رواية غدر وقدر الفصل الخامس5 بقلم دانيا
صلوا على النبي......
ودعت صديقتي البحبها شديد ورجعت البيت جيت داخله بعد الظهر البيت كان هادي بقيت بنادي لأمي م ردت علي قلت معناها مافيشا مشيت غيرت ملابسي وطلعت على المطبخ لقيت معتز في وشي سألتو قلت ليهو امي وينا ؟ قال لي من بعد الفطور مشت على بيت عمي قلت ليهو عافيه ؟ قال لي يعني م عارفه ؟ ابراهيم جاي بكره ،، قلت ليهو م عارفه خلي اللآمه ومشيت منو .
عند إبراهيم :
مشيت السوق مع هيثم اشتريت حاجات لناس البيت وشلناهم وديناهم موقف الباصات قطعت تزكره وخليتها مع هيثم قلت ليهو تعال بكره الصباح بدري جيبها لي ،، ومشيت مكتب تاني قطعت تزكرة خليتها معاي وقلت لهيثم م تنسى الإتفقنا عليهو .. قال لي على عيني قلت ليهو صحي جاي البيت متين على اساس ح تستلم عني لمن انا اجي ؟! قال لي يازول هوي انا العندي م مكفيني جايين تزيدوني انت والملكه تبعك كفايه إني واقف ليكم حرس في المخزن تاني دايرين شنو ؟ ضحكت وقلت ليهو دي الأوامر كدا يا مستر ومشيت خليتو متغاظ .
وصلت البيت لمن دخلت الغرفه اتفاجأت وقت لقيت كيسين كبار مختوتات في نص الغرفه ومعاهن شنطه للحظه قلبي رجف قلت معقولة قررت الشيطانه دي تمشي معاي ؟! قاطع تفكيري صوتها وهي جايه من برا قالت لي " جهزت ليك حاجات بسيطه لناس البيت هدايه وكدا والشنطه دي رتبت ليك فيها هدومك ... اتلفت عاينت ليها وكانت مبتسمه قلت في نفسي " ياالله من وين جابت اللطافه دي فجأة ؟ هدايه م تكون متفجرات " !! بتسائل مع نفسي طوالي هي مشت على الأكياس فتحتهن وبقت تطلع في الحاجات وتوريني فيهن ابتسمت ومشيت قعدت جنبها قلت ليها ليه متعبه نفسك كدا ياقلب م كان تتعذبي والله .
قالت لي معقولة عذاب شنو دا واجبي شوف التوب دا مش حلو ؟ دا اخترتو لأمك وعاين الجلابيه دي .... بقت توريني ليهن وانا بقول ليها حلوين شديد ذوقك جميل زيك ياجميل ،، خلت الحاجات وانتكت على كتفي وقالت لي ياريت لو م تمش .
للحظه اتشرقت قلت ليها انا زاتي م بتمنى ابعد عنك لكن يلا كلها عشرة يوم وتاني منك م بتحرك ،، في قلبي قلت ليها إن شاء الله تاني م اشوف وشك دا تاني .
قلت ليها لكن في حاجه مهمه عاوزك تعرفيها رفعت راسها وقالت لي شنو ؟ قمت وقفت وقلت ليها بتردد " المايك والمسدس م بقدر اشيلهم معاي " وقبل ترد لي قلت ليها وبتمنى تفهميني فجأة اتغيرت ملامح وشها من زوله بشوشة لملامح جاده وحاده ،، قلت ليها دقيقه م تفهمي غلط لكن انتي عارفه شغلنا الشغالنو دا خطر علينا في روحنا خلي اهلنا انا مكان اهلي دا نسمة الهواء م عاوزها تعرفو ... عاينت لي بغضب وقالت لي دا كلامك ؟ اتصل لصاحبك المستر ،، استغربت شديد وقلت ليها لشنو ؟ قالت لي اتصل وطلعت برا .
