كدا ؟!.
قلت ليها صاح مصاريفهم واصله وماكلين وشاربين لكن ابوي كبر في العمر وزيادة على المرض عاوز يشوف ولدو وقال لي لو م جيت م عافي ليك وانا اي حاجه ولا رضى ابوي ... قبل ترد لي الجرسون جاب الأكل ختاهو ،، عاينت لي مسافه وبعدين قالت لي اكل في اللحظه دي اتمنين اصمتها كف قلت ليها خلينا في المهم .. رفعت راسها عاينت لي وقالت لي كم يوم ؟ قلت ليها بتعجب اا زي عشرة يوم لأنو من هنا يومين في الطريق ومن هناك يومين ،، بعد مسافه قالت لي طيب .
للحظه حسيت بالفرح من جوا لأنها م اعترضت قبل فرحتي تكمل قالت لي بعد اسبوع قلت ليها اسبوع ؟! قالت لي ااي نسيت بعد بكرة في قروش المفروض تمشي تبدلها بدولارات ؟ ياداب اتزكرت الموضوع قلت ليها والله الموضوع طلع من بالي والزول لسه م ظهر علي زاتو م ممكن اخلي المهمه دي لمستر H ؟ ردت بنبره حادة قالت لي لا انت عارف في موضوع التسليم دا م بثق في غيرك !! قلت ليها تمام .
عند غفران:
قاعده بعد العشاء بزكر امي جات عاينت لي قالت لي امتحاناتكم دي م بتنتهي هي ؟ قلت ليها ياامي بسم الله هي اصلاً م بدت عشان تنتهي قالت يومي شايله كتابك وبتقري معزبه نفسك كدي .... حسيت بكلامها زعلني رغم إنها امي وم مفروض ازعل منها جات إلهام بت عمي داخله وامي مشت على المطبخ ،، عاينت ليها وقلت ليها شكلك جايبه شمار !! ضحكت وقالت لي دا حد كلامك سمعت ابوي بقول لأمي إبراهيم رسل رساله وإستلمها الناجي صاحبو وقال جاي في الأيام الجايه دي ... قلت ليها بطريقه مستفزه ما يجي كان جاء قالت لي انتي جاهزة ؟ عاينت ليها بإستغراب وقلت ليها لشنو ؟ ابتسمت وختت يدها على خشمها وقالت لي مافي حاجه يلا انا مرسلني ومرقت فاتت خلتني في حيرة قلت دي جنت ولشنو .
نزلنا امتحانات والحمد لله عدت على خير بس في آخر يوم المدرسه قلبت بيت بكاء لأنو اغلب البنات عارفين مصيرهم شنو وعارفين يمكن تاني م نتلاقى ومتأكدين إنو قليل الحأيمشو المدينه يكملو تعليمهم بس الاغلبيه م ح يقدرو يخشو الثانوي بسبب المجتمع وقلة الحيله .... رجعت