رواية غدر وقدر الفصل التاسع9 بقلم دانيا
#غــــدِر_و_قـــــدّر
#البــــارت9
#بقلـــم_دانيـــا
صلوا على النبي......
ام مرام كانت واقفه بتصلي في المغرب ومرام كانت كالعاده بتلعب لعبتها المفضله " الشرطه والحرامي " وكانت شايله مسدس ابوها وجايه نازله من السلم جري وهي بتقول اقيف مكانك اقيف مكان ياحرامي احسن ليك واثناء ما امها رافعه من الركوع مرام داست على الزناد والطلقه طلعت منو بإتجاه امها واصابتها في صدرها ومرام من الخلعه بقت ترجف ورمت المسدس وامها خلاص وقعت في محلها .
ابوها كان في الغرفه من سمع صوت الضرب جاء جاري وقف مصدوم لمن شاف الأم واقعه والبت واقفه بترجف والمسدس مرمي جنب رجلها ... جرى على الأم قعد جنبها وهو بحاول يتحسس نبضها ويصحي فيها بس للأسف لقاها ماتت ،، قعد على الأرض مخلوع من الحاصل وعيونو بقن يشوفن ضلام .
فجأة سمع صوت طقطقه في الباب بقى يعاين للمرا ويعاين للبت وراسو جايط بالأفكار ومن دون تفكير كتير جرى شال المسدس من جنب مرام ومسحو بقميصو وجابو مسكو للأم في يدها وجرى فتح الباب لقاهم ديل الجيران فتح الباب وهو ايديه برجفن الناس دخلو واتخلعوا من المنظر ،، اتصلوا للشرطه جات رفعت الجثه وحققت في الموضوع معاهو وسجنوهو شهر وبعدها طلع برآءة والقضيه اتصنفت قضية إنتحار .
إبراهيم :
بقيت بعاين ليها مافي في راسي غير قصة امها قلت خلاص التاريخ ح يعيد نفسه واثناء ما انا واقف فجأة اتلفتت علي وبقت تعاين لي قالت لي متين طلعت تعال شوف وبقت تعاين لي وتعاين للمسدس مشيت عليها بخطوات مثقله وقفت قدامها وقلت ليها دا شنو ؟ رغم إني شايفو دا شنو رفعتو في وضعية الإستعداد وقالت لي ببرود " دا مسدس ابوي " قلت ليها بصوت متردد اا ااي عارفو مسدس ابوكي لكن قصدي الزكرك بيهو شنو الليله ؟! عاينت لي بعيونها الكلهن شر ديل وقالت لي " ساي بس يمكن في يوم اضطر ادافع عن نفسي " من كلامها دا ياداب قلبي رجف حسيتها قاصدة حاجه عاينت ليها بإستغراب وقلت ليها تدافعي ليه انا وين ؟.
ضحكت وقامت على حيلها مشت على الدولاب وقالت لي عارفه إنك موجود لحمايتي لكن انا قصدي بغيابك يعني وفتحت الدولاب ودخلتو جوا ... شلت نفس عميق وحاولت اهدأ قلت ليها ايوااه فكرة ممتازة .
الصباح جهزت وقمت طالع جات داخله قالت قلت اكيد كالعادة ح تركب لي جهاز التجسس بقيت واقف بعاين ليها قالت لي ورح اشرب الشاي عاينت ليها بإستغراب كانت طالعه من الغرفه وقفت واتلفتت علي وابتسمت وقالت لي انت كبرت على الحاجات دي ... وهي طلعت وانا بقيت مصدوم وم مصدق بعد مسافه مشيت وراها قعدت وهي جات مدت لي الشاي وقالت لي جمله خلتني اتأكد إنها بالجد عندها مرض نفسي قالت لي "انا بثق فيك يا قلب " للحظه حسيت هم وزاح من قلبي ابتسمت وقلت ليها الحمد لله .