اتصلت ليهو وبقيت قاعد في الغرفه مسافة ربع ساعه جاء واتصل لي قال لي انا تحت قمت طلعت برا سلمت ليهو وقعدنا في الهول طوالي هي جات قعدت معانا ،، حصل هدوء لعدة دقائق وبعدها كسرت الهدوء وقالت لي " صاحبك ح يكون قاعد معانا هنا لمن انت ترجع وإذا م جيت في زمنك اتأكد راس مالو طلقه ،، للحظه اتهجمت من طريقة كلامها وعاينت ليهو هو الكان بعاين لي وباين على وشو التوتر ... قلت ليها معقولة يا مرام ثقه مافي ؟ صرت وشها وقالت لي مافي وقامت مشت .
الصباح لميت الحاجات وقمت طالع مسكت فيني وبقت تبكي قالت لي م تمش قلت ليها م تخافي راجع ليكي مسكت يدي شديد وبعد مسافه وتحنيس حتى طلعت منها .... وصلني السواق للموقف وبعد مشى مني طوالي غيرت إتجاهي ومشيت موقف تاني الأنا اصلاً قطعت منو التزكره السلمتها لهيثم مشيت لبتاع المكتب قلت ليهو امبارح صاحبي جاب ليك التزكره خلاها لي عندك هنا قال لي بإسم منو ؟ قلت ليهو إبراهيم الطيب ،، طلعها من الدرج اداني ليها شلتها ومشيت حمامات السوق غيرت ملابسي وعندي شنطه راكنها في السوق مع الحاجات الإشتريتهم امس شلتهم والحاجات الجابتهم لي هي ركنتهم ورا الحمامات ولبست نظارتي وطلعت مشيت ركبت الباص ... اقل من ربع ساعه الباص دور كانت الساعه 8 ص مسافة الطريق كانت سته ساعات .
كنت حاسي بالملل شديد لأني م شايل معاي تلفون خليت التلفون في البيت بحجة البلد م فيها شبكه " م عاوز اي وسيله تخليهم يصلو لي " . وصلت الساعه وحده ظهر ومن السوق اجرت كارو حمار للبيت ،، طول الطريق وانا بتمعن في منظر القريه كيف خليتها وكيف بقت وحلاوة الجو الطبيعي ،، كل ما امر بناس بعاينو لي زي الكلمه الشاذة .
اول ما وصلت البيت لاقوني اولاد عمي الصغار معاز ومعتز جاريين سلمو علي بالحضن وبقو يكوركو إبراهيم جاء إبراهيم جاء ... اخواتي الصغار من سمعن جن جاريات ياخ انا إبتسام دي خليتها بترضع م معقولة طولت للدرجه دي قعدت تحت حضنتهم وياداب حسيت بشيء من الفرح والإطمئنان إني شفت اهلي بعد السنين دي كلها ،، اول ما خشيت جوا مسكتني امي وبقت تبكي بقيت بهدي فيها إنو م تبكي للحظه قربت ابكي معاها جاء ابوي طالع سلم علي من شفتو م قدرت م ابكي .
بعد سلمت عليهم جات مرت عمي كوثر سلمت علي والبيت اتملا ناس كل ما اعاين إني وسط اهلي بحس بفرحه كبيرة شديد .
عند غفران :
كنت قاعدة وسامعه اصوات الناس بسلمو وناس ببكو بس قلت يلا بعد يخفو بمش بسلم عليهو او بكره امشي م فرقت جاني معتز قال لي انتي قاعده هنا بتعملي شنو امي قالت ليكي قومي تعالي سلمي ... اتأفأفت وقلت ليهو جاء من لندن ؟ ماخلاص بعدين بجي بسلم عليهو هارب هو ؟ حمر لي عيونو وقال لي م تتلائمي وقومي طيري امي نادتك تقولي ليها م جايه ،، صريت وشي وقمت من السرير لبست اقرب توب جنبي وطلعت مشيت لقيتهم قاعدين في ظل العصر .
إبراهيم وعمي ومعاهم اتنين كدا من الحي نهائي م رفعت عيني عاينت ليهو بس قلت ليهم السلام عليكم ردو لي السلام ... سلمت عليهو وقلت ليهو حمد لله على السلامه ومشيت منهم ،، مشيت لناس امي في المطبخ من شافني البنات بقن يتهامسن