رواية شلة بنات الفصل الاول 1 والثاني 2 بقلم شذى عبدالمكرم
_ نوسة خلينا نطلع من الجامعة قبل ما اشوف العارض دا
__ والله حرام عليكي الولد بحبك وشوفي جاري وراكي كيف
_ ياااخ انا ما دايرة يعني غصب احبو
__ ما عارفة الما عاجبك فيهو شنو ود كاريزمة وحليوة . وقامت ضحكت
_ ربطتيهو خلاص
__ والله لو بعاين لي بربطو . ضحكنا واتحركنا على بوابة الجامعة
_ نوسة خففي رجلك شوية
__ اكتر من كدا؟ ياااخ ما تجرينا ما حنلقى
_ والله قلبي حاسس انو...... . ما تميت كلامي سمعت صوتو وراي وهو بناديني
__ روز . غمض عيوني شديد وبحاول اتحكم في اعصابي التفت وانا ضاغطة على اسناني
روز: نعم . وملامحي جامدة
نوسة: روز انا في البوابة تمام . مسكتها من اسكريتيها بس جريتو بالراحة مني ومشت خلتني معاهو بقيت اسب ليها في سري اخدت نفس واتنهدت
روز: نعم يا سام
سام: فكرتي في كلامي
روز: سام قولت ليك انا قراري واحد ما حأغيريو لا يعني لا
سام: انا عاوز فرصة وحدة بس
روز: للاسف ما بقدر . ومشيت خليتو لقيت نوسة واقفة لي برا مسكتها خبطتها لمن شفيت غليلي حتى ركبنا الموصلات ورجعنا الحي انا وايناس حينا واحد وصحبات من الثانوي غشيت الدكان الجنبنا و رجعت البيت وفتحتو بمفاتيحي لقيت التوأم في الحوش بلعبو بالحبل رابطينو في عمود المظلة
روز: رايس لفي فوق . عملت ذي ما قولت ليها ختيت شنطتي في اقرب كرسي وجيت جارية ودخلت وبقيت انط لمن عمل لي ضربات طلعت ورايس ووقفت اللف وجوني الاتنين جاريين
رايس وريل: روز حبيبة جوز اللوز . بقيت اضحك دايما بقولو لي كدا والجوز قصدهم انفسهم
روز: انتو يا جوز اللوز كيفكم
الاتنين: تمام
روز: رايس جيبي لي شنطتي . جرت جابتو لي طلعت ليهم مصاصات كالعادة
روز: امي جات؟
رايس: لسع . شيلت شنطتي ودخلت غيرت وصليت ونومت
اليوم التاني مشيت الجامعة مع نوسة وبعد المحاضره اجتمعت مع الشلة كلها نحنا ستة بنات فطرنا وقعدنا نتونس
هديل: طبعا خبر الموسم انفصلنا انا وحمزة
روز: بالمرة كدا ولا ذي كل مرة تنفصلو بالليل واليوم التاني برجعك
هديل: لا المرة دي جادة وخلاص تاني كم ركع قدامي ما دايرة
روز: لالا تمام
قمر: وانتي يا روز عملتي شنو مع سام
روز: ما تركزيني بالله موش طريتي هسي حيجي حيااا انا . قامت ضحكت
قمر: قلبك قاسي
روز: قلبي ما قاسي بس مليان
نوسة: بأخوي ولا شنو
روز: طبعا يا مرت اخوي . وضحكنا مكرشة على اخوها وهي مكرشة على اخوي بس الاتنين ما معبرينا بقينا نتونس
روز: ماشة الكافيريا في وحدة عاوزة حاجة
هديل : جيبي لي موية
روز: تمام
نوسة: خليني امشي معاكي . ومشينا الكافتيريا ....
________
نبأ : ما عارفة روز دي بتفتري على شنو
قمر: وين الافتراء
نبأ : ما شايفين شايفة روحها على شنو ما عارفة
ريان: بالنسبة؟
نبأ: مجرية الولد وراها ذي الشنو وما عارفة عاجبو فيها شنو بس
هديل: حي هي ما دايرة تعمل ليهو شنو مثلا تربطو غصب . ريان لوت خشمها وسكتت
قمر: انتي مشكلتك معاها شنو روز وحدة قلبها طيب
نبأ: والله دا ليكم انتو بس والله خبيثة منها ماف
قمر: هووس جايين علينا . سكتو وروز ونوسة رجعو
رجعنا من الكافتيريا حسيت كأنو في حاجة لانو لمن كنا راجعين شايفاهم بتناقشو من جينا سكتو ما اشتغلت بالموضوع كتير
لمن خلصنا وراجعين البيت شوفت سام من بعيد طوالي لفيت سريع وجريت نوسة من ايدها لمن نوسة استغربت فيني دخلنا في زحمة بنات وطلعنا معاهم وفهمتها الحصل ورجعنا
موضوع سام دا زاد عن حدو مكرهني الجامعة عديل كدا ياااخ انا ما دايرة احبو غصب يعني ولا شنو والله اسمو ساي بعمل لي طمام قررت بكرة امشي الجامعة احسم الفارغة دي
2
الصباح اصبح وانا شايلة نية لسام دا طلعت لمن نوسة اتصلت لي عشان نمش الجامعة
نوسة: مالك رابطة وشك من الصباح كدا
روز: الليلة حأحسم الفارغة بتاعت سام دا
نوسة: ناوية تعملي شنو
روز: كل خير حبيبتي ما تخافي