طلعت مشيت على السوق واتصلت لهيثم قلت ليهو لاقيني سريع قال لي تمام ،، اول ما وصلت الكافتيريا هيثم جاني قال لي شنو يا بوس مالك من الصباح كدا ؟ كنت قاعد وخالف رجلي وساند ضهري على الكرسي صلحت قعدتي وطلعت النظارة واشرت ليهو على الكرسي بمعني اقعد .. قعد وهو بعاين لي منتظرني اتكلم ،، شلت نفس عميق وعاينت ليهو ومن دون مقدمات قلت ليهو " انا عرست تاني " من الصدمه فتح عيونو قدر الفنجان وبقى يعاين لي وغلبو التعبير ، بعد مسافه بدأ يستوعب كلامي قال لي عملت شنو ؟؟! قبلت منو وضربت يدي مع التربيزة وقلت ليهو عرست ياخ عرست في البلد .
بقى يتلفت زي المجنون في المكان م عرفتو بفتش في شنو قال لي اسكت دا كلام شنو تعرس تاني كيف يعني ؟ قلت ليهو كدي انت اهدأ عشان تفهم وبديت احكي ليهو الحاصل ... لمن قلت ليهو لكن اول ما دخلت الغرفه ولقيتها قاعده كنت مقرر اتفاهم معاها واشرح ليها اني م دايرها وبعد ارجع هنا ح اطلقها ،، قال لي عملت الصاح اها إن شاء الله فهمت ؟ عاينت ليهو بأسف وقلت ليهو لكن م قدرت اكلمها عاين لي بإستغراب وقال لي ليه مالك م فهمتها اتأفأفت وبزهج قلت ليهو " صعفت يا هيثم " ضربني في يدي وقال لي انت غبي يازول حمار انت ضعفت كيف يعني يخرب بيتك انت في وضع يسمح ليك تضعف .
الشيطانه القاعدة هنا دي م اتزكرتها ول المسكينه ديك زنبها شنو معاك دنقرت مسافه وبقيت بس بسمع في توبيخاتو وبعدين قلت ليهو كدي هسي دا م وقت الكلام الكتير الإنسان بضعف مالي انا عملت جريمه يعني ؟ معرس لي واحده هنا اهلي م قادر اوريهم بيها ومحرم علي إني انجب منها اولاد مجرمه زي دي بسوي بيهم شنو انا وم تنسى ديك بت عمي ولو م المصايب الحصلت معانا دي ما كان مصيري ارجع هناك واتزوجها .... عاين لي بأسف وقال لي لكن م بالطريقه دي .
حصل هدوء فجأة لا هو اتكلم ولا انا اتكلمت اي واحد فينا شرد في افكارو وبعدها قاطعت الهدوء دا وقلت ليهو انا جايبك تساعدني م عشان تحسسني بالذنب وتكرهني عيشتي ،، عاين لي وقال اساعدك كيف ؟ قلت ليهو عاوزك تهتم بموضوع التحويلات وتلقي الرسائل البتجيني من هناك وكل شيء انا ح اقطع تواصلي بناس البلد لفترة م عايزهم يعرفو عني اي شيء ولو بتقول لبتاع التحويلات م يستلم رسائل بكون احسن ... كل العليهو يرسل القروش فقط ،، هز راسو وقال لي والله دي عوجه دي لكن خير يازول .
غفران:
بعد إبراهيم سافر بقيت محتاره اقعد في بيت عمي هنا او ارجع لناس امي بهناك قمت مشيت لأمي اتكلمت معاها قالت لي لالا خليكي هناك في بيت عمك ... مرت الأيام بسرعه والنتيجه ظهرت واخيراً مشى معتذ جاب لي خبرها جاء فرحان وبكورك من برا طلعت ليهو الكلام دا بعد الظهر قلت ليهو اها قول بسرعه ،، عاين لي وبقى ينطط قال لي جبتي 250 للحظه من الفرح قعدت ابكي جن بنات عمي يزغردن وباركن لي قلت ليهم بكرا بقول لعمي يرسل رساله لإبراهيم يوريهو ،، لمن بقت بكره المساء عمي جاء من الشغل بعد صلى المغرب وجاء سألتو ،، قال لي والله يابتي م عارف اقول ليكي شنو لكن ناس التحويلات قالوا منعوا الرسائل