نوسة: كدا يداب خوفت . ضحكنا ومشينا الجامعة بعد المحاضرات وقفت في شجرة منتظرة سام يظهر وكنت عارفة حألقاهو وهو لو شافني براي حيجيني ودا الحصل فعلا جاني
سام: روز ليه واقفة براكي وين ايناس . عاينت ليهو باستغراب هو شغلتو شنو اقيف براي ولالا
روز: دا ما بخصك وبتعرف ايناس من وين
سام: دا سؤال ليكي
روز: سام انا رفضتك كم مرة
سام: امممم دقيقه . بقى يحسب بأصابعو وانا مستغربة فيهو
سام: تقريبا تمانية تسعة مرة كدا . عضيت شفتي من الزعل
روز: ودي المرة العاشرة والاخيرة
سام: انتي لو اديتيني فرصة حتخسري؟
روز: حأخسر كتير عشان كدا شوف وحدة غيري لانو كدا حتضيع وقتك معاي بس ما اكتر
سام: انا ما عميان من باقي البنات
روز: اووف يا سام اعمل ليك شنو بس عشان تريحني
سام: واقفي بس او اقول ليكي فكري في كلامي دا ما تتسرعي
روز: تمام حأفكر
سام: وانا ما عاوز اكتر من كدا . مشيت خليتو جيت بحاجة ورجعت بحاجة مشيت للشلة
روز: اووووف ياااخ اووف
نوسة: اكيد بدل تقنعي اقنعك صح؟ . عاينت ليها مسافة وضحكت كلهم ضحكو
قمر: البشوفك وانتي منفوخة وداقة صدرك قبل ما تمشي ما يشوفك هسي وانتي راجعة . ضحكنا
روز: ايي اتريقو ساي . شايفة نبأ ما عاجبة الوضع ما ركزت معاها
ريان: خلونا نكتب الاسايمنت
روز: والأوراق
ريان: انا بمشي بجيبو من كشك عمو عيسى
روز: جيبي لي معاكي رصيد
ريان: تمام . وقامت مشت.......
____________
ريان قامت مشت كشك عمو عيسى عشان تشيل اوراق للاسايمنت
ريان: عمو اديني اوراق A4 . جا ولد وقف جنبها
الولد: حاج عيسى اوراق A4 عالسريع كدا . عمو عيسى جاب الاوراق
عمو عيسى: والله دي اخر اوراق
الولد: اديني ليهو . ريان التفت ليهو برفعة حاجب
ريان: لا بالله وانا هنا واقفة عبث ودايرة دكوة صح؟ . عاين ليها بأستغراب
ريان: عمو عيسى انا اتكلمت اول
الولد: بس انا محتاجو ضروري شديد
ريان: وانا دايرة اشرطو صح؟
الولد: مالك قبيحة كدا
ريان: انت الما عندك ذوق نهائي . وقعدو يتناقشو في منو حيشيل الاوراق لمن سمعو واحد بنادي
الواحد: ريان . الاتنين في نفس الوقت
الاتنين: نعم . رجعو عاينو لبعض باستغراب وتاني قالو في نفس الزمن
ريان: انت اسمك ريان؟
الولد: انتي اسمك ريان؟
الاتنين: ايي . عاينو لبعض بخلعة وضحكو
ريان: لا بالجد اسمك ريان؟
الولد: اي والله اسمي ريان وانتي اصدميني انو اسمك ريان
ريان: اتخيل بس . رجعو ضحكو وهم مستغرين . صاحب ريان قرب منو
هشام: ريان من قبيل بتعمل شنو
ريان الشب : بتناقش مع ريان
هشام: كيف يعني
ريان الشب: مع ريان دي . واشر لي هشام عاين ليهو بمعنى كذاب
هشام: اسمك ريان؟
ريان البت: ايي
ريان الشب: خلاص عشان الصدفة الحلوة دي حاخلي ليكي الاوراق
ريان البت: لالا على اساس انا كنت حأخليهو ليك كدا . قام ضحك
ريان الشب: لسانك طويل
ريان: ذي طولك دا . هشام صحبو ضحك
ريان الشب: استغفر الله هشام ورح . ومشو ريان شالت الاوراق ورجعت للبنات......
____________
قعدنا منتظرين ريان تجيب الاوراق عشان نبدأ نكتب تلفون هديل رن عاينت فينا
روز: ردي ما تخلي ابو النسب ينتظر . قامت ضحكت وقامت مشت مننا بعيد عرفت انو حمزة صالحها ريان جات راجعة
روز: وين الرصيد
ريان: حي نسيت والله
روز: ومن قبيل بتعملي شنو
ريان: خلوني احكي ليكم الحصل معاي . وحكت لينا موقفها مع ريان قتلنا بالضحك ما صدقنا الا حلفت
روز: ريان وريان كلام عجيب
ريان: انا للان ما قادرة اصدق
انتظرنا هديل خلصت وجات
روز: قمر قولتي لي شنو لو ركع قدامي ما برجع ليهو تاني
قمر: بس دا حمزة يا روز كمان ما بقدر
هديل: ايي زلوني
روز: لازم ازلك كدا يا مرت حمزة
هديل: والله حاولت اتجاوز بس صالحني بطريقة حلوة . ضحكنا فيها لانو قالتو بخجل كدا
روز: بطريقة حلوة قولتي لي لا تمام ربنا يخلي لينا حمزة البصالح بطريقة حلوة . وضحكنا وكتبنا الاسايمنت و جينا الصباح سلمناهو